ܦܪܽܘ̣ܡܝܽܘܢ

ܬܶܫܒܘ̣ܚܬܳܐ: ܠܗܰܘ̇ ܚܰܢܳܢܳܐ ܕܚܳܐܶܢ ܠܰܓܒܝ̣ܠܬܶܗ ܘܥܳܒܶܕ ܦܘ̣ܪܩܳܢܳܐ ܠܰܒܪܝ̣ܬܶܗ: ܠܗܰܘ̇ ܫܳܒܘ̣ܩܳܐ ܕܰܚܛܳܗ̈ܶܐ ܘܡܰܥܒܪܳܢܳܐ ܕܫܳܪ̈ܥܳܬܳܐ ܕܰܠܡܳܟ̈ܣܶܐ ܩܰܒܶܠ ܘܰܠܚܰܛܳܝ̈ܶܐ ܚܰܣܝ̣: ܘܰܠܩܶܢܛܪܽܘܢܐ ܕܰܒܪܶܗ ܟܪܝ̣ܗ ܗ̱ܘܳܐ ܐܰܚܝ̣: ܘܠܰܣ̈ܡܰܝܳܐ ܒܡܶܠܬܶܗ ܥܰܝ̈ܢܰܝܗܽܘܢ ܦܰܬ̣ܰܚ: ܘܰܠܠܳܥܳܙܳܪ ܪܳܚܡܶܗ ܒܳܬܰܪ ܕܰܣܪܝ̣ ܐܰܩܝ̣ܡ: ܘܠܰܐܚ̈ܘܳܬܶܗ ܚܰܕܝ̣: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܩܰܘܡܳܐ ܩܰܕܡܝܳܐ ܕܠܶܠܝܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܶܛܽܠ ܕܶܝܢ ܕܰܠܣܰܓܺܝܽܐܘ̣ܬ ܥܘ̣ܕܪ̈ܳܢܰܝܟ ܘܣܳܥܘ̣ܪܘ̣ܬ ܬܶܕܡܪ̈ܳܬܳܟ ܦܰܐܝ̈ܳܬܳܐ: ܠܳܐ ܣܳܦܶܩ ܗܰܘܢܳܐ ܐ̱ܢܳܫܳܝܳܐ ܘܠܶܫܳܢܳܐ ܒܶܣܪܳܢܳܐ ܕܰܢ̣ܣܰܝܶܟ ܐܳܘ ܡܶܠܬܳܐ ܐܰܠܳܗܳܐ: ܡܦܝ̣ܣܝ̣ܢܰܢ ܗܳܟܝ̣ܠ ܘܡܶܬܟܰܫܦܝ̣ܢܰܢ ܠܝܰܡܳܐ ܫܦܝ̣ܥ ܒܛܳܒܘ̣ܬܳܐ ܕܰܡܪܰܚܡܳܢܘ̣ܬܳܟ ܕܰܐܝܟ ܕܰܒܩܳܛܢܶܐ ܡܰܝ̈ܳܐ ܫܚܝ̣̈ܡܶܐ ܘܚܰܡܪܳܐ ܛܳܒܳܐ ܚ̣ܰܘܝ̣ܬ ܘܰܒܬܶܕܡܘ̣ܪܬܳܐ ܚܕܰܬܳܐ ܠܰܙܡܝ̣̈ܢܶܐ ܐܰܬܗ̣ܰܪܬ: ܗܳܟܰܢܳܐ ܡܳܪܝ̱ ܠܟܽܠܰܢ ܡ̣ܶܢ ܡܰܪܝ̣ܪܘ̣ܬܶܗ ܕܚܶܘܝܳܐ ܚܰܪܡܳܢܳܐ ܫܰܚܠܶܦ ܠܰܢ ܠܘܳܬ ܛܳܒܘ̣ܬܳܐ ܘܒܰܣܝ̣ܡܘ̣ܬܳܐ ܕܠܳܟ ܦܰܐܝܳܐ ܘܰܪܚܝ̣ܡܳܐ: ܘܰܐܝܟ ܕܰܠܓܰܪܒܳܐ ܒܝܰܕ ܓܶܫܬܳܐ ܕܰܐܝ̈ܕܰܝܟ ܘܰܒܡܶܠܬܳܟ ܡܰܚܝܳܢܝ̣ܬܳܐ ܕܰܟܝ̣ܬ: ܗܳܟܰܢܳܐ ܡܳܪܝ̱ ܘܰܠܬܰܪ̈ܥܝܳܬܳܐ ܕܝ̣ܠܰܢ ܓܘ̣ܫ ܘܰܒܩܝ̣ ܘܕܰܟܳܐ ܠܰܢ ܡ̣ܶܢ ܟܽܠ ܛܘ̣ܠܫܳܐ ܘܡܘ̣̈ܡܶܐ ܕܰܚܛܝ̣ܬܳܐ: ܘܰܐܝܟ ܕܰܠܣܰܡܝܳܐ ܕܡ̣ܶܢ ܟܪܶܣ ܐܶܡܶܗ ܐܰܢܗ̣ܰܪܬ ܒܢܘ̣ܗܪܳܐ ܕܝ̣ܠܳܟ ܫܰܪܝ̣ܪܳܐ ܗܰܘ̇ ܕܢ̣ܶܬܚܰܘܶܐ ܒܶܗ ܚܰܝܠܳܐ ܕܡܰܥܒܕܳܢܘ̣ܬܳܐ ܬܡܝ̣ܗܳܐܝ̣ܬ ܢܛܝ̣ܪ ܗ̱ܘܳܐ: ܗܳܟܰܢܳܐ ܡܳܪܝ̱ ܘܰܠܥܰܝ̈ܢܶܐ ܚܶܫܘ̣̈ܟܳܬܳܐ ܕܪܶܥܝܳܢܰܢ ܐܰܢܗܰܪ ܒܢܘ̣ܗܪܳܐ ܕܝ̣ܕܰܥܬܳܟ: ܘܰܐܝܟ ܕܰܠܗܳܝ ܡܡܰܚܰܝܬܳܐ ܕܩܶܪܒ̣ܰܬ݀ ܠܟܶܢܦܳܐ ܕܡܰܪܛܘ̣ܛܳܟ ܩܰܕܝ̣ܫܳܐ ܥܘ̣ܕܪܳܢܳܐ ܐܰܘܫ̣ܶܛܬ: ܗܳܟܰܢܳܐ ܡܳܪܝ̱ ܘܰܠܪܶܕܝܳܐ ܕܰܚܛܳܗ̈ܰܝܢ ܐܰܘܒܶܫ ܘܰܟܠܝ̣ ܘܰܦܣܘ̣ܩ: ܘܰܐܝܟ ܕܰܠܗܰܘ̇ ܡܫܰܪܝܳܐ ܕܰܬܠܳܬܝ̣ܢ ܘܰܬܡܳܢܶܐ ܫܢܝ̣̈ܢ ܒܰܡܫܰܪܝܘ̣ܬܳܐ ܕܗܰܕܳܡ̈ܶܐ ܪܡܶܐ ܗ̱ܘܳܐ ܕܢ̣ܶܛܥܰܢ ܥܰܪܣܶܗ ܘܢ̣ܺܐܙܰܠ ܠܒܰܝܬܶܗ ܦܰܩ̣ܶܕܬ: ܗܳܟܰܢܳܐ ܡܳܪܝ̱ ܠܰܡܫܰܪܝܘ̣ܬܳܐ ܘܪܰܦܝܘ̣ܬܳܐ ܕܝ̣ܠܰܢ ܫܰܪܰܪ ܘܰܐܚܠܶܡ: ܘܰܠܡܶܛܥܰܢ ܢܘ̣ܗܪܳܐ ܕܦܘ̣ܩ̈ܕܳܢܰܝܟ ܩܰܕܝ̣̈ܫܶܐ ܐܰܫܘܳܐ: ܘܰܐܝܟ ܕܠܰܒܪܶܗ ܕܩܶܢܛܪܽܘܢܐ ܗܰܘ̇ ܡܗܰܝܡܢܳܐ ܒܡܶܠܬܳܟ ܡܰܨܝܰܬ݀ ܟܽܠ ܐܰܣܝ̣ܬ: ܗܳܟܰܢܳܐ ܡܳܪܝ̱ ܘܠܰܦܠܝ̣ܓܘ̣ܬܳܐ ܕܪܶܥܝܳܢܳܐ ܕܝ̣ܠܰܢ ܐܰܣܳܐ ܘܫܰܪܰܪ ܠܰܢ ܒܗܰܝܡܳܢܘ̣ܬܳܐ ܫܰܪܝ̣ܪܬܳܐ ܕܒܳܟ: ܘܰܐܝܟ ܕܠܰܚܡܳܬܶܗ ܕܦܶܛܪܘ̣ܣ ܡ̣ܶܢ ܛܘ̣ܪܳܦܳܐ ܕܶܐܫܳܬܳܗ̇ ܐܰܩܝ̣ܡܬ: ܗܳܟܰܢܳܐ ܘܰܠܬܰܙܝ̣ܙܘ̣ܬܳܐ ܕܚܰܫ̈ܶܐ ܕܝ̣ܠܰܢ ܒܰܛܶܠ ܘܰܫܪܝ̣: ܘܰܐܝܟ ܕܰܠܡܰܚ̈ܫܘ̣ܠܶܐ ܬܗ̈ܘ̣ܡܳܝܶܐ ܘܝܰܡ̱̈ܡܳܝܶܐ ܟܰܕ ܐܶܬ̣ܬܥܝ̣ܪܬ ܙܓ̥ܰܪܬ ܘܫܰܠܝ̣ܬ ܘܫܰܝܶܢ̣ܬ ܘܰܠܡܶܬܬܪܝ̣ܡܳܢܘ̣ܬܳܐ ܕܓܰܠ̱ܠ̈ܰܘܗ̱ܝ ܐܰܢܝ̣ܚܬ: ܗܳܟܰܢܳܐ ܡܳܪܝ̱ ܘܰܠܟܺܐܡܽܘ̈ܢܶܐ ܕܶܐܪ̈ܶܣܝ̣ܣ ܕܰܓ̈ܳܠܳܬܳܐ ܙܓܘ̣ܪ ܘܒܰܛܶܠ: ܘܰܐܝܟ ܕܰܫܦ̣ܰܪ ܠܳܟ ܘܒܶܝܬ ܡܳܟ̈ܣܶܐ ܐܶܫܬܰܪܝ̣ܬ ܘܰܠܗܳܠܶܝܢ ܬܰܠܡܝ̣̈ܕܶܐ ܚܠܳܦ ܚܳܛܘ̣̈ܦܶܐ ܚܰܘܝ̣ܬ: ܘܗܳܟܰܢܳܐ ܡܳܪܝ̱ ܘܰܒܠ̈ܶܒܰܘܳܬܳܐ ܕܟܽܠܰܢ ܥܡܰܪ ܘܰܫܪܝ̣ ܘܕܰܝܰܪ: ܐܰܝܟ ܕܰܒܒܶܝܬ ܙܰܟܰܝ ܗܰܘ̇ ܡܳܟܣܳܐ ܘܰܐܝܟ ܕܰܠܡܰܪܝܰܡ ܚܰܛܳܝ̇ܬܳܐ ܙܰܕܶܩ̣ܬ ܘܰܒܕܰܪܓܳܐ ܕܰܒܬܘ̣̈ܠܳܬܳܐ ܛܰܟܶܣ̣ܬ: ܗܳܟܰܢܳܐ ܡܳܪܝ̱ ܠܰܚܛܳܗ̈ܶܐ ܘܒܘ̣ܨܳܪ̈ܶܐ ܘܡܶܬܥܰܒܪ̈ܳܢܘܳܬܳܐ ܕܰܣܥ̣ܰܪܢ ܩܕܳܡܰܝܟ ܐܰܥܒܰܪ ܘܰܠܚܝ̣ ܘܰܫܒܘ̣ܩ: ܘܰܐܝܟ ܕܠܰܥܠܰܝܡܬܳܐ ܒܰܪܬܶܗ ܕܝܘ̣ܐܳܪܳܫ ܪܰܒ ܟܢܘ̣ܫܬܳܐ ܢܰܚܶܡ̣ܬ: ܗܳܟܰܢܳܐ ܡܳܪܝ̱ ܘܠܰܢ ܢܰܚܶܡ ܡ̣ܶܢ ܡܝ̣ܬܘ̣ܬܳܐ ܕܰܚܛܝ̣ܬܳܐ ܘܫܰܘܙܶܒ ܠܰܢ ܡ̣ܶܢ ܡܰܘܬܳܐ ܬܶܢܝܳܢܳܐ: ܘܰܐܝܟ ܕܰܐܟܶܣ̣ܬ ܠܥܰܡܳܐ ܕܝܘ̣̈ܕܳܝܶܐ ܟܰܕ ܦܫ̣ܰܛܬ ܠܺܐܝܕܳܐ ܕܝܰܒܝ̣ܫܳܐ ܗ̱ܘܳܬ݀ ܗܳܟܰܢܳܐ ܡܳܪܝ̱ ܘܰܠܟܽܠ ܣܳܢ̈ܶܐܐ ܘܰܒܥܶܠ̈ܕܒܳܒܶܐ ܕܥܰܡܳܟ ܩܰܕܝ̣ܫܳܐ ܐܰܟܶܣ ܘܦܰܪܣܳܐ ܘܰܦܫܘ̣ܛ ܠܺܐܝ̈ܕܰܝܳܐ ܕܝ̣ܠܰܢ ܒܣܳܥܘ̣ܪܘ̣ܬ ܛܳܒ̈ܬܳܐ: ܘܰܐܝܟ ܕܰܠܒܰܪܬܳܗ̇ ܕܰܟܢܰܥܢܳܝܬܳܐ ܡ̣ܶܢ ܥܰܒܕܘ̣ܬܶܗ ܕܳܐܟܶܠܩܰܪܨܳܐ ܫܰܘܙܶܒ̣ܬ ܐܳܦ ܒܝܳܪܬܘ̣ܬܳܐ ܕܰܒܢܰܝ̈ܐ ܐܰܩܝ̣ܡܬ ܟܰܕ ܠܰܠܘܛܬܳܐ ܗܳܝ ܩܰܕܡܳܝܬܳܐ ܫ̣ܪܰܝܬ ܘܒܰܛܶܠ̣ܬ: ܗܳܟܰܢܳܐ ܡܳܪܝ̱ ܘܠܰܢ ܐܰܥܕܳܐ ܡ̣ܶܢ ܢܘ̣ܪܳܗ̇ ܕܓܺܗܰܢܳܐ ܘܰܒܬܰܪ̈ܥܶܝܗ̇ ܕܐܘ̣ܪܫܠܶܡ ܥܶܠܳܝܬܳܐ ܐܰܩܝ̣ܡ: ܘܰܐܝܟ ܕܰܠܠܶܓܝܽܘܢ ܕܫܺܐܕ̈ܶܐ ܒܝܰܕ ܒܰܩܪܳܐ ܕܰܚܙܝ̣ܪ̈ܶܐ ܠܝܰܡܳܐ ܫ̣ܰܕܰܪܬ: ܗܳܟܰܢܳܐ ܡܳܪܝ̱ ܘܰܠܟܽܠܗܽܘܢ ܚܰܝ̈ܠܰܘܳܬܳܐ ܣܰܩܘ̣ܒ̈ܠܳܝܶܐ ܕܳܐܟܶܠܩܰܪܨܳܐ ܛܰܠܶܩ ܘܫܰܕܰܪ ܠܰܐܬܪ̈ܰܘܳܬܳܐ ܪ̈ܰܚܝ̣ܩܶܐ ܘܠܳܐ ܡܶܬܥܰܡܪ̈ܳܢܶܐ: ܘܰܐܝܟ ܕܰܠܠܳܥܳܙܳܪ ܪܳܚܡܳܟ ܒܳܬܰܪ ܕܰܣ̣ܪܝ̣ ܡ̣ܶܢ ܩܰܒܪܳܐ ܕܠܳܐ ܚܒܳܠܳܐ ܐܰܩܝ̣ܡܬ: ܗܳܟܰܢܳܐ ܡܳܪܝ̱ ܘܰܠܦܳܣ̈ܶܩܝܳܬܳܐ ܘܠܰܦܟܳܪ̈ܶܐ ܕܥܰܘܠܳܐ ܡ̣ܶܢ ܬܰܪ̈ܥܝܳܬܳܐ ܕܝ̣ܠܰܢ ܦܰܣܶܩ ܘܰܫܪܝ̣ ܘܰܒܢܘ̣ܚܳܡܳܐ ܐܰܦܨܰܚ: ܘܰܐܝܟ ܕܰܠܡܰܚ̈ܘܳܬܶܗ ܕܗܰܘ̇ ܕܰܢܦ̣ܰܠ ܒܺܐܝ̈ܕܰܝ ܓܰܝܳܣ̈ܶܐ ܥܨܰܒ̣ܬ ܒܥܘ̣ܕܪ̈ܳܢܶܐ ܕܰܚܢܳܢܳܟ: ܗܳܟܰܢܳܐ ܡܳܪܝ̱ ܘܰܠܟܺܐܒ̈ܶܐ ܘܫܘ̣̈ܡܳܬܳܐ ܕܝ̣ܠܰܢ ܐܰܣܳܐ ܘܰܥܨܘ̣ܒ: ܘܰܚܠܳܦ ܡܰܚܰܬܬܳܐ ܕܠܺܐܝܪܝ̣ܚܘ̣ ܡܰܣܰܩܬܳܐ ܕܠܐܘ̣ܪܫܠܶܡ ܕܰܠܥܶܠ ܛܰܝܶܒ ܠܰܢ: ܘܰܐܝܟ ܕܒܶܐܣܛܠܳܐ ܪܝ̣ܫܳܝܬܳܐ ܠܰܒܪܳܐ ܐܳܣܘ̣ܛܳܐ ܗܰܘ̇ ܕܦܰܪܳܚܳܐܝ̣ܬ ܚ̣ܝܳܐ ܨܰܒ̣ܶܬܬ: ܘܰܒܫܳܪܘ̣ܬܳܐ ܗܳܝ ܡܝܰܬܰܪܬܳܐ ܐܰܣܡܶܟ̣ܬܳܝܗ̱ܝ ܗܳܟܰܢܳܐ ܡܳܪܝ̱ ܘܰܠܛܳܥܝܘ̣ܬܳܐ ܕܝ̣ܠܰܢ ܡ̣ܶܢ ܦܶܗܝܳܐ ܕܚܰܝ̈ܶܐ ܛܪ̈ܝ̣ܫܶܐ ܟܰܢܶܫ ܘܒܶܐܣܛܠܳܐ ܕܢܘ̣ܗܪܳܐ ܘܥܶܙܰܩܬܳܐ ܗܕܝ̣ܪܬܳܐ ܨܰܒܶܬ: ܘܰܐܝܟ ܕܰܠܠܳܥܳܙܳܪ ܡܶܣܟܺܢܳܐ ܒܥܘ̣̈ܒܶܐ ܐܰܒܪ̈ܳܗܳܡܳܝܶܐ ܘܡܰܠ̈ܝ݂ܰܝ݂ ܪܘܳܙܳܐ ܐܰܣܡ̣ܶܟܬ ܗܳܟܰܢܳܐ ܡܳܪܝ̱ ܘܠܰܢ ܡ̣ܶܢ ܫܽܘܢܳܩܶܗ ܕܥܰܬܝ̣ܪܳܐ ܐܰܪܚܶܩ ܘܠܰܡܢܳܬܶܗ ܘܰܠܘܰܥܕܶܗ ܕܡܶܣܟܺܢܳܐ ܩܰܪܶܒ ܠܰܢ: ܘܰܐܝܟ ܕܰܠܗܰܘ̇ ܓܰܝܳܣܳܐ ܕܟܰܕ ܥܰܡܳܟ ܥܰܠ ܩܰܝܣܳܐ ܬ̇ܠܶܐ̣ ܗ̱ܘܳܐ ܐܰܠܳܗܳܐ ܐܶܫ̣ܬܰܘܕܥܳܟ ܘܰܩܠܝ̣̈ܕܶܐ ܕܰܐܬܪ̈ܰܘܳܬܳܐ ܥܕܶܢܳܝ̈ܶܐ ܘܗܰܝܡ̣ܶܢܬܳܝܗ̱ܝ: ܗܳܟܰܢܳܐ ܡܳܪܝ̱ ܘܠܰܢ ܘܰܠܥܰܢܝ̣̈ܕܰܝܢ ܕܩܰܕܶܡ̣ܘ̱ ܫܟ̣ܶܒܘ̱ ܥܰܠ ܣܰܒܪܳܟ ܠܦܰܪܕܰܝܣܳܐ ܡ̇ܠܶܐ̣ ܛܘ̣̈ܒܶܐ ܫܰܕܰܪ ܘܬܰܡܳܢ ܐܰܢܝ̣ܚ: ܘܰܒܡܶܐܬܝ̣ܬܳܟ ܬܪܰܝܳܢܝ̣ܬܳܐ ܠܡܰܠܟܘ̣ܬܳܟ ܐܰܫܘܳܐ ܘܒܰܚܙܳܬܳܟ ܚܰܕܳܐ ܘܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܡܳܪܝܳܐ ܣܳܥܰܪ ܬܶܕܡܪ̈ܳܬܳܐ ܘܡܰܠܟܳܐ ܥܳܒܶܕ ܬܡܝ̣̈ܗܳܬܳܐ: ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀