ܦܪܽܘ̣ܡܝܽܘܢ

ܬܶܫܒܽܘ̣ܚܬܳܐ: ܠܚܰܕ ܐܰܒܳܐ ܡܪܰܚܡܳܢܳܐ: ܕܥܳܢܶܐ ܠܚܰܛܳܝ̈ܶܐ ܕܩܳܪܶܝܢ ܠܶܗ: ܠܚܰܕ ܒܪܳܐ ܚܰܢܳܢܳܐ: ܕܰܡܩܰܒܶܠ ܠܬܰܝܳܒ̈ܶܐ ܕܣܳܘܚܝ̣ܢ ܠܶܗ: ܠܚܰܕ ܪܘ̣ܚܳܐ ܚܰܝܘ̣ܣܬܳܢܳܐ ܕܰܡܚܰܣܶܐ ܠܚܰܛܳܝ̈ܶܐ ܕܢܳܩܫܝ̣ܢ ܒܬܰܪܥܶܗ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܩܰܘܡܳܐ ܩܰܕܡܳܝܳܐ ܕܠܶܠܝܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܳܪܝܳܐ ܐܰܠܳܗܳܐ ܕܝ̣ܠܰܢ ܗܰܘ̇ ܕܥܰܠ ܟܪ̈ܘܽܒܶܐ ܝܳܬܶܒ: ܘܡ̣ܶܢ ܣܪ̈ܳܦܶܐ ܡܶܬܩܰܕܰܫ ܘܡ̣ܶܢ ܡܰܠܰܐܟ̈ܶܐ ܕܠܳܐ ܣܳܟܳܐ ܘܰܕܠܳܐ ܡܶܢܝܳܢܳܐ ܒܢ̈ܳܬ ܩ̈ܳܠܶܐ ܕܠܳܐ ܫܶܠܝܳܐ ܕܰܡܡܰܠܠܘ̣ܬ ܐܰܠܳܗܽܘ̣ܬܳܐ ܕܟܽܠܗܽܘܢ ܗܰܘ̈ܢܶܐ ܥܶܠܳܝ̈ܶܐ ܦܰܐܝܘ̣ܬ ܐܰܠܳܗܳܐܝ̣ܬ ܡܶܫܬܰܒܰܚ: ܠܳܐ ܬ̣ܰܗܦܶܟ ܐܰܦ̈ܰܝܟ ܡܶܢܰܢ ܡܳܪܝܳܐ: ܘܠܳܐ ܬ̣ܰܣܠܶܐ ܠܰܨ̈ܠܰܘܳܬܳܐ ܘܒܳܥ̈ܘܳܬܳܐ ܘܬܰܟ̈ܫܦܳܬܳܐ ܕܝ̣ܠܰܢ ܫܝ̣̈ܛܳܬܳܐ ܘܡܶܣ̈ܟܺܢܳܬܳܐ ܘܰܡܚܝ̣̈ܠܳܬܳܐ ܕܥܰܒ̈ܕܶܐ ܕܝ̣ܠܳܟ: ܐܶܠܳܐ ܠܪܝ̣ܚܳܐ ܒܰܣܝ̣ܡܳܐ ܟܰܕ ܥܰܡ ܥܶܛܪܳܐ ܕܒܶܣ̈ܡܶܐ ܠܳܟ ܡܶܬܩܰܪ̈ܒܳܢ: ܠܗܳܠܶܝܢ ܠܰܡܩܰܒܳܠܘ̣ ܐܶܬ̣ܬܦܝ̣ܣ ܡܳܪܝܳܐ: ܟܰܕ ܡܰܫܘܶܐ ܐܰܢ̱ܬ ܠܰܢ ܠܰܡܩܰܪܳܒܘ̣ ܠܳܟ ܒܰܣܝ̣ܡܘ̣ܬ ܪܝ̣ܚܳܐ: ܘܕܰܟܝܘ̣ܬܳܐ ܕܢܰܦܫܳܐ ܒܟܽܠ ܙܒܰܢ: ܘܠܰܡܫܰܘܙܳܒܘ̣ ܠܬܶܫܡܶܫܬܳܐ ܕܝ̣ܠܰܢ ܕܠܳܐ ܬܘ̣ܩܰܠܬܳܐ: ܘܕܰܒܫܰܦܝܘ̣ܬܳܐ ܕܡ̣ܶܢ ܟܽܠܳܗ̇ ܢܰܦܫܳܐ ܠܡܶܥܒܰܕ ܝܰܨܝ̣ܦܘ̣ܬܳܐ ܕܟܰܟܪܳܐ ܐܰܝ̇ܕܳܐ ܕܶܐܬܗܰܝܡ̣ܰܢܢܰܢ: ܟܰܕ ܡܣܰܝܰܥ ܐܰܢ̱ܬ ܠܰܢ ܠܥܰܒ̈ܕܶܐ ܕܝ̣ܠܳܟ ܕܰܠܕܘ̣ܒܳܪܳܐ ܕܶܐܘܰܢܓܶܠܝܽܘܢ ܕܠܳܐ ܙܺܐܦܳܐ ܢܫܰܡܠܶܐ ܘܚܰܬܝ̣ܬܘ̣ܬܳܐ ܕܥܰܝ̈ܢܶܐ ܠܡܶܩܢܳܐ: ܙܗܝ̣ܪܘ̣ܬܳܐ ܕܠܶܫܳܢܳܐ: ܫܘ̣ܥܒܳܕܳܐ ܕܦܰܓܪܳܐ ܬܰܪܥܝ̣ܬܳܐ ܡܰܟܝ̣ܟܬܳܐ: ܥܛܳܝܳܐ ܕܰܪܓܝ̣ܙܘ̣ܬܳܐ ܫܘ̣ܒܩܳܢܳܐ ܕܰܚ̈ܛܳܗܶܐ ܝ̣ܕܰܥܬܳܐ ܘܦܘ̣ܠܚܳܢܳܐ ܕܰܐܝܠܶܝܢ ܕܡܰܘܬܪ̈ܳܢ: ܘܡܰܣܠܝܳܢܘ̣ܬܳܐ ܕܰܐܝܠܶܝܢ ܕܡܰܚܣܪ̈ܳܢ: ܚܘ̣ܪܳܪܳܐ ܕܡ̣ܶܢ ܚܰܫ̈ܶܐ ܦܰܓܪ̈ܳܢܳܝܶܐ ܘܢܰܦ̈ܫܳܢܳܝܶܐ: ܩܰܕܝ̣ܫܘ̣ܬܳܐ ܕܗܰܕܳܡ̈ܶܐ ܟܢܝ̣ܟܘ̣ܬܳܐ ܕܗܘ̣̈ܦܳܟܶܐ: ܫܦܝ̣ܥܘ̣ܬܳܐ ܕܰܒܣܳܥܘ̣ܪ̈ܘܳܬܳܐ ܫܰܦܝ̣ܪ̈ܳܬܳܐ: ܥܘ̣ܬܪܳܐ ܕܪܶܚܡܰܬ݀ ܐܰܚ̈ܶܐ ܕܰܟܝܘ̣ܬܳܗ̇ ܕܢܰܟܦܘ̣ܬܳܐ ܠܒܝ̣ܒܘ̣ܬܳܐ ܕܓܰܢ̱ܒܳܪܘ̣ܬܳܐ ܡܫܰܡܠܝܘ̣ܬܳܐ ܕܰܓܡܝ̣ܪܘ̣ܬܳܐ: ܡܰܓܠܶܐ ܐܰܦ̈ܶܐ ܕܟܺܐܢܘ̣ܬܳܐ: ܬܰܚܘܝ̣ܬܳܐ ܦܺܐܪܳܢܳܝܬܳܐ ܕܟܽܠܗܽܘܢ ܐܰܚ̈ܶܐ ܪ̈ܳܚܡܰܝ ܐܰܠܳܗܳܐ: ܘܪܶܚܡܰܬ݀ ܚܶܟܡܬܳܐ: ܘܫܰܦܝ̣ܪܘ̣ܬ ܩܘ̣ܪܳܒ ܦܺܐܪ̈ܶܐ ܕܰܡܝܰܬܪܘ̣ܬܳܐ: ܟܰܕ ܡܚܰܠܶܦ ܐܰܢ̱ܬ ܡܰܬܩܶܢ ܐܰܢ̱ܬ ܠܰܢ ܠܘܳܬ ܨܶܒܝܳܢܳܟ ܛܳܒܳܐ ܘܰܡܩܰܒܠܳܐ: ܘܰܡܫܰܚܠܶܦ ܐܰܢ̱ܬ ܠܰܢ ܒܫܘ̣ܚܠܳܦܳܐ ܕܡܶܢܳܟ: ܐܶܬ̣ܕܰܟܰܪ ܡܳܪܝܳܐ ܠܰܐܝܠܶܝܢ ܕܰܒܛܘ̣ܪ̈ܳܦܶܐ ܘܒܰܫܚ̈ܳܩܶܐ ܥܳܠ̈ܡܳܢܳܝܶܐ ܐܝ̣ܬܰܝܗܽܘܢ: ܘܰܥܒܶܕ ܒܰܥܓ̥ܰܠ ܦܘ̣ܪܩܳܢܳܐ ܕܝ̣ܠܗܽܘܢ: ܠܳܐ ܡܳܪܝ̱ ܬ̣ܣܝ̣ܦ ܢܰܦܫܳܐ ܙܰܕܝ̣ܩܬܳܐ: ܘܡ̣ܶܢ ܒܳܥ̈ܘܳܬܳܐ ܕܒܳܝ̈ܫܶܐ ܠܳܐ ܬ̣ܰܗܡܶܐ: ܕܶܡܥ̈ܶܐ ܕܰܐܪ̈ܡܠܳܬܳܐ ܒܰܝܰܐ: ܨܪܝ̣ܟܘ̣ܬܳܐ ܕܝܰܬ̈ܡܶܐ ܦܰܪܢܶܣ: ܫܝ̣ܛܘ̣ܬܳܐ ܕܰܐܟܣ̈ܢܳܝܶܐ ܣܥܘ̣ܪ: ܐܳܠܨ̈ܳܬܳܐ ܕܰܪ̈ܕܝ̣ܦܶܐ ܡܰܠܳܐ: ܠܰܟܪ̈ܝ̣ܗܶܐ ܐܰܣܳܐ: ܠܰܙܥܘ̣ܪ̈ܰܝ ܢܰܦܫܳܐ ܐܰܪܘܰܚ: ܠܕܰܡܥܳܩܝ̣ܢ ܡܠܝ̣ ܒܠܶܒܳܐ ܠܰܕܚܳܙܩܝ̣ܢ ܒܐܘ̣ܪ̈ܚܳܬܳܐ ܦܘ̣ܢܳܝܳܐ ܛܳܒܳܐ ܗܰܒ: ܠܰܐܝܠܶܝܢ ܕܒܰܚܒܘ̣̈ܫܝܶܐ ܘܰܒܒܶܝܬ ܐܰܣܝ̣ܪ̈ܶܐ ܚܰܪܰܪ: ܦܪܘ̣ܩ ܠܰܐܝܠܶܝܢ ܕܰܒܫܶܒ̈ܝܶܐ ܡܰܬܢܰܘܠܝ̣ܢ ܘܠܰܐܝܠܶܝܢ ܕܡ̣ܶܢ ܫܺܐܕ̈ܶܐ ܛܰܢ̈ܦܶܐ ܡܶܫܬܰܩܦܝ̣ܢ: ܡ̣ܶܢ ܡܰܥܒܕܳܢܘ̣ܬܳܐ ܣܳܛܳܢܳܝܬܳܐ ܐܰܓܗܳܐ ܡܳܪܝܳܐ ܪܳܚܶܡ ܐ̱ܢܳܫܳܐ: ܘܦܰܨܳܐ ܠܰܢ ܒܰܚܢܳܢܳܟ ܡ̣ܶܢ ܟܰܦܢܳܐ ܘܡ̣ܶܢ ܡܰܘܬܳܢܳܐ: ܘܡ̣ܶܢ ܚܒܳܠܳܐ ܓܰܘܳܢܳܝܳܐ: ܘܡ̣ܶܢ ܙܰܘ̈ܥܶܐ: ܘܡ̣ܶܢ ܛܘ̣̈ܒܳܥܶܐ ܘܡ̣ܶܢ ܩܰܡ̈ܨܶܐ ܘܡ̣ܶܢ ܫܰܘܒ̈ܶܐ: ܘܡ̣ܶܢ ܒܰܪܕܳܐ: ܘܡ̣ܶܢ ܫܶܒܝܳܐ ܘܡ̣ܶܢ ܟܽܠ ܡܰܚ̈ܘܳܬܳܐ ܕܪܘ̣ܓܙܳܐ: ܘܗܰܒ ܠܰܢ ܕܰܒܫܰܦܝ̣ܪܘ̣ܬ ܩܰܘܡܳܐ ܘܕܰܟܝܘ̣ܬܳܐ ܕܢܰܦܫܳܐ ܠܡܶܐܚܰܕ ܦܘ̣ܩ̈ܕܳܢܰܝܟ ܐܶܬ̣ܕܰܟܰܪ ܡܳܪܝܳܐ: ܘܠܰܐܝܠܶܝܢ ܕܰܒܦܘ̣ܠ̈ܚܳܢܶܐ ܟܳܗ̈ܢܳܝܶܐ ܦܩ̣ܰܕܘ̱ ܠܰܢ ܕܢ̇ܶܬܕܟܰܪ ܐܶܢܽܘܢ ܘܡܰܠܳܐ ܠܗܽܘܢ ܣܘ̣̈ܢܩܳܢܰܝܗܽܘܢ: ܘܰܠܥܘ̣ܡܪܳܐ ܗܳܢܳܐ ܘܰܠܟܽܠ ܥܘ̣ܡܪ̈ܶܐ ܕܰܐܪ̈ܬܳܕܳܟܣܘ̣: ܘܒ̈ܳܬܶܐ ܕܰܡܗܰܝ̈ܡܢܶܐ ܒܣܳܥܘ̣ܪܘ̣ܬܳܐ ܕܝ̣ܠܳܟ ܛܳܒܬܳܐ ܘܰܡܛܰܟܰܣܬܳܐ ܘܰܡܫܰܝܰܢܬܳܐ ܣܥܘ̣ܪ ܐܽܢܽܘܢ: ܘܝܰܨܝ̣ܦܘ̣ܬܳܐ ܕܕܘ̣ܒܳܪ̈ܶܐ ܡܝܰܬܪ̈ܶܐ ܫܰܟܶܢ ܠܗܽܘܢ: ܘܦܘ̣ܢܳܝܳܐ ܕܫܶܐܠ̈ܳܬܳܐ ܕܝ̣ܠܗܽܘܢ ܠܳܐ ܬ̣ܶܟܠܶܐ ܡܳܪܝܳܐ: ܠܳܐ ܓܶܝܪ ܐܝ̣ܬ ܐܳܦܠܳܐ ܚܰܕ ܕܰܡ̇ܨܶܐ̣ ܠܡܶܦܪܰܩ ܐܶܠܳܐ ܐܶܢ ܐܰܢ̱ܬ ܡܳܪܝܳܐ: ܘܠܰܐܝܠܶܝܢ ܕܩ̣ܰܕܶܡܘ̱ ܚܙ̣ܰܩܘ̱ ܠܘܳܬܳܟ ܐܰܒܳܗ̈ܶܐ ܘܰܐܚ̈ܶܐ ܕܝ̣ܠܰܢ: ܐܰܢܝ̣ܚ ܒܰܐܘ̈ܘܳܢܶܐ ܛܘ̣ܒ̈ܬܳܢܶܐ ܕܡܶܢܳܟ ܡܠܝ̣ܟܝ̣ܢ ܘܰܡܛܰܝܒܝ̣ܢ ܠܡܰܚ̈ܒܳܢܶܐ ܕܝ̣ܠܳܟ: ܠܗܳܢܽܘܢ ܘܳܐܦ ܠܰܢ ܐܰܫܘܳܐ ܠܡܺܐܪܰܬ ܒܛܰܝܒܘ̣ܬܳܐ ܘܰܒܪ̈ܰܚܡܶܐ ܘܰܒܪܶܚܡܰܬ݀ ܐ̱ܢܳܫܘ̣ܬܳܐ ܕܝ̣ܚܝ̣ܕܳܝܳܐ ܒܪܳܐ ܕܝ̣ܠܳܟ: ܡܳܪܰܢ ܘܰܐܠܳܗܰܢ ܘܦܳܪܘ̣ܩܰܢ ܝܶܫܘ̣ܥ ܡܫܝ̣ܚܳܐ: ܕܥܰܡܶܗ ܠܳܟ ܦ̇ܐܶܐ̣ ܫܘ̣ܒܚܳܐ ܘܺܐܝܩܳܪܳܐ ܘܐܘ̣ܚܕܳܢܳܐ ܥܰܡ ܪܘ̣ܚܳܐ ܕܝ̣ܠܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܛܳܒܳܐ ܐܝ̣ܬܰܝܟ ܡܬܘ̣ܡܳܝܳܐ ܡܳܪܝܳܐ ܐܰܠܳܗܳܐ ܕܝ̣ܠܰܢ: ܘܠܰܝܬ ܛܳܒܳܐ ܐܶܠܳܐ ܐܶܢ ܐܰܢ̱ܬ ܒܰܠܚܘ̣ܕܰܝܟ: ܘܒܰܕܓܽܘܢ ܡܦܝ̣ܣܝ̣ܢܰܢ ܠܛܳܒܘ̣ܬܳܐ ܕܝ̣ܠܳܟ ܘܰܬܪܰܚܶܡ ܘܰܬܚܽܘܢ ܠܰܢ ܠܥܰܒ̈ܕܶܐ ܘܣܳܓ̈ܘ̣ܕܶܐ ܕܝ̣ܠܳܟ: ܘܰܠܣܰܟ̈ܠܘܳܬܳܐ ܘܡܶܬܥܰܒܪ̈ܳܢܘܳܬܳܐ ܕܝ̣ܠܰܢ ܫܘ̣ܒܩܳܢܳܐ ܫܰܟܶܢ ܒܰܫܦܝ̣ܥܘ̣ܬ ܡܪܰܚܡܳܢܘ̣ܬܳܟ ܘܰܠܛܳܒ̈ܳܬܳܐ ܕܰܠܥܳܠܰܡ ܐܰܫܘܳܐ: ܐܰܝܟܰܢܳܐ ܕܢ̇ܰܘܕܶܐ ܘܢ̇ܶܣܓܘ̣ܕ ܘܰܢܫܰܒܰܚ ܠܛܰܝܒܘ̣ܬܳܟ: ܡܳܪܰܢ ܘܰܐܠܳܗܰܢ ܠܥܳܠܡܝ̣ܢ܀