ܡܥܺܝܪܳܢܳܐ ܕܠܺܠܝܳܐ

ܐܰܥܺܝܪ ܡܳܪܝ̱ ܕܰܡܟܽܘܬܰܢ ܡܶܢ ܛܽܘܒܳܥܳܐ ܕܰܚܛܺܝܬܳܐ ܕܢܰܘܕܶܐ ܠܥܺܝܪܽܘܬܳܟ܆ ܥܺܝܪܳܐ ܕܠܳܐ ܕܳܡܶܟ. ܘܰܐܚܳܐ ܠܡܺܝܬܽܘܬܰܢ ܡܶܢ ܫܶܢܬܳܐ ܡܛܰܒܥܳܢܺܝܬܳܐ ܕܡܰܘܬܳܐ ܘܕܰܚܒܳܠܳܐ ܕܢܶܣܓܽܘܕ ܠܰܚܢܳܢܳܟ܆ ܚܰܝܳܐ ܕܠܳܐ ܡܳܐܶܬ. ܘܰܐܫܘܳܐ ܠܰܢ ܕܥܰܡ ܟܶܢ̈ܫܶܐ ܫܡܰܝܳܢ̈ܶܐ ܫܒܺܝܚܳܐܺܝܬ ܢܫܰܒܚܳܟ. ܫܒܺܝܚܳܐ ܓܶܝܪ ܘܰܡܫܰܒܚܳܐ ܐܺܝܬܰܝܟ ܥܰܡ ܐܰܒܽܘܟ ܘܪܽܘܚܳܟ ܩܰܕܺܝܫܳܐ ܗܳܫܳܐ ܘܰܠܥܳܠܡܺܝܢ܀

ܨܠܽܘܬܳܐ ܕܡܳܪܝ ܡܰܩܰܪܺܝܣ ܐܰܠܶܟܣܰܢܕܪܳܝܳܐ

ܡܒܰܝܳܐܢܳܐ ܕܟܽܠ ܒܡܺܐܡܪܶܗ܆ ܒܰܝܰܐ ܢܰܦ̈ܫܳܬܰܢ ܒܣܰܒܪܳܟ. ܡܠܰܒܒܳܢܳܐ ܕܟܽܠ ܒܝܽܘܠܦܳܢܶܗ܆ ܠܰܒܶܒ ܬܰܪ̈ܥܝܳܬܰܢ ܒܣܽܘܟܳܠܰܝ̈ܟ. ܛܰܝܒܽܘܬܳܟ ܕܰܐܚܝܰܬܰܢ ܒܚܰܝ̈ܶܐ ܕܰܬܢܳܢ܆ ܗܺܝ ܬܰܚܶܝܢ ܒܚܰܝ̈ܶܐ ܕܬܰܡܳܢ. ܪ̈ܰܚܡܰܝܟ ܕܰܐܫܦܰܥܬ ܥܠܰܝܢ ܒܕܶܢܚܳܐ ܕܡܰܘܠܳܕܳܟ܆ ܗܶܢܽܘܢ ܢܶܫܬܰܦܥܽܘܢ ܥܠܰܝܢ ܒܓܶܠܝܳܢܳܐ ܕܪ̈ܰܚܡܰܝܟ. ܛܳܒܽܘܬܳܟ ܡܳܪܝ̱ ܕܰܒܪܳܬܰܢ܆ ܗܺܝ ܬܰܣܓܶܐ ܪܽܘܡܪܳܡܰܢ ܒܝܰܘܡܳܐ ܪܰܒܳܐ ܕܡܶܐܬܺܝܬܳܟ.

ܡܫܺܝܚܳܐ ܕܰܐܪܡܺܝ ܢܽܘܪܶܗ ܒܠܶܒܰܘ̈ܳܬܳܐ ܕܩܰܕܺܝ̈ܫܶܐ܆ ܐܰܢ̱ܬ ܦܬܰܚ ܩܕܳܡܰܝܢ ܬܰܪܥܳܐ ܕܰܬܝܳܒܽܘܬܳܐ. ܐܰܢ̱ܬ ܒܰܚܢܳܢܳܟ ܦܬܰܚ ܠܓܰܘ ܡܶܢܰܢ ܬܰܪܥܳܐ ܕܪ̈ܰܚܡܶܐ. ܐܰܢ̱ܬ ܡܳܪܝ̱ ܐܰܫܘܳܢ ܠܺܝܕܰܥܬܳܐ ܫܰܪܺܝܪܬܳܐ ܕܕܶܚܠܬܳܟ. ܐܰܢ̱ܬ ܐܰܪܚܶܫ ܒܰܢ ܚܰܡܺܝܡܽܘܬܳܐ ܕܠܶܒܳܐ ܒܟܽܠܶܗ ܦܽܘܠܚܳܢܰܢ ܕܰܠܘܳܬܳܟ. ܫܳܪܽܘܝܳܐ ܕܟܽܠ ܒܡܶܠܬܶܗ ܫܪܺܝ ܡܶܢܰܢ ܟܽܠ ܕܒܺܝܫ. ܡܒܰܛܠܳܢܳܐ ܕܟܽܠܡܶܕܶܡ ܕܡܶܬܚܙܶܐ܆ ܒܰܛܶܠ ܡܶܢܰܢ ܟܽܠܡܶܕܶܡ ܕܰܣܢܶܐ܆ ܒܰܨܠܽܘܬ ܝܳܠܶܕܬܳܟ ܘܡܰܠܰܐܟܰܝ̈ܟ ܘܟܽܠܗܽܘܢ ܩܰܕܺܝ̈ܫܰܝܟ܆ ܐܰܡܺܝܢ܀

ܨܠܽܘܬܳܐ ܐ̱ܚܪܺܬܳܐ ܕܝܽܘܚܰܢܳܢ ܚܰܙܳܝܳܐ

ܐܰܠܳܗܳܐ ܐܰܫܘܳܢ ܒܛܰܝܒܽܘܬܳܐ ܠܗܳܝ ܪܰܒܽܘܬܳܐ ܕܰܥܬܺܝܕ ܐܰܢ̱ܬ ܕܬܶܬܶܠ ܠܥܳܠܡܳܐ ܒܥܳܠܡܳܐ ܚܰܕܬܳܐ. ܠܳܐ ܬܕܽܘܢܰܢ ܟܺܐܢܽܘܬܳܟ ܒܝܰܘܡܳܐ ܪܰܒܳܐ ܕܡܶܐܬܺܝܬܳܟ. ܐܰܠܳܗܳܐ ܐܰܫܘܳܢ ܒܪ̈ܰܚܡܰܝܟ ܠܗܳܝ ܝܺܕܰܥܬܳܐ ܕܰܫܪܳܪܳܐ܆ ܘܰܠܗܳܝ ܫܰܘܬܳܦܽܘܬܳܐ ܕܚܽܘܒܳܟ ܓܡܺܝܪܳܐ܆ ܐܰܡܺܝܢ܀

ܚܽܘܬܳܡܳܐ ܓܰܘܳܢܳܝܳܐ

ܫܽܘܒܚܳܐ ܠܳܟ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ. ܡܳܪܰܢ ܐܶܬܪܰܚܰܡܥܠܰܝ ܘܥܰܠ ܟܽܠܳܗ̇ ܒܪܺܝܬܳܟ. ܘܰܫܒܽܘܩ ܠܺܝ ܠܚܰܝܳܒܳܐ ܘܰܠܟܽܠܗܽܘܢ ܚܰܛܳܝ̈ܶܐ ܕܬܳܝܒܺܝܢ ܠܘܳܬܳܟ. ܐܰܦܢܳܐ ܠܛܳܥܰܝ̈ܳܐ. ܐܰܪܘܰܚ ܠܰܐܠܺܝ̈ܨܶܐ. ܐܶܬܪܰܥܳܐ ܠܡܰܣܟ̈ܠܳܢܶܐ. ܐܰܢܺܝܚ ܠܰܡܛܰܪ̈ܦܶܐ. ܫܰܡܠܳܐ ܙܶܕ̈ܩܳܬܳܐ ܕܰܐܝܠܶܝܢ ܕܥܳܒܕܺܝܢ ܡܶܛܽܠ ܫܡܳܟ ܩܰܕܺܝܫܳܐ ܘܢܰܛܰܪ ܠܰܐܝܠܶܝܢ ܕܪܳܕܶܝܢ ܒܽܐܘܪܚܳܐ.

ܘܠܺܝ ܚܰܛܳܝܳܐ ܘܡܰܣܟܠܳܢܳܐ ܕܰܚܛܺܝܬ ܩܕܳܡܰܝܟ܆ ܚܽܘܢܰܝܢܝ̱ ܒܛܰܝܒܽܘܬܳܟ ܘܶܐܬܪܰܚܰܡܥܠܰܝ܆ ܕܰܐܘܕܶܐ ܠܳܟ ܘܶܐܫܰܒܚܳܟ ܟܺܐܢܳܐܺܝܬ ܥܰܡ ܟܶܢ̈ܫܶܐ ܫܡܰܝܳܢ̈ܶܐ ܕܰܡܫܰܒܚܺܝܢ ܠܳܟ ܕܠܳܐ ܫܰܠܘܳܐܺܝܬ. ܫܒܺܝܚܳܐ ܗ̱ܝ ܓܶܝܪ ܛܰܝܒܽܘܬܳܟ ܠܥܳܠܡܺܝܢ܀