ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܐܳܣܝܳܐ ܕܪ̈ܰܚܡܶܐ ܕܶܐܫܬܰܕܰܪ ܡܶܢ ܨܶܝܕ ܐܰܒܳܐ ܠܥܳܠܡܳܐ: ܘܰܒܣܰܡ̱̈ܡܳܢܰܘܗ̱ܝ ܐܰܠܳܗ̈ܳܝܶܐ ܥܨܰܒ ܡܰܚ̈ܘܳܬܳܐ ܕܰܒܢܰܝ̈ܢܳܫܳܐ ܚܰܛܳܝ̈ܶܐ ܒܛܰܝܒܘ̣ܬܶܗ: ܠܗܰܘ̄ ܕܰܒܪ̈ܰܚܡܶܐ ܕܡܶܢܶܗ ܐܶܬܚ̣ܢܶܢ ܟܝܳܢܳܐ ܐ̱ܢܳܫܳܝܳܐ ܟܰܕ ܐܶܬܒܰܣܰܪ: ܘܒܰܕܡܳܐ ܕܰܩܢܘ̣ܡܶܗ ܦܰܪܩ̣ܶܗ ܡܶܢ ܚܰܫ̈ܶܐ ܕܫܺܐܕ̈ܶܐ: ܘܡܶܢ ܡܰܘܬܳܐ ܚܰܪܪܶܗ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܩܰܘܡܳܐ ܩܰܕܡܳܝܳܐ ܕܠܺܠܝܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܩܕܳܡܰܝܢ ܘܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܫܝ̣ܚܳܐ ܐܰܠܳܗܳܐ ܕܝ̣ܠܰܢ ܐܳܣܝܳܐ ܡܪܰܚܡܳܢܳܐ ܕܰܓ̣ܙܰܪ ܠܫܘ̣ܚ̈ܢܶܐ ܕܐ̱ܢܳܫܘ̣ܬܰܢ ܕܠܳܐ ܚܰܫܳܐ: ܘܰܐܣܝ̣ ܚܒܳܪ̈ܳܬܶܗ ܕܥܳܠܡܳܐ ܒܣܰܡܳܐ ܒܰܣܝ̣ܡܳܐ ܕܰܚܢܳܢܶܗ: ܡܰܒܘ̣ܥܳܐ ܕܪ̈ܰܚܡܶܐ ܕܰܐܪܕܝ̣ ܠܟܽܠ ܓܰܒܝ̣̈ܢ ܥܘ̣ܕܪ̈ܳܢܰܘܗ̱ܝ: ܘܦܰܠ̣ܶܓ ܠܟܽܠ ܦܶܢܝ̈ܳܢ ܫܽܘ̈ܘ̣ܟܳܢܰܘܗ̱ܝ: ܡܰܪܓܳܢܝ̣ܬܳܐ ܛܳܒܬܳܐ ܕܶܐܬ̣ܬܰܓܰܪܘ̱ ܒܳܗ̇ ܡܶܣ̈ܟܺܢܶܐ ܘܰܥܬ̣ܰܪܘ̱ ܡ̣ܶܢ ܛܳܒ̈ܳܬܳܗ̇: ܣܝ̣ܡܬܳܐ ܕܒܘ̣ܪ̈ܟܳܬܳܐ ܕܶܐܫ̣ܟܚܘ̣ܗ̇ ܨܪ̈ܝ̣ܟܶܐ ܘܰܚ̣ܕܝ̣ܘ ܒܳܗ̇: ܦܳܬܘ̣ܪܳܐ ܕܒܘ̣ܣ̈ܳܡܶܐ ܕܶܐܟܰܠ̣ܘ̱ ܡܶܢܶܗ ܟܰܦ̈ܢܶܐ ܘܰܣܒ̣ܰܥܘ̱: ܟܰܪܡܳܐ ܕܰܫܪܳܪܳܐ ܕܶܐܬ̣ܢܨܶܒܘ̱ ܒܶܗ ܝܰܒܝ̣̈ܫܶܐ ܘܰܐܦ̣ܪܰܥܘ̱: ܚܰܡܪܳܐ ܡܚܰܕܝܳܢܳܐ ܕܶܐܫ̣ܬܝ̣ܘ ܡܶܢܶܗ ܙܡܝ̣̈ܢܶܐ ܘܰܪܘܺܝ̣ܘ ܒܪܶܚܡܬܶܗ: ܠܒܘ̣ܫܳܐ ܕܬܶܫܒܘ̣ܚܬܳܐ ܕܶܐܬ̣ܥܰܛܰܦܘ̱ ܣܢܰܝ̈ܳܐ ܘܰܫܦ̣ܰܪܘ̱ ܠܶܗ: ܢܘ̣ܗܪܳܐ ܡܰܢܗܪܳܢܳܐ ܕܰܐܚ̣ܕܘ̣ܗ̱ܝ ܣܡܰܝ̈ܳܐ ܘܰܐܢ̣ܗܰܪܘ̱ ܒܶܗ: ܥܶܩܳܪܳܐ ܒܪܝ̣ܟܳܐ ܕܫܰܩ̣ܠܘ̣ܗ̱ܝ ܟܪ̈ܝ̣ܗܶܐ ܘܶܐܬ̣ܚܠ̣ܶܡܘ̱ ܡܶܢܶܗ: ܦܝ̣ܪܡܳܐ ܕܬܰܪܥܘ̣ܬܳܐ ܕܣܳܩܘ̣ܗ̱ܝ ܚܰܛܳܝ̈ܶܐ ܘܶܐܙܕܰܕܰܩܘ̱ ܒܶܗ: ܢܶܒܥܳܐ ܕܠܳܐ ܡܳܝܽܘ̣ܬܘ̣ܬܳܐ ܕܰܪܕܳܐ ܨܶܝܕ ܥܰܢܝ̣̈ܕܶܐ ܘܰܚ̣ܝܰܘ ܒܶܗ: ܢܘ̣ܚܳܡܳܐ ܫܰܪܝ̣ܪܳܐ ܕܰܩ̣ܪܳܐ ܠܰܩܒܝ̣ܪ̈ܶܐ ܘܰܢܦ̣ܰܩܘ̱ ܠܐܘ̣ܪܥܶܗ: ܝܰܡܳܐ ܕܰܚܢܳܢܳܐ ܕܰܣ̣ܚܰܘ ܒܶܗ ܓܰܪ̈ܒܶܐ ܘܶܐܬ̣ܕܰܟܝ̣ܘ: ܙܘ̣ܦܳܐ ܡܩܰܕܫܳܢܳܐ ܕܰܩ̣ܪܶܒܘ̱ ܠܶܗ ܛܰܡ̈ܶܐܐ ܘܶܐܬ̣ܩܰܕܰܫܘ̱: ܥܘ̣ܫܢܳܐ ܫܰܪܝ̣ܪܳܐ ܕܰܐܗ̣ܦܶܟ ܠܰܡܫܰܪ̈ܰܝܳܐ ܚܰܝܠܗܽܘܢ: ܚܰܝܠܶܗ ܕܰܐܒܳܐ ܕܰܥܒ̣ܰܕ ܠܰܚܓܝ̣ܪ̈ܶܐ ܕܢ̣ܶܪܗܛܽܘܢ: ܪܰܥܡܳܐ ܕܩ̈ܳܠܶܐ ܕܦܰܬ̣ܰܚ ܠܕܘ̣̈ܓܶܐ ܐܶܕܢܰܝ̈ܗܽܘܢ: ܒܳܪܘ̣ܝܳܐ ܕܥܳܠ̈ܡܶܐ ܕܰܦܫ̣ܰܛ ܠܦܺܐܩ̈ܶܐ ܠܶܫܳܢܰܝ̈ܗܽܘܢ: ܘܰܐܦ̣ܨܰܚ ܠܚܰܪ̈ܫܶܐ ܒܩܳܠܰܝ̈ܗܽܘܢ: ܠܳܟ ܡܳܪܝܳܐ ܕܗܳܠܶܝܢ ܟܽܠܗܶܝܢ ܛܰܝܒ̈ܘܳܬܳܟ ܠܳܐ ܡܶܬܦܰܪ̈ܥܳܢܝܳܬܳܐ ܕܰܣܥ̣ܰܪܬ ܠܘܳܬܰܢ ܒܚܘ̣ܒܳܟ: ܘܡܶܬܟܰܫܦܝ̣ܢܰܢ ܗܳܟܝ̣ܠ ܠܰܡܪܰܚܡܳܢܘ̣ܬܳܟ ܕܬ̣ܶܣܥܘ̣ܪ ܠܰܟܪ̈ܝ̣ܗܶܐ ܒܚܰܝܠܳܟ ܪܰܒܳܐ: ܘܬܰܪܘܰܚ ܠܰܐܠܝ̣̈ܨܶܐ ܒܝܰܕ ܪܶܡܙܳܟ: ܘܬ̣ܰܐܣܶܐ ܠܟܺܐܒ̈ܬܳܢܶܐ ܒܥܘ̣ܕܪܳܢܳܟ: ܘܬ̣ܶܥܨܘ̣ܒ ܠܰܬܒܝ̣ܪ̈ܶܐ ܒܣܘ̣ܝܳܥܳܟ: ܘܬ̣ܶܣܡܘ̣ܟ ܠܰܡܚܝ̣̈ܠܶܐ ܒܰܚܢܳܢܳܟ: ܘܰܬ̣ܠܰܒܶܒ ܠܰܡܥ̈ܳܩܶܐ ܒܒܘ̣ܝ̈ܳܐܰܝܟ: ܘܬ̣ܰܦܢܶܐ ܠܛܳܥܰܝ̈ܳܐ ܠܝ̣ܕܰܥܬܳܟ: ܘܰܬ̣ܟܰܢܶܫ ܠܰܡܒܰܕܪ̈ܶܐ ܠܰܛܝܳܪܳܟ: ܘܰܬ̣ܚܰܣܶܐ ܠܚܰܛܳܝ̈ܶܐ ܒܚܰܘܣܳܢܳܟ: ܘܬ̣ܶܒܣܰܡ ܠܳܟ ܪܝ̣ܚܳܐ ܕܰܥܒ̈ܳܕܶܐ ܛܳܒ̈ܶܐ ܕܥܰܢܝ̣̈ܕܰܝܢ ܘܰܕܟܽܠܗܽܘܢ ܥܰܢܝ̣̈ܕܶܐ ܡܗܰܝܡ̈ܢܶܐ: ܘܰܐܫܘܳܐ ܐܶܢܽܘܢ ܠܡܰܠܟܘ̣ܬܳܟ ܫܡܰܝܳܢܝ̣ܬܳܐ: ܡܶܛܽܠ ܕܛܳܒܳܐ ܘܪܳܚܶܡ ܐ̱ܢܳܫ̈ܳܐ ܐܝ̣ܬܰܝܟ: ܘܠܳܟ ܫܘ̣ܒܚܳܐ ܡܰܣܩܝ̣ܢܰܢ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀