ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܚܰܬܢܳܐ ܕܰܫܪܳܪܳܐ: ܕܙܰܡ̣ܶܢ ܗܽܘ̣ ܠܶܗ ܠܡܶܫܬܘ̣ܬܳܐ ܐܰܪܥܳܢܳܝܬܳܐ ܕܰܒܩܳܛܢܶܐ ܕܰܓܠܝ̣ܠܳܐ: ܟܰܕ ܫܰܚ̣ܠܶܦ ܠܡܰܝ̈ܳܐ ܘܰܗ̣ܘܰܘ ܚܰܡܪܳܐ ܪܝ̣ܫܳܝܳܐ: ܠܗܰܘ̇ ܡܰܠܟܳܐ ܕܬܶܫܒܘ̣ܚܬܳܐ ܕܩܰܒ̣ܶܠ ܠܒܳܥܘ̣ܬܳܗ̇ ܕܶܐܡܶܗ ܟܢܝ̣ܟܬܳܐ: ܠܗܰܘ̇ ܝܰܠܕܳܐ ܡܬܘ̣ܡܳܝܳܐ ܕܒ̣ܰܪܶܟ ܥܰܠ ܝܰܠܕܳܐ ܕܰܓܦܶܬܳܐ ܒܰܚܫܳܡܝ̣ܬܳܐ ܐ̱ܪܳܙܳܢܳܝܬܳܐ: ܟܰܕ ܐܶܡ̣ܰܪ ܠܬܰܠܡܝ̣̈ܕܰܘܗ̱ܝ ܫܠܝ̣̈ܚܶܐ ܩܰܕܝ̣̈ܫܶܐ ܒܥܶܠܝ̣ܬܳܐ: ܕܠܳܐ ܐܶܫ̇ܬܶܐ ܥܰܡܟܽܘܢ ܡ̣ܶܢ ܗܳܢܳܐ ܝܰܠܕܳܐ ܕܰܓܦܶܬܳܐ ܥܕܰܡܳܐ ܕܶܐܫ̇ܬܶܝܘܗ̱ܝ ܥܰܡܟܽܘܢ ܚ̣ܰܕܬܳܐ ܒܡܰܠܟܘ̣ܬܶܗ ܕܐܳܒܝ̱ ܕܒܰܫܡܰܝܳܐ: ܗܘ̣ ܢ̣ܒܰܪܶܟ ܠܚܰܡܪܰܢ ܒܛܰܝܒܘ̣ܬܶܗ ܐܰܠܳܗܳܝܬܳܐ: ܘܢ̣ܰܪܘܶܐ ܠܢܰܦ̈ܫܳܬܳܐ ܕܫܳܬܘ̣̈ܝܰܘܗ̱ܝ ܒܚܘ̣ܒܳܐ ܐܶܘܰܢܓܶܠܳܝܳܐ: ܘܢ̣ܶܕܚܘ̣ܩ ܡܶܢܰܢ ܠܟܽܠܳܗ̇ ܙܺܐܦܳܢܘ̣ܬܳܐ ܕܰܚܛܝ̣ܬܳܐ ܘܰܢ̣ܫܰܚܠܶܦ ܠܠܶܒܰܘ̈ܳܬܰܢ ܡ̣ܶܢ ܒܝ̣̈ܫܳܬܳܐ ܠܛܳܒ̈ܳܬܳܐ: ܛܳܒܳܐ ܕܠܶܗ ܢ̇ܶܬܕܟܰܪ ܘܠܶܗ ܢ̇ܫܰܒܰܚ ܘܠܶܗ ܢ̇ܶܣܓܘ̣ܕ ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܨܰܦܪܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܩܕܳܡܰܝܢ ܘܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܫܝ̣ܚܳܐ ܐܰܠܳܗܳܐ ܕܝ̣ܠܰܢ: ܗܰܘ̇ ܕܬܶܕܡܘ̣ܪܬܳܐ ܚ̇ܕܰܬܳܐ ܚܰܘܺܝ̣ ܒܩܳܛܢܶܐ ܕܰܓܠܝ̣ܠܳܐ: ܗܘ̣ ܢ̣ܚܰܕܶܬ ܠܠܶܒܰܘ̈ܳܬܰܢ ܒܚܘ̣ܕܳܬܳܐ ܕܪܘ̣ܚܳܐ ܩܰܕܝ̣ܫܳܐ: ܘܰܢ̣ܒܰܣܶܡ ܠܰܢ ܡܳܪܝܳܐ ܒܫܶܩܝܳܐ ܫܡܰܝܳܢܳܐ: ܗܰܘ̇ ܕܣܰܓܝ̣ ܫܰܦܝܘ̣ܬܳܐ ܕܰܡܨܰܠܰܠ ܡ̣ܶܢ ܟܽܠܳܗ̇ ܕܠܝ̣ܚܘ̣ܬܳܐ ܕܰܚܛܝ̣ܬܳܐ: ܢܓ݂ܰܘܙܶܠ ܐܰܠܳܗܳܐ ܒܪܶܚܡܰܬ݀ ܚܘ̣ܒܶܗ ܘܰܢ̣ܛܰܠܶܩ ܡ̣ܶܢܢ ܠܟܽܠܶܗ ܝܰܥܪܳܐ ܕܣܶܢܶܐܬܳܐ ܘܰܕܒܝ̣ܫܘ̣ܬܳܐ: ܢ̣ܕܰܒܰܪ ܡܳܪܝܳܐ ܠܡܰܚ̈ܫܒܳܬܰܢ ܒܰܫܒܝ̣̈ܠܶܐ ܕܩܘ̣ܫܬܳܐ ܘܢ̣ܰܫܪܶܐ ܠܢܰܦ̈ܫܳܬܰܢ ܥܰܠ ܡܰܪ̈ܓܶܐ ܕܥܘ̣ܫܢܳܐ ܘܰܕܒܰܣܝ̣ܡܘ̣ܬܳܐ: ܢ̣ܗܰܕܶܐ ܠܰܢ ܡܳܪܝܳܐ ܒܐܘ̣ܪ̈ܚܳܬܳܐ ܬܪ̈ܝ̣ܨܳܬܳܐ ܕܡܰܘܒ̈ܠܳܢ ܠܰܐܘ̈ܘܳܢܶܐ ܕܰܢܝܳܚܳܐ: ܢ̣ܙܰܗܶܐ ܡܳܪܝܳܐ ܠܢܰܦ̈ܫܳܬܰܢ ܘܰܠܦܰܓܪ̈ܰܝܢ ܒܚܘ̣ܒܳܐ ܕܰܨܠܝ̣ܒܳܐ ܕܝ̣ܠܶܗ ܙܰܟܳܝܳܐ: ܢ̣ܰܪܬܰܚ ܠܰܢ ܡܳܪܝܳܐ ܒܪܶܚܡܬܶܗ ܘܰܒܚܘ̣ܒܶܗ: ܘܢ̣ܶܡܠܶܐ ܠܰܢ ܡ̣ܶܢ ܒܘ̣ܣܳܡܰܘ̈ܗ̱ܝ ܡܶܬܝܰܕ̈ܥܳܢܶܐ ܘܠܳܐ ܚܰܫܳܢܳܝ̈ܶܐ: ܢ̣ܒܰܣܶܡ ܠܰܢ ܡܳܪܝܳܐ ܒܟܳܣܳܐ ܕܝ̣ܠܶܗ ܗܰܘ̇ ܕܡܰܪܘܶܐ ܐܰܝܟ ܚܰܝܳܐ ܗܳܢܰܘ ܕܶܝܢ ܒܫܘ̣̈ܟܳܢܶܐ ܕܪܘ̣ܚܳܐ ܕܝ̣ܠܶܗ ܩܰܕܝ̣ܫܳܐ: ܢ̣ܰܪܘܶܐ ܠܰܢ ܡ̣ܶܢ ܚܰܡܪܳܐ ܕܝ̣ܠܶܗ ܗܰܘ̇ ܕܡ̣ܶܢ ܕܰܦܢܶܗ ܩܰܕܝ̣ܫܬܳܐ ܐܶܫ̣ܬܰܦܰܥ ܘܰܠܥܳܠܡܳܐ ܡ̣ܶܢ ܚܛܝ̣ܬܳܐ ܘܡܰܘܬܳܐ ܚ̣ܰܪܰܪ: ܢ̣ܰܪܚܶܩ ܡܳܪܝܳܐ ܠܪܰܘܳܝܘ̣ܬܳܐ ܡܨܰܥܪܳܢܝ̣ܬܳܐ ܗܳܝ̇ ܕܓܳܠܙܳܐ ܠܰܢ ܡ̣ܶܢ ܡܰܠܟܘ̣ܬܳܐ ܕܝ̣ܠܶܗ ܫܡܰܝܳܢܝ̣ܬܳܐ: ܢ̣ܰܫܩܶܐ ܠܰܢ ܡ̣ܶܢ ܐܰܓܳܢܳܐ ܕܝ̣ܠܶܗ ܪܘ̣ܚܳܢܳܝܬܳܐ: ܗܳܝ ܕܡ̣ܶܢ ܚܶܟܡܬܳܐ ܕܰܫܠܝ̣̈ܚܶܐ ܕܝ̣ܠܶܗ ܐܶܬ̣ܡ̣ܰܙܓܰܬ݀: ܢ̣ܰܫܘܶܐ ܠܰܢ ܡܳܪܝܳܐ ܠܫܶܩܝܳܐ ܕܡܰܠܟܘ̣ܬܶܗ ܐܶܡܰܬܝ̱ ܕܥܰܡ ܬܰܠܡܝ̣̈ܕܰܘܗ̱ܝ ܫ̇ܳܬܶܐ ܚܰܕܬܳܐܝ̣ܬ ܘܠܳܐ ܡܶܫܬܰܠܡܳܢܳܐܝ̣ܬ: ܢ̣ܰܪܬܰܚ ܠܰܢ ܒܫܶܩܝܳܐ ܕܚܰܡܪܳܐ ܚܰܕܬܳܐ ܘܡܶܐܪܝ̣ܬܳܐ ܫܠܝ̣ܚܳܝܬܳܐ: ܐܰܝܟ ܕܠܰܫܠܝ̣̈ܚܰܘܗ̱ܝ ܩܰܕܝ̣̈ܫܶܐ ܘܰܐܠܳܗܳܝ̈ܶܐ: ܢ̣ܰܫܩܶܐ ܠܰܢ ܫܶܩܝܳܐ ܡܶܬܗܰܘܢܳܢܳܐ ܕܡܶܫܬܘ̣ܬܳܐ ܪܘ̣ܚܳܢܳܝܬܳܐ ܗܳܝ̇ ܕܗܳܘ̇ܝܳܐ ܠܩܰܕܝ̣̈ܫܶܐ ܒܢܘ̣ܗܪܳܐ ܡܶܬܝܰܕܥܳܢܳܐ: ܢ̣ܫܰܘܙܶܒ ܠܰܢ ܡܳܪܝܳܐ ܡ̣ܶܢ ܟܳܣܳܐ ܕܡܰܦܘ̣ܠܬܳܐ ܗܰܘ ܕܬܶܛܪܶܗ ܫܳܬܶܝܢ ܟܽܠܗܽܘܢ ܪ̈ܰܫܝ̣ܥܶܐ ܕܰܐܪܥܳܐ: ܘܰܢ̣ܫܰܚܠܶܦ ܡܶܢܰܢ ܠܟܽܠܗܶܝܢ ܣܰܢܝ̈ܳܬܳܐ ܘܰܫܟܝ̣ܪ̈ܳܬܳܐ ܠܘܳܬ ܛܳܒ̈ܳܬܳܐ ܫܡܰܝ̈ܳܢܝܳܬܳܐ: ܢ̣ܶܥܒܶܕ ܡܳܪܝܳܐ ܡܰܫܬܝܳܐ ܕܰܢܝܳܚܳܐ ܠܟܽܠܗܽܘܢ ܐܰܒܳܗܰܝ̈ܢ ܘܐܰܚܰܝ̈ܢ ܘܪ̈ܰܒܳܢܰܝܢ ܕܰܥܢ̣ܰܕܘ̱ ܒܗܰܝܡܳܢܘ̣ܬܳܐ ܕܰܫܪܳܪܳܐ: ܢ̣ܰܫܘܶܐ ܠܰܢ ܘܰܠܗܽܘܢ ܠܡܰܫܬܝܳܐ ܢܛܝ̣ܪܳܐ ܘܰܫܡܰܝܳܢܳܐ ܕܡܰܚܝܳܢܰܢ ܝܶܫܘܽܥ ܡܫܝ̣ܚܳܐ: ܢ̣ܰܪܘܶܐ ܠܰܢ ܘܰܠܗܽܘܢ ܡ̣ܶܢ ܕܰܗܝ̣ܢܘ̣ܬܳܐ ܕܒܰܝܬܳܐ ܕܝ̣ܠܶܗ: ܘܢ̣ܰܫܩܶܐ ܠܰܢ ܘܰܠܗܽܘܢ ܡ̣ܶܢ ܢܰܚܠܳܐ ܕܒܘ̣ܣ̈ܳܡܰܘܗ̱ܝ ܡܬܘ̣̈ܡܳܝܶܐ: ܢ̣ܩܰܒܶܠ ܡܳܪܝܳܐ ܩܘ̣ܪܒܳܢܳܐ ܕܰܡܩܰܪܒܝ̣ܢܰܢ: ܘܢ̣ܶܥܒܶܕ ܒܶܗ ܢܝܳܚܳܐ ܠܚܰܝ̈ܶܐ ܘܒܘ̣ܣܳܡܳܐ ܠܥܰܢܝ̣̈ܕܶܐ ܡܗܰܝ̈ܡܢܶܐ: ܘܰܢ̣ܫܰܟܶܢ ܒܶܗ ܫܰܝܢܳܐ ܘܰܫܠܳܡܳܐ ܠܥܺܕܬܶܗ ܩܰܕܝ̣ܫܬܳܐ: ܘܰܢ̣ܒܰܛܶܠ ܡ̣ܶܢܗ̇ ܩܪ̈ܳܒܶܐ ܘܬܰܟܬܘ̣̈ܫܶܐ: ܘܒܰܕܓܽܘܢ ܗܰܒ ܡܳܪܝܳܐ ܒܪܶܚܡܰܬ݀ ܐ̱ܢܳܫܘ̣ܬܳܟ ܠܰܟܪ̈ܝ̣ܗܶܐ ܘܠܰܐܠܝ̣̈ܨܶܐ ܚܘ̣ܠܡܳܢܳܐ: ܠܛܳܥܰܝ̈ܳܐ ܘܰܐܒܝ̣̈ܕܶܐ ܦܘ̣ܢܳܝܳܐ: ܠܩܰܪ̈ܝ̣ܒܶܐ ܘܪ̈ܰܚܝ̣ܩܶܐ ܦܘ̣ܢܳܝܳܐ ܘܢܘ̣ܛܳܪܳܐ: ܠܚܰܛܳܝ̈ܶܐ ܘܬܰܝ̈ܳܒܶܐ ܫܘ̣ܒܩܳܢܳܐ: ܠܰܫ̈ܒܰܝܳܐ ܘܠܰܐܣܝ̣ܪ̈ܶܐ ܚܘ̣ܪܳܪܳܐ: ܠܒܳܝ̈ܫܶܐ ܘܡܶܣ̈ܟܺܢܶܐ ܦܘ̣ܪܩܳܢܳܐ: ܘܠܰܐܝܠܶܝܢ ܕܡܶܬܢܰܣܶܝܢ ܡ̣ܶܢ ܪ̈ܘ̣ܚܶܐ ܒܝ̣̈ܫܳܬܳܐ ܫܽܘܘ̣ܙܳܒܐ: ܠܟܰܦ̈ܢܶܐ ܘܠܰܡܛܰܪ̈ܦܶܐ ܦܘ̣ܪܢܳܣܳܐ: ܘܰܗܘܺܝ̣ ܡܳܪܝܳܐ ܠܣܳܒ̈ܶܐ ܘܠܰܡܚܝ̣̈ܠܶܐ ܡܚܰܝܠܳܢܳܐ: ܠܓܰܒܪ̈ܶܐ ܘܰܠܢܶܫ̈ܶܐ ܡܢܰܟ݂ܦܳܢܳܐ: ܠܫܰܒܪ̈ܶܐ ܘܠܰܛܠܳܝ̈ܶܐ ܡܪܰܒܝܳܢܳܐ: ܠܰܒܬܘ̣̈ܠܳܐ ܘܠܰܡܙܰܘ̈ܓ݂ܶܐ ܡܩܰܕܫܳܢܳܐ: ܠܚܰܝ̈ܶܐ ܘܰܠܡܝ̣̈ܬܶܐ ܡܚܰܣܝܳܢܳܐ: ܘܠܰܐܒܳܗܰܝ̈ܢ ܘܰܐܚܰܝ̈ܢ ܘܪ̈ܰܒܳܢܰܝܢ ܘܰܠܟܽܠܗܽܘܢ ܥܰܢܝ̣̈ܕܶܐ ܡܗܰܝ̈ܡܢܶܐ ܢܘ̣ܚܳܡܳܐ ܕܙܰܕܝ̣ܩܘ̣ܬܳܐ: ܡܶܛܽܠ ܕܰܐܠܳܗܳܐ ܕܰܬܪ̈ܰܝܗܽܘܢ ܥܳܠ̈ܡܶܐ ܐܝ̣ܬܰܝܟ: ܘܠܳܟ ܫܘ̣ܒܚܳܐ ܡܰܣܩܝ̣ܢܰܢ: ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ: ܘܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܩܰܒܶܠ ܠܥܶܛܪܳܐ ܗܳܢܳܐ ܕܒܶܣ̈ܡܶܐ ܕܩܰܪܶܒ̣ܢܰܢ ܩܕܳܡܰܝܟ ܡܳܪܝܳܐ ܐܰܠܳܗܳܐ ܕܝ̣ܠܰܢ: ܘܰܐܝܟ ܕܶܐܫܬܰܚ̣ܠܰܦܘ̱ ܒܦܘ̣ܩܕܳܢܳܟ ܡܰܝ̈ܳܐ ܒܩܳܛܢܶܐ ܘܰܗ̣ܘܰܘ ܚܰܡܪܳܐ ܪܝ̣ܫܳܝܳܐ: ܨܒܝ̣ ܘܫܰܚܠܶܦ ܠܰܢ ܡܳܪܝܳܐ ܡ̣ܶܢ ܟܽܠ ܥܒܳܕ̈ܶܐ ܠܳܐ ܢܳܡܘ̣̈ܣܳܝܶܐ: ܐܰܝܟܰܢܳܐ ܕܢ̇ܶܗܘܶܐ ܡܳܐܢ̈ܶܐ ܕܟܰܝ̈ܳܐ ܕܚܳܫ̇ܚܝ̣ܢ ܠܩܘ̣ܒܳܠܳܐ ܕܡܰܘܗ̈ܒܳܬܳܟ ܫܡܰܝ̈ܳܢܝܳܬܳܐ: ܘܰܚܢܰܢ ܘܟܽܠܗܽܘܢ ܥܰܢܝ̣̈ܕܶܐ ܡܗܰܝ̈ܡܢܶܐ ܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܠܥܳܠܡܝ̣ܢ܀