ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܕܕܰܟܝ̣ ܓܰܪ̈ܒܶܐ ܒܝܰܕ ܡܶܠܬܶܗ ܡܰܨܝܰܬ݀ ܟܽܠ: ܘܚܰܝܶܨ ܠܰܡܫܰܪ̈ܰܝܳܐ ܒܛܰܝܒܘ̣ܬܶܗ ܒܳܪܝܰܬ݀ ܟܽܠ: ܗܰܘ̇ ܕܗܰܠ̣ܶܟ ܥܰܠ ܓܰܠ̱ܠ̈ܰܘܗ̱ܝ ܕܝܰܡܳܐ ܒܫܘ̣ܠܛܳܢܳܐ ܕܪܰܒܘ̣ܬܶܗ: ܘܦܰܬ̣ܰܚ ܠܰܣ̈ܡܰܝܳܐ ܒܚܰܝܠܬܳܢܘ̣ܬܶܗ: ܗܰܘ̇ ܕܩ̣ܰܕܶܫ ܠܛܰܡ̈ܶܐܐ ܒܙܘ̣ܦܳܐ ܕܰܚܢܳܢܶܗ: ܘܚܰܘܰܪ ܟܘ̣ܬܡ̈ܳܬܳܐ ܕܚܰܛܳܝ̈ܶܐ ܒܚܰܝܽܘ̣ܣܬܳܢܘ̣ܬܶܗ: ܗܰܘ̇ ܕܬܰܠ̣ܡܶܕ ܠܨܰܝܳܕ̈ܶܐ ܘܠܳܐ ܣܦܝ̣ܪ̈ܶܐ ܠܟܳܪܘ̣ܙܘ̣ܬܳܐ ܕܰܣܒܰܪܬܶܗ: ܘܢܰܚ̣ܶܡ ܠܥܰܢܝ̣̈ܕܶܐ ܒܚܝ̣ܠ ܐܰܠܳܗܘ̣ܬܶܗ ܕܠܶܗ ܢ̇ܶܬܕܟܰܪ ܘܠܶܗ ܢ̇ܫܰܒܰܚ ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܩܰܘܡܳܐ ܩܰܕܡܳܝܳܐ ܕܠܺܠܝܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܝܰܡܳܐ ܕܪ̈ܰܚܡܶܐ ܘܕܰܚܢܳܢܳܐ ܡܳܪܝܳܐ: ܬܗܘ̣ܡܳܐ ܠܳܐ ܡܶܬܡܰܠܠܳܢܳܐ ܕܥܘ̣ܕܪ̈ܳܢܶܐ ܘܓܰܙܳܐ ܠܳܐ ܡܶܣܬܰܝܟܳܢܳܐ ܕܫܘ̣ܘ̈ܟܳܢܶܐ: ܠܡܺܐܢܳܐ ܘܢܰܘܚܳܐ ܕܰܡܛܰܪ̈ܦܶܐ: ܒܶܝܬ ܓܰܘܣܳܐ ܘܣܘ̣ܝܳܥܳܐ ܕܰܪ̈ܕܝ̣ܦܶܐ: ܢܦܺܐܫܳܐ ܘܰܪܘܳܚܬܳܐ ܕܰܐܠܝ̣̈ܨܶܐ: ܣܰܒܪܳܐ ܘܬܘ̣ܟܠܳܢܳܐ ܕܰܡ̈ܥܳܩܶܐ: ܒܘ̣ܝܳܐܳܐ ܘܚܰܕܘ̣ܬܳܐ ܕܰܐܒܝ̣̈ܠܶܐ: ܠܘ̣ܒܳܒܳܐ ܘܰܦܨܝ̣ܚܘ̣ܬܳܐ ܕܰܟܡܝ̣ܪ̈ܶܐ: ܥܳܨܘ̣ܒܳܐ ܘܡܰܚܠܡܳܢܳܐ ܕܰܬܒܝ̣ܪ̈ܶܐ: ܥܘ̣ܫܢܳܐ ܘܚܘ̣ܝܳܠܳܐ ܕܰܡܚܝ̣̈ܠܶܐ: ܡܣܰܡܟܳܢܳܐ ܘܰܡܩܰܝܡܳܢܳܐ ܕܢܰܦ̈ܠܶܐ ܐܳܣܝܳܐ ܫܰܪܝ̣ܪܳܐ ܕܢܰܦ̈ܳܫܳܬܳܐ ܘܰܕܦܰܓܪ̈ܶܐ: ܠܳܟ ܡܶܬܟܰܫܦܝ̣ܢܰܢ ܥܰܠ ܥܶܛܪܳܐ ܕܒܶܣ̈ܡܶܐ: ܐܰܢ̱ܬ ܛܳܒܳܐ ܘܒܰܣܝ̣ܡܳܐ ܫܡܰܥܝ̣ܗ̇ ܠܬܰܟܫܶܦܬܳܐ ܕܰܡܚܝ̣ܠܘ̣ܬܰܢ ܘܩܰܒܶܠ ܒܳܥ̈ܘܳܬܰܢ ܘܰܦܝܳܣܰܢ ܘܰܣܥܘ̣ܪ ܠܰܢ ܒܪ̈ܰܚܡܶܐ ܘܚܰܝܘ̣ܣܬܳܢܘ̣ܬܳܐ ܕܝ̣ܠܳܟ: ܘܰܐܩܶܦ ܠܰܢ ܐܳܣܝܘ̣ܬܳܐ ܪܰܒܬܳܐ ܘܥܰܫܝ̣ܢܬܳܐ ܘܪܰܚܶܡ ܥܰܠ ܟܽܠܰܢ ܚܰܢܳܢܳܐ ܘܪ̈ܰܚܡܶܐ: ܘܰܐܦܪܰܚ ܒܗܰܕܳܡ̈ܰܝܢ ܡܰܥܒܕܳܢܘ̣ܬܳܐ ܕܛܰܝܒܘ̣ܬܳܟ: ܘܝܰܡܝ̣ܢܳܟ ܡܠܰܝܬ ܥܘܽܕܪ̈ܳܢܶܐ ܗܳܝ ܕܶܐܬ̣ܬܣܝ̣ܡܰܬ݀ ܥܰܠ ܓܰܪ̈ܒܶܐ ܘܶܐܬܕܰܟܝ̣ܘ: ܘܥܰܠ ܡܰܟ̈ܰܐܒܶܐ ܘܶܐܬ̣ܰܐܣܝ̣ܘ: ܘܥܰܠ ܣܡܰܝ̈ܳܐ ܘܶܐܬ̣ܢܰܗܰܪܘ̱: ܘܥܰܠ ܡܫܰܪ̈ܰܝܳܐ ܘܶܐܫ̣ܬܰܪܰܪܘ̱: ܘܥܰܠ ܟܪ̈ܝ̣ܗܶܐ ܘܶܐܬܚܠ̣ܶܡܘ̱: ܗܝ̣ ܬ̣ܰܓܶܢܝ̱ ܥܠܰܝܢ ܘܬ̣ܶܪܕܘ̣ܦܝ̱ ܠܟܺܐܒ̈ܰܝܢ ܟܣܰܝ̈ܳܐ ܘܰܓܠ̈ܰܝܳܐ ܒܪ̈ܰܚܡܰܝܟ: ܘܰܬ̣ܛܰܠܶܩܝ̱ ܠܟܘܽܪ̈ܗܳܢܰܝܢ ܒܚܰܝܠܳܟ: ܘܬ̣ܰܚܠܶܡ ܗܰܕܳܡ̈ܰܝܢ ܒܳܐܣܝܘ̣ܬܳܟ: ܘܰܬ̣ܫܰܪܰܪܝ̱ ܪ̈ܶܓܫܰܝܢ ܒܣܳܥܘ̣ܪܘ̣ܬܳܟ: ܘܚܰܣܳܐ ܚܰܘ̈ܒܰܝܢ ܒܒܰܣܝ̣ܡܘ̣ܬܳܟ: ܘܰܫܒܘ̣ܩ ܠܰܢ ܣܰܟ̈ܠܘܳܬܰܢ ܒܰܡܪܰܚܡܳܢܘ̣ܬܳܟ: ܘܰܠܚܝ̣ ܚܛܳܗ̈ܰܝܢ ܒܚܰܘ̈ܣܳܢܰܝܟ: ܘܰܥܨܘ̣ܒ ܫܘ̣ܚ̈ܢܰܝܢ ܒܣܰܡ̱̈ܡܳܢܰܝܟ: ܘܰܐܣܳܐ ܫܘ̣̈ܡܳܬܰܢ ܒܰܚܢܳܢܳܟ: ܘܚܰܘܰܪ ܟܘ̣ܬܡ̈ܳܬܳܐ ܕܝ̣ܠܰܢ ܒܙܘ̣ܦܳܟ: ܘܩܰܕܶܫ ܢܰܦ̈ܫܳܬܰܢ ܒܪܘ̣ܚܳܟ ܘܙܰܗܳܐ ܬܰܪܥܝ̣ܬܰܢ ܒܚܘ̣ܒܳܟ ܘܚܰܙܶܩ ܠܰܩܢܘ̣ܡܰܢ ܒܥܘ̣ܫܢܳܟ: ܘܢܰܛܰܪ ܠܟܽܠܰܢ ܒܰܫܪܳܪܳܟ ܘܬܰܪܶܨ ܪ̈ܶܓܠܰܝܢ ܒܐܘܽܪ̈ܚܳܬܳܟ ܘܐܰܬܩܶܢ ܗܰܠ̈ܟܳܬܰܢ ܒܰܫܒܝ̣̈ܠܰܝܟ: ܘܡܰܢܰܥ ܡܰܪܕܝ̣ܬܰܢ ܠܰܠܡܺܐܢܳܟ: ܘܰܐܫܘܳܐ ܠܰܢ ܘܰܠܥܰܢܝ̣̈ܕܰܝܢ ܠܩܰܘܡܳܐ ܕܡ̣ܶܢ ܝܰܡܝ̣ܢܳܟ: ܘܠܰܪܘܳܙܳܐ ܘܕܰܘܨܳܐ ܕܰܓܢܽܘܢܟ ܘܰܠܢܘ̣ܗܪܳܐ ܘܚܰܕܘ̣ܬܳܐ ܕܦܰܪܨܘ̣ܦܳܟ: ܘܰܒܝܰܘܡܳܐ ܫܒܝ̣ܚܳܐ ܕܡܶܐܬܝ̣ܬܳܟ ܘܰܒܓܶܠܝܳܢܳܐ ܪܰܒܳܐ ܘܰܕܚܝ̣ܠܳܐ ܕܪܰܒܘ̣ܬܳܟ: ܒܚܰܝܠܳܟ ܪܰܒܳܐ ܡܶܣܬܰܥܪܝ̣ܢܰܢ ܘܰܒܥܘ̣ܕܪ̈ܳܢܰܝܟ ܡܶܬܰܐܣܶܝܢܰܢ ܘܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܡܰܣܩܝ̣ܢܰܢ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀