ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܒܣܶܬܳܪܳܐ ܕܝ̣ܠܳܟ ܡܳܪܝܳܐ ܕܚܰܝ̈ܠܰܘܳܬܳܐ ܩܰܕܝ̣̈ܫܶܐ ܢ̣ܶܣܬܰܬܪܽܘܢ ܟܽܠܗܽܘܢ ܡܗܰܝ̈ܡܢܶܐ ܬܪ̈ܝ̣ܨܰܝ ܫܘ̣ܒܚܳܐ ܕܰܒܟܽܠ ܐܰܬܰܪ: ܡ̣ܶܢ ܢܶܟ̈ܝܳܢܶܐ ܕܢܰܦܫܳܐ ܘܰܕܦܰܓܪܳܐ ܘܡ̣ܶܢ ܡܰܟܝܳܢܘ̣ܬܳܐ ܕܫܺܐܕ̈ܶܐ ܡܳܪ̈ܘ̣ܕܶܐ ܒܠܶܠܝܳܐ ܘܒܺܐܝ̣ܡܳܡܳܐ ܘܢ̣ܰܣܩܽܘܢ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ: ܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܢܘ̣ܗܪܳܐ ܡܶܬܝܰܕܥܳܢܳܐ ܘܰܠܚܘ̣ܕܳܝܳܐ: ܗܰܘ̇ ܕܰܠܟܽܠ ܡܰܢܗܰܪ ܒܝ̣ܕܰܥܬܶܗ ܘܰܒܬܶܐܘܳܪܺܝܰܐ ܕܫܘ̣ܒܚܶܗ: ܗܰܘ̇ ܕܒܰܠܚܘ̣ܕܳܝܘ̣ܬܳܐ ܠܳܐ ܚܒܝ̣ܟܳܐܝ̣ܬ ܡܶܬܬܰܘܕܶܐ: ܘܒܰܬܠܝ̣ܬܳܝܘ̣ܬܳܐ ܠܳܐ ܡܦܰܠܓܳܐܝ̣ܬ ܡܶܬܝ̣ܕܰܥ: ܘܗܳܟܰܢܳܐ ܒܫܘ̣ܒܚܳܐ ܬܪܝ̣ܨܳܐ ܡܶܣܬܓܶܕ ܘܡܶܫܬܰܒܰܚ ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܪܰܡܫܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܥܳܒܽܘ̣ܕܳܐ ܕܥܳܠ̈ܡܶܐ ܘܰܡܛܰܟܣܳܢܳܐ ܕܥܶܕܳܢ̈ܶܐ ܡܳܪܝܳܐ: ܗܰܘ̇ ܡܬܰܩܢܳܢܳܐ ܚܰܟܝ̣ܡܳܐ ܚܰܝܠܬܳܢܳܐ ܕܟܽܠܳܗ̇ ܒܪܝ̣ܬܳܐ: ܗܰܘ̇ ܛܶܟܣܳܐ ܘܶܐܣܟܝ̣ܡܳܐ ܠܟܽܠ ܚܰܕ ܡ̣ܶܢ ܐܶܣܛܘ̣ܟ̈ܣܶܐ ܕܝ̣ܠܶܗ ܝܳܗܶܒ ܐܰܢ̱ܬ : ܐܰܢ̱ܬ ܐܳܦ ܗܳܫܳܐ ܡܳܪܝܳܐ ܒܥܶܕܳܢܳܐ ܗܳܢܳܐ ܕܪܰܡܫܳܐ ܕܒܶܗ ܐܝ̣ܡܳܡܳܐ ܦܨܝ̣ܚܳܐ ܫܩ̣ܰܠ ܫܘ̣ܠܳܡܳܐ: ܘܫܶܡܫܳܐ ܡܰܢܗܪܳܢܳܐ ܒܡܶܕܝܳܪ̈ܶܐ ܬܰܚ̈ܬܳܝܶܐ ܐܶܬ̣ܛܰܫܝ̣ ܘܡ̣ܶܢ ܟܰܕܘ̣ ܫܰܪܝ̣ ܚܶܫܘ̣ܟܳܐ ܕܢ̣ܶܓܠܶܐ: ܘܠܶܠܝܳܐ ܕܰܢ̣ܫܰܡܰܪ ܟܰܘ̈ܟܒܰܘܗ̱ܝ ܡܰܙܠ̈ܓܳܢܶܐ ܗܳܢܽܘܢ ܕܰܒܕܰܪ̈ܓܶܐ ܡܡܰܫܚ̈ܳܢܶܐ ܪܳܗ̇ܛܝ̣ܢ ܠܬܶܫܡܶܫܬܳܐ ܕܝ̣ܠܳܟ: ܟܰܕ ܒܬܶܫܒܘ̣ܚܬܳܐ ܫܶܬܩܳܢܳܝܬܳܐ ܡܰܥܒܪܝ̣ܢ ܚܰܕ ܠܚܰܕ ܟܰܕ ܫܶܡܫܳܐ ܡܰܢ ܥܪܘ̣ܩܝܳܐ ܚܰܘܝ̣: ܣܰܗܪܳܐ ܕܶܝܢ ܒܰܡܟܰܬܪܳܢܘ̣ܬܳܐ ܩܰܘܝ̣: ܟܰܕ ܓܰܢ̱ܒܳܪܳܐ ܒܡܰܛܰܪܬܶܗ ܙܪܝ̣ܙܳܐܝ̣ܬ ܪܗ̣ܶܛ: ܘܥܺܝ̣ܘܬܳܐ ܒܥܶܒܪ̈ܶܐ ܘܣܰܘ̈ܦܶܐ ܕܰܐܪܥܳܐ ܦܨܝ̣ܚܳܐܝ̣ܬ ܡܕܰܝܠܳܐ: ܘܡܶܛܽܠ ܗܳܕܶܐ ܡܦܝ̣ܣܝ̣ܢܰܢ ܠܳܟ ܡܳܪܝܳܐ ܪܳܚܶܡ ܐ̱ܢܳܫܳܐ ܕܢ̣ܶܗܘܶܐ ܠܰܢ ܪܰܡܫܳܐ ܗܳܢܳܐ ܠܡܺܐܢܳܐ ܕܫܰܝܢܳܐ ܘܒܶܝܬ ܓܰܘܣܳܐ ܕܰܢܝܳܚܳܐ: ܘܠܳܐ ܢ̣ܶܚܫܰܟ ܗܰܘܢܰܢ ܥܰܡ ܪܰܡܫܳܐ ܘܠܳܐ ܢ̣ܶܥܡܛܽܘܢ ܪ̈ܶܥܝܳܢܰܝܢ ܒܥܰܡ̈ܛܳܢܶܐ ܠܶܠܝ݂ܳܝ݂̈ܶܐ ܐܶܠܳܐ ܒܡܰܥܪ̈ܳܒܰܝ ܫܶܡܫܳܐ ܕܙܰܕܝ̣ܩܘ̣ܬܳܐ ܢ̣ܶܕܢܰܚ ܠܰܢ: ܒܚܘ̣ܡܳܠܳܐ ܕܙܰܠܝ̣̈ܩܰܘܗܝ ܙܰܠܝ̣̈ܩܶܐ ܕܛܰܝܒܘܽܬܳܟ ܢ̣ܶܕܢܚܽܘܢ ܥܠܰܝܢ: ܬܘ̣ܒ ܕܶܝܢ ܡܦܝ̣ܣܝ̣ܢܰܢ ܠܳܟ ܡܳܪܝܳܐ ܟܰܕ ܥܰܡ ܗܰܘ̇ ܪܰܒܳܐ ܕܰܘܝ̣ܕ ܡܰܙܥܩܝ̣ܢܰܢ ܘܳܐܡ̇ܪܝ̣ܢܰܢ: ܕܩܘ̣ܪܒܳܢܳܐ ܕܺܐܝ̈ܕܰܝ ܐܰܝܟ ܩܘ̣ܪܒܳܢܳܐ ܕܪܰܡܫܳܐ: ܘܢ̣ܶܥ̈ܠܳܢ ܨܠܰܘ̈ܳܬܰܢ ܘܒܳܥ̈ܘܳܬܰܢ ܠܒܶܝܬ ܡܩܰܕܫܳܟ ܒܥܶܕܢܳܐ ܗܳܢܳܐ ܕܪܰܡܫܳܐ ܘܡ̣ܶܢ ܪܰܡܫܳܐ ܕܰܚܛܝ̣ܬܳܐ ܘܡ̣ܶܢ ܚܶܫܘ̣ܟܳܐ ܐܰܝܢܳܐ ܕܗܽܘ̣ ܦܰܨܳܐ ܠܰܢ ܡܳܪܝܳܐ: ܘܰܒܢܘ̣ܗܪܳܟ ܢ̣ܰܢܗܪܽܘܢ ܪ̈ܶܓܫܰܝܢ ܘܰܠ̈ܥܰܠܠܳܬܳܐ ܕܫܰܢ̱ܬܳܐ ܒܰܪܶܟ ܒܛܰܝܒܘ̣ܬܳܟ ܘܙܰܒ̈ܢܶܐ ܡܫܰܝ̈ܢܶܐ ܘܰܫܢܰܝ̈ܳܐ ܕܚܰܕ̈ܘܳܬܳܐ ܘܝܰܪ̈ܚܶܐ ܕܒܘ̣ܪ̈ܟܳܬܳܐ ܫܰܟܶܢ ܠܰܢ ܡܳܪܝܳܐ: ܘܰܒܫܰܝܢܳܐ ܕܡܶܢܳܟ ܐܰܡܝ̣ܢܳܐܝ̣ܬ ܩܰܝܶܡ ܘܢܰܛܰܪ ܠܰܢ ܘܰܠܥܺܕܬܳܐ ܕܝ̣ܠܳܟ ܩܰܕܝ̣ܫܬܳܐ: ܝܰܩܰܪ ܘܪܰܡܪܶܡ ܘܨܰܒܶܬ ܘܗܰܕܰܪ: ܠܪ̈ܳܥܰܘܳܬܳܐ ܕܰܒܰܪ ܒܙܰܗܝܘ̣ܬܳܐ: ܠܳ̈ܟܳܗ̈ܢܶܐ ܙܰܗܳܐ ܒܢܰܟܦܘ̣ܬܳܐ ܠܰܡܫܰܡ̈ܫܳܢܶܐ ܨܰܒܶܬ ܒܕܶܚܠܬܳܟ ܠܚܰܛܳܝ̈ܶܐ ܚܰܣܳܐ: ܠܬܰܝܳܒ̈ܶܐ ܩܰܕܶܫ ܠܰܕܩܳܪܶܝܢ ܠܳܟ ܥܢܝ̣: ܠܰܫܟܝ̣̈ܒܰܝ ܥܰܠ ܣܰܒܪܳܟ ܐܰܒܳܗܰܝ̈ܢ ܘܰܐܚ̈ܰܝܢ ܘܪ̈ܰܒܳܢܰܝܢ ܘܥܰܢܝ̣̈ܕܰܝܢ ܘܟܽܠܗܽܘܢ ܥܰܢܝ̣̈ܕܶܐ ܡܗܰܝ̈ܡܢܶܐ: ܐܰܢܝ̣ܚ ܐܶܢܽܘܢ ܒܰܡ̈ܛܰܠ̱ܠܶܐ ܕܝ̣ܠܳܟ ܕܢܘ̣ܗܪܳܐ: ܕܰܚܢܰܢ ܘܗ̣ܶܢܽܘܢ ܢܰܣܶܩ ܠܳܟ ܫܘ̣ܒܚܳܐ ܕܰܡܚܰܪܰܪ ܡ̣ܶܢ ܫܰܠܘܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝܺܢ܀

ܥܶܛܪܳܐ

ܡܶܢܳܟ ܐܶܬ̣ܒܪܝ̣ ܢܘ̣ܗܪܳܐ ܡܫܝ̣ܚܳܐ ܢܘ̣ܗܪܳܐ ܫܰܪܝ̣ܪܳܐ: ܘܰܒܦܘ̣ܩܕܳܢܳܟ ܥ̣ܪܰܒ ܫܶܡܫܶܗ ܕܺܐܝܡܳܡܳܐ: ܫܶܡܫܳܐ ܕܙܰܕܝ̣ܩܘ̣ܬܳܐ: ܩܰܒܶܠ ܠܦܝ̣ܪܡܰܢ ܗܳܢܳܐ ܐܰܝܟ ܩܘ̣ܪܒܳܢܳܐ ܕܪܰܡܫܳܐ: ܐܶܬ̣ܪܰܥܳܐ ܒܰܨܠܰܘ̈ܳܬܰܢ ܐܰܝܟ ܕܶܒܚܳܐ ܡܩܰܒܠܳܐ: ܘܰܐܩܝ̣ܡ ܢܳܛܘ̣ܪ̈ܶܐ ܠܦܘ̣̈ܡܰܝܢ ܘܰܠܣܶܦ̈ܘܳܬܰܢ ܕܠܳܐ ܢ̣ܡܰܠ̈ܠܳܢ ܥܰܘܠܳܐ: ܢ̣ܶܨܛܰܠ̈ܝܳܢ ܠܡܶܠܬܳܐ ܣܪܝ̣ܩܬܳܐ: ܐܶܠܳܐ ܒܬܶܫܒ̈ܚܳܬܳܟ ܢ̣ܶܬܥܢܽܘܢ ܗܰܘܢܰܝ̈ܢ ܘܚܘܽܫܳܒ̈ܰܝܢ: ܘܰܒܡܰܫ̈ܟܒܰܝܢ ܘܰܒܫܶܢܬܰܢ ܒܪܶܢܝܳܐ ܕܰܠܘܳܬܳܟ ܢ̣ܶܬܰܐܡܢܽܘܢ ܐܰܝܟܰܢܳܐ ܕܟܽܠܰܢ ܥܰܡ ܟܽܠܰܢ ܕܝ̣ܠܳܟ ܢ̣ܶܗܘܶܐ: ܘܠܳܟ ܢܰܘܕܶܐ ܘܰܢ̇ܫܰܒܰܚ ܘܰܢ̇ܪܰܡܪܶܡ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀