ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܐܰܫܘܳܐ ܠܰܢ ܡܳܪܝܳܐ ܐܰܠܳܗܳܐ ܡܪܰܚܡܳܢܳܐ ܘܪܳܚܶܡ ܐ̱ܢܳܫ̈ܳܐ: ܕܥܰܡ ܫܰܒܪ̈ܶܐ ܕܫܰܒ̣ܚܘ̣ܟ ܘܝܰܠܘ̣̈ܕܶܐ ܕܩܰܠ̣ܣܘ̣ܟ ܗܳܪܟܳܐ ܒܐܘ̣ܫܰܥܢܰܝ̈ܗܽܘܢ ܢ̇ܺܐܪܥܳܟ ܒܡܶܐܬܝ̣ܬܳܟ ܕܬܰܪܬܶܝܢ: ܘܰܢ̇ܫܰܒܚܳܟ ܒܐܘ̣ܫܰܥ̈ܢܶܐ ܒܥܳܠܡܳܐ ܕܠܳܐ ܥܳܒܰܪ: ܡܳܪܰܢ ܘܰܐܠܳܗܰܢ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܫܽܘܒܚ̈ܶܐ ܫܦܰܝ̈ܳܐ ܘܩܽܘ̈ܠܳܣܶܐ ܡܥܰܠܰܝ̈ܳܐ: ܠܗܰܘ̇ ܪܳܡܳܐ ܘܰܡܫܰܒܚܳܐ ܒܰܐܠܳܗܽܘܬܶܗ ܕܶܐܬܬܰܚܬܺܝ: ܘܣܰܥ̣ܪܰܢ ܒܡܽܘܟܳܟܶܗ ܘܟ̣ܰܬܰܪ ܒܐܝ̣ܬܽܘܬܶܗ ܘܶܐܬܚ̣ܙܝ̣ ܠܘܳܬܰܢ ܒܐ̱ܢܳܫܽܘܬܶܗ: ܘܥܺܝܪ̈ܶܐ ܙܳܡܪܝ̣ܢ ܬܶܫܒܘ̣ܚܬܶܗ ܒܪ̈ܰܘܡܶܐ ܡܥܰܠܰܝ̈ܳܐ ܕܡܰܠܟܘ̣ܬܶܗ ܘܫܰܒܪ̈ܶܐ ܘܝܰܠܘ̣̈ܕܶܐ ܡܩܰܠܣܝ̣ܢ ܠܪܰܒܘ̣ܬܶܗ ܘܓܺܝ̈ܓܠܶܐ ܡܰܠܳـܠܴ̈ܬܳܐ ܟܕ̈ܝ̣ܢܳܢ ܒܡܰܪܟܰܒܬܶܗ܆ ܘܥܝ̣ܠܳܐ ܫܝ̣ܛܳܐ ܣܦ̣ܰܩ ܠܰܪܟ̥ܽܘܒܶܗ: ܘܰܫܡܰܝ̈ܳܐ ܘܰܐܪܥܳܐ ܡܠܶܝܢ ܡܶܢ ܬܶܫܒܽܘܚܬܶܗ܆ ܘܟܶܢ̈ܫܶܐ ܦܫܝ̣̈ܛܶܐ ܒܣܰܘ̈ܟܶܐ ܕܙܰܝ̈ܬܶܐ ܢܦ̣ܰܩܘ̱ ܠܐܘ̣ܪܥܶܗ: ܕܠܶܗ ܝܳܐܶܐ ܫܽܘܒܚܳܐ ܘܺܐܝܩܳܪܳܐ ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܪܰܡܫܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܫܝ̣ܚܳܐ ܐܰܠܳܗܳܐ ܕܝ̣ܠܰܢ: ܚܰܢܳܢܳܐ ܘܣܰܓܝ̣ ܛܰܝܒܘ̣ܬܳܐ ܘܩܘ̣ܫܬܳܐ: ܗܰܘ̇ ܕܡ̣ܶܢ ܡܰܠܰܐܟ̈ܶܐ ܘܪ̈ܰܒܰܝ ܡܰܠܰܐܟ̈ܶܐ ܒܙܰܘܥܳܐ ܡܶܬܒܰܪܰܟ ܐܰܢ̱ܬ ܘܡܶܫܬܰܒܰܚ ܐܰܢ̱ܬ: ܗܰܘ̇ ܕܬܰܚܬܝ̣ܬ ܪܰܘܡܳܐ ܕܪܰܒܘ̣ܬܳܟ ܘܰܫܒܰܩ̣ܬ ܡܰܪܟܰܒܬܳܐ ܕܰܟܪ̈ܘ̣ܒܶܐ ܘܙܰܘܚܳܐ ܘܪܰܘܒܳܐ ܕܪ̈ܘ̣ܚܳܢܶܐ ܘܰܢܚ̣ܶܬܬ ܘܰܢܣܰܒ̣ܬ ܩܘ̣ܠܳܣ̈ܶܐ ܡ̣ܶܢ ܫܰܒܪ̈ܶܐ ܦܫܝ̣̈ܛܶܐ ܘܝܰܠܘ̣̈ܕܶܐ ܒܢܰܝ̈ ܨܶܗܝܽܘܢ: ܗܰܘ̇ ܕܰܠܘܳܬ ܚܰܫܳܐ ܦܳܪܘ̣ܩܳܝܳܐ ܫܦ̣ܰܪ ܠܳܟ ܕܬ̣ܺܐܬܶܐ ܘܡܰܘܬܳܐ ܡܰܥܒܶܕ ܚܰܝ̈ܶܐ ܨܶܒܝܳܢܳܐܝ̣ܬ ܛܥܶܡ̣ܬ ܘܥܰܠ ܥܝ̣ܠܳܐ ܒܰܪ ܐܰܬܳܢܳܐ ܨܒ̣ܰܝܬ ܕܬܶܙ̣ܕܰܝܰܚ: ܘܡܰܟܝ̣ܟܳܐܝ̣ܬ ܠܐܘ̣ܪܫܠܶܡ ܥܳܐܶܠ ܗ̱ܘܰܝܬ ܐܰܝܟܰܢܳܐ ܕܰܒܝܰܕ ܡܰܘܬܒܳܐ ܕܝ̣ܠܳܟ ܕܥܰܠ ܚܰܝܘ̣ܬܳܐ ܫܝ̣ܛܬܳܐ ܘܡܶܙܕܰܝܚܳܢܘ̣ܬܳܟ ܕܥܰܠ ܒܰܪ ܐܰܬܳܢܳܐ ܬ̣ܒܣܘ̣ܪ ܠܪܳܡܘ̣ܬܶܗ ܕܳܐܟܶܠܩܰܪܨܳܐ: ܘܠܰܚܬܝ̣ܪܘ̣ܬܳܐ ܬ̣ܒܰܛܶܠ ܘܠܰܢ ܡ̣ܶܢ ܡܘ̣ܟܳܟܳܐ ܕܰܚܛܝ̣ܬܳܐ ܬ̣ܪܰܡܪܶܡ: ܘܦ̈ܶܠܳܐܬܳܐ ܕܰܥܠܰܝܟ ܐܶܬ̣ܪ̈ܫܶܡܝ̱ ܬ̣ܚܰܬܶܡ: ܘܠܰܒܢ̈ܳܬ ܩ̈ܳܠܶܐ ܕܰܢܒܺܝ̈ܶܐ ܩܰܕܝ̣̈ܫܶܐ ܬ̣ܫܰܪܰܪ: ܟܰܕ ܚܰܕ ܡܶܢܗܽܘܢ ܡܰܢ ܕܝܰܒܶܒܝ̱ ܐܘ̣ܪܫܠܶܡ ܕܗܳܐ ܐܳ݀ܬܶܐ ܡܰܠܟܶܟܝ̱ ܠܶܟܝ̱ ܐܳܡܰܪ ܗ̱ܘܳܐ: ܘܰܐ̱ܚܪܺܢܳܐ ܕܰܚܙܺܝ̇ܬ ܫܘ̣ܒܚܶܗ ܕܡܳܪܝܳܐ ܡ̣ܶܢ ܡܰܕܢܚܳܐ ܡܰܙܥܶܩ ܗ̱ܘܳܐ: ܚܰܕ ܕܢ̣ܶܐܣܘ̣ܪ ܒܰܓܦܶܬܳܐ ܥܝ̣ܠܶܗ ܘܰܒܫܰܒܘ̣ܩܳܐ ܒܰܪ ܐܰܬܳܢܶܗ ܡܰܐܪܶܙ ܗ̱ܘܳܐ: ܘܰܐ̱ܚܪܺܢܳܐ ܕܰܢܪܝ̣ܡ ܡܳܪܝܳܐ ܩܳܠܶܗ ܘܰܬܚܘ̣ܬܰܘܗ̱ܝ ܟܽܠܗܽܘܢ ܫܡܰܝ̈ܳܐ ܚܒܝ̣ܫܝ̣ܢ ܓܳܠܶܐ ܗ̱ܘܳܐ: ܚܰܕ ܠܡܶܠܬܳܐ ܐܰܠܳܗܳܐ ܐܶܫܰܒܰܚ ܩܳܥܶܐ ܗ̱ܘܳܐ: ܘܰܐ̱ܚܪܺܢܳܐ ܕܢ̣ܶܕܢܰܚ ܡܳܪܝܳܐ ܥܰܠ ܥܢ̈ܳܢܰܝ ܫܡܰܝ̈ܳܐ ܡܙܰܡܰܪ ܗ̱ܘܳܐ: ܚܰܕ ܕܢ̣ܰܗܦܶܟ ܡܳܪܝܳܐ ܫܒܝ̣ܬܳܐ ܕܨܶܗܝܽܘܢ ܡܰܘܕܰܥ ܗ̱ܘܳܐ: ܘܰܐ̱ܚܪܺܢܳܐ ܕܡ̣ܶܢ ܦܘ̣ܡܳܐ ܕܰܛܠܳܝ̈ܶܐ ܘܕܰܥܠܰܝ̈ܡܶܐ ܕܬܶܩ̣ܢܰܬ݀ ܬܶܫܒܘ̣ܚܬܳܐ ܠܡܳܪܝܳܐ ܡܝܰܒܶܒ ܗ̱ܘܳܐ: ܚܰܕ ܕܢ̣ܶܫܘܰܚ ܐܰܝܟ ܫܒܺܫܬܳܐ ܒܪܰܘܡܶܗ ܕܐܝ̣ܣܪܳܐܝܶܠ ܪܳܡܶܙ ܗ̱ܘܳܐ: ܘܰܐ̱ܚܪܺܢܳܐ ܕܢ̣ܶܬܟܰܢܫܽܘܢ ܫܰܠܝ̣̈ܛܳܢܶܐ ܠܰܡܕܝ̣ܢ̱ܬܶܗ ܕܡܳܪܝܳܐ ܡܰܐܛܶܒ ܗ̱ܘܳܐ: ܚܰܕ ܕܰܢ̣ܪܝ̣ܡ ܡܳܪܝܳܐ ܪܝ̣ܫܶܗ ܕܐܝ̣ܣܪܳܐܝܶܠ ܡܰܠܶܦ ܗ̱ܘܳܐ: ܘܰܐ̱ܚܪܺܢܳܐ ܕܢ̣ܶܥܒܶܕ ܦܘ̣ܪܩܳܢܳܐ ܠܰܒ̈ܢܰܝ ܝܰܥܩܘ̣ܒ ܡܣܰܒܰܪ ܗ̱ܘܳܐ: ܚܰܕ ܕܗܳܐ ܥܰܠ ܛܘ̣ܪ̈ܶܐ ܪ̈ܶܓܠܶܐ ܕܰܡܣܰܒܪ̈ܰܝ ܫܠܳܡܳܐ ܠܳܥܶܙ ܗ̱ܘܳܐ: ܐ̱ܚܪܺܢܳܐ ܕܶܐܬܬܥܝ̣ܪܝ̱ ܐܶܬܬܥܝ̣ܪܝ̱ ܐܘ̣ܪܫܠܶܡ ܘܰܠܒܰܫܝ̱ ܥܘ̣ܫܢܳܐ ܘܓܰܐܝܘ̣ܬܳܐ ܦܳܩܶܕ ܗ̱ܘܳܐ: ܘܒܰܕܓܽܘܢ ܒܝܰܕ ܡܶܐܬܝ̣ܬܳܟ ܫܰܪܝ̣ܪܬܳܐ ܚܰܘܝ̣ܬ ܐܶܢܶܝܢ ܠܡܶܠܰܝ̈ܗܽܘܢ ܕܰܢܒܺܝ̈ܶܐ ܘܰܓܡ̣ܰܪܬ ܠܰܢ ܐܶܢܶܝܢ ܒܰܥܒܳܕܳܐ: ܘܟܰܕ ܬܘ̣ܒ ܒܰܒܢ̈ܳܬ ܩ̈ܳܠܶܐ ܕܝܰܠ̈ܘ̣ܕܶܐ ܕܩܳܥܶܝܢ ܗ̱ܘܰܘ ܘܳܐܡ̇ܪܝ̣ܢ: ܐܘ̣ܫܰܥܢܳܐ ܠܰܒܪܶܗ ܕܕܰܘܝ̣ܕ ܡܶܣܬܰܓܶܐ ܗ̱ܘܰܝܬ: ܚܰܝܠܰܘ̈ܳܬܳܐ ܫܡܰܝ̈ܳܢܶܐ ܒܡܘ̣ܟܳܟܳܟ ܕܰܚܠܳܦܰܝܢ ܡܶܬܕܰܡܪܝ̣ܢ ܗ̱ܘܰܘ: ܦܪܰܥ̣ܘ̱ ܠܳܟ ܕܳܫ̈ܢܶܐ ܕܫܘ̣ܒܚܳܐ ܗܳܠܶܝܢ ܕܠܳܐ ܡܶܠܬܳܐ: ܡ̣ܶܢ ܕܶܩ̈ܠܶܐ ܣܰܘ̈ܟܶܐ: ܘܡܶܢ ܛܠܳܝ̈ܶܐ ܐܘ̣ܫ̈ܰܥܢܶܐ: ܝܳܗܒܝ̣ܢ ܐܝ̣ܠܳܢ̈ܶܐ ܣܰܘܟܰܝ̈ܗܽܘܢ: ܘܬܰܠܡܝ̣̈ܕܶܐ ܡܰܪ̈ܛܘ̣ܛܰܝܗܽܘܢ: ܗܳܠܶܝܢ ܡܰܢ ܣܰܘ̈ܟܶܐ ܡ̣ܶܢ ܐܝ̈ܠܳܢܶܐ ܦܳܣܩܝ̣ܢ ܗ̱ܘܰܘ ܘܪܘ̣ܡܝܳܢܳܐ ܠܡܳܪܗܽܘܢ ܡܩܰܪܒܝ̣ܢ ܗ̱ܘܰܘ: ܐ̱ܚܪ̈ܳܢܶܐ ܒܪܝ̣ܟ ܗ̱ܘ̣ ܐܝ̣ܩܳܪܶܗ ܕܡܳܪܝܳܐ ܡ̣ܶܢ ܐܰܬܪܶܗ ܠܥܳܠܰܡ ܡܰܙܥܩܝ̣ܢ ܗ̱ܘܰܘ: ܘܰܐ̱ܚܪ̈ܳܢܶܐ ܠܐܘ̣ܪܫܠܶܡ ܫܳܓܫܝ̣ܢ ܗ̱ܘܰܘ: ܐ̱ܚܪ̈ܳܢܶܐ ܩܘ̣ܠܳܣ̈ܶܐ ܡ̣ܶܢ ܠܶܫܳܢܰܝ̈ܗܽܘܢ ܡܫܰܕܪܝ̣ܢ ܗ̱ܘܰܘ: ܘܰܐ̱ܚܪ̈ܳܢܶܐ ܟܺܐܦ̈ܶܐ ܒܰܩܥܳܬܗܽܘܢ ܡܨܰܪܶܝܢ ܗ̱ܘܰܘ: ܐ̱ܚܪ̈ܳܢܶܐ ܥܝ̣ܠܳܐ ܠܰܪܟܘ̣ܒܶܗ ܕܡܳܪܗܽܘܢ ܡܰܝܬܶܝܢ ܗ̱ܘܰܘ: ܘܰܐ̱ܚܪ̈ܳܢܶܐ ܕܰܒܪܝ̣ܟ ܗ̱ܘ̣ ܕܳܐܬܶܐ ܒܰܫܡܶܗ ܕܡܳܪܝܳܐ ܡܰܙܥܩܝ̣ܢ ܗ̱ܘܰܘ: ܐ̱ܚܪ̈ܳܢܶܐ ܕܶܝܢ ܩ̈ܳܠܶܐ ܕܐܘ̣ܫܰܥܢܰܝ̈ܗܽܘܢ ܡܰܫܡܥܝ̣ܢ ܗ̱ܘܰܘ: ܘܰܐ̱ܚܪ̈ܳܢܶܐ ܪܘ̣ܡܪܳܡܶܗ ܕܰܐܠܳܗܳܐ ܒܓܰܓܪ̈ܳܬܗܽܘܢ ܡܡܰܠܠܝ̣ܢ ܗ̱ܘܰܘ: ܘܰܐ̱ܚܪ̈ܳܢܶܐ ܠܣܳܦܪ̈ܶܐ ܒܩܳܠܰܝ̈ܗܽܘܢ ܫܳܓܫܝ̣ܢ ܗ̱ܘܰܘ: ܘܰܐ̱ܚܪ̈ܳܢܶܐ ܟܠܝ̣ܠܳܐ ܕܬܶܫܒܘ̣ܚܬܳܐ ܠܡܰܠܟܳܐ ܪܰܒܳܐ ܓܳܕܠܝ̣ܢ ܗ̱ܘܰܘ: ܐ̱ܚܪ̈ܳܢܶܐ ܫܘ̣ܒܚܳܐ ܕܰܛܠ̣ܡܘ̱ ܣܳܒ̈ܶܐ ܒܩܳܠܰܝ̈ܗܽܘܢ ܦܳܪܥܝ̣ܢ ܗ̱ܘܰܘ: ܘܰܐ̱ܚܪ̈ܳܢܶܐ ܬܶܫܒܘ̣ܚܬܶܗ ܕܰܐܠܳܗܳܐ ܒܰܡܨܰܥܬܳܗ̇ ܕܰܐܪܥܳܐ ܡܰܫܡܥܝ̣ܢ ܗ̱ܘܰܘ: ܐ̱ܚܪ̈ܳܢܶܐ ܫܘ̣ܒܚܳܐ ܒܐܘ̣̈ܫܰܥܢܶܐ ܙܳܡܪܝ̣ܢ ܗ̱ܘܰܘ: ܐ̱ܚܪ̈ܳܢܶܐ ܕܗܳܐ ܡܠܶܟ ܡܰܠ̈ܟܶܐ ܩܳܥܶܝܢ ܗ̱ܘܰܘ: ܘܰܐ̱ܚܪ̈ܳܢܶܐ ܠܰܡܕܝ̣ܢܰܬ݀ ܩܘ̣ܕ̈ܫܶܐ ܪܳܕܶܝܢ ܗ̱ܘܰܘ: ܐ̱ܚܪ̈ܳܢܶܐ ܕܢ̣ܰܡܠܶܟ ܡܳܪܝܳܐ ܫܠܳܡܳܐ ܘܫܰܝܢܳܐ ܒܣܳܚܪ̈ܳܬܳܗ̇ ܕܐܘ̣ܪܫܠܶܡ ܩܳܥܶܝܢ ܗ̱ܘܰܘ: ܘܰܐ̱ܚܪ̈ܳܢܶܐ ܕܗܳܢܰܘ ܒܘ̣ܟܪܳܐ ܕܰܫܪܳܪܳܐ ܡܰܙܥܩܝ̣ܢ ܗ̱ܘܘ: ܐ̱ܚܪ̈ܳܢܶܐ ܕܰܒܪܝ̣ܟ ܗ̱ܘ̣ ܕܳܐܬܶܐ ܒܰܫܡܶܗ ܕܡܳܪܝܳܐ ܘܰܒܪܝ̣ܟܳܐ ܗ̱ܝ ܡܰܠܟܘ̣ܬܳܐ ܕܳܐܬܝܳܐ ܕܰܐܒܽܘܢ ܕܰܘܝ̣ܕ ܩܳܥܶܝܢ ܗ̱ܘܰܘ: ܐ̱ܚܪ̈ܳܢܶܐ ܠܡܳܪܶܐ ܡܰܠ̈ܟܶܐ ܒܕܳܫ̈ܢܰܝܗܽܘܢ ܡܝܰܩܪܝ̣ܢ ܗ̱ܘܰܘ: ܐ̱ܚܪ̈ܳܢܶܐ ܙܡܝ̣ܪ̈ܳܬܳܐ ܕܫܘ̣ܒܚܳܐ ܩܕܳܡ ܥܝ̣ܠܶܗ ܡܙܰܡܪܝ̣ܢ ܗ̱ܘܰܘ: ܘܰܐ̱ܚܪ̈ܳܢܶܐ ܚܳܕܶܝܢ ܗ̱ܘܰܘ ܘܕܳܝܨܝ̣ܢ ܘܰܕܢ̣ܶܕܢܰܚ ܦܘ̣ܪܩܳܢܳܐ ܡܣܰܟܶܝܢ ܗ̱ܘܰܘ: ܐ̱ܚܪ̈ܳܢܶܐ ܕܢ̣ܺܐܬܶܐ ܗܰܘ̇ ܕܶܐܬ̣ܳܐ ܘܠܳܐ ܢ̣ܰܘܚܰܪ ܡܫܰܘܕܥܝ̣ܢ ܗ̱ܘܰܘ: ܘܰܐ̱ܚܪ̈ܳܢܶܐ ܫܘ̣ܒܚܶܗ ܕܡܳܪܝܳܐ ܙܳܡܪܝ̣ܢ ܗ̱ܘܰܘ: ܘܳܐܦ ܚܢܰܢ ܝܰܘܡܳܢܳܐ ܚܳܕܶܝܢܰܢ ܘܕܳܝܨܝ̣ܢܰܢ ܘܪܳܘܙܝ̣ܢܰܢ ܘܰܡܫܰܒܚܝ̣ܢܰܢ: ܘܠܳܟ ܡܦܝ̣ܣܝ̣ܢܰܢ ܡܫܝ̣ܚܳܐ ܐܰܠܳܗܳܐ ܕܝ̣ܠܰܢ: ܕܬ̣ܶܚܠܘ̣ܛ ܠܩ̈ܳܠܶܐ ܕܝ̣ܠܰܢ ܒܟܶܢ̈ܫܶܐ ܘܓܽܘ̈ܕܶܐ ܕܰܡܫܰܒ̈ܚܳܢܰܝܟ: ܘܒܰܛܶܠ ܡ̣ܶܢ ܓܰܘ ܥܺܕܬܳܟ ܩܰܕܝ̣ܫܬܳܐ ܠܚܶܪ̈ܝܳܢܶܐ ܘܰܫܓܘ̣ܫ̈ܝܶܐ: ܘܰܐܫܪܳܐ ܒܳܗ̇ ܫܰܝܢܳܐ ܘܰܫܠܡܐ ܗܰܘ̇ ܕܡܶܢܳܟ ܘܰܐܫܘܳܐ ܠܰܢ ܕܥܰܡ ܓܰܠܝܘ̣ܬ ܐܰܦ̈ܶܐ ܕܰܥܒܳܕ̈ܶܐ ܛܳܒ̈ܶܐ ܘܗܰܝܡܳܢܘ̣ܬܳܐ ܬܪܝ̣ܨܰܬ݀ ܫܘ̣ܒܚܳܐ: ܢ̇ܶܦܘ̣ܩ ܠܐܘ̣ܪܥܳܟ ܡܳܐ ܕܳܐܬܶܐ ܐܰܢ̱ܬ ܒܫܘ̣ܠܳܡܗܽܘܢ ܕܙܰܒ̈ܢܶܐ: ܘܥܰܡ ܫܘ̣ܒܚܳܐ ܘܩܘ̣ܒܳܠܛܰܝܒܘ̣ܬܳܐ ܢ̇ܺܐܡܰܪ ܐܘ̣ܫܰܥܢܳܐ ܒܰܡܪ̈ܰܘܡܶܐ ܐܘ̣ܫܰܥܢܳܐ ܠܰܒܪܶܗ ܕܕܰܘܝ̣ܕ: ܡܒܰܪܰܟ ܐܰܢ̱ܬ ܗ̱ܘ̣ ܗܰܘ̇ ܕܶܐܬ̣ܳܐ ܘܰܦ̣ܪܰܩ ܠܰܢ ܡ̣ܶܢ ܛܳܥܝܘ̣ܬܳܐ ܘܫܘ̣ܥܒܳܕܳܐ ܕܰܚܛܝ̣ܬܳܐ: ܘܳܐܬܶܐ ܬܘ̣ܒ ܡܶܛܽܠ ܩܝܳܡܬܳܐ ܘܦܘ̣ܢܳܝܳܐ ܕܝ̣ܠܰܢ ܘܡܰܥܰܠܬܳܐ ܕܰܠܡܰܠܟܘ̣ܬܳܐ: ܕܠܳܗ̇ ܐܰܫܘܳܐ ܠܰܢ ܕܢ̇ܶܥܘ̣ܠ ܚܢܰܢ ܘܥܰܢܝ̣̈ܕܰܝܢ ܘܟܽܠܗܽܘܢ ܥܰܢܝ̣̈ܕܶܐ ܡܗܰܝ̈ܡܢܶܐ ܝܰܠ̈ܕܶܝܗ̇ ܕܥܺܕܬܳܐ ܩܰܕܝ̣ܫܬܳܐ: ܘܗܳܪܟܳܐ ܘܬܰܡܳܢ ܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܩܰܒܶܠ ܡܳܪܝܳܐ ܐܰܠܳܗܳܐ ܒܛܰܝܒܘ̣ܬܳܟ: ܠܬܶܫܒ̈ܚܳܬܳܐ ܘܩܘ̣̈ܠܳܣܶܐ ܕܡܶܢܰܢ ܡܶܬܩܰܪܒܝ̣ܢ ܠܳܟ ܒܥܺܐܕܳܐ ܗܳܢܳܐ ܫܒܝ̣ܚܳܐ ܘܰܡܝܰܩܪܳܐ: ܘܶܐܬܪܰܥܳܐ ܒܥܶܛܪܳܐ ܗܳܢܳܐ ܕܒܶܣ̈ܡܶܐ ܕܩܰܪܶܒ̣ܢܰܢ ܩܕܳܡܰܝܟ: ܘܰܚܠܘ̣ܛ ܠܩ̈ܳܠܶܐ ܕܝ̣ܠܰܢ ܥܰܡ ܗܳܢܽܘܢ ܕܫܰܒ̣ܚܘ̣ܟ ܒܡܰܥܰܠܬܳܟ ܕܠܐܘ̣ܪܫܠܶܡ: ܘܟܰܕ ܒܙܰܠܝ̣̈ܩܶܐ ܕܝ̣ܕܰܥܬܳܐ ܐܰܠܳܗܳܝ̇ܬܳܐ ܡܰܦܪܓܝ̣ܢܰܢ ܩܕܳܡܰܝܟ: ܒܚܰܕܘ̣ܬܳܐ ܪܰܒܬܳܐ ܢ̇ܶܦܘ̣ܩ ܠܐܘ̣ܪܥܳܟ ܒܥܳܠܡܳܐ ܚܰܕܬܳܐ: ܟܰܕ ܛܥܝ̣ܢܝ̣ܢܰܢ ܣܰܘ̈ܟܶܐ ܗܕܝ̣ܪ̈ܳܬܳܐ ܘܐܘ̣ܫܰܥ̈ܢܶܐ ܠܳܐ ܡܶܫܬܰܪ̈ܝܳܢܶܐ: ܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܠܥܳܠܡܝ̣ܢ܀