ܬܡܝܢܝܐ

ܐ: ܠܒܰܝܬܳܟ ܐܶܬܰܝܢܰܢ ܡܳܪܝܳܐ. ܘܶܐܬܛܰܝܰܒܢܰܢ ܕܰܢܩܰܪܶܒ ܠܳܟ ܬܰܟܫܶܦܬܳܐ. ܒܡܰܥܪ̈ܳܒܰܝ ܫܶܡܫܳܐ. ܐܰܕܢܰܚ ܢܽܘܗܪܳܐ ܕܦܽܘܩܕܳܢܰܝ̈ܟ. ܒܠܶܒܰܘ̈ܳܬܰܢ ܕܢܶܬܢܰܗܪ̈ܳܢ ܒܳܟ ܢܰܦ̈ܫܳܬܰܢ. ܝܳܗܽܘܒܳܐ ܕܚܰܝ̈ܶܐ ܦܰܣܶܩ ܢܶܫܒܰܘ̈ܗ̱ܝ ܕܰܢܟܺܝܠܳܐ. ܒܥܶܠܕܒܳܒܳܐ ܕܰܠܗܺܝܩܽ ܗ̱ܘ ܠܡܰܘܒܳܕܽܘܬܰܢ: ܒܪܽܘܫܡܶܗ ܕܰܨܠܺܝܒܳܐ. ܡܰܟܶܟ ܫܽܘܥܠܳܝܶܗ. ܐܰ‌ܠܳܗܳܐ ܕܰܐܢ̱ܬܽ ܗ̱ܘ ܐܺܝܬܰܝܟ: ܠܡܺܐܢܳܐ ܕܰܡܛܰܪ̈ܦܶܐ܀

ܐܚܪܢܐ

ܒ: ܢܶܬܕܟܰܪ ܟܽܠܰܢ ܠܡܰܘܬܳܐ. ܗܰܘ ܕܰܓܙܺܝܪ ܥܰܠ ܓܶܢܣܰܢ. ܘܰܠܣܳܣܳܐ ܕܰܡܚܰܒܶܠ ܘܰܠܬܰܘܠܥܳܐ ܕܠܳܐ ܡܳܝܬܳܐ. ܢܶܬܕܟܰܪ ܠܗܰܘ ܫܽܘܢܳܩܳܐ: ܡܰܪܺܝܪܳܐ ܘܰܕܠܳܐ ܪ̈ܰܚܡܶܐ. ܐܰܝܟܳܐ ܕܒܶܟܝܳܐ ܡܰܡܠܶܟ. ܪܰܒܳܐ ܘܚܽܘܪܳܩ ܫܶܢ̈ܶܐ. ܚܶܫܽܘܟܳܐ ܓܙܺܝܡ ܘܰܠܚܺܝܡ. ܘܚܰܪܒܳܐ ܕܢܽܘܪܳܐ ܠܛܺܝܫܳܐ. ܘܘܳܝܳܐ ܪܰܒܳܐ ܬܰܡܳܢ ܠܚܰܛܳܝ̈ܶܐ ܕܕܳܡܶܝܢ ܠܺܝ. ܠܳܐ ܡܳܪܝ. ܬܶܫܕܶܝܢܝ ܡܶܢ ܒܶܝܬ ܓܢܽܘܢܳܟ: ܡܶܛܽܠ ܥܒܳܕܰܝ̈ ܒܺܝ̈ܫܶܐ ܕܣܶܥܪܶܬ. ܐܶܠܐ ܒܝܰܕ ܦܰܓܪܳܟ ܘܰܕܡܳܟ. ܬܶܟܪܶܐ ܠܳܟ ܥܰܠ ܫܰܦܠܽܘܬܝ. ܘܠܰܓܢܽܘܢܳܟ ܗܰܘ ܕܰܠܥܳܠܰܡ: ܐܰܫܘܳܢܝ ܐܳܘ ܛܳܒܳܐ ܐܳܦ ܪܳܚܶܡܢܳܫܳܐ܀

ܐܚܪܢܐ

ܓ: ܚܰܢܳܢܳܐ ܕܕܳܡܶܐ ܠܰܐܒܽܘܗ̱ܝ: ܡܳܪܳܐ ܕܥܺܝܪ̈ܶܐ ܡܫܰܡܫܺܝܢ ܠܶܗ. ܚܽܘܣ ܥܰܠ ܦܰܓܪ̈ܶܐ ܕܥܰܢܺܝ̈ܕܶܐ ܕܰܒܠܺܝܘ ܒܰܚܒܳܠܳܐ ܕܰܫܝܽܘܠ. ܛܰܠܳܐ ܕܪ̈ܰܚܡܶܐ ܘܕܰܚܢܳܢܳܐ: ܪܽܘܣ ܒܰܐܦܰܝ̈ܗܽܘܢ ܒܗܰܘ ܝܰܘܡܳܐ. ܕܦܰܓܪܳܟ ܐܶܟܰܠܘ: ܘܰܕܡܳܟ ܐܶܫܬܺܝܘ ܓܺܗܰܢܳܐ ܠܗܽܘܢ ܠܳܐ ܬܶܩܪܽܘܒ. ܕܠܳܟ ܡܳܪܝ ܫܩܰܠܘ ܒܗܰܕܳܡܰܝ̈ܗܽܘܢ. ܒܗܰܘ ܥܶܕܳܢܳܐ ܦܳܪܽܘܩܰܢ. ܚܽܘܣ ܥܰܠ ܣܳܓܕܰܝ̈ ܠܰܨܠܺܝܒܳܟ܀

ܐܚܪܢܐ

ܕ: ܩܒܽܘܪܬܶܗ ܕܰܡܫܺܝܚܳܐ ܡܰܠܟܰܢ. ܚܰܝ̈ܶܐ ܗܘܳܬ ܠܰܒܢܰܝ̈ܢܳܫܳܐ. ܐܶܠܘܠܳܐ ܕܰܒܓܰܘ ܩܰܒܪܳܐ ܠܳܐ ܐܶܬܬܣܺܝܡ ܗ̱ܘܳܐ. ܬܰܪ̈ܥܶܐ ܪ̈ܳܡܶܐ ܕܦܰܪܕܰܝܣܳܐ ܠܳܐ ܐܶܬܦܬܰܚܘ ܗ̱ܘܰܘ: ܒܗܽܘܢ ܡܳܪܝ ܐܰܢ̱ܬ ܐܰܢܺܝܚ ܠܢܰܦ̈ܫܳܬܳܐ ܕܥܰܒܕܰܝ̈ܟ: ܕܰܫܟܶܒܘ ܥܰܠ ܣܰܒܪܳܟ܀