ܦܪܽܘ̣ܡܝܽܘܢ

ܬܶܫܒܘ̣ܚܬܳܐ: ܠܗܰܘ̇ ܚܰܣܝܳܐ ܘܩܰܕܝ̣ܫܳܐ ܘܠܳܐ ܡܶܬܡܰܠܠܳܢܳܐ: ܠܗܰܘ̇ ܠܳܐ ܚܳܫܘ̣ܫܳܐ ܘܠܳܐ ܡܳܝܘ̣ܬܳܐ ܘܠܳܐ ܡܶܬܚܰܒܠܳܢܳܐ: ܠܗܰܘ̇ ܕܰܒܨܶܒܝܳܢܶܗ ܚܰܫ̣ ܚܠܳܦܰܝܢ ܘܐܰܚ̣ܶܫ ܠܚܰܫ̈ܶܐ ܕܟܽܠܰܢ ܒܚܰܫܶܗ: ܘܐܰܡܝ̣ܬ ܠܡܰܘܬܳܐ ܛܪܘ̣ܢܳܐ ܒܡܰܘܬܶܗ ܕܥܰܠ ܐܰܦܰܝ̈ܢ: ܘܠܰܢ ܫܰܟ̣ܶܢ ܚܰܝ̈ܶܐ ܘܠܳܐ ܡܶܬܚܰܒܠܳܢܘ̣ܬܳܐ ܘܠܳܐ ܡܳܝܘ̣ܬܘ̣ܬܳܐ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܩܰܘܡܳܐ ܪܒܝ̣ܥܳܝܳܐ ܕܠܶܠܝܳܐ: ܘܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒܢ̈ܶܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܫܺܝ̣ܚܳܐ ܐܰܠܳܗܳܐ ܕܝ̣ܠܰܢ: ܗܰܘ̇ ܡܗܰܕܪܳܐ ܘܰܡܥܰܠܰܝ ܒܬܶܫܒܘ̣ܚܬܳܐ: ܗܰܘ̇ ܕܚܝ̣ܠܳܐ ܘܚܰܝܠܬܳܢܳܐ ܘܓܰܢ̱ܒܳܪܳܐ ܕܥܳܠ̈ܡܶܐ: ܗܰܘ̇ ܠܳܐ ܡܶܬܒܰܨܝܳܢܳܐ ܘܠܳܐ ܡܶܬ̣ܕܰܪܟܳܢܳܐ ܐܝ̣ܬܰܝܟ: ܘܠܳܐ ܡܶܬ̣ܡܰܠܠܳܢܳܐ ܠܟܽܠܗܶܝܢ ܒܶܪ̈ܝܳܬܳܟ: ܐܶܬܪܟܶܢ̣ܬ ܚܰܝܘ̣ܣܬܳܢܳܐܝ̣ܬ ܡܶܢ ܡܪ̈ܰܘܡܶܐ ܓܢܝ̣̈ܙܶܐ ܕܝ̣ܠܳܟ ܠܘܳܬ ܡܚܝ̣ܠܘ̣ܬܰܢ: ܘܚܰܫ̈ܶܐ ܘܰܨܠܝ̣ܒܳܐ ܘܡܰܘܬܳܐ ܚܠܳܦܰܝܢ ܣܒܰܠ̣ܬ: ܐܰܝܟܰܢܳܐ ܕܠܰܢ ܒܚܰܫܰܝ̈ܟ ܠܳܐ ܚܳܫܘ̣ܫܘ̣ܬܳܐ ܬ̣ܫܰܟܶܢ: ܘܰܒܡܰܘܬܳܟ ܠܳܐ ܡܶܬܚܰܒܠܳܢܘ̣ܬܳܐ ܬܙ̣ܰܡܶܢ: ܘܫܰܡܠܝ̣ܬ ܒܰܩܢܘ̣ܡܳܟ ܟܽܠܗܽܘܢ ܐ̱ܪ̈ܳܙܶܐ ܘܛܘ̣̈ܦܣܶܐ ܘܦ̈ܶܠܳܐܬܳܐ ܕܰܢܒܺܝ̈ܶܐ ܩܰܕܝ̣̈ܫܶܐ ܘܚܰܙܳܝ̈ܶܐ ܕܰܣܬܝ̣ܪ̈ܳܬܳܐ ܕܩܰܕܶܡ̣ܘ̱ ܘܒܰܕܶܩ̣ܘ̱ ܘܚܰܘܝ̣ܘ ܥܰܠ ܙܩܝ̣ܦܘ̣ܬܳܟ ܡܰܥ̣ܒܕܰܬ݀ ܚܰܝ̈ܶܐ ܕܡܰܘܬܳܟ ܦܳܪܘ̣ܩܳܝܳܐ: ܟܰܕ ܚܰܕ ܡܰܢ ܒܶܐܡܪܳܐ ܕܡܶܬܢܟܶܣ ܗ̱ܘܳܐ ܒܶܝܬ ܪ̈ܰܡܫܶܐ ܠܦܘ̣ܪܩܳܢܰܢ ܡܛܰܦܶܣ ܗ̱ܘܳܐ: ܘܰܐ̱ܚܪܺܢܳܐ ܒܕܶܟܪܳܐ ܕܝ̣ܠܝ̣ܕ ܡܶܢ ܐܝ̣ܠܳܢܳܐ ܕܰܦ̣ܪܰܩ ܠܐܝ̣ܣܚܳܩ ܠܰܕܒܝ̣ܚܘ̣ܬܳܟ ܨܳܐܰܪ ܗ̱ܘܳܐ: ܚܰܕ ܒܬܘ̣ܪܬܳܐ ܣܘ̣ܡܳܩܬܳܐ ܕܰܚܠܳܦ ܚܛܳܗ̈ܶܐ ܕܥܰܡܳܐ ܡܶܬܕܰܒܚܳܐ ܠܳܟ ܪܳܫܶܡ ܗ̱ܘܳܐ: ܚܰܕ ܕܐܰܝܟ ܐܶܡܪܳܐ ܠܢܶܟܣܬܳܐ ܡܶܬ̣ܕܒܰܪ ܐܰܢ̱ܬ ܡܶܬ̣ܢܰܒܶܐ ܗ̱ܘܳܐ: ܘܰܐ̱ܚܪܺܢܳܐ ܒܢܶܩܝܳܐ ܕܰܩܕܳܡ ܓܳܙܘ̣ܙܳܐ ܠܳܟ ܡܡܰܬܶܠ ܗ̱ܘܳܐ: ܘܰܐ̱ܚܪܺܢܳܐ ܕܥܰܡ ܥܰܘ̈ܳܠܶܐ ܡܶܬ̣ܡܢܶܐ ܐܰܢ̱ܬ ܡܰܐܛܶܒ ܗ̱ܘܳܐ: ܚܰܕ ܕܰܡܚܺܝ̣ ܠܪܳܥܝܳܐ ܘܢ̣ܶܬܒܰܕܪܽܘܢ ܥܶܪ̈ܒܰܘܗ̱ܝ ܡܰܙܥܶܩ ܗ̱ܘܳܐ: ܘܰܐ̱ܚܪܺܢܳܐ ܕܰܢ̣ܫܰܩܦܽܘܢ ܠܪܳܥܝܳܐ ܕܐܝ̣ܣܪܳܐܝܶܠ ܥܰܠ ܦܰܟܰܘ̈ܗ̱ܝ ܡܰܟ̇ܪܶܙ ܗ̱ܘܳܐ: ܚܰܕ ܕܒܰܙܰܚ̣ܘ̱ ܒܶܗ ܟܰܕ ܩܳܥܶܐ ܗ̱ܘܳܐ: ܚܰܕ ܕܒܰܙܰܥ̣ܘ̱ ܐܝ̣̈ܕܰܝ ܘܪ̈ܶܓܠܰܝ ܡܙܰܡܰܪ ܗ̱ܘܳܐ: ܘܰܐ̱ܚܪܺܢܳܐ ܕܰܢ̣ܚܘ̣ܪܽܘܢ ܒܡܰܢ̇ ܕܰܕܩ̣ܰܪܘ̱ ܡܰܠܶܦ ܗ̱ܘܳܐ: ܚܰܕ ܕܰܡܫܝ̣ܚܳܐ ܡܰܠܟܳܐ ܡܶܬ̣ܩܛܶܠ ܘܰܡܕܝ̣ܢܰܬ݀ ܩܘܕ̈ܫܶܐ ܚܳܪܒܳܐ ܒܩܶܛܠܶܗ ܡܰܘ̇ܕܰܥ ܗ̱ܘܳܐ: ܘܰܐ̱ܚܪܺܢܳܐ ܕܢܶܚ̣ܙܽܘܢ ܡܰܘܬܶܗ ܕܙܰܕܝ̣ܩܳܐ ܘܠܳܐ ܢܶܣ̣ܬܰܟܠܘ̣ܢܳܝܗ̱ܝ ܐܳܡܰܪ ܗ̱ܘܳܐ: ܚܰܕ ܕܗܳܐ ܚܰܝ̈ܶܐ ܕܝ̣ܠܟܽܘܢ ܥܰܠ ܩܰܝܣܳܐ ܠܰܒܢܰܝ̈ ܥܰܡܶܗ ܡܰܐܪܶܙ ܗ̱ܘܳܐ: ܘܰܐ̱ܚܪܺܢܳܐ ܕܡܰܢ̇ ܕܰܡܗܰܝ̇ܡܶܢ ܒܶܗ ܠܳܐ ܢܶܒ̣ܗܰܬ ܡܣܰܟܶܠ ܗ̱ܘܳܐ: ܘܒܰܕܓܽܘܢ ܠܡܶܠܰܝ̈ܗܽܘܢ ܫܰܪܝ̣ܪ̈ܳܬܳܐ ܚܰܘܝ̣ܬ ܘܠܶܐܡܪܳܐ ܢܳܡܘ̣ܣܳܝܳܐ ܥܰܡ ܬܰܠܡܝ̣̈ܕܰܝܟ ܐܶܟܰܠ̣ܬ: ܘܡܶܢ ܬܰܠܡܝ̣ܕܳܐ ܙܺܐܦܳܢܳܐ ܠܥܰܡܳܐ ܦܰܩܪܳܐ ܐܶܫܬܠܶܡ̣ܬ ܘܒܶܙܚܳܐ ܘܡܘ̣ܝܳܩܳܐ ܣܰܝܒ̣ܰܪܬ: ܘܰܒܒܶܝܬ ܕܝ̣ܢܳܐ ܩܳܡ̣ܬ ܘܰܐܝܟ ܚܰܝܳܒܳܐ ܐܶܫܬܰܐܰܠܬ ܘܰܐܝܟ ܥܳܒܶܕ ܒܝ̣̈ܫܳܬܳܐ ܚܰܫܳܐ ܘܡܰܘܬܳܐ ܣܒܰܠ̣ܬ: ܘܟܰܕ ܒܪ̈ܰܘܡܶܐ ܥܶܠܳܝ̈ܶܐ ܡܶܢ ܡܰܠܰܐܟ̈ܶܐ ܒܕܶܚܠܳܐ ܡܶܫܬܰܒܰܚ ܐܰܢ̱ܬ: ܒܥܘ̣̈ܡܩܶܐ ܬܰܚ̈ܬܳܝܶܐ ܡܶܢ ܝܘ̣̈ܕܳܝܶܐ ܣܰܟ̈ܠܶܐ ܐܶܬܒܰܙܰܚ̣ܬ: ܟܰܕ ܒܪ̈ܰܘܡܶܐ ܥܶܠܳܝ̈ܶܐ ܡܶܢ ܬܳܓ̈ܡܶܐ ܕܰܟܪ̈ܘ̣ܒܶܐ ܒܙܰܘܚܳܐ ܡܶܬܒܰܪܰܟ ܐܰܢ̱ܬ: ܒܥܘ̣̈ܡܩܶܐ ܬܰܚ̈ܬܳܝܶܐ ܒܩܰܢܝܳܐ ܡܶܢ ܡܰܪ̈ܳܚܶܐ ܐܬܩܰܦ̣ܰܚܬ: ܟܰܕ ܒܪ̈ܰܘܡܶܐ ܥܶܠܳܝ̈ܶܐ ܡܶܢ ܣܪ̈ܳܦܶܐ ܩܰܕܝ̣̈ܫܶܐ ܒܕܶܚܠܳܐ ܡܶܬܩܰܕܰܫ ܐܰܢ̱ܬ: ܒܥܘ̣̈ܡܩܶܐ ܬܰܚ̈ܬܳܝܶܐ ܒܰܦܪ̈ܳܓܶܠܶܐ ܐܶܬ̣ܢܓܶܕܬ: ܟܰܕ ܒܪ̈ܰܘܡܶܐ ܥܶܠܳܝ̈ܶܐ ܢܘ̣ܗܪܳܐ ܐܝܟ ܡܰܪܛܘ̣ܛܳܐ ܡܥܰܛܰܦ ܐܰܢ̱ܬ: ܒܥܘ̣̈ܡܩܶܐ ܬܰܚ̈ܬܳܝܶܐ ܢܰܚ̈ܬܶܐ ܕܒܶܙܚܳܐ ܐܶܬܥ̣ܰܛܰܦܬ: ܟܰܕ ܒܪ̈ܰܘܡܶܐ ܥܶܠܳܝ̈ܶܐ ܡܠܶܟ ܡܰܠ̈ܟܶܐ ܘܩܳܛܰܪ ܬܳܓ̈ܶܐ ܡܶܬܝ̣ܕܰܥ ܐܰܢ̱ܬ: ܒܥܘ̣̈ܡܩܶܐ ܬܰܚ̈ܬܳܝܶܐ ܟܠܝ̣ܠܳܐ ܟܘ̣ܒܳܢܳܝܳܐ ܒܪܝ̣ܫܳܟ ܡܶܬܬܣܝ̣ܡ: ܟܰܕ ܒܪ̈ܰܘܡܶܐ ܥܶܠܳܝ̈ܶܐ ܡܰܪܟܰܒܬܳܐ ܕܢܘ̣ܪܳܐ ܟܕܝ̣ܢܳܐ ܠܐܝ̣ܩܳܪܳܟ: ܒܥܘ̣̈ܡܩܶܐ ܬܰܚ̈ܬܳܝܶܐ ܥܰܠ ܩܰܝܣܳܐ ܕܰܙܩܝ̣ܦܳܐ ܐܶܬܩܰܒ̣ܰܥܬ: ܟܰܕ ܒܪ̈ܰܘܡܶܐ ܥܶܠܳܝ̈ܶܐ ܥܰܡ ܐܰܒܳܐ ܘܪܘ̣ܚܳܐ ܒܫܰܘܝܘ̣ܬ ܐܘ̣ܣܺܝܰܐ ܡܶܣܬܓܶܕ ܐܰܢ̱ܬ: ܒܥܘ̣̈ܡܩܶܐ ܬܰܚ̈ܬܳܝܶܐ ܥܰܡ ܥܰܘ̈ܳܠܶܐ ܘܥܳܒ̈ܕܰܝ ܒܝ̣̈ܫܳܬܳܐ ܐܶܬ̣ܡܢܝ̣ܬ: ܘܡܶܛܽܠ ܗܳܕܶܐ ܒܬܰܪ̈ܥܝܳܬܰܢ ܫܘ̣ܒܚܳܐ ܠܛܰܝܒܘ̣ܬܳܟ ܡܰܣܩܝ̣ܢܰܢ ܟܰܕ ܐܳܡ̇ܪܝ̣ܢܰܢ: ܫܘ̣ܒܚܳܐ ܠܳܟ ܪܝ̣ܫ ܟܘ̣ܡܪ̈ܶܐ ܕܬܰܘܕܝ̣ܬܳܐ ܕܩܰܕܶܫ̣ܬ ܠܓܶܢܣܰܢ ܒܰܕܒܝ̣ܚܘ̣ܬܳܟ: ܫܘ̣ܒܚܳܐ ܠܳܟ ܪܳܥܝܳܐ ܛܳܒܳܐ ܕܰܗ̣ܘܰܝܬ ܐܶܡܪܳܐ ܠܢܶܟܣܬܳܐ ܡܶܛܽܠ ܦܘ̣ܪܩܳܢܰܢ: ܫܘ̣ܒܚܳܐ ܠܳܟ ܕܐܶܨܛܠܶܒ̣ܬ: ܫܘ̣ܒܚܳܐ ܠܳܟ ܕܡܝ̣ܬܬ: ܫܘ̣ܒܚܳܐ ܠܳܟ ܕܐܶܬܩܒ̣ܰܪܬ: ܫܘ̣ܒܚܳܐ ܠܳܟ ܕܐܶܬܢܰܚ̣ܰܡܬ: ܘܒܰܕܓܽܘܢ ܡܦܝ̣ܣܝ̣ܢܰܢ ܠܳܟ ܡ̇ܠܶܐ̣ ܪ̈ܰܚܡܶܐ ܘܪܶܚܡܰܬ݀ ܐ̱ܢܳܫܘ̣ܬܳܐ ܡܳܪܝܳܐ ܕܰܬ̣ܩܰܒܶܠ ܠܦܝ̣ܪܡܳܐ ܗܳܢܳܐ ܡܶܢ ܐܝ̣̈ܕܰܝ ܚܰܠܳܫܘ̣ܬܝ̱: ܘܫܰܟܶܢ ܠܰܢ ܕܐܰܝܟ ܕܫܳܘܶܐ ܠܚܰܫܰܝ̈ܟ ܘܰܠܡܰܘܬܳܟ ܢܶܬܚ̇ܙܶܐ ܩܕܳܡܰܝܟ ܝܰܘܡܳܢܳܐ ܘܫܰܪܟܳܐ ܕܝܰܘ̈ܡܳܬܳܐ ܕܝ̣ܠܰܢ: ܘܠܳܐ ܚܳܫܘ̣̈ܫܶܐ ܘܠܳܐ ܡܶܙܕܰܟ̈ܝܳܢܶܐ ܒܝܰܕ ܚܰܫܰܝ̈ܟ ܩܰܕܝ̣̈ܫܶܐ ܥܒܶܕ ܠܰܢ: ܘܡܶܢ ܟܽܠܗܽܘܢ ܚܰܫ̈ܶܐ ܢܕܝ̣̈ܕܶܐ ܘܰܡܨܰܥܪ̈ܶܐ ܘܰܥܕܝ̣̈ܠܶܐ ܚܰܪܰܪ ܠܰܢ: ܘܗܰܒܠܰܢ ܕܒܰܛܥܳܡܬܳܐ ܕܚܰܫܰܝ̈ܟ ܦܳܪ̈ܘ̣ܩܳܝܶܐ ܠܰܫܓܝ̣ܫܘ̣ܬܳܐ ܕܬܰܪ̈ܥܝܳܬܰܢ ܢ̇ܫܰܝܶܢ: ܘܠܰܪ̈ܓܝ̣ܓܳܬܳܐ ܕܦܰܓܪ̈ܰܝܢ ܒܝܰܕ ܡܰܘܬܳܟ ܡܰܥܒܶܕ ܚܰܝ̈ܶܐ ܢ̇ܰܕܥܶܟ ܘܰܢ̇ܡܝ̣ܬ: ܘܰܠܒܘ̣ܣܳܡܳܐ ܘܫܰܘܬܳܦܘ̣ܬܳܐ ܕܰܩܝܳܡܬܳܟ ܒܚܰܕܘ̣ܬܳܐ ܢ̇ܡܰܢܰܥ: ܘܰܒܣܰܒܪܳܐ ܕܚܰܝ̈ܶܐ ܠܳܐ ܡܳܝܘ̣̈ܬܶܐ ܥܰܡ ܩܰܕܝ̣̈ܫܰܝܟ ܢ̇ܶܬܒܰܣܰܡ: ܘܰܠܥܰܢܝ̣̈ܕܰܝܢ ܕܰܫܟ݂ܶܒ̣ܘ̱ ܥܰܠ ܣܰܒܪܳܟ ܐܰܢܝ̣ܚ ܒܡܰܠܟܘ̣ܬܳܟ ܘܒܰܣܶܡ ܒܰܓܢܽܘܢܳܟ: ܐܰܝܟܰܢܳܐ ܕܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܡܫܺܝ̣ܚܳܐ ܪܺܝ̣ܚܳܐ ܚܰܠܝܳܐ ܘܥܶܛܪܳܐ ܒܰܣܝ̣ܡܳܐ: ܕܐܰܢ̱ܬ ܐܝ̣ܬܰܝܟ ܕܐܰܥ̣ܛܰܪܬ ܠܰܐܠܳܗܳܐ ܐܒܳܐ ܡܶܛܽܠܳܬܰܢ: ܘܡܶܢ ܕܪܝ̣ܫ ܒܝܰܕ ܨܠܝ̣ܒܳܟ ܒ̣ܪܰܝܬܳܢ ܡܶܢ ܡܰܘܬܳܐ ܠܚܰܝ̈ܶܐ: ܚܘ̣ܪ ܡܳܪܝ̱ ܐܳܦ ܗܳܫܳܐ ܒܒܳܥܘ̣ܬܳܐ ܒܨܝ̣ܪܬܳܐ ܕܝ̣ܠܰܢ ܘܩܰܒܶܠ ܡܶܢܰܢ ܚܰܛܳܝ̈ܶܐ ܠܥܶܛܪܳܐ ܗܳܢܳܐ ܕܒܶܣ̈ܡܶܐ ܕܩܰܪܶܒ̣ܢܰܢ ܠܳܟ: ܘܫܰܟܶܢ ܠܰܢ ܒܰܡܪܰܚܡܳܢܘ̣ܬܳܟ ܫܘ̣ܒܩܳܢܳܐ ܕܚܰܘ̈ܒܶܐ ܘܕܰܚ̈ܛܳܗܶܐ: ܘܰܠܥܰܢܝ̣̈ܕܶܐ ܡܗܰܝ̈ܡܢܶܐ ܥܒܶܕ ܢܝܳܚܳܐ ܣܒܝ̣ܣܳܐ ܘܚܘ̣ܣܳܝܳܐ ܓܡܝ̣ܪܳܐ: ܕܰܚܢܰܢ ܘܗ̣ܶܢܽܘܢ ܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ: ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܠܥܳܠܡܝ̣ܢ܀