ܡܥܺܝܪܳܢܳܐ ܕܠܺܠܝܳܐ

ܒܓܽܘܕ̈ܶܐ ܪ̈ܽܘܚܳܢܳܝܳܬܳܐ ܘܩܰܕܺܝ̈ܫܳܬܳܐ ܘܰܒܟܶܢ̈ܫܶܐ ܠܳܐ ܗܽܘ̈ܠܳܢܳܝܶܐ ܕܰܕܠܳܐ ܫܶܠܝܳܐ ܡܫܰܒܚܺܝܢ ܠܳܟ܆ ܚܰܠܶܛ ܠܰܢ ܡܳܪܝܳܐ ܠܰܒܨܺܝܪ̈ܶܐ ܥܰܒܕܰܝ̈ܟ. ܘܠܳܐ ܒܝܰܕ ܫܶܢܬܳܐ ܕܡܰܗܡܝܳܢܽܘܬܳܐ ܘܕܰܚܛܺܝܬܳܐ ܢܶܬܢܰܟܪܶܐ ܘܢܶܬܕܚܰܩ ܡܶܢ ܟܶܢ̈ܫܶܐ ܩܰܕܺܝ̈ܫܶܐ ܕܰܡܫܰܒܚܳܢܰܝ̈ܟ ܪ̈ܽܘܚܳܢܳܝܶܐ. ܐܶܠܳܐ ܓܶܕ ܘܰܐܦܶܩ ܠܰܢ ܡܶܢ ܚܶܫܽܘܟܳܐ ܕܰܚܛܺܝܬܳܐ ܘܥܰܡܛܳܢܳܐ ܕܛܳܥܝܽܘܬܳܐ ܘܡܶܢ ܠܳܐ ܝܺܕܰܥܬܳܐ ܠܺܝܕܰܥܬܳܐ ܕܰܫܪܳܪܳܐ. ܘܰܛܪܽܘܕ ܡܶܢܰܢ ܠܝܽܘܩܪܳܐ ܕܫܶܢܬܳܐ ܘܰܠܡܰܐܺܝܢܽܘܬܳܐ ܕܬܰܪܥܺܝܬܳܐ. ܘܰܒܥܺܝܪܽܘܬܳܐ ܘܰܒܙܰܗܝܽܘܬܳܐ ܙܗܺܝܬܳܐ ܐܰܫܘܳܐ ܠܰܢ ܕܰܢܩܰܪܶܒ ܠܳܟ ܬܶܫ̈ܒܚܳܬܳܐ ܕܠܳܐ ܫܰܠܘܳܐ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ܀

ܚܽܘܬܳܡܳܐ ܓܰܘܳܢܳܝܳܐ

ܒܬܰܪܥܳܐ ܕܪ̈ܰܚܡܰܝܟ ܢܳܩܶܫ ܐ̱ܢܳܐ. ܐܺܝܬܝܳܐ ܕܥܳܡܰܪ ܒܢܽܘܗܪܳܐ ܓܰܐܝܳܐ ܗܰܘ ܕܠܶܓܝܽܘ̈ܢܶܐ ܕܰܣܪ̈ܳܦܶܐ ܠܳܐ ܡܰܡܪܚܺܝܢ ܠܡܶܬܩܰܪܳܒܽܘ ܠܰܫܟܺܝܢܬܶܗ. ܗܰܘ ܕܳܐܠܶܦ ܐܰܠ̈ܦܺܝܢ ܘܪܶܒܽܘ ܪ̈ܶܒܘܳܢ ܕܡܰܠܰܐܟ̈ܶܐ ܠܳܐ ܡܨܶܝܢ ܠܡܰܨܳܕܽܘ ܒܙܺܝܘܳܐ ܕܬܶܫܒܽܘܚܬܶܗ. ܐܰܢ̱ܬ ܡܳܪܝ̱ ܦܬܰܚ ܠܳܗ̇ ܬܰܪܥܳܐ ܠܰܨܠܽܘܬܝ̱ ܘܢܶܬܩܰܒ̈ܠܳܢ ܫ̈ܶܐܠܳܬܝ̱ ܩܕܳܡ ܡܳܪܽܘܬܳܟ. ܘܗܰܒܠܺܝ ܡܶܢ ܒܶܝܬ ܓܰܙܳܟ ܥܰܬܺܝܪܳܐ ܚܰܕ ܫܳܡܽܘܢܳܐ ܙܥܽܘܪܳܐ܆ ܕܶܐܣܰܒܰܥ ܒܶܗ ܟܰܦܢܽܘܬܝ̱ ܘܶܐܦܰܝܶܓ ܒܶܗ ܨܰܗܝܽܘܬܝ̱. ܝܰܡܳܐ ܕܪ̈ܰܚܡܶܐ ܘܕܰܚܢܳܢܳܐ ܝܶܫܽܘܥ ܡܫܺܝܚܳܐ ܡܰܥܬܰܪ ܟܽܠ ܕܰܨܪܺܝܟܺܝܢ܆ ܙܠܽܘܥ ܒܺܝ ܫܶܦ̈ܥܶܐ ܕܛܰܝܒܽܘܬܳܟ. ܒܳܟ ܢܶܬܠܰܚ̈ܝܳܢ ܣܰܟܠ̈ܘܳܬܝ̱.

ܐܺܝܢ ܡܳܪܝ̱ ܫܡܰܥ ܨܠܽܘܬܝ̱ ܘܩܰܒܶܠ ܒܳܥܽܘܬܝ̱ ܘܰܐܢܗܰܪ ܚܶܫܽܘܟܽܘܬܝ̱܆ ܘܰܐܫܘܳܢܝ̱ ܕܶܐܬܒܰܣܰܡ ܒܬܶܗܪܳܐ ܕܺܝܕܰܥܬܳܐ ܕܰܡܕܰܒܪܳܢܽܘܬܳܐ ܕܺܝܚܺܝܕܳܝܳܐ ܒܪܳܟ ܡܳܪܰܢ ܘܰܐܠܳܗܰܢ ܝܶܫܽܘܥ ܡܫܺܝܚܳܐ. ܐܳܘ ܐܰܒܳܐ ܛܳܒܳܐ ܘܡܳܪܳܐ ܡܪܰܚܡܳܢܳܐ ܓܳܡܰܪ ܟܽܠ ܘܰܡܩܰܕܶܫ ܟܽܠ. ܪܽܘܚܳܐ ܩܰܕܺܝܫܳܐ ܐܰܠܳܗܳܐ ܕܰܫܘܶܐ ܒܽܐܘܣܺܝܰܐ ܠܰܐܒܳܐ ܘܠܰܒܪܳܐ܆ ܩܰܕܶܫܰܝܢܝ̱ ܒܪܽܘܚܳܦܳܟ ܘܕܰܟܳܢܝ̱ ܒܙܽܘܦܶܗ ܕܰܚܢܳܢܳܟ. ܬܠܺܝܬܳܝܳܐ ܐܰܠܳܗܳܐ ܫܰܪܺܝܪܳܐ ܕܰܬܠܺܝܬܳܐܺܝܬ ܡܶܫܬܰܒܰܚ ܘܰܠܚܽܘܕܳܐܺܝܬ ܡܶܬܬܰܘܕܶܐ܆ ܓܡܽܘܪ ܠܰܢ ܒܺܝܕܰܥܬܳܟ ܘܚܰܟܶܡ ܗܶܕܝܽܘܛܽܘܬܰܢ ܒܢܳܛܽܘܪܽܘܬ ܢܳܡܽܘ̈ܣܰܝܟ ܕܢܰܘܕܶܐ ܠܳܟ ܘܰܢܫܰܒܚܳܟ ܒܟܽܠܙܒܰܢ܆ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ܀