ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܪ̈ܽܗܘܡܳܝܶܐ
ܒ: ܒ ـ ܝܔ Romans 2:2-13

ܘܝܳܕܥܺܝܢܰܢ ܕܺܐܝܬܘܗܝ ܕܺܝܢܶܗ ܕܰܐܠܗܳܐ ܒܩܽܘܫܬܐ܇ ܥܰܠ ܐܰܝܠܶܝܢ ܕܰܒܗܳܠܶܝܢ ܡܶܬܗܰܦܟܺܝܢ. ܡܳܢܳܐ ܕܶܝܢ ܡܶܬܚܰܫܰܒ ܐܰܢ̱ܬ ܐܳܘ ܒܰܪܢܳܫܳܐ܇ ܕܕܳܐܷܢ ܐܰܢ̱ܬ ܠܰܐܝܠܶܝܢ ܕܰܒܗܳܠܶܝܢ ܡܶܬܗܰܦܟܺܝܢ܇ ܟܰܕ ܐܳܦ ܐܰܢ̱ܬ ܒܗܶܝܢ ܡܶܬܗܰܦܰܟ ܐܰܢ̱ܬ܆ ܕܰܐܢ̱ܬ ܬܶܥܪܽܘܩ ܡܶܢ ܕܺܝܢܶܗ ܕܰܐܠܗܳܐ. ܐܰܘ ܥܰܠ ܥܽܘܬܪܳܐ ܕܒܰܣܺܝܡܽܘܬܶܗ ܘܥܰܠ ܡܰܓܪܰܬ ܪܽܘܚܶܗ܇ ܘܥܰܠ ܐܰܬܪܳܐ ܕܝܰܗܒ ܠܳܟ. ܡܰܡܪܰܚ ܐܰܢ̱ܬ܆ ܘܠܳܐ ܝܳܕܰܥ ܐܰܢ̱ܬ ܕܒܰܣܺܝܡܽܘܬܗ ܕܰܐܠܗܳܐ ܠܰܬܝܳܒܽܘܬܰܐ ܗ̱ܘ ܡܰܝܬܝܳܐ ܠܳܟ. ܐܶܠܳܐ ܡܶܛܽܠ ܩܰܫܝܽܘܬ ܠܶܒܳܟ ܕܠܳܐ ܬܳܐܷܒ܆ ܣܳܐܷܡ ܐܰܢ̱ܬ ܠܳܟ ܣܺܝܡܬܐ ܕܪܽܘܓܙܳܐ ܠܝܰܘܡܳܐ ܕܪܽܘܓܙܳܐ ܘܰܠܓܶ‍ܠܝܳܢܳܐ ܕܕܺܝܢܳܐ ܟܺܐܢܳܐ ܕܰܐܠܗܳܐ܇ ܗܰܘ ܕܦܳܪܰܥ ܠܟܽܠܢܳܫ ܐܰܝܟ ܥܒܳܕܰܘ̈ܗ̱ܝ. ܠܰܐܝܠܶܝܢ ܕܒܰܡܣܰܝܒܪܳܢܽܘܬܐ ܕܰܥ̈ܒܳܕܶܐ ܛܳܒ̈ܶܐ܇ ܬܶܫܒܽܘܚܬܐ ܘܺܐܝܩܳܪܳܐ ܘܠܳܐ ܡܶܬܚܰܒܠܳܢܽܘܬܐ ܒܳܥܶܝܢ܆ ܝܳܗܶܒ ܠܗܽܘܢ ܚܰـ̈ܝܶܐ ܕܰܠܥܳܠܰܡ. ܐܰܝܠܶܝܢ ܕܶܝܢ ܕܥܳܨܶܝܢ ܘܠܳܐ ܡܶܬܛܦܺܝܣܺܝܢ ܠܰܫܪܳܪܳܐ܇ ܐܶܠܳܐ ܠܥܰܘܠܐ ܡܶܬܛܦܺܝܣܺܝܢ܆ ܢܶܦܪܽܘܥ ܐܶܢܽܘܢ ܪܽܘܓܙܳܐ ܘܚܶܡܬܳܐ ܘܽܐܘܠܨܳܢܳܐ ܘܛܽܘܪܳܦܳܐ. ܠܟܽܠ ܒܰܪܢܳܫ ܕܦܳܠܰܚ ܒܺܝ̈ܫܳܬܐ. ܠܺܝܗܽܘ̈ܕܳܝܶܐ ܠܽܘܩܕܰܡ ܘܠܰܐܪ̈ܡܳܝܶܐ. ܬܶܫܒܽܘܚܬܐ ܕܶܝܢ ܘܺܐܝܩܳܪܳܐ ܘܰܫܠܳܡܳܐ܆ ܠܟܽܠ ܕܦܳܠܰܚ ܛܳـ̈ܒܳܬܐ. ܠܺܝ̈ܗܽܘܕܳܝܶܐ ܠܽܘܩܕܰܡ ܘܠܰܐܪ̈ܡܳܝܶܐ. ܠܳܐ ܓܶܝܪ ܐܺܝܬ ܡܰܣܰܒ ܒܰܐܦܷ̈ܐ ܠܘܳܬ ܐܰ‌ܠܗܳܐ. ܐܰܝܠܶܝܢ ܓܶܝܪ ܕܰܕܠܳܐ ܢܳܡܽܘܣܳܐ ܚܛܰܘ܆ ܐܳܦ ܕܠܳܐ ܢܳܡܽܘܣܳܐ ܢܺܐܒܕܽܘܢ. ܘܰܐܝܠܶܝܢ ܕܰܒܢܳܡܽܘܣܳܐ ܚܛܰܘ܆ ܡܶܢ ܢܳܡܽܘܣܳܐ ܢܶܬܕܺܝܢܽܘܢ. ܠܳܐ ܗ̱ܘܳܐ ܓܶܝܪ ܫܳܡܽܘܥܰܘ̈ܗ̱ܝ ܕܢܳܡܽܘܣܳܐ ܟܺܐܢܺܝܢ ܩܕܳܡ ܐܰܠܗܳܐ܆ ܐܶܠܐ ܥܳܒܽܘܕܰܘܗ̈ܝ ܕܢܳܡܽܘܣܳܐ ܡܶܙܕܰܕܩܺܝܢ܀