ܦܪܽܘ̣ܡܝܽܘܢ

ܠܳܟ ܫܽܘ̣ܒܚܳܐ ܘܠܳܟ ܬܰܘܕܝ̣ܬܳܐ ܡܰܚܝܳܢܳܐ ܘܝܳܗܶܒ ܚܰܝ̈ܶܐ: ܕܡܝ̣ܬ ܒܰܒܣܰܪ ܘܰܐܚܝ̣ ܠܓܶܢܣܳܐ ܕܡܳܝܘ̣̈ܬܶܐ: ܠܳܟ ܣܶܓܕܬܳܐ ܘܪܘ̣ܡܪܳܡܳܐ ܚܰܣܝܳܐ ܕܠܳܐ ܚ̣ܙܳܐ ܚܒܳܠܳܐ ܒܰܫܝܘ̣ܠ: ܠܳܟ ܩܘ̣ܠܳܣܳܐ ܘܩܘ̣ܒܳܠܛܰܝܒܘ̣ܬܳܐ ܓܰܢ̱ܒܳܪܳܐ ܕܥ̣ܰܠ ܠܰܐܬܪܳܐ ܕܥܰܢܝ̣̈ܕܶܐ: ܘܐܰܟ̣ܪܶܙ ܢܘ̣ܚܳܡܳܐ ܠܰܩܒܝ̣ܪ̈ܶܐ ܘܣܰܒܪܳܐ ܫܰܪܝ̣ܪܳܐ ܠܰܫܟܝ̣̈ܒܶܐ: ܘܚܰܝ̈ܶܐ ܘܠܳܐ ܡܳܝܘ̣ܬܘ̣ܬܳܐ ܠܥܰܢܝ̣̈ܕܶܐ: ܛܳܒܳܐ ܕܠܶܗ ܢ̇ܶܬܕܟܰܪ ܘܠܶܗ ܢ̇ܫܰܒܰܚ ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܰܬܠܳܬܫܳܥܝ̣̈ܢ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒܢ̈ܶܐ ܘܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܫܺܝ̣ܚܳܐ ܐܰܠܳܗܳܐ ܕܝ̣ܠܰܢ ܗܰܘ̇ ܚܰܝ̈ܶܐ ܫܰܪܝ̣ܪ̈ܶܐ: ܘܡܰܚܝܳܢܳܐ ܕܒܶܪ̈ܝܳܬܳܐ ܗܰܘ̇ ܕܶܐܬ̣ܳܐ ܠܚܰܫܳܐ ܒܨܶܒܝܳܢܶܗ ܟܰܕ ܒܰܟܝܳܢܶܗ ܡܥܰܠܰܝ ܡ̣ܶܢ ܚܰܫ̈ܶܐ ܕܚܳܫܘ̣̈ܫܶܐ: ܘܣܰܝܒ̣ܰܪ ܙܩܝ̣ܦܳܐ ܘܡܰܘܬܳܐ ܡܶܛܽܠ ܦܘ̣ܪܩܳܢܰܢ: ܘܒܰܫܝܘ̣ܠ ܩ̣ܰܘܝ̣ ܝܰܘ̈ܡܳܬܳܐ ܬܠܳܬܳܐ ܐܰܝܟ ܛܘ̣ܦܣܳܐ ܕܩ̣ܰܕܶܡ ܪܰܫܡ̣ܶܗ ܝܰܘܢܳܢ ܒܝܰܡܳܐ ܘܰܒܢܽܘܢܳܐ: ܓܘ̣ܪܝܳܐ ܕܐܰܪܝܳܐ ܕܰܪܒ̣ܰܥ ܒܥܘ̣ܒܳܗ̇ ܕܰܫܝܘ̣ܠ ܐܰܝܟ ܩܛܝ̣ܠܳܐ ܕܰܥܠܰܘܗ̱ܝ ܐܶܬ̣ܢܰܒܝ̣ ܝܰܥܩܽܘܒ: ܕܰܣܶܠ̣ܩ ܡ̣ܶܢ ܩܶܛܠܳܐ: ܘܠܶܗ ܛܰܦ̣ܶܣ ܗ̱ܘܳܐ ܫܶܡܫܽܘܢ ܒܐܘ̣ܟܠܳܐ ܚܰܠܝܳܐ ܕܰܢܒ̣ܰܥ ܡ̣ܶܢ ܐܳܟܘ̣ܠܳܐ ܡܰܘܬܳܐ ܡܰܪܝ̣ܪܳܐ: ܘܐܳܦ ܠܶܗ ܐܶܫ̣ܬܰܘܕܰܥ ܓܰܝܳܣܳܐ ܕܗܘ̣ ܐܝ̣ܬܰܘܗ̱ܝ ܡܰܠܟܳܐ ܫܡܰܝܳܢܳܐ: ܡܶܢܶܗ ܫܡ̣ܰܥ ܒܰܪ̱ܬ݀ ܩܳܠܳܐ ܕܝܰܘܡܳܢܳܐ ܥܰܡܝ̱ ܬܶܗ̣ܘܶܐ ܒܦܰܪܕܰܝܣܳܐ ܕܐܝ̣ܬܰܘܗ̱ܝ ܠܶܗ ܪܰܗܒܘ̣ܢܳܐ: ܘܒܶܗ ܗ̱ܘ̣ ܐܰܘܕܝ̣ ܩܶܢܛܪܘ̣ܢܳܐ ܕܰܒܪܶܗ ܕܐܰܠܳܗܳܐ ܐܝ̣ܬܰܘܗ̱ܝ ܫܰܪܝ̣ܪܳܐܝ̣ܬ: ܫ̣ܶܐܠ ܦܰܓܪܶܗ ܝܘܣܶܦ ܡ̣ܶܢ ܦܝ̣ܠܰܛܘ̣ܣ ܗܺܓܡܘ̣ܢܳܐ: ܘܣܰܒܪܳܐ ܕܝ̣ܠܶܗ ܚ̣ܰܕܬܳܐ ܣܳܡ̣ܶܗ ܠܗܰܘ̇ ܦܰܓܪܳܐ ܕܰܟܝܳܐ: ܒܟ̈ܶܬܳܢܶܐ ܟܰܪܟ̣ܶܗ: ܘܰܒܡܘ̣ܪܳܐ ܘܥܰܠܘܰܝ ܚܰܢ̣ܛܶܗ: ܘܰܟܡܳܐ ܕܡܰܨܝܳܐ ܗ̱ܘܳܬ݀ ܝܰܩ̣ܪܶܗ: ܘܰܫܝܘ̣ܠ ܐܶܬܡ̣ܰܪܡ̣ܪܰܬ݀ ܐܰܝܟ ܡܶܠܬܶܗ ܕܰܢܒܺܝܳܐ ܒܡܰܥܰܠܬܶܗ ܘܰܐܝܟ ܡܝ̣ܬܳܐ ܩܰܒܶܠ̣ܬܶܗ: ܘܒܰܩܒܘ̣ܪܬܶܗ ܚܶܪܒ̣ܰܬ݀ ܡ̣ܶܢ ܫܶܬܶܐܣܶܝ̈ܗ̇: ܥ̣ܰܠ ܠܳܗ̇ ܫܝ̣ܛܳܐ ܘܰܒܠܰܥ̣ܬܶܗ: ܣܰܦ̣ܶܩ ܓܰܙܶܝ̈ܗ̇ ܘܐܰܘܒ̣ܶܕ ܥܘ̣̈ܒܶܝܗ̇: ܘܡܶܟܝ̣ܠ ܙܳܕܩܳܐܝ̣ܬ ܐܶܬܰܐܡ̣ܪܰܬ݀ ܐܰܝܟܰܘ ܥܘ̣ܩܣܳܟ ܡܰܘܬܳܐ ܘܐܰܝܟܳܐ ܗ̱ܝ ܙܳܟܘ̣ܬܶܟܝ̱ ܫܝܘ̣ܠ: ܐܶܬܒ̣ܠܰܥ ܡܰܘܬܳܐ ܒܙܳܟܘ̣ ܠܥܳܠܡܝ̣ܢ: ܘܠܳܐ ܡܰܨܝܳܐ ܕܚܰܝ̈ܶܐ ܕܡ̣ܶܢ ܡܰܘܬܳܐ ܢ̣ܶܬܬܰܚܕܽܘܢ: ܕܡܰܠܟܳܐ ܥܰܫܝ̣ܢܳܐ ܦܰܟ̣ܪܶܗ ܠܡܰܘܬܳܐ ܛܪܘ̣ܢܳܐ: ܘܰܐܥܕܝ̣ ܡܶܢܶܗ ܫܒܝ̣ܬܳܐ ܕܒܶܝܬ ܐܳܕܳܡ: ܘܕܳܢ̣ܶܗ ܠܚܰܣܝ̣ܢܳܐ ܘܫܘ̣ܠܛܳܢܶܗ ܫ̣ܪܳܐ: ܘܰܟܢܘ̣ܫܬܳܐ ܒܰܪ̱ܬ݀ ܐܰܒܕܳܢܳܐ ܕܰܠܚܝ̣ܡܳܐ ܗ̱ܘܳܬ ܠܩܶܛܠܳܐ ܕܝܳܪܬܳܐ ܡܳܪܶܐ ܟܰܪܡܳܐ: ܐܰܗ̣ܠܰܬ݀ ܒܶܗ ܘܐܶܡ̣ܪܰܬ݀ ܐܶܗܶܐ ܐܶܗܶܐ ܚ̣ܙܳܬ݀ ܒܶܗ ܥܰܝܢܰܢ: ܐܽܘܢ ܫܳܪܶܐ ܗܰܝܟܠܳܐ ܘܒܰܬܠܳܬܳܐ ܝܰܘܡܝ̣̈ܢ ܡܩܝ̣ܡ ܠܶܗ ܐܰܚܳܐ ܢܰܦܫܳܟ: ܘܥܺܕܬܳܐ ܒܰܪ̱ܬ݀ ܥܰܡ̱̈ܡܶܐ ܗܳܝ̇ ܕܒܶܐܒܠܳܐ ܪܰܒܳܐ ܝܳܬܒܳܐ ܗ̱ܘܳܬ݀ ܥܰܠ ܡܰܘܬܳܐ ܕܚܰܬܢܳܐ ܡܟܝ̣ܪܳܗ̇: ܦܢ̣ܝܰܬ݀ ܠܳܗ̇ ܠܟܰܠܬܳܐ ܙܳܢܝ̣ܬܳܐ ܐܰܝܟ ܕܐܰܠܦ̣ܳܗ̇ ܢܒܺܝܳܐ ܘܐܶܡ̣ܪܰܬ݀ : ܕܠܳܐ ܬܶܚܕܝ̣ܢ ܠܝ̣ ܒܥܶܠ̈ܕܒܳܒܰܝ ܕܢܶܦ̇ܠܶܬ ܬܘ̣ܒ ܩܳܝ̇ܡܳܐ ܐ̱ܢܳܐ: ܘܰܕܝܶܬܒܶܬ ܒܚܶܫܘ̣ܟܳܐ ܡܳܪܝܳܐ ܡܰܢܗܰܪ ܠܝ̣: ܡܶܟܝ̣ܠ ܥܰܝ̈ܢܰܝ ܬܶܚ̣ܙܶܐ ܒܗܶܝܢ ܘܒܶܝܬ ܥܰܡ̱̈ܡܶܐ ܡܒܰܕܪܳܐ ܘܰܠܬܶܡܗܳܐ ܘܠܰܚܒܳܠܳܐ ܬܶܗ̣ܘܶܐ: ܡܶܛܽܠ ܕܰܐܒܳܐ ܫܡܰܝܳܢܳܐ ܠܳܐ ܫܒ̣ܰܩ ܢܰܦܫܶܗ ܕܰܒܪܳܐ ܒܰܫܝܘ̣ܠ: ܘܠܳܐ ܝܰܗ̣ܒ ܠܚܰܣܝܶܗ ܕܢܶܚ̣ܙܶܐ ܚܒܳܠܳܐ: ܠܡܽܘܢ ܢܳܛܘ̣ܪ̈ܶܐ ܫܳܐܠܳܐ ܒܰܪ̱ܬ݀ ܥܰܡܳܐ ܫܳܛܝ̣ܬܳܐ: ܠܡܽܘܢ ܩܶܣܛܘ̣ܢܳܪ̈ܶܐ ܡܶܬܒܥܶܝܢ ܠܟܳܗ̈ܢܶܐ ܙܺܐܦܳܢ̈ܶܐ: ܠܡܽܘܢ ܕܳܚ̇ܠܳܐ ܡܶܢ ܓܰܒܪܳܐ ܩܛܝ̣ܠܳܐ: ܠܡܽܘܢ ܙܳܝ̇ܥܳܐ ܡܶـ̣ܢ ܡܝ̣ܬܳܐ ܩܒܝ̣ܪܳܐ: ܠܒܘ̣ܣܪܳܢܳܗ̇ ܫܶܐܠ̣ܰܬ݀ ܢܳܛܘ̣ܪ̈ܶܐ: ܠܒܶܗܬܰܬ݀ ܐܰܦܶܝ̈ܗ̇ ܒܥ̣ܳܬ݀ ܩܶܣܛܘ̣ܢܳܪ̈ܶܐ ܕܰܢܣ̣ܰܒܘ̱ ܟܶܣܦܳܗ̇ ܘܐܰܟ̣ܪܶܙܘ̱ ܫܪܳܪܳܐ: ܘܰܫܩ̣ܰܠܘ̱ ܫܘ̣ܚܕܳܐ ܘܰܓܠ̣ܰܘ ܙܺܐܦܳܗ̇: ܘܗܳܐ ܠܳܐ ܐܰܟ̣ܪܶܙܘ̱ ܐܰܝܟ ܕܐܰܠܦ̣ܰܬ݀ ܐܶܢܽܘܢ: ܕܬܰܠܡܝ̣̈ܕܰܘܗ̱ܝ ܓܰܢܒܘ̣ܗ̱ܝ: ܕܚܶܙܘܳܐ ܕܡܰܠܰܐܟ̈ܶܐ ܐܰܪܗ̣ܶܒ ܐܶܢܽܘܢ: ܘܕܶܢܚܶܗ ܕܡܰܠܟܳܐ ܩܛܝ̣ܠܳܐ ܐܰܙܝ̣ܥ ܐܶܢܽܘܢ: ܘܡ̣ܶܢ ܩܶܢܛܶܗ ܕܡܝ̣ܬܳܐ ܕܩܳܡ̣ ܢܦܰܠ̣ܘ̱ ܘܰܗ̣ܘܰܘ ܐܰܝܟ ܡܝ̣̈ܬܶܐ: ܘܡܶܛܽܠ ܗܳܕܶܐ ܡܙܰܡܪܝ̣ܢܰܢ ܘܐܳܡ̇ܪܝ̣ܢܰܢ: ܕܰܢ̣ܩܘ̣ܡ ܐܰܠܳܗܳܐ ܘܢ̣ܶܬܒܰܕܪܽܘܢ ܟܽܠܗܽܘܢ ܒܥܶܠ̈ܕܒܳܒܰܘܗ̱ܝ ܣܳܦܪ̈ܶܐ ܘܟܳܗ̈ܢܶܐ ܘܝܘ̣̈ܕܳܝܶܐ: ܘܢܶܥ̣ܪܩܽܘܢ ܣܳܢܰܐܘ̈ܗ̱ܝ ܡ̣ܶܢ ܩܕܳܡܰܘܗ̱ܝ ܣܳܛܳܢܳܐ ܘܫܺܐܕ̈ܶܐ ܡܳܪ̈ܘ̣ܕܶܐ: ܘܗ̣ܶܢܽܘܢ ܒܪܰܟ̣ܘ̱ ܘܰܢܦܰܠ̣ܘ̱ ܘܰܚܢܰܢ ܩܳܡ̣ܢܰܢ ܘܐܶܬܛܰܝܰܒ̣ܢܰܢ: ܘܳܐܦ ܥܘ̣ܕܪܳܢܰܢ ܒܰܫܡܶܗ ܕܡܳܪܝܳܐ ܕܡܝ̣ܬ ܘܐܰܚ̣ܝܰܢ: ܘܡ̣ܶܢ ܐܘ̣ܚܕܳܢܶܗ ܕܡܰܘܬܳܐ ܦܰܪܩ̣ܰܢ: ܘܡ̣ܶܢ ܫܘ̣ܥܒܳܕܶܗ ܕܒܝ̣ܫܳܐ ܚ̣ܰܪܪܰܢ: ܒܥܶܠܕܰܪܳܐ ܕܡܰܩ̇ܪܶܒ ܥܰܡܰܢ: ܘܰܚܢܰܢ ܘܥܰܢܝ̣̈ܕܰܝܢ ܕܢܿܶܬܒܰܣܰܡ ܒܡܰܠܟܘ̣ܬܶܗ ܫܡܰܝܳܢܝ̣ܬܳܐ ܥܰܬܶܕ ܠܰܢ ܘܢܶܚ̇ܕܶܐ ܒܰܚܙܳܬܶܗ: ܘܢ̇ܰܣܶܩ ܠܶܗ ܫܘ̣ܒܚܳܐ ܘܬܰܘܕܝ̣ܬܳܐ: ܘܠܰܐܒܘ̣ܗ̱ܝ ܘܰܠܪܘ̣ܚܶܗ ܩܰܕܝ̣ܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀