ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܦܶܨܚܳܐ ܚܰܝܳܐ ܘܡܰܚܝܳܢܳܐ ܕܟܽܠ ܦܶܨܚܝ̣̈ܢ ܠܶܗ ܨܳܝ̇ܪܝ̣ܢ: ܘܟܽܠ ܥܺܐܕܝ̣̈ܢ ܠܶܗ ܡܝܰܩܢܝ̣ܢ ܘܟܽܠ ܐ̱ܪ̈ܳܙܝ̣ܢ ܠܶܗ ܪܳܫ̇ܡܝ̣ܢ: ܘܟܽܠ ܚܰܓܝ̣̈ܢ ܠܶܗ ܡܩܰܠܣܝ̣ܢ: ܘܟܽܠ ܦܘ̣̈ܡܝ̣ܢ ܠܶܗ ܡܫܰܒܚܝ̣ܢ: ܘܟܽܠ ܠܶܫܳܢܝ̣̈ܢ ܠܶܗ ܡܰܘ̇ܕܶܝܢ ܘܰܡܪܰܡܪܡܝ̣ܢ: ܛܳܒܳܐ ܕܠܶܢ ܢ̇ܶܬܕܟܰܪ ܘܠܶܗ ܢ̇ܫܰܒܰܚ: ܒܗܳܢܳܐ ܥܶܕܳܢܳܐ ܕܣܶܕܪܳܐ ܩܰܕܡܳܝܳܐ ܕܠܶܠܝܳܐ: ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒܢ̈ܶܐ ܘܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܫܺܝ̣ܚܳܐ ܐܰܠܳܗܳܐ ܕܝ̣ܠܰܢ: ܗܰܘ̇ ܕܐܝ̣ܬܰܝܟ ܐܰܠܳܗܳܐ ܘܒܳܪܘ̣ܝܳܐ ܕܟܽܠ ܥܰܡ ܐܰܒܘ̣ܟ ܘܪܘ̣ܚܳܟ ܩܰܕܝ̣ܫܳܐ: ܨܒ̣ܰܝܬ ܒܚܘ̣ܒܳܟ ܘܒܰܪܢܳܫܳܐ ܕܠܳܐ ܫܘ̣ܚܠܳܦܳܐ ܗ̣ܘܰܝܬ ܡܶܢ ܠܳܐ ܡܢܰܣ̣ܝܰܬ݀ ܒܙܘ̣ܘܳܓܳܐ ܐܟܡܰܢ ܕܬ̣ܶܦܪܘ̣ܩ ܠܰܓܒܝ̣ܠܬܳܐ ܐ̱ܢܳܫܳܝܬܳܐ ܡܶܢ ܡܰܘܬܳܐ ܘܰܚܛܝ̣ܬܳܐ: ܘܟܰܕ ܣܳܝܘ̣ܡܳܐ ܕܢܳܡܘ̣ܣܳܐ ܒܰܩܢܘ̣ܡܳܟ ܚ̣ܰܘܝ̣ܬ: ܐܰܝܟܰܢܳܐ ܕܡܶܢ ܠܰܘܛܬܳܐ ܬܶܗ̣ܘܶܐ ܕܥܰܡ̱̈ܡܶܐ ܕܠܳܐ ܢܳܡܘ̣ܣܳܐ ܢ̣ܶܬܒܰܪܟܽܘܢ ܒܳܟ: ܒܫܘ̣ܪܳܝܳܐ ܓܶܝܪ ܕܐܘ̣ܪܚܳܐ ܓܙܘ̣ܪܬܳܐ ܫܰܡܶܫ̣ܬ: ܘܛܰܒܥܳܐ ܕܒܶܝܬ ܐܰܒܪܳܗܳܡ ܒܰܩܢܘ̣ܡܳܟ ܫܩܰܠ̣ܬ: ܐܰܝܟܰܢܳܐ ܕܠܳܐ ܐܰܝܟ ܢܘ̣ܟܪܳܝܳܐ ܒܰܣܒܰܪܬܳܐ ܬܗ̣ܰܠܶܟ: ܒܰܡܨܰܥܬܳܐ ܕܶܝܢ ܒܰܡܕܰܒܪܳܢܘ̣ܬܳܐ ܟܺܐܢܘ̣ܬܳܐ ܡ̣ܰܠܺܝ̣ܬ ܡܰܥܡܘ̣ܕܝ̣ܬܳܐ ܗܳܝ̇ ܕܰܬܝܳܒܘ̣ܬܳܐ ܥܠܰܝܟ ܩܰܒܶܠ̣ܬ ܒܛܰܝܒܘ̣ܬܳܐ ܕܝ̣ܠܳܟ: ܐܳܘ ܡܥܰܠܰܝ ܡܶܢ ܟܽܠ ܚܛܳܗ̈ܶܐ: ܘܰܡܪܰܝܰܡ ܡܶܢ ܫܳܪ̈ܥܳܬܳܐ ܐܰܝܟܰܢܳܐ ܕܫܘ̣ܒܩܳܢܳܐ ܓܡܝ̣ܪܳܐ ܠܰܢ ܬ̣ܶܬܶܠ: ܘܓܰܙܳܐ ܠܳܐ ܡܶܬ̣ܚܰܠܨܳܢܳܐ ܒܡܰܝ̈ܳܐ ܠܰܢ ܬ̣ܣܝ̣ܡ: ܒܫܘ̣ܠܳܡܳܐ ܕܶܝܢ ܕܟܽܠܳܗ̇ ܣܳܥܘ̣ܪܘ̣ܬܳܐ ܕܝ̣ܠܳܟ ܫܰܦ̣ܪ ܠܳܟ ܕܦܶܨܚܳܐ ܕܒܶܝܬ ܡܘ̣ܫܶܐ ܬ̣ܶܥܒܶܕ: ܐܶܡܪܳܐ ܐ̱ܪܳܙܳܢܳܝܳܐ ܥܰܡ ܬܰܠܡܝ̣̈ܕܰܝܟ ܪܰܓ̣ܬ ܠܡܶܐܟܰܠ: ܗܳܢܳܐ ܕܝ̣ܠܳܟ ܚܰܬܝ̣ܬܳܐܝ̣ܬ ܒܐ̱ܪ̈ܳܙܰܘܗ̱ܝ ܬܡܝ̣̈ܗܶܐ ܨܳܐܰܪ ܗ̱ܘܳܐ: ܘܰܠܝܘ̣ܩܢܳܟ ܟܽܠܳܢܳܐܝ̣ܬ ܒܫܰܪ̈ܒܰܘܗ̱ܝ ܟܣܰܝ̈ܳܐ ܪܳܫܶܡ ܗ̱ܘܳܐ: ܐܰܢ̱ܬ ܕܐܝ̣ܬܰܝܟ ܐܶܡܪܳܐ ܚܰܝܳܐ ܕܐܰܠܳܗܳܐ: ܐܰܝܟܰܢܳܐ ܕܰܓܡܝ̣ܪܳܐܝ̣ܬ ܠܟܽܠܗܶܝܢ ܗܳܠܶܝܢ ܕܢܳܡܘ̣ܣܳܐ ܥܰܬܝ̣ܩܳܐ ܬ̣ܫܰܡܠܶܐ: ܘܗܳܝܕܶܝܢ ܡܶܢܳܟ ܒܙܶܕܩܳܐ ܢܶܫ̣ܬܰܬܰܩ: ܘܒܳܬܰܪܟܶܢ ܠܰܚ̇ܕܰܬܳܐ ܠܰܢ ܬ̣ܶܬܶܠ: ܘܦܰܓܪܳܟ ܩܰܕܝ̣ܫܳܐ ܠܰܫܠܝ̣̈ܚܰܝܟ ܬ̣ܦܰܠܶܓ ܘܬ̣ܰܘܟܶܠ: ܘܰܕܡܳܟ ܡܳܪܳܢܳܝܳܐ ܠܗܽܘܢ ܬ̣ܰܫܩܶܐ: ܘܕܺܝܰܬܝ̣ܩܺܝ̣ ܚ̇ܕܰܬܳܐ ܠܥܺܕܬܳܟ ܒܶܗ ܟܰܕ ܒܶܗ ܬ̣ܶܟܬܘ̣ܒ: ܘܐܰܦܰܝ̈ܟ ܠܡܰܘܬܳܐ ܕܰܨܠܝ̣ܒܳܐ ܬ̣ܣܝ̣ܡ: ܕܦܘ̣ܪܩܳܢܳܐ ܓܡܝ̣ܪܳܐ ܠܰܢ ܬܶܥ̣ܒܶܕ: ܘܥܰܠ ܗܳܕܶܐ ܒܰܝܬܳܐ ܫܶܐܠ̣ܬ: ܘܕܘ̣ܟܬܳܐ ܕܚܳܫ̇ܚܳܐ ܠܣܳܥܘ̣ܪܘ̣ܬܳܐ ܕܝ̣ܠܳܟ ܒܥ̣ܰܘ ܠܳܟ ܡܫܰܡ̈ܫܳܢܰܝܟ: ܐܳܘ ܕܪܰܘܡܳܐ ܘܥܘ̣ܡܩܳܐ ܘܟܽܠ ܡ̇ܠܶܐ̣ ܡܶܢܶܗ: ܒܗܳܝ̇ ܕܠܰܝܬ ܗ̱ܘܳܐ ܕܘ̣ܟܬܳܐ ܐܰܝܟܳܐ ܕܬ̣ܶܣܡܘ̣ܟ ܪܝ̣ܫܳܟ ܐܳܘ ܪܝ̣ܫܳܐ ܕܚܰܝ̈ܶܐ: ܘܟܰܕ ܟܽܠܡܶܕܶܡ ܐܰܝܟ ܕܰܦ̇ܐܶܐ̣ ܠܳܟ ܐܶܬ̣ܬܰܩܰܢ: ܘܬܰܡܳܢ ܒܛܰܝܒܘ̣ܬܳܟ ܚܘ̣ܒܳܢܳܐܝ̣ܬ ܐܶܣ̣ܬܡܶܟ݂ܬ ܘܰܠܟܽܠܗܶܝܢ ܢܝ̣ܚܳܐܝ̣ܬ ܓܡ̣ܰܪܬ ܘܫܰܡܠܝ̣ܬ: ܠܪ̈ܶܓܠܶܐ ܕܬܰܠܡܝ̣̈ܕܰܝܟ ܒܪܶܚ̣ܡܰܬ݀ ܐ̱ܢܳܫܘ̣ܬܳܟ ܐܰܫܝ̣ܓܬ: ܘܐܘ̣ܪܚܳܐ ܚ̇ܕܰܬܳܐ ܕܚܘ̣ܒܳܐ ܡܰܟܝ̣ܟܳܐܝ̣ܬ ܠܗܽܘܢ ܚܰܘܝ̣ܬ ܘܒܐܝ̣̈ܕܰܝܗܽܘܢ ܠܰܢ ܐܰܓܥܶܠ̣ܬ: ܘܰܠܙܺܐܦܳܢܳܐ ܝ̣ܺܗܘ̣ܕܳܐ ܒܠܰܚܡܳܐ ܨܒܝ̣ܥܳܐ ܦܰܪܣܝ̣ܬ: ܘܬܶܫܒܘ̣ܚܬܳܐ ܕܩܘ̣ܒܳܠܛܰܝܒܘ̣ܬܳܐ: ܘܬܰܘܕܝ̣ܬܳܐ ܠܰܐܒܳܐ ܝܳܠܘ̣ܕܳܟ ܘܠܰܒܢܰܝ̈ ܐ̱ܪ̈ܳܙܰܝܟ ܕܒܐܝ̣ܕܶܗ ܐܰܓܥ̣ܶܠܬ: ܘܗܳܫܳܐ ܡܳܪܝܳܐ ܪܳܚܶܡ ܐ̱ܢܳܫܳܐ ܡܶܬܟܰܫܦܝ̣ܢܰܢ ܠܛܰܝܒܘ̣ܬܳܟ ܘܰܠܪ̈ܰܚܡܰܝܟ ܘܰܡܦܝ̣ܣܝ̣ܢܰܢ ܠܳܟ ܕܰܬܚ̣ܰܕܶܐ ܠܰܢ ܘܰܬ̣ܚܰܕܶܬ ܒܰܢ ܓܘ̣ܥ̈ܠܳܢܰܝܟ ܐܰܠܳܗ̈ܳܝܶܐ ܘܰܬ̣ܚܰܝܶܠ ܠܢܰܦ̈ܫܳܬܰܢ ܒܡܰܓܢܳܢܘ̣ܬܳܐ ܕܪܘ̣ܚܳܟ ܩܰܕܝ̣ܫܳܐ: ܘܬܶܡ̣ܠܶܐ ܠܠܶܒܰܘ̈ܳܬܰܢ ܚܘ̣ܒܳܐ ܕܠܳܐ ܙܺܐܦܳܐ ܕܰܠܘܳܬܳܟ ܘܰܠܘܳܬ ܚܕ̈ܳܕܶܐ: ܘܬܰܦ̣ܨܰܚ ܠܰܟܡܝ̣ܪܘ̣ܬܰܢ ܒܰܦܨܝ̣ܚܘ̣ܬܳܐ ܕܦܶܨܚܳܟ ܩܰܕܝ̣ܫܳܐ: ܐܰܝܟܰܢܳܐ ܕܢܶܫ̇ܬܘܶܐ ܕܰܢ̇ܥܰܕܥܶܕ ܠܳܟ ܕܰܟܝܳܐܝ̣ܬ ܥܺܐܕ̈ܶܐ ܕܦܘ̣ܪܩܳܢܳܐ ܠܳܐ ܒܦܰܛܝ̣ܪܳܐ ܥܰܬܝ̣ܩܳܐ ܕܒܝ̣ܫܘ̣ܬܳܐ ܘܡܰܪܝ̣ܪܘ̣ܬܳܐ: ܐܶܠܳܐ ܒܰܚܡܝ̣ܪܳܐ ܕܕܰܟܝܘ̣ܬܳܐ ܘܩܰܕܝ̣ܫܘ̣ܬܳܐ ܕܰܡܢܝ̣ܚ ܠܨܶܒܝܳܢܳܟ ܘܥܰܡ ܟܽܠܗܽܘܢ ܡܥܰܕ̈ܥܕܳܢܶܐ ܕܰܠܥܶܠ: ܘܚܝ̈ܠܰܘܳܬܳܐ ܢܘ̣ܪ̈ܳܢܳܝܶܐ ܘܢܰܦ̈ܫܳܬܳܐ ܕܩܰܕܝ̣̈ܫܶܐ: ܢܶܚ̇ܕܶܐ ܘܰܢ̇ܕܘ̣ܨ ܘܢ̇ܶܪܘܰܙ: ܢ̇ܫܰܒܰܚ ܠܳܟ ܬܶܫܒ̈ܚܳܬܳܐ ܕܦܰܐܝ̈ܳܢ ܠܳܟ: ܘܰܚܢܰܢ ܘܥܰܢܝ̣̈ܕܰܝܢ ܡܗܰܝ̈ܡܢܶܐ ܒܗܰܘ̇ ܥܺܐܕܳܐ ܐ̱ܚܪܳܝܳܐ ܕܠܳܐ ܡܶܫ̣ܬܪܶܐ ܕܒܶܗ ܗܳܘ̇ܝܳܐ ܡܶܐܬܝ̣ܬܳܟ ܡܫܰܒܰܚܬܳܐ ܕܬܰܪܬܶܝܢ: ܢܶܫ̇ܬܘܶܐ ܕܢ̇ܶܥܘ̣ܠ ܠܰܓܢܽܘܢܳܟ ܡ̇ܠܶܐ̣ ܢܘ̣ܗܪܳܐ ܘܚܕ̈ܘܳܬܳܐ ܣܒܝ̣̈ܣܳܬܳܐ ܥܰܡ ܟܽܠܗܽܘܢ ܓܳܡܪ̈ܰܝ ܨܶܒܝܳܢܳܟ: ܘܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܠܐܪܳܙܳܟ ܡܳܪܝ̱ ܛܰܦ̣ܶܣ ܐܝ̣ܣܚܳܩ ܒܰܥܠܳܬܶܗ: ܘܠܶܗ ܣ̣ܘܰܚ ܐܰܒܪܳܗܳܡ ܕܢܶܚ̣ܙܶܐ ܝܰܘܡܶܗ: ܘܠܶܗ ܨܳܪ ܡܘ̣ܫܶܐ ܒܶܐܡܪܶܗ: ܘܒܰܕܡܶܗ ܐܶܫ̣ܬܰܘܙܰܒ ܥܰܡܳܐ ܡܶܢ ܡܰܘܬܳܐ ܡܚܰܒܠܳܢܶܗ: ܘܠܶܗ ܐܰܟ̣ܪܶܙ ܐܶܫܰܥܝܳܐ ܒܰܢܒܺܝܘ̣ܬܳܐ ܕܝ̣ܠܶܗ ܟܰܕ ܐܰܙܥ̣ܶܩ: ܕܐ̱ܪܳܙ ܠܝ̣ ܐ̱ܪܳܙ ܠܝ̣ ܘܠܰܒܢܰܝ̈ ܒܰܝܬܝ̱: ܘܠܰܢ ܡܳܪܝ̱ ܕܒܰܝ̈ܬܳܝܶܐ ܥܒ̣ܰܕܬ ܠܰܢ ܒܐ̱ܪ̈ܳܙܰܝܟ ܘܫܰܘ̈ܬܳܦܶܐ ܕܦܰܓܪܳܟ ܘܰܕܡܳܟ ܗ̣ܘܰܝܢܰܢ: ܘܰܒܡܰܘܬܳܟ ܡܰܥܒܶܕ ܚܰܝ̈ܶܐ ܥܡ̣ܰܕܢܰܢ: ܘܰܒܡܰܠܟܘ̣ܬܳܟ ܐܶܫܬܰܘܕܝ̣ܬ ܠܰܢ: ܐܰܫܘܳܐ ܠܰܢ ܕܢ̇ܶܛܰܪ ܓܘ̣̈ܥܠܳܢܰܝܟ ܘܢ̇ܶܗܘܶܐ ܫܳܡܘ̣̈ܥܶܐ ܕܦܘ̣̈ܩܕܳܢܰܝܟ ܘܓܳܡܘ̣ܪ̈ܶܐ ܕܨܶܒܝܳܢܳܟ: ܘܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀