ܦܪܽܘ̣ܡܝܽܘܢ

ܬܶܫܒܘ̣ܚܬܳܐ: ܠܗܰܘ̇ ܚܰܝܠܬܳܢܳܐ ܕܰܒܚܰܝܠܶܗ ܛܥܝ̣ܢ ܒܶܪ̈ܝܳܬܳܐ ܕܛܰܥܢ̣ܶܗ ܩܰܝܣܳܐ ܕܰܨܠܝ̣ܒܳܐ ܒܨܶܒܝܳܢܶܗ: ܠܗܰܘ̇ ܓܢܝ̣ܙܳܐ ܘܰܡܥܰܠܝܳܐ ܕܒܰܕܡܶܗ ܚܰܣܝܳܐ ܕܐܶܫܬ̣ܦܰܥ ܠܚ̣ܳܐ ܐܶܫܛܳܪ ܚܰܘ̈ܒܶܐ ܕܐ̱ܢܳܫܘ̣ܬܳܐ: ܠܗܰܘ̇ ܦܫܝ̣ܛܳܐ ܕܐܶܬ̣ܪܰܟܰܒ ܘܒܰܦܫܳܛܳܐ ܕܐܝ̣̈ܕܰܘܗ̱ܝ ܐܶܚ̣ܰܕ ܠܟܽܠܗܽܘܢ ܣܰܘ̈ܦܶܐ ܕܥܳܡܰܪܬܳܐ: ܠܗܰܘ̇ ܡܳܪܳܐ ܕܢܘ̣ܗܪܳܐ ܘܰܕܡܰܕܢܚܳܐ ܕܰܠܡܰܥܪܒܳܐ ܪܟ̣ܶܒ ܕܢ̣ܶܦܪܘ̣ܩ ܠܰܢ ܡ̣ܶܢ ܚܶܫܘ̣ܟܳܐ ܕܰܚܛܝ̣ܬܳܐ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܦܶܠܓܶܗ ܕܝܰܘܡܳܐ ܘܰܕܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒܢ̈ܶܐ ܘܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܠܳܟ ܫܽܘ̣ܒܚܳܐ ܘܠܳܟ ܬܰܘܕܝ̣ܬܳܐ: ܒܳܪܘ̣ܝܳܐ ܚܰܟܝ̣ܡܳܐ ܕܰܒܫܶܬ ܡܶܠܝ̣̈ܢ ܠܥܳܠܡܳܐ ܘܰܠܟܽܠ ܕܐܝ̣ܬ ܒܶܗ ܐܰܬ̣ܩܶܢ ܘܛܰܟܶܣ ܒܚܶܟܡܬܶܗ: ܘܒܶܫܬܳܐ ܝܰܘܡܝ̣̈ܢ ܕܚܰܫܶܗ ܫܰܡܠܝ̣ ܟܽܠ ܐ̱ܪ̈ܳܙܝ̣ܢ ܘܚ̣ܰܕܶܬ ܠܰܒܪܝ̣ܬܳܐ: ܒܰܪ ܚܺܐܪ̈ܶܐ ܕܒܰܥܪܘ̣ܒܬܳܐ ܚܰܘܝ̣ ܡܶܫܬܰܡܥܳܢܘ̣ܬܳܐ ܕܠܳܐ ܣܳܟܳܐ ܘܰܫ̣ܪܳܐ ܠܰܥܒܳܪ ܦܘ̣ܩܕܳܢܳܐ ܕܐܰܒܽܘܢ ܐܳܕܳܡ ܩܰܕܡܳܝܳܐ: ܝ̣ܚܝ̣ܕܳܝܳܐ ܐܰܠܳܗܳܐ ܕܰܡ̣ܬܰܚ ܐܝ̣ܕܰܘ̈ܗ̱ܝ ܒܰܙܩܝ̣ܦܳܐ ܒܝܰܘܡܳܐ ܕܰܥܪܘ̣ܒܬܳܐ ܘܰܐܣܝ̣ ܠܰܦܫܳܛ ܐܝ̣ܕܰܘ̈ܗ̱ܝ ܕܐܳܕܳܡ ܕܝܰܥܢܳܐܝ̣ܬ ܐܶܬܩ̣ܰܪܰܒ ܠܦܺܐܪܳܐ: ܘܡܶܛܽܠܳܬܶܗ ܩܰܒ̣ܶܠ ܚܰܫܳܐ ܘܡܰܘܬܳܐ ܕܰܙܩܝ̣ܦܳܐ ܡ̣ܶܢ ܨܳܠܘ̣̈ܒܶܐ ܨܰܗ̈ܝܰܝ ܠܰܕܡܳܐ ܘܩܶܛܠܳܐ: ܘܠܶܒܗܽܘܢ ܕܰܩ̇ܫܶܐ̣ ܡ̣ܶܢ ܛܰܪܳܢܳܐ ܠܳܐ ܐܰܪܓܶܫ̣ܘ̱ ܒܰܐܝܠܶܝܢ ܕܰܗ̣ܘܰܝ̈ ܘܠܳܐ ܐܶܬ̣ܬܙܝ̣ܥܘ̱ ܡ̣ܶܢ ܐܰܝܠܶܝܢ ܕܰܣܥ̣ܰܪܘ̱: ܬܶܕܡܪ̈ܳܬܳܐ ܕܚܰܘܝ̣ ܠܗܽܘܢ ܗܘ̣ ܒܳܪܘ̣ܝܳܐ ܐܰܡ̣ܪܰܚܘ̱ ܟܰܕ ܚ̣ܰܙܐܘܽܘ̣ܗ̱ܝ: ܘܰܐܪܓ݂ܶܫܘ̱ ܘܝ̣ܕܰܥܘ̱ ܕܝ̣ܚܝ̣ܕܳܝܰܐ ܗ̱ܘ̇ ܕܐܰܠܳܗܳܐ ܘܡܶܠܬܳܐ: ܘܠܳܐ ܚ̣ܰܪܰܪܘ̱ ܢܰܦܫ̈ܳܬܗܽܘܢ ܘܠܳܐ ܐܰܫܝ̣ܓܘ̱ ܐܝ̣ܕܰܝ̈ܗܽܘܢ ܐܶܠܳܐ ܒܩܰܫܝܘ̣ܬ ܠܶܒܗܽܘܢ ܟ̣ܰܬܰܪܘ̱ ܘܣܳܡ̣ܘ̱ ܐܰܦܰܝ̈ܗܽܘܢ ܠܩܶܛܠܳܐ: ܘܶܐܬܥ̣ܰܬܰܕܘ̱ ܠܡܶܐܫܰܕ ܕܡܳܐ ܙܰܟܳܝܳܐ: ܘܰܐܪܡܝ̣ܘ ܐܝ̣̈ܕܰܝܳܐ ܥܠܰܘܗ̱ܝ ܘܚܰܝܒܘ̣ܗ̱ܝ ܠܦܳܪܘ̣ܩܳܐ: ܐܰܚܕܘ̣ܗ̱ܝ ܒܰܙܗܝ̣ܪܘ̣ܬܳܐ ܘܰܐܥ̣ܠܘ̣ܗ̱ܝ ܠܕܝ̣ܢܳܐ ܘܰܐܫ̣ܠܡܘ̣ܗ̱ܝ ܠܕܰܝܳܢܳܐ: ܐܰܛܥܢܘ̣ܗ̱ܝ ܨܠܝ̣ܒܳܐ ܘܬܰܪܨܘ̣ܗ̱ܝ ܠܓܳܓܘ̣ܠܬܳܐ ܘܐܰܣ̣ܩܘ̣ܗ̱ܝ ܠܰܙܩܝ̣ܦܳܐ ܕܐܶܬ̣ܩܒܰܥ ܒܰܡܨܰܥܬܳܗ̇ ܕܐܰܪܥܳܐ: ܣܳܡ̣ܘ̱ ܟܠܝ̣ܠܳܐ ܕܟܘ̣̈ܒܶܐ ܥܰܠ ܪܝ̣ܫܳܐ ܕܝ̣ܠܶܗ ܡܫܰܒܚܳܐ: ܙܠܰܚ̣ܘ̱ ܪܘ̣ܩܳܐ ܒܰܐܦܰܘ̈ܗ̱ܝ: ܐܰܠܒܫܘ̣ܗ̱ܝ ܟܠܰܐܡܽܘ̣ܕܰܐ ܕܰܙܚܘ̣ܪܝ̣ܬܳܐ ܒܒܶܙܚܳܐ: ܐܰܫܩܝܘ̣ܗ̱ܝ ܚܰܠܳܐ ܘܰܡܪܳܪ̈ܶܐ: ܒܰܙܰܥܘ̱ ܐܝ̣ܕܰܘ̈ܗ̱ܝ ܘܪ̈ܶܓܠܰܘܗ̱ܝ: ܕܰܩܪܘ̣ܗ̇ ܕܰܦܢܶܗ ܒܠܘ̣ܟܳܝܬܳܐ ܘܰܪܕܰܘ ܡܶܢܶܗ ܕܡܳܐ ܘܡܰܝ̈ܳܐ ܕܨܳܝ̇ܪܝ̣ܢ ܚܰܝܘ̣ܬܳܐ ܘܡܝ̣ܬܘ̣ܬܳܐ: ܐܰܙܥ̣ܩ ܒܩܳܠܳܐ ܪܳܡܳܐ ܘܐܶܡ̣ܰܪ: ܐܶܠܘܳܝ ܐܶܠܘܳܝ ܠܰܡܰܐ ܣܰܐܒܰܩܬܰܐܢܺܝ̣: ܘܙܳܥ̣ܰܬ݀ ܐܰܪܥܳܐ ܡ̣ܶܢ ܩܳܠܶܗ: ܢ̣ܳܕܘ̱ ܛܘ̣ܪ̈ܶܐ ܦܩܰܥ̣ܘ̱ ܫܘ̣̈ܥܶܐ: ܚܫ̣ܶܟ ܫܶܡܫܳܐ: ܐܶܨܛܰܪܝ̣ܘ ܛܰܪ̈ܳܢܶܐ: ܘܐܰܦܰܝ̈ ܬܰܪܥܳܐ ܕܗܰܝܟܠܳܐ ܐܶܨܛܰܪܝ̣ ܡ̣ܶܢ ܠܥܶܠ ܥܕܰܡܳܐ ܠܬܰܚܬ ܘܐܶܣ̣ܬܕܶܩ̈ܝ̱: ܙܳܥ̣ܘ̱ ܢܘ̣ܪ̈ܳܢܶܐ ܪܳܬ̣ܘ̱ ܪ̈ܘ̣ܚܳܢܶܐ: ܘܶܐܬܒܰܠ̣ܗܝ̣ܘ ܛܶܟ̈ܣܶܐ: ܬܗ̣ܰܪܘ̱ ܡܰܠܰܐܟ̈ܶܐ: ܪܥܶܠ̣ܘ̱ ܟܪ̈ܘ̣ܒܶܐ: ܟܘܰܙܘ̱ ܣܪ̈ܳܦܶܐ ܟܰܕ ܚ̣ܙܰܘ ܠܡܳܪܗܽܘܢ ܕܰܬܠܶܐ ܥܰܠ ܩܰܝܣܳܐ: ܫܶܡܫܳܐ ܛܰܫܝ̣ ܙܰܠܝ̣ܩܰܘ̈ܗ̱ܝ ܕܠܳܐ ܢܶܚ̣ܙܶܐ ܦܘ̣ܪܣܳܝ ܒܳܪܘ̣ܝܶܗ: ܘܩܳܡ̣ ܚܶܫܘ̣ܟܳܐ ܒܡܶܨܥܰܬ݀ ܐܝ̣ܡܳܡܳܐ: ܟܰܕ ܚ̣ܙܳܐ ܠܢܘ̣ܗܪܳܐ ܡܬܘ̣ܡܳܝܳܐ ܕܥܰܠ ܩܰܝܣܳܐ ܐܶܬ̣ܬܠܝ̣: ܬܰܠܡܝ̣̈ܕܶܐ ܥܰܪܝ̣ܩܝ̣ܢ: ܘܪ̈ܳܚܡܶܐ ܡܒܰܕܪܝ̣ܢ: ܐܶܬܬܥܝ̣ܪ ܘܩܘ̣ܡ ܒܰܪ ܒܪܰܟܝܳܐ ܕܗܳܐ ܫܶܠ̣ܡܰܬ݀ ܠܳܗ̇ ܢܒܺܝܘ̣ܬܳܟ ܕܪܳܥܝܳܐ ܒܠ̣ܰܥ ܘܥܶܪ̈ܒܰܘܗ̱ܝ ܐܶܬ̣ܒܰܕܰܪܘ̱: ܐܰܝܟܳܐ ܐܢܽܘܢ ܢܘ̣ܪ̈ܳܢܶܐ: ܐܰܝܟܳܐ ܐܢܽܘܢ ܥܛܝ̣̈ܦܰܝ ܓܰܘܙܰܠܬܳܐ: ܐܰܝܟܰܘ ܛܢܳܢܳܟ ܡܝ̣ܟܳܐܝܶܠ: ܐܰܝܟܰܘ ܣܰܝܦܳܟ ܗܰܘ̇ ܕܰܚ̣ܪܰܒ ܐܰܠܦ̈ܶܐ ܕܐܳܬܘ̣ܪ̈ܳܝܶܐ: ܐܰܝܟܰܘ ܥܘ̣ܙܳܟ ܓܰܒܪܺܐܝܶܠ ܪܝ̣ܫܳܐ ܕܡܰܠܰܐܟ̈ܶܐ: ܬܰܠܡܝ̣̈ܕܶܐ ܠܳܐ ܬ̣ܶܕܚܠܽܘܢ ܐܶܬܚܰܝܰܠܘ̱ ܘܐܶܬܠܰܒܰܒܘ̱ ܘܐܶܬܟܰܢܰܫܘ̱: ܐܶܢ ܝܰܘܡܳܢ ܒܳܠܰܥ ܪܰܒܟܽܘܢ ܠܚܰܕ ܒܫܰܒܳܐ ܡܶܬ̣ܢܰܚܰܡ ܐܰܝܟ ܢܒܺܝܘ̣ܬܳܐ ܕܙܶܥ̣ܩܰܬ݀ ܥܠܰܘܗ̱ܝ: ܠܰܐܝܟܳܐ ܐܳܙܶܠ ܐܰܢ̱ܬ ܫܶܡܥܽܘܢ: ܠܰܐܝܟܳܐ ܪܗܝ̣ܒ ܐܰܢ̱ܬ ܝܽܘܚܰܢܳܢ: ܠܰܐܝܟܳܐ ܬ̣ܶܥܪܘ̣ܩ ܒܰܪ ܬܘ̣ܠܡܰܝ: ܬܽܐܘ̣ܡܰܐ ܠܰܐܝܟܳܐ ܡܫܰܢܶܐ ܐܰܢ̱ܬ: ܦܝ̣ܠܝ̣ܦܘ̣ܣ ܠܰܐܝܟܳܐ ܡܰܒܥܶܕ ܐܰܢ̱ܬ: ܝܰܥܩܘ̣ܒ ܠܡܳܢܳܐ ܐܰܒܝ̣ܠ ܐܰܢ̱ܬ: ܐܰܢܕܪܶܐܘܳܣ ܠܡܳܢܳܐ ܟܡܝ̣ܪ ܐܰܢ̱ܬ: ܠܰܒܺܝ̣ ܠܡܳܢܳܐ ܒܳܟܶܐ ܐܰܢ̱ܬ: ܫܠܝ̣̈ܚܶܐ ܠܳܐ ܬ̣ܶܬܪܰܗܒܽܘܢ ܠܡܶܬܒܰܕܳܪܘ̣: ܐܶܢ ܕܶܝܢ ܝܰܘܡܳܢܳܐ ܥܳܪܩܝ̣ܢ ܐܰܢ̱ܬܽܘܢ ܠܚܰܕ ܒܫܰܒܳܐ ܡܶܬܟܰܢܫܝ̣ܢ ܐܰܢ̱ܬܘܢ: ܝܰܘܡܳܢܳܐ ܪܶܗܛܳܐ ܠܰܥܪܘ̣ܩܝܳܐ ܡ̣ܶܢ ܕܶܚܠܬܳܐ: ܠܚܰܕ ܒܫܰܒܳܐ ܟܢܘ̣ܫܝܳܐ ܠܰܦܨܝ̣ܚܘ̣ܬܳܐ: ܝܰܘܡܳܢܳܐ ܕܶܚܠܬܳܐ ܘܙܰܘܥܬܳܐ ܘܠܰܡܚܳܪ ܣܒܰܪܬܳܐ ܡܚܰܕܝܳܢܝ̣ܬܳܐ: ܝܰܘܡܳܢܳܐ ܐܶܒܠܳܐ ܠܣܝ̣ܥܰܬܟܽܘܢ ܠܚܰܕ ܒܫܰܒܳܐ ܚܰܕܘ̣ܬܳܐ ܘܰܦܨܝ̣ܚܘ̣ܬܳܐ: ܘܰܠܝܘ̣̈ܕܳܝܶܐ ܐܶܒܠܳܐ ܘܟܰܪܝܘ̣ܬܳܐ: ܟܰܕ ܫܳܡܥܝ̣ܢ ܕܩܳܡ̣ ܠܶܗ ܪܰܒܟܽܘܢ ܡ̣ܶܢ ܩܰܒܪܳܐ: ܘܒܰܕܓܽܘܢ ܡܦܝ̣ܣܝ̣ܢܰܢ ܠܳܟ ܡܫܝ̣ܚܳܐ ܐܰܠܳܗܳܐ ܕܝ̣ܠܰܢ ܒܝܰܘܡܳܐ ܗܳܢܳܐ ܕܚܰܫܳܟ ܦܳܪܘ̣ܩܳܝܳܐ: ܕܬܶܥ̣ܒܶܕ ܠܰܢ ܠܳܐ ܚܳܫܘ̣̈ܫܶܐ ܘܠܳܐ ܡܶܬܢܰܟܝ̈ܳܢܶܐ: ܘܚܰܪܰܪ ܠܰܢ ܡ̣ܶܢ ܟܽܠܗܽܘܢ ܚܰܫ̈ܶܐ ܕܰܚܛܝ̣ܬܳܐ: ܘܰܒܝܰܕ ܚܰܝܠܳܟ ܐܰܠܳܗܳܝܳܐ ܢ̇ܶܙܟܶܐ ܠܟܽܠܗܶܝܢ ܡܰܥܒ̈ܕܳܢܘܳܬܶܗ ܕܗܰܘ̇ ܕܰܠܩܘ̣ܒܠܳܐ ܒܛܰܝܒܘ̣ܬܳܟ: ܘܕܰܐܒܘ̣ܟ ܘܰܕܪܘ̣ܚܳܟ ܩܰܕܝ̣ܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܠܳܟ ܫܽܘ̣ܒܚܳܐ ܝܰܠܕܶܗ ܕܐܰܒܳܐ ܕܰܨܒ̣ܳܐ ܒܚܘ̣ܒܶܗ ܘܚܰܫ̣ ܒܰܒܣܰܪ ܡܶܛܽܠܳܬܰܢ: ܒܫܶܬܫܳܥܝ̣̈ܢ ܐܰܚܫ̣ܶܟ ܠܫܶܡܫܳܐ ܒܰܪܩܝ̣ܥܳܐ ܕܠܳܐ ܢ̣ܶܬܚܙܶܐ ܕܰܡܦܰܪܣܰܝ ܒܰܙܩܝ̣ܦܳܐ: ܘܫܘ̣̈ܥܶܐ ܐܶܨܛܰܪܝ̣ܘ ܟܰܕ ܫܡܰܥ̣ܘ̱ ܩܳܠܶܗ: ܘܩܰܒܪ̈ܶܐ ܐܶܬܦ̣ܰܬܰܚܘ̱ ܘܡܝ̣̈ܬܶܐ ܣܰܓܺܝ̈ܶܐܐ ܩܳܡ̣ܘ̱: ܐܰܩܝ̣ܡ ܠܰܢ ܡܳܪܝ̱ ܩܕܳܡܰܝܟ ܕܠܳܐ ܡܰܦܘ̣ܠܬܳܐ ܕܰܚܛܝ̣ܬܳܐ ܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ: ܘܩܰܒܶܠ ܦܝ̣ܪܡܰܢ ܘܐܶܬܬܢܝ̣ܚ ܒܥܶܛܪܳܗ̇ ܕܬܶܫܡܶܫܬܰܢ ܕܰܒܟܽܠܙܒܰܢ ܢܰܘ̇ܕܶܐ ܠܳܟ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀