ܬܽܘܪܓܳܡܳܐ

ܬܽܘܪܓܳܡܳܐ ܕܩܳܪܶܐ ܠܶܗ ܪܺܝܫܟܳܗ̈ܢܶܐ ܥܰܠ ܗܳܢܽܘܢ ܕܡܶܬܛܰܝܒܺܝܢ ܕܰܢܩܰܒܠܽܘܢ ܠܰܣܝܳܡܺܝܕܳܐ ܕܰܡܫܰܡܫܳܢܽܘܬܳܐ܆ ܟܰܕ ܡܫܰܒܠܳܢܗܽܘܢ ܢܶܗܘܶܐ ܩܰܪܺܝܒ ܘܫܳܡܰܥ. ܐܶܢ ܗܳܟܺܝܠ ܚܰܕܽ ܗ̱ܘ ܡܶܬܬܰܣܪܚܳܢܳܐ܆ ܢܺܐܡܰܪ ܠܬܽܘܪܓܳܡܳܐ ܒܰܙܢܳܐ ܚܕܳܢܳܝܳܐ܆ ܘܶܐܢ ܣܰܓܺܝܐܺܝܢ܆ ܒܰܙܢܳܐ ܣܰܓܺܝܐܳܢܳܝܳܐ܀

ܩܕܳܡ ܕܶܝܢ ܕܰܢܫܰܪܶܐ ܪܺܝܫܟܳܗ̈ܢܶܐ ܒܬܽܘܪܓܳܡܳܐ܆ ܢܶܬܦܢܶܐ ܠܘܳܬ ܡܫܰܒܠܳܢܳܐ ܕܗܰܘ ܕܗܳܐ ܡܶܬܬܰܣܪܰܚ ܘܢܺܐܡܰܪ ܠܶܗ: ܗܳܢܳܐ ܬܰܠܡܺܝܕܳܟ ܫܳܘܶܐ [ܗܳܠܶܝܢ ܬܰܠܡܺܝ̈ܕܰܝܟ ܫܳܘܶܝܢ] ܠܛܶܟܣܳܐ ܗܳܢܳܐ ܩܰܕܺܝܫܳܐ ܕܰܡܫܰܡܫܳܢܽܘܬܳܐ؟ ܘܟܰܕ ܡܦܰܢܶܐ ܗܽܘ ܡܫܰܒܠܳܢܳܐ ܘܢܺܐܡܰܪ: ܐܺܝܢ ܡܳܪܝ܀ ܗܳܝܕܶܝܢ ܡܫܰܪܶܐ ܪܺܝܫܟܳܗ̈ܢܶܐ ܒܬܽܘܪܓܳܡܳܐ ܗܳܟܰܢܳܐ܀

ܐܰܡܽܘܠܽܘܓܺܝܰܐ

ܙܽܘܗܳܪܳܐ ܩܦܺܝܣܳܐ ܕܳܐܡܰܪ ܠܶܗ ܪܺܝܫ ܟܳܗ̈ܢܶܐ܆ ܥܰܠ ܡܫܰܡ̈ܫܳܢܶܐ ܘܩܰܫܺܝ̈ܫܶܐ ܩܕܳܡ ܕܢܰܣܪܰܚ ܐܶܢܽܘܢ

ܒܪܳܐ ܕܺܝܠܰܢ ܪܽܘܚܳܢܳܝܳܐ܆ (ܒܢܰܝ̈ܳܐ ܕܺܝܠܰܢ ܪ̈ܽܘܚܳܢܳܝܶܐ) ܟܰܕ ܠܰܡ ܨܳܒܶܐ ܐܰܢ̱ܬ (ܨܳܒܶܝܬܽܘܢ) ܠܡܶܬܩܰܪܳܒܽܘ ܠܬܶܫܡܶܫܬܶܗ ܕܰܐܠܳܗܳܐ ܡܪܰܝܡܳܐ܆ ܘܰܠܕܰܪܓܳܐ ܗܳܢܳܐ ܪܳܡܳܐ܆ ܐܰܝܟ ܕܬܶܗܘܶܐ ܒܳܚܰܪ (ܕܬܶܗܘܽܘܢ ܒܳܚܪܺܝܢ) ܐ̱ܪ̈ܳܙܰܘܗ̱ܝ ܕܰܡܫܺܝܚܳܐ ܡܳܪܰܢ. ܩܰܒܶܠ (ܩܰܒܶܠܘ) ܡܶܟܺܝܠ ܠܡܰܘܗܰܒܬܳܐ ܗܳܕܶܐ ܪܰܒܬܳܐ ܕܠܰܝܬ ܦܽܘܪܥܳܢܳܐ ܠܛܺܝܡܶܝ̈ܗ܆ ܕܡܶܬܝܰܗܒܳܐ ܠܳܟ (ܠܟܽܘܢ) ܒܝܰܕ ܡܚܺܝܠܽܘܬܰܢ.

ܥܰܠܗܳܕܶܐ ܕܢܰܘܕܥܳܟ (ܕܢܰܘܕܰܥܟܽܘܢ) ܐܺܝܬ ܠܰܢ. ܘܽܐܘܪܚܳܐ ܬܪܺܝܨܬܳܐ ܠܳܟ (ܠܟܽܘܢ) ܢܰܠܶܦ ܕܬܶܪܕܶܐ (ܕܬܶܪܕܽܘܢ) ܒܳܗ. ܘܬܶܛܰܪ (ܘܬܶܛܪܽܘܢ) ܠܗܰܝܡܳܢܽܘܬܳܐ ܬܪܺܝܨܬܳܐ܆ ܕܠܳܐ ܢܶܟܠܳܐ܆ ܐܰܝܟ ܕܰܐܫܠܡܳܗ ܡܳܪܰܢ ܝܶܫܽܘܥ ܡܫܺܝܚܳܐ ܒܰܣܒܰܪܬܶܗ ܠܬܰܠܡܺܝ̈ܕܰܘܗ̱ܝ ܓܒܰܝ̈ܳܐ܆ ܘܗܶܢܽܘܢ ܐܰܫܠܡܽܘܗ ܠܰܒܢܰܝ̈ ܥܺܕܬܳܐ ܩܰܕܺܝܫܬܳܐ ܒܝܰܕ ܬܰܠܡܺܝܕܰܝ̈ܗܽܘܢ ܫܠܺܝ̈ܚܶܐ ܘܝܰܕܘܥ̈ܬܳܢܶܐ ܘܡܰܠ̈ܦܳܢܶܐ ܐܳܪ̈ܬܳܕܽܘܟܣܳܝܶܐ.

ܘܳܐܦ ܘܳܠܶܐ ܠܳܟ ܕܰܬܗܰܝܡܶܢ (ܠܟܽܘܢ ܕܰܬܗܰܝܡܢܽܘܢ) ܗܰܝܡܳܢܽܘܬܳܐ ܬܪܺܝܨܬܳܐ ܒܰܐܒܳܐ ܘܰܒܪܳܐ ܘܪܽܘܚܳܐ ܕܩܽܘܕܫܳܐ: ܬܠܳܬܳܐ ܩܢܽܘ̈ܡܶܐ܆ ܚܰܕ ܐܰܠܳܗܳܐ. ܘܬܶܗܘܶܐ ܗܰܝܡܳܢܽܘܬܳܟ (ܗܰܝܡܳܢܽܘܬܟܽܘܢ) ܒܓܶܠܝܳܐ ܘܰܒܟܶܣܝܳܐ ܒܦܽܘܡܳܐ ܘܰܒܠܶܫܳܢܳܐ. ܘܬܶܗܘܶܐ ܡܗܰܝܡܶܢ (ܘܬܶܗܘܽܘܢ ܡܗܰܝܡܢܺܝܢ) ܕܶܝܢ܆ ܕܠܰܡ ܚܰܕ ܡܶܢ ܬܠܳܬܳܐ ܩܢܽܘ̈ܡܶܐ ܕܺܐܝܬܰܘܗܝ ܡܶܠܬܶܗ ܕܰܐܠܳܗܳܐ ܢܚܶܬ ܡܶܢ ܫܡܰܝܳܐ ܒܨܶܒܝܳܢܶܗ ܘܰܒܨܶܒܝܳܢܳܐ ܕܰܐܒܽܘܗ̱ܝ ܘܰܕܪܽܘܚܶܗ ܩܰܕܺܝܫܳܐ܆ ܘܰܐܓܶܢ ܒܳܗ ܒܰܒܬܽܘܠܬܳܐ ܕܟܺܝܬܳܐ ܡܰܪܝܰܡ ܘܶܐܬܓܰܫܰܡ ܡܶܢܳܗ ܪܶܚܡܰܬ ܐ̱ܢܳܫܳܐܺܝܬ. ܘܒܶܗ ܒܥܶܕܳܢܳܐ ܕܰܫܪܶܐ ܗ̱ܘܳܐ ܒܰܒܬܽܘܠܬܳܐ܆ ܝܰܬܺܝܒ ܗ̱ܘܳܐ ܐܳܦ ܥܰܠ ܟܽܘܪܣܰܝ ܪܰܒܽܘܬܳܐ ܟܰܕ ܘܰܡܫܰܡܠܰܝܽ ܗ̱ܘ ܒܰܐܠܳܗܽܘܬܶܗ ܘܰܒܐ̱ܢܳܫܽܘܬܶܗ܆ ܘܚܰܕܽ ܗ̱ܘ ܒܰܩܢܽܘܡܳܐ ܘܳܐܦ ܒܰܟܝܳܢܳܐ. ܘܺܐܝܬ ܠܳܟ (ܠܟܽܘܢ) ܬܽܘܒ ܕܰܬܗܰܝܡܶܢ ܘܬܶܩܰܦ (ܕܰܬܗܰܝܡܢܽܘܢ ܘܬܶܩܦܽܘܢ) ܠܦܶܛܪܽܘܣ ܪܺܝܫܳܐ ܕܰܫܠܺܝ̈ܚܶܐ ܘܠܰܫܠܺܝ̈ܚܶܐ ܚܰܒܪ̈ܰܘܗ̱ܝ܆ ܘܰܠܫܰܒܥܺܝܢ ܘܰܬܪܶܝܢ ܡܣܰܒܪ̈ܳܢܶܐ܆ ܘܡܳܪܝ ܐܺܝܓܢܰܛܺܝܽܘܣ ܢܽܘܪܳܢܳܐ ܘܕܺܝܽܘܢܽܘܣܺܝܽܘܣ ܘܝܽܘܠܺܝܽܘܣ ܘܰܐܬܰܢܰܣܺܝܽܘܣ ܘܒܰܣܶܝܠܺܝܽܘܣ ܘܰܓܪܺܝܓܽܘܪܺܝܽܘܣ ܘܺܐܝܘܰܢܺܝܣ ܘܩܽܘܪܺܝܠܽܘܣ ܘܕܺܝܽܘܣܩܽܘܪܽܘܣ ܡܰܘܕܝܳܢܳܐ܆ ܘܣܶܘܶܝܪܺܝܽܘܣ ܠܶܫܳܢܳܐ ܕܟܽܠܗܽܘܢ ܡܰܠ̈ܦܳܢܶܐ܆ ܘܰܕܬܶܗܘܶܐ ܡܶܬܛܦܺܝܣ (ܘܰܕܬܶܗܘܽܘܢ ܡܶܬܛܦܺܝܣܺܝܢ) ܡܶܢ ܒܳܬܰܪܗܽܘܢ ܠܩܰܕܺܝܫܽܘܬܶܗ ܕܡܳܪܰܢ ܡܳܪܝ ܐܺܝܓܢܰܛܺܝܽܘܣ (ܦܠܳܢ) ܦܰܛܪܺܝܰܪܟܳܐ ܕܰܐܢܛܺܝܽܘܟܺܝܰܐ܆ ܘܠܺܝ ܐܶܢܳܐ ܡܚܺܝܠܳܐ ܚܰܣܝܳܐ ܕܡܰܪܥܺܝܬܳܐ ܗܳܕܶܐ ܕܪܳܕܶܐ ܐ̱ܢܳܐ ܒܰܫܒܺܝܠܗܽܘܢ ܬܪܺܝܨܳܐ. ܘܬܰܣܠܶܐ (ܘܬܰܣܠܽܘܢ) ܥܰܡܰܢ ܠܟܽܠܗܽܘܢ ܚܰܢ̈ܦܶܐ ܘܰܡܓܽܘ̈ܫܶܐ ܘܝܽܗ̱ܘܕ̈ܝܶܐ ܘܟܽܠܗܽܘܢ ܗܶܪ̈ܶܛܺܝܩܽܘ܆ ܘܬܰܚܪܶܡ (ܘܬܰܚܪܡܽܘܢ) ܗܰܘ ܡܳܐ ܕܡܰܚܪܡܺܝܢܰܢ܆ ܘܡܰܣܠܶܐ ܐܰܢ̱ܬ (ܘܡܰܣܠܶܝܬܽܘܢ) ܗܰܘ ܡܳܐ ܕܡܰܣܠܶܝܢܰܢ.

ܡܗܰܝܡܶܢ ܐ̱ܢܳܐ ܒܡܳܐ ܕܰܡܗܰܝܡܢܺܝܬܽܘܢ܆ ܘܡܰܚܪܶܡ ܐܢܳܐ ܠܡܰܢ ܕܡܰܚܪܡܺܝܬܽܘܢ.

ܘܗܳܫܳܐ ܕܶܝܢ ܡܦܰܩܕܺܝܢܰܢ ܠܳܟ ܕܬܶܗܘܶܐ ܡܫܰܡܶܫ (ܠܟܽܘܢ ܕܬܶܗܘܽܘܢ ܡܫܰܡܫܺܝܢ) ܠܰܐܠܳܗܳܐ ܡܥܰܠܰܝ ܒܟܽܠ ܐܰܝܟ ܕܝܳܐܶܐ ܘܙܳܕܶܩ ܕܠܳܐ ܚܒܰܢܳܢܽܘ ܘܡܰܐܺܝܢܽܘ. ܘܬܶܛܰܪ ܢܰܦܫܳܟ (ܘܬܶܛܪܽܘܢ ܢܰܦ̈ܫܳܬܟܽܘܢ) ܡܶܢ ܡܽܘ̈ܡܶܐ ܘܳܐܣܽܘܛܽܘܬܳܐ ܘܪܰܘܳܝܽܘܬܳܐ ܘܡܶܢ ܟܽܠ ܡܶܕܶܡ ܕܡܰܪܚܶܩ ܠܒܰܪܢܳܫܳܐ ܡܶܢ ܐܰܠܳܗܳܐ܆ ܐܰܝܟ ܕܦܰܩܶܕ ܫܠܺܝܚܳܐ ܦܰܘܠܽܘܣ «ܘܳܠܶܐ ܕܶܝܢ ܕܢܶܗܘܶܐ ܩܰܫܺܝܫܳܐ ܐܰܝܢܳܐ ܕܡܽܘܡܳܐ ܠܳܐ ܡܶܫܬܟܰܚ ܒܶܗ ܘܰܕܥܺܝܪ ܪܶܥܝܳܢܶܗ ܘܰܢܟܶܦ ܘܰܡܛܰܟܰܣ ܘܪܳܚܶܡ ܐܰܟܣ̈ܢܳܝܶܐ ܘܡܰܠܦܳܢ ܘܠܳܐ ܥܳܒܰܪ ܥܰܠ ܚܰܡܪܳܐ ܘܠܳܐ ܪܳܗܛܳܐ ܐܺܝܕܶܗ ܠܡܶܡܚܳܐ. ܐܶܠܳܐ ܢܶܗܘܶܐ ܡܰܟܺܝܟ ܘܠܳܐ ܢܰܨܳܝ ܘܠܳܐ ܪܳܚܶܡ ܟܶܣܦܳܐ“ ܒܗܳܝ ܕܗܳܠܶܝܢ ܟܽܠܗܶܝܢ ܣܰܢ̈ܝܳܢ ܐܶܢܶܝܢ ܠܘܳܬ ܐܰܠܳܗܳܐ. ܘܬܶܗܘܶܐ ܕܶܝܢ ܐܰܡܺܝܢ (ܘܬܶܗܘܽܘܢ ܕܶܝܢ ܐܰܡܺܝܢܺܝ̈ܢ) ܒܨܰܘܡܳܐ ܘܒܰܨܠܽܘܬܳܐ. ܘܰܒܕܶܚܠܬܳܐ ܘܰܒܬܰܟܫܶܦܬܳܐ ܕܰܠܘܳܬ ܡܫܺܝܚܳܐ ܡܳܪܰܢ܆ ܚܠܳܦܰܝܟ (ܚܠܳܦܰܝܟܽܘܢ) ܘܰܚܠܳܦ ܟܽܠܶܗ ܥܰܡܳܐ ܕܰܩܕܳܡܰܘܗ̱ܝ ܡܨܰܠܶܐ ܐܰܢ̱ܬ (ܡܨܰܠܶܝܬܽܘܢ). ܘܬܶܗܘܶܐ ܐܳܦ ܪܳܚܶܡ (ܘܬܶܗܘܽܘܢ ܐܳܦ ܪܳܚܡܺܝܢ) ܠܰܐܟܣ̈ܢܳܝܶܐ ܘܠܰܡܚܺܝ̈ܠܶܐ ܘܰܠܡܶܣ̈ܟܺܢܶܐ܆ ܘܶܐܬܚܰܣܢ ܠܳܟ (ܘܶܐܬܚܰܣܢܘ ܠܟܽܘܢ) ܒܡܰܟܺܝܟܽܘܬܳܐ ܘܢܺܝܚܽܘܬܳܐ ܘܒܰܣܺܝܡܽܘܬܳܐ ܥܰܡ ܟܽܠ ܐ̱ܢܳܫ. ܘܬܶܫܬܘܶܐ ܕܰܡܫܰܡܫܳܢܳܐ ܫܰܪܺܝܪܳܐ (ܘܬܶܫܬܘܽܘܢ ܕܰܡܫܰܡ̈ܫܳܢܶܐ ܫܰܪܺܝܪ̈ܶܐ) ܒܒܰܝܬܶܗ ܕܰܐܠܳܗܳܐ ܬܶܗܘܶܐ (ܬܶܗܘܽܘܢ). ܐܰܝܟܰܢܳܐ ܕܳܐܦ ܚܢܰܢ ܕܰܒܓܰܠܝܽܘܬ ܐܰܦ̈ܐ ܢܩܽܘܡ ܩܕܳܡܰܘܗ̱ܝ ܕܰܡܫܺܝܚܳܐ ܡܳܪܰܢ ܘܰܕܠܳܐ ܥܶܕܠܳܝ ܢܶܫܬܟܰܚ ܡܶܛܽܠܳܬܳܟ (ܡܶܛܽܠܳܬܟܽܘܢ) ܩܕܳܡ ܐܰܠܳܗܳܐ܀

ܕܰܥ ܠܳܟ (ܕܰܥܘ ܠܟܽܘܢ) ܐܳܘ̃ ܒܪܳܐ ܕܺܝܠܰܢ ܚܰܒܺܝܒܳܐ (ܒܢܰܝ̈ܳܐ ܕܺܝܠܰܢ ܚܰܒܺܝ̈ܒܶܐ) ܕܗܳܢܳܐ ܪܽܘܫܡܳܐ܀

ܪܺܝܫܟܳܗ̈ܢܶܐ܆ ܗܳܪܟܳܐ ܒܡܰܣܦܳܪܳܐ ܠܣܰܥܪܶܗ ܨܠܺܝܒܳܐܺܝܬ ܡܣܰܦܰܪ܀

ܣܳܗܕܳܐ ܢܶܗܘܶܐ ܥܠܰܝܟ (ܥܠܰܝܟܽܘܢ) ܩܕܳܡ ܐܰܠܳܗܳܐ ܘܡܰܠܰܐܟܰܘ̈ܗ̱ܝ ܩܰܕܺܝ̈ܫܶܐ܆ ܘܰܩܕܳܡ ܡܰܕܒܚܳܐ ܗܳܢܳܐ ܩܰܕܺܝܫܳܐ܆ ܕܬܶܗܘܶܐ ܢܳܛܰܪ (ܕܬܶܗܘܽܘܢ ܢܳܛܪܺܝܢ) ܠܗܰܝܡܳܢܽܘܬܳܐ ܬܪܺܝܨܰܬ ܫܽܘܒܚܳܐ ܕܠܳܟ (ܕܰܠܟܽܘܢ) ܐܰܫܠܶܡܢ܆ ܕܠܳܐ ܢܶܟܠܳܐ ܐܳܦܠܳܐ ܒܡܰܣܰܒ ܒܰܐܦ̈ܐ. ܕܰܚܢܰܢ ܘܰܐܢ̱ܬ (ܘܰܐܢ̱ܬܽܘܢ) ܢܶܗܘܶܐ ܩܳܝܡܺܝܢ ܐܰܟܚܰܕ ܒܓܰܠܝܽܘܬ ܐܰܦ̈ܐ ܩܕܳܡܰܘܗ̱ܝ ܕܰܡܫܺܝܚܳܐ ܡܳܪܰܢ ܒܡܶܐܬܺܝܬܶܗ ܕܬܰܪܬܶܝܢ܀

ܘܳܐܦ ܗܳܫܳܐ ܒܺܐܝܕܳܟ (ܒܺܐܝܕܰܝ̈ܟܽܘܢ) ܒܰܟܬܳܒܳܐ ܗܳܢܳܐ܆ ܠܪܽܘܫܡܳܐ ܕܰܨܠܺܝܒܳܐ ܬܶܪܫܽܘܡ (ܬܶܪܫܡܽܘܢ)܀

ܗܳܪܟܳܐ܆ ܗܰܘ ܕܡܶܬܬܰܣܪܰܚ܆ ܬܳܠܶܐ ܪܺܝܫܶܗ܆ ܘܪܺܝܫܟܳܗ̈ܢܶܐ ܠܳܒܶܟ ܠܩܰܢܝܳܐ ܒܝܰܡܺܝܢܶܗ ܘܗܰܘ ܕܶܝܢ ܕܡܶܬܬܰܣܪܰܚ܆ ܣܳܐܶܡ ܝܰܡܺܝܢܶܗ ܠܥܶܠ ܡܶܢ ܝܰܡܺܝܢܳܐ ܕܪܺܝܫܟܳܗ̈ܢܶܐ ܘܪܳܫܶܡ ܢܺܝܫܳܐ ܕܰܨܠܺܝܒܳܐ. ܘܒܳܬܰܪܟܶܢ ܗܽܘ ܪܺܝܫܟܳܗ̈ܢܶܐ ܐܰܘ ܣܽܘܢܩܶܠܳܐ ܕܺܝܠܶܗ܆ ܟܳܬܶܒ ܫܡܶܗ ܕܰܡܫܰܡܫܳܢܳܐ ܘܕܰܐܒܽܘܗ̱ܝ ܘܰܕܫܰܪܒܬܶܗ ܘܰܕܥܺܕܬܳܐ ܕܠܳܗ ܡܶܬܬܰܣܪܰܚ܆ ܒܶܗ ܒܓܰܒܶܗ ܕܰܨܠܺܝܒܳܐ ܟܶܢ ܡܰܩܶܦ ܪܺܝܫ ܟܳܗ̈ܢܶܐ ܘܳܐܡܰܪ:

ܟܰܕ ܡܶܫܬܰܘܕܶܐ ܐܰܢ̱ܬ (ܡܶܫܬܰܘܕܶܝܬܽܘܢ) ܕܡܶܕܶܡ ܡܶܢ ܗܰܘ ܡܳܐ ܕܦܰܩܶܕܢܳܟ ܠܳܐ ܬܫܰܚܠܶܦ (ܕܦܰܩܶܕܢܳܟܽܘܢ ܠܳܐ ܬܫܰܚܠܦܽܘܢ). ܘܰܕܬܶܗܘܶܐ ܡܶܫܬܰܡܥܳܢܳܐ (ܘܰܕܬܶܗܘܽܘܢ ܡܶܫܬܰܡ̈ܥܳܢܶܐ) ܠܰܢ ܘܢܳܛܽܘܪܳܐ (ܘܢܳܛܽܘܪ̈ܶܐ) ܠܦܽܘܩܕܳܢܰܝ̈ܢ ܕܢܰܚܶܝܟ (ܕܢܰܚܶܝܟܽܘܢ) ܐܰܠܳܗܳܐ. ܘܶܐܠܳܐ ܗܽܘ ܡܳܪܝܳܐ ܢܕܽܘܢ ܒܶܝܬ ܠܺܝ ܘܠܳܟ (ܘܰܠܟܽܘܢ) ܒܝܰܘܡܶܗ ܕܕܺܝܢܳܐ. ܘܗܳܐ ܐܶܢܳܐ ܐܰܪܺܝܡܶܬ ܐܺܝ̈ܕܰܝ ܠܰܫܡܰܝܳܐ ܕܢܰܓܶܢ ܥܠܰܝܟ (ܥܠܰܝܟܽܘܢ) ܪܽܘܚܳܐ ܩܰܕܺܝܫܳܐ. ܒܗܳܝ ܕܺܐܝܬܰܝ ܡܶܨܥܳܝܳܐ ܒܰܨܒܽܘܬܳܐ ܗܳܕܶܐ܆ ܕܠܳܐ ܠܰܡ ܬܶܛܥܶܐ (ܬܶܛܥܽܘܢ) ܡܶܕܶܡ ܡܶܢ ܗܳܠܶܝܢ ܕܦܰܩܶܕܢܳܟ (ܕܦܰܩܶܕܢܳܟܽܘܢ) ܘܗܳܐ ܩܕܳܡ ܐܰܠܳܗܳܐ ܩܳܝܡܺܝܢܰܢ ܘܰܩܕܳܡ ܡܰܠܰܐܟܰܘ̈ܗ̱ܝ ܘܣܳܗ̈ܕܶܐ ܘܩܰܕܺܝ̈ܫܶܐ܆ ܕܗܶܢܽܘܢ ܢܶܗܘܽܘܢ ܣܳܗ̈ܕܶܐ ܒܶܝܬ ܠܺܝ ܘܠܳܟ (ܘܰܠܟܽܘܢ)܆ ܕܠܳܐ ܡܚܰܠܶܦ ܐܰܢ̱ܬ (ܡܚܰܠܦܺܝܬܽܘܢ) ܡܶܕܶܡ ܡܶܢ ܗܳܠܶܝܢ ܕܰܐܫܠܶܡܢ ܠܳܟ (ܠܟܽܘܢ).

ܡܶܬܟܰܫܦܺܝܢܰܢ ܠܶܗ ܠܡܳܪܰܢ ܝܶܫܽܘܥ ܡܫܺܝܚܳܐ ܕܢܶܦܪܩܰܢ ܘܢܶܦܪܩܳܟ (ܘܢܶܦܪܽܘܩܟܽܘܢ) ܡܶܢ ܚܰܘ̈ܒܶܐ ܘܢܰܫܘܶܝܟ ܕܰܬܩܽܘܡ (ܘܢܰܫܘܶܝܟܽܘܢ ܕܰܬܩܽܘܡܽܘܢ) ܩܕܳܡܰܘܗ̱ܝ܆ ܟܰܕ ܚܳܕܶܐ ܐܰܢ̱ܬ ܘܙܰܟܳܝ (ܚܳܕܶܝܬܽܘܢ ܘܙܰܟܳܝܺܝܬܽܘܢ) ܒܗܰܘ ܡܳܐ ܕܰܐܫܠܶܡܢ ܠܳܟ (ܠܟܽܘܢ)܆ ܘܬܶܫܡܰܥ (ܘܬܶܫܡܥܽܘܢ) ܩܳܠܶܗ ܡܚܰܕܝܳܢܳܐ ܕܳܐܡܰܪ: «ܬܳܐ ܠܘܳܬܝ ܒܪܺܝܟܰܐ ܗ̱ܘ ܕܳܐܒܝ (ܬܰܘ ܠܘܳܬܝ ܒܪ̈ܺܝܟܰܐ ܗ̱ܘ ܕܳܐܒܝ)܆ ܝܺܪܰܬ (ܝܺܪܰܬܘ) ܡܰܠܟܽܘܬܳܐ ܕܰܡܛܰܝܒܳܐ ܠܳܟ (ܠܟܽܘܢ) ܩܕܳܡ ܬܰܪ̈ܡܝܳܬܶܗ ܕܥܳܠܡܳܐ. ܒܰܨ̈ܠܰܘܳܬܳܐ ܕܰܒܬܽܘܠܬܳܐ ܕܟܺܝܬܳܐ ܡܰܪܝܰܡ ܝܳܠܕܰܬ ܐܰܠܳܗܳܐ ܘܰܕܟܽܠܗܽܘܢ ܣܳܗ̈ܕܶܐ ܘܩܰܕܺܝ̈ܫܶܐ. ܐܰܡܺܝܢ܀

ܫܠܶܡ ܬܽܘܪܓܳܡܳܐ ܕܡܶܬܩܪܶܐ ܥܰܠ ܐܰܝܠܶܝܢ ܕܰܠܛܶܟܣܳܐ ܕܰܡܫܰܡܫܳܢܳܐ ܘܕܰܪܓܳܐ ܕܩܰܫܺܝܫܳܐ ܡܶܬܩܰܪܒܺܝܢ܀

ܗܦܰܟ ←