ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܩܽܘ̈ܠܳܣܳܝܶܐ
ܓ: ܝܚ ـ ܟܗ܇ ܕ: ܐ ـ ܕ Colossians 3:18-25, 4:1-4

ܢܶܫ̈ܶܐ ܐܶܫܬܰܥܒܰܕܶܝ̈ܢ ܠܒܰܥܠܰܝ̈ܟܶܝܢ܆ ܐܰܝܟ ܕܙܳܕܶܩ ܒܰܡܫܺܝܚܳܐ. ܓܰܒܪ̈ܶܐ ܐܰܚܶܒܘ ܢܶܫܰܝ̈ܟܽܘܢ܆ ܘܠܳܐ ܬܶܗܘܽܘܢ ܡܰܪܺܝܪܺܝܢ ܥܠܰܝܗܶܝܢ. ܒܢܱ̈ܝܳܐ ܐܶܫܬܰܡ̱ܥܘ ܠܐܒܳܗܰܝ̈ܟܽܘܢ ܒܟܽ‍ܠܡܶܕܶܡ. ܗܳܟܰܢܳܐ ܓܶܝܪ ܫܰܦܺܝܪ ܩܕܳܡ ܡܳܪܰܢ. ܐܰܒܳܗ̈ܶܐ ܠܐ ܬܰܪܓܙܽܘܢ ܒܢܰܝ̈ܟܽܘܢ܆ ܕܠܐ ܢܶܬܬܥܺܝܩܽܘܢ. ܥܰܒ̈ܕܶܐ ܐܶܫܬܰܡ̱ܥܘ ܒܟܽ‍ܠܡܶܕܶܡ ܠܡܳܪ̈ܰܝܟܽܘܢ ܕܦܰܓܪܳܐ܆ ܠܐ ܒܡܰܚܙܶܐ ܥܰܝܢܳܐ ܐܰܝܟ ܗܳܢܽܘܢ ܕܫܳܦܪܺܝܢ ܠܰܒܢܰܝ̈ܢܳܫܳܐ܇ ܐܶܠܐ ܒܠܶܒܳܐ ܦܫܺܝܛܳܐ ܘܰܒܕܶܚܠܬܗ ܕܡܳܪܝܳܐ. ܘܟܽ‍ܠ ܕܥܳܒܕܺܝܢ ܐܢ̱ܬܘܢ܆ ܡܶܢ ܟܽ‍ܠܳܗ̇ ܢܰܦܫܟܽܘܢ ܥܒܶܕܘ܇ ܐܰܝܟ ܕܰܠܡܳܪܰܢ ܘܠܳܐ ܐܰܝܟ ܕܠܰܒܢܰܝ̈ܢܳܫܳܐ. ܘܕܰܥܘ ܕܡܶܢ ܡܳܪܰܢ ܡܩܰܒܠܺܝܬܘܢ ܦܽܘܪܥܳܢܳܐ ܒܝܳܪܬܽܘܬܳܐ. ܠܡܳܪܝܳܐ ܓܶܝܪ ܡܫܺܝܚܳܐ ܦܳܠܚܺܝܬܘܢ. ܡܰܣܟ‍ܠܳܢܳܐ ܕܶܝܢ ܡܶܬܦܪܰܥ܆ ܐܰܝܟ ܡܶܕܶܡ ܕܰܐܣܟܶ‍ܠ. ܘܠܰܝܬ ܡܰܣܰܒ ܒܰܐܦ̈ܶܐ. ܡܳܪ̈ܰܝܳܐ ܥܒܶܕܘ ܫܰܘܝܽܘܬܐ ܘܟܺܐܢܽܘܬܐ ܠܘܳܬ ܥܰܒܕܰܝ̈ܟܽܘܢ. ܘܰܗܘܰܝܬܘܢ ܝܳܕܥܺܝܢ܆ ܕܳܐܦ ܠܟܽܘܢ ܐܺܝܬ ܗܽܘ ܡܳܪܳܐ ܒܰܫܡܰܝܳܐ. ܒܰܨܠܽܘܬܐ ܐܶܬܰܐܡ̱ܢܘ. ܘܰܗܘܰܝܬܘܢ ܥܺܝܪܺܝܢ ܐܢ̱ܬܽܘܢ ܒܳܗ̇. ܘܡܰܘܕܶܝܢ. ܘܰܡܨܰܠܶܝܢ ܐܳܦ ܥܠܰܝܢ܆ ܕܰܐܠܳܗܳܐ ܢܶܦܬܚ ܠܰܢ ܬܰܪܥܳܐ ܕܡܶܠܬܐ܇ ܠܰܡܡܰܠܳ‍ܠܽܘ ܐ̱ܪܳܙܳܐ ܕܰܡܫܺܝܚܳܐ ܕܡܶܛܽܠܳܬܗ ܐܰܣܺܝܪ ܐ̱ܢܳܐ܇ ܕܰܐܓ‍ܠܝܶܘܗܝ ܘܶܐܡܰܠ‍ܠܺܝܘܗܝ ܐܰܝܟܰܢܳܐ ܕܘܳܠܶܐ ܠܺܝ܀