ܢܽܘܗܳܪܳܐ

ܐܰܝܢܳܐ ܕܡܶܬܓܒܶܐ ܠܬܶܫܡܶܫܬܳܐ ܕܩܳܪܽܘܝܳܐ܆ ܗܰܘ ܕܝܰܘܢܳܐܺܝܬ ܐܰܢܰܓܢܳܣܛܽܘܣ ܡܶܬܩܪܶܐ܆ ܙܳܕܶܩ ܕܰܢܩܽܘܡ ܩܕܳܡ ܬܰܪܥܳܐ ܕܡܰܕܒܚܳܐ܆ ܒܥܶܕܳܢܳܐ ܕܩܽܘܪܳܒܳܐ ܐܰܠܳܗܳܐ܆ ܟܰܕ ܠܒܺܝܫ ܟܽܘܬܺܝܢܶܗ܆ ܘܰܓܠܶܐ ܪܺܝܫܶܗ ܘܡܰܪܟܰܢ܆ ܘܰܦܟܺܝܪ̈ܳܢ ܐܺܝܕ̈ܰܘܗ̱ܝ ܥܰܠ ܚܰܕܝܶܗ܀

ܒܥܶܕܳܢܳܐ ܕܶܝܢ ܕܡܶܬܬܰܣܪܚܳܢܽܘܬܳܐ ܗ̄ܕ̄ ܩܕܳܡ ܫܰܘܬܳܦܽܘܬܳܐ ܕܰܒܐܪ̈ܳܙܶܐ ܩܰܕܺܝ̈ܫܶܐ܆ ܪܺܝܫܟܳܗ̈ܢܶܐ ܡܫܺܝܓ ܨܶܒ̈ܥܳܬܶܗ ܒܰܡܫܰܡܫܳܢܺܝܬܳܐ܆ ܘܠܳܒܶܫ ܬܳܓܳܐ܆ ܘܳܐܚܶܕ ܨܠܺܝܒܳܐ ܘܚܽܘܛܪܳܐ܆ ܘܩܳܐܶܡ ܩܕܳܡ ܦܳܬܽܘܪ ܚܰܝ̈ܐ ܘܰܡܫܰܒܰܚ ܟܰܕ ܐܳܡܰܪ:

ܨܠܽܘܬܳܐ ܕܫܽܘܪܳܝܳܐ

ܪܺܝܫܟܳܗ̈ܢܶܐ: ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ܀

ܡܫܰܡ̈ܫܳܢܶܐ: ܘܰܥܠܰܝܢ ܡܚܺܝ̈ܠܶܐ ܘܚܰܛܳܝ̈ܶܐ ܪ̈ܰܚܡܶܐ ܘܰܚܢܳܢܳܐ ܢܶܫܬܰܦܥܽܘܢ ܒܰܬܪ̈ܰܝܗܽܘܢ ܥܳܠ̈ܡܶܐ ܠܥܳܠܰܡ ܥܳܠܡܺܝܢ ܐܰܡܺܝܢ܀

ܪܺܝܫܟܳܗ̈ܢܶܐ: ܫܰܪܰܪ ܡܳܪܝ ܠܥܺܕܬܳܟ ܩܰܕܺܝܫܬܳܐ܆ ܥܰܠ ܫܽܘܥܳܐ ܠܳܐ ܡܶܙܕܰܥܙܥܳܢܳܐ ܕܗܰܝܡܳܢܽܘܬܳܐ ܬܪܺܝܨܰܬ ܫܽܘܒܚܳܐ. ܕܒܳܟ ܬܶܬܚܰܝܰܠܝ ܘܡܶܢܳܟ ܬܩܰܒܶܠܝ ܥܽܘܕܪ̈ܳܢܶܐ ܡܫܰܡ̈ܠܰܝܳܐ܆ ܘܫܽܘܟܳܢ̈ܐ ܐܰܠܳܗܳܝ̈ܐ܆ ܕܰܒܗܽܘܢ ܢܶܬܢܰܗܪܽܘܢ ܝܰܠܕܶܝ̈ܗ ܠܰܡܫܰܡܳܫܽܘ ܒܗܰܝܟܠܳܟ ܩܰܕܺܝܫܳܐ ܕܰܟܝܳܐܺܝܬ ܘܩܰܕܺܝܫܳܐܺܝܬ܆ ܘܰܢܫܰܒܚܽܘܢܳܟ ܥܰܡ ܬܶܓ̈ܡܶܐ ܠܳܐ ܗܽܘܠܳܢܳܝ̈ܐ ܕܰܠܥܶܠ. ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ ܠܥܳܠܰܡ ܥܳܠܡܺܝܢ ܐܰܡܺܝܢ܀

ܩܳܠܳܐ: ܬܡܺܝܢܳܝܳܐ ܩܽܘܩܰܠܺܝܽܘܢ

ܒܡܳܢܳܐ ܡܕܰܟܶܐ ܛܰܠܝܳܐ ܐܽܘܪܚܶܗ ܕܢܶܛܰܪ ܦܽܘܩܕܳܢܰܝ̈ܟ ܗܰܠܶܠܽܘܝܰܗ ܒܟܽܠܶܗ ܠܶܒܝ ܥܰܩܶܒܬܳܟ ܠܳܐ ܬܶܛܥܶܝܢܝ ܡܶܢ ܦܽܘܩܕܳܢܰܝ̈ܟ܀

ܒܠܶܒܝ ܛܰܫܺܝܬ ܡܶܠܰܝ̈ܟ ܕܠܳܐ ܐܶܚܛܶܐ ܠܳܟ ܗܰܠܶܠܽܘܝܰܗ ܒܪܺܝܟ ܐܰܢ̱ܬ ܡܳܪܝܳܐ ܐܰܠܶܦܰܝܢܝ ܦܽܘܩܕܳܢܰܝ̈ܟ܀

ܠܽܐܘܪܚܳܐ ܕܣܳܗܕܽܘܬܳܟ ܪܶܚܡܶܬ ܛܳܒ ܡܶܢ ܟܽܠܶܗ ܥܽܘܬܪܳܐ ܗܰܠܶܠܽܘܝܰܗ ܒܦܽܘܩܕܳܢܰܝ̈ܟ ܪܢܺܝܬ ܘܝܶܕܥܶܬ ܐܽܘܪ̈ܚܳܬܳܟ܀

ܒܢܳܡܘܣܳܟ ܪܢܺܝܬ ܕܠܳܐ ܐܶܛܥܶܐ ܡܶܠܰܝ̈ܟ ܗܰܠܶܠܽܘܝܰܗ ܥܢܺܝ ܠܥܰܒܕܳܟ ܕܺܐܚܶܐ ܘܶܐܛܰܪ ܡܶܠܰܝ̈ܟ܀

ܓܠܺܝ ܥܰܝܢܰܝ̈ ܕܶܐܚܙܶܐ ܬܶܕܡܪ̈ܳܬܳܐ ܕܰܒܢܳܡܽܘܣܳܟ ܗܰܠܶܠܽܘܝܰܗ ܥܳܡܽܘܪܳܐ ܐ̱ܢܳܐ ܥܰܡܳܟ ܠܳܐ ܬܛܰܫܶܐ ܡܶܢܝ ܦܽܘܩܕܳܢܰܝ̈ܟ܀

ܨܒܳܬ ܢܰܦܫܝ ܘܶܐܬܪܰܓܪܓܰܬ ܠܕܺܝܢܰܝ̈ܟ ܒܟܽܠܙܒܰܢ ܗܰܠܶܠܽܘܝܰܗ ܟܐܰܝܬ ܒܥܰܡ̈ܡܶܐ ܘܠܺܝܛܺܝܢ ܐܶܢܽܘܢ ܐܰܝܠܶܝܢ ܕܛܳܥܶܝܢ ܡܶܢ ܦܽܘܩܕ̈ܳܢܰܝܟ܀

ܥܶܩܒܳܐ: ܫܽܘܒܚܳܐ

ܒܰܪܟܽܘܗ̱ܝ ܛܠܳܝ̈ܶܐ ܫܦܰܝ̈ܳܐ ܫܰܘܝ̈ܰܝ ܒܡܶܢܝܳܢ ܬܠܺܝܬܳܝܽܘܬܳܐ ܒܳܪܝܰܬ ܥܳܠ̈ܡܶܐ ܠܰܐܠܳܗܳܐ ܐܰܒܳܐ. ܐܰܘܕܰܘ ܠܡܶܠܬܳܐ ܕܙܳܚ ܘܰܢܚܶܬ ܠܦܽܘܪܩܳܢܰܢ. ܫܰܚܠܦܳܗ ܗ̱ܘܳܐ ܠܓܰܘܙܰܠܬܳܐ ܒܪܽܘܚ ܛܰܠܳܐ ܡܦܰܝܓܳܢܳܐ. ܥܰܡܡ̈ܶܐ ܟܽܠܟܽܘܢ ܒܰܪܶܟܘ ܘܰܐܘܕܰܘ ܠܰܫܡܶܗ ܕܝܳܗܽܘܒܳܐ ܕܚܰܝ̈ܶܐ ܕܟܽܠ ܢܶܫܡܳܐ. ܪܽܘܚܳܐ ܡܩܰܕܶܫ ܟܽܠܳܐ ܒܟܽܠܙܒܰܢ ܘܠܥܳܠܰܡ ܥܳܠܡܺܝܢ܀

ܡܶܢܥܳܠܰܡ

ܗܰܘ ܕܺܐܝܬܰܘܗܝ ܓܢܺܝܙܳܐ ܘܰܡܥܰܠܰܝ ܡܶܢ ܟܽܠ. ܗܰܘ ܕܰܡܫܰܡܫܺܝܢ ܠܶܗ ܕܠܳܐ ܫܶܠܝܳܐ ܦܳܠܰܚ̈ܘܳܬܳܐ ܕܡܰܠܰܐܟ̈ܶܐ. ܛܠܳܝ̈ܶܐ ܒܫܰܦܺܝܪܽܘܬ ܕܶܚܠܬܳܐ ܫܰܒܚܽܘܗܝ. ܟܳܗ̈ܢܶܐ ܒܟܽܠܥܶܕܳܢ ܒܰܪܟܽܘܗܝ. ܥܰܡܡ̈ܶܐ ܐܰܘܕܰܘ ܠܶܗ ܘܒܰܪܶܟܘ ܠܰܫܡܶܗ ܠܥܳܠܰܡ ܥܳܠܡܺܝܢ܀

ܐܚܪܢܐ

ܠܰܐܠܳܗܳܐ ܕܒܰܐܬܽܘܢܳܐ ܕܢܽܘܪܳܐ܆ ܥܰܡ ܛܠܳܝ̈ܶܐ ܒܢ̈ܰܝ ܥܶܒܪ̈ܳܝܶܐ ܐܰܟܚܕܳܐ ܢܚܶܬ ܗ̱ܘܳܐ ܘܩܳܡ܆ ܘܰܠܫܰܠܗܶܒܺܝܬܳܐ ܕܝܳܩܕܳܐ ܠܛܰܠܳܐ ܗܰܢܺܝܐܳܐ ܫܰܚܠܶܦ܆ ܕܠܶܗ ܫܰܒܰܚܘ ܥܰܒܕ̈ܰܘܗ̱ܝ ܘܟܽܠܗܶܝܢ ܒܶܪ̈ܝܳܬܶܗ܆ ܕܝܰܬܺܝܪ ܢܪܰܡܪܶܡ ܘܢܰܘܕܶܐ ܠܰܫܡܶܗ ܩܰܕܺܝܫܳܐ ܠܥܳ݀ܠܡܺܝܢ܀

ܡܫܰܡ̈ܫܳܢܶܐ: ܡܳܪܝܳܐ ܡܪܰܚܡܳܢܳܐ ܪܰܚܶܡܥܠܰܝܢ ܘܥܰܕܰܪܰܝܢ܀

ܨܠܽܘܬܳܐ

ܡܳܪܰܢ ܘܰܐܠܳܗܰܢ ܝܶܫܽܘܥ ܡܫܺܝܚܳܐ܆ ܫܰܟܶܢ ܠܥܰܒܕܰܝ̈ܟ ܗܳܠܶܝܢ ܠܰܡܩܰܒܳܠܽܘ ܥܽܘܬܪܳܐ ܕܡܰܘܗ̈ܒܳܬܳܟ ܐܰܠܳܗܳܝܳ̈ܬܳܐ܆ ܐܰܝܟܰܢܳܐ ܕܰܒܕܰܟܝܽܘܬܳܐ ܘܩܰܕܺܝܫܽܘܬܳܐ ܢܰܣܩܽܘܢ ܠܳܟ ܩܽܘܒܳܠܛܰܝܒܽܘܬܳܐ ܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܗܽܘܢ. ܘܰܐܫܘܳܐ ܠܰܢ ܘܰܠܗܽܘܢ ܠܡܶܦܰܩ ܠܽܐܘܪܥܳܟ ܒܡܶܐܬܺܝܬܳܟ ܬܪܰܝܳܢܺܝܬܳܐ܆ ܘܰܢܫܰܡܫܳܟ ܥܰܡܗܽܘܢ ܕܬܶܓ̈ܡܶܐ ܡܰܠܰܐܟܳܝ̈ܐ ܒܥܺܕܬܳܐ ܕܒܽܘܟܪ̈ܶܐ ܕܒܰܫܡܰܝܳܐ ܠܥܳܠܰܡ ܥܳܠܡܺܝܢ܀

ܥܶܢܝܳܢܳܐ ܕܪܰܚܶܡܥܠܰܝ: ܒܪܶܟܢܳܐ ܕܚܽܘܣܳܝܳܐ ܗܘܺܝ ܠܺܝ

ܪܺܝܫܟܳܗ̈ܢܶܐ: ܪܰܚܶܡܥܠܰܝ ܐܰܠܳܗܳܐ ܐܰܝܟ ܛܰܝܒܽܘܬܳܟ܀

ܡܫܰܡ̈ܫܳܢܶܐ: ܚܽܘܣܳܝܳܐ ܗܘܺܝ ܠܺܝ܆ ܐܰܢ̱ܬ ܠܚܽܘܕܰܝܟ ܣܰܓܺܝ ܪ̈ܰܚܡܶܐ ܐܰܠܳܗܳܐ. ܘܩܰܒܶܠܰܝܢܝ ܐܰܝܟ ܕܰܠܗܰܘ ܒܪܳܐ ܐܳܣܽܘܛܳܐ ܘܪܰܚܶܡܥܠܰܝ܀

ܪܺܝܫܟܳܗ̈ܢܶܐ: ܐܰܣܓܳܐ ܐܰܫܺܝܓܰܝܢܝ ܡܶܢ ܥܰܘܠܝ܀

ܡܫܰܡ̈ܫܳܢܶܐ: ܐܰܒܳܐ ܩܰܕܺܝܫܳܐ܆ ܘܝܳܗܽܘܒܳܐ ܕܩܰܕܺܝܫܽܘܬܳܐ ܐܰܠܳܗܳܐ. ܩܰܕܶܫ ܒܛܰܝܒܽܘܬܳܟ܆ ܠܥܰܒܕܳܟ ܕܰܡܣܰܟܶܐ (ܠܥܰܒܕܰܝ̈ܟ ܕܰܡܣܰܟܶܝܢ) ܠܡܰܘܗܰܒܬܳܟ ܕܒܳܗ ܢܶܬܩܰܕܰܫ (ܢܶܬܩܰܕܫܽܘܢ)܀

ܪܺܝܫܟܳܗ̈ܢܶܐ: ܠܳܟ ܒܰܠܚܽܘܕܰܝܟ ܚܛܺܝܬ܀

ܡܫܰܡ̈ܫܳܢܶܐ: ܒܪܳܐ ܕܰܒܡܰܘܗܰܒܬܶܗ܆ ܠܰܫܠܺܝ̈ܚܶܐ ܕܺܝܠܶܗ ܚܰܟܶܡ ܐܰܠܳܗܳܐ. ܚܰܟܶܡ ܒܡܰܘܗܰܒܬܳܟ܆ ܠܥܰܒܕܳܟ ܕܰܡܣܰܟܶܐ (ܠܥܰܒܕܰܝ̈ܟ ܕܰܡܣܰܟܶܝܢ) ܠܪܽܘܚܳܟ ܕܒܳܗ ܢܶܬܚܰܟܰܡ (ܢܶܬܚܰܟܡܽܘܢ)܀

ܪܺܝܫܟܳܗ̈ܢܶܐ: ܐܰܢ̱ܬ ܕܶܝܢ ܒܩܽܘܫܬܳܐ ܨܒܰܝܬ܀

ܡܫܰܡ̈ܫܳܢܶܐ: ܪܽܘܚܳܐ ܕܠܰܫܠܺܝ̈ܚܶܐ܆ ܒܠܶܫܳܢ̈ܐ ܕܢܽܘܪܳܐ ܚܰܟܶܡ ܐܰܠܳܗܳܐ. ܩܰܕܶܫ ܒܡܰܘܗܰܒܬܳܟ܆ ܠܥܰܒܕܳܟ ܕܰܡܣܰܟܶܐ (ܠܥܰܒܕܰܝ̈ܟ ܕܰܡܣܰܟܶܝܢ) ܠܪܽܘܚܳܟ ܕܒܳܗ ܢܶܬܩܰܕܰܫ (ܢܶܬܩܰܕܫܽܘܢ)܀

ܪܺܝܫܟܳܗ̈ܢܶܐ: ܐܰܣܒܰܥܰܝܢܝ ܒܽܘܣܳܡܳܟ ܘܚܰܕܽܘܬܳܟ܀

ܡܫܰܡ̈ܫܳܢܶܐ: ܠܬܰܪ̈ܥܶܐ ܕܰܫܡܰܝ̈ܳܐ܆ ܬܶܦܬܰܚܝ ܛܰܝܒܽܘܬܳܟ ܩܕܳܡܰܝܢ ܐܰܠܳܗܳܐ. ܘܰܐܓܶܢ ܝܰܡܺܝܢܳܟ܆ ܥܰܠ ܥܰܒܕܳܟ ܕܰܡܣܰܟܶܐ (ܠܥܰܒܕܰܝ̈ܟ ܕܰܡܣܰܟܶܝܢ) ܠܳܗ ܕܒܳܗ ܢܶܬܒܰܪܰܟ (ܢܶܬܒܰܪܟܽܘܢ)܀

ܪܺܝܫܟܳܗ̈ܢܶܐ: ܠܶܒܳܐ ܕܰܟܝܳܐ ܒܪܺܝ ܒܺܝ ܐܰܠܳܗܳܐ܀

ܡܫܰܡ̈ܫܳܢܶܐ: ܒܶܐܣܛܠܳܟ ܢܶܨܛܰܒܰܬ܆ ܨܰܘܪܳܐ ܕܰܩܕܳܡܰܝܟ ܪܟܺܝܢܽ ܗ̱ܘ ܐܰܠܳܗܳܐ. ܘܚܳܐܰܪ ܠܡܰܘܗܰܒܬܳܟ܆ ܕܒܳܗ ܢܶܨܛܰܒܰܬ ܒܨܶܒ̈ܬܶܐ ܕܪܽܘܚܳܐ ܩܰܕܺܝܫܳܐ܀

ܪܺܝܫܟܳܗ̈ܢܶܐ: ܐܶܠܳܐ ܐܰܗܦܶܟ ܠܺܝ ܒܽܘܣܳܡܳܟ ܘܦܽܘܪܩܳܢܳܟ܀

ܡܫܰܡ̈ܫܳܢܶܐ: ܟܶܢ̈ܫܶܐ ܫܡܰܝܳܢ̈ܶܐ܆ ܡܶܬܦܰܨܚܺܝܢ ܒܫܽܘܡܠܳܝ ܥܰܒܕܳܟ (ܥܰܒܕܰܝ̈ܟ) ܐܰܠܳܗܳܐ. ܘܙܳܡܪܺܝܢ ܬܰܚ̈ܬܳܝܶܐ܆ ܬܶܫܒܽܘܚܬܳܐ ܠܰܕܚܰܠܛܶܗ (ܠܕܰܚܠܰܛ ܐܶܢܽܘܢ) ܒܶܝܬ ܟܶܢܫܰܝ̈ܗܽܘܢ܀

ܪܺܝܫܟܳܗ̈ܢܶܐ: ܦܰܨܳܢܝ ܡܶܢ ܕܡܳܐ ܐܰܠܳܗܝ ܐܰܠܳܗܳܐ ܕܦܽܘܪܩܳܢܝ܀

ܡܫܰܡ̈ܫܳܢܶܐ: ܬܳܡܗܺܝܢ ܢܽܘܪ̈ܳܢܶܐ܆ ܟܰܕ ܨܳܪܶܐ ܠܪܰܘܡܳܐ ܪܽܘܚܳܐ ܩܰܕܺܝܫܳܐ ܐܰܠܳܗܳܐ. ܘܢܳܚܶܬ ܕܰܢܫܰܟܶܢ܆ ܡܰܘܗܰܒܬܳܐ ܒܺܐܝܕܰܝ̈ ܪܺܝܫܟܳܗ̈ܢܶܐ ܠܰܕܫܳܐܠܺܝܢ ܠܳܗ܀

ܪܺܝܫܟܳܗ̈ܢܶܐ: ܡܶܛܽܠ ܕܠܳܐ ܨܒܰܝܬ ܒܕܶܒ̈ܚܶܐ ܘܳܐܦܠܳܐ ܒܝܰܩ̈ܕܶܐ ܫܰܠ̈ܡܶܐ ܐܶܬܪܰܥܺܝܬ܀

ܡܫܰܡ̈ܫܳܢܶܐ: ܠܳܐ ܡܶܣܬܰܝܟܳܢܳܐ܆ ܒܺܐܝܕܰܝ̈ܳܐ ܕܕܰܟܝ̈ܳܢ ܡܶܬܬܚܶܕ ܪܽܘܚܳܐ ܐܰܠܳܗܳܐ. ܘܢܳܚܶܬ ܕܰܢܫܰܟܶܢ܆ ܡܰܘܗܰܒܬܳܐ ܠܪܺܝܫܳܐ ܕܟܳܗ̈ܢܶܐ ܒܰܕܡܽܘܬ ܐܰܗܪܽܘܢ܀

ܪܺܝܫܟܳܗ̈ܢܶܐ: ܐܰܛܐܶܒ ܒܨܶܒܝܳܢܳܟ ܠܨܶܗܝܽܘܢ ܘܰܒܢܺܝ ܫܽܘܪ̈ܶܝܗ ܕܽܐܘܪܺܫܠܶܡ܀

ܡܫܰܡ̈ܫܳܢܶܐ: ܡܕܰܟܝܳܢܳܐ ܕܚܰܘ̈ܒܶܐ܆ ܒܝܰܕ ܡܰܓܢܳܢܽܘܬܶܗ ܕܪܽܘܚܳܐ ܐܰܠܳܗܳܐ܆ ܕܰܟܳܐ ܒܪܽܘܚܳܦܳܟ܆ ܠܥܰܒܕܳܟ ܕܰܡܣܰܟܶܐ (ܠܥܰܒܕܰܝ̈ܟ ܕܰܡܣܰܟܶܝܢ) ܠܫܽܘܡܠܳܝܳܟ܆ ܕܒܶܗ ܢܶܬܕܰܟܶܐ (ܢܶܬܕܰܟܽܘܢ)܀

ܚܽܘܣܳܝܳܐ

ܡܫܰܡ̈ܫܳܢܶܐ: ܣܛܳܘܡܶܢ ܩܰܐܠܽܘܣ ܩܽܘܪܝܶܐܠܶܝܣܽܘܢ܀

ܪܺܝܫܟܳܗ̈ܢܶܐ: ܢܨܰܠܶܐ ܟܽܠܰܢ܆ ܘܪ̈ܰܚܡܶܐ ܘܰܚܢܳܢܳܐ ܡܶܢ ܡܳܪܝܳܐ ܢܶܒܥܶܐ ܡܳܪܝܳܐ ܡܪܰܚܡܳܢܳܐ ܪܰܚܶܡܥܠܰܝܢ ܘܥܰܕܰܪܰܝܢ܀ ܬܶܫܒܽܘܚܬܳܐ ܘܬܰܘܕܺܝܬܳܐ ܘܗܶܕܪܳܐ ܘܩܽܘܠܳܣܳܐ ܘܪܽܘܡܪܳܡܳܐ ܛܳܒܳܐ ܕܠܳܐ ܒܳܛܶܠ ܐܰܡܺܝܢܳܐܺܝܬ ܒܟܽܠܙܒܰܢ ܘܰܒܟܽܠܥܶܕܳܢ ܢܶܫܬܘܶܐ ܕܢܰܣܶܩ܀

ܦܪܽܘܡܺܝܽܘܢ

ܬܶܫܒܽܘܚܬܳܐ ܠܗܰܘ ܡܪܰܚܡܳܢܳܐ ܘܣܰܓܺܝ ܛܰܝܒܽܘܬܳܐ܆ ܕܰܠܓܶܢܣܳܐ ܐ̱ܢܳܫܳܝܳܐ ܡܶܢ ܗܳܝ ܕܠܳܐ ܐܺܝܬܰܘܗ̱ܝ ܗ̱ܘܳܐ܆ ܠܘܳܬ ܗܳܝ ܕܢܶܗܘܶܐ ܐܺܝܬܰܘܗ̱ܝ܆ ܐܰܝܬܺܝ. ܟܰܕ ܒܪܳܝܗ̱ܝ ܘܨܰܒܬܶܗ. ܘܬܽܘܒ ܟܰܕ ܫܪܰܥ ܘܰܢܦܰܠ܆ ܦܪܰܩ ܘܰܐܩܺܝܡ. ܘܰܠܘܳܬ ܪܰܘܡܳܐ ܡܥܰܠܝܳܐ ܕܫܽܘܟܳܢܰܘ̈ܗ̱ܝ ܐܰܠܳܗܳܝ̈ܶܐ ܠܡܶܬܩܰܪܳܒܽܘ ܐܰܫܘܺܝ. ܠܳܟ ܡܳܪܝܳܐ ܡܠܶܐ ܪ̈ܰܚܡܶܐ ܘܰܚܢܳܢܳܐ ܡܦܺܝܣܺܝܢܰܢ ܘܡܶܬܟܰܫܦܺܝܢܰܢ ܒܥܶܕܳܢܳܐ ܗܳܢܳܐ ܥܰܡ ܥܶܛܪܳܐ ܕܒܶܣ̈ܡܶܐ. ܕܰܒܗܽܘܢ ܒܪ̈ܰܚܡܶܐ ܕܺܝܠܳܟ ܡܬܽܘܡܳܝ̈ܶܐ܆ ܬܰܫܘܶܐ ܠܰܡܩܰܒܳܠܽܘ ܘܠܰܡܩܰܪܳܒܽܘ ܠܘܳܬ ܬܶܫܡܶܫܬܶܗ ܕܗܰܝܟܠܳܟ ܕܰܟܝܳܐ ܘܩܰܕܺܝܫܳܐ. ܠܥܰܒܕܳܟ ܗܳܢܳܐ (ܠܥܰܒܕܰܝ̈ܟ ܗܳܠܶܝܢ) ܕܗܳܐ ܩܳܐܶܡ (ܩܳܝܡܺܝܢ) ܟܰܕ ܪܟܺܝܢ (ܪܟܺܝܢܺܝܢ) ܩܕܳܡ ܬܪܽܘܢܽܘܣ ܕܪܰܒܽܘܬܳܟ. ܘܰܡܣܰܟܶܐ (ܘܰܡܣܰܟܶܝܢ) ܠܡܰܘܗܰܒܬܳܐ ܫܡܰܝܳܢܺܝܬܳܐ ܕܡܶܢܳܟ. ܕܠܳܟܽ ܗ̱ܘ ܝܳܐܶܐ ܫܽܘܒܚܳܐ ܘܺܐܝܩܳܪܳܐ ܒܗܳܢܳܐ ܥܶܕܳܢܳܐ ܕܬܶܫܡܶܫܬܳܐ ܗܳܕܶܐ ܪܽܘܚܳܢܳܝܬܳܐ. ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܢܶܐ ܘܫܳܥ̈ܶܐ ܘܙܰܒ̈ܢܶܐ ܘܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ ܠܥܳܠܡܺܝܢ܀

ܣܶܕܪܳܐ

ܡܫܰܒܚܳܐ ܠܳܟ ܡܳܪܝ ܫܡܰܝܳܐ ܒܟܶܢ̈ܫܶܐ ܪ̈ܽܘܚܳܢܳܝܶܐ. ܗܳܢܽܘܢ ܕܰܒܩܘܕ̈ܳܫܶܐ ܬܠܺܝܬܳܝܰܝ̈ ܠܶܥ̈ܙܶܐ ܡܒܰܪܟܺܝܢ ܠܪܰܒܽܘܬܳܟ ܠܳܐ ܡܶܬܡܰܠܠܳܢܺܝܬܳܐ. ܘܣܳܓܕܳܐ ܠܳܟ ܐܰܪܥܳܐ ܒܰܒܢܰܝ̈ܢܳܫܳܐ ܗܳܢܽܘܢ ܕܡܶܢܶܗ ܕܥܰܦܪܳܐ ܒܦܽܘܩܕܳܢܳܟ ܐܶܬܒܪܺܝܘ. ܘܰܠܘܳܬ ܬܶܫܡܶܫܬܳܐ ܕܺܝܠܳܟ ܕܰܟܝܳܐܺܝܬ ܘܩܰܕܺܝܫܳܐܺܝܬ ܠܡܶܬܩܰܪܳܒܽܘ ܐܰܫܘܺܝܬ. ܐܰܢ̱ܬ ܡܳܪܝ܆ ܗܰܘ ܕܟܽܠ ܒܳܨܶܐ ܘܟܽܠ ܡܨܶܐ. ܐܰܢ̱ܬ ܕܰܒܝܰܕ ܒܪܳܐ ܕܺܝܠܳܟ ܚܰܒܺܝܒܳܐ: ܡܳܪܝܳܐ ܕܶܝܢ ܕܺܝܠܰܢ ܘܰܐܠܳܗܰܢ ܘܦܳܪܽܘܩܰܢ ܝܶܫܽܘܥ ܡܫܺܝܚܳܐ܆ ܘܰܒܝܰܕ ܡܰܓܢܳܢܽܘܬܳܐ ܕܪܽܘܚܳܐ ܩܰܕܺܝܫܳܐ. ܐܰܓܥܶܠܬ ܫܽܘ̈ܟܳܢܶܐ ܗܳܠܶܝܢ ܪ̈ܽܘܚܳܢܳܝܶܐ ܕܬܶܫܡܶܫܬܳܐ ܗܳܕܶܐ ܠܰܟܝܳܢܳܐ ܬܰܚܽܘܒܳܐ ܕܺܝܠܰܢ ܒܢܰܝ̈ܢܳܫܳܐ ܥܰܦܪ̈ܳܢܶܐ. ܟܰܕ ܠܰܫܠܺܝ̈ܚܶܐ ܕܺܝܠܳܟ ܩܰܕܺܝ̈ܫܶܐ ܡܠܰܝܬ ܡܶܢ ܩܽܘܕ̈ܫܶܐ ܕܺܝܠܳܟ ܠܳܐ ܡܶܬܕܰܪ̈ܟܳܢܶܐ. ܘܒܺܐܝܕܰܝ̈ܗܽܘܢ ܩܠܺܝ̈ܕܶܐ ܪ̈ܽܘܚܳܢܳܝܶܐ ܕܟܳܗܢܽܘܬܳܐ ܡܳܪܰܬ ܓܰـ̈ܙܶܐ ܠܰܢ ܐܰܓܥܶܠܬ ܘܫܰܟܶܢܬ. ܡܰܘܕܶܝܢܰܢ ܠܪ̈ܰܚܡܰܝܟ ܘܰܡܫܰܒܚܺܝܢܰܢ ܠܛܰܝܒܽܘܬܳܟ. ܘܟܰܕ ܡܫܰܪܪܺܝܢܰܢ ܒܣܰܒܪܳܟ ܪܰܒܳܐ. ܘܰܡܚܰܙܩܺܝܢܰܢ ܒܬܽܘܟܠܳܢܳܐ ܕܰܥܠܰܝܟ. ܐܳܫܕܺܝܢܰܢ ܬܰܟܫܶܦܬܳܐ ܘܒܳܥܽܘܬܳܐ ܕܰܡܚܺܝܠܽܘܬܰܢ ܩܕܳܡ ܪܰܒܽܘܬܳܟ. ܘܰܡܦܺܝܣܺܝܢܰܢ ܠܒܰܣܺܝܡܽܘܬܳܟ. ܠܚܺܝ ܚܛܳܗܰܝ̈ܢ ܒܪ̈ܰܚܡܰܝܟ. ܘܰܐܥܒܰܪ ܣܰܟܠܘ̈ܳܬܰܢ ܒܰܚܢܳܢܳܟ. ܚܰܘܳܐ ܠܰܢ ܓܳܡܽܘܪ̈ܶܐ ܘܰܡܫܰܡܠ̈ܝܳܢܶܐ ܕܦܽܘܩܕܳܢܰܝ̈ܟ. ܘܰܡ̈ܠܰܝܳܐ ܘܰܓܡܺܝܪ̈ܶܐ ܒܩܽܘܕ̈ܫܶܐ ܕܺܝܠܳܟ. ܐܰܝܟܰܢܳܐ ܕܢܶܣܦܰܩ ܠܰܡܫܰܡܳܫܽܘ ܩܕܳܡܰܝܟ܆ ܕܠܳܐ ܡܶܨܛܰܠܝܳܢܽܘܬܳܐ ܕܰܠܘܳܬ ܚܰܫ̈ܐ ܕܰܚܒܳܠܳܐ. ܘܠܰܡܫܰܟܳܢܽܘ ܠܥܰܡܳܐ ܕܺܝܠܳܟ ܡܶܢ ܫܽܘܟܳܢ̈ܐ ܕܺܝܠܳܟ ܪ̈ܳܡܶܐ ܘܰܡܥܰܠܰܝ̈ܳܐ. ܘܠܰܡܩܰܪܳܒܽܘ ܠܘܳܬ ܡܰܕܒܚܳܟ ܩܰܕܺܝܫܳܐ. ܠܰܐܝܢܳܐ (ܠܰܐܝܠܶܝܢ) ܕܺܝܕܰܥܬܳܟ ܐܰܠܳܗܳܝܬܳܐ ܡܚܰܘܝܳܐ ܘܰܡܩܰܪܒܳܐ. ܟܰܕ ܗܺܝ ܪܶܚܡܰܬ ܐ̱ܢܳܫܽܘܬܳܟ ܓܳܡܪܳܐ ܘܰܡܫܰܡܠܝܳܐ ܠܶܗ (ܠܗܽܘܢ). ܒܡܶܨܥܳܝܽܘܬܳܐ ܕܰܡܚܺܝܠܽܘܬܰܢ. ܒܗܳܝ ܕܠܰܘ ܡܶܛܽܠ ܕܫܳܘܶܝܢܰܢ ܡܶܬܩܰܪܒܺܝܢܰܢ. ܐܶܠܳܐ ܟܰܕ ܒܰܚܢܳܢܳܟ ܫܦܺܝܥ ܒܡܰܘܗ̈ܒܳܬܳܐ ܡܶܬܚܰܝܠܺܝܢܰܢ. ܥܰܠܗܳܝ ܠܥܰܒܕܳܟ ܗܳܢܳܐ (ܠܥܰܒܕܰܝ̈ܟ ܗܳܠܶܝܢ) ܕܰܠܬܶܫܡܶܫܬܳܐ ܕܩܳܪܽܘܝܳܐ ܐܶܬܩܪܺܝ (ܕܩܳܪ̈ܽܘܝܶܐ ܐܶܬܩܪܺܝܘ). ܐܰܫܘܳܐ ܠܰܡܩܰܒܳܠܽܘ ܘܠܰܡܫܰܡܠܳܝܽܘ܆ ܒܡܰܓܢܳܢܽܘܬܳܐ ܕܪܽܘܚܳܟ ܐܰܠܳܗܳܝܳܐ܆ ܘܟܰܕ ܠܦܰܓܪܶܗ (ܠܦܰܓܪ̈ܰܝܗܽܘܢ) ܐܰܠܳܗܳܝܳܐ ܘܰܠܢܰܦܫܶܗ (ܘܰܠܢܰܦ̈ܫܳܬܗܽܘܢ) ܐܰܟܚܕܳܐ ܡܕܰܟܶܐ ܐܰܢ̱ܬ ܡܶܢ ܟܽܠ ܛܽܘܠܫܳܐ ܘܟܽܘܬܡܳܐ ܕܥܰܘܠܳܐ ܘܕܰܚܛܺܝܬܳܐ܆ ܢܶܗܘܶܐ (ܢܶܗܘܽܘܢ) ܒܗܰܝܟܠܳܟ ܩܰܕܺܝܫܳܐ܆ ܐܶܡܪܳܐ ܕܰܟܝܳܐ (ܐܶܡܪ̈ܶܐ ܕܟܰܝܳ̈ܐ) ܕܡܶܬܬܢܺܝܚ ܒܶܗ (ܒܗܽܘܢ) ܨܶܒܝܳܢܳܟ ܛܳܒܳܐ ܘܰܡܩܰܒܠܳܐ ܘܰܒܚܰܝܠܳܟ ܐܰܠܳܗܳܝܳܐ ܢܶܬܚܰܝܰܠ (ܢܶܬܚܰܝܠܽܘܢ) ܘܰܠܘܳܬ ܫܽܘ̈ܟܳܢܶܐ ܕܒܺܝܕܰܥܬܳܐ ܕܺܝܠܳܟ ܐܰܠܳܗܳܝܬܳܐ ܘܪܳܡܰܬ ܡܶܢ ܟܽܠ ܡܶܫܬܰܟܢܺܝܢ܆ ܢܶܬܕܰܪܰܓ (ܢܶܬܕܰܪܓܽܘܢ) ܘܰܚܢܰܢ ܘܗܽܘ (ܘܗܶܢܽܘܢ) ܠܚܰܪܬܳܐ ܛܳܒܬܳܐ ܐܰܝܕܳܐ ܕܰܡܠܺܝܟܳܐ ܠܩܰܕܺܝܫܰܝ̈ܟ ܢܶܫܬܘܶܐ. ܘܢܰܣܶܩ ܫܽܘܒܚܳܐ ܘܬܰܘܕܺܝܬܳܐ܆ ܠܳܟ ܐܰܒܳܐ ܓܢܺܝܙܳܐ ܘܠܳܐ ܡܶܬܕܰܪܟܳܢܳܐ. ܘܠܰܒܪܳܟ ܣܓܺܝܕܳܐ ܘܠܳܐ ܡܶܬܥܰܩܒܳܢܳܐ܆ ܘܰܠܪܽܘܚܳܟ ܩܰܕܺܝܫܳܐ ܘܠܳܐ ܡܶܬܒܰܨܝܳܢܳܐ. ܗܳܫܳܐ ܘܰܒܟܽܠܙܒܰܢ ܘܰܠܥܳܠܰܡ ܥܳܠܡܺܝܢ ܐܰܡܺܝܢ ܒܰܪܶܟܡܳܪܝ܀

ܪܺܝܫܟܳܗ̈ܢܶܐ: ܡܶܢ ܐܰܠܳܗܳܐ ܢܩܰܒܶܠ ܚܽܘܣܳܝܳܐ ܕܚܰܘ̈ܒܶܐ ܘܫܽܘܒܩܳܢܳܐ ܕܰܚ̈ܛܳܗܶܐ ܒܰܬܪ̈ܰܝܗܽܘܢ ܥܳܠ̈ܡܶܐ ܠܥܳܠܰܡ ܥܳܠܡܺܝܢ܀

ܩܳܠܳܐ ܒܩ̄: ܐܢܳܐ ܐ̱ܢܳܐ ܢܽܘܗܪܳܐ ܫܰܪܺܝܪܳܐ

ܦܶܬܓܳܡܳܐ: ܫܡܰܥܘ ܗܳܕܶܐ ܟܽܠܟܽܘܢ ܥܰܡ̈ܡܶܐ:

ܐܳܡܰܪ ܠܶܗ ܪܰܒ ܪ̈ܳܥܰܘܳܬܳܐ ܠܫܶܡܥܽܘܢ ܪܺܝܫܳܐ ܕܰܫܠܺܝ̈ܚܶܐ. ܚܙܺܝ ܫܶܡܥܽܘܢ ܡܳܢܳܐ ܥܳܒܶܕ ܐܰܢ̱ܬ ܠܓܽܘܥܠܳܢܳܐ ܕܝܶܗܒܶܬ ܒܺܐܝܕܰܝ̈ܟ܆ ܒܥܺܝܪܽܘܬܳܐ ܛܰܪ ܡܰܪܥܺܝܬܳܟ܆ ܡܶܢ ܣܽܘܓܦܳܢ̈ܶܐ ܘܚܶܪ̈ܝܳܢܶܐ܆ ܕܚܽܘܫܒܳܢܳܐ ܐܺܝܬ ܠܳܟ ܕܬܶܬܶܠ܆ ܩܕܳܡ ܕܰܝܳܢܳܐ ܕܟܺܐܢܽܘܬܳܐ܆ ܕܠܰܝܬ ܒܕܺܝܢܶܗ ܡܰܣܰܒ ܒܰܐܦ̈ܶܐ܀

ܐܰܢܗܰܪܘ ܒܰܪ̈ܩܰܝܟ ܠܬܺܒܶܝܠ:

ܟܬܰܒ ܗ̱ܘܳܐ ܠܶܗ ܦܰܘܠܽܘܣ ܛܽܘܒܳܢܳܐ܆ ܠܛܺܝܡܳܬܶܐܽܘܣ ܬܰܠܡܺܝܕܶܗ܆ ܚܙܺܝ ܐܰܚܽܘܢ ܡܳܢܳܐ ܥܳܒܶܕ ܐܰܢ̱ܬ ܡܶܢ ܥܺܕ̈ܳܬܳܐ ܕܰܡܫܺܝܚܳܐ. ܚܙܺܝ ܠܳܐ ܬܶܬܶܠ ܟܳܗܢܽܘܬܳܐ ܠܳܐ ܠܪ̈ܳܡܶܐ ܘܠܳܐ ܠܙܰܠܺܝ̈ܠܶܐ܆ ܘܠܳܐ ܠܝܰܥ̈ܢܶܐ ܘܠܳܐ ܠܳܐܣܽܘ̈ܛܶܐ܆ ܐܶܠܳܐ ܠܢܺܝ̈ܚܶܐ ܘܡܰܟܺܝ̈ܟܶܐ܆ ܘܟܽܠ ܕܰܕܟܶܐ ܘܰܫܦܶܐ ܘܩܰܕܺܝܫ܀

ܫܘܒܚܐ: ܐܰܠܳܗܳܐ ܕܡܰܠܶܠ ܥܰܡ ܡܽܘܫܶܐ܆ ܒܛܽܘܪ ܣܺܝܢܰܝ ܡܶܢ ܓܰܘ ܣܰܢܝܳܐ܆ ܘܶܐܡܰܪ ܠܶܗ ܕܬܳܐ ܥܽܘܠ ܠܓܰܘ ܡܶܨܪܶܝܢ܆ ܘܰܐܦܶܩ ܠܰܒܢܰܝ̈ ܝܺܣܪܳܐܶܝܠ܆ ܗܽܘ ܢܶܗܘܶܐ ܫܽܘܪܳܐ ܕܫܰܝܢܳܐ܆ ܘܢܳܛܽܘܪܳܐ ܠܥܺܕܰܬ ܩܽܘܕܫܳܐ܆ ܘܬܶܙܡܰܪܝ ܫܽܘܒܚܳܐ ܘܬܰܘܕܺܝܬܳܐ܆ ܠܰܐܒܳܐ ܘܠܰܒܪܳܐ ܘܪܽܘܚܩܽܘܕܫܳܐ܆ ܐ̱ܪܳܙܳܐ ܕܰܬܠܺܝܬܳܝܽܘܬܳܐ܀

ܡܶܢܥܳܠܰܡ: ܚܙܰܘ ܟܳܗ̈ܢܶܐ ܡܳܢܳܐ ܡܫܰܡܫܺܝܬܽܘܢ܆ ܕܰܪ̈ܓܶܐ ܪ̈ܳܡܶܐ ܕܟܳܗܢܽܘܬܳܐ܆ ܕܳܐܣܪܳܐ ܘܫܳܪܝܳܐ ܐܰܝܟ ܕܝܰܗ̱ܒ ܠܳܗ܆ ܦܳܪܽܘܩܳܐ ܕܟܽܠ ܒܶܪ̈ܝܳܬܳܐ܆ ܩܠܺܝ̈ܕܶܐ ܕܪܰܘܡܳܐ ܘܰܕܥܽܘܡܩܳܐ܆ ܗܳܐ ܣܺܝܡܺܝܢ ܒܶܝܬ ܐܺܝܕܰܝ̈ܟܽܘܢ܆ ܘܛܽܘܒܰܝܟܽܘܢ ܟܰܕ ܥܳܒܕܺܝܬܽܘܢ܆ ܨܶܒܝܳܢܶܗ ܕܡܳܪܝܳܐ ܡܳܪܟܽܘܢ܆ ܕܥܰܡܶܗ ܬܶܥܠܽܘܢ ܠܰܓܢܽܘܢܳܐ܀

ܡܫܰܡ̈ܫܳܢܶܐ: ܡܳܪܝܳܐ ܡܪܰܚܡܳܢܳܐ ܪܰܚܶܡܥܠܰܝܢ ܘܥܰܕܰܪܰܝܢ܀

ܥܶܛܪܳܐ

ܒܳܥܶܝܢܰܢ ܡܶܢܳܟ ܡܳܪܝܳܐ ܣܰܓܺܝ ܪ̈ܰܚܡܶܐ. ܕܳܐܦ ܗܳܫܳܐ ܒܗܽܘܢ ܒܪ̈ܰܚܡܶܐ ܕܺܝܠܳܟ ܐܰܒܳܗܳܝ̈ܶܐ. ܩܰܒܶܠ ܗܰܢܺܝܳܐܺܝܬ ܠܥܶܛܪܳܐ ܗܳܢܳܐ ܕܒܶܣ̈ܡܶܐ ܕܩܰܪܶܒܢܰܢ ܠܰܐܠܳܗܽܘܬܳܟ ܪܳܡܰܬ ܡܶܢ ܟܽܠ܆ ܒܡܶܬܩܰܪܒܳܢܽܘܬܳܐ ܕܰܒܢܰܝ̈ܳܐ ܪ̈ܽܘܚܳܢܳܝܶܐ ܕܰܠܬܶܫܡܶܫܬܳܐ ܗܳܕܶܐ ܙܰܡܢܰܬ ܐܶܢܽܘܢ ܪܶܚܡܰܬ ܐ̱ܢܳܫܽܘܬܳܟ. ܘܰܐܫܘܳܐ ܐܶܢܽܘܢ ܕܰܢܫܰܡܫܽܘܢ ܒܗܰܝܟܠܳܟ ܩܰܕܺܝܫܳܐ ܒܰܡܕܰܝܠܳܢܽܘܬܳܐ ܕܟܺܝܬܳܐ. ܟܰܕ ܡܫܰܒܚܺܝܢ ܘܰܡܪܰܡܪܡܺܝܢ ܠܳܟ. ܥܰܡ ܝܺܚܺܝܕܳܝܳܐ ܒܪܳܟ ܘܪܽܘܚܳܟ ܩܰܕܺܝܫܳܐ. ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܢܽܘܗܳܪܳܐ

ܗܳܝܕܶܝܢ ܗܰܘ ܕܡܶܬܛܰܝܰܒ ܕܢܶܬܬܰܣܪܰܚ܆ ܩܳܪܶܐ ܠܩܶܪܝܳܢܳܐ ܗܳܢܐ ܡܶܢ ܚܰܙܩܺܝܐܶܝܠ ܢܒܺܝܐܳ. ܘܶܐܢ ܣܰܓܺܝܐܺܝܢ ܐܶܢܽܘܢ ܗܳܢܽܘܢ ܕܡܶܬܬܰܣܪܚܺܝܢ܆ ܚܰܕ ܡܶܢܗܽܘܢ ܩܳܪܶܐ ܠܶܗ܀

ܙܽܘܡܳܪܳܐ

ܡܫܰܡ̈ܫܳܢܶܐ: ܚܕܺܝܬ ܟܰܕ ܐܳܡܪܺܝܢ ܗ̱ܘܰܘ ܠܺܝ܆ ܠܒܰܝܬܶܗ ܕܡܳܪܝܳܐ ܐܳܙܺܠ̱ܝܢܰܢ ܗܰܠܶܠܽܘܝܰܗ܀

ܙܽܘܡܳܪܳܐ ܐܚܪܺܢܳܐ

ܡܫܰܡ̈ܫܳܢܶܐ: ܩܳܠܳܐ ܕܫܽܘܒܚܳܐ ܘܰܕܦܽܘܪܩܳܢܳܐ ܒܡܰܫܟܢܳܐ ܕܙܰܕܺܝ̈ܩܶܐ ܪܽܘܚܩܽܘܕܫܳܐ ܒܕܰܘܺܝܕ ܙܶܡܪܰܬ܀

ܡܫܰܡܫܳܢܳܐ: ܩܶܪܝܳܢܳܐ ܡܶܢ ܢܒܺܝܽܘܬܶܗ ܕܚܰܙܩܺܐܶܝܠ ܢܒܺܝܳܐ ܡܫܰܒܚܳܐ ܒܰܪܶܟܡܳܪܝ܀

ܡܫܰܡ̈ܫܳܢܶܐ: ܫܽܘܒܚܳܐ ܠܡܳܪܶܗ ܕܰܢܒܺܝܳܐ ܘܰܥܠܰܝܢ ܪ̈ܰܚܡܰܘܗ̱ܝ ܠܥܳܠܡܺܝܢ܀

ܚܙܩܐܝܠ: ܡܓ: ܐ - ܙ܇ ܡܕ: ܝܗ - ܝܘ

ܘܰܐܘܒܠܰܢܝ ܠܬܰܪܥܳܐ ܕܚܳܐܰܪ ܠܡܰܕܢܚܳܐ܆ ܘܗܳܐ ܫܽܘܒܚܶܗ ܕܰܐܠܳܗܳܐ ܕܺܝܣܪܳܐܶܝܠ ܐܳܬܶܐ ܡܶܢ ܐܽܘܪܚܳܐ ܕܡܰܕܢܚܳܐ܆ ܘܩܳܠܶܗ ܐܰܝܟ ܩܳܠܳܐ ܕܡܰܝ̈ܳܐ ܣܰܓܺܝ̈ܐܶܐ܆ ܘܰܐܪܥܳܐ ܢܶܗܪܰܬ ܡܶܢ ܫܽܘܒܚܶܗ. ܐܰܝܟ ܚܶܙܘܳܐ ܕܰܚܙܺܝܬ ܟܰܕ ܐܶܬܺܝܬ ܠܰܡܚܰܒܳܠܽܘ ܠܰܡܕܺܝܢ̱ܬܳܐ. ܘܰܐܝܟ ܚܶܙܘܳܐ ܕܰܚܙܺܝܬ ܥܰܠ ܢܗܰܪ ܟܳܒܳܪ. ܘܢܶܦܠܶܬ ܥܰܠ ܐܰܦܰܝ̈. ܘܫܽܘܒܚܶܗ ܕܡܳܪܝܳܐ ܥܰܠ ܠܒܰܝܬܳܐ܆ ܒܽܐܘܪܚܳܐ ܕܬܰܪܥܳܐ ܕܚܳܐܰܪ ܠܡܰܕܢܚܳܐ. ܘܰܫܩܰܠܬܰܢܝ ܪܽܘܚܳܐ ܘܰܐܥܶܠܬܰܢܝ ܠܕܳܪܬܳܐ ܓܰܘܳܝܬܳܐ܆ ܘܰܚܙܺܝܬ ܕܶܐܬܡܠܺܝ ܒܰܝܬܶܗ ܕܡܳܪܝܳܐ ܫܽܘܒܚܶܗ. ܘܫܶܡܥܶܬ ܡܶܕܶܡ ܕܳܐܡܰܪ ܠܺܝ ܡܶܢ ܓܰܘ ܒܰܝܬܳܐ. ܘܓܰܒܪܳܐ ܩܳܐܶܡ ܗ̱ܘܳܐ ܠܘܳܬܝ ܘܶܐܡܰܪ ܠܺܝ: ܒܰܪܢܳܫܳܐ܆ ܗܳܢܰܘ ܐܰܬܪܳܐ ܕܟܽܘܪܣܰܝ ܘܰܐܬܪܳܐ ܕܦܰܪ̈ܣܳܬܳܐ ܕܪ̈ܶܓܠܰܝ܆ ܕܫܳܪܶܐ ܐ̱ܢܳܐ ܒܶܝܬ ܒܢܰܝ̈ ܝܺܣܪܳܐܶܝܠ܀ ܘܟܳܗ̈ܢܶܐ ܘܠܶܘܳܝ̈ܶܐ ܒܢܰܝ̈ ܨܳܕܽܘܩ܆ ܕܰܢܛܰܪܘ ܡܰܛܪ̈ܳܬܳܐ ܕܡܰܩܕܰܫܝ ܟܰܕ ܛܥܰܘ ܒܢܰܝ̈ ܝܺܣܪܳܐܶܝܠ ܡܶܢܝ܆ ܗܶܢܽܘܢ ܢܶܩܪܒܽܘܢ ܠܘܳܬܝ ܠܰܡܫܰܡܳܫܽܘܬܰܢܝ܆ ܘܗܶܢܽܘܢ ܢܩܽܘܡܽܘܢ ܩܕܳܡܰܝ. ܘܰܢܩܰܪܒܽܘܢ ܠܺܝ ܬܰܪܒܳܐ ܘܰܕܡܳܐ ܐܳܡܰܪ ܡܳܪܶܐ ܡܳܪ̈ܰܘܳܬܳܐ. ܗܶܢܘܢ ܢܶܥܠܽܘܢ ܠܡܰܩܕܰܫܝ܆ ܘܗܶܢܽܘܢ ܢܶܩܪܒܽܘܢ ܠܦܳܬܽܘܪܝ. ܐܰܝܟܰܢܳܐ ܕܰܢܫܰܡܫܽܘܢܳܢܝ ܘܢܶܛܪܽܘܢ ܢܛܽܘܪ̈ܘܳܬܝ ܒܰܪܶܟܡܳܪܝ܀

ܗܽܘܠܳܠܳܐ ܕܶܐܘܰܢܓܶܠܝܽܘܢ

ܡܫܰܡ̈ܫܳܢܶܐ: ܐܰܘܕܰܘ ܠܶܗ ܒܟܶܢܳܪܳܐ ܘܰܒܩܺܝܬܳܪܳܐ܆ ܕܰܥܣܰܪ ܡܶܢܺܝ̈ܢ ܙܰܡܰܪܘ ܠܶܗ ܗܰܠܶܠܘܝܰܗ܀

ܘܩܳܐܶܡ ܪܺܝܫܟܳܗ̈ܢܶܐ ܡܶܢ ܬܪܽܘܢܺܝܽܘܢ܆ ܘܳܐܬܶܐ ܠܰܩܕܳܡ ܦܳܬܽܘܪ ܚܰܝ̈ܐ܆ ܘܟܰܕ ܐܰܦܰܘܗ̱̈ܝ ܠܡܰܥܪܒܳܐ ܩܳܪܶܐ ܠܶܐܘܰܢܓܶܠܺܝܽܘܢ ܡܶܢ ܠܽܘܩܳܐ ܡܣܰܒܪܳܢܳܐ܀

ܡܫܰܡܫܳܢܳܐ: ܒܰܪܶܟ݂ܡܳܪܝ܆ ܥܰܡ ܫܶܠܝܳܐ ܘܕܶܚܠܬ݂ܳܐ ܘܢܰܟ݂ܦܽܘܬ݂ܳܐ ܢܨܘܬ݂ ܘܢܶܫܡܰܥ ܠܰܣܒܰܪܬ݂ܐ ܕܡ̈ܠܶܐ ܚܰܝܳ̈ܬ݂ܐ ܕܶܐܘܰܢܓܶܠܝܘܢ ܩܰܕܝܫܐ ܕܡܳܪܰܢ ܝܶܫܘܥ ܡܫܝܚܐ ܕܡܶܬ݂ܩܪܶܐ ܥܠܰܝܢ܀

ܪܺܝܫܟܳܗ̈ܢܶܐ: ܫܠܳܡܳܐ ܠܟܽܠܟܽܘܢ܀

ܡܫܰܡܫܳܢܳܐ: ܐܰܫܘܳܐ ܠܰܢ ܡܳܪܝܳܐ ܐܰܠܳܗܳܐ. ܘܥܰܡ ܪܽܘܚܳܐ ܕܺܝܠܳܟ݂܀

ܪܺܝܫܟܳܗ̈ܢܶܐ: ܐܶܘܰܢܓܶܠܺܝܽܘܢ ܩܰܕܺܝܫܳܐ ܕܡܳܪܰܢ ܝܶܫܽܘܥ ܡܫܺܝܚܳܐ܆ ܣܒܰܪܬܳܐ ܡܰܚܝܳܢܺܝܬܳܐ ܡܶܢ ܠܽܘܩܳܐ ܡܣܰܒܪܳܢܳܐ ܕܰܡܣܰܒܰܪ ܚܰܝ̈ܶܐ ܘܦܽܘܪܩܳܢܳܐ ܠܥܳܠܡܳܐ܀

ܡܫܰܡܫܳܢܳܐ: ܒܪܺܝܟ݂ ܕܶܐܬ݂ܳܐ ܘܰܥܬܺܝܕ ܕܢܺܐܬ݂ܶܐ ܬܶܫܶܒ̈ܚܳܢ ܠܫܳܠܽܘܚܶܗ ܕܫܰܠܚܶܗ ܠܦܽܘܪܩܳܢܰܢ ܘܥܰܠ ܟܽܠܰܢ ܪ̈ܰܚܡܰܘܗ̱ܝ̱ ܠܥܳܠܡܺܝܢ܀

ܪܺܝܫܟܳܗ̈ܢܶܐ: ܒܙܰܒܢܳܐ ܗܳܟ݂ܺܝܠ ܕܰܡܕܰܒܪܳܢܽܘܬܶܗ ܕܡܳܪܰܢ ܘܰܐܠܳܗܰܢ ܘܦܳܪܽܘܩܳܐ ܕܺܝܠܰܢ ܝܶܫܽܘܥ ܡܫܺܝܚܳܐ ܡܶܠܬ݂ܳܐ ܕܚܰܝ̈ܐ ܐܰܠܳܗܳܐ ܕܶܐܬ݂ܒܰܣܰܪ ܡܶܢ ܒܬ݂ܽܘܠܬܳܐ ܩܰܕܺܝܫܬܳܐ ܡܰܪܝܰܡ ܗܳܠܶܝܢ ܕܶܝܢ ܗܳܟ݂ܰܢܐ ܗܘܰ̈ܝ܀

ܐܶܘܰܢܓܶܠܺܝܽܘܢ ܡܶܢ ܠܽܘܩܳܐ ܡܣܰܒܪܳܢܳܐ

ܕ: ܝܕ - ܟܒ

ܘܰܗܦܰܟ ܝܶܫܽܘܥ ܒܚܰܝܠܳܐ ܕܪܽܘܚܳܐ ܠܰܓܠܺܝܠܳܐ ܘܰܢܦܰܩ ܥܠܰܘܗ̱ܝ ܛܶܒܳܐ ܒܟܽܠܶܗ ܐܰܬܪܳܐ ܕܰܚܕܳܪ̈ܰܝܗܽܘܢ. ܘܗܽܘ ܡܰܠܶܦ ܗ̱ܘܳܐ ܒܰܟܢܽܘ̈ܫܳܬܗܽܘܢ ܘܡܶܫܬܰܒܰܚ ܗ̱ܘܳܐ ܡܶܢ ܟܽܠ ܐ̱ܢܳܫ. ܘܶܐܬܳܐ ܠܢܳܨܪܰܬ ܐܰܝܟܳܐ ܕܶܐܬܪܰܒܺܝ ܘܥܰܠ ܐܰܝܟܰܢܳܐ ܕܰܡܥܳܕ ܗ̱ܘܳܐ ܠܰܟܢܽܘܫܬܳܐ ܒܝܰܘܡܳܐ ܕܫܰܒܬܳܐ ܘܩܳܡ ܠܡܶܩܪܳܐ. ܘܶܐܬܺܝܗܶܒ ܠܶܗ ܣܶܦܪܳܐ ܕܶܐܫܰܥܝܳܐ ܢܒܺܝܳܐ. ܘܰܦܬܰܚ ܝܶܫܽܘܥ ܣܶܦܪܳܐ܆ ܘܶܐܫܟܰܚ ܕܽܘܟܬܳܐ ܐܰܝܟܳܐ ܕܰܟܬܺܝܒ: ܪܽܘܚܶܗ ܕܡܳܪܝܳܐ ܥܠܰܝ܆ ܘܡܶܛܽܠ ܗܳܕܶܐ ܡܰܫܚܰܢܝ ܠܰܡܣܰܒܳܪܽܘ ܠܡܶܣ̈ܟܺܢܶܐ܆ ܘܫܰܠܚܰܢܝ ܠܡܰܐܣܳܝܽܘ ܠܰܬܒܺܝܪ̈ܰܝ ܠܶܒܳܐ ܘܰܠܡܰܟܪܳܙܽܘ ܠܰܫ̈ܒܰܝܳܐ ܫܽܘܒܩܳܢܳܐ܆ ܘܠܰܥܘܺܝܪ̈ܶܐ ܚܙܳܝܳܐ܆ ܘܠܰܡܫܰܪܳܪܽܘ ܠܰܬܒܺܝܪ̈ܶܐ ܒܫܽܘܒܩܳܢܳܐ܆ ܘܰܠܡܰܟܪܳܙܽܘ ܫܰܢ̱ܬܳܐ ܡܩܰܒܰܠܬܳܐ ܠܡܳܪܝܳܐ. ܘܰܟܪܰܟ ܣܶܦܪܳܐ ܘܝܰܗܒܶܗ ܠܰܡܫܰܡܫܳܢܳܐ ܘܶܐܙܰܠ ܝܺܬܶܒ. ܟܽܠܗܽܘܢ ܕܶܝܢ ܕܒܰܟܢܽܘܫܬܳܐ ܥܰܝܢܰܝ̈ܗܽܘܢ ܚܳܝܪ̈ܳܢ ܗ̱ܘܰܝ̈ ܒܶܗ. ܘܫܰܪܺܝ ܠܡܺܐܡܰܪ ܠܘܳܬܗܽܘܢ: ܕܝܰܘܡܳܢܳܐ ܐܶܫܬܰܠܰܡ ܟܬܳܒܳܐ ܗܳܢܳܐ ܒܶܐܕܢܰܝ̈ܟܽܘܢ. ܘܣܳܗܕܺܝܢ ܗ̱ܘܰܘ ܠܶܗ ܟܽܠܗܽܘܢ ܘܡܶܬܕܰܡܪܺܝܢ ܗ̱ܘܰܘ ܒܡܶـ̈ܠܶܐ ܕܛܰܝܒܽܘܬܳܐ ܕܢܳܦ̈ܩܳܢ ܗ̱ܘܰܝ̈ ܡܶܢ ܦܽܘܡܶܗ܀

ܥܶܢܝܳܢܳܐ ܕܫܰܒܰܚܘ ܠܡܳܪܝܳܐ ܒܪܶܟܢܳܐ ܕܩܰܕܺܝܫܳܐ ܕܰܐܫܪܺܝ

ܪܺܝܫܟܳܗ̈ܢܶܐ: ܫܰܒܰܚܘ ܠܡܳܪܝܳܐ ܒܩܽܘܕܫܶܗ ܫܰܒܚܽܘܗ̱ܝ ܒܰܪܩܺܝܥܳܐ ܕܥܽܘܫܢܶܗ܀

ܡܫܰܡ̈ܫܳܢܶܐ: ܩܰܕܺܝܫܳܐ ܕܰܐܫܪܺܝ ܫܟܺܝܢܬܶܗ܆ ܥܰܠ ܛܽܘܪ ܣܺܝܢܰܝ ܘܩܰܕܫܶܗ. ܗܽܘ ܢܺܐܬܶܐ ܘܢܶܫܪܶܐ ܘܢܰܓܶܢ܆ ܥܰܠ ܥܰܒܕܶܗ (ܥܰܒܕܰܘܗ̱̈ܝ) ܘܢܶܬܩܰܕܰܫ (ܘܢܶܬܩܰܕܫܽܘܢ)܀

ܪܺܝܫܟܳܗ̈ܢܶܐ: ܫܰܒܚܽܘܗ̱ܝ ܒܚܰܝܠܬܳܢܽܘܬܶܗ܆ ܫܰܒܚܽܘܗ̱ܝ ܒܣܽܘܓܐܳܐ ܕܪܰܒܽܘܬܶܗ܀

ܡܫܰܡ̈ܫܳܢܶܐ: ܨܠܳܐ ܪܳܡܳܐ ܥܰܠ ܛܽܘܪ ܣܺܝܢܰܝ܆ ܘܰܐܓܶܢ ܐܺܝܕܶܗ ܥܰܠ ܡܽܘܫܶܐ. ܘܡܽܘܫܶܐ ܣܳܡܳܗ ܥܰܠ ܐܰܗܪܽܘܢ܆ ܘܶܐܬܝܰܒܠܰܬ ܨܶܝܕ ܝܽܘܚܰܢܢ܀

ܪܺܝܫܟܳܗ̈ܢܶܐ: ܫܰܒܚܽܘܗ̱ܝ ܒܩܳܠܳܐ ܕܩܰܪܢܳܐ. ܫܰܒܚܽܘܗ̱ܝ ܒܩܺܝܬܳܪ̈ܶܐ ܘܰܒܟܶܢܳܪ̈ܶܐ܀

ܡܫܰܡ̈ܫܳܢܶܐ: ܪܽܘܚܳܐ ܩܰܕܺܝܫܳܐ ܕܰܐܓܶܢ܆ ܥܰܠ ܫܠܺܝ̈ܚܶܐ ܒܓܰܘ ܥܶܠܺܝܬܳܐ. ܗܽܘ ܢܺܐܬܶܐ ܘܢܶܫܪܶܐ ܘܢܰܓܶܢ܆ ܥܰܠ ܥܰܒܕܶܗ (ܥܰܒܕܰܘܗ̱̈ܝ) ܘܢܶܬܩܰܕܰܫ (ܘܢܶܬܩܰܕܫܽܘܢ)܀

ܪܺܝܫܟܳܗ̈ܢܶܐ: ܫܰܒܚܽܘܗ̱ܝ ܒܰܦ̈ܠܰܓܶܐ ܘܒܰܪ̈ܒܺܝܥܶܐ܆ ܫܰܒܚܽܘܗ̱ܝ ܒܡܶܢ̈ܶܐ ܚܰܠ̈ܝܳܬܳܐ܀

ܡܫܰܡ̈ܫܳܢܶܐ: ܪܽܘܚܳܐ ܕܡܰܠܶܠ ܒܰܢ̈ܒܺܝܶܐ܆ ܘܶܐܬܳܐ ܘܰܐܓܶܢ ܥܰܠ ܫܠܺܝ̈ܚܶܐ. ܗܽܘ ܢܺܐܬܶܐ ܘܢܶܫܪܶܐ ܘܢܰܓܶܢ. ܥܰܠ ܥܰܒܕܶܗ (ܥܰܒܕܰܘܗ̱̈ܝ) ܘܢܶܬܩܰܕܰܫ (ܘܢܶܬܩܰܕܫܽܘܢ)܀

ܪܺܝܫܟܳܗ̈ܢܶܐ: ܫܰܒܚܽܘܗ̱ܝ ܒܨܺܝܨܠܰܝ̈ ܫܶܡܥܳܐ܆ ܫܰܒܚܽܘܗ̱ܝ ܒܩܳܠܳܐ ܘܒܰܩܥܳܬܳܐ܆ ܟܽܠ ܢܶܫܡܳܐ ܬܫܰܒܰܚܝ ܠܡܳܪܝܳܐ܀

ܡܫܰܡ̈ܫܳܢܶܐ: ܛܳܒܳܐ ܕܰܐܓܥܶܠ ܠܰܫܠܺܝ̈ܚܰܘܗ̱ܝ܆ ܫܽܘܠܛܳܢܳܐ ܕܪܰܘܡܳܐ ܘܥܽܘܡܩܳܐ. ܐܰܫܪܳܐ ܫܟܺܝܢܬܳܟ ܒܛܰܝܒܽܘܬܳܟ܆ ܥܰܠ ܥܰܒܕܳܟ (ܥܰܒܕܰܝ̈ܟ) ܘܢܶܬܩܰܕܰܫ (ܘܢܶܬܩܰܕܫܽܘܢ)܀

ܡܫܰܡ̈ܫܳܢܶܐ: ܒܰܪܶܟܡܳܪܝ܀

ܪܺܝܫܟܳܗ̈ܢܶܐ: ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ܀

ܡܫܰܡ̈ܫܳܢܶܐ: ܫܽܘܒܚܳܐ ܠܰܐܒܐ ܩܰܕܺܝܫܳܐ܆ ܕܫܰܕܰܪ ܠܰܒܪܶܗ ܩܰܕܺܝܫܳܐ. ܘܰܒܝܰܕ ܪܽܘܚܶܗ ܩܰܕܺܝܫܳܐ܆ ܝܳܗܶܒ ܩܽܘܕ̈ܫܶܐ ܠܩܰܕܺܝ̈ܫܶܐ܀

ܪܺܝܫܟܳܗ̈ܢܶܐ: ܡܶܢܥܳܠܰܡ: ܪܽܘܚܳܐ ܩܰܕܺܝܫܳܐ ܕܩܰܕܶܫ܆ ܠܰܫܡܽܘܐܶܝܠ ܡܶܢ ܓܰܘ ܟܰܪܣܳܐ. ܗܽܘ ܢܺܐܬܶܐ ܘܢܶܫܪܶܐ ܘܢܰܓܶܢ. ܥܰܠ ܥܰܒܕܶܗ(ܥܰܒܕܰܘܗ̱̈ܝ) ܘܢܶܬܩܰܕܰܫ (ܘܢܶܬܩܰܕܫܽܘܢ)܀

ܪܺܝܫ ܡܫܰܡ̈ܫܳܢܶܐ: ܣܛܳܘܡܶܢ ܩܰܐܠܽܘܣ܀

ܥܰܡܳܐ: ܩܽܘܪܝܶܠܶܝܣܽܘܢ܀

ܡܫܰܡ̈ܫܳܢܶܐ: ܩܽܘܪܝܶܠܶܝܣܽܘܢ܀

ܪܺܝܫܟܳܗ̈ܢܶܐ ܡܨܰܠܶܐ ܨܠܽܘܬܳܐ ܗܳܕܶܐ ܟܰܕ ܓܳܗܶܝܢ

ܓܗܳܢܬܳܐ

ܒܳܥܶܝܢܰܢ ܘܰܡܦܺܝܣܺܝܢܰܢ ܠܳܟ ܡܳܪܝܳܐ ܐܰܠܳܗܳܐ܆ ܩܰܒܶܠ ܠܥܰܒܕܳܟ ܗܳܢܳܐ (ܠܥܰܒܕܰܝ̈ܟ ܗܳܠܶܝܢ ܩܳܪ̈ܽܘܝܶܐ) ܒܥܺܕܬܳܟ ܩܰܕܺܝܫܬܳܐ܆ ܚܰܟܶܡܳܝܗ̱ܝ (ܚܰܟܶܡ ܐܶܢܽܘܢ) ܒܦܽܘܩܕܳܢܰܝ̈ܟ. ܣܰܟܶܠܳܝܗ̱ܝ (ܣܰܟܶܠ ܐܶܢܽܘܢ) ܙܶܕ̈ܩܶܐ ܕܺܝܠܳܟ܆ ܘܫܰܟܶܢ ܠܶܗ (ܘܫܰܟܶܢ ܠܗܽܘܢ) ܕܰܒܕܶܚܠܬܳܐ ܢܶܦܠܽܘܚ (ܢܶܦܠܚܽܘܢ) ܠܳܟ ܥܰܒܕܽܘܬܳܐ. ܟܰܕ ܡܰܫܘܶܐ ܐܰܢ̱ܬ ܠܶܗ (ܠܗܽܘܢ) ܠܡܶܗܘܳܐ ܡܳܐܢܳܐ (ܡܳܐܢ̈ܶܐ) ܕܰܓܒܺܝܬܳܐ. ܘܩܳܪܽܘܝܳܐ ܡܝܰܩܪܳܐ (ܘܩܳܪ̈ܽܘܝܶܐ ܡܝܰܩܪ̈ܶܐ) ܩܕܳܡܰܝܟ. ܐܰܝܟܰܢܳܐ ܕܳܐܦ ܗܽܘ ܢܶܫܟܰܚ (ܗܳܢܽܘܢ ܢܶܫܟܚܽܘܢ) ܪ̈ܰܚܡܶܐ ܩܕܳܡܰܝܟ ܥܰܡ ܗܳܠܶܝܢ ܕܡܶܢ ܥܳܠܰܡ ܫܦܰܪܘ ܠܳܟ܀

ܬܠܳܝܬܳܐ

ܪܺܝܫܟܳܗ̈ܢܶܐ: ܡܶܛܽܠ ܕܰܐܠܳܗܳܐ ܕܨܳܒܶܐ ܒܪ̈ܰܚܡܶܐ ܘܰܒܪܶܚܡܰܬ ܐ̱ܢܳܫܽܘܬܳܐ ܐܺܝܬܰܝܟ܆ ܘܠܳܟ ܦܐܶܐ ܫܽܘܒܚܳܐ ܘܺܐܝܩܳܪܳܐ ܘܣܶܓܕܬܳܐ ܡܶܢ ܟܽܠ. ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ. ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܥܰܡܳܐ: ܐܰܡܺܝܢ ܒܰܪܶܟܡܳܪܝ܀

ܪܺܝܫܟܳܗ̈ܢܶܐ: ܫܠܳܡܳܐ ܠܟܽܠܟܽܘܢ܀

ܥܰܡܳܐ: ܘܥܰܡ ܪܽܘܚܳܐ ܕܺܝܠܳܟ܀

ܟܶܢ܆ ܪܺܝܫ ܟܳܗ̈ܢܶܐ ܢܳܣܶܒ ܠܡܰܣܦܳܪܳܐ ܒܺܐܝܕܶܗ܆ ܘܰܡܣܰܦܰܪ ܠܣܰܥܪܳܐ ܕܪܺܝܫܶܗ ܕܡܶܣܬܰܦܪܳܢܳܐ ܨܠܺܝܒܳܐܺܝܬ ܟܰܕ ܐܳܡܰܪ:

ܪܺܝܫܟܳܗ̈ܢܶܐ: ܡܶܣܬܰܦܰܪ (ܦܠܳܢ) ܡܶܬܪܫܶܡ ܡܙܰܡܪܳܢܳܐ ܠܥܺܕܬܳܐ ܩܰܕܺܝܫܬܳܐ ܕܰ(ܦܠܳܢܺܝܬ) ܕܰܒܕܽܘܟܬܳܐ (ܦܠܳܢܺܝܬ)܀

ܡܫܰܡ̈ܫܳܢܶܐ: ܒܰܪܶܟܡܳܪܝ܀

ܪܺܝܫܟܳܗ̈ܢܶܐ: ܒܰܫܡܳܐ ܕܰܐܒܳܐ ♱

ܥܰܡܳܐ: ܐܰܡܺܝܢ.

ܪܺܝܫܟܳܗ̈ܢܶܐ: ܘܕܰܒܪܳܐ ♱

ܥܰܡܳܐ: ܐܰܡܺܝܢ.

ܪܺܝܫܟܳܗ̈ܢܶܐ: ܘܰܕܪܽܘܚܳܐ ܚܰܝܳܐ ܩܰܕܺܝܫܳܐ ܠܚܰܝ̈ܶܐ ܕܰܠܥܳܠܰܡ ܥܳܠܡܺܝܢ܀ ♱

ܥܰܡܳܐ: ܐܰܡܺܝܢ.

ܬܠܳܝܬܳܐ

ܪܺܝܫܟܳܗ̈ܢܶܐ: ܐܰܠܳܗܳܐ ܗܰܘ ܪܰܒܳܐ ܘܥܰܬܺܝܪ ܒܡܰܘܗ̈ܒܳܬܳܐ. ܗܰܘ ܕܛܶܟܣ̈ܶܐ ܫܰܟܶܢܬ ܠܥܺܕܬܳܟ. ܘܕܰܪ̈ܓܶܐ ܐܰܩܺܝܡܬ ܒܳܗ ܕܬܶܫܡܶܫܬܳܐ. ܘܶܐܫܰܕܬ ܡܰܘܗܰܒܬܳܟ ܥܰܠ ܥܰܒܕܰܝ̈ܟ. ܩܰܕܶܫ ܐܳܦ ܠܥܰܒܕܳܟ ܗܳܢܳܐ (ܠܥܰܒܕܰܝ̈ܟ ܗܳܠܶܝܢ) ܘܰܓܒܺܝܘܗ̱ܝ ܠܩܳܪܽܘܝܳܐ (ܘܰܓܒܺܝ ܐܶܢܽܘܢ ܠܩܳܪ̈ܽܘܝܶܐ)܆ ܘܰܐܫܘܳܝܗ̱ܝ (ܘܰܐܫܘܳܐ ܐܶܢܽܘܢ) ܕܥܰܡ ܟܽܠܳܗ ܚܶܟܡܬܳܐ ܘܣܽܘܟܳܠܳܐ ܢܶܥܒܶܕ (ܢܶܥܒܕܽܘܢ) ܗܽܘܓܳܝܳܐ ܘܩܶܪܝܳܢܳܐ ܕܡܶـ̈ܠܶܐ ܐܰܠܳܗܳܝ̈ܳܬܳܐ. ܘܰܡܠܺܝܘܗ̱ܝ (ܘܰܡܠܺܝ ܐܶܢܽܘܢ) ܡܶܢ ܡܰܘܗ̈ܒܳܬܳܟ. ܟܰܕ ܡܶܬܢܛܰܪ (ܡܶܬܢܰܛܪܺܝܢ) ܒܕܽܘܒܳܪ̈ܶܐ ܠܳܐ ܥܕܺܝ̈ܠܶܐ܀

ܪܺܝܫܟܳܗ̈ܢܶܐ: ܐܰܝܟܰܢܳܐ ܕܰܢܩܰܪܶܒ ܫܽܘܒܚܳܐ ܕܠܳܐ ܫܰܠܘܳܐ ܡܶܛܽܠ ܣܰܓܺܝܐܽܘܬ ܛܰܝܒ̈ܘܳܬܳܟ ܕܡܶܬܝܰܗ̈ܒܳܢ ܠܓܶܢܣܰܢ. ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܗܳܝܕܶܝܢ ܪܺܝܫ ܡܫܰܡ̈ܫܳܢܶܐ ܡܰܥܶܠ ܠܡܶܬܬܰܣܪܚܳܢܳܐ ܠܰܩܕܳܡܰܘܗ̱ܝ ܕܪܺܝܫ ܟܳܗ̈ܢܶܐ܆ ܘܡܶܬܦܢܶܐ ܪܺܝܫܟܳܗ̈ܢܶܐ ܠܘܳܬ ܟܽܠ ܚܰܕ ܡܶܢܗܽܘܢ ܟܰܕ ܠܳܒܶܟ ܒܬܰܪ̈ܬܰܝܗܶܝܢ ܐܺܝ̈ܕܰܘܗ̱ܝ ܠܰܬܪܶܝܢ ܨܶܕ̈ܥܰܘܗ̱ܝ ܘܰܡܨܰܠܶܐ ܫܰܠܝܳܐܺܝܬ ܨܠܽܘܬܳܐ ܗܳܕܶܐ܀

ܓܗܳܢܬܳܐ

ܐܰܠܳܗܳܐ ܗܰܘ ܪܰܒܳܐ ܘܪܳܚܶܡ ܐ̱ܢܳܫܳܐ܆ ܗܰܘ ܕܒܺܐܝܕܰܝ̈ܟ ܟܽܠܗܶܝܢ ܠܒܺܝ̈ܟܳܢ܆ ܘܰܒܪܶܡܙܳܟ ܟܽܠܗܶܝܢ ܐܰܚܺܝ̈ܕܳܢ. ܗܰܘ ܕܰܠܟܽܠ ܩܰܪܺܝܒ ܐܰܢ̱ܬ. ܘܰܠܘܳܬ ܟܽܠ ܡܶܕܶܡ ܩܳܐܶܡ ܐܰܢ̱ܬ. ܚܽܘܪ ܒܥܰܒܕܳܟ ܗܳܢܳܐ (ܒܥܰܒܕܰܝ̈ܟ ܗܳܠܶܝܢ) ܕܡܶܢܰܢ ܡܶܬܩܰܪܰܒ (ܡܶܬܩܰܪܒܺܝܢ). ܕܢܶܗܘܶܐ ܟܳܪܽܘܙܳܐ (ܕܢܶܗܽܘܘܢ ܟܳܪ̈ܽܘܙܶܐ) ܕܡܶܠܰܝ̈ܟ ܩܰܕܺܝ̈ܫܳܬܳܐ܆ ܘܦܽܘܩܕܳܢܰܝ̈ܟ ܬܪ̈ܺܝܨܶܐ. ܘܢܰܙܥܶܩ (ܢܰܙܥܩܽܘܢ) ܝܽܘܠܦܳܢܰܝ̈ܟ ܐܰܠܳܗܳܝ̈ܐ ܘܦܳܪ̈ܽܘܩܳܝܶܐ. ܗܳܠܶܝܢ ܕܣܳܡܬ ܠܥܽܘܕܪܳܢܳܐ ܘܦܽܘܪܩܳܢܳܐ ܕܢܰܦ̈ܫܳܬܰܢ܀

ܪܺܝܫܟܳܗ̈ܢܶܐ܆ ܬܳܠܶܐ ܩܳܠܶܗ ܟܰܕ ܢܶܗܘ̈ܝܳܢ ܐܺܝܕܰܘܗ̱̈ܝ ܐܳܦ ܠܒܺܝ̈ܟܳܢ ܠܨܶܕ̈ܥܰܘܗ̱ܝ ܕܡܶܬܬܰܣܪܚܳܢܳܐ ܘܳܐܡܰܪ:

ܬܠܳܝܬܳܐ

ܪܺܝܫܟܳܗ̈ܢܶܐ: ܐܺܝܢ ܐܰܠܳܗܳܐ܆ ܚܰܟܶܡܳܝܗ̱ܝ (ܚܰܟܶܡ ܐܶܢܽܘܢ) ܒܦܽܘܩܕܳܢܰܝ̈ܟ܆ ܘܣܰܟܶܠܳܝܗ̱ܝ (ܘܣܰܟܶܠ ܐܶܢܽܘܢ) ܙܶܕ̈ܩܶܐ ܕܺܝܠܳܟ. ܘܰܐܢܗܰܪ ܥܰܝ̈ܢܶܐ ܕܬܰܪܥܺܝܬܶܗ (ܕܬܰܪ̈ܥܝܳܬܗܽܘܢ) ܠܡܰܢܗܪܳܢܽܘܬܳܐ ܕܺܝܕܰܥܬܳܐ ܕܦܽܘܩܕܳܢܰܝ̈ܟ. ܘܗܰܒ ܠܶܗ (ܠܗܽܘܢ) ܕܰܒܕܰܟܝܽܘܬܳܐ ܕܠܶܒܳܐ܆ ܘܰܒܗܰܝܡܳܢܽܘܬܳܐ ܕܠܐ ܡܰܣܰܒ ܒܰܐܦ̈ܐ܆ ܢܶܥܒܶܕ (ܢܶܥܒܕܽܘܢ) ܗܽܘܓܳܝ̈ܐ ܘܩܶܪ̈ܝܳܢܶܐ ܕܗܳܠܶܝܢ. ܠܒܶܢܝܳܢܳܐ ܕܗܳܢܽܘܢ ܕܨܳܝܬܺܝܢ. ܠܬܶܫܒܽܘܚܬܳܐ ܘܰܠܩܽܘܠܳܣܳܐ. ܕܡܰܠܟܽܘܬܳܐ ܕܺܝܠܳܟ. ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ. ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܗܳܝܕܶܝܢ ܪܺܝܫܟܳܗ̈ܢܶܐ ܢܳܣܶܒ ܠܽܐܘܪܳܪܳܐ ܒܝܰܡܺܝܢܶܗ ܘܰܡܒܰܪܶܟ ܥܠܰܘܗ̱ܝ ܘܰܡܙܰܝܰܚ ܠܶܗ ܠܥܶܠ ܡܶܢ ܪܺܝܫܶܗ ܕܡܶܬܬܰܣܪܚܳܢܳܐ ܟܰܕ ܐܳܡܰܪ:

ܠܬܶܫܒܽܘܚܬܳܐ ܘܠܺܐܝܩܳܪܳܐ ܘܗܶܕܪܳܐ ܘܪܽܘܡܪܳܡܳܐ ܕܰܬܠܺܝܬܳܝܽܘܬܳܐ ܩܰܕܺܝܫܬܳܐ ܘܫܰܘܝܰܬ ܒܽܐܘܣܺܝܰܐ. ܘܰܠܫܰܝܢܳܐ ܘܒܶܢܝܳܢܳܐ ܕܥܺܕܬܳܐ ܩܰܕܺܝܫܬܳܐ ܕܰܐܠܳܗܳܐ܀

ܟܶܢ ܝܳܗܶܒ ܠܶܗ ܠܰܐܪܟܺܝܕܝܰܩܽܘܢ ܕܢܰܠܒܫܺܝܘܗ̱ܝ ܠܡܶܬܬܰܣܪܚܳܢܳܐ. ܘܢܶܗܘܶܐ ܐܰܝܟ ܨܠܺܝܒܳܐ ܥܰܠ ܚܰܕܝܶܗ ܘܥܰܠ ܚܰܨܶܗ܀
ܘܰܡܫܰܡ̈ܫܳܢܶܐ ܕܶܝܢ ܬܳܢܶܝܢ ܘܰܡܬܰܠܬܺܝܢ: "ܠܬܶܫܒܽܘܚܬܳܐ ܘܠܺܐܝܩܳܪܳܐ ܘܗܶܕܪܳܐ ܘܪܽܘܡܪܳܡܳܐ ܕܰܬܠܺܝܬܳܝܽܘܬܳܐ ܩܰܕܺܝܫܬܳܐ ܘܫܰܘܝܰܬ ܒܽܐܘܣܺܝܰܐ. ܘܰܠܫܰܝܢܳܐ ܘܒܶܢܝܳܢܳܐ ܕܥܺܕܬܳܐ ܩܰܕܺܝܫܬܳܐ ܕܰܐܠܳܗܳܐ܀"
ܘܝܳܗܶܒ ܠܶܗ ܟܬܳܒܳܐ ܕܩܶܪ̈ܝܳܢܶܐ܆ ܟܰܕ ܛܥܺܝܢ ܝܳܗܶܒ ܫܠܳܡܳܐ ܠܦܳܬܽܘܪ ܚܰܝ̈ܶܐ. ܘܢܳܫܶܩ ܝܰܡܺܝܢܶܗ ܕܪܺܝܫܟܳܗ̈ܢܶܐ. ܘܟܽܠܶܗ ܥܰܡܳܐ ܘܰܩܠܺܝܪܽܘܣ ܡܗܰܢܶܝܢ ܠܶܗ. ܘܰܡܫܰܘܬܶܦ ܠܶܗ ܒܐ̱ܪ̈ܳܙܶܐ ܩܰܕܺܝ̈ܫܶܐ ܠܗܰܘ ܕܶܐܬܬܰܣܪܰܚ ܥܰܡ ܩܠܺܝܪ̈ܺܝܩܽܘ܀ ܟܶܢ ܪܺܝܫܟܳܗ̈ܢܶܐ܆ ܝܳܗܶܒ ܠܶܗ ܠܩܳܪܽܘܝܳܐ ܚܰܕܬܳܐ܆ ܟܬܺܝܒܬܳܐ ܕܡܶܬܬܰܣܪܚܳܢܽܘܬܶܗ܆ ܕܬܶܬܢܛܰܪܝ ܠܘܳܬܶܗ ܐܰܝܟ ܕܰܠܣܳܗܕܽܘܬܳܐ܀

ܫܠܶܡ ܛܶܟܣܳܐ ܕܰܪܫܳܡ ܩܳܪ̈ܽܘܝܶܐ