ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܩܳܘܪ̈ܺܝܢܬܳܝܶܐ ܐ
ܝܘ: ܝܓ ـ ܟܕ 1Corinthians 16:13-24

ܐܶܬܬܥܺܝܪܘ ܘܩܽܘܡܘ ܒܗܰܝܡܳܢܽܘܬܐ. ܐܶܬܓܰܒܰܪܘ ܐܶܬܚܰܣܰܢܘ. ܘܟܽ‍ܠܗܶܝܢ ܨܶܒܘ̈ܳܬܟܽܘܢ ܒܚܽܘܒܳܐ ܢܶܗ̈ܘܝܳܢ. ܒܳܥܶܐ ܐܢܳܐ ܕܶܝܢ ܡܶܢܟܽܘܢ ܐܰܚܰـ̈ܝ܆ ܥܰܠ ܒܰܝܬܐ ܕܶܐܣܛܶܦܰܢܰܐ. ܡܶܛܽܠ ܕܝܳܕܥܺܝܢ ܐܢ̱ܬܽܘܢ ܕܗܶܢܽܘܢ ܐܶܢܽܘܢ ܪܺܫܺܝܬܐ ܕܰܐܟܰܐܝܰܐ܇ ܘܣܳܡܘ ܢܰܦܫܗܽܘܢ ܠܬܶܫܡܶܫܬܐ ܕܩܰܕܺܝ̈ܫܶܐ. ܕܳܐܦ ܐܰܢ̱ܬܘܢ ܬܶܗܘܽܘܢ ܡܶܫܬܰܡܥܺܝܢ ܠܰܐܝܠܶܝܢ ܕܗܳܟܰܢܳܐ ܐܶܢܽܘܢ. ܘܰܠܟܽ‍ܠܢܳܫ ܕܠܳ‍ܐܶܐ ܥܰܡܢ ܘܰܡܥܰܕܰܪ. ܚܳܕܶܐ ܐ̱ܢܳܐ ܕܶܝܢ ܒܡܶܐܬܺܝܬܶܗ ܕܶܐܣܛܶܦܰܢܰܐ ܘܰܕܦܳܪܛܽܘܢܰܛܳܘܣ ܘܕܰܐܟܰܐܝܺܩܳܘܣ. ܕܡܶܕܶܡ ܕܒܰܨܰܪܬܘܢ ܠܘܳܬܝ ܗܶܢܽܘܢ ܡܰܠܺܝܘ. ܐܰܢܺܝܚܘ ܓܶܝܪ ܪܽܘܚܝ ܕܺܝܠܝ ܘܕܺܝܠܟܽܘܢ. ܗܘܰܝܬܽܘܢ ܗܳܟܺܝܠ ܡܶܫܬܘܕܥܺܝܢ ܠܰܐܝܠܶܝܢ ܕܗܳܟܰܢܳܐ ܐܶܢܽܘܢ. ܫܳـ̈ܐܠܳܢ ܒܰܫܠܳܡܟܽܘܢ ܥܺـ̈ܕܳܬܐ ܟܽ‍ܠܗܶܝܢ ܕܒܰܐܣܺܝܰܐ. ܫܳܐܠܺܝܢ ܒܰܫܠܳܡܟܽܘܢ ܣܰܓܺܝ ܒܡܳܪܰܢ܆ ܐܰܩܶܠܳܘܣ ܘܰܦܪܺܝܣܩܺܠܰܐ ܥܰܡ ܥܺܕ̱ܬܐ ܕܰܒܒܰܝܬܗܽܘܢ. ܫܳܐܠܺܝܢ ܒܰܫܠܳܡܟܽܘܢ ܐܰܚܰܝ̈ܢ ܟܽ‍ܠܗܽܘܢ. ܫܰܐܠܘ ܒܰܫܠܳܡܳܐ ܚܰܕ ܕܚܰܕ ܒܢܽܘܫܰܩܬܐ ܩܰܕܺܝܫܬܐ. ܫܠܳܡܳܐ ܒܰܟ‍ܬܳܒܰܬ ܐܻܝܕܳܐ ܕܺܝܠܝ ܕܦܰܘܠܳܘܣ. ܡܰܢ ܕܠܳܐ ܪܳܚܶܡ ܠܡܳܪܰܢ ܝܶܫܽܘܥ ܡܫܺܝܚܳܐ ܢܶܗܘܶܐ ܚܪܶܡ. ܡܳܪܰܢ ܐܶܬܳܐ. ܛܰܝܒܽܘܬܗ ܕܡܳܪܰܢ ܝܶܫܽܘܥ ܡܫܺܝܚܳܐ ܥܰܡܟܽܘܢ܆ ܘܚܽܘܒܝ ܥܰܡ ܟܽ‍ܠܟܽܘܢ ܒܰܡܫܺܝܚܳܐ ܝܶܫܽܘܥ܀