ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܚܰܠܝܽܘ̣ܬ ܢܶܥ̈ܡܳܬܳܐ ܕܡ̣ܶܢ ܚܘ̣ܫ̈ܳܒܶܐ ܫܦܰܝ̈ܳܐ: ܘܠܶܒܰܘ̈ܳܬܳܐ ܫܰܒܪ̈ܳܝܶܐ: ܕܰܡܚܰܪܪܝ̣ܢ ܡ̣ܶܢ ܟܽܠ ܒܝ̣ܫܬܳܐ ܘܰܨܢܝ̣ܥܘ̣ܬܳܐ ܥܳܠܡܳܢܳܝܬܳܐ ܢܶܫ̇ܬܘܶܐ ܕܰܢ̇ܩܰܪܶܒ ܠܳܟ ܡܳܪܝܳܐ ܐܰܠܳܗܳܐ: ܘܗܰܒܠܰܢ ܕܟܰܕ ܪ̈ܳܘܙܳܢ ܒܰܦܨܝ̣ܚܘ̣ܬܳܐ ܡܝܰܬܪ̈ܳܢ: ܢ̇ܶܦܓܰܥ ܒܳܟ ܒܝܰܘܡܳܐ ܕܡܶܬܓܰܠܝܳܢܘ̣ܬܳܐ ܕܝ̣ܠܳܟ ܕܬܰܪܬܶܝܢ: ܘܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܬܶܫܒܽܘ̣ܚܬܳܐ: ܠܗܰܘ̇ ܡܥܰܠܝܳܐ ܕܰܡܥܰܠܰܝ ܡ̣ܶܢ ܡܰܠܰܐܟ̈ܶܐ ܐܰܠܳܗܳܐܝ̣ܬ: ܘܰܠܥܶܠ ܡ̣ܶܢ ܟܽܠܗܽܘܢ ܪ̈ܰܘܡܶܐ ܓܢܝ̣̈ܙܶܐ ܡܶܬܓܰܝܰܐܐ ܒܺܐܝܬܘ̣ܬܶܗ: ܗܰܘ̇ ܕܥܰܠ ܡܰܪܟܰܒܬܳܐ ܕܚܝ̣ܠܬܳܐ: ܘܓܝ̣ܓ̈ܠܶܐ ܢܘ̣ܪ̈ܳܢܳܝܳܬܳܐ ܡܳܪܳܢܳܐܝ̣ܬ ܡܶܫܬܰܒܰܚ ܘܡ̣ܶܢ ܬܶܓܡ̈ܶܐ ܠܳܐ ܗܘ̣ܠ̈ܳܢܳܝܶܐ ܕܢܘ̣ܪܳܐ ܘܰܕܪܘ̣ܚܳܐ ܡܶܣܬܓܶܕ ܘܡܶܬܗܰܕܰܪ: ܝܰܘܡܳܢܳܐ ܒܬܶܗܪܳܐ ܘܰܠܥܶܠ ܡ̣ܶܢ ܡܶܠܬܳܐ ܥܰܠ ܥܝ̣ܠܳܐ ܫܝ̣ܛܳܐ ܘܰܡܡܰܟܟܳܐ ܐܶܬ̣ܝܰܩܰܪ ܪܟ̥ܘ̣ܒܶܗ ܘܰܒܙܰܘܚܳܐ ܕܬܶܫܒܘ̣ܚܬܳܐ ܕܰܛܠܳܝ̈ܶܐ ܘܰܫܒܪ̈ܶܐ ܐܶܙܕܰܝܰܚ ܕܢ̣ܶܥܘ̣ܠ ܠܐܘ̣ܪܫܠܶܡ ܐܰܝܟܰܢܳܐ ܕܰܢ̣ܪܰܡܪܶܡ ܠܫܶܦܠܶܗ ܕܳܐܕܳܡ ܪܝ̣ܫ ܛܘ̣ܗ̈ܡܶܐ ܕܶܐܬ̣ܡܰܟܰܟ ܒܝܰܕ ܥܒܳܪ ܦܘ̣ܩܕܳܢܳܐ ܕܰܒܦܰܪܕܰܝܣܳܐ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܪܰܡܫܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܐܰܠܳܗܳܐ ܡܪܰܝܡܳܐ ܗܕܝ̣ܪ ܒܬܶܫܒ̈ܚܳܬܳܐ ܘܰܡܥܰܠܝܳܐ ܘܰܡܫܰܒܚܳܐ ܘܰܡܒܰܪܟܳܐ ܕܘ̣ܡܪܳܐ ܠܳܐ ܡܶܬܦܰܫܩܳܢܳܐ: ܗܰܘ̇ ܕܒܰܥ̈ܢܳܢܶܐ ܫܩܝ̣ܠ ܐܰܢ̱ܬ ܘܥܰܠ ܟܶܢ̈ܦܶܐ ܕܪܘ̣ܚܳܐ ܝܳܬܶܒ ܐܰܢ̱ܬ ܘܥܰܠ ܚܰܨܳܐ ܕܰܟܪ̈ܘ̣ܒܶܐ ܡܶܙܕܰܝܰܚ ܐܰܢ̱ܬ: ܗܰܘ̇ ܕܪܘ̣ܚܳܢܳܐܝ̣ܬ ܡܶܫܬܰܒܰܚ ܐܰܢ̱ܬ ܘܩܘ̣ܕ̈ܫܶܐ ܫܦܰܝ̈ܳܐ ܡܩܰܒܶܠ ܐܰܢ̱ܬ: ܗܰܘ̇ ܕܣܳܡ̣ܬܳܝܗ̱ܝ ܒܦܘ̣ܡܳܐ ܕܣܳܦܪ̈ܶܐ: ܗܰܘ̇ ܕܰܒܟܶܢ̈ܫܶܐ ܫܦܰܝ̈ܳܐ ܕܰܒܢܰܝ̈ ܢܘ̣ܗܪܳܐ ܡܶܬܗܰܠܰܠ ܐܰܢ̱ܬ: ܗܳܢܽܘܢ ܕܰܩܢ̣ܰܝܬ ܐܶܢܽܘܢ ܒܒܳܪܘ̣ܝܘ̣ܬܳܟ ܢܘ̣ܗܪܳܐ ܘܩܳܠܳܐ ܘܕܰܟܝܽܘ̣ܬܳܐ: ܗܰܘ̇ ܕܰܒܝܰܕ ܢܒܺܝ̈ܶܐ ܕܝ̣ܠܳܟ ܩܰܕܝ̣̈ܫܶܐ ܫܰܘܕܰܥ̣ܬ ܠܥܳܠܡܳܐ ܐ̱ܪܳܙܳܐ ܕܡܶܐܬܝ̣ܬܳܟ ܦܳܪܘ̣ܩܳܝܬܳܐ ܘܰܓܡ̣ܰܪܬ ܒܰܩܢܘ̣ܡܳܟ ܫܰܪܝ̣ܪ̈ܳܬܳܐ ܠܡܶܠܰܝ̈ܗܽܘܢ ܚܰܬܝ̣̈ܬܳܬܳܐ ܠܦ̈ܶܠܳܐܬܗܽܘܢ ܘܚܰܘܝ̣ܬ ܐܶܢܶܝܢ ܒܝܰܕ ܡܶܬܓܰܠܝܳܢܘ̣ܬܳܟ ܕܒܰܒܣܰܪ: ܐܰܢ̱ܬ ܗܰܘ̇ ܕܒܰܢܒܺܝܽܘܬܶܗ ܕܕܰܘܝ̣ܕ ܡܶܬܢܰܨܰܪ ܗ̱ܘܰܝܬ ܘܰܒ̈ܩܳܠܶܐ ܕܰܙܟܰܪܝܳܐ ܡܶܙܕܰܡܰܪ ܗ̱ܘܰܝܬ: ܗܰܘ̇ ܕܡ̣ܶܢ ܝܰܥܩܘ̣ܒ ܡܶܬܒܰܕܰܩ ܗ̱ܘܰܝܬ: ܘܡ̣ܶܢ ܐܶܫܰܥܝܳܐ ܓܰܠܝܳܐܝ̣ܬ ܡܶܬܚܰܘܶܐ ܗ̱ܘܰܝܬ: ܠܨܶܗܝܽܘܢ ܡܰܪܳܚܬܳܐ ܘܓܘ̣ܡܕܳܢܝ̣ܬܳܐ ܗܳܝ ܕܶܐܫ̣ܕܰܬ݀ ܐܶܕܢܶܝ̈ܗ̇ ܡ̣ܶܢ ܡ̈ܶܠܶܐ ܐܰ‌ܠܳܗܳܝ̈ܳܬܳܐ ܘܡ̣ܶܢ ܒܢ̈ܳܬ ܩ̈ܳܠܶܐ ܢܒܺܝ̈ܳܝܳܬܳܐ: ܐܰܢ̱ܬ ܗܳܟܝ̣ܠ ܡܳܪܝܳܐ ܒܝܰܕ ܡܶܬܒܰܪܢܫܳܢܘ̣ܬܳܟ ܘܡܘ̣ܟܳܟܳܟ ܕܨܶܝܕܰܝܢ ܟܰܕ ܡܶܛܽܠ ܦܘ̣ܪܩܳܢܶܗ ܕܳܐܕܳܡ ܬ̣ܶܣܒܘ̣ܠ ܚܰܫ̈ܶܐ ܘܰܨܠܝ̣ܒܳܐ ܘܡܰܘܬܳܐ ܒܐܘ̣ܪܫܠܶܡ ܨܒ̣ܰܝܬ ܫ̣ܰܕܰܪܬ ܠܬܰܠܡܝ̣̈ܕܶܐ ܕܝ̣ܠܳܟ ܩܰܕܝ̣̈ܫܶܐ ܘܡܰܟܪ̈ܙܳܢܶܐ ܕܡܰܠܟܘ̣ܬܳܐ ܕܝ̣ܠܳܟ ܘܰܐܝܬܝ̣ܘ ܥܝ̣ܠܳܐ ܠܰܪܟܘ̣ܒܳܐ ܕܝ̣ܠܳܟ ܗܰܘ̇ ܕܡ̣ܶܢ ܙܟܰܪܝܳܐ ܒܰܪ ܒܪܰܟܝܳܐ ܐܶܬ̣ܡܬܶܠ ܕܰܥܠܰܘܗ̱ܝ ܬ̣ܙܰܝܰܚ ܪܰܒܘ̣ܬܳܟ: ܐܰܝܟ ܕܥܰܠ ܡܰܪܟܰܒܬܳܐ ܕܰܟܪ̈ܘ̣ܒܶܐ ܘܬ̣ܶܐܣܘ̣ܪ ܒܡܘ̣ܟܳܟܳܟ ܠܪܳܡܘ̣ܬܳܐ ܕܝܘ̣̈ܕܳܝܶܐ ܡܫܰܩ̈ܠܶܐ ܘܙܰܠ̈ܝ̣ܠܶܐ: ܟܰܕ ܕܶܝܢ ܥܰܠ ܒܰܪ ܐܰܬܳܢܳܐ ܝ̣ܬܶܒ̣ܬ ܘܰܒܢܰܚ̈ܬܶܐ ܕܥܰܡ̱̈ܡܶܐ ܐܶܬܝܰܩ̣ܰܪܬ ܘܰܒܠܶܥ̈ܙܶܐ ܕܰܛܠܳܝ̈ܶܐ ܐܶܫܬܰܒܰܚ̣ܬ: ܘܒܰܚ̈ܕܘ̣ܓܶܐ ܠܳܐ ܡܟܰܬܡ̈ܶܐ ܐܶܬܩܰܒܰܠ̣ܬ: ܘܰܒܣܰܘ̈ܟܶܐ ܘܬܶܫܒ̈ܚܳܬܳܐ ܐܶܙܕܰܝܰܚ̣ܬ: ܐܶܬ̣ܝܰܕܥܰܬ݀ ܗܰܝܡܳܢܘ̣ܬܳܟ ܚܕܳܪ̈ܰܝܟ ܘܶܐܬ̣ܓܰܠܝܰܬ݀ ܪܰܒܘ̣ܬܳܟ ܠܟܽܠ ܐ̱ܢܳܫ: ܕܕܝ̣ܠܳܟ ܐܶܢܽܘܢ ܫܡܰܝ̈ܳܐ ܘܐܰܪܥܳܐ ܘܫܘ̣ܒܚܳܐ ܘܐܝ̣ܩܳܪܳܐ ܘܰܕܪܳܥܳܐ ܘܓܰܢ̱ܒܳܪܘ̣ܬܳܐ: ܐܶܠܳܐ ܡܦܝ̣ܣܝ̣ܢܰܢ ܠܳܟ ܐܳܘ ܡܳܪܝܳܐ ܡܫܰܒܚܳܐ ܘܩܰܕܝ̣ܫܳܐ ܥܢܝ̣ ܠܰܡܚܝ̣ܠܘ̣ܬܰܢ ܘܩܰܒܶܠ ܨܠܰܘ̈ܳܬܰܢ ܘܦܝ̣ܪܡܳܐ ܕܡ̣ܶܢ ܚܰܝܳܒܘ̣ܬܰܢ ܡܶܬܩܰܪܰܒ ܠܳܟ ܒܥܺܐܕܳܐ ܗܳܢܳܐ ܕܥ̱ܘ̣ܗܕܳܢܳܐ ܕܡܰܥܰܠܬܳܟ ܡܰܠܝܰܬ݀ ܪ̈ܰܚܡܶܐ ܕܠܐܘ̣ܪܫܠܶܡ: ܘܗܰܒܠܰܢ ܕܒܰܪܘܳܙܳܐ ܕܗܰܘ̈ܢܰܝܢ ܘܰܒܣܘ̣ܟܳܠܳܐ ܕܪ̈ܶܥܝܳܢܰܝܢ ܘܰܒܫܘ̣ܒܚܳܐ ܕܦܘ̣̈ܡܰܝܢ ܘܰܒܕܰܟܝܽܘ̣ܬܳܐ ܕܩܳܠܰܝ̈ܢ ܫܰܦܝܳܐܝ̣ܬ ܘܩܰܕܝ̣ܫܳܐܝ̣ܬ ܘܪܘ̣ܚܳܢܳܐܝ̣ܬ ܢ̇ܚܰܓܝ̣ܘܗ̱ܝ ܠܝܰܘܡܳܐ ܗܳܢܳܐ ܩܰܕܝ̣ܫܳܐ ܟܰܕ ܐܳܡܪܝ̣ܢܰܢ ܥܰܡ ܚܰܕܘ̣ܬܳܐ: ܒܪܝ̣ܟܳܐܗ̱ܝ ܡܰܠܟܘ̣ܬܳܟ ܡܰܠܟܳܐ ܕܰܠܥܳܠܡ̈ܝ̣ܢ: ܒܪܝ̣ܟܳܐ ܗ̱ܝ ܡܶܐܬܝ̣ܬܳܟ ܐܝ̣ܬܝܳܐ ܕܡ̣ܶܢ ܥܳܠܰܡ ܒܪܝ̣ܟܳܐ ܗ̱ܝ ܛܰܝܒܘ̣ܬܳܟ ܝܶܫܘ̣ܥ ܦܳܪܘ̣ܩܰܢ: ܒܪܝ̣ܟ ܗ̱ܘ̣ ܐܝ̣ܩܳܪܳܟ ܡ̣ܶܢ ܐܰܬܪܳܟ ܘܰܒܪܝ̣ܟܝ̣ܢ ܪ̈ܰܚܡܶܐ ܕܫܰܠܚܘ̣ܟ ܠܘܳܬ ܓܶܢܣܰܢ: ܐܰܘܪܶܒ ܡܳܪܝ̱ ܠܥܺܕܬܳܟ ܒܬܶܫܒ̈ܚܳܬܳܐ ܘܰܐܥܬܰܪܶܝܗ̇ ܒܰܙܡܝ̣ܪ̈ܳܬܳܟ: ܣܥܘ̣ܪܶܝܗ̇ ܒܪ̈ܰܚܡܰܝܟ ܘܰܡܠܝ̣ܗ̇ ܓܰܙܳܐ ܕܡܰܘܗܰܒܬܳܟ ܦܪܘ̣ܩܶܝܗ̇ ܡ̣ܶܢ ܪ̈ܰܘܒܶܐ ܫܓܝ̣̈ܫܶܐ ܘܡ̣ܶܢ ܟܽܠ ܙܰܒ̈ܢܶܐ ܕܐܘ̣ܠܨܳܢܳܐ: ܐܰܫܰܪ ܫܘ̣ܘܕܳܝܳܟ ܠܘܳܬܳܗ̇ ܘܰܐܣܓܳܐ ܒܓܰܘܳܗ̇ ܫܘ̣ܒܩܳܢܳܐ: ܨܰܒܶܬ ܥܘ̣ܒܳܗ̇ ܒܥܘ̣ܕܪ̈ܳܢܰܝܟ ܡܬܘ̣ܚ ܣܶܕܪ̈ܶܝܗ̇ ܥܰܠ ܟܽܠ ܥܰܡ̈ܡܝ̣ܢ ܘܓܘ̣̈ܕܶܐ ܕܰܒܢܶܝ̈ܗ̇ ܒܟܽܠ ܣܰܘ̈ܦܝ̣ܢ: ܗܰܕܰܪܶܝܗ̇ ܒܰܦܬܝ̣ܟܘ̣ܬ ܟܶܢܫܳܐ ܕܰܡܗܰܝ̈ܡܢܶܐ ܕܕܳܝܨܝ̣ܢ ܩܕܳܡܰܝܟ ܒܝܰܘܡܳܐ ܕܥܰܕܥܺܐܕܳܟ ܢܰܨܝ̣ܚܳܐ ܘܰܫܒܝ̣ܚܳܐ: ܢ̣ܰܙܥܩܽܘܢ ܩܘ̣̈ܠܳܣܶܐ ܕܪܰܒܘ̣ܬ ܦܰܐܝܘ̣ܬܳܐ ܠܳܟ ܡܳܪܝ̱ ܘܒܺܐܝ̈ܕܰܝܟ ܘܥܰܡܳܟ ܠܰܐܒܘ̣ܟ ܕܫܰܠܚܳܟ ܠܦܘ̣ܪܩܳܢܰܢ ܘܰܠܪܘ̣ܚܳܟ ܚܰܝܳܐ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܛܰܝܶܒ ܠܟܽܠܰܢ ܡܳܪܝܳܐ ܐܰܠܳܗܳܐ ܕܕܰܟܝܳܐܝ̣ܬ ܘܩܰܕܝ̣ܫܳܐܝ̣ܬ ܕܰܠܢܰܚ̈ܬܶܐ ܕܡܶܫܬܘ̣ܬܳܐ ܫܡܰܝܳܢܝ̣ܬܳܐ ܢ̇ܶܬܥܰܛܰܦ: ܘܢ̣ܶܒܣܰܡ ܠܳܟ ܪܝ̣ܚܳܐ ܕܦܝ̣ܪܡܰܢ ܘܰܨ̈ܠܰܘܳܬܰܢ ܘܬܰܟܫ̈ܦܳܬܰܢ ܗܰܢܺܝܳܐܝ̣ܬ ܢ̣ܶܬܩܰܒܠܽܘܢ ܩܕܳܡܰܝܟ: ܟܰܕ ܡܫܰܟܶܢ ܐܰܢ̱ܬ ܠܰܢ ܡܳܪܝ̱ ܐܳܣܝܘ̣ܬܳܐ ܕܢܰܦܫܳܐ ܘܰܕܦܰܓܪܳܐ ܘܡܰܥܒܰܪ ܐܰܢ̱ܬ ܡܶܢܰܢ ܟܽܠ ܫܚܳܩ̈ܶܐ ܘܕܘ̣̈ܘܳܢܶܐ: ܟܽܠ ܢܶܟܠܳܐ ܘܰܚܣܳܡܳܐ ܘܟܽܠ ܚܰܫܳܐ ܡܰܟܝܳܢܳܐ: ܘܰܡܕܰܟܶܐ ܐܰܢ̱ܬ ܠܬܰܪܥܝ̣ܬܰܢ ܡ̣ܶܢ ܟܽܠ ܚܘ̣ܫ̈ܳܒܶܐ ܡܥܰܪ̈ܦܳܢܶܐ ܕܥܰܘܠܳܐ ܘܰܐܟܣܘ̣ܪ̈ܝ̣ܣܬܝ̣ܢܶܐ ܥܳܒܶܕ ܐܰܢ̱ܬ ܠܗܽܘܢ ܡ̣ܶܢ ܢܰܦ̈ܫܳܬܰܢ: ܐܰܝܟ ܕܠܰܡܥܰܪ̈ܦܳܢܶܐ ܕܗܳܝܕܶܝܟ ܡ̣ܶܢ ܗܰܝܟܠܳܐ ܕܝ̣ܠܳܟ ܩܰܕܝ̣ܫܳܐ: ܟܰܕ ܡܫܰܟܶܢ ܐܰܢ̱ܬ ܠܰܢ ܚܘ̣ܣܳܝܳܐ ܕܚܰܘ̈ܒܶܐ ܘܫܘ̣ܒܩܳܢܳܐ ܕܰܚ̈ܛܳܗܶܐ ܕܘ̣ܟܪܳܢܳܐ ܛܳܒܳܐ ܠܟܽܠܗܽܘܢ ܥܰܢܝ̣̈ܕܶܐ ܡܗܰܝ̈ܡܢܶܐ ܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀