ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܐܳܣܝܳܐ ܕܟܽܠ ܟܺܐܒ̈ܝ̣ܢ: ܘܥܳܨܽܘܒܳܐ ܕܟܽܠ ܡܰܚ̈ܘܳܢ: ܘܓܰܙܳܐ ܕܟܽܠ ܥܘ̣ܬܪ̈ܝ̣ܢ: ܘܣܝ̣ܡܬܳܐ ܕܟܽܠ ܒܘ̣ܪ̈ܟܳܢ: ܠܗܰܘ̇ ܡܰܒܘ̣ܥܳܐ ܕܥܘ̣ܕܪ̈ܳܢܶܐ ܘܰܡܥܝ̣ܢܳܐ ܕܚܘ̣ܠ̈ܡܳܢܶܐ: ܐܘ̣ܪܚܳܐ ܕܚܰܝ̈ܶܐ ܘܰܫܒܝ̣ܠܳܐ ܕܰܫܠܳܡܳܐ: ܬܰܪܥܳܐ ܕܚܰܕ̈ܘܳܬܳܐ ܘܰܠܡܺܐܢܳܐ ܕܰܢܝܳܚܬܳܐ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܩܰܘܡܳܐ ܩܰܕܡܳܝܳܐ ܕܠܺܠܝܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܩܕܳܡܰܝܢ ܘܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܳܪܝܳܐ ܡܪܰܚܡܳܢܳܐ ܘܰܡܪܰܚܦܳܢܳܐ: ܢܰܓܝ̣ܪ ܪܘ̣ܚܳܐ ܘܣܰܓܝ̣ ܛܰܝܒܘ̣ܬܳܐ ܘܩܘ̣ܫܬܳܐ: ܗܰܘ̇ ܕܡ̣ܶܢ ܗܳܝ̇ ܕܠܳܐ ܐܝ̣ܬܰܝܢ ܠܘܳܬ ܗܳܝ̇ ܕܢ̇ܶܗܘܶܐ ܐܰܝܬܝ̣ܬ ܠܰܢ: ܘܡ̣ܶܢ ܥܰܦܪܳܐ ܫܝ̣ܛܳܐ ܘܠܳܐ ܚܳܫܚܳܐ: ܒܰܪܢܳܫܳܐ ܡܶܛܽܠ ܪܰܒܘ̣ܬܳܐ ܕܨܰܠܡܳܟ ܥܒ̣ܰܕܬܳܝܗ̱ܝ: ܘܰܐܝܟ ܕܰܠܬܶܫܒܘ̣ܚܬܳܐ ܕܡܳܪܘ̣ܬܳܟ ܐܰܬܩܶܢ̣ܬܳܝܗ̱ܝ: ܘܰܚܢܰܢ ܡ̣ܶܢ ܐܘ̣ܪܚܳܐ ܕܦܘ̣ܩ̈ܕܳܢܰܝܟ ܩܰܕܝ̣̈ܫܶܐ ܛܥܰܝܢܰܢ: ܘܰܒܝܰܕ ܥܒܳܪ ܦܘ̣ܩܕܳܢܳܐ ܕܐܰܒܽܘܢ ܐܳܕܳܡ ܐܰܡܠ̣ܶܟ ܡܰܘܬܳܐ ܥܠܰܝܢ: ܐܶܠܳܐ ܐܰܢ̱ܬ ܡܳܪܝܳܐ ܡܪܰܚܡܳܢܳܐ ܠܳܐ ܐܰܗ̣ܡܝ̣ܬ ܡ̣ܶܢ ܥܘ̣ܕܪܳܢܳܐ ܘܝܰܨܝ̣ܦܘ̣ܬܳܐ ܕܝ̣ܠܳܟ ܕܰܥܠܰܝܢ: ܛܰܝܒܘ̣ܬܳܟ ܡܳܪܝ̱ ܩܪܳܬܳܟ ܠܘܳܬܰܢ ܘܰܡܪܰܚܡܳܢܘ̣ܬܳܟ ܐܰܪܟܶܢ̣ܬܳܟ ܨܶܝܕܰܝܢ: ܘܰܐܟܘܳܬܰܢ ܘܡܶܛܽܠܳܬܰܢ ܒܰܪܢܳܫܳܐ ܗ̣ܘܰܝܬ: ܘܥܘ̣ܕܪ̈ܳܢܶܐ ܘܡܰܘܗ̈ܒܳܬܳܐ ܠܓܶܢܣܳܐ ܕܝ̣ܠܰܢ ܐܶܬ̣ܬܰܓܰܪܬ: ܘܡܶܛܽܠ ܚܢܳܢܳܟ ܕܠܳܐ ܡܶܣܬܰܝܰܟ: ܘܛܰܝܒܘ̣ܬܳܟ ܕܠܳܐ ܡܶܬܬܟܝ̣ܠܳܐ ܠܡܶܫܬܘ̣ܬܳܐ ܕܩܳܛܢܶܐ ܐܶܙܕܰܡܰܢ̣ܬ ܘܚܰܡܪܳܐ ܛܳܒܳܐ ܐܰܣܓܝ̣ܬ: ܘܰܠܗܰܘ̇ ܛܪܝ̣ܕܳܐ ܡ̣ܶܢ ܢܳܡܘ̣ܣܳܐ ܒܝܰܕ ܐܳܬܳܐ ܕܓܰܪܒܳܐ ܗܳܝ̇ ܕܥܰܠ ܗܰܕܳܡ̈ܰܘܗ̱ܝ ܦܪܝ̣ܣܳܐ ܗ̱ܘܳܬ݀ ܐܶܡ̣ܰܪܬ ܕܨܳܒܶܐ ܐ̱ܢܳܐ ܐܶܬ̣ܕܰܟܳܐ ܘܚܘ̣ܠܡܳܢܳܐ ܘܐܳܣܝܽܘ̣ܬܳܐ ܫܰܟܶܢ̣ܬ ܠܶܗ: ܘܠܰܡܫܰܪܝܳܐ ܕܟܘ̣ܪ̈ܗܳܢܶܐ ܪܡܶܐ ܗ̱ܘܳܐ ܚܘ̣ܠܡܳܢܳܐ ܩܰܠܝ̣ܠܳܐ ܘܫܘ̣ܒܩܳܢܳܐ ܕܰܚܛܳܗ̈ܶܐ ܝܰܗ̣ܒܬ ܠܶܗ: ܠܦܺܐܩܳܐ ܚܰܪܫܳܐ ܓܠܝ̣ܙ ܡ̣ܶܢ ܬܰܪܬܶܝܢ ܛܳܒ̈ܳܢ ܒܝܰܕ ܪܘ̣ܩܳܐ ܕܒܶܐܕ̈ܢܰܘܗ̱ܝ ܢܦ̣ܰܠ: ܕܢ̣ܶܫܡܰܥ ܘܰܕܢ̣ܶܫܬܪܶܐ ܐܶܣܳܪܳܐ ܕܠܶܫܳܢܶܗ ܦܫܝ̣ܩܳܐܝ̣ܬ ܫܰܟܶܢ̣ܬ ܠܶܗ: ܠܰܬܪܝ̣ܥܘ̣ܬ ܕܡܳܐ ܕܐܰܢ̱ܬܬܳܐ ܡܡܰܚܰܝܬܳܐ ܒܝܰܕ ܟܶܢܦܳܐ ܕܡܰܪܛܘ̣ܛܳܟ ܐܰܘܒܶܫ̣ܬ: ܘܰܠܒܰܪܬܶܗ ܕܝܽܘܐܳܪܳܫ ܗܰܘ̇ ܪܝ̣ܫ ܟܢܘ̣ܫܬܳܐ ܕܡ̣ܶܢ ܫܶܢ̈ܶܐ ܕܡܰܘܬܳܐ ܐܰܥܕܝ̣ܬ: ܠܰܒܪܳܗ̇ ܕܰܐܪܡܰܠܬܳܐ ܡ̣ܶܢ ܐܘ̣ܪܚܳܐ ܕܩܰܒܪܳܐ ܐܰܗ̣ܦܶܟ̣ܬ: ܘܠܰܚܡܳܬܶܗ ܕܦܶܛܪܽܘܣ ܡ̣ܶܢ ܐܶܫܳܬܳܐ ܣܥ̣ܰܪܬ ܘܫܰܘܙܶܒ̣ܬ: ܠܣܰܡܝܳܐ ܕܡ̣ܶܢ ܟܪܶܣ ܐܶܡܶܗ ܢܘ̣ܗܪܳܐ ܟܢܝ̣ܟܳܐ ܘܰܕܠܳܐ ܡܘ̣ܡ ܝܰܗ̣ܒܬ ܠܶܗ: ܠܰܬܪܶܝܢ ܣܡܰܝ̈ܳܐ ܟܰܕ ܡܳܪܝܳܐ ܘܰܒܪܶܗ ܕܕܰܘܺܝ̣ܕ ܫܰܡ̣ܗܽܘ̣ܟ ܦܘ̣ܬܳܚܳܐ ܕܥܰܝܢܰܝ̈ܗܽܘܢ ܫܰܟܶܢ̣ܬ ܠܗܽܘܢ: ܠܙܳܢܝ̣ܬܳܐ ܛܰܡܰܐܬܳܐ ܝܰܬܝ̣ܪ ܟܢܝ̣ܟܬܳܐ ܡ̣ܶܢ ܒܬܘܠ̈ܳܬܳܐ ܫܰܡܠܝ̣ܬ: ܘܰܠܫܳܡܪܳܝܬܳܐ ܟܰܕ ܒܥ̣ܳܬ݀ ܡ̣ܶܢܟ ܡܝ̈ܳܐ ܚܰܝ̈ܶܐ ܝܰܗ̣ܒܬ ܠܳܗ̇: ܠܡܳܟܣܳܐ ܡܰܢ ܬܘ̣ܒ ܒܥܶܕܳܢܳܐ ܙܥܘ̣ܪܳܐ ܙܰܕܶܩ̣ܬ: ܘܰܠܠܳܥܳܙܳܪ ܪܳܚܡܳܟ ܡ̣ܶܢ ܥܓܝ̣ܢܘ̣ܬܳܐ ܕܩܰܒܪܳܐ ܢܰܚܶܡ̣ܬ: ܐܳܦ ܚܢܰܢ ܡܶܬܟܰܫܦܝ̣ܢܰܢ ܠܳܟ ܡܳܪܝܳܐ ܒܝܰܕ ܥܶܛܪܳܐ ܗܳܢܳܐ ܕܒܶܣ̈ܡܶܐ: ܠܳܐ ܬܶܟ̣ܠܶܐ ܡ̣ܶܢܢ ܪ̈ܰܚܡܰܝܟ ܐܶܠܳܐ ܐܳܦ ܠܫܘ̣ܒܩܳܢܳܐ ܕܚܰܘܒ̈ܶܐ ܐܰܫܘܳܐ ܠܰܢ: ܘܰܠܥܺܕ̱ܬܳܐ ܕܝ̣ܠܳܟ ܩܰܕܝ̣ܫܬܳܐ ܒܫܰܝܢܳܐ ܘܒܫܠܳܡܳܐ ܕܡܶܢܳܟ ܨܰܒܶܬ ܘܗܰܕܰܪ: ܒܰܛܶܠ ܡ̣ܶܢ ܒܪܝ̣ܬܳܐ ܫܒ̈ܛܶܐ ܕܪܘ̣ܓܙܳܐ ܘܡܰܚ̈ܘܳܬܳܐ ܩܰܫܝ̈ܳܬܳܐ: ܘܰܐܢܝ̣ܚ ܠܥܰܢܝ̈ܕܶܐ ܡܗܰܝܡ̈ܢܶܐ ܕܥܰܠ ܣܰܒܪܳܟ ܫܟ̣ܶܒܘ̱ ܒܰܐܘ̈ܘܳܢܶܐ ܕܝ̣ܠܳܟ ܫܡܰܝ̈ܳܢܶܐ: ܘܠܳܟ ܫܘ̣ܒܚܳܐ ܡܰܣܩܝ̣ܢܰܢ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀