ܬܠܳܬܫܳܥܺܝ̈ܢ
ܕܡܳܪܝ ܓܪܺܝ̣ܓܳܘܪܺܝܳܘܣ ܕܩܽܘܦܪܽܘܣ

ܝܳܕܰܥ ܟܰܣ̈ܝܳܬܳܐ ܕܠܶܒܰܘ̈ܳܬܳܐ ܕܟܽܠܗܽܘܢ ܒܢܰܝ̈ܢܳܫܳܐ܆ ܐܰܬܩܶܢ ܗܶܠ̈ܟܳܬܝ̱ ܒܰܫܒܺܝ̈ܠܰܝܟ ܕܠܳܐ ܢܶܫܬܰܠܰܛ ܒܺܝ ܒܥܶܠܕܒܳܒܝ̱. ܘܰܒܚܽܘܪ ܡܳܪܝ̱ ܒܢܽܘܪܳܐ ܕܚܽܘܒܳܟ ܘܰܕܪܶܚܡܬܳܟ. ܘܰܒܩܺܝ ܟܽܘܠ̈ܝܳܬܝ̱ ܘܠܶܒܝ̱. ܘܕܰܟܳܗ̇ ܠܢܰܦܫܝ̱ ܘܰܨܪܽܘܦܺܝܗ̇ ܒܣܰܡܳܐ ܬܡܺܝܗܳܐ ܕܪ̈ܰܚܡܰܝܟ. ܢܶܗܘܶܐ ܠܺܝ ܡܳܪܝ̱ ܚܽܘܒܳܟ ܩܰܕܺܝܫܳܐ ܟܽܘܪܳܐ ܒܳܚܽܘܪܳܐ ܘܪܶܚܡܬܳܟ ܕܒܶܗ ܢܽܘܪܳܐ ܕܝܳܩܕܳܐ ܘܚܳܒܳܐ ܒܓܰܪ̈ܡܰܝ. ܘܢܺܐܩܕܽܘܢ ܒܓܰܘܳܗ̇ ܟܽܠܗܽܘܢ ܐܰܬܪ̈ܰܘܳܬܳܐ ܚܰܪ̈ܒܶܐ ܗܳܠܶܝܢ ܕܰܡܦܰܟܪ̈ܳܢ ܚܰܩ̈ܠܳܬܳܐ ܕܰܒܗܽܘܢ ܒܟܽܘ̈ܒܶܐ ܘܰܒܝܰܥܪܳܐ ܕܟܽܠ ܓܢܶܣ ܕܰܚܛܺܝܬܳܐ. ܘܶܐܦܽܘܩ ܡܶܢܶܗ ܡܳܐܢܳܐ ܓܰܒܝܳܐ ܘܝܰܩܺܝܪܳܐ ܐܰܝܢܳܐ ܕܥܳܗܶܢ ܠܰܚܫܰܚܬܳܐ ܕܡܳܪܽܘܬܳܟ ܘܰܡܛܰܝܰܒ ܠܫܽܘܡܠܳܝܳܐ ܕܨܶܒܝܳܢܳܟ. ܡܫܰܒܰܚ ܐܰܢ̱ܬ ܡܳܪܝܳܐ ܠܥܳܠܡܺܝܢ܀

ܚܽܘܬܳܡܳܐ

ܪܳܡܳܐ ܘܰܡܥܰܠܝܳܐ ܘܰܫܒܺܝܚܳܐ ܡܳܪܝܳܐ. ܩܰܕܺܝܫܳܐ ܕܰܒܩܰܕܺܝ̈ܫܶܐ ܡܶܬܬܢܺܝܚ. ܩܰܕܶܫ ܠܰܢ ܒܥܶܕܳܢܳܐ ܗܳܢܳܐ ܕܩܳܪܶܝܢܰܢ ܠܳܟ ܘܰܒܟܽܠ̈ܥܶܕܳܢܺܝܢ ܒܢܰܦܫܳܐ ܘܰܒܗܰܘܢܳܐ ܕܒܳܟ ܡܨܰܠܡܺܝܢ ܘܰܠܦܰܓܪܳܐ ܕܶܐܬܚܰܝܰܕ ܠܗܽܘܢ ܒܦܽܘܩܕܳܢܳܟ. ܘܫܰܪܰܪ ܠܰܢ ܒܗܰܝܡܳܢܽܘܬܳܐ ܬܪܺܝܨܰܬ ܫܽܘܒܚܳܐ ܘܰܒܢܳܛܽܘܪܽܘܬ ܦܽܘ̈ܩܕܳܢܶܐ ܕܺܝܠܳܟ ܡܰܚ̈ܝܳܢܶܐ. ܦܰܓܶܕ ܚܽܘ̈ܫܳܒܰܝܢ ܘܗܶܪ̈ܓܰܝܢ ܒܕܶܚܠܬܳܐ ܕܺܝܠܳܟ ܘܙܰܘ̈ܥܰܝܢ ܘܪ̈ܶܓܫܰܝܢ ܒܢܳܡܽܘ̈ܣܰܝܟ ܪ̈ܽܘܚܳܢܳܝܶܐ ܘܢܶܗܘܶܐ ܠܳܟ ܥܰܡܳܐ ܩܰܕܺܝܫܳܐ ܘܟܶܢܫܳܐ ܦܪܺܝܩܳܐ ܘܟܽܘܗܳܢܳܐ ܡܰܠܰܐܟܳܝܳܐ ܕܰܡܨܰܒܰܬ ܒܚܽܘܒܳܟ ܘܒܰܫܪܳܪܳܟ. ܘܢܶܣܓܽܘܕ ܘܰܢܫܰܒܰܚ ܠܳܟ ܒܪܽܘܚܳܐ ܘܒܰܫܪܳܪܳܐ ܘܠܺܝܚܺܝܕܳܝܳܐ ܒܪܳܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀