ܕܰܬܫܰܥܫܳܥܺܝ̈ܢ
ܕܡܳܪܝ ܐܺܝܣܚܳܩ ܕܢܺܝܢܘܶܐ

ܡܫܺܝܚܳܐ ܕܡܺܝܬܬ ܚܠܳܦܰܝܢ ܒܚܽܘܒܳܟ܆ ܐܰܢ̱ܬ ܐܰܡܺܝܬܰܝܢܝ̱ ܠܰܚܛܺܝܬܳܐ ܘܰܐܫܠܰܚ ܡܶܢܝ̱ ܠܒܰܪܢܳܫܳܐ ܥܰܬܺܝܩܳܐ܆ ܕܰܒܚܽܘܕܳܬܳܐ ܕܪܶܥܝܳܢܳܐ ܐܶܩܽܘܡ ܩܕܳܡܰܝܟ ܒܟܽܠܥܶܕܳܢ܆ ܐܰܝܟ ܕܰܒܥܳܠܡܳܐ ܚܰܕܬܳܐ. ܐܰܠܳܗܳܐ ܕܰܫܡܰܝܳܐ ܘܰܫ̈ܡܰܝ ܫܡܰܝܳܐ ܠܳܐ ܡܣܰܝܟܺܝܢ ܠܶܗ܆ ܐܶܗܘܶܐ ܥܽܘܡܪܳܐ ܠܚܽܘܒܳܟ ܕܰܒܡܶܬܪܰܓܫܳܢܽܘܬܶܗ ܛܥܰܘ ܩܰܕܺܝ̈ܫܶܐ ܝܳܬܗܽܘܢ ܘܰܗܘܰܘ ܫܰܢܺܝܺܐܝܢ ܒܳܬܪܳܟ. ܘܰܒܟܽܠܥܶܕܳܢ ܒܳܟ ܐܶܬܚܰܠܰܛܘ̱ ܒܪܰܘܳܝܽܘܬܗܽܘܢ ܕܰܒܪܶܚܡܬܳܟ. ܘܠܳܐ ܬܽܘܒ ܗܦܰܟܘ̱ ܠܒܶܣܬܰܪܗܽܘܢ ܡܶܢ ܕܶܐܫܬܺܝܘ ܡܶܢ ܡܰܒܽܘܥܳܐ ܗܳܢܳܐ ܚܰܠܝܳܐ. ܘܕܰܨܗܺܝܘ ܠܚܽܘܒܳܟ ܒܬܶܗܪܳܐ ܕܐ̱ܪ̈ܳܙܰܝܟ ܐܰܪܘܺܝܬ ܐܶܢܽܘܢ܀

ܚܽܘܬܳܡܳܐ ܕܝܽܘܚܰܢܳܢ ܚܰܙܳܝܳܐ

ܫܽܘܒܚܳܐ ܠܳܟ ܡܫܺܝܚܳܐ ܡܳܪܰܢ ܗܰܘ ܡܫܰܠܡܳܢܳܐ ܒܟܽܠܡܶܕܶܡ. ܕܪܰܒܽ ܗ̱ܘ ܚܽܘܒܳܟ ܘܰܡܪܰܝܡܳܐ ܓܡܺܝܪܽܘܬܳܟ ܒܟܽܠ. ܘܡܰܢܽܘ ܡܰܘܦܶܐ ܠܳܗ̇. ܚܽܘܣ ܡܳܪܝ̱ ܥܰܠ ܚܰܝܰܝ̈ܢ ܕܒܰܕܡܳܟ ܝܰܩܺܝܪܳܐ ܙܒܺܝܢܺܝܢܰܢ ܠܳܟ. ܘܢܰܛܰܪ ܢܰܦ̈ܫܳܬܰܢ ܩܕܳܡܰܝܟ ܕܠܳܐ ܢܶܟܝܳܢܳܐ ܘܫܰܡܠܳܐ ܥܰܡܰܢ ܛܰܝܒܽܘܬܳܟ. ܚܰܝܶܠ ܡܳܪܝ̱ ܠܰܡܚܺܝܠܽܘܬܰܢ ܘܰܐܚܠܶܡ ܠܰܟܪܺܝܗܽܘܬܰܢ܆ ܕܢܶܗܘܶܐ ܟܽܠܰܢ ܓܽܘܫܡܳܐ ܚܠܺܝܡܳܐ ܠܬܶܫܒܽܘܚܬܳܟ܆ ܘܟܽܠ ܚܰܝ̈ܠܺܝܢ ܕܡܰܩܪܒܺܝܢ ܥܰܡܰܢ. ܚܰܝܠܳܟ ܢܠܰܘܶܐ ܠܰܢ ܠܽܘܩܒܰܠܗܽܘܢ. ܘܠܳܟ ܡܫܺܝܚܳܐ ܙܰܟܳܝܳܐ ܢܶܬܠܰܘܶܐ ܓܡܺܝܪܳܐܺܝܬ. ܘܡܶܕܶܡ ܡܶܢ ܢܶܩܦܶܗ ܕܚܽܘܒܳܟ ܠܳܐ ܢܶܪܚܩܰܢ. ܫܪܳܪܳܟ ܕܶܝܢ ܡܳܪܝ̱ ܗܽܘ ܢܶܥܡܰܪ ܒܰܢ ܘܚܽܘܒܳܟ ܢܶܫܪܶܐ ܒܰܢ ܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ܆ ܐܰܡܺܝܢ܀