ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܝܰܡܳܐ ܕܪ̈ܰܚܡܶܐ: ܘܰܡܥܝ̣ܢܳܐ ܕܚܘ̣ܠ̈ܡܳܢܶܐ ܡܳܪܝܳܐ: ܗܰܘ̇ ܕܠܰܐܢ̱ܬܬܳܐ ܟܢܰܥܢܳܝܬܳܐ ܥܢ̣ܰܝܬ: ܘܰܠܒܰܪܬܳܗܿ ܡ̣ܶܢ ܡܰܥܒܕܳܢܘ̣ܬܳܐ ܕܫܺܐܕ̈ܶܐ ܚ̣ܰܪܰܪܬ: ܚܰܪܰܪ ܡܳܪܝ̱ ܘܳܐܦ ܗܳܫܳܐ ܠܢܰܦ̈ܫܳܬܰܢ ܡ̣ܶܢ ܚܛܳܗ̈ܶܐ ܘܡܰܛܥܝܳܢܘ̣ܬܳܐ ܕܫܺܐܕ̈ܶܐ: ܘܰܠܦܰܓܪ̈ܰܝܢ ܡ̣ܶܢ ܟܺܐܒ̈ܶܐ ܘܟܘ̣ܪ̈ܗܳܢܶܐ ܕܥܳܒܪܝ̣ܢ ܠܚܰܝܠܳܐ: ܘܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ: ܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܐܳܣܝܳܐ ܫܡܰܝܢܳܐ: ܕܰܣܥ̣ܰܪ ܠܰܒܪܝ̣ܬܶܗ ܒܛܰܝܒܘ̣ܬܶܗ: ܘܰܐܚ̣ܠܶܡ ܟܘ̣ܪ̈ܗܳܢܶܐ ܕܰܓܒܝ̣ܠܬܶܗ ܒܰܚܢܳܢܶܗ: ܪܳܡܳܐ ܕܶܐܬ̣ܬܰܚܬܝ̣ ܕܢ̣ܶܬܶܠ ܚܘ̣ܠܡܳܢܳܐ ܠܰܟܪ̈ܝ̣ܗܶܐ: ܘܰܡܥܝ̣ܢܳܐ ܕܥܘ̣ܕܪ̈ܳܢܶܐ ܘܳܐܣܝܘ̣ܬܳܐ ܠܡܰܟ̈ܰܐܒܶܐ: ܥܰܬܝ̣ܪܳܐ ܕܠܳܐ ܡܶܬܡܰܣܟܢܝ̣ܢ ܫܘ̣ܘ̈ܟܳܢܶܐ ܕܰܚܢܳܢܶܗ: ܘܠܳܐ ܡܶܬܡܰܠܠܝ̣ܢ ܥܘ̣ܕܪ̈ܳܢܶܐ ܕܪܰܒܘ̣ܬܶܗ: ܓܰܙܳܐ ܡܰܠܝܳܐ ܕܟܽܠܗܽܘܢ ܥܘ̣ܬܪ̈ܶܐ ܟܢܝ̣ܫܝ̣ܢ ܒܶܗ: ܘܟܽܠܗܽܘܢ ܛܘ̣ܒ̈ܶܐ ܘܒܘ̣ܣ̈ܳܡܶܐ ܫܟܝ̣ܚܝ̣ܢ ܒܶܗ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܪܰܡܫܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕܳܢ̈ܶܐ ܘܫܳܥ̈ܶܐ ܘܙܰܒ̈ܢܶܐ ܘܟܽܠܗܽܘܢ ܝܰܘ̈ܡܳܬܳܐ ܕܚܰܝ̈ܰܝܢ ܠܥܳܠܡܝ̣ܢ܀

ܣܶܕܪܳܐ

ܗܰܘ̇ ܕܒܰܠܚܘ̣ܕܰܘܗ̱ܝ ܡܪܰܚܡܳܢܳܐ ܘܣܳܥܰܪ ܬܶܕܡܪ̈ܳܬܳܐ: ܗܰܘ̇ ܕܒܰܫܦܝ̣ܥܘ̣ܬ ܛܳܒܘ̣ܬܳܟ ܪܰܒܬܳܐ ܘܠܳܐ ܡܶܣܬܰܝܟܳܢܝ̣ܬܳܐ ܨܒ̣ܰܝܬ ܕܰܬ̣ܥܰܕܰܪ ܠܓܶܢܣܳܐ ܕܝ̣ܠܰܢ ܡܚܝ̣ܠܳܐ: ܕܗܽܘ ܠܶܗ ܒܝܰܕ ܚܺܐܪܘ̣ܬܳܐ ܐܰܪܶܚ̣ܩ ܢܰܦܫܶܗ ܡ̣ܶܢ ܥܘ̣ܕܪ̈ܳܢܰܝܟ: ܘܰܒܟܺܐܒ̈ܶܐ ܕܢܰܦܫܳܐ ܘܦܰܓܪܳܐ ܡܦܰܟܰܪ ܗ̱ܘܳܐ ܬܚܶܝ̣ܬ ܢܝ̣ܪܳܐ ܘܰܚܳܢ̈ܩܶܐ ܕܰܒܥܶܠܕܒܳܒܳܐ ܟ̣ـܕܰܢ ܗ̱ܘܳܐ ܨܰܘܪܶܗ: ܘܡܳܪܘ̣ܕܳܐ ܡܰܢ ܟܰܕܘ̣ ܐܝ̣ܬܰܘܗ̱ܝ ܗ̱ܘܳܐ ܘܠܳܐ ܡܶܬܬܦܝ̣ܣܳܢܳܐ: ܘܒܰܕܓܽܘܢ ܐܶܫ̣ܬܰܠܰܛ ܒܶܗ ܩܳܛܘ̣ܠܳܐ ܘܰܕܠܳܐ ܚܰܘܣܳܢ ܒܠ̣ܰܥ: ܘܪܰܡܝܳܐ ܘܰܫܒܝ̣ܩܳܐ ܡܶܢܳܟ ܐܰ‌ܠܳܗܳܐ ܗ̣ܘܳܐ: ܗܳܝܕܶܝܢ ܒܝܰܕ ܡܰܣܪܚܳܢܘ̣ܬܳܐ ܕܰܢܒܺܝ̈ܶܐ: ܗܳܢܽܘܢ ܕܩܰܫܝ̣ܘ ܘܡ̣ܰܬܚܘ̣ܗ̱ܝ ܠܰܓܙܳܡܳܐ ܣܥ̣ܰܪܬܳܝܗ̱ܝ: ܘܟܰܕ ܐܳܦ ܒܗܳܠܶܝܢ ܠܳܐ ܡܶܬܬܦܝ̣ܣܳܢܳܐ ܟ̣ܰܬܰܪ: ܡܶܐܬܝ̣ܬܳܐ ܕܝ̣ܠܳܟ ܩܢܘ̣ܡܳܐܝ̣ܬ ܠܘܳܬܶܗ ܥܒ̣ܰܕܬ ܐܰܝܟܰܢܳܐ ܕܬ̣ܶܣܥܪܝ̣ܘܗ̱ܝ: ܘܐܝ̣ܕܳܐ ܐܰܘܫ̣ܶܛܬ ܠܶܗ ܥܕܰܡܳܐ ܠܓܘ̣ܡܳܨܳܐ ܕܰܐܒܕܳܢܳܐ: ܘܰܐܢ̱ܬ ܐܰ‌ܠܳܗܳܐ ܕܟܽܠܶܗ ܒܘ̣ܝܳܐܳܐ ܨܒ̣ܰܝܬ ܕܬ̣ܰܥܒܰܪ ܠܕܘ̣ܥܬܶܗ: ܘܰܬ̣ܟܰܦܰܪ ܐܰܦ̈ܰܘܗ̱ܝ ܠܡܶܫܬܘ̣ܬܳܐ ܕܩܳܛܢܶܐ ܐܰܢ̱ܬ ܠܳܟ ܙܰܡܶܢ̣ܬ ܘܰܒܫܘ̣ܚܠܳܦܳܐ ܕܡܰܝ̈ܳܐ ܠܘܳܬ ܚܰܡܪܳܐ ܐܰܪܘܝ̣ܬ ܠܗܰܘܢܶܗ ܒܚܘ̣ܒܳܟ ܘܦܰܣܶܩ̣ܬ ܡܶܢܶܗ ܠܰܦܟܳܪ̈ܶܐ ܕܡܳܪܘ̣ܕܳܐ ܘܰܠܘܳܬܳܟ ܢܬܰܦ̣ܬܳܝܗ̱ܝ ܒܝܰܕ ܫܘ̣ܚܠܳܦܳܐ ܕܡܰܝ̈ܳܐ ܠܘܳܬ ܚܰܡܪܳܐ: ܗܳܝܕܶܝܢ ܘܰܠܓܰܒܪܳܐ ܗܰܘ̇ ܕܦܶܠܓܽܘ̣ ܡܝ̣ܬܳܐ: ܒܝܰܕ ܓܶܫܬܳܐ ܐ̱ܢܳܫܳܝ̇ܬܳܐ ܘܡܰܥܒܕܳܢܘ̣ܬܳܐ ܕܝ̣ܠܳܟ ܐܰܠܳܗܳܝܬܳܐ ܕܰܟܝ̣ܬ: ܘܰܒܟܽܠܶܗ ܦܰܓܪܶܗ ܠܢܰܦܫܶܗ ܐܰܪܗ̣ܶܛܬ: ܗܳܟܘ̣ܬ ܕܶܝܢ ܘܠܰܡܫܰܪܝܘ̣ܬܳܐ ܕܢܰܦܫܳܐ ܘܰܕܦܰܓܪܳܐ ܚ̣ܰܝܶܨܬ: ܘܰܐܟܶܣ̣ܬ ܒܰܐܦ̈ܶܐ ܠܝܘ̣ܕܳܝ̈ܶܐ ܛܳܠܘ̣ܡ̈ܶܐ ܕܰܥܫ̣ܰܩܘ̱ ܠܐ̱ܪܳܙܳܐ ܪܰܒܳܐ ܕܰܡܕܰܒܪܳܢܘ̣ܬܳܟ: ܟܰܕ ܚ̣ܰܘܝ̣ܬ ܒܝܰܕ ܬܰܪ̈ܬܰܝܗܶܝܢ ܕܰܐܠܳܗܳܐ ܐܝ̣ܬܰܝܟ ܡܒܰܣܪܳܐ ܕܠܳܐ ܫܘ̣ܚܠܳܦܳܐ ܘܫܘ̣ܓܢܳܝܳܐ: ܠܣܰܡܝܳܐ ܕܶܝܢ ܗܰܘ̇ ܚܰܣܝ̣ܪ ܒܰܒܪܝ̣ܬܶܗ ܕܳܐܦܠܳܐ ܕܘ̣ܟ̈ܝ̣ܬܳܐ ܕܒܳܒ̈ܳܬܳܐ ܠܶܗ ܐܶܬ̣ܝ̣̈ܕܰܥܝ̱: ܒܝܰܕ ܛܝ̣ܢܳܐ ܕܪܘ̣ܩܳܟ ܐܰܢܗ̣ܰܪܬ: ܟܰܕ ܒܝܰܕ ܪܶܗܛܳܐ ܕܦܘ̣ܩܕܳܢܳܟ ܩܰܠܝ̣ܠܳܐ ܚܙܳܝ̈ܳܬܳܐ ܕܒܳܒ̈ܳܬܳܐ ܘܢܘ̣ܗܪܳܐ ܢܣ̣ܰܒ: ܘܫܰܘܕܰܥ̣ܬ ܒܝܰܕ ܗܳܕܶܐ ܕܰܐܢ̱ܬ ܗ̱ܘ̣ ܐܝ̣ܬܰܝܟ ܒܳܪܘ̣ܝܳܐ ܘܓܳܒܘ̣ܠܳܐ ܕܰܟܝܳܢܳܐ ܕܝ̣ܠܰܢ ܘܰܕܡܶܢܳܟ ܡܶܬܬܰܝ̣ܬܶܝܢ ܒܢܰܝ̈ܢܳܫܳܐ ܠܰܗܘܳܝܳܐ: ܠܥܝ̣ܢ ܟܽܠܢܳܫ ܓܠ̣ܰܝܬ ܗܰܝܡܳܢܘ̣ܬܶܗ ܕܩܶܢܛܪܘ̣ܢܳܐ: ܟܰܕ ܓܰܫ̣ܬ ܠܬܰܘܘܳܢܳܐ ܟܰܣܝܳܐ ܕܬܰܪܥܝ̣ܬܗ: ܚ̣ܰܪܰܪܬ ܡ̣ܶܢ ܐܶܫܳܬܳܐ ܠܰܚܡܳܬܶܗ ܕܦܶܛܪܘ̣ܣ: ܙܪܰܥ̣ܬ ܠܰܐܪܡܰܠܬܳܐ ܩܝܳܡܬܳܐ ܥܰܠ ܬܰܪܥܶܗ ܕܩܰܒܪܳܐ ܕܚܰܒܝܒܳܗܿ: ܒܰܛܶܠ̣ܬ ܡܥܰܒܕܳܢܘ̣ܬܳܐ ܕܫܺܐܕ̈ܶܐ ܡ̣ܶܢ ܓܘ̣ܫܡܳܐ ܡܚܝ̣ܠܳܐ ܕܒܰܪ ܐ̱ܢܳܫ̈ܳܐ: ܟܠ̣ܰܝܬ ܠܰܡܥܝ̣ܢܳܐ ܕܰܕܡܳܐ ܒܚܰܝܠܳܟ ܟܰܕ ܝܰܗ̣ܒܬ ܠܗܰܝܡܳܢܘ̣ܬܳܐ ܦܘ̣ܢܝܳܐ ܕܫܶܐܠ̈ܳܬܳܗܿ: ܠܗܳܝ̇ ܕܶܝܢ ܕܒܰܪܬܳܗܿ ܡ̣ܶܢ ܫܺܐܕܳܐ ܡܶܬܡܰܪܕܳܐ ܗ̣ܘܳܬ݀: ܘܩܳܥܝܳܐ ܗ̣ܘܳܬ݀ ܐܶܬ̣ܪܰܚܰܡܥܠܰܝ ܡܳܪܝܳܐ ܒܪܶܗ ܕܕܰܘܝ̣ܕ: ܚܰܪܪܬܳܗܿ ܡ̣ܶܢ ܩܛܝ̣ܪܳܐ ܕܫܺܐܕܳܐ ܕܳܒܘ̣ܪܳܗܿ: ܟ̣ܐܰܝܬ ܒܝܰܡܳܐ ܘܫܰܬܶܩ̣ܬ ܠܰܫܓܝ̣ܫܘ̣ܬܳܐ ܕܓܰܠ̱ܠܱ̈ܘܗ̱ܝ: ܘܰܐܣ̣ܓܝ̣ܬ ܠܒܝ̣ܒܘ̣ܬܳܐ ܒܬܰܠܡܝ̣̈ܕܶܐ ܒܣ̣ܶܡ ܠܳܟ ܩܳܠܳܐ ܕܰܬܪܶܝܢ ܣܡ̈ܰܝܳܐ ܘܳܐܦ ܡܰܘܕܝܳܢܘ̣ܬܗܽܘܢ ܫܰܦܝ̣ܪܬܳܐ: ܟܰܕ ܡܳܪܝܳܐ ܘܰܒܪܶܗ ܕܕܰܘܝ̣ܕ ܫܰܡܗܽܘ̣ܟ: ܦܘ̣ܢܝܳܐ ܘܦܘ̣ܬܳܚܳܐ ܠܥܰܝ̈ܢܰܝܗܽܘܢ ܫܰܟܶܢ̣ܬ ܠܗܽܘܢ: ܠܙܳܢܝ̣ܬܳܐ ܕܶܝܢ ܬܘ̣ܒ ܗܳܝ̇ ܕܰܒܣܰܓܺܝܽܐܘ̣ܬ ܪܶܓܬܳܐ ܠܘܳܬ ܒܰܥܪܝ̣ܪܘ̣ܬܳܐ ܐܶܫܬܰܪܓܠܰܬ݀ ܒܝܰܕ ܬܪܝܥܘ̣ܬ ܒܶܟܝܳܐ ܕܥܰܝ̈ܢܶܝܗܿ: ܘܡܶܬܩܰܪܒܳܢܘ̣ܬܳܐ ܕܨܶܝܕ ܪ̈ܶܓܠܰܝܟ ܟܢܝ̣ܟܬܳܐ ܘܢܰܟܦܬܳܐ ܚ̣ܰܘܝ̣ܬ: ܘܰܐܣܝ̣ܬ ܠܟܽܠܗܽܘܢ ܐܰܝܠܶܝܢ ܕܡܶܬܥܰܩܡܝ̣ܢ ܗ̱ܘܰܘ ܡ̣ܶܢ ܪ̈ܘ̣ܚܶܐ ܒܝ̣̈ܫܳܬܳܐ: ܠܙܰܕܝ̈ܩܶܐ ܩܰܠܶܣ̣ܬ: ܠܚܰܛ̈ܳܝܶܐ ܩ̣ܪܰܝܬ ܘܩܰܪܒ̣ܶܬ ܠܘܳܬܳܟ: ܠܡܳܟ̈ܣܶܐ ܙܰܕܶܩ̣ܬ: ܠܥܰܘ̈ܳܠܶܐ ܩܰܕܶܫ̣ܬ: ܘܰܠܥܳܠܡܳܐ ܟܽܠܶܗ ܡ̣ܶܢ ܐܶܫܛܳܪܳܐ ܕܰܚܛܝ̣ܬܳܐ ܚ̣ܰܪܰܪܬ: ܘܶܐܬܗܰܝܡ̣ܰܢܬ ܡ̣ܶܢ ܟܽܠܳܗܿ ܒܪܝ̣ܬܳܐ ܕܰܐܢ̱ܬ ܐܝ̣ܬܰܝܟ ܐܰܠܳܗܳܐ ܫܰܪܝܪܳܐ: ܘܒܰܕܓܽܘܢ ܠܳܟ ܡܶܠܬܳܐ ܐܰ‌ܠܳܗܳܐ ܗܰܘ̇ ܕܟܽܠܗܶܝܢ ܗܳܠܶܝܢ ܣܥ̣ܰܪܬ ܐܳܦ ܫܰܡ̣ܠܝ̣ܬ ܒܰܩܢܘ̣ܡܳܟ: ܒܰܡܕܰܒܪܳܢܘ̣ܬܳܐ ܕܝ̣ܠܳܟ ܦܳܪܘ̣ܩܳܝܬܳܐ ܕܰܚܠܳܦܰܝܢ ܡܶܬܟܰܫܦܝ̣ܢܰܢ: ܫܰܟܶܢ ܠܰܢ ܒܪܶܚܡܰܬ݀ ܐ̱ܢܳܫܘ̣ܬܳܟ ܚܘ̣ܣܳܝܳܐ ܕܚܰܘ̈ܒܶܐ ܘܫܘ̣ܒܩܳܢܳܐ ܕܰܚ̈ܛܳܗܶܐ: ܘܰܣܥܘ̣ܪ ܠܥܺܕܬܳܟ ܩܰܕܝ̣ܫܬܳܐ ܕܰܬܢܳܢ ܘܕܰܒܟܽܠ ܐܰܬܰܪ ܠܰܓܡܝ̣ܪ̈ܶܐ ܒܫܘ̣ܡܠܳܝܳܐ: ܠܬܰܝܳܒ̈ܶܐ ܒܫܽܘܘ̣ܫܳܛܳܐ: ܠܚܰܛ̈ܳܝܶܐ ܒܚܘ̣ܣܳܝܳܐ ܘܠܰܟܪ̈ܝ̣ܗܶܐ ܒܚܘ̣ܠܡܳܢܳܐ: ܠܪ̈ܰܚܝ̣ܩܶܐ ܒܦܘ̣ܢܝܳܐ: ܠܩܰܪ̈ܝ̣ܒܶܐ ܒܢܘ̣ܛܳܪܳܐ: ܠܥܰܢܝ̣̈ܕܶܐ ܡܗܰܝ̈ܡܢܶܐ ܒܥ̱ܘ̣ܗܕܳܢܳܐ ܛܳܒܳܐ: ܡܶܛܠ ܕܰܐܢ̱ܬ ܐܝ̣ܬܰܝܟ ܡܳܪܳܐ ܕܰܬܪ̈ܰܝܗܽܘܢ ܥܳܠ̈ܡܶܐ: ܘܠܳܟ ܫܘ̣ܒܚܳܐ ܡܰܣܩܝ̣ܢܰܢ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܣܳܓܕܝ̣ܢܰܢ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܫܶܡܫܳܐ ܥܰܬܝ̣ܪ ܙܰܠܝ̣̈ܩܶܐ ܕܰܒܙܰܗܪܝ̣ܪ̈ܰܘܗ̱ܝ ܐܰܠܳܗܳܝ̈ܶܐ ܐܰܨܡ̣ܰܚ ܠܟܽܠܳܗܿ ܡܶܬܥܰܡܪܳܢܝ̣ܬܳܐ: ܘܰܒܕܘ̣ܪ̈ܟܳܬܳܐ ܕܝ̣ܠܶܗ ܩܰܕܝ̣̈ܫܳܬܳܐ ܙܪܰܥ ܫܰܝܢܳܐ ܘܰܫܠܳܡܳܐ ܒܟܽܠܳܗܿ ܬܺܒܶܝܠ: ܡܳܪܰܢ ܕܩܰܕܶܫ̣ܬ ܠܛܰܡ̈ܶܐܐ: ܘܢܰܟܶܦ̣ܬ ܠܙܰܠܝ̣̈ܠܶܐ ܘܰܐܢܗ̣ܰܪܬ ܠܬܰܪ̈ܥܝܳܬܳܐ ܕܰܐܝܠܶܝܢ ܕܗܰܝܡ̣ܶܢܘ̱ ܒܳܟ: ܩܰܒܶܠܳܝܗ̱ܝ ܠܦܝ̣ܪܡܳܐ ܗܳܢܳܐ ܡ̣ܶܢ ܐܝ̣̈ܕܰܝܢ ܚܰܠܳܫ̈ܳܬܳܐ ܕܩܰܪܶܒ̣ܢܰܢ ܗܳܫܳܐ ܩܕܳܡ ܡܳܪܘ̣ܬܳܟ: ܘܫܰܟܶܢ ܠܰܢ ܒܶܗ ܥܘ̣ܬܪܳܐ ܕܡܰܘ̈ܗܒܳܬܳܟ ܐܰܠܳܗܳܝ̈ܳܬܳܐ: ܘܗܰܒ ܐܳܣܝܘ̣ܬܳܐ ܡܫܰܡܠܰܝܬܳܐ ܠܢܰܦ̈ܫܳܬܳܐ ܘܦܰܓܪ̈ܶܐ ܕܣܳܓ̈ܘ̣ܕܰܝܟ: ܘܰܐܢܝ̣ܚ ܠܟܽܠܗܽܘܢ ܥܰܢܝ̣̈ܕܶܐ ܡܗܰܝ̈ܡܢܶܐ ܕܩܰܕܶܡ̣ܘ̱ ܚܙܰܩ̣ܘ̱ ܠܘܳܬܳܟ: ܘܡ̣ܶܢ ܦܘ̣ܡ ܚܰܝ̈ܶܐ ܘܡܝ̣̈ܬܳܐ ܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀