ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܐܰܫܘܳܐ ܠܰܢ ܡܳܪܝܳܐ ܐܰܠܳܗܳܐ ܕܰܒܨܰܘ̈ܡܶܐ ܘܒܰܨ̈ܠܰܘܳܬܳܐ ܘܰܒܙܶܕ̈ܩܳܬܳܐ ܡܶܫܟܚܝ̣ܢܰܢ ܠܡܺܐܪܰܬ ܚܰܝ̈ܶܐ: ܘܰܒܙܰܗܝܘ̣ܬܳܐ ܕܠܶܒܳܐ ܘܰܒܩܰܕܝ̣ܫܘ̣ܬܳܐ ܕܦܰܓܪܳܐ: ܢܶܫ̇ܬܘܶܐ ܕܰܢ̇ܩܰܒܶܠ ܦܨܝ̣ܚܳܐܝ̣ܬ ܠܥܺܐܕܳܐ ܗܳܢܳܐ ܩܰܕܝ̣ܫܳܐ ܘܢܰܗܝ̣ܪܳܐ ܘܡܰܚܝܳܢܳܐ ܕܰܩܝܳܡܬܳܟ ܘܫܘ̣ܒܚܳܐ ܘܬܰܘܕܝ̣ܬܳܐ ܢ̇ܰܣܶܩ ܠܳܟ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܫܽܘ̣ܒܚܳܐ ܕܠܳܐ ܫܰܠܘܳܐ ܘܺܐܝܩܳܪܳܐ ܕܠܳܐ ܡܰܘܦܶܐ ܘܩܘ̣ܠܳܣܳܐ ܕܠܳܐ ܡܶܬܦܣܶܩ ܢܶܫ̇ܬܘܶܐ ܕܰܢ̇ܩܰܪܶܒ: ܠܗܰܘ̇ ܕܠܰܝܬ ܣܳܟܳܐ ܠܪܰܒܘ̣ܬܶܗ ܘܠܳܐ ܬܚܘ̣ܡܳܐ ܠܺܐܝܬܘ̣ܬܶܗ: ܘܠܳܐ ܐܳܚܶܕ ܫܘ̣ܠܳܡܳܐ ܠܡܳܪܘ̣ܬܶܗ: ܗܰܘ̇ ܕܰܐܫ̣ܘܝ̣ ܠܰܢ ܠܚܰܛܳܝ̈ܶܐ ܥܰܒ̈ܕܰܘܗ̱ܝ ܠܫܘ̣ܠܳܡ ܨܰܘܡܶܗ ܩܰܕܝ̣ܫܳܐ ܘܡܰܥܒܶܕ ܚܰܝ̈ܶܐ ܠܰܡܩܰܒܳܠܘ̣ ܠܚܰܫܶܗ ܦܳܪܘ̣ܩܳܝܳܐ: ܕܗܘ̣ ܡܰܫܘܶܐ ܠܰܢ ܒܛܰܝܒܘ̣ܬܶܗ ܠܦܶܨܚܶܗ ܦܨܝ̣ܚܳܐ: ܘܠܰܡܥܰܕܥܳܕܘ̣ ܠܰܩܝܳܡܬܶܗ ܡܫܰܒܰܚܬܳܐ: ܘܰܠܓܶܠܝܳܢܶܗ ܫܒܝ̣ܚܳܐ ܕܡ̣ܶܢ ܫܡܰܝܳܐ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܪܰܡܫܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܕܚܰܝܰܝ̈ܢ܀

ܣܶܕܪܳܐ

ܐܰ‌ܠܳܗܰܢ ܪܰܒܳܐ ܘܦܳܪܘ̣ܩܰܢ ܝܶܫܘ̣ܥ ܡܫܝ̣ܚܳܐ ܗܰܘ̇ ܕܨܳܡ̣ܬ ܚܠܳܦܰܝܢ ܒܰܒܣܰܪ ܘܰܒܝܰܕ ܨܰܘܡܳܟ ܘܕܰܪܳܟ ܪܰܒܳܐ: ܫܒܝ̣ܠܳܐ ܕܚܰܝ̈ܶܐ ܕܠܳܐ ܣܳܐܒܝ̣ܢ ܠܰܢ ܕܪܰܫ̣ܬ ܘܰܒܫܘ̣ܠܳܡ ܨܰܘܡܳܐ ܕܰܪܳܐ ܥܰܡ ܐܳܟܶܠܩܰܪܨܳܐ ܒܥܶܠܕܰܪܳܐ ܐܶܚ̣ܰܕܬ: ܘܰܒܙܳܟܘ̣ܬܳܟ ܪܰܒܬܳܐ ܠܰܢ ܠܚܰܝܳܒ̈ܶܐ ܙܰܟܝ̣ܬ: ܘܰܐܫܘܳܐ ܐܳܦ ܠܰܢ ܗܳܫܳܐ ܒܛܰܝܒܘ̣ܬܳܟ ܒܫܘ̣ܠܳܡ ܨܰܘܡܰܢ ܠܫܘ̣ܘ̈ܟܳܢܰܝܟ ܡܥܰܠܰܝ̈ܳܐ ܘܰܠܡܰܘܗ̈ܒܳܬܳܟ ܐܰ‌ܠܳܗܳܝ̈ܬܳܐ: ܘܰܐܫܘܳܢ ܡܳܪܰܢ ܒܫܘ̣ܠܳܡ ܨܰܘܡܰܢ ܠܰܐܓܪܳܐ ܛܳܒܳܐ ܕܰܡܠ̣ܰܟܬ ܠܨܰܝܳܡ̈ܶܐ ܫܰܪܝ̣ܪ̈ܶܐ: ܐܰܫܘܳܢ ܡܳܪܝ̱ ܒܫܘ̣ܠܳܡ ܨܰܘܡܳܐ ܕܝ̣ܠܰܢ ܠܒܘ̣ܣܳܡܳܐ ܗܰܘ̇ ܕܰܢܛܝ̣ܪ ܒܦܰܪܕܰܝܣܳܐ ܠܰܢܙܝ̣ܪ̈ܶܐ: ܐܰܫܘܳܢ ܡܳܪܝ̱ ܒܫܘ̣ܠܳܡ ܨܰܘܡܰܢ ܠܰܓܢܘ̣ܢܳܐ ܕܢܘ̣ܗܪܳܐ ܕܰܡܛܰܝܰܒ ܠܟܰܫܝ̣ܪ̈ܶܐ: ܐܰܫܘܳܢ ܡܳܪܝ̱ ܒܫܘ̣ܠܳܡ ܐܰܓܘ̣ܢܰܢ ܠܕܰܪܓܳܐ ܪܳܡܳܐ ܘܰܡܥܰܠܝܳܐ ܕܰܓܡܝ̣ܪ̈ܶܐ: ܐܰܫܘܳܢ ܡܳܪܝ̱ ܒܫܘ̣ܠܳܡ ܨܰܘܡܰܢ ܠܗܶܕܪܳܐ ܘܨܶܒܬܳܐ ܘܫܘ̣ܦܪܳܐ ܕܫܰܦܝ̣ܪ̈ܶܐ: ܐܰܫܘܳܢ ܡܳܪܝ̱ ܒܫܘ̣ܠܳܡ ܐܰܓܘ̣ܢܰܢ ܠܘܰܥܕܳܐ ܕܘܰܥ̣ܶܕܬ ܘܥ̣ܰܬܶܕܬ ܒܛܰܝܒܘ̣ܬܳܟ ܠܨܰܝܳܡ̈ܶܐ ܒܚܝ̣ܪ̈ܶܐ: ܐܰܫܘܳܢ ܡܳܪܝ̱ ܒܫܘ̣ܠܳܡ ܨܰܘܡܰܢ ܠܙܳܟܘ̣ܬܳܐ ܕܙܰܟܳܝ̈ܶܐ: ܘܰܠܢܶܨ̈ܚܳܢܶܐ ܕܰܐܓܽܘܢܝ̣̈ܣܛܶܐ ܬܗܝ̣ܪ̈ܶܐ: ܐܰܫܘܳܢ ܡܳܪܝ̱ ܒܫܘ̣ܠܳܡ ܐܰܓܘ̣ܢܰܢ ܠܚܰܕܘ̣ܬܳܐ ܘܠܰܪܘܳܙܳܐ ܘܰܠܕܰܘܨܳܐ ܕܥܰܡ ܝܰܩܝ̣ܪ̈ܶܐ: ܐܰܫܘܳܢ ܡܳܪܝ̱ ܒܫܘ̣ܠܳܡ ܨܰܘܡܰܢ ܠܛܘ̣ܒ̈ܶܐ ܛܘ̣ܒ̈ܬܳܢܶܐ ܘܰܠܓܶܐܘ̈ܳܬܳܐ ܕܰܥܕܶܝܢ ܕܢܰܗܝ̣ܪ̈ܶܐ: ܐܰܫܘܳܢ ܡܳܪܝ̱ ܒܫܘ̣ܠܳܡ ܨܰܘܡܰܢ ܠܝܳܪܬܘ̣ܬܳܐ ܕܟܺܐܢ̈ܶܐ ܘܰܠܡܘ̣̈ܠܟܳܢܶܐ ܕܰܡܪ̈ܰܚܡܳܢܶܐ: ܐܰܫܘܳܢ ܡܳܪܝ̱ ܒܫܘ̣ܠܳܡ ܐܰܓܘ̣ܢܰܢ ܠܰܟܠ̈ܝ̣ܠܶܐ ܠܳܐ ܡܶܬܚܰܒ̈ܠܳܢܶܐ ܕܣܳܗ̈ܕܶܐ ܘܡܰܘ̈ܕܝܳܢܶܐ: ܐܰܫܘܳܢ ܡܳܪܝ̱ ܒܫܘ̣ܠܳܡ ܨܰܘܡܰܢ ܠܰܠܡܺܐܢܳܐ ܘܢܰܘܚܳܐ ܕܰܡܛܰܪ̈ܦܶܐ ܘܕܡܶܛܽܠ ܚܘ̣ܒܳܟ ܗ̣ܘܰܘ ܪ̈ܕܝ̣ܦܶܐ: ܐܰܫܘܳܢ ܡܳܪܝ̱ ܒܫܘ̣ܠܳܡ ܐܰܓܘ̣ܢܰܢ ܠܡܶܫܬܘ̣ܬܳܐ ܗܳܝ ܕܰܡܛܰܝܒܳܐ ܠܰܚܕܘ̣ܓ̈ܶܐ ܘܰܠܦܘ̣ܚܪܳܐ ܕܰܣܕܝ̣ܪ ܠܰܪ̈ܓܝ̣ܓܶܐ: ܐܰܫܘܳܢ ܡܳܪܝ̱ ܒܫܘ̣ܠܳܡ ܨܰܘܡܰܢ ܢܘ̣ܗܪܳܐ ܐܰܫܝ̣ܕܳܐ ܕܰܢܛܝ̣ܪ ܠܰܒ̈ܬܘ̣ܠܶܐ ܘܠܰܢܝܳܚܬܳܐ ܪܰܒܬܳܐ ܕܰܡܥܰܬܕܳܐ ܠܰܥ̈ܡܝ̣ܠܶܐ: ܐܰܫܘܳܢ ܡܳܪܝ̱ ܒܫܘ̣ܠܳܡ ܐܰܓܘ̣ܢܰܢ ܠܰܣܡܳܟܳܐ ܕܒܶܗ ܚܳܕܝܶܢ ܟܺܐܢ̈ܶܐ ܘܙܰܕܝ̣̈ܩܶܐ ܘܰܐܒܝ̣̈ܠܶܐ ܘܰܠܣܰܒܪܳܐ ܕܠܶܗ ܡܣܰܟܶܝܢ ܚܣܝ̣̈ܠܶܐ: ܐܰܫܘܳܢ ܡܳܪܝ̱ ܒܫܘ̣ܠܳܡ ܨܰܘܡܰܢ ܠܥܶܢܝܳܢܳܐ ܕܥܰܡ ܩܰܕܝ̣̈ܫܶܐ ܘܰܠܥܘ̣ܬܪܳܐ ܘܓܰܐܝܘ̣ܬܳܐ ܕܨܰܝܳܡ̈ܶܐ ܦܳܪ̈ܘ̣ܫܶܐ: ܐܰܫܘܳܢ ܡܳܪܝ̱ ܒܫܘ̣ܠܳܡ ܐܰܓܘ̣ܢܰܢ ܠܦܘ̣ܪ̈ܦܳܥܶܐ ܪ̈ܘ̣ܚܳܢܳܝܶܐ ܕܥܰܡ ܡܶܣ̈ܟܺܢܶܐ ܘܰܠܦܳܬܘ̣ܪ ܛܘ̣ܒ̈ܶܐ ܕܰܥܠܰܘܗ̱ܝ ܡܶܣܬܰܡܟܝ̣ܢ ܙܡܝ̣̈ܢܶܐ: ܐܰܫܘܳܢ ܡܳܪܝ̱ ܒܫܘ̣ܠܳܡ ܨܰܘܡܰܢ ܠܨܶܗܝܽܘܢ ܡܶܬܝܰܕܥܳܢܝ̣ܬܳܐ ܐܶܡܳܐ ܕܙܰܕܝ̣̈ܩܶܐ ܘܰܠܥܺܕܬܳܐ ܕܒܘ̣ܟܪ̈ܶܐ ܕܒܶܗ ܡܫܰܡܫܝ̣ܢ ܟܳܗ̈ܢܶܐ ܘܰܡܫܰܡ̈ܫܳܢܶܐ ܛܰܪ̈ܩܶܐ: ܐܰܫܘܳܢ ܡܳܪܝ̱ ܒܫܘ̣ܠܳܡ ܐܰܓܘ̣ܢܰܢ ܠܩܰܘܡܳܐ ܕܡ̣ܶܢ ܝܰܡܝ̣ܢܳܟ ܥܰܡ ܐܶܡܪ̈ܶܐ ܓܒܰܝ̈ܳܐ ܘܰܠܒܰܪ̱ܬ ܩܳܠܳܐ ܕܰܡܙܰܡܢܳܐ ܠܡܰܠܟܘ̣ܬܳܐ ܕܰܫܡܰܝܳܐ: ܐܰܫܘܳܢ ܡܳܪܝ̱ ܒܫܘ̣ܠܳܡ ܨܰܘܡܰܢ ܠܪܘ̣ܡܪܳܡܳܐ ܕܡܰܟܝ̣̈ܟܶܐ ܘܰܠܩܘ̣̈ܠܳܣܶܐ ܕܰܟܢܝ̣̈ܟܶܐ: ܐܰܫܘܳܢ ܡܳܪܝ̱ ܒܫܘ̣ܠܳܡ ܐܰܓܘ̣ܢܰܢ ܠܫܘ̣ܒܚܳܐ ܕܡܰܠܰܐܟ̈ܶܐ ܪ̈ܘ̣ܚܳܢܶܐ ܘܰܠܗ̈ܘ̣ܠܳܠܶܐ ܕܬܶܓ̈ܡܶܐ ܕܢܘ̣ܪ̈ܳܢܶܐ: ܐܰܫܘܳܢ ܡܳܪܝ̱ ܒܫܘ̣ܠܳܡ ܨܰܘܡܰܢ ܠܬܶܫܒܘ̣ܚܬܳܐ ܕܡܳܪܘ̣ܬܳܟ ܘܰܠܬܰܘܕܝ̣ܬܳܐ ܕܰܐܠܳܗܘ̣ܬܳܟ: ܐܰܫܘܳܢ ܡܳܪܝ̱ ܒܫܘ̣ܠܳܡ ܐܰܓܘ̣ܢܰܢ ܕܰܒܪ̈ܶܥܝܳܢܶܐ ܕܟܰܝ̈ܳܐ ܘܰܒܚ̈ܘܽܫܳܒܶܐ ܙܗܰܝ̈ܳܐ ܘܰܒܠܶܫܳܢ̈ܶܐ ܫܦܰܝ̈ܳܐ ܘܰܙܗ̈ܰܝܳܐ ܥܰܡ ܫܰܒܪ̈ܶܐ ܬܰܡܝ̣̈ܡܶܐ ܢ̇ܶܦܘ̣ܩ ܠܐܘ̣ܪܥܳܟ ܒܐܘ̣ܫܰܥܢ̈ܶܐ ܡܶܬܝܰܕܥܳܢܳܐܝ̣ܬ: ܘܥܰܡ ܒܬܘ̣̈ܠܳܬܳܐ ܚܰܟܝ̣̈ܡܳܬܳܐ ܒܠܰܡ̈ܦܺܐܕܶܐ ܢܰܗܝ̣ܪ̈ܶܐ ܢ̇ܺܐܪܥܳܟ ܡܰܦܪܓܳܐܝ̣ܬ: ܘܥܰܡ ܫܠܝ̣̈ܚܶܐ ܩܰܕܝ̣̈ܫܶܐ ܢ̇ܶܬܒܰܣܰܡ ܥܰܡܳܟ ܒܰܚܫܳܡܝ̣ܬܳܐ ܐ̱ܪܳܙܳܢܳܐܝ̣ܬ: ܘܥܰܡ ܒܶܪ̈ܝܳܬܳܟ ܢ̇ܶܚܰܫ ܥܰܡܳܟ ܦܳܪܘ̣ܫܳܐܝ̣ܬ: ܘܥܰܡ ܓܰܝܳܣܳܐ ܕܡ̣ܶܢ ܝܰܡܝ̣ܢܳܟ ܢ̇ܰܘܕܶܐ ܒܳܟ ܬܪܝ̣ܨܳܐܝ̣ܬ: ܘܥܰܡ ܝܰܘܣܶܦ ܘܢܝ̣ܩܘ̣ܕܝ̣ܡܘ̣ܣ ܢ̇ܝܰܩܰܪ ܠܰܩܒܘ̣ܪܬܳܟ ܡܗܰܝܡܢܳܐܝ̣ܬ: ܘܰܕܢ̇ܶܬܩܒܰܪ ܥܰܡܳܟ ܬܠܝ̣ܬܳܐܝ̣ܬ ܘܕܰܢ̇ܩܘ̣ܡ ܥܰܡܳܟ ܕܠܳܐ ܚܒܳܠܳܐ ܚܰܣܝܳܐܝ̣ܬ ܘܕܰܢ̇ܣܰܒܰܪ ܩܝܳܡܬܳܟ ܥܰܡ ܡܰܠܰܐܟ̈ܶܐ ܓܰܠܝܳܐܝ̣ܬ: ܘܰܕܢ̇ܺܚܶܐ ܒܰܫܠܳܡܳܟ ܫܰܦܝܳܐܝ̣ܬ: ܘܕܰܢ̇ܩܰܒܶܠ ܡܰܦܘ̣ܚܝ̣ܬܳܐ ܐܰ‌ܠܳܗܳܝܬܳܐ ܡ̣ܶܢ ܦܘ̣ܡܳܟ ܩܰܕܝ̣ܫܳܐ ܪܘ̣ܚܳܢܳܐܝ̣ܬ: ܘܰܕܢ̇ܶܓܘ̣ܫ ܕܰܦܢܳܟ ܡܰܪܕܝܰܬ݀ ܚܰܝ̈ܶܐ ܘܢܶܚ̇ܙܶܐ ܕܘ̣ܟܝ̈ܳܬܳܐ ܕܨܶܨ̈ܶܐ ܒܺܐܝ̈ܕܰܝܟ ܚܳܕܝܳܐܝ̣ܬ: ܘܕܰܢ̇ܩܰܒܶܠ ܪܘ̣ܚܳܦܳܟ ܥܰܠ ܪ̈ܝ̣ܫܰܝܢ ܟܺܐܢܳܐܝ̣ܬ: ܘܰܕܢ̇ܶܣܬܰܠܰܩ ܥܰܡܳܟ ܠܪܰܘܡܳܐ ܕܰܫܡܰܝܳܐ ܪܘ̣ܚܳܢܳܐܝ̣ܬ: ܘܰܕܢ̇ܶܬܶܒ ܡ̣ܶܢ ܝܰܡܝ̣ܢ ܐܰܒܘ̣ܟ ܥܰܡܳܟ ܫܒܝ̣ܚܳܐܝ̣ܬ ܘܰܕܢ̣ܶܬܬܢܝ̣ܚ ܥܠܰܝܢ ܪܘ̣ܚܳܐ ܦܰܪܩܠܝ̣ܛܳܐ ܥܰܡ ܫܠܝ̣̈ܚܰܝܟ ܩܰܕܝ̣̈ܫܶܐ ܫܰܘܝܳܐܝ̣ܬ: ܐܰܝܟܰܢܳܐ ܕܰܢ̇ܫܰܒܚܳܟ ܠܳܐ ܫܳܬܘ̣ܩܳܐܝ̣ܬ ܘܰܢ̇ܗܰܕܪܳܟ ܥܰܡ ܫܠܝ̣̈ܚܶܐ ܩܰܕܝ̣̈ܫܶܐ ܫܰܘܝܳܐܝ̣ܬ: ܘܰܢ̇ܪܰܡܪܡܳܟ ܐܰܡܝ̣ܢܳܐܝ̣ܬ: ܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܩܰܒܶܠ ܡܳܪܝ̱ ܒܛܰܝܒܘ̣ܬܳܟ ܥܰܡ ܒܶܣ̈ܡܶܐ ܗܳܠܶܝܢ ܗܘ̣ܠܳܢܝ̈ܳܬܳܐ ܕܰܒܫܘ̣ܠܳܡ ܨܰܘܡܳܐ ܩܰܪܶܒ̣ܢܰܢ ܠܡܳܪܘ̣ܬܳܟ: ܐܳܦ ܠܦܺܐܪ̈ܶܐ ܪ̈ܘ̣ܚܳܢܳܝܶܐ ܕܡ̣ܶܢ ܠܶܒܰܘ̈ܳܬܰܢ ܩܰܪܶܒ̣ܢܰܢ ܠܳܟ ܒܬܺܐܪܬܳܐ ܕܟܝ̣ܬܳܐ ܘܰܒܡܰܕܥܳܐ ܦܳܪܘ̣ܫܳܐ ܘܰܒܣܘ̣ܟܳܠܳܐ ܡܶܬܒܰܝܢܳܢܳܐ: ܘܢ̣ܶܗܘܽܘܢ ܩܕܳܡܰܝܟ ܡܩܰܒ̈ܠܶܐ ܐܰܝܟ ܩܘ̣ܪܒܳܢܳܐ ܕܟܺܐܢ̈ܶܐ ܘܰܙܕܝ̣̈ܩܶܐ ܕܡ̣ܶܢ ܥܳܠܰܡ: ܘܢ̣ܶܬܟܠܶܐ ܡ̣ܶܢ ܟܽܠ ܝܰܠ̈ܕܶܝܗ̇ ܕܥܺܕܬܳܐ ܡܗܰܝܡܰܢܬܳܐ ܡܰܘܬܳܢܳܐ ܕܰܚܛܝ̣ܬܳܐ ܘܟܰܦܢܳܐ ܡܚܰܒܠܳܢܳܐ ܕܢܰܦ̈ܫܳܬܳܐ: ܘܐܘ̣ܠܨܳܢܳܐ ܘܰܙܪܘ̣ܒܝܳܐ ܡܕܰܝܒܳܢܳܐ ܕܠܶܒܰܘ̈ܳܬܳܐ ܢܶܫ̇ܬܘܶܐ ܟܽܠܰܢ ܠܚܰܕܘ̣ܬܳܐ ܠܳܐ ܡܶܫܬܰܚܠܦܳܢܝ̣ܬܳܐ ܕܰܢܛܝ̣ܪܳܐ ܠܥܳܒ̈ܕܰܝ ܨܶܒܝܳܢܳܟ: ܐܰܝܟܰܢܳܐ ܕܰܓܡܝ̣ܪܳܐܝ̣ܬ ܢ̇ܫܰܒܚܳܟ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܠܥܳܠܡܝ̣ܢ܀