ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܪܳܡܳܐ ܕܒܰܡܪ̈ܰܘܡܶܐ ܥܶܠ̈ܳܝܶܐ ܣܪ̈ܳܦܶܐ ܡܩܰܕܫܝ̣ܢ ܠܶܗ: ܘܰܒܥܘ̣ܡ̈ܩܶܐ ܬܰܚ̈ܬܳܝܶܐ ܫܰܒܪ̈ܶܐ ܡܩܰܠܣܝ̣ܢ ܠܶܗ: ܠܗܰܘ̇ ܕܰܟܪ̈ܘܽܒܶܐ ܒܙܰܘܥܳܐ ܡܒܰܪܟܝ̣ܢ ܠܶܗ: ܝܰܠ̈ܘ̣ܕܶܐ ܒܪܝ̣ܪ̈ܶܐ ܒܬܶܗܪܳܐ ܡܗܰܕܪܝ̣ܢ ܠܶܗ ܘܺܐܝ̈ܠܳܢܶܐ ܘܕܶܩ̈ܠܶܐ ܒܣܰܘ̈ܟܶܐ ܡܝܰܩܪܝ̣ܢ ܠܶܗ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܩܰܘܡܳܐ ܩܰܕܡܳܝܳܐ ܕܠܶܠܝܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܐܰܠܳܗܳܐ ܚܰܝܠܬܳܢܳܐ ܘܓܰܢ̱ܒܳܪܳܐ ܕܥܳܠܡܳܐ ܪܳܡܳܐ ܘܰܡܥܰܠܝܳܐ ܘܰܡܫܰܒܚܳܐ ܗܰܘ̇ ܕܠܳܐ ܡܶܣܬܰܝܟܳܐ ܛܰܝܒܘ̣ܬܳܟ ܘܪܶܚܡܰܬ݀ ܐ̱ܢܳܫܘ̣ܬܳܟ ܡ̣ܶܢ ܒܶܪ̈ܝܳܬܳܟ ܗܰܘ̇ ܕܒܰܫܦܝ̣ܥܘ̣ܬ ܪ̈ܰܚܡܰܝܟ ܡܬܘ̣̈ܡܳܝܶܐ ܘܣܰܓܺܝ̈ܶܐܐ ܐܶܬ̣ܬܰܚܬܝ̣ܬ ܒܨܶܒܝܳܢܳܟ ܡ̣ܶܢ ܡܪ̈ܰܘܡܶܐ ܥܶܠ̈ܳܝܶܐ ܘܰܫ̈ܡܰܝܳܢܶܐ ܕܬܶܫܒܘ̣ܚܬܳܟ ܠܘܳܬ ܦܘ̣ܪܩܳܢܳܐ ܕܓܶܢܣܳܐ ܕܝ̣ܠܰܢ ܐܰܪ̈ܥܳܢܳܝܶܐ ܘܬܰܚܘ̣̈ܒܶܐ: ܐܶܬܪܟܶܢ̣ܬ ܒܚܘ̣ܒܳܟ ܥܕܰܡܳܐ ܠܟܽܠܳܗ̇ ܗܳܕܶܐ ܡܰܟܝ̣ܟܘ̣ܬܳܐ ܕܰܚܠܳܦ ܡܰܪܟܰܒܬܳܐ ܕܰܟܪ̈ܘ̣ܒܶܐ ܗܳܝ ܕܒܳܗ̇ ܡܶܙܕܰܝܰܚ ܐܰܢ̱ܬ ܒܰܫܡܰܝܳܐ ܦܰܐܝܘ̣ܬ ܐܰܠܳܗܳܐܝ̣ܬ ܥܰܡ ܝܳܠܘ̣ܕܳܟ: ܪܟܘ̣ܒܳܐ ܕܥܰܠ ܥܝ̣ܠܳܐ ܫܝ̣ܠܳܐ ܘܫܝ̣ܛܳܐ ܕܰܠܪܳܡܘ̣ܬܳܐ ܘܰܢܦܝ̣ܚܘ̣ܬܳܐ ܕܳܐܟܶܠܩܰܪܨܳܐ ܘܰܕܫܺܐܕ̈ܶܐ ܬܶܣܚܘ̣ܦ ܘܬܶܗܓܘ̣ܡ: ܘܰܠܥܰܡ̱̈ܡܶܐ ܕܰܣܚܝ̣ܦܝ̣ܢ ܗܘܰܘ ܘܰܥܓܝ̣ܢܝ̣ܢ ܒܓܘ̣ܡܳܨܳܐ ܘܚܰܒܳܪܳܐ ܘܡܰܦܘ̣ܠܬܳܐ ܕܰܚܛܝ̣ܬܳܐ ܘܰܕܛܳܥܝܘ̣ܬܳܐ ܕܰܦܬܰܟܪ̈ܶܐ ܘܦܳܠܚܘ̣ܬܳܐ ܕܫܺܐܕ̈ܶܐ ܬܩܝ̣ܡ ܘܬ̣ܶܬܪܘ̣ܨ: ܘܰܠܘܳܬ ܛܰܝܒܘ̣ܬܳܐ ܕܣܝ̣ܡܰܬ݀ ܒܢܰܝ̈ܳܐ ܩܰܕܡܳܝܬܳܐ ܬ̣ܥܰܠܶܐ ܘܬ̣ܰܦܢܶܐ ܠܗܽܘܢ ܘܦܰܪܶܗܣܺܝܰܐ ܕܝ̣ܠܳܟ ܗܳܕܶܐ ܬ̣ܫܰܟܶܢ: ܘܒܰܒ̈ܢܳܬ ܩ̈ܳܠܶܐ ܕܫܘ̣ܒܚܳܐ ܕܰܦ̇ܐܶܐ̣ ܠܰܐܠܳܗܳܐ ܕܚܰܝ̈ܠܰܘܳܬܳܐ ܥܶܠ̈ܳܝܶܐ ܘܰܫܡܰܝܳܢ̈ܶܐ ܢ̣ܫܰܒܚܽܘܢ ܘܰܢ̣ܩܰܠܣܽܘܢ ܠܡܰܥܰܠܬܳܟ ܒܣܰܘ̈ܟܶܐ ܕܙܰܝ̈ܬܶܐ ܘܰܕܕܶܩ̈ܠܶܐ: ܘܰܕܢ̣ܶܕܥܽܘܢܳܟ ܕܺܐܝܬܰܝܟ ܐܰܠܳܗܳܐ ܫܰܪܝ̣ܪܳܐ ܘܰܡܪܰܚܡܳܢܳܐ ܟܰܕ ܡܰܙܥܩܝ̣ܢܰܢ ܘܳܐܡ̇ܪܝ̣ܢܰܢ: ܡܒܰܪܟܳܐ ܐܝ̣ܬܰܘܗ̱ܝ ܗܰܘ̇ ܕܳܐܬܶܐ ܒܰܫܡܶܗ ܕܡܳܪܝܳܐ ܐܘ̣ܫܰܥܢܳܐ ܒܰܡܪ̈ܰܘܡܶܐ: ܩܰܒܶܠ ܡܳܪܝܳܐ ܡܶܢܰܢ ܕܠܰܢ ܚܰܛܳܝ̈ܶܐ ܘܰܒܨܝ̣ܪ̈ܶܐ ܥܶܛܪܳܐ ܗܳܢܳܐ ܕܒܶܣ̈ܡܶܐ ܠܺܐܝ̣ܩܳܪܳܐ ܕܡܳܪܘ̣ܬܳܟ ܥܰܡ ܒܳܥ̈ܘܳܬܳܐ ܘܬܰܟ̈ܫܦܳܬܳܐ ܕܝ̣ܠܰܢ ܘܰܕܟܽܠܗܽܘܢ ܝܰܠ̈ܕܶܝܗ̇ ܕܥܺܕܬܳܐ ܩܰܕܝ̣ܫܬܳܐ: ܗܳܠܶܝܢ ܕܰܐܫܘܝ̣ܘ ܠܰܢ ܪ̈ܰܚܡܰܝܟ ܠܰܡܩܰܪܳܒܘ̣ ܠܳܟ ܒܝܰܘܡܳܐ ܗܳܢܳܐ ܕܥ̱ܘ̣ܗܕܳܢܳܐ ܕܡܰܥܰܠܬܳܟ ܡܰܠܝܰܬ݀ ܪ̈ܰܚܡܶܐ: ܘܰܐܫܘܳܐ ܠܰܢ ܘܰܠܗܽܘܢ ܕܥܰܡ ܓܰܠܝܘ̣ܬ ܐܰܦ̈ܶܐ ܕܥܰܒ̈ܕܶܐ ܛܳܒ̈ܶܐ ܘܗܰܝܡܳܢܘ̣ܬܳܐ ܬܪܝ̣ܨܬܳܐ ܢ̇ܶܦܘ̣ܩ ܠܐܘ̣ܪܥܳܟ ܒܫܘ̣ܠܳܡܗܽܘܢ ܕܙܰܒ̈ܢܶܐ ܡܳܐ ܕܳܐܬܶܐ ܐܰܢ̱ܬ ܕܬ̣ܶܦܪܘ̣ܥ ܠܟܽܠܢܳܫ ܐܰܝܟ ܥܒ̈ܳܕܰܘܗ̱ܝ: ܘܥܰܡ ܫܘ̣ܒܚܳܐ ܘܩܘ̣ܒܳܠܛܰܝܒܘ̣ܬܳܐ ܢܺܐܡܰܪ: ܐܘ̣ܫܰܥܢܳܐ ܒܰܡܪ̈ܰܘܡܶܐ ܡܒܰܪܟܳܐ ܐܝ̣ܬܰܝܟ ܗܰܘ̇ ܕܶܐܬ̣ܳܐ ܘܚ̣ܰܪܰܪ ܠܰܢ ܡ̣ܶܢ ܛܳܥܝܘ̣ܬܳܐ: ܘܡ̣ܶܢ ܫܘ̣ܥܒܳܕܳܐ ܕܰܚܛܝ̣ܬܳܐ ܘܕܳܐܟܶܠܩܰܪܨܳܐ ܘܰܕܫܺܐܕ̈ܶܐ: ܘܳܐܬܶܐ ܬܘ̣ܒ ܡܶܛܽܠ ܩܝܳܡܬܳܐ ܘܦܽܘܢܳܝܳܐ ܕܝ̣ܠܰܢ: ܘܡܰܥܰܠܬܳܐ ܕܰܠܡܰܠܟܘ̣ܬܳܐ ܒܛܰܝܒܘ̣ܬܳܐ ܘܰܒܪ̈ܰܚܡܶܐ ܘܰܒܪܶܚܡܰܬ݀ ܐ̱ܢܳܫܘ̣ܬܳܟ ܘܒܰܫܦܝ̣ܥܘ̣ܬ ܪ̈ܰܚܡܰܝܟ: ܘܰܒܫܰܦܝ̣ܪܘ̣ܬ ܨܶܒܝܳܢܳܐ ܕܰܐܒܘ̣ܟ ܣܓܝ̣ܕܳܐ ܘܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀