ܕܪܰܡܫܳܐ

ܡܳܪܝܳܐ ܐܰܠܳܗܳܐ ܕܺܝܠܰܢ ܗܰܘ ܥܰܬܺܝܪ ܒܫܽܘܒܩܳܢܳܐ ܘܡܰܬܺܝܢ ܠܘܳܬ ܡܰܟܣܳܢܽܘܬܳܐ܆ ܗܰܘ ܚܽܘܒܳܐ ܪܰܒܳܐ ܘܠܳܐ ܡܶܬܡܰܫܚܳܢܳܐ ܘܓܰܙܳܐ ܪܰܒܳܐ ܕܛܳܒܽܘܬܳܐ܆ ܫܰܡܠܳܐ ܠܰܢ ܡܳܪܝ̱ ܒܚܽܘܒܳܐ ܕܡܶܢ ܠܘܳܬܳܟ ܘܰܡܠܺܝ ܠܰܢ ܚܽܘܒܳܐ ܕܰܐܠܳܗܽܘܬܳܟ. ܐܺܝܢ ܫܰܪܺܝܪܳܐ ܘܩܰܕܺܝܫܳܐ ܡܳܪܝܳܐ܆ ܡܠܺܝ ܠܶܫܳܢܰܢ ܫܪܳܪܳܟ ܘܢܰܦܫܰܢ ܗܰܝܡܳܢܽܘܬܳܐ ܬܪܺܝܨܰܬ ܫܽܘܒܚܳܐ ܕܒܳܟ܆ ܘܦܰܓܪܰܢ ܢܰܩܕܽܘܬܳܐ ܘܕܰܟܝܽܘܬܳܐ ܘܩܰܕܺܝܫܽܘܬܳܐ ܘܛܳܒܽܘܬܳܐ. ܐܺܝܢ ܗܰܘܢܳܐ ܪܰܒܳܐ ܕܰܠܟܽܠ ܗܰܘܢܺܝ̈ܢ ܡܰܢܗܰܪ܆ ܐܰܢܗܰܪ ܠܗܰܘܢܳܐ ܕܺܝܠܰܢ ܗܰܘ ܕܰܒܨܰܠܡܳܟ ܡܰܬܩܰܢ ܒܢܽܘܗܪܳܐ ܡܝܰܬܪܳܐ ܘܡܰܠܟܳܝܳܐ ܕܝܰܕ̈ܥܳܬܳܐ ܐܰܠܳܗܳܝ̈ܳܬܳܐ܆ ܐܰܝܟܰܢܳܐ ܕܰܒܢܰܗܺܝܪܽܘܬ ܗܰܘܢܳܐ ܕܡܶܢ ܟܽܠ ܚܶܫܽܘܟܽܘܬܳܐ ܕܛܽܘܥܝܰܝ ܡܰܒܥܕܳܐ ܢܫܰܒܚܳܟ ܘܰܢܪܰܡܪܡܳܟ ܘܰܢܝܰܩܰܪ ܫܡܳܟ ܣܓܺܝܕ ܡܶܢ ܟܽܠ ܠܥܳܠܡܺܝܢ܀

ܚܽܘܬܳܡܳܐ

ܒܳܥܶܝܢܰܢ ܡܶܢܳܟ ܡܳܪܝܳܐ ܐܰܠܳܗܳܐ ܘܰܡܦܺܝܣܺܝܢܰܢ ܠܰܚܢܳܢܳܟ܆ ܕܰܬܩܰܒܶܠ ܡܶܢܰܢ ܠܬܶܫܡܶܫܬܳܐ ܗܳܕܶܐ ܕܰܩܕܳܡܰܝܟ ܫܰܡܠܺܝܢܰܢ. ܘܫܰܟܶܢ ܠܰܢ ܡܶܢܳܗ̇ ܥܽܘܕܪ̈ܳܢܶܐ ܘܛܰܝ̈ܒܘܳܬܳܐ ܕܪܽܘܚܳܟ ܩܰܕܺܝܫܳܐ ܗܳܠܶܝܢ ܕܒܳܗ̇ ܠܰܢ ܡܶܫܬܰܟܢܺܝܢ ܒܝܰܕ ܡܰܓܢܳܢܽܘܬܳܐ ܕܺܝܠܶܗ܆ ܕܢܰܘܕܶܐ ܠܳܟ ܘܰܢܫܰܒܚܳܟ ܠܥܳܠܰܡ ܥܳܠܡܺܝܢ܀