ܕܰܬܫܰܥܫܳܥܺܝ̈ܢ

ܡܳܪܝܳܐ ܠܳܐ ܬܶܥܒܶܕ ܥܰܡܝ̱ ܐܰܝܟ ܚܛܳܗܰܝ̈ ܘܠܳܐ ܬܶܦܪܥܰܢܝ̱ ܒܺܝܫܽܘܬܝ̱ ܘܪܽܘܫܥܝ̱. ܡܳܪܝ̱ ܫܰܘܙܶܒܰܝܢܝ̱ ܡܶܢ ܗܳܝ ܕܶܐܚܛܶܐ ܩܕܳܡܰܝܟ ܘܰܐܠܶܦܰܝܢܝ̱ ܠܡܶܥܒܰܕ ܨܶܒܝܳܢܳܟ. ܡܳܪܝ̱ ܥܰܕܰܪܰܝܢܝ̱ ܥܰܠ ܫܳܥܬܶܗ ܕܡܰܘܬܳܐ ܘܚܽܘܣ ܥܠܰܝ ܒܝܰܘܡܶܗ ܕܕܺܝܢܳܐ. ܡܳܪܝ̱ ܠܳܐ ܬܶܓܠܶܐ ܣܰܢ̈ܝܳܬܝ̱ ܘܠܳܐ ܬܦܰܪܣܶܐ ܣܰܟܠ̈ܘܳܬܝ̱. ܘܡܽܘ̈ܡܰܝ ܘܒܽܘܨܳܪ̈ܰܝ ܠܳܐ ܬܰܪܫܶܐ ܘܬܰܟܶܣ. ܘܠܳܐ ܬܰܒܗܶܬ ܐܰܦܰܝ̈ ܒܝܰܘܡܳܐ ܕܕܳܐܶܢ ܐܰܢ̱ܬ ܟܰܣ̈ܝܳܬܳܐ ܘܓܰܠ̈ܝܳܬܳܐ ܕܰܒܢܰܝ̈ܢܳܫܳܐ.

ܡܳܪܝܳܐ ܣܰܓܺܝ ܪ̈ܰܚܡܶܐ ܘܰܐܠܳܗܰܢ ܚܳܐܶܢ ܠܚܰܛܳܝ̈ܶܐ. ܩܰܕܶܫܰܝܢܝ̱ ܡܶܢ ܛܰܡܽܐܘܬܳܐ ܘܰܢܕܺܝܕܽܘܬܳܐ ܕܰܚ̈ܛܳܗܰܝ ܘܰܫܟܺܝܪ̈ܘܳܬܝ̱ ܘܣܰܢ̈ܝܳܬܳܐ ܣܰܓܺܝ̈ܳܐܬܳܐ ܕܣܶܥܪܶܬ. ܚܰܣܳܐ ܡܳܪܝ̱ ܒܣܰܓܺܝܽܐܘܬ ܚܢܳܢܳܟ ܘܪ̈ܰܚܡܰܝܟ ܒܺܝܫܽܘܬܝ̱ ܘܪܽܘܫܥܝ̱ ܘܥܰܘܠܳܐ ܕܰܥܒܰܕ̈ܝ̱ ܐܺܝ̈ܕܰܝ. ܐܰܫܺܝܓ ܘܕܰܟܳܐ ܘܰܫܒܽܘܩ ܒܝܰܡܳܐ ܫܦܺܝܥܳܐ ܕܚܰܝܽܘܣܬܳܢܽܘܬܳܟ ܘܰܕܛܳܒܽܘܬܳܟ.

ܐܺܝܢ ܐܰܠܳܗܳܐ ܛܳܒܳܐ ܕܫܶܡܫܶܗ ܠܒܺܝ̈ܫܶܐ ܡܰܕܢܰܚ ܘܡܰܚܶܬ ܡܶܛܪܶܗ ܠܥܰܘ̈ܳܠܶܐ܆ ܚܰܣܳܐ ܚܰܘ̈ܒܰܝ ܒܪ̈ܰܚܡܰܝܟ ܘܢܶܠܚܶܐ ܚܢܳܢܳܟ ܚ̈ܛܳܗܰܝ. ܡܳܪܝܳܐ ܕܩܰܒܶܠܬ ܬܝܳܒܽܘܬܳܐ ܘܡܶܬܬܰܘܝܳܢܽܘܬܳܐ ܕܳܐܚܳܒ ܘܰܡܢܰܫܶܐ ܡܰܠ̈ܟܶܐ ܒܺܝ̈ܫܶܐ ܘܪ̈ܰܫܺܝܥܶܐ. ܩܰܒܶܠܰܝܢܝ̱ ܠܺܝ ܕܳܘܝܳܐ ܘܚܰܠܳܫܳܐ ܘܒܺܝܫ ܡܶܢ ܒܺܝ̈ܫܶܐ ܘܪܰܫܺܝܥ ܡܶܢ ܪ̈ܰܫܺܝܥܶܐ. ܘܰܒܛܰܝܒܽܘܬܳܟ ܚܽܘܣ ܥܠܰܝ ܘܪܰܚܶܡܥܠܰܝ.

ܡܳܪܝܳܐ ܕܶܐܫܬܰܘܕܺܝܬ ܘܶܐܡܰܪܬ ܕܰܩܪܰܘ ܘܶܐܢܳܐ ܥܳܢܶܐ ܐ̱ܢܳܐ. ܘܩܽܘܫܽܘܢ ܘܶܐܢܳܐ ܦܳܬܰܚ ܐ̱ܢܳܐ ܘܺܐܝܕܳܐ ܕܺܝܠܝ̱ ܝܳܗܶܒ ܐ̱ܢܳܐ ܠܟܽܘܢ ܘܣܰܟܠ̈ܘܳܬܳܐ ܘܰܚ̈ܛܳܗܶܐ ܕܺܝܠܟܽܘܢ ܫܳܒܶܩ ܐ̱ܢܳܐ ܠܟܽܘܢ. ܫܡܰܥܰܝܢܝ̱ ܡܳܪܝ̱ ܒܛܰܝܒܽܘܬܳܟ ܘܰܥܢܺܝܢܝ̱ ܒܒܰܣܺܝܡܽܘܬܳܟ. ܘܰܦܬܰܚ ܠܺܝ ܬܰܪܥܳܐ ܕܰܡܪܰܚܡܳܢܽܘܬܳܟ ܘܗܰܒܠܺܝ ܐܺܝܕܳܐ ܕܥܽܘܕܪ̈ܳܢܰܝܟ. ܘܣܰܟܠ̈ܘܳܬܝ̱ ܘܣܽܘܪ̈ܚܳܢܰܝ ܫܒܽܘܩ ܘܰܐܥܒܰܪ ܐܶܢܽܘܢ ܒܰܚܢܳܢܳܟ ܘܪܰܚܶܡܥܠܰܝ ܐܰܝܟ ܕܰܡܥܳܕ ܐܰܢ̱ܬ. ܐܺܝܢ ܒܒܳܥܽܘ ܡܶܢܳܟ ܐܰܠܳܗܳܐ ܛܳܒܳܐ܆ ܕܥܰܠ ܟܽܠ ܒܣܰܪ ܡܪܰܚܶܡ ܐܰܢ̱ܬ ܘܚܳܐܶܣ ܐܰܢ̱ܬ ܥܰܠ ܟܽܠܗܽܘܢ ܥܰܒܕܰܝ̈ܟ܆ ܚܽܘܣ ܥܠܰܝ ܘܪܰܚܶܡܥܠܰܝ ܘܚܰܣܳܐ ܠܺܝ ܚܰܘ̈ܒܰܝ ܘܰܚ̈ܛܳܗܰܝ܀

ܚܽܘܬܳܡܳܐ

ܒܳܪܽܘܝܳܐ ܕܰܒܨܶܒܝܳܢܶܗ ܨܒܳܐ ܕܰܒܪܺܝܬܶܗ ܢܩܰܕܶܫ. ܘܥܰܠ ܩܰܝܣܳܐ ܕܰܨܠܺܝܒܳܐ ܩܢܽܘܡܶܗ ܕܒܰܚ ܘܒܰܕܒܺܝܚܽܘܬܶܗ ܚܰܣܺܝ ܠܚܰܛܳܝ̈ܶܐ. ܘܰܗܘܳܐ ܐܽܘܟܠܳܐ ܘܫܶܩܝܳܐ ܕܠܳܐܟܽܘ̈ܠܰܘܗ̱ܝ ܡܰܠܟܽܘܬܳܐ ܢܫܰܟܶܢ. ܒܪܺܝܢܝ̱ ܡܳܪܝ̱ ܒܪܺܝܬܳܐ ܚܕܰܬܳܐ ܒܛܰܝܒܽܘܬܳܟ. ܘܰܒܙܰܕܺܝܩܽܘܬܳܟ ܚܰܣܳܢܝ̱ ܘܦܰܨܳܢܝ̱ ܡܶܢ ܚ̈ܛܳܗܰܝ ܕܶܐܟܠܶܬ ܦܰܓܪܳܟ ܩܰܕܺܝܫܳܐ ܘܕܶܐܫܬܺܝܬ ܕܡܳܟ ܚܰܝܳܐ. ܐܽܘܟܠܳܐ ܠܢܽܘܪܳܐ ܠܳܐ ܐܶܗܘܶܐ. ܘܕܰܐܘܕܺܝܬ ܘܗܰܝܡܢܶܬ ܒܳܟ ܡܳܪܝ̱ ܘܒܰܐܒܽܘܟ ܘܰܒܪܽܘܚܳܟ ܩܰܕܺܝܫܳܐ.

ܥܰܡ ܓܰܝܳܣܳܐ ܘܡܳܟܣܳܐ ܘܚܰܛܳܝܬܳܐ ܕܗܰܝܡܶܢܘ̱ ܒܳܟ ܘܶܐܬܦܪܶܩܘ̱܆ ܦܪܽܘܩܰܝܢܝ̱ ܐܳܘ ܪܳܚܶܡ ܐ̱ܢܳܫ̈ܳܐ ܐܰܠܳܗܳܐ ܘܚܽܘܣ ܘܶܐܬܪܰܚܰܡܥܠܰܝ. ܘܰܐܢܺܝܚ ܡܳܪܝ̱ ܘܚܰܣܳܐ ܐܶܢܽܘܢ ܠܰܐܒܳܗܰܝ̈ ܘܠܰܐܚܰܝ̈ ܕܰܛܠܺܝܡܺܝܢ ܒܒܺܝܫܽܘܬ ܥܒܳܕܰܝ̈. ܡܳܪܝܳܐ ܕܚܰܣܺܝܬ ܠܓܰܝܳܣܳܐ ܘܡܳܟܣܳܐ ܘܚܰܛܳܝܬܳܐ ܘܰܠܗܰܕܳܡܰܘ̈ܗ̱ܝ ܕܰܡܫܰܪܝܳܐ ܫܰܪܰܪܬ ܘܠܰܡܡܰܚܰܝܬܳܐ ܐܰܚܠܶܡܬ܆ ܐܰܚܠܶܡ ܡܰܚ̈ܘܳܬܳܐ ܕܰܚ̈ܛܳܗܰܝ ܘܫܽܘܚ̈ܢܶܐ ܘܟܽܘ̈ܬܡܳܬܳܐ ܕܢܰܦܫܝ̱ ܕܳܘܺܝܬܳܐ. ܐܰܣܳܐ ܘܚܰܣܳܐ ܒܰܡܪܰܚܡܳܢܽܘܬܳܟ ܠܺܝ ܠܚܰܛܳܝ ܡܶܢ ܚܰܛܳܝ̈ܶܐ ܘܪܰܚܶܡܥܠܰܝ ܘܰܫܒܽܘܩ ܠܺܝ ܟܽܠ ܕܰܚܛܺܝܬ ܠܳܟ܀