ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܡܚܰܣܝܳܢܳܐ ܕܚܰܘ̈ܒܶܐ: ܠܗܰܘ̇ ܫܳܒܘ̣ܩܳܐ ܕܰܚ̈ܛܳܗܶܐ: ܠܗܰܘ̇ ܡܕܰܟܝܳܢܳܐ ܕܛܰܡ̈ܶܐܐ ܘܰܡܩܰܕܫܳܢܳܐ ܕܰܡܟܰܬܡ̈ܶܐ ܘܨܳܒܶܐ ܒܡܶܬܦܰܢܝܳܢܘ̣ܬܳܐ ܕܚܰܛܳܝ̈ܶܐ: ܗܰܘ̇ ܕܗܘ̣ ܒܰܠܚܘ̣ܕܰܘܗ̱ܝ ܐܝ̣ܬܰܘܗ̱ܝ ܚܰܢܳܢܳܐ ܘܪܳܚܶܡ ܐ̱ܢܳܫ̈ܳܐ ܘܣܰܒܪܳܐ ܘܦܘ̣ܪܩܳܢܳܐ ܕܟܽܠ ܒܣܰܪ: ܡܦܝ̣ܣܝ̣ܢܰܢ ܠܰܚܢܳܢܳܟ ܗܰܒ ܘܫܰܟܶܢ ܠܥܰܒ̈ܕܶܐ ܕܝ̣ܠܳܟ ܚܘ̣ܣܳܝܳܐ ܕܚܰܘ̈ܒܶܐ ܘܫܘ̣ܒܩܳܢܳܐ ܕܰܚ̈ܛܳܗܶܐ: ܘܪ̈ܰܚܡܶܐ ܫܦܝ̣̈ܥܶܐ ܕܛܰܝܒܘ̣ܬܳܟ ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܰܬܠܳܬܫܳܥ̈ܝ̣ܢ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܐܰ‌ܠܳܗܳܐ ܗܰܘ̇ ܕܺܐܝܬܰܝܟ ܡܪܰܚܡܳܢܳܐ ܒܰܟܝܳܢܳܐ ܡܬܘ̣ܡܳܐܝ̣ܬ ܘܡܰܫܦܰܥ ܐܰܢ̱ܬ ܪ̈ܰܚܡܰܝܟ ܥܰܠ ܟܽܠܰܢ ܐܰܡܝ̣ܢܳܐܝ̣ܬ: ܕܡܶܛܽܠ ܕܶܐܬܒܰܣ̣ܰܪܬ ܝܰܬܝ̣ܪܳܐܝ̣ܬ ܐܰܟܡܳܐ ܕܦܘ̣ܡܳܟ ܩܰܕܝ̣ܫܳܐ ܐܶܡ̣ܰܪ ܫܰܪܝ̣ܪܳܐܝ̣ܬ: ܠܳܐ ܐܶܬ̣ܺܝ̇ܬ ܕܶܐܩ̇ܪܶܐ ܠܙܰܕܝ̣̈ܩܶܐ ܐܶܠܳܐ ܠܚܰܛܳܝ̈ܶܐ ܘܠܰܐܝܠܶܝܢ ܕܒܝ̣ܫ ܒܝ̣ܫ ܥܒܝ̣ܕܝ̣ܢ ܪܰܚܡܬܳܢܳܐܝ̣ܬ: ܐܰܢ̱ܬ ܓܶܝܪ ܡܳܪܝ̱ ܐܶܬ̣ܪܰܚܰܡ̣ܬ ܥܰܠ ܡܰܪܝܰܡ ܕܰܐܓܪܒ̣ܰܬ݀ ܒܝܰܕ ܒܳܥܘ̣ܬܶܗ ܕܡܘ̣ܫܶܐ ܕܰܟܝ̣ܬܳܗ̇: ܐܰܢ̱ܬ ܐܰܥܒ̣ܰܪܬ ܣܰܟܠܘܽܬܶܗ ܕܰܘܝ̣ܕ ܡܰܠܟܳܐ ܗܰܘ ܕܰܐܣܟ̣ܶܠ ܒܒܰܝܬܶܗ ܕܐܘ̣ܪܺܝܳܐ: ܘܥܰܠܝ̣ܬ ܪܘ̣ܓܙܳܐ ܡ̣ܶܢ ܒܰܝܬܶܗ ܕܳܐܚܳܒ ܡܰܠܟܳܐ ܥܰܘܳܠܳܐ: ܐܰܢ̱ܬ ܩܰܒܶܠ̣ܬ ܬܝܳܒܘ̣ܬܶܗ ܕܰܡܢܰܫܶܐ ܡܰܠܟܳܐ ܪܰܫܝ̣ܥܳܐ ܘܐܳܫܶܕ ܕܡܳܐ: ܐܰܢ̱ܬ ܐܰܘܣܶܦ̣ܬ ܝܰܘ̈ܡܳܬܳܐ ܥܰܠ ܝܰܘ̈ܡܳܬܶܗ ܕܡܰܠܟܳܐ ܚܶܙܰܩܝܳܐ: ܐܰܢ̱ܬ ܐܰܗܦܶܟ̣ܬ ܚܶܡܬܳܟ ܡ̣ܶܢ ܡܰܠܟܳܐ ܕܢܝ̣ܢܘܶܐ ܘܡ̣ܶܢ ܡܕܝ̣ܢܬܳܐ ܘܥܰܡܳܐ ܕܝ̣ܠܶܗ: ܐܰܢ̱ܬ ܫܰܟܶܢ̣ܬ ܡܰܘܗܰܒܬܳܐ ܡܫܰܡܠܰܝܬܳܐ ܠܰܫܠܝ̣̈ܚܰܝܟ ܘܶܐܡ̣ܰܪܬ ܠܗܽܘܢ: ܕܒܺܐܝ̈ܕܰܝܟܽܘܢ ܐܝ̣ܬܰܝܗܽܘܢ ܩܠܝ̣̈ܕܶܐ ܕܡܰܠܟܘ̣ܬܳܐ ܕܰܫܡܰܝܳܐ ܘܟܽܠܡܳܐ ܕܬ̣ܶܐܣܪܽܘܢ ܒܰܐܪܥܳܐ ܢ̣ܶܗܘܶܐ ܐܰܣܝ̣ܪ ܒܰܫܡܰܝܳܐ: ܐܰܢ̱ܬ ܩܰܒܶܠ̣ܬܳܝܗ̱ܝ ܠܫܶܡܥܽܘܢ ܟܺܐܦܳܐ ܡ̣ܶܢ ܒܳܬܰܪ ܕܰܟܦ̣ܰܪ ܕܠܳܐ ܝܳܕܰܥ ܠܳܟ: ܘܒܰܝܬܝ̣ܬܳܝܗ̱ܝ ܠܕܰܪܓܳܐ ܕܪܝ̣ܫܳܢܘ̣ܬܶܗ: ܐܰܢ̱ܬ ܩܰܒܶܠ̣ܬܳܝܗ̱ܝ ܠܡܰܬܰܝ ܡܳܟܣܳܐ ܟܰܕ ܐܶܫܬܰܚ̣ܠܰܦ ܡ̣ܶܢ ܛܶܟܣܳܐ ܕܡܳܟ̈ܣܶܐ ܠܛܶܟܣܳܐ ܗܰܘ̇ ܕܰܫܠܝ̣̈ܚܶܐ: ܐܰܢ̱ܬ ܩܰܪܶܒ̣ܬܳܝܗ̱ܝ ܠܦܰܘܠܘ̣ܣ ܫܠܝ̣ܚܳܐ ܟܰܕ ܐܶܫܬܰܚ̣ܠܰܦ ܡ̣ܶܢ ܛܶܟܣܳܐ ܕܪ̈ܳܕܘ̣ܦܶܐ ܡܶܛܽܠܳܬܳܟ: ܐܰܢ̱ܬ ܡܳܪܝ̱ ܚܰܣܝ̣ܬ ܚܛܳܗ̈ܶܝܗ̇ ܘܚܰܘ̈ܒܶܝܗ̇ ܕܚܰܛܳܝܬܳܐ ܘܕܰܟܝ̣ܬܳܗ̇ ܡ̣ܶܢ ܛܰܡܽܐܘ̣ܬܳܐ ܕܙܳܢܝܽܘ̣ܬܳܐ ܘܰܐܟ̣ܪܶܙܬ ܫܡܳܗ̇ ܒܰܣܒܰܪܬܳܐ ܐܶܘܰܢܓܶܠܝܳܬܳܐ: ܝܰܗ̣ܒܬ ܚܘ̣ܠܡܳܢܳܐ ܕܢܰܦܫܳܐ ܘܰܕܦܰܓܪܳܐ ܠܰܡܫܰܪܝܳܐ ܗܰܘ̇ ܕܰܬܠܳܬܝ̣ܢ ܘܰܬܡܳܢܶܐ ܫܢܝ̣̈ܢ ܐܶܬ̣ܢܰܘܰܠ ܒܟܘ̣ܪܗܳܢܳܐ: ܘܰܬ̣ܪܰܨܬ ܠܰܐܢ̱ܬܬܳܐ ܕܰܟܦܝ̣ܦܳܐ ܗ̱ܘܳܬ݀ ܫܢܝ̣̈ܢ ܬܰܪܬܰܥܶܣܪ̈ܶܐ ܘܰܫܡܰܥ̣ܬܳܝܗ̱ܝ ܠܓܰܝܳܣܳܐ ܘܫܰܟܶܢ̣ܬ ܠܶܗ ܡܰܥܰܠܬܳܐ ܕܰܠܦܰܪܕܰܝܣܳܐ: ܐܰܢ̱ܬ ܩܰܒܶܠ̣ܬܳܝܗ̱ܝ ܠܰܒܪܳܐ ܐܳܣܘܽܛܳܐ ܡ̣ܶܢ ܒܳܬܰܪ ܦܶܗܝܳܐ ܗܰܘ̇ ܕܰܣܪ̈ܝ̣ܩܳܬܳܐ ܘܠܰܒܶܒ̣ܬ ܠܶܗ ܥܰܠ ܬܝܳܒܘ̣ܬܳܐ ܡܳܪܳܢܳܝܬܳܐ: ܐܰܢ̱ܬ ܛܥܶܢ̣ܬܳܝܗ̱ܝ ܠܥܶܪܒܳܐ ܗܰܘ̇ ܕܶܐܒ̣ܰܕ ܥܰܠ ܟܰܬ̈ܦܳܬܳܟ: ܘܠܰܛܝܳܪܳܐ ܕܒܶܝܬ ܐܰܒܘ̣ܟ ܐܰܦܢܝ̣ܬܳܝܗ̱ܝ: ܐܰܢ̱ܬ ܐܳܦ ܗܳܫܳܐ ܐܳܘ ܡܳܪܝܳܐ ܐܰ‌ܠܳܗܳܐ ܪܳܚܶܡ ܐ̱ܢܳܫ̈ܳܐ ܐܶܬ̣ܬܰܚܬܳܐ ܠܘܳܬ ܒܨܝ̣ܪܘ̣ܬܰܢ ܘܰܫܡܰܥ ܘܩܰܒܶܠ ܒܳܥܘ̣ܬܳܐ ܕܰܩܕܳܡܰܝܟ ܡܩܰܪܒܝ̣ܢܰܢ ܒܥܶܕܳܢܳܐ ܗܳܢܳܐ ܘܰܒܟܽܠܥܶܕܳܢܝ̣̈ܢ: ܘܚܘ̣ܣ ܘܶܐܬܪܰܚܰܡ ܥܠܰܝܢ ܐܰ‌ܠܳܗܳܐ: ܚܽܘܢ ܠܰܢ ܐܰܢ̱ܬ ܥܳܒܘ̣ܕܳܐ ܘܰܒܥܝ̣ ܠܰܢ ܐܰܝܟ ܪܳܥܝܳܐ ܛܳܒܳܐ ܩܰܕܶܫ ܠܛܰܡܽܐܘ̣ܬܰܢ ܘܙܰܕܶܩ ܠܚܰܝܳܒܘ̣ܬܰܢ: ܘܚܰܣܳܐ ܚܰܘ̈ܒܰܝܢ ܘܰܚ̈ܛܳܗܰܝܢ ܗܳܠܶܝܢ ܕܡܰܪܳܚܳܐܝ̣ܬ ܣܥ̣ܰܪܢܰܢ ܩܕܳܡܰܝܟ: ܐܶܢ ܒܨܶܒܝܳܢܳܐ ܘܶܐܢ ܠܳܐ ܒܨܶܒܝܳܢܳܐ ܐܶܢ ܒܝ̣ܕܰܥܬܳܐ ܘܶܐܢ ܠܳܐ ܒܝ̣ܕܰܥܬܳܐ: ܘܰܐܫܘܳܐ ܠܰܢ ܕܢ̇ܶܗܘܶܐ ܠܳܟ ܐܰܘܳܘ̈ܢܶܐ ܕܟܰܝ̈ܳܐ ܘܩܰܕܝ̣̈ܫܶܐ ܒܟܽܠܙܒܰܢ ܘܥܰܬܶܕ ܠܰܢ ܕܢ̇ܶܥܘ̣ܠ ܠܡܰܠܟܘ̣ܬܳܟ ܥܰܡ ܟܽܠܗܽܘܢ ܩܰܕܝ̣̈ܫܶܐ ܕܰܐܢܝ̣ܚܘ̱ ܠܨܶܒܝܳܢܳܟ: ܡܶܛܽܠ ܕܰܡܪܰܚܡܳܢܳܐ ܐܝ̣ܬܰܝܟ ܘܣܰܓܝ̣ ܪ̈ܰܚܡܶܐ ܘܰܦ̇ܐܶܐ̣ ܠܳܟ ܫܘ̣ܒܚܳܐ ܘܺܐܝܩܳܪܳܐ ܘܐܘ̣ܚܕܳܢܳܐ ܥܰܡ ܐܰܒܘ̣ܟ ܘܪܘ̣ܚܳܟ ܩܰܕܝ̣ܫܳܐ ܗܳܫܳܐ ܒܟܽܠܙܒܰܢ ܠܥܳܠܡܝ̣ܢ܀