ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܐܰܡܝ̣ܢܬܳܐ ܘܬܰܘܕܝ̣ܬܳܐ ܡܩܰܠܰܣܬܳܐ ܘܩܘ̣ܒܳܠܛܰܝܒܘ̣ܬܳܐ ܠܳܐ ܡܶܬܦܰܚܡܳܢܝ̣ܬܳܐ ܢ̇ܶܫܬܘܶܐ ܕܢ̇ܰܣܶܩ: ܠܗܰܘ̇ ܐܳܣܝܳܐ ܡܰܚܠܡܳܢܳܐ ܕܟܽܠ ܡܰܚ̈ܘܳܢ ܘܓܰܙܳܐ ܕܟܽܠ ܥܘ̣ܕܪ̈ܳܢܝ̣ܢ: ܘܣܝ̣ܡܬܳܐ ܕܟܽܠ ܒܘ̣ܪ̈ܟܳܢ: ܡܰܒܘ̣ܥܳܐ ܕܛܳܒ̈ܳܬܳܐ: ܘܰܡܥܝ̣ܢܳܐ ܕܳܐܣܝܘ̣ܬܳܐ: ܐܰܘܨܪܳܐ ܕܚܘ̣ܠ̈ܡܢܶܐ: ܐܘ̣ܪܚܳܐ ܘܰܫܒܝ̣ܠܳܐ ܕܰܫܠܳܡܳܐ: ܬܰܪܥܳܐ ܕܚܰܕ̈ܘܳܬܳܐ ܠܡܺܐܢܳܐ ܕܰܢܝܳܚܳܐ ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܨܰܦܪܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕܳܢ̈ܶܐ ܘܫܳܥ̈ܶܐ ܘܙܰܒ̈ܢܶܐ ܘܟܽܠܗܽܘܢ ܝܰܘ̈ܡܳܬܳܐ ܕܚܰܝ̈ܰܝܢ ܠܥܳܠܡܝ̣ܢ܀

ܣܶܕܪܳܐ

ܐܰ‌ܠܳܗܳܐ ܗܰܘ̇ ܬܗܘ̣ܡܳܐ ܕܪ̈ܰܚܡܶܐ ܘܝܰܡܳܐ ܕܰܚܢܳܢܳܐ: ܗܰܘ̇ ܪܰܒܳܐ ܒܥܘ̣ܕܪ̈ܳܢܶܐ ܘܰܡܥܰܠܝܳܐ ܒܫܘ̣ܘ̈ܟܳܢܶܐ ܐܰܠܳܗܳܝ̈ܶܐ: ܗܰܘ̇ ܕܬܶܕܡܪ̈ܳܬܳܐ ܦܰܐܝܘ̣ܬ ܐܰܠܳܗܳܐܝ̣ܬ ܫܰܡ̣ܠܝ̣ܬ ܠܘܳܬ ܓܶܢܣܳܐ ܕܝ̣ܠܰܢ ܡܚܝ̣ܠܳܐ ܘܳܐܣܝܘ̣ܬܳܐ ܫܰܟܶܢ̣ܬ ܠܰܟܪ̈ܝ̣ܗܶܐ: ܘܒܘ̣ܝܳܐܳܐ ܠܰܐܒܝ̣̈ܠܶܐ ܕܘ̣ܟܳܝܳܐ ܠܓܰܪ̈ܒܶܐ ܘܗܶܠܰܟܬܳܐ ܠܰܡܫܰܪ̈ܰܝܳܐ: ܢܘ̣ܗܪܳܐ ܠܰܣ̈ܡܰܝܳܐ ܘܫܘ̣ܒܩܳܢܳܐ ܠܚܰܛ̈ܳܝܶܐ ܘܰܩܝܳܡܬܳܐ ܠܥܰܢܝ̈ܕܶܐ: ܒܰܕܓܽܘܢ ܟܰܕ ܒܪ̈ܶܒܘ̣ ܬܶܗܪ̈ܝ̣ܢ ܠܪܰܒܘ̣ܬܳܟ ܡܰܘܕܶܝܢܰܢ ܟܰܕ ܐܳܡܪܝ̣ܢܰܢ: ܗܳܢܰܘ ܐܳܣܝܳܐ ܫܡܰܝܳܢܳܐ ܕܶܐܡ̣ܰܪ ܠܓܰܪܒܳܐ ܕܨܳܒܶܐ ܐ̱ܢܳܐ ܒܳܟ ܐܶܬܕܰܟܳܐ: ܗܳܢܰܘ ܐܳܣܝܳܐ ܫܡܰܝܳܢܳܐ ܕܰܐܩܝ̣ܡ ܠܰܡܫܰܪܝܳܐ ܡ̣ܶܢ ܥܰܪܣܳܐ ܕܟܘ̣ܪܗܳܢܶܗ ܘܰܫܒ̣ܰܩ ܠܶܗ ܚܛܳܗܰܘ̈ܗ̱ܝ: ܗܳܢܰܘ ܐܳܣܝܳܐ ܫܡܰܝܳܢܳܐ ܕܰܒܛܝ̣ܢܳܐ ܕܪܘ̣ܩܶܗ ܦܰܬ̣ܰܚ ܥܰܝ̈ܢܰܘܗ̱ܝ ܕܗܰܘ̇ ܣܰܡܝܳܐ: ܗܳܢܰܘ ܐܳܣܝܳܐ ܫܡܰܝܳܢܳܐ ܕܰܓܡ̣ܰܪ ܠܠܳܐ ܣܦܝ̣ܪ̈ܶܐ ܘܗܶܕܝ̈ܘ̣ܛܶܐ ܫܠܝ̣̈ܚܶܐ ܬܰܡܝ̣̈ܡܶܐ: ܗܳܢܰܘ ܐܳܣܝܳܐ ܫܡܰܝܳܢܳܐ ܕܰܓܠܳܐ ܠܫܳܡܪܳܝܬܳܐ ܐ̱ܪܳܙܳܐ ܕܚܶܟܡܬܶܗ ܐܰܠܗܳܝ̇ܬܳܐ: ܗܳܢܰܘ ܐܳܣܝܳܐ ܫܡܰܝܳܢܳܐ ܕܰܕܡ̣ܶܟ ܒܰܣܦܝ̣ܢ̱ܬܳܐ ܟܰܕ ܐܝ̣ܬܰܘܗ̱ܝ ܒܰܟܝܳܢܳܐ ܕܝ̣ܠܶܗ ܥܝ̣ܪܳܐ ܕܠܳܐ ܕܳܡܶܟ: ܗܳܢܰܘ ܐܳܣܝܳܐ ܫܡܰܝܳܢܳܐ ܕܕܰܠܝ̣ ܘܰܐܣ̣ܶܩ ܠܓܶܢܣܰܢ ܡ̣ܶܢ ܗܰܘܬܳܐ ܕܰܚܛܝ̣ܬܳܐ: ܗܳܢܰܘ ܐܳܣܝܳܐ ܫܡܰܝܳܢܳܐ ܕܗܰܘ̇ ܕܢܳܚܶܬ ܗ̱ܘܳܐ ܡ̣ܶܢ ܐܘ̣ܪܫܠܶܡ ܠܐܝ̣ܪܝ̣ܚܘ̣ ܐܳܕܳܡ ܪܰܡܝܳܐ ܥ̣ܨܰܒ ܡܰܚ̈ܘܳܬܶܗ: ܗܳܢܰܘ ܐܳܣܝܳܐ ܫܡܰܝܳܢܳܐ ܕܗܰܝܡ̣ܶܢ ܒܶܗ ܗܰܘ̇ ܩܶܢܛܪܘܢܐ ܕܰܐܚܝ̣ ܠܝ̣ܚܝ̣ܕܶܗ: ܗܳܢܰܘ ܐܳܣܝܳܐ ܫܡܰܝܳܢܳܐ ܕܘܳܠܝܳܐܝ̣ܬ ܣܥ̣ܰܪ ܬܶܕܡܪ̈ܳܬܳܐ: ܗܳܢܰܘ ܐܳܣܝܳܐ ܫܡܰܝܳܢܳܐ ܕܰܥܒ̣ܰܕ ܐܳܬܘ̈ܳܬܳܐ ܠܘܳܬ ܓܶܢܣܳܐ ܐ̱ܢܳܫܝܳܐ: ܗܳܢܰܘ ܐܳܣܝܳܐ ܫܡܰܝܳܢܳܐ ܕܘܰܥ̣ܶܕ ܠܰܫܠܝ̣̈ܚܰܘܗ̱ܝ ܕܢ̣ܶܣܩܽܘܢ ܠܶܐܠܦܳܐ ܕܰܢ̣ܚܰܘܶܐ ܠܗܽܘܢ ܚܰܝܠܶܗ: ܗܳܢܰܘ ܐܳܣܝܳܐ ܫܡܰܝܳܢܳܐ ܕܙܰܟܰܝ ܡܳܟܣܳܐ ܐܶܬ̣ܒܰܪܰܟ ܒܰܝܬܶܗ ܒܕܘ̣ܪ̈ܟܳܬܶܗ: ܗܳܢܰܘ ܐܳܣܝܳܐ ܫܡܰܝܳܢܳܐ ܕܙܳܢܝ̣ܬܳܐ ܕܡܶܫ̣ܚܰܬ݀ ܪ̈ܶܓܠܰܘܗ̱ܝ ܘܰܒܣܰܥܪܳܗܿ ܟܰܦ̣ܪܰܬ݀ ܫܒ̣ܰܩ ܠܳܗܿ ܚܛܳܗܶܝ̈ܗܿ: ܗܳܢܰܘ ܐܳܣܝܳܐ ܫܡܰܝܳܢܳܐ ܕܚ̣ܰܕܝ ܠܪܝ̣ܫ ܟܢܘ̣ܫܬܳܐ ܒܢܘ̣ܚܳܡܳܐ ܕܰܛܠܝ̣ܬܳܐ: ܗܳܢܰܘ ܐܳܣܝܳܐ ܫܡܰܝܳܢܳܐ ܕܰܚ̣ܙܰܘ ܫܘ̣ܒܚܶܗ ܘܗܰܝܡ̣ܶܢܘ̱ ܒܶܗ ܬܰܠܡܝ̈ܕܰܘܗ̱ܝ: ܗܳܢܰܘ ܐܳܣܝܳܐ ܫܡܰܝܳܢܳܐ ܕܰܛܪܰܕ ܠܫܺܐܕܳܐ ܡܳܪܘ̣ܕܳܐ ܡ̣ܶܢ ܗܰܘ̇ ܕܰܡܫܰܢܶܩ ܗ̱ܘܳܐ ܠܶܗ: ܗܳܢܰܘ ܐܳܣܝܳܐ ܫܡܰܝܳܢܳܐ ܕܛܝ̣ܡܰܝ ܒܰܪ ܛܝ̣ܡܰܝ ܒܪܘ̣ܩܶܗ ܦܬ̣ܰܚ ܠܶܗ ܥܰܝ̈ܢܰܘܗ̱ܝ: ܗܳܢܰܘ ܐܳܣܝܳܐ ܫܡܰܝܳܢܳܐ ܕܝܰܡܳܐ ܘܪ̈ܘ̣ܚܶܐ ܐܶܫ̣ܬܡܰܥܘ̱ ܠܦܘ̣ܩܕܳܢܳܐ ܕܒܳܪܘ̣ܝܘ̣ܬܶܗ: ܗܳܢܰܘ ܐܳܣܝܳܐ ܫܡܰܝܳܢܳܐ ܕܝܰܡܝ̣ܢܶܗ ܚܰܝܠܬܳܢܝ̣ܬܳܐ ܥܶܒ̣ܕܰܬ݀ ܥܳܠ̈ܡܶܐ ܘܰܐܣ̣ܝܰܬ݀ ܟܪ̈ܝ̣ܗܶܐ ܘܡܰܟܰܐܒ̈ܶܐ: ܗܳܢܰܘ ܐܳܣܝܳܐ ܫܡܰܝܳܢܳܐ ܕܟܺܐܒܰܝ̈ܢ ܘܟܘ̣ܪ̈ܗܳܢܰܝܢ ܛܥ̣ܶܢ ܒܰܡܪܰܚܡܳܢܘ̣ܬܶܗ: ܗܳܢܰܘ ܐܳܣܝܳܐ ܫܡܰܝܳܢܳܐ ܕܰܟܢܰܥܢܳܝܬܳܐ ܕܗܰܝܡ̣ܢܰܬ݀ ܒܶܗ ܒܰܪܬܳܗܿ ܐܶܬ̣ܐܣܝܰܬ݀ ܡ̣ܶܢ ܫܺܐܕܳܐ ܡܳܪܘ̣ܕܳܐ: ܗܳܢܰܘ ܐܳܣܝܳܐ ܫܡܰܝܳܢܳܐ ܕܰܠܕܘ̣ܓܳܐ ܘܚܰܪܫܳܐ ܘܰܕܠܳܐ ܡܡܰܠܶܠ ܦܫ̣ܰܛ ܠܶܫܳܢܶܗ ܠܬܶܫܒܘ̣ܚܬܳܐ: ܗܳܢܰܘ ܐܳܣܝܳܐ ܫܡܰܝܳܢܳܐ ܕܠܰܬܠܳܬܳܐ ܡܝ̣̈ܬܳܐ ܢܰܚ̣ܶܡ ܒܦܘܳܩܕܳܢܳܐ ܕܰܐܠܳܗܘ̣ܬܶܗ: ܗܳܢܰܘ ܐܳܣܝܳܐ ܫܡܰܝܳܢܳܐ ܕܡܰܝ̈ܳܐ ܫܰܚ̣ܠܶܦ ܠܚܰܡܪܳܐ ܛܳܒܳܐ ܒܩܳܛܢܶܐ ܡܕܝ̣ܢ̱ܬܳܐ ܕܰܓܠܝ̣ܠܳܐ: ܗܳܢܰܘ ܐܳܣܝܳܐ ܫܡܰܝܳܢܳܐ ܕܰܢܚ̣ܶܬ ܡ̣ܶܢ ܪܰܘܡܳܐ ܠܥܘ̣ܡܩܳܐ ܕܢ̣ܰܐܣܶܐ ܟܺܐܒ̈ܰܝܢ ܘܟܘ̣ܪ̈ܗܳܢܰܝܢ: ܗܳܢܰܘ ܐܳܣܝܳܐ ܫܡܰܝܳܢܳܐ ܕܢܳܛܰܪ ܩܘ̣ܫܬܳܐ ܠܥܳܠܰܡ ܠܕܳܚ̈ܠܰܘܗ̱ܝ ܒܛܰܝܒܘ̣ܬܶܗ: ܗܳܢܰܘ ܐܳܣܝܳܐ ܫܡܰܝܳܢܳܐ ܕܣܰܒ̣ܰܥ ܠܚܰܡܫܳܐ ܐܰܠ̈ܦܝ̣ܢ ܡ̣ܶܢ ܚܰܡܫܳܐ ܠܰܚ̈ܡܝ̣ܢ ܒܝܰܕ ܒܘ̣ܪܟܬܳܐ ܕܝܰܡܝ̣ܢܶܗ: ܗܳܢܰܘ ܐܳܣܝܳܐ ܫܡܰܝܳܢܳܐ ܕܰܣ̣ܕܰܪ ܩܕܳܡܰܝܢ ܦܳܬܘ̣ܪܳܐ ܠܰܚܡܳܐ ܫܡܰܝܳܢܳܐ: ܗܳܢܰܘ ܐܳܣܝܳܐ ܫܡܰܝܳܢܳܐ ܕܥܰܠ̣̈ܝ̱ ܥܰܡܶܗ ܠܰܓܢܽܘܢܐ ܚܰܡܶܫ ܒܬܘ̣ܠ̈ܳܬܳܐ ܟܺܐܢ̈ܶܐ ܘܙܰܕܝ̣̈ܩܶܐ: ܗܳܢܰܘ ܐܳܣܝܳܐ ܫܡܰܝܳܢܳܐ ܕܰܥܒ̣ܰܕ ܬܶܕܡܪ̈ܳܬܳܐ ܪܰܘܪ̈ܒܳܬܳܐ ܐܰܝܟ ܕܙܰܡ̣ܰܪ ܕܰܘܝ̣ܕ: ܗܳܢܰܘ ܐܳܣܝܳܐ ܫܡܰܝܳܢܳܐ ܕܦܰܬ̣ܰܚ ܥܰܝ̈ܢܶܐ ܕܗܳܠܶܝܢ ܬܪܶܝܢ ܣܡܰܝ̈ܳܐ ܕܰܒܗܰܝܡܳܢܘ̣ܬܳܐ ܒܪܶܗ ܕܕܰܘܝ̣ܕ ܩܳܥܶܝܢ ܗ̱ܘܰܘ ܠܶܗ: ܗܳܢܰܘ ܐܳܣܝܳܐ ܫܡܰܝܳܢܳܐ ܕܰܦܬܝ̣ܚ ܬܰܪܥܶܗ ܠܚܰܛ̈ܳܝܶܐ ܕܩܳܪܶܝܢ ܠܶܗ ܒܗܰܝܡܳܢܘ̣ܬܳܐ ܕܠܳܐ ܦܘ̣ܠܳܓܳܐ: ܗܳܢܰܘ ܐܳܣܝܳܐ ܫܡܰܝܳܢܳܐ ܕܨܳܡ̣ ܚܠܳܦܰܝܢ ܡܕܰܒܪܳܢܳܐܝ̣ܬ ܘܠܰܢ ܝܰܗ̣ܒܶܗ ܙܰܝܢܳܐ ܕܦܘ̣ܪܩܳܢܳܐ: ܗܳܢܰܘ ܐܳܣܝܳܐ ܫܡܰܝܳܢܳܐ ܕܨܳܒܶܐ ܕܟܽܠܗܽܘܢ ܒܢܰܝ̈ܢܳܫܳܐ ܢ̣ܺܚܽܘܢ ܘܠܝ̣ܕܰܥܬܳܐ ܕܰܫܪܳܪܳܐ ܢ̣ܺܐܬܽܘܢ: ܗܳܢܰܘ ܐܳܣܝܳܐ ܫܡܰܝܳܢܳܐ ܕܰܩ̣ܪܳܐ ܠܠܳܥܳܙܪ ܡ̣ܶܢ ܒܳܬܰܪ ܣܰܪܝܘ̣ܬܳܐ ܕܰܐܪܒܥܳܐ ܝܰܘܡܝ̣̈ܢ: ܗܳܢܰܘ ܐܳܣܝܳܐ ܫܡܰܝܳܢܳܐ ܕܩܰܒ̣ܶܠ ܬܝܳܒܘ̣ܬܳܐ ܕܓܰܝܳܣܳܐ ܘܡܳܟܣܳܐ ܘܚܰܛܳܝ݀ܬܳܐ ܕܰܒܗܽܘܢ ܢܓ̣ܰܕ ܠܰܢ ܠܘܳܬܶܗ: ܗܳܢܰܘ ܐܳܣܝܳܐ ܫܡܰܝܳܢܳܐ ܕܰܪܕܰܘ ܡ̣ܶܢ ܕܰܦܢܶܗ ܕܡܳܐ ܘܡܰܝ̈ܳܐ ܚܘ̣ܣܝܳܐ ܠܢܰܦ̈ܫܳܬܰܢ: ܗܳܢܰܘ ܐܳܣܝܳܐ ܫܡܰܝܳܢܳܐ ܕܪ̈ܰܚܡܰܘܗ̱ܝ ܐܰܫܦ̣ܰܥ ܥܰܠ ܓܶܢܣܳܐ ܡܚܝ̣ܠܳܐ ܕܐ̱ܢܳܫܘ̣ܬܰܢ: ܗܳܢܰܘ ܐܳܣܝܳܐ ܫܡܰܝܳܢܳܐ ܕܫ̣ܰܬܶܩ ܓܰܠ̱ܠ̈ܰܝ ܝܰܡܳܐ ܒܡܶܠܬܶܗ ܡܰܨܝܰܬ݀ ܟܽܠ: ܗܳܢܰܘ ܐܳܣܝܳܐ ܫܡܰܝܳܢܳܐ ܕܫܰܪܝ̣ܪܳܐܝ̣ܬ ܚܰܘܝ̣ ܕܗܘ̣ܝܘ̣ ܕܣ̣ܳܡ ܬܚܘ̣ܡܳܐ ܠܝܰܡܳܐ ܘܠܳܐ ܥܳܒܰܪ ܠܶܗ: ܗܳܢܰܘ ܐܳܣܝܳܐ ܫܡܰܝܳܢܳܐ ܕܬܶܫܒܘ̣ܚܬܶܗ ܐܶܬ̣ܡ̣ܰܠܝܰܬ݀ ܟܽܠܳܗܿ ܒܪܝ̣ܬܳܐ ܕܰܫ̈ܡܰܝܳܢܶܐ ܘܕܰܐܪ̈ܥܳܢܳܝܶܐ: ܗܳܢܰܘ ܐܳܣܝܳܐ ܫܡܰܝܳܢܳܐ ܕܟܽܠܗܽܘܢ ܦܘ̣ܡ̈ܶܐ ܡܰܘܕܶܝܢ ܠܛܰܝܒܘ̣ܬܶܗ ܕܰܚܠܳܦܰܝܢ: ܕܠܶܗ ܡܦܝ̣ܣܝ̣ܢܰܢ ܥܰܠ ܥܶܛܪܳܐ ܗܳܢܳܐ ܕܒܶܣ̈ܡܶܐ ܕܰܩܕܳܡܰܘܗ̱ܝ ܡܩܰܪܒܝ̣ܢܰܢ: ܕܰܢ̣ܫܰܟܶܢ ܫܰܝܢܳܐ ܘܰܫܠܳܡܳܐ ܠܥܺܕܬܳܐ ܕܝ̣ܠܶܗ ܩܰܕܝ̣ܫܬܳܐ: ܘܠܰܐܪܥܳܐ ܘܰܠܟܽܠܗܽܘܢ ܥܳܡܘ̣ܪ̈ܶܝܗܿ ܒܐܰܘܝܘ̣ܬܳܐ ܘܫܘ̣ܪܬܳܚܳܐ ܕܛܳܒ̈ܳܬܳܐ ܕܡ̣ܶܢ ܚܢܳܢܶܗ ܫܳܦ̈ܥܳܢ: ܘܰܠܥܰܢܝ̣̈ܕܶܐ ܡܗܰܝܡ̈ܢܶܐ ܚܘ̣ܣܝܳܐ ܕܚܰܘ̈ܒܶܐ ܘܫܘ̣ܒܩܳܢܳܐ ܕܰܚܛܳܗ̈ܶܐ: ܘܰܚܢܰܢ ܘܗܶܢܽܘܢ ܢ̇ܶܫܬܘܶܐ ܠܛܰܝܒܘ̣ܬܶܗ ܘܰܠܪ̈ܰܚܡܰܘܗ̱ܝ ܕܰܠܘܳܬܰܢ ܘܰܕܠܰܐܒܘܗ̱ܝ ܡܒܰܪܟܳܐ ܘܛܘ̣ܒܬܳܢܳܐ ܘܰܕܪܘ̣ܚܗ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܦܺܝ̣ܪܡܳܐ ܕܚܘ̣ܣܳܝܳܐ ܕܣܳܩܘ̣ܗ̱ܝ ܚܰܛܳܝ̈ܶܐ ܘܶܐܙܕܰܕܰܩ̣ܘ̱: ܘܰܡܟܰܬ̈ܡܶܐ ܘܶܐܬ̣ܚܰܘܰܪܘ̱: ܘܛܰܡ̈ܶܐܐ ܘܶܐܬ̣ܩܰܕܰܫܘ̱: ܘܰܣܡܰܝ̈ܳܐ ܘܶܐܬ̣ܢܰܗܰܪܘ̱: ܘܓܰܪ̈ܒܶܐ ܘܶܐܬ̣ܕܰܟܝ̣ܘ: ܘܰܡܫܰܪ̈ܰܝܳܐ ܘܶܐܫ̣ܬܰܪܰܪܘ̱: ܘܰܟܪ̈ܝ̣ܗܶܐ ܘܶܐܬ̣ܰܐܣܝ̣ܘ: ܘܰܡܡܰܚ̈ܰܝܳܐ ܘܶܐܬܚܠ̣ܶܡܘ̱: ܘܡܝ̣̈ܬܶܐ ܘܶܐܬܢܰܚ̣ܰܡܘ̱: ܐܰܢ̱ܬ ܡܳܪܝ̱ ܥܰܠܳܐ ܥܶܛܪܶܗ ܕܦܝ̣ܪܡܰܢ ܠܘܳܬܳܟ: ܘܩܰܪܶܒ ܒܳܥܘ̣ܬܰܢ ܘܰܦܝܳܣܰܢ ܨܶܝܕ ܬܰܪܥܳܟ: ܘܰܐܩܶܦ ܣܢܝ̣ܩܘ̣ܬܰܢ ܠܒܶܝܬ ܓܰܙܳܟ: ܘܡܰܠܳܐ ܚܰܣܝ̣ܪ̈ܳܬܰܢ ܡ̣ܶܢ ܡܰܠܝܘ̣ܬܳܟ: ܘܰܐܚܠܶܡ ܫܘ̣ܚ̈ܢܰܝܢ ܒܳܐܣܝܘ̣ܬܳܟ: ܘܛܰܒܰܥ ܠܥܰܘܠܰܢ ܒܝܰܡܳܐ ܕܰܚܢܳܢܳܟ: ܘܰܐܫܘܳܐ ܠܰܢ ܠܫܘ̣ܠܳܡܳܐ ܕܫܳܦܰܪ ܠܳܟ: ܘܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܠܥܳܠܰܡܥܳܠܡܝ̣ܢ܀