ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܚܰܝܶܕ ܘܚܰܠܶܛ ܠܩ̈ܳܠܶܐ ܘܒܳܥ̈ܘܳܬܳܐ ܘܚܶܢܓ̥̈ܳܬܳܐ: ܕܡ̣ܶܢ ܠܶܒܳܐ ܫܚܝ̣ܩܳܐ ܕܥܰܒ̈ܕܰܝܟ ܡܳܪܝܳܐ ܐܰܠܳܗܳܐ: ܒܥܶܕܳܢܳܐ ܗܳܢܳܐ ܡܶܬܬܰܘܝܳܢܳܐܝ̣ܬ ܡܶܬܩܰܪ̈ܒܳܢ ܩܕܳܡܰܝܟ: ܥܰܡ ܕܟܺܐܢ̈ܶܐ ܘܰܕܙܰܕܝ̣̈ܩܶܐ ܕܫܰܡܠܝ̣ܘ ܘܰܢ̣ܛܰܪܘ̱ ܠܦܘ̣ܩ̈ܕܳܢܰܝܟ ܩܰܕܝ̣̈ܫܶܐ: ܘܰܐܠܘܶܬ ܠܰܢ ܥܰܡܗܽܘܢ ܘܰܒܝܳܢܬܗܽܘܢ ܠܓܘ̣ܕܳܐ ܗܳܝ ܢܰܨܝ̣ܚܬܳܐ ܘܠܳܐ ܡܶܫܬܰܪܝܳܢܝ̣ܬܳܐ ܕܒܘ̣ܟܪ̈ܶܐ ܟܬܝ̣̈ܒܰܝ ܒܰܫܡܰܝܳܐ ܒܣܶܦܪܳܐ ܫܡܰܝܳܢܳܐ: ܐܰܒܳܐ ܘܰܒܪܳܐ ܘܪܘ̣ܚܳܐ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܪܝ̣ܚܳܐ ܗܰܢܺܝܳܐܐ ܕܦܰܐܝܘ̣ܬܳܐ ܡܬܘ̣ܡܳܝܬܳܐ ܘܰܐܠܳܗܳܝܬܳܐ: ܗܰܘ̇ ܕܺܐܝܬܰܘܗ̱ܝ ܡܕܰܟܝܳܢܳܐ ܘܡܳܪܘ̣ܩܳܐ ܕܨܳܐܝܘ̣ܬܳܐ ܐ̱ܢܳܫܳܝܬܳܐ: ܠܗܰܘ̇ ܡܗܰܕܝܳܢܳܐ ܕܰܠܘܳܬ ܛܳܒ̈ܬܳܐ: ܘܰܡܩܰܪܒܳܢܳܐ ܕܨܶܝܕ ܛܘ̣ܒܬܳܢܘ̣ܬܳܐ: ܠܗܰܘ̇ ܕܰܡܥܰܠܰܝ ܐܳܦ ܡ̣ܶܢ ܬܶܐܘܳܪܺܝܰܐ ܘܟܽܘ̈ܢܳܝܶܐ ܕܗܘ̣̈ܠܳܢܳܝܶܐ ܒܪ̈ܰܝܳܐ: ܘܰܒܚܘ̣ܒܳܐ ܡܶܬܪܟܶܢ ܠܰܡܩܰܒܳܠܘ̣ ܒܳܥ̈ܘܳܬܳܐ ܘܬܰܟܫ̈ܦܳܬܳܐ ܕܰܐܝܠܶܝܢ ܕܩܳܪܶܝܢ ܠܶܗ: ܒܩܘ̣ܫܬܳܐ ܘܰܒܠܶܒܳܐ ܫܚܝ̣ܩܳܐ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܨܰܦܪܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܟܰܕ ܒܰܫܦܺܝ̣ܥܽܘ̣ܬ ܪ̈ܰܚܡܰܝܟ ܣܰܓܺܝ̈ܶܐܐ ܘܰܒܫܰܦܝ̣ܪܘ̣ܬ ܥܘ̣ܕܪ̈ܳܢܰܝܟ ܕܰܠܘܳܬ ܓܶܢܣܰܢ ܡܶܬܒܰܩܶܝܢܰܢ ܐܳܘ ܐܰܒܳܐ ܡܬܘ̣ܡܳܝܳܐ: ܬܶܫܒ̈ܚܳܬܳܐ ܘܩ̈ܳܠܶܐ ܘܩܘ̣ܒܳܠܛܰܝܒܘܽܬܳܐ: ܥܰܡ ܥܶܛܪܳܐ ܗܰܢܺܝܳܐܐ ܘܪܝ̣ܚܳܐ ܒܰܣܝ̣ܡܳܐ ܡܩܰܪܒܝ̣ܢܰܢ ܠܥܘ̣ܬܪܳܐ ܕܰܡܪܰܚܡܳܢܘ̣ܬܳܟ: ܐܰܢ̱ܬ ܕܝܶܢ ܟܰܕ ܡܫܰܝܢܳܐܝ̣ܬ ܘܪܶܚܡܰܬ݀ ܐ̱ܢܳܫܳܐܝ̣ܬ ܘܒܰܣܝ̣ܡܳܐܝ̣ܬ ܠܘܳܬܰܢ ܡܶܬܚܰܫܰܚ ܐܰܢ̱ܬ : ܘܐܰܝܟ ܕܰܒܟܽܠܙܒܰܢ ܠܛܰܝܒܘ̣ܬܳܟ ܥܠܰܝܢ ܡܰܫܦܰܥ ܐܰܢ̱ܬ: ܗܦܘ̣ܟ ܦܰܢܳܐ ܠܰܢ ܥܰܡ ܣܘ̣ܓܳܐܐ ܕܰܚܢܳܢܳܟ ܪܘ̣ܚܳܐ ܡܕܰܟܝܳܢܳܐ ܕܚܰܘ̈ܒܶܐ ܘܕܰܚ̈ܛܳܗܶܐ ܕܟܽܠܰܢ: ܪܘ̣ܚܳܐ ܕܚܶܟܡܬܳܐ ܘܰܕܣܘ̣ܟܳܠܳܐ: ܪܘ̣ܚܳܐ ܕܡܰܚܫܰܒܬܳܐ ܘܰܕܓܰܢ̱ܒܳܪܘ̣ܬܳܐ: ܪܘ̣ܚܳܐ ܕܝ̣ܕܰܥܬܳܐ ܘܰܕܫܰܦܝ̣ܪܘ̣ܬ ܕܶܚܠܬܳܐ ܪܘ̣ܚܳܐ ܕܢܝ̣ܚܘ̣ܬܳܐ ܘܰܕܡܰܟܝ̣ܟܘ̣ܬܳܐ: ܪܘ̣ܚܳܐ ܕܪ̈ܰܚܡܶܐ ܘܰܕܪܘ̣ܚܳܦܳܐ ܘܰܕܚܘ̣ܒܳܐ ܫܰܪܝ̣ܪܳܐ ܕܰܠܘܳܬܳܟ ܘܰܠܘܳܬ ܚܕܳܕ̈ܶܐ: ܟܰܕ ܒܶܗ ܡܨܰܒܶܬ ܐܰܢ̱ܬ ܘܰܡܗܰܕܰܪ ܐܰܢ̱ܬ ܟܽܠܗܽܘܢ ܙܰܘ̈ܥܶܐ ܘܡܰܚ̈ܫܒܳܬܳܐ ܕܝ̣ܠܰܢ: ܘܰܕܫܳܘܶܝܢ ܠܰܓܙܳܪܳܐ ܩܰܕܝ̣ܫܳܐ ܥܰܬܶܕ ܠܰܢ ܘܶܐܡܪ̈ܶܐ ܬܰܡܝ̣̈ܡܶܐ ܕܡܰܪܥܝ̣ܬܳܟ ܘܰܠ̈ܟܺܐܒܶܐ ܢܰܦ̈ܫܳܢܳܝܶܐ ܘܦܰܓܪ̈ܳܢܳܝܶܐ ܕܝ̣ܠܰܢ ܐܰܣܳܐ ܒܰܥܨܳܒܳܐ ܕܪ̈ܰܚܡܰܝܟ: ܘܠܰܡܚܝ̣ܠܘ̣ܬܳܢ ܣܡܘ̣ܟ ܒܰܫܪܳܪܳܟ: ܘܰܠܟܰܣ̈ܝܳܬܳܐ ܘܓܰܠ̈ܝܳܬܳܐ ܕܝ̣ܠܰܢ ܕܰܟܳܐ ܘܩܰܕܶܫ: ܘܰܠܥܰܣ̈ܩܳܬܳܐ ܘܡܰܪ̈ܕܘܳܬܳܐ ܕܰܥܠܰܝܢ ܒܰܛܶܠ ܒܰܚܢܳܢܳܟ: ܘܗܰܝܡܳܢܘܽܬܳܐ ܘܣܰܒܪܳܐ ܘܚܘ̣ܒܳܐ ܕܝ̣ܠܳܟ ܢ̣ܰܒܪܶܫ: ܘܟܽܠܫܳܥ ܒܥܘ̣ܗܕܳܢܳܐ ܕܝ̣ܠܳܟ ܘܰܐܝܠܶܝܢ ܕܺܐܝܬܰܝܗܶܝܢ ܚܳܫ̈ܚܳܬܳܐ ܘܳܐܠ̈ܨܳܝܳܬܳܐ ܕܣܘ̣̈ܢܩܳܢܶܐ ܕܝ̣ܠܰܢ ܘܕܰܐܚ̈ܰܝܢ ܕܰܒܟܽܠ ܐܰܬܰܪ ܡܶܬܓܰܘܣܝ̣ܢ ܒܰܫܡܳܟ ܩܰܕܝ̣ܫܳܐ ܛܰܝܶܒ ܘܫܰܡܠܳܐ ܒܛܰܝܒܘ̣ܬܳܟ: ܘܰܙܓܘ̣ܪ ܘܒܰܛܶܠ ܡܶܢܰܢ ܒܬܰܩܝ̣ܦܘ̣ܬ ܚܰܝܠܳܟ ܠܟܽܠܶܗ ܩܪܳܒܳܐ ܩܰܫܝܳܐ ܘܬܰܟܬܘ̣ܫܳܐ ܐܰܡܝ̣ܢܳܐ ܕܪ̈ܘ̣ܚܶܐ ܕܡܰܪܳܚܘ̣ܬܳܐ: ܘܰܐܩܝ̣ܡ ܢܳܛܘ̣ܪ̈ܶܐ ܠܰܢ ܠܕܳܚ̈ܠܰܝܟ ܡܰܫܪ̈ܝܳܬܳܐ ܡܰܠܰܐܟܳܝ̈ܳܬܳܐ: ܘܡܳܐ ܕܫܳܦܰܪ ܠܨܶܒܝܳܢܳܟ ܛܳܒܳܐ ܕܢ̣ܰܓܗܶܐ ܡ̣ܶܢ ܚܰܝ̈ܶܐ ܗܳܠܶܝܢ ܕܰܬܢܳܢ: ܩܰܒܶܠ ܠܰܢ ܒܡܰܫܪ̈ܝܳܬܳܐ ܕܰܓܒܰܝ̈ܟ ܒܡܰܫ̈ܟܢܶܐ ܕܩܰܕܝ̣̈ܫܰܝܟ: ܒܰܡ̈ܛܰܠ̱ܠܶܐ ܕܰܡܫܰܒ̈ܚܳܢܰܝܟ ܒܰܐܘ̈ܘܳܢܶܐ ܕܰܐܝܠܶܝܢ ܕܡ̣ܶܢ ܥܳܠܰܡ ܫܦ̣ܰܪܘ̱ ܠܳܟ ܘܥܰܡܗܽܘܢ ܕܰܟܝܳܐܝ̣ܬ ܘܪܰܒܘ̣ܬ ܦܰܐܝܳܐܝ̣ܬ ܢ̇ܙܰܡܰܪ ܠܳܟ ܐܰܒܳܐ ܢܳܛܘ̣ܪܳܐ ܕܕܳܚ̈ܠܰܘܗ̱ܝ: ܘܠܝ̣ܚܝ̣ܕܳܝܳܐ ܒܪܳܟ ܣܰܒܪܳܐ ܕܣܰܓ̈ܘ̣ܕܰܘܗ̱ܝ ܘܰܠܪܘ̣ܚܳܟ ܩܰܕܝ̣ܫܳܐ ܡܟܰܠܶܠ ܒܰܟ̈ܠܝ̣ܠܶܐ ܕܙܳܟܘܽܬܳܐ ܠܥܰܒ̈ܕܰܘܗ̱ܝ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝ̣ܢ܀

ܥܶܛܪܳܐ

ܓܰܙܳܐ ܕܪ̈ܝ̣ܚܳܢܶܐ ܡܫܰܒ̈ܚܶܐ: ܕܡ̣ܶܢ ܐܰܪܥܳܐ ܕܗܶܪ̈ܘ̣ܡܶܐ ܗܕܝ̣ܪ̈ܶܐ ܐܶܫܬܰܕܰܪ ܠܥܳܠܡܳܐ ܡܳܪܝܳܐ: ܘܰܒܦܝ̣ܪܡܳܐ ܕܰܟܝܳܐ ܕܥܘ̣ܒܳܐ ܩܰܕܝ̣ܫܳܐ ܕܰܒܬܘ̣ܠܬܳܐ ܙܗܝ̣ܬܳܐ ܐܶܬ̣ܬܣܝ̣ܡ ܒܬܶܕܡܘ̣ܪܬܳܐ: ܒܰܣܶܡ ܒܪܝ̣ܚܶܗ ܗܰܢܺܝܳܐܐ ܠܟܽܠܗܶܝܢ ܦܶܢ̈ܝܳܬܳܐ: ܒܰܣܶܡ ܡܳܪܝ̱ ܐܳܦ ܗܳܫܳܐ ܠܢܰܦ̈ܫܳܬܳܐ ܕܝ̣ܠܰܢ: ܒܗܰܢܺܝܽܐܘ̣ܬ ܪܝ̣ܚܳܐ ܒܰܣܝ̣ܡܳܐ ܕܚܘ̣ܒܳܟ ܡܫܰܒܚܳܐ: ܘܚܰܣܳܐ ܠܟܽܠܗܶܝܢ ܠܳܐ ܢܳܡܘ̣ܣܳܝ̈ܘܳܬܳܐ ܕܝ̣ܠܰܢ ܒܣܰܓܺܝܽܐܘ̣ܬ ܥܘ̣ܬܪܳܐ ܡܫܰܪܬܚܳܐ ܕܰܚܢܳܢܳܟ ܡܩܰܠܣܳܐ: ܘܰܐܪܘܰܚ ܠܽܟܠܗܽܘܢ ܟܪ̈ܝ̣ܗܶܐ ܘܰܐܠܝ̣̈ܨܶܐ ܘܥܰܝ݂ܺܝ݂ܩ̈ܰܝ ܪܘ̣ܚܳܐ: ܘܰܐܢܝ̣ܚ ܠܟܽܠܗܽܘܢ ܫܟܝ̣̈ܒܰܝ ܥܰܠ ܣܰܒܪܳܟ ܒܗܰܝܡܳܢܘ̣ܬܳܐ ܕܰܫܪܳܪܳܐ ܡܳܪܰܢ ܘܰܐܠܳܗܰܢ ܠܥܳܠܡܝ̣ܢ܀