ܬܠܳܬܫܳܥܺܝ̈ܢ
ܕܰܫܠܺܝ̈ܚܶܐ ܩܰܕܺܝ̈ܫܶܐ

ܡܳܪܝܳܐ ܡܳܪܰܢ ܐܰܚܺܝܕ ܟܽܠ ܐܰܒܽܘܗ̱ܝ ܕܡܳܪܰܢ ܝܶܫܽܘܥ ܡܫܺܝܚܳܐ. ܡܶܬܟܰܫܰܦ ܐ̱ܢܳܐ ܠܛܰܝܒܽܘܬܳܟ ܐܶܢܳܐ ܕܳܘܝܳܐ ܘܰܐܒܺܝܕܳܐ܆ ܬܶܥܽܘܠ ܒܳܥܽܘܬܝ̱ ܩܕܳܡܰܝܟ ܡܶܛܽܠ ܕܒܳܟ ܠܚܽܘܕܰܝܟ ܣܰܒܪܶܬ. ܫܰܟܶܢ ܠܺܝ ܡܳܪܝ̱ ܛܰܝܒܽܘܬܳܐ ܕܪܽܘܚܳܟ ܩܰܕܺܝܫܳܐ܆ ܘܰܥܒܶܕܰܝܢܝ̱ ܗܰܝܟܠܳܐ ܠܪܰܒܽܘܬܳܟ ܕܒܳܗ̇ ܐܶܬܕܰܟܶܐ ܡܶܢ ܟܽܠ ܛܽܘܠܫܳܐ ܕܰܚܛܺܝܬܳܐ. ܥܒܶܕܰܝܢܝ̱ ܗܰܝܟܠܳܐ ܠܪܽܘܚܳܟ ܩܰܕܺܝܫܳܐ. ܐܺܝܢ ܡܳܪܝ̱ ܒܳܥܶܐ ܐ̱ܢܳܐ ܡܶܢ ܪܰܒܽܘܬܳܟ ܗܰܒ ܠܺܝ ܡܣܰܝܒܪܳܢܽܘܬܳܐ܆ ܘܬܰܡܺܝܡܽܘܬܳܐ܆ ܘܢܰܓܺܝܪܽܘܬ ܪܽܘܚܳܐ܆ ܐܰܝܟܰܢܳܐ ܕܶܐܣܰܝܒܰܪ ܟܽܠ ܕܳܐܬܶܐ ܥܠܰܝ ܒܬܰܘܕܺܝܬܳܐ.

ܘܰܐܫܘܳܢܝ̱ ܕܶܐܛܥܰܢ ܙܩܺܝܦܶܗ ܕܰܒܪܳܟ ܝܺܚܺܝܕܳܝܳܐ ܟܰܕ ܡܫܰܒܚܳܐ ܢܰܦܫܝ̱ ܠܰܐܠܳܗܽܘܬܳܟ ܡܪܰܝܰܡܬܳܐ. ܘܟܰܢܶܫ ܚܽܘ̈ܫܳܒܰܝ ܠܘܳܬܳܟ܆ ܘܣܰܒܰܥ ܠܢܰܦܫܝ̱ ܡܶܢ ܚܰܠܝܽܘܬܳܐ ܕܪܽܘܚܳܟ ܩܰܕܺܝܫܳܐ܆ ܘܢܶܬܬܢܺܝܚ ܒܺܝ ܡܳܪܝ̱ ܨܶܒܝܳܢܳܟ. ܘܶܐܫܟܰܚ ܡܶܢܳܟ ܪ̈ܰܚܡܶܐ ܘܰܚܢܳܢܳܐ ܒܝܰܘܡܳܐ ܕܕܺܝܢܳܐ ܗܰܘ ܙܺܝܥܳܐ ܘܰܕܚܺܝܠܳܐ. ܡܶܛܽܠ ܕܠܳܟ ܦܐܶܐ ܫܽܘܒܚܳܐ ܘܺܐܝܩܳܪܳܐ ܘܣܶܓܕܬܳܐ ܥܰܡ ܝܺܚܺܝܕܳܝܳܐ ܒܪܳܟ ܘܪܽܘܚܳܟ ܩܰܕܺܝܫܳܐ ܗܳܫܳܐ ܘܰܠܥܳܠܡܺܝܢ܀

ܚܽܘܬܳܡܳܐ ܕܰܬܠܳܬܫܳܥܺܝ̈ܢ

ܡܳܪܝܳܐ ܚܽܘܢܰܝܢܝ̱ ܒܪ̈ܰܚܡܶܐ ܕܡܶܢܳܟ ܘܚܰܣܳܐ ܠܺܝ ܚܰܘ̈ܒܰܝ ܒܰܚܢܳܢܳܟ. ܘܰܐܫܘܳܢܝ̱ ܡܳܪܝ̱ ܠܪ̈ܰܚܡܶܐ ܘܰܠܫܽܘܒܩܳܢܳܐ ܘܰܙܓܽܘܪ ܡܶܢܝ̱ ܠܚܰܫ̈ܶܐ ܫܟܺܝܪ̈ܶܐ ܘܰܠܚܽܘ̈ܫܳܒܶܐ ܣܢܰܝ̈ܳܐ. ܡܳܪܝ̱ ܦܰܨܳܢܝ̱ ܡܶܢ ܫܽܘܪ̈ܥܳܬܶܗ ܕܳܐܟܶܠܩܰܪܨܳܐ ܘܗܰܒܠܺܝ ܕܶܐܗܘܶܐ ܕܺܝܠܳܟ ܘܶܐܫܦܰܪ ܠܳܟ ܐܰܝܟ ܨܶܒܝܳܢܳܟ. ܡܳܪܝܳܐ ܕܰܒܰܪܰܝܢܝ̱ ܠܰܠܡܺܐܢܳܐ ܕܚܰܝ̈ܶܐ ܘܫܰܟܶܢ ܠܺܝ ܠܶܒܳܐ ܡܶܬܬܰܘܝܳܢܳܐ. ܡܳܪܝ̱ ܗܰܒ ܠܺܝ ܡܰܟܺܝܟܽܘܬܳܐ ܘܚܽܘ̈ܫܳܒܶܐ ܕܰܡܣܰܝܒܪܳܢܽܘܬܳܐ ܘܟܽܠܗܶܝܢ ܐܰܝܠܶܝܢ ܕܫܳܦܪ̈ܳܢ ܠܳܟ ܘܦܳܩ̈ܚܳܢ ܠܦܽܘܪܩܳܢܳܐ ܕܚܰܝܰܝ̈ ܐܰܝܟ ܣܽܘܓܳܐܐ ܕܰܡܪܰܚܡܳܢܽܘܬܳܟ.

ܫܰܟܶܢ ܠܺܝ ܝܺܕܰܥܬܳܐ ܘܚܶܟܡܬܳܐ ܟܰܕ ܡܟܰܢܶܫ ܐܰܢ̱ܬ ܠܚܽܘ̈ܫܳܒܰܝ ܡܶܢ ܦܶܗܝܳܐ ܕܰܣܪ̈ܺܝܩܳܬܳܐ܆ ܘܡܳܠܶܐ ܐܰܢ̱ܬ ܠܺܝ ܕܶܚܠܬܳܟ܆ ܘܙܰܘܥܬܳܟ܆ ܘܚܽܘܒܳܟ܆ ܘܪܶܚܡܬܳܟ܆ ܘܪܶܚܡܬܳܐ ܕܰܐܚ̈ܶܐ. ܐܰܠܳܗܳܐ ܚܽܘܢܰܝܢܝ̱ ܠܺܝ ܠܚܰܛܳܝܳܐ ܥܰܒܕܳܟ ܘܩܰܒܶܠܰܝܢܝ̱ ܐܰܝܟ ܕܰܠܡܳܟܣܳܐ܆ ܘܰܥܛܺܝ ܡܶܢ ܩܕܳܡ ܥܰܝ̈ܢܰܝ ܡܰܕܰܥܝ̱ ܡܶܣܟܺܢܳܐ ܟܽܠܶܗ ܚܒܳܠܗܽܘܢ ܕܫܺܐܕ̈ܶܐ ܟܰܕ ܡܥܰܕܰܪ ܐܰܢ̱ܬ ܘܰܡܚܰܝܶܠ ܠܰܡܚܺܝܠܽܘܬܝ̱ ܒܰܩܪܳܒܳܐ ܕܠܽܘܩܒܰܠܗܽܘܢ܆ ܐܰܝܟܰܢܳܐ ܕܰܒܙܳܟܽܘܬܳܐ ܐܰܘܕܶܐ ܠܳܟ܆ ܘܶܐܫܰܒܚܳܟ ܘܠܰܐܒܽܘܟ ܘܰܠܪܽܘܚܳܟ ܩܰܕܺܝܫܳܐ܆ ܗܳܫܳܐ ܘܰܠܥܳܠܡܺܝܢ܀