ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܡܪܰܚܡܳܢܳܐ ܘܣܰܓܝ̣ ܥܘܽܕܪ̈ܳܢܶܐ: ܕܰܐܪܟܶܢ ܪܰܘܡܳܐ ܕܪܰܒܘ̣ܬܶܗ ܠܘܳܬܰܢ ܡܚܝ̣̈ܠܶܐ: ܘܥܰܡ ܒܢܰܝ̈ܢܳܫܳܐ ܐܶܬ̣ܗܰܦܰܟ ܘܰܐܣܝ̣ ܘܰܐܚܠ̣ܶܡ ܟܺܐܒܰܝ̈ܗܽܘܢ ܒܰܚܢܳܢܶܗ: ܠܗܰܘ̇ ܥܰܬܝ̣ܪܳܐ ܕܰܐܥ̣ܬܰܪ ܠܡܶܣܟܺܢܘ̣ܬܰܢ ܒܥܘ̣ܬܪܶܗ: ܘܚ̣ܰܝܶܨ ܪܰܦܝܘ̣ܬܰܢ ܘܬܰܪܶܨ ܟܦܝ̣ܦܘ̣ܬܳܐ ܕܝ̣ܠܰܢ ܒܬܘ̣ܩܦܶܗ: ܛܳܒܳܐ ܕܠܶܗ ܢ̇ܫܰܒܰܚ: ܒܗܳܢܳܐ ܥܶܕܳܢܳܐ ܕܩܰܘܡܳܐ ܩܰܕܡܳܝܳܐ ܕܠܺܠܝܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܐܳܣܝܳܐ ܒܰܣܝ̣ܡܳܐ ܕܡܰܐܣܶܐ ܠܟܽܠ ܒܰܬܝܳܒܘ̣ܬܳܐ ܘܛܘ̣ܒܬܳܢܳܐ ܘܪܰܒ ܐܳܣ̈ܰܘܳܬܳܐ ܡܳܪܝܳܐ: ܗܰܘ̇ ܡܰܒܘ̣ܥܳܐ ܕܚܰܝ̈ܶܐ ܘܰܡܥܝ̣ܢܳܐ ܕܚܘ̣ܠ̈ܡܳܢܶܐ ܗܰܘ̇ ܕܰܠܘܳܬ ܕܝ̣̈ܢܶܐ ܕܝ̣ܠܳܟ ܥܰܡܝ̣̈ܩܶܐ ܠܚܰܟܝ̣̈ܡܶܐ ܡܰܬܡܰܗ ܐܰܢ̱ܬ: ܘܳܐܦ ܒܰܬܡܝ̣̈ܗܳܬܳܐ ܕܝ̣ܠܳܟ ܬܶܡܗܳܐ ܫܳܪܶܐ ܐܰܢ̱ܬ ܥܰܠ ܚܰܝܠ̈ܬܳܢܶܐ: ܗܰܘ̇ ܕܰܒܟܘ̣ܪ̈ܗܳܢܶܐ ܦܰܓܪ̈ܳܢܳܝܶܐ ܠܢܰܦ̈ܫܳܬܳܐ ܘܦܰܓܪ̈ܶܐ ܕܝ̣ܠܰܢ ܡܰܚܠܶܡ ܐܰܢ̱ܬ: ܘܰܒܡܰܚ̈ܘܳܬܳܐ ܕܡܶܬܚܰܙܝ̈ܳܢ ܒܚܝ̣ܪ̈ܶܐ ܚܰܬܝ̣̈ܬܶܐ ܡܚܰܘܶܐ ܐܰܢ̱ܬ: ܘܒܰܡܣܰܝܒܪܳܢܘ̣ܬܳܐ ܫܶܐܠ̈ܳܬܳܐ ܡܦܰܢܶܐ ܐܰܢ̱ܬ: ܐܰܢ̱ܬ ܗ̱ܘ̣ ܕܰܠܟܺܐܒ̈ܰܝܢ ܢܣܰܒ̣ܬ ܘܰܠܟܘ̣ܪ̈ܗܳܢܰܝܢ ܛܥܶܢ̣ܬ: ܘܫܳܡܪܳܝܳܐ ܡܶܛܽܠܳܬܰܢ ܐܶܬ̣ܩܪܝ̣ܬ: ܘܡ̣ܶܢ ܨܘ̣ܠ̈ܦܳܬܳܐ ܕܰܚܛܳܗ̈ܶܐ ܠܰܢ ܫܰܘܙܶܒ̣ܬ ܘܚܰܡܪܳܐ ܘܡܶܫܚܳܐ ܥܠܰܝܗܶܝܢ ܢܨܰܠ̣ܬ: ܘܒܰܕܓܽܘܢ ܒܳܥܶܝܢܰܢ ܡܶܢܳܟ ܡܳܪܝܳܐ ܗܰܘ̇ ܕܪ̈ܰܚܡܰܝܟ ܫܦܝ̣ܥܝ̣ܢ ܥܰܠ ܓܶܢܣܰܢ: ܬ̣ܶܥܘ̣ܠ ܩܕܳܡܰܝܟ ܬܝܳܒܘ̣ܬܳܗ̇ ܕܰܒܨܝ̣ܪܘ̣ܬܰܢ: ܫܡܰܥ ܠܩ̈ܳܠܶܐ ܕܒܳܥ̈ܘܳܬܰܢ ܨܘ̣ܬ ܠܛܘ̣ܝܳܒܶܗ ܕܠܶܒܰܢ ܚܘ̣ܣ ܥܠܰܝܢ ܡܳܪܝܳܐ ܘܠܰܚܒܳܪ̈ܳܬܳܐ ܕܝ̣ܠܰܢ ܕܶܐܬ̣ܡ̈ܣܝ̣ ܐܰܚܠܶܡ ܘܪܰܚܶܡ ܥܠܰܝܢ ܡܳܪܝܳܐ ܬܪܘ̣ܨ ܠܰܟܦܝ̣ܦܘ̣ܬܰܢ ܚܘ̣ܢܰܝܢ ܡܳܪܝܳܐ ܘܰܒܝܰܡܝ̣ܢܳܟ ܣܰܡܶܟ ܠܰܢ ܐܰܪܘܰܚ ܠܰܢ: ܘܰܒܢܘ̣ܗܪܳܐ ܕܦܰܪܨܘ̣ܦܳܟ ܒܰܣܶܡ ܠܰܢ: ܘܛܰܝܶܒ ܠܰܢ ܒܫܳܥܬܳܐ ܐ̱ܚܪܳܝܬܳܐ ܥܰܡ ܗܳܢܽܘܢ ܕܒܰܚܕܰܥܶܣܪܶܐ ܫܳܥ̈ܝ̣ܢ ܦܠܰܚ̣ܘ̱ ܒܟܰܪܡܳܐ ܕܙܰܕܝ̣ܩܘ̣ܬܳܐ ܥܰܡ ܕܰܘܝ̣ܕ ܗܰܘ̇ ܪܰܒܳܐ ܒܰܬܝܳܒܘ̣ܬܳܐ: ܘܰܐܝܟ ܡܢܰܫܶܐ ܗܰܘ̇ ܕܝܰܬܝ̣ܪ ܐܰܪܫ̣ܰܥ ܒܡܶܬܬܰܘܝܳܢܘ̣ܬܳܐ: ܘܰܐܝܟ ܒܪܳܐ ܐܳܣܘ̣ܛܳܐ ܕܦ̣ܰܪܰܚ ܢܶܟ̈ܣܰܘܗ̱ܝ ܒܡܶܬܦܰܢܝܳܢܘ̣ܬܳܐ: ܘܰܐܝܟ ܙܰܟܰܝ ܒܡܶܬܥܰܠܝܳܢܘ̣ܬܳܐ: ܘܰܐܝܟ ܡܳܟܣܳܐ ܕܶܐܙ̣ܕܰܕܰܩ ܝܰܬܝ̣ܪ ܡ̣ܶܢ ܦܪܝ̣ܫܳܐ ܒܡܶܬܚܰܢܳܢܘ̣ܬܳܐ ܘܰܐܝܟ ܫܶܡܥܽܘܢ ܪܝ̣ܫܳܐ ܕܰܫܠܝ̣̈ܚܶܐ ܒܡܰܘܕܝܳܢܘ̣ܬܳܐ: ܘܰܐܝܟ ܫܳܐܘܳܠ ܕܶܐܬ̣ܟܰܢܝ̣ ܦܰܘܠܠܳܘܣ ܒܡܰܙܠܓ̥ܘ̣ܬܳܐ: ܘܰܐܝܟ ܓܰܝܳܣܳܐ ܕܡ̣ܶܢ ܝܰܡܝ̣ܢܳܐ ܒܡܶܬܕܰܟܪܳܢܘ̣ܬܳܐ: ܘܰܐܝܟ ܚܰܛܳܝܬܳܐ ܒܰܬܝܳܒܘ̣ܬܳܐ: ܠܳܐ ܓܶܝܪ ܐܝ̣ܬ ܠܰܢ ܦܰܪܶܗܣܺܝܰܐ ܕܰܢ̇ܚܘ̣ܪ ܠܘܳܬ ܪܰܘܡܳܐ ܕܰܫܡܰܝܳܐ ܘܢ̇ܶܒܥܶܐ ܥܰܠ ܣܰܟ̈ܠܘܳܬܰܢ: ܝܳܕܥ̇ܝ̣ܢܰܢ ܡܳܪܝ̱ ܕܰܐܪܓ̣ܶܙܢܳܟ ܘܒܳܗ̇ܬܝ̣ܢܰܢ ܡ̣ܶܢ ܟܺܐܢܘ̣ܬܳܟ: ܠܳܐ ܡܳܪܝ̱ ܬ̣ܰܗܦܶܟ ܐܰܦ̈ܰܝܟ ܡܶܢܰܢ ܘܠܳܐ ܬ̣ܶܓܥܘ̣ܪ ܒܰܢ: ܘܰܢ̇ܦܘ̣ܫ ܠܒܰܪ ܡ̣ܶܢ ܬܰܪܥܶܗ ܕܰܓܢܽܘܢܟ: ܫܡܰܥ ܒܩܳܠܰܢ ܡܳܪܝܳܐ ܘܩܰܒܶܠ ܡܶܢܰܢ ܦܝ̣ܪܡܳܐ ܕܰܬܝܳܒܘ̣ܬܳܐ: ܐܰܣܳܐ ܟܺܐܒ̈ܰܝܢ ܘܟܘ̣ܪ̈ܗܳܢܰܝܢ ܐܰܝܟ ܕܰܐܣܝ̣ܬ ܠܰܡܡܰܚ̈ܰܝܳܐ: ܟܪ̈ܝ̣ܗܶܐ ܐܝ̣ܬܰܝܢ ܒܢܰܦܫܳܐ ܘܦܰܓܪܳܐ ܠܳܐ ܬ̣ܶܫܕܶܐ ܠܰܢ ܕܠܳܐ ܚܘܽܠܡܳܢܳܐ: ܐܶܠܳܐ ܟܰܕ ܒܪܝ̣ܫܳܐ ܡܰܪܟܢܳܐ ܘܠܶܒܳܐ ܕܓܳܥܶܐ ܒܬܶܢ̈ܚܳܬܳܐ ܪ̈ܰܥܘ̣ܡܳܬܳܐ ܡܶܬܟܰܫܦܝ̣ܢܰܢ ܠܳܟ ܡܳܪܝܳܐ: ܒܡܶܢܝܳܢܳܐ ܕܥܰܒ̈ܕܰܝܟ ܢ̇ܶܬܡܢܶܐ: ܒܪܘ̣ܫܡܳܐ ܕܰܨܠܝ̣ܒܳܟ ܢ̇ܶܬܪܫܶܡ ܒܛܰܒܥܳܐ ܕܡܘ̣ܪܽܘܢ ܩܰܕܝ̣ܫܳܐ ܛܒܰܥ̣ܬ ܠܰܢ: ܘܦܰܓܪܳܟ ܐܰܘܟ̣ܶܠܬܰܢ ܘܰܕܡܳܟ ܩܰܕܝ̣ܫܳܐ ܐܰܫܩܝ̣ܬܳܢ: ܘܰܒܥܶܠܕܒܳܒܳܐ ܨܢܝ̣ܥܳܐ ܚܳܣܶܡ ܒܰܢ: ܟܐܝ̣ ܒܡܰܪܳܚܳܐ ܕܠܳܐ ܣܳܒܰܥ ܡܶܢܰܢ: ܦܰܚ̈ܶܐ ܛܳܡܰܪ ܠܰܢ ܘܨܳܠܶܐ ܠܰܢ ܢܶܫ̈ܒܶܐ: ܡ̣ܶܢ ܟܽܠܶܗ ܠܶܒܰܢ ܓܳܥܶܝܢܰܢ ܠܘܳܬܳܟ: ܒܚܰܘ̈ܣܳܢܰܝܟ ܣܰܓܺܝ̈ܶܐܐ ܚܰܣܳܐ ܘܚܰܠܶܠ ܘܰܡܪܘ̣ܩ ܠܰܢ: ܘܝܰܬܝ̣ܪ ܡ̣ܶܢ ܬܰܠܓܳܐ ܚܰܘܰܪܰܝܢ ܘܕܰܟܳܐ ܠܰܢ ܡ̣ܶܢ ܟܽܠܗܽܘܢ ܚܛܳܗ̈ܰܝܢ ܘܣܰܟ̈ܠܘܳܬܰܢ: ܝܺܕܝ̣ܥܳܐܝ̣ܬ ܕܶܝܢ ܐܰܝܠܶܝܢ ܕܡܶܛܽܠܳܬܗܽܘܢ ܩܕܳܡܰܝܟ ܡܶܬܚܰܢܢܝ̣ܢܰܢ ܘܚܘ̣ܪܳܪܳܐ ܕܡܶܢܗܽܘܢ ܫܳܐܠܝ̣ܢܰܢ: ܢܰܟܶܦ ܘܙܰܗܳܐ ܘܩܰܕܶܫ ܢܰܦ̈ܫܳܬܳܐ ܕܝ̣ܠܰܢ: ܘܣܰܬܰܪ ܘܢܰܛܰܪ ܐܶܢܶܝܢ ܡ̣ܶܢ ܟܽܠ ܡܰܦܘ̣ܠܬܳܐ ܘܡܘ̣ܡܳܐ ܘܛܘ̣ܠܫܳܐ ܕܰܚܛܝ̣ܬܳܐ: ܘܗܰܒ ܘܫܰܟܶܢ ܠܰܢ ܫܘ̣ܠܳܡܳܐ ܛܘ̣ܒܬܳܢܳܐ ܘܡܰܦܩܳܢܳܐ ܚܰܬܝ̣ܬܳܐ ܕܡ̣ܶܢ ܗܳܪܟܳܐ: ܘܡ̣ܶܢ ܫܘ̣ܢܳܩܳܐ ܗܰܘ̇ ܕܠܰܝܬ ܠܡܶܫܬܐܳܠܘ̣ ܡܶܢܶܗ: ܦܰܨܳܐ ܠܰܢ ܘܡܰܢܰܥ ܠܰܢ ܠܝܳܪܬܘ̣ܬܳܐ ܛܘ̣ܒܬܳܢܝ̣ܬܳܐ ܕܒܳܟ: ܗܳܝ ܕܝܰܗ̣ܒܬ ܠܗܳܢܽܘܢ ܕܰܡܫܰܡܠܝܳܐܝ̣ܬ ܐܶܬ̣ܓܡ̣ܰܪܘ̱ ܒܰܬܝܳܒܘ̣ܬܳܐ ܘܡܶܬܦܰܢܝܳܢܘ̣ܬܳܐ ܕܰܠܘܳܬܳܟ ܒܪܶܚܡܰܬ݀ ܐ̱ܢܳܫܘ̣ܬܳܟ ܘܕܰܐܒܘ̣ܟ ܘܰܕܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀