ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܬܶܫܒܽܘ̣ܚܬܳܐ: ܠܗܰܘ̇ ܕܒܰܬܪܘ̣ܢܘ̣ܣ ܕܝ̣ܠܶܗ ܠܥܶܠ ܥܰܠ ܡܰܪܟܰܒܬܳܐ ܡܶܬܓܰܝܶܐ ܘܡ̣ܶܢ ܬܶܓ̈ܡܶܐ ܠܳܐ ܗܘ̣ܠ̈ܳܢܝܶܐ ܥܰܠ ܬܪܘ̣ܢܘ̣ܣ ܕܰܐܠܳܗܘ̣ܬܶܗ ܟܘ̣ܪܣܰܝ ܡܰܠܟܘ̣ܬܶܗ ܡܶܫܬܰܒܰܚ: ܘܗܘ̣ ܟܰܕ ܗܘ̣ ܨܶܒܝܳܢܳܐܝ̣ܬ ܠܘܳܬ ܚܰܫܳܐ ܦܳܪܘ̣ܩܳܝܳܐ ܐܶܬ̣ܳܐ ܗ̱ܘܳܐ: ܘܥܰܠ ܒܰܪ ܐܰܬܳܢܳܐ ܝ̣ܬܶܒ ܡܕܰܒܪܳܢܳܐܝ̣ܬ: ܘܡ̣ܶܢ ܦܘ̣ܡܳܐ ܕܫܰܒܪ̈ܶܐ ܘܕܰܛܠܳܝ̈ܶܐ ܐܶܬܩܰܠ̣ܰܣ: ܘܫܰܡ̣ܠܝ̣ ܠܰܢܒܺܝܽܘ̣ܬܳܐ ܕܕܰܘܝ̣ܕ ܘܚ̣ܰܘܝ̣ ܕܗܘ̣ ܐܝ̣ܬܰܘܗ̱ܝ ܥܶܠܳܝܳܐ ܕܰܠܥܶܠ ܡ̣ܶܢ ܟܝܳܢܳܐ ܘܗܘ̣ܝܘ̣ ܕܫܰܠܝ̣ܛ ܥܰܠ ܟܽܠ ܘܠܶܗ ܡܶܫܬܡܥܝ̣ܢ ܘܡܶܢܶܗ ܪܳܐܬܝ̣ܢ: ܡܳܪܰܢ ܘܰܐܠܳܗܰܢ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܬܶܫܒܘ̣ܚܬܳܐ: ܠܗܰܘ̇ ܩܰܕܝ̣ܫܳܐ ܘܰܡܩܰܕܫܳܢܳܐ ܕܩܰܕܝ̈ܫܶܐ ܡܳܪܝܳܐ ܚܰܝܠܬܳܢܳܐ ܨܒܰܐܘܽܬ: ܩܳܥܶܝܢ ܠܳܟ ܡܫܰܒܚ̈ܳܢܶܐ ܕܝ̣ܠܳܟ ܪ̈ܘ̣ܚܳܢܳܝܶܐ ܘܢܘ̣ܪ̈ܳܢܝܶܐ ܥܰܠ ܡܰܪܟܰܒܬܳܐ ܕܓܝ̣ܓ̈ܠܶܐ ܡܰܠܳـܠ̈ܳܬܳܐ ܒܰܐܬܪܳܐ ܥܶܠܳܝܳܐ ܘܩܰܕܝ̣ܫܳܐ ܕܰܐܒܘ̣ܟ: ܘܝܰܠ̈ܕܶܝܗ̇ ܕܥܺܕܬܳܐ ܩܰܕܝ̣ܫܬܳܐ ܒܰܚܕܳܐ ܫܰܘܝܘ̣ܬܳܐ ܡܪܰܡܪܡܝ̣ܢ ܟܰܕ ܐܳܡܪܝ̣ܢ: ܐܘ̣ܫܰܥܢܳܐ ܒܰܡܪ̈ܰܘܡܶܐ ܒܪܝ̣ܟ ܗ̱ܘ̣ ܐܝ̣ܩܳܪܳܟ ܡ̣ܶܢ ܐܰܬܪܳܟ: ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܨܰܦܪܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܐܰܠܳܗܳܐ ܗܰܘ ܕܰܡܥܰܠܰܝ ܥܘ̣ܫܢܳܐ ܕܺܐܝܩܳܪܶܗ ܘܪܰܒ ܗ̱ܘ̣ ܥܘ̣ܡܩܳܐ ܕܰܡܕܰܒܪܳܢܘ̣ܬܶܗ: ܗܰܘ̇ ܛܳܒܳܐ ܒܰܟܝܳܢܶܗ ܘܚܰܢܳܢܳܐ ܒܪܶܚܡܰܬ݀ ܐ̱ܢܳܫܘ̣ܬܶܗ: ܗܰܘ ܕܶܐܬܳܐ ܠܕܝ̣ܠܶܗ ܕܢ̣ܰܦܢܶܐ ܠܰܒܪܝ̣ܬܶܗ ܠܣܶܓܕܬܳܐ ܕܐܝ̣ܩܳܪܶܗ: ܘܟܰܕ ܩܕܳܡ ܚܰܫܳܐ ܕܝ̣ܠܶܗ ܦܳܪܘ̣ܩܳܝܳܐ ܥܝ̣ܠܳܐ ܫܝ̣ܛܳܐ ܫ̣ܶܐܠ ܠܰܪܟܘ̣ܒܶܗ: ܗܳܢܳܐ ܕܨܳܐܰܪ ܗ̱ܘܳܐ ܛܘ̣ܦܣܳܐ ܕܝ̣ܠܰܢ ܥܰܡܳܐ ܕܡ̣ܶܢ ܥܰܡ̱̈ܡܶܐ ܕܶܐܬ̣ܦܪܶܩ ܡ̣ܶܢ ܛܳܥܝܘ̣ܬܳܐ ܕܫܺܐܕ̈ܶܐ: ܘܰܗ̣ܘܳܐ ܢܝܳܚܳܐ ܠܰܐܠܳܗܘ̣ܬܳܐ: ܗܰܘ̇ ܕܰܢܒܺܝ̈ܶܐ ܩܰܕܝ̣̈ܫܶܐ ܒܠܶܥܙܳܐ ܕܪܘ̣ܚܳܐ ܩܰܕܝ̣ܫܳܐ: ܩܰܕܶܡ̣ܘ̱ ܛܰܦܶܣ̣ܘ̱ ܠܥܺܐܕܳܐ ܗܳܢܳܐ ܩܰܕܝ̣ܫܳܐ. ܟܰܕ ܝܰܥܩܽܘܒ ܗܰܘ̇ ܪܝ̣ܫܳܐ ܕܫܰܒ̈ܛܶܐ ܘܰܬܠܝ̣ܬܳܝܳܐ ܒܪ̈ܝ̣ܫܰܝ ܐܰܒܳܗ̈ܳܬܳܐ ܩ̣ܰܕܶܡ ܐܶܬ̣ܢܰܒܝ̣. ܕܠܳܐ ܢ̣ܶܥܢ̣ܰܕ ܫܰܒܛܳܐ ܡ̣ܶܢ ܝ̣ܗܘ̣ܕܳܐ ܘܰܡܒܰܕܩܳܢܳܐ ܡ̣ܶܢ ܒܶܝܬ ܪ̈ܶܓܠܰܘܗ̱ܝ ܥܕܰܡܳܐ ܕܢ̣ܺܐܬܶܐ ܡܰܢ ܕܕܝ̣ܠܶܗ ܗ̱ܝ̣ ܡܰܠܟܘ̣ܬܳܐ ܘܠܶܗ ܢ̣ܣܰܟܽܘܢ ܥܰܡ̱̈ܡܶܐ: ܘܢ̣ܶܐܣܽܘܪ ܒܰܓܦܶܬܳܐ ܥܝ̣ܠܶܗ ܘܰܒܫܰܒܘ̣ܩܳܐ ܒܰܪ ܐܰܬܳܢܶܗ: ܠܗܳܢܳܐ ܥܺܐܕܳܐ ܩܰܕܝ̣ܫܳܐ ܕܐܘ̣ܫܰܥ̈ܢܶܐ ܩ̣ܰܕܶܡ ܐܰܟ̣ܪܶܙ ܠܨܶܗܝܽܘܢ ܥܺܕܬܳܐ ܩܰܕܝ̣ܫܬܳܐ ܕܰܐܠܳܗܳܐ ܙܟܰܪܝܳܐ ܢܒܺܝܳܐ ܟܰܕ ܐܳܡܰܪ: ܕܗܳܐ ܡܰܠܟܶܟܝ̱ ܐܳܬܶܐ ܠܶܟܝ̱ ܡܰܟܝ̣ܟ ܘܰܪܟܝ̣ܒ ܥܰܠ ܚܡܳܪܳܐ ܘܥܰܠ ܥܝ̣ܠܳܐ ܒܰܪ ܐܰܬܳܢܳܐ: ܠܗܳܢܐ ܥܺܐܕܳܐ ܩܰܕܝ̣ܫܳܐ ܕܐܘ̣ܫܰܥ̈ܢܶܐ ܩ̣ܰܕܶܡ ܙܰܡ̣ܰܪ ܕܰܘܝ̣ܕ ܢܒܺܝܳܐ ܐܰܠܳܗܳܝܳܐ ܟܰܕ ܐܳܡܰܪ: ܕܡ̣ܶܢ ܦܘ̣ܡܳܐ ܕܰܥܠܰܝ̈ܡܶܐ ܘܕܰܛܠܳܝ̈ܶܐ ܬܶܩܢ̣ܰܬ݀ ܬܶܫܒܘ̣ܚܬܳܐ ܠܡܳܪܝܳܐ: ܠܗܳܢܳܐ ܥܺܐܕܳܐ ܩܰܕܝ̣ܫܳܐ ܕܐܘ̣ܫܰܥ̈ܢܶܐ ܐܶܫܰܥܝܳܐ ܗܰܘ̇ ܡܫܰܒܚܳܐ ܒܰܢܒܺܝ̈ܶܐ ܩ̣ܰܕܶܡ ܐܰܟ̣ܪܶܙ: ܕܶܐܬܬܥܝ̣ܪܝ̱ ܐܶܬܬܥܝ̣ܪܝ̱ ܐܘ̣ܪܫܠܶܡ ܘܰܠܒܰܫܝ̱ ܥܽܘ̣ܫܢܳܐ ܕܰܕܪܳܥܶܗ ܕܡܳܪܝܳܐ: ܘܒܰܕܓܽܘܢ̇ ܟܰܕ ܒܝܰܘܡܳܐ ܗܳܢܳܐ ܩܰܕܝ̣ܫܳܐ ܕܥܺܐܕܳܐ ܗܳܢܳܐ ܡܙܰܡܢܳܢܳܐ ܕܬܶܫܒ̈ܚܳܬܳܐ ܡܚܰܓܶܝܢܰܢ ܘܰܡܫܰܒܚܝ̣ܢܰܢ ܒܰܪܘܳܙܳܐ ܪܘ̣ܚܳܢܳܝܳܐ ܐܳܡܪܝ̣ܢܰܢ: ܐܘ̣ܫܰܥܢܳܐ ܐܰܘܟܝ̣ܬ ܬܶܫܒ̈ܚܳܬܳܐ ܠܐܝ̣ܬܝܳܐ ܕܡ̣ܶܢ ܐܝ̣ܬܝܳܐ ܕܶܐܬ̣ܳܐ ܕܢ̣ܶܦܪܘ̣ܩ ܠܥܳܠܡܳܐ ܡ̣ܶܢ ܫܘ̣ܥܒܳܕܳܐ ܕܰܚܛܝ̣ܬܳܐ. ܐܘ̣ܫܰܥܢܳܐ ܠܰܒܪܶܗ ܕܕܰܘܺܝܕ ܒܪܝ̣ܟ ܗ̣ܘ ܕܶܐܬܳܐ ܒܰܫܡܶܗ ܕܡܳܪܝܳܐ ܩܥ̣ܰܘ ܠܶܗ ܝܰܠܘ̣̈ܕܶܐ: ܐܘ̣ܫܰܥܢܳܐ ܠܰܓܢܝ̣ܙ ܒܐܝ̣ܬܘ̣ܬܶܗ ܡܥܰܠܰܝܬܳܐ ܕܰܓܒ̣ܳܐ ܠܶܗ ܥܝ̣ܠܳܐ ܫܝ̣ܛܳܐ ܠܰܪܟܽܘܒܶܗ: ܐܘܫܰܥܢܳܐ ܠܕܶܐܬ̣ܬܰܚܬܝ̣ ܒܛܰܝܒܘ̣ܬܶܗ ܕܢ̣ܶܫܬܰܒܰܚ ܡ̣ܶܢ ܫܰܒܪ̈ܶܐ ܕܰܢ̣ܪܰܡܪܶܡ ܒܡܘ̣ܟܳܟܶܗ ܠܫܶܦܠܶܗ ܕܓܶܢܣܰܢ: ܐܘ̣ܫܰܥܢܳܐ ܠܗܰܘ ܕܶܐܬ̣ܡܰܟܰܟ ܗܳܢܳܐ ܟܽܠܶܗ ܕܢ̣ܶܪܟܰܒ ܥܰܠ ܒܰܪ ܐܰܬܳܢܳܐ: ܐܘ̣ܫܰܥܢܳܐ ܠܘܰܥܕܳܐ ܕܚܰܝ̈ܶܐ ܕܘܰܥ̣ܶܕ ܠܶܗ ܫܘ̣ܒܚܳܐ ܡ̣ܶܢ ܦܘ̣ܡ ܫܰܒܪ̈ܶܐ: ܐܘ̣ܫܰܥܢܳܐ ܠܙܰܕܝ̣ܩܳܐ ܘܙܰܟܳܝܳܐ ܕܰܙܟ̣ܳܐ ܒܡܘ̣ܟܳܟܶܗ ܠܫܘ̣ܥܠܳܝܶܗ ܕܳܐܟܶܠܩܰܪܨܳܐ: ܐܘ̣ܫܰܥܢܳܐ ܠܚܰܢܳܢܳܐ ܕܚ̣ܰܕܝ̣ ܠܥܺܕܬܶܗ ܘܥܰܕܥ̈ܺܐܕܰܘܗ̱ܝ ܚܣܰܝ̈ܳܐ ܘܩܰܕܝ̣̈ܫܶܐ: ܐܘ̣ܫܰܥܢܳܐ ܠܛܳܒܳܐ ܘܒܰܣܝ̣ܡܳܐ ܕܰܛܪܰܕ ܠܚܶܫܟܳܐ ܕܛܘ̣ܥܝܰܝ ܒܰܡܕܰܒܪܳܢܘ̣ܬܶܗ ܦܳܪܘ̣ܩܳܝܬܳܐ: ܐܘ̣ܫܰܥܢܳܐ ܠܝܰܡܳܐ ܠܳܐ ܡܶܬܡܰܫܚܳܢܳܐ ܕܥܘ̣ܕܪ̈ܳܢܶܐ ܕܝܰܗ̣ܒ ܠܶܥܙܳܐ ܕܬܶܫܒܘ̣ܚܬܳܐ ܒܦܘ̣ܡܳܐ ܕܝܰܠܘ̣̈ܕܶܐ: ܐܘ̣ܫܰܥܢܳܐ ܠܟܺܐܢܳܐ ܘܙܰܕܝ̣ܩܳܐ ܕܟܰܕ ܐܶܬ̣ܬܰܚܬܝ̣ ܠܣܘ̣ܪܳܩܳܐ ܨܶܒܝܳܢܳܝܳܐ ܠܳܐ ܐܰܪܚ̣ܶܩ ܡ̣ܶܢ ܗܳܝ̇ ܕܐܝ̣ܬܰܘܗ̱ܝ ܐܰܠܳܗܳܐ ܠܥܶܠ ܡ̣ܶܢ ܟܽܠ: ܐܘ̣ܫܰܥܢܳܐ ܠܰܠܡܺܐܢܳܐ ܕܚܰܝ̈ܶܐ ܫܰܪ̈ܝ̣ܪܶܐ ܕܰܠܓܶܢܣܰܢ ܫܰܘܙ̣ܶܒ ܡ̣ܶܢ ܥܓܳܢܳܐ ܕܰܚܛܝ̣ܬܳܐ. ܐܘ̣ܫܰܥܢܳܐ ܠܰܡܪܰܚܡܳܢܳܐ ܘܣܰܓܝ̣ ܛܰܝܒܘ̣ܬܳܐ ܘܩܘ̣ܫܬܳܐ ܕܡ̣ܶܢ ܫܰܒܪ̈ܶܐ ܘܝܰܠܘ̣̈ܕܶܐ ܬܶܩܢ̣ܰܬ݀ ܬܶܫܒܘ̣ܚܬܶܗ: ܐܘ̣ܫܰܥܢܳܐ ܠܢܽܘ̣ܪܳܐ ܐܳܟܶܠܬܳܐ ܘܠܳܐ ܗܘ̣ܠܳܢܳܝܬܳܐ ܕܢܰܒ̣ܪܶܫ ܠܪ̈ܳܚܡܰܘܗ̱ܝ ܒܕܰܠܩܶܗ: ܐܘ̣ܫܰܥܢܳܐ ܠܣܰܒܪܳܐ ܕܟܽܠܗܘܢ̇ ܣܰܘ̈ܦܶܝܗ̇ ܕܰܐܪܥܳܐ ܕܣܰܒ̣ܰܪܘ̱ ܢܒܺܝ̈ܶܐ ܡܶܐܬܝ̣ܬܶܗ: ܐܘ̣ܫܰܥܢܳܐ ܠܥܳܒܘ̣ܕܳܐ ܘܰܡܬܰܩܢܳܢܳܐ ܕܟܽܠ ܢܶܫ̈ܡܳܢ ܕܰܥܒ̣ܰܕ ܠܶܗ ܡܫܰܒ̈ܚܳܢܶܐ ܚܰܕ̈ܬܶܐ ܝܰܠܘ̣̈ܕܶܐ ܘܫܰܒܪ̈ܶܐ: ܐܘ̣ܫܰܥܢܳܐ ܠܦܳܪܘ̣ܩܳܐ ܕܦܰܪܩ̣ܶܗ ܠܥܳܠܡܳܐ ܒܰܡܕܰܒܪܳܢܘ̣ܬܶܗ: ܐܘ̣ܫܰܥܢܳܐ ܠܨܰܠܡܳܐ ܡܫܰܡܠܝܳܐ ܕܰܐܒܳܐ ܡܫܰܡܠܝܳܐ ܕܰܨܒ̣ܳܐ ܘܶܐܬ̣ܬܰܚܬܝ̣ ܕܠܰܢ ܢ̣ܥܰܠܶܐ ܠܪܰܘܡܳܐ ܕܪܰܒܘ̣ܬܶܗ: ܐܘ̣ܫܰܥܢܳܐ ܠܨܶܡܚܶܗ ܕܰܐܒܳܐ ܕܰܐܨܡ̣ܰܚ ܘܰܐܢ̣ܗܰܪ ܠܒܶܪ̈ܝܳܬܶܗ: ܐܘ̣ܫܰܥܢܳܐ ܠܩܰܕܝ̣ܫ ܒܰܟܝܳܢܶܗ ܕܰܩܥ̣ܰܘ ܠܶܗ ܝܰܠܘ̣̈ܕܶܐ ܒܪܺܝܟ ܗ̱ܘ̣ ܕܶܐܬܳܐ ܒܰܫܡܶܗ ܕܡܳܪܝܳܐ: ܐܘ̣ܫܰܥܢܳܐ ܠܪܰܒܳܐ ܕܰܙܥ̣ܰܪ ܕܢ̣ܰܘܪܒܰܢ ܒܰܡܕܰܒܪܳܢܘ̣ܬܶܗ ܟܰܕ ܪܰܒܘ̣ܬܶܗ ܠܳܐ ܣܳܟ ܙܶܥ̣ܪܰܬ݀ : ܐܘ̣ܫܰܥܢܳܐ ܠܫܳܒܶܩ ܚܰܘ̈ܒܶܐ ܕܡܰܣܟ̈ܠܳܢܶܐ ܕܰܫܒ̣ܰܩ ܠܚܰܘܒܬܳܐ ܕܪܝ̣ܫ ܛܘ̣ܗܡܰܢ ܒܰܚܢܳܢܶܗ: ܐܘ̣ܫܰܥܢܳܐ ܠܬܶܫܒܘ̣ܚܬܳܐ ܘܝܘ̣ܩܢܳܐ ܕܰܐܒܳܐ ܓܢܝ̣ܙܳܐ ܕܫܰܒܪ̈ܶܐ ܬܡܝ̣ܗܳܐܝ̣ܬ ܝܰܒ̣ܶܒܘ̱ ܬܶܫܒܘ̣ܚܬܶܗ: ܘܒܰܕܓܘܢ̇ ܡܦܝ̣ܣܝ̣ܢܰܢ ܠܳܟ ܡܫܺܝܚܳܐ ܐܰܠܳܗܳܐ ܕܝ̣ܠܰܢ ܕܰܬ̣ܩܰܒܶܠ ܡܶܢܰܢ ܠܫܘ̣ܒ̈ܚܶܐ ܕܦܘ̣̈ܡܰܝܢ ܐܰܝܟ ܕܡ̣ܶܢ ܝܰܠܘ̣̈ܕܶܐ ܘܫܰܒܪ̈ܶܐ: ܟܰܕ ܡܫܰܟܶܢ ܐܰܢ̱ܬ ܠܪ̈ܝ̣ܫܰܝ ܟܳܗ̈ܢܶܐ ܡܶܠܬܳܐ ܕܚܶܟܡܬܳܐ ܠܟܳܗ̈ܢܶܐ ܙܰܗܝܘ̣ܬܳܐ: ܠܰܡܫܰܡ̈ܫܳܢܶܐ ܕܰܟܝܘ̣ܬܳܐ: ܠܐܱܦܘ̣ܕܝܰܩ̈ܢܘ̣ ܟܚܝ̣ܕܽܘܬܳܐ: ܠܕܰܝܪ̈ܳܝܶܐ ܡܚܰܡܣܢܳܢܘ̣ܬܳܐ: ܠܥܰܬܝ̣ܪ̈ܶܐ ܪܶܚܡܰܬ݀ ܐ̱ܢܳܫܘ̣ܬܳܐ: ܠܡܶܣ̈ܟܺܢܶܐ ܙܝܳܢܬܳܐ ܛܳܒܬܳܐ: ܠܥܺܕ̈ܳܬܳܐ ܪܘ̣ܡܪܳܡܳܐ: ܠܕܰܝܪ̈ܳܬܳܐ ܩܘ̣ܝܳܡܳܐ: ܠܡܰܠ̈ܟܶܐ ܒܗܺܝܠܘ̣ܬܳܐ: ܠܦܳܠܚ̈ܶܐ ܡܶܫܬܰܡܥܳܢܘ̣ܬܳܐ: ܠܚܰܛܳܝ̈ܶܐ ܫܘ̣ܒܩܳܢܳܐ: ܠܛܳܥܰܝ̈ܳܐ ܦܘ̣ܢܳܝܳܐ: ܠܰܪ̈ܓܝ̣ܙܶܐ ܫܰܝܢܳܐ ܘܰܫܠܳܡܳܐ: ܘܰܠܟܽܠܗܘܢ̇ ܡܗܰܝܡ̈ܢܶܐ ܣܰܒܪܳܐ ܛܳܒܳܐ: ܘܰܠܥܰܢܝ̣̈ܕܶܐ ܚܘ̣ܣܳܝܳܐ ܘܠܰܢ ܘܰܠܗܘܢ̇ ܡܛܰܝܒܘ̣ܬܳܐ ܕܩܰܘܡܳܐ ܠܳܐ ܥܕܝ̣ܠܳܐ ܒܫܘ̣ܒܚܳܐ ܕܪܰܒܘ̣ܬܳܟ ܘܕܰܐܒܘ̣ܟ ܘܰܕܪܘ̣ܚܳܟ ܩܰܕܝ̣ܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܐܳܦ ܗܳܫܳܐ ܡܳܪܝܳܐ ܡܦܝ̣ܣܝ̣ܢܰܢ ܠܳܟ ܒܝܰܕ ܥܶܛܪܳܐ ܗܳܢܳܐ ܕܒܶܣ̈ܡܶܐ ܕܩܰܪܶܒ̣ܢܰܢ ܩܕܳܡܰܝܟ: ܒܝܰܘܡܳܐ ܗܳܢܳܐ ܕܚܘ̣ܕܳܬܳܐ ܕܐܘ̣ܫܰܥ̈ܢܶܐ ܐܘ̣ܪ̈ܫܠܶܡܳܝܶܐ ܕܢ̣ܶܬܥܰܠ̈ܝܳܢ ܨܠܰܘ̈ܳܬܰܢ ܩܕܳܡܰܝܟ ܘܢ̣ܶܬܦܬܰܚ ܬܰܪܥܳܐ ܕܪ̈ܰܚܡܰܝܟ ܠܫܶܐܠ̈ܳܬܰܢ: ܘܫܰܕܰܪ ܠܰܢ ܡ̣ܶܢ ܫܟܝ̣ܢܬܳܐ ܕܐܝ̣ܩܳܪܳܟ ܪ̈ܰܚܡܶܐ ܘܰܚܢܳܢܳܐ ܘܚܘ̣ܣܳܝܳܐ ܕܚܰܘ̈ܒܶܐ ܘܳܐܣܝܘ̣ܬܳܐ ܠܟܽܠܗܽܘܢ ܟܪ̈ܝ̣ܗܶܐ ܘܐܰܠܝ̣̈ܨܶܐ ܫܰܝܢܳܐ ܘܰܫܠܳܡܳܐ ܠܟܽܠܶܗ ܥܳܠܡܳܐ ܘܕܘ̣ܟܪܳܢܳܐ ܛܳܒܳܐ ܠܟܽܠܗܽܘܢ ܥܰܢܝ̣̈ܕܶܐ ܡܗܰܝ̈ܡܢܶܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀