ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܦܳܪܘ̣ܩܳܐ ܕܒܰܙܩܝ̣ܦܶܗ ܐܰܦ̣ܢܝ̣ ܛܪ̈ܝ̣ܕܶܐ ܠܝܳܪܬܘ̣ܬܗܽܘܢ: ܘܐܰܥܒ̣ܰܪ ܡ̣ܶܢ ܚܰܝ̈ܳܒܶܐ ܒܶܗܬܰܬܗܽܘܢ: ܘܐܰܠܒ̣ܶܫ ܠܥܰܪ̈ܛܶܠܳܝܶܐ ܬܰܟܣܝ̣ܬܗܽܘܢ: ܘܟܰܣܝ̣ ܠܦܘ̣ܪܣܳܝܳܐ ܕܐ̱ܢܳܫܘ̣ܬܗܽܘܢ: ܘܛܰܠ̣ܶܩ ܠܚܶܫܘ̣ܟܳܐ ܕܰܚܛܝ̣ܬܗܽܘܢ: ܘܐܰܢܗ̣ܰܪ ܠܰܒܪܝ̣ܬܳܐ ܒܝ̣ܕܰܥܬܗܽܘܢ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܣܘ̣ܬܳܪܳܐ: ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒܢ̈ܶܐ ܘܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܫܺܝ̣ܚܳܐ ܐܰܠܳܗܳܐ ܕܝ̣ܠܰܢ: ܗܰܘ̇ ܒܪܳܐ ܘܡܳܪܳܐ ܒܰܪ ܟܝܳܢܳܐ ܕܐܰܒܘ̣ܗ̱ܝ: ܗܰܘ̇ ܕܡ̣ܶܢ ܐܰܒܳܐ ܐܝ̣ܬܰܘܗ̱ܝ ܗ̱ܘܳܐ ܘܐܝ̣ܬܰܘܗ̱ܝ: ܗܰܘ̇ ܕܟܰܕ ܨܒ̣ܳܐ ܫ̣ܰܕܪܶܗ ܠܥܳܠܡܳܐ ܕܢ̣ܶܦܪܘ̣ܥ ܚܰܘܒܬܳܐ ܥܰܬܝ̣ܩܬܳܐ ܕܶܐܫܛܳܪܳܐ ܪܰܒܳܐ ܗܰܘ̇ ܕܒܰܓܙܳܪܕܝ̣ܢܳܐ ܕܡܰܘܬܳܐ ܐܶܬ̣ܓܙܰܪ ܥܠܰܝܢ ܐܶܬ̣ܩܪܝ̣ ܘܐܶܬ̣ܳܐ ܠܒܶܝܬ ܕܝ̣ܢܳܐ ܘܐܶܬ̣ܕܒܰܪ ܘܥ̣ܰܠ ܠܰܚܒܘ̣ܫܝܳܐ ܘܢܰܓ̣ܕܘ̣ܗ̱ܝ ܘܩ̣ܳܡ ܒܫܘ̣̈ܐܳܠܶܐ: ܫܬ̣ܶܩ ܘܩܰܒ̣ܶܠ ܥܠܰܘܗ̱ܝ ܚܰܘܒܬܳܐ ܥܰܬܝ̣ܩܬܳܐ ܬܰܪܶܨ ܐܰܦܰܘ̈ܗ̱ܝ ܠܪܘ̣ܩܳܐ: ܘܐܰܬ̣ܩܶܢ ܚܰܨܶܗ ܠܰܦܪ̈ܳܓܶܠܶܐ: ܝܰܗ̣ܒ ܦܰܟܰܘ̈ܗ̱ܝ ܠܫܘ̣̈ܩܳܦܶܐ: ܐܰܫܠ̣ܶܡ ܓܘ̣ܫܡܶܗ ܠܡܰܚ̈ܘܳܬܳܐ: ܐܶܨܛܰܥ̣ܰܪ ܒܢܰܚ̈ܬܶܐ ܕܒܶܙܚܳܐ: ܐܶܬ̣ܩܰܦܰܚ ܒܩܰܢܝܳܐ ܕܒܶܗܬܬܳܐ ܥܰܠ ܪܝ̣ܫܶܗ: ܛܥ̣ܶܢ ܨܠܝ̣ܒܶܗ ܥܰܠ ܟܰܬܦܶܗ ܐܰܝܟ ܓܰܒܪܳܐ ܩܳܛܘ̣ܠܳܐ: ܐܶܬܡ̣ܬܰܚ ܥܰܠ ܩܰܝܣܳܐ ܐܰܝܟ ܚܰܝܳܒܳܐ: ܐܶܬ̣ܡܢܝ̣ ܥܰܡ ܥܰܘ̈ܳܠܶܐ ܐܰܝܟ ܥܳܒܶܕ ܒܝ̣̈ܫܳܬܳܐ: ܐܶܬܩ̣ܒ̈ܰܥܝ̱ ܐܝ̣ܕܰܘ̈ܗ̱ܝ ܒܨܶܨ̈ܐ: ܐܶܬܶܐܣܰܪ̈ܝ̱ ܪ̈ܶܓܠܰܘܗ̱ܝ ܒܰܙܩܝ̣ܦܳܐ: ܡܦܰܪܣܰܝ ܘܰܡܟܰܠܰܠ ܒܟܘ̣̈ܒܶܐ: ܕܒܝ̣ܪܝ̣ܢ ܠܶܗ ܘܣܳܒܶܠ ܚܰܫ̈ܶܐ: ܨ̇ܗܶܐ̣ ܠܡܰܝ̈ܳܐ ܘܡܶܬܝ̣ܗܶܒ ܠܶܗ ܚܰܠܳܐ ܘܰܡܪܳܪ̈ܶܐ: ܡܒܰܓܶܢ ܒܚܰܫܳܐ ܘܡܶܫܬܰܡ̈ܥܳܢ ܬܶܢܚ̈ܳܬܶܗ ܡ̣ܶܢ ܨܠܝ̣ܒܳܐ: ܥܰܡ ܗܳܠܶܝܢ ܟܽܠܗܶܝܢ ܛܥܝ̣ܢܝ̣ܢ ܚܠܝ̣̈ܡܶܐ ܥܘ̣ܕܪ̈ܳܢܰܘܗ̱ܝ ܥܒܝ̣ܕܝ̣ܢ ܕܒܶܝܬ ܦܝ̣ܠܰܛܘ̣ܣ ܣܳܗ̈ܕܶܐ ܠܰܫܪܳܪܶܗ: ܘܡܰܠܟܳܐ ܡܶܬ̣ܬܰܪܓܰܡ ܒܰܬܠܳܬܳܐ ܠܶܫܳܢܝ̣̈ܢ: ܘܩܳܥܶܝܢ ܟܝ̈ܳܢܶܐ ܕܡܳܪܰܐ ܗ̱ܘ̇ ܕܒܶܪ̈ܝܳܬܳܐ: ܐܰܪܥܳܐ ܕܙܳܝ̇ܥܳܐ: ܬܺܒܶܝܠ ܕܢܳܝ̇ܕܳܐ: ܫܘ̣̈ܥܶܐ ܕܡܶܨܛܰܪܶܝܢ: ܩܰܒܪ̈ܶܐ ܕܡܶܬܦܰܬܚܝ̣ܢ: ܡܝ̣̈ܬܶܐ ܕܩܳܝ̇ܡܝ̣ܢ: ܫܝܘ̣ܠ ܕܡܶܬܥܰܩܪܳܐ: ܣܰܗܪܳܐ ܕܚܳܫܶܟ: ܫܶܡܫܳܐ ܕܰܡܚܰܦܰܝ ܢܘ̣ܗܪܶܗ: ܐܰܦܰܝ̈ ܬܰܪܥܳܐ ܕܡܶܣ̣ܬܕܶܩ ܡ̣ܶܢ ܙܰܘܥܳܐ: ܐܶܣܛܘ̣̈ܟܣܶܐ ܕܡܶܬ̣ܒܰܠܗܝ̣ܢ ܕܰܒܕܶܚܠܳܐ ܢ̣ܶܫܬܪܽܘܢ ܡ̣ܶܢ ܚ̈ܕܳܕܶܐ: ܡܕܝ̣ܢ̱ܬܶܗ ܪܰܒܬܳܐ ܕܡܰܘܬܳܐ ܕܰܡܣܰܕܶܩ ܠܳܗ̇ ܙܰܘܥܳܐ ܠܡܰܦܘ̣ܠܬܳܐ: ܫܘ̣ܪ̈ܰܘܗ̱ܝ ܕܰܐܒܕܳܢܳܐ ܕܪܳܥܠܝ̣ܢ: ܪܗܳܒܬܳܐ ܕܚܰܝ̈ܶܐ ܕܡܶܫܬܰܡܥܳܐ ܒܰܐܬܪܳܐ ܕܡܝ̣̈ܬܶܐ: ܡܰܘܬܳܐ ܕܡܶܬܬܕܝ̣ܫ ܥܰܠ ܐܶܣܟܘ̣ܦܬܶܗ ܡ̣ܶܢ ܟܶܢ̈ܫܶܐ ܕܚܳܒܨܝ̣ܢ ܠܡܶܦܰܩ: ܥܳܠܡܳܐ ܕܪܳܐܶܬ ܒܙܰܘܥܳܐ ܪܰܒܳܐ ܕܢܶܫ̣ܬܪܶܐ: ܥܰܠ ܕܰܚ̣ܙܳܐ ܠܡܳܪܶܗ ܥܰܠ ܩܰܝܣܳܐ: ܓܘ̣̈ܢܚܶܐ ܪܰܘܪ̈ܒܶܐ ܕܡܶܣ̣ܬܰܥܪܝ̣ܢ: ܚܰܝ̈ܠܶܐ ܬܡܝ̣̈ܗܶܐ ܕܡܶܬ̣ܚܰܘܶܝܢ: ܐܰܪܥܳܐ ܘܰܫܡܰܝܳܐ ܕܰܫܓܝ̣ܫܝ̣ܢ ܘܒܳܥܶܝܢ ܐܰܬܪܳܐ ܠܡܶܥ̣ܪܰܩ: ܟܽܠ ܬܶܕܡܪ̈ܳܬܳܐ ܕܡܶܬܚܰܘ̈ܝܳܢ ܒܰܒܪܝ̣ܬܳܐ: ܕܢ̣ܶܬܝ̣ܕܰܥ ܗܰܘ̇ ܕܰܙܩܝ̣ܦ ܡܳܪܰܐ ܗ̱ܘ̇ ܕܡܰܠܰܐܟ̈ܶܐ: ܗܳܠܶܝܢ ܫܒܝ̣̈ܚܳܬܳܐ ܘܗܳܠܶܝܢ ܫܚܝ̣̈ܡܳܬܳܐ: ܕܚܰܕ ܩܢܘ̣ܡܳܐ ܕܰܒܪܳܐ ܝ̣ܚܝ̣ܕܳܝܳܐ ܕܕܝ̣ܠܶܗ ܚܰܫ̈ܶܐ ܘܚܰܝ̈ܠܶܐ: ܘܗܳܐ ܛܥܝ̣ܢܝ̣ܢ ܣܒܰܪܬܳܐ ܕܝ̣ܠܶܗ ܟܽܠ ܣܰܘ̈ܦܝ̣ܢ: ܘܰܙܪܝ̣ܥ ܝܘ̣ܠܦܳܢܶܗ ܒܟܽܠ ܥܰܡ̱̈ܡܝ̣ܢ: ܘܰܚܒܝ̣ܫܝ̣ܢ ܒܰܡܨܝ̣ܕܬܶܗ ܟܽܠ ܓܶܢܣܝ̣̈ܢ: ܪܳܗܛܝ̣ܢ ܠܬܰܪܥܶܗ ܟܽܠ ܚܰܝ̈ܠܝ̣ܢ: ܘܣܳܓ̇ܕܝ̣ܢ ܩܕܳܡ ܐܶܣܟܘ̣ܦܬܶܗ ܟܽܠ ܬܶܓܡܝ̣̈ܢ: ܘܐܳܟܠܝ̣ܢ ܦܰܓܪܶܗ ܟܽܠ ܦܘ̣̈ܡܝ̣ܢ: ܘܡܶܬܒܰܣܡܝ̣ܢ ܒܰܕܡܶܗ ܟܽܠ ܠܶܫܳܢܝ̣̈ܢ: ܘܙܳܡܪܝ̣ܢ ܫܘ̣ܒܚܶܗ ܟܽܠ ܩܳܠܝ̣̈ܢ: ܘܐܳܬܝ̈ܳܢ ܠܣܶܓܕܬܶܗ ܟܽܠ ܒܶܪ̈ܝܳܢ ܘܟܽܠ ܦܶܢܝ̈ܳܢ: ܘܟܽܠ ܠܶܫܳܢ ܡܰܘ̇ܕܶܐ ܕܡܳܪܝܰܐ ܗ̱ܘ̇ ܝܶܫܘ̣ܥ ܡܫܝ̣ܚܳܐ: ܕܠܶܗ ܘܠܰܐܒܘ̣ܗ̱ܝ ܘܰܠܪܘ̣ܚܶܗ ܩܰܕܝ̣ܫܳܐ ܬܰܘܕܝ̣ܬܳܐ ܘܣܶܓܕܬܳܐ ܘܗܶܕܪܳܐ ܘܩܘ̣ܠܳܣܳܐ ܡܰܣ̇ܩܝ̣ܢܰܢ: ܘܰܥܠܰܝܢ ܪ̈ܰܚܡܰܘܗ̱ܝ ܘܰܚܢܳܢܶܗ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀