ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܐܝ̣ܬܝܳܐ ܡܬܘ̣ܡܳܝܳܐ: ܘܳܐܣܝܳܐ ܕܪ̈ܰܚܡܶܐ ܕܶܐܫ̣ܬܰܕܰܪ ܡ̣ܶܢ ܨܶܝܕ ܐܰܒܘ̣ܗ̱ܝ ܠܥܳܠܡܳܐ ܘܰܐܣܝ̣ ܟܪܝ̣ܗܘ̣ܬܶܗ: ܘܰܒܣܰܡ̱̈ܡܳܢܰܘܗ̱ܝ ܐܰܠܳܗܳܝ̈ܶܐ ܥ̣ܨܰܒ ܡܰܚ̈ܘܳܬܶܗ ܕܰܒܢܰܝ̈ ܐ̱ܢܳܫܳܐ ܚܰܛܳܝ̈ܶܐ ܒܛܰܝܒܘ̣ܬܶܗ: ܠܗܰܘ̇ ܕܰܒܪ̈ܰܚܡܶܐ ܕܡܶܢܶܗ ܐܶܬ̣ܚܢܶܢ ܟܝܳܢܳܐ ܕܐܢܳܫܘ̣ܬܳܐ ܟܰܕ ܐܶܬ̣ܒܰܣܰܪ: ܘܒܰܕܡܳܐ ܕܰܩܢܘ̣ܡܶܗ ܦܰܪܩ̣ܶܗ ܘܡ̣ܶܢ ܚܰܫ̈ܶܐ ܕܫܺܐܕ̈ܶܐ ܘܐܘ̣ܚܕܳܢܳܐ ܕܡܰܘܬܳܐ ܚ̣ܰܪܪܶܗ ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܩܰܘܡܳܐ ܩܰܕܡܳܝܳܐ ܕܠܺܠܝܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܫܺܝ̣ܚܳܐ ܐܰܠܳܗܳܐ ܕܝ̣ܠܰܢ ܗܰܘ̇ ܕܰܒܝܰܕ ܡܶܬܓܰܠܝܳܢܘ̣ܬܳܟ ܕܒܰܒܣܰܪ ܠܓܶܢܣܳܐ ܕܝ̣ܠܰܢ ܗܰܘ̇ ܕܰܡܡܰܚܰܝ ܗ̱ܘܳܐ ܒܫܘܽܚ̈ܢܶܐ ܕܰܚܛܝ̣ܬܳܐ ܐܰܣܝ̣ܬ: ܘܰܠܟܘ̣ܪ̈ܗܳܢܶܐ ܘܟܺܐܒ̈ܶܐ ܕܐ̱ܢܳܫܘ̣ܬܰܢ ܒܝܰܕ ܥܘ̣ܕܪ̈ܳܢܰܝܟ ܡܳܪ̈ܳܢܳܝܶܐ ܐܰܚܠ̣ܶܡܬ: ܘܰܠܟܽܠܗܽܘܢ ܐܰܝܠܶܝܢ ܕܶܐܬ̣ܓܰܘܰܣܘ̱ ܒܳܟ ܚܠܝ̣̈ܡܶܐ ܘܝܰܬܝ̣ܪ ܚܰܝܠܬܳܢܳܐܝ̣ܬ ܚܰܘܝ̣ܬ: ܘܰܒܪ̈ܰܚܡܶܐ ܕܝ̣ܠܳܟ ܐܰܠܳܗܳܝ̈ܶܐ ܠܰܣ̈ܡܰܝܳܐ ܦܰܬ̣ܰܚܬ: ܘܰܠܓܰܪ̈ܒܶܐ ܕܰܟܝ̣ܬ ܘܠܰܡܫܰܪ̈ܰܝܳܐ ܫ̣ܰܪܰܪܬ: ܘܚܰܘ̈ܒܶܐ ܘܰܚܛܳܗ̈ܶܐ ܒܝܰܕ ܫܘܽܠܛܳܢܳܐ ܕܝ̣ܠܳܟ ܦ̇ܐܶܐ̣ ܠܰܐܠܳܗܳܐ ܫܒܰܩ̣ܬ: ܘܰܠܕܘ̣̈ܓܶܐ ܘܚܰܪ̈ܫܶܐ ܐܰܫܡܰܥ̣ܬ: ܘܰܠܦܻ̈ܐܩܶܐ ܡܶܠܬܳܐ ܚܠܝ̣ܡܬܳܐ ܫܰܟܶܢ̣ܬ: ܘܰܠܠܶܓܝܽܘܢ ܕܫܺܐܕ̈ܶܐ ܡܳܪ̈ܘ̣ܕܶܐ ܒܰܬܗܘ̣ܡܳܐ ܕܡܰܝ̈ܳܐ ܒܝܰܕ ܚܙܝ̣ܪ̈ܶܐ ܛܰܒܰܥ̣ܬ ܘܠܰܚܡܳܬܶܗ ܕܦܶܛܪܘ̣ܣ ܡ̣ܶܢ ܐܶܫܳܬܳܐ ܐܰܓ̣ܗܝ̣ܬ: ܘܠܰܬܪܝ̣ܥܰܬ݀ ܕܡܳܐ ܒܩܰܪܢܳܐ ܕܡܰܪܛܘ̣ܛܳܟ ܢܓܰܒ̣ܬ: ܘܰܠܚܰܛܳܝ̇ܬܳܐ ܒܝܰܕ ܕܶܡ̈ܥܶܐ ܕܝ̣ܠܳܗ̇ ܚܰܣܝ̣ܬ: ܘܰܠܡܳܟ̈ܣܶܐ ܙܰܕܶܩ̣ܬ: ܘܰܠܠܳܥܳܙܳܪ ܡ̣ܶܢ ܒܳܬܰܪ ܕܰܣܪܝ̣ ܦܳܩܘ̣ܕܳܐܝ̣ܬ ܩ̣ܪܰܝܬ ܘܰܐܩܝ̣ܡܬ: ܘܡܰܝ̈ܳܐ ܫܚܝ̣̈ܡܶܐ ܠܚܰܡܪܳܐ ܛܳܒܳܐ ܫܰܚ̣ܠܶܦܬ: ܘܐܰܠܦ̈ܶܐ ܣܰܓܺܝ̈ܶܐܐ ܡ̣ܶܢ ܠܰܚܡܳܐ ܙܥܘ̣ܪܳܐ ܣܰܒܰܥ̣ܬ: ܘܰܠܟܰܦ̈ܢܶܐ ܘܠܰܨܪ̈ܝ̣ܟܶܐ ܘܠܰܨܗ̈ܰܝܳܐ ܒܝܰܕ ܡܰܠܦܳܢܘ̣ܬܳܟ ܦܳܪܘ̣ܩܳܝܬܳܐ ܬܰܪܣܝ̣ܬ: ܘܡ̈ܰܬܠܶܐ ܩܰܕܝ̣̈ܫܶܐ ܠܦܘ̣ܪܩܳܢܰܢ ܪܰܟܶܒ̣ܬ: ܠܚܰܛܳܝ̈ܶܐ ܚܰܣܝ̣ܬ: ܘܠܰܐܒܝ̣̈ܕܶܐ ܐܶܫܟܰܚ̣ܬ ܠܛܳܥܰܝ̈ܳܐ ܐܰܦܢܝ̣ܬ: ܘܡܰܝ̈ܳܐ ܚܰܝ̈ܶܐ ܠܫܳܡܪܳܝܬܳܐ ܝܰܗ̣ܒܬ: ܘܰܠܗܰܘ̇ ܕܡ̣ܶܢ ܓܰܝܳܣ̈ܶܐ ܐܶܬ̣ܡܰܚܝ̣ ܘܶܐܬ̣ܚܰܠܰܨ ܚܰܢ̣ܬ ܒܪܶܚܡܰܬ݀ ܐ̱ܢܳܫܘ̣ܬܳܟ: ܘܰܒܚܰܡܪܳܐ ܘܡܶܫܚܳܐ ܥܨܰܒ̣ܬ ܫܘ̣̈ܡܳܬܶܗ ܘܡܰܚ̈ܘܳܬܳܐ ܕܝ̣ܠܶܗ: ܘܗܳܫܳܐ ܡܦܝ̣ܣܝ̣ܢܰܢ ܠܪ̈ܰܚܡܰܝܟ ܣܰܓܺܝ̈ܶܐܐ ܐܰܠܳܗܳܐ ܪܳܚܶܡ ܐ̱ܢܳܫ̈ܳܐ ܗܰܘ̇ ܕܗܳܠܶܝܢ ܟܽܠܗܶܝܢ ܠܓܶܢܣܳܐ ܕܐ̱ܢܳܫܘ̣ܬܰܢ ܚܰܠܳܫܳܐ ܫܰܟܶܢܬ: ܕܰܠܟܺܐܒ̈ܶܐ ܘܫܘ̣ܚ̈ܢܶܐ ܕܝ̣ܠܰܢ ܥܨܘ̣ܒ ܘܰܐܣܳܐ: ܘܰܠܣܰܡܝܘ̣ܬܳܐ ܕܗܰܘܢܳܐ ܕܝ̣ܠܰܢ ܐܰܢܗܰܪ: ܘܠܰܡܫܰܪܝܘ̣ܬܳܐ ܕܢܰܦ̈ܫܳܬܰܢ ܚܰܝܶܨ: ܘܰܠܚܰܘܒܬܳܐ ܕܝ̣ܠܰܢ ܥܛܝ̣: ܘܰܡܠܝ̣ ܠܰܢ ܚܘܽܒܳܐ ܘܫܰܝܢܳܐ ܕܝ̣ܠܳܟ ܘܰܫܠܳܡܳܟ ܢ̣ܶܗܘܶܐ ܥܰܡܰܢ ܒܟܽܠܙܒܰܢ ܘܰܠܥܺܕܬܳܟ ܩܰܕܝ̣ܫܬܳܐ ܢܰܛܰܪ: ܘܰܠܟܽܠܗܽܘܢ ܝܰܠ̈ܕܶܝܗ̇ ܒܰܨܠܝ̣ܒܳܟ ܚܙܘ̣ܩ: ܠܗܶܪ̈ܶܣܝ̣ܣ ܡܚܰܒ̈ܠܳܬܳܐ ܒܰܛܶܠ: ܘܰܠܪܘ̣ܓܙܳܐ ܕܡܶܛܽܠ ܚܛܳܗ̈ܰܝܢ ܡܶܬܬܰܝܬܶܐ ܥܠܰܝܢ ܟܠܝ̣: ܘܕܘ̣ܟܪܳܢܳܐ ܕܝܳܠܶܕܬܳܟ ܘܰܕܩܰܕܝ̣̈ܫܰܝܟ ܪܰܡܪܶܡ: ܘܰܠܥܰܢܝ̣̈ܕܶܐ ܕܒܰܬܪܝ̣ܨܘ̣ܬ ܫܘ̣ܒܚܳܐ ܠܘܳܬܳܟ ܚܙܰܩ̣ܘ̱ ܐܰܢܝ̣ܚ ܢܰܦ̈ܫܳܬܗܽܘܢ: ܘܚܰܣܳܐ ܒܘ̣ܨܳܪ̈ܰܝܗܽܘܢ: ܘܠܰܢ ܚܰܛܳܝ̈ܶܐ ܡܣܰܝ̈ܒܶܐ ܘܡܶܣ̈ܟܺܢܶܐ ܥܰܒ̈ܕܰܝܟ: ܫܘ̣ܠܳܡܳܐ ܛܳܒܳܐ ܟܪܝ̣ܣܛܝܳܢܳܝܳܐ: ܘܡܰܦܩܳܢܳܐ ܕܪ̈ܰܚܡܶܐ ܫܰܟܶܢ: ܘܥܰܕܰܪ ܠܟܽܠܗܽܘܢ ܡܗܰܝ̈ܡܢܶܐ ܕܩܳܪܶܝܢ ܠܰܫܡܳܟ ܒܟܽܠ ܐܰܬܰܪ: ܡܶܛܽܠ ܕܪܳܚܶܡ ܐ̱ܢܳܫ̈ܳܐ ܐܝ̣ܬܰܝܟ ܘܠܳܟ ܫܘ̣ܒܚܳܐ ܡܰܣܩܝ̣ܢܰܢ: ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀