ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܫܶܡܫܳܐ ܕܙܰܕܝ̣ܩܘ̣ܬܳܐ: ܗܰܘ̇ ܕܰܠܫܶܡܫܳܐ ܡܶܬܪܰܓܫܳܢܳܐ ܐܰܥ̣ܪܶܒ ܒܦܘ̣ܩܕܳܢܶܗ: ܘܚܶܫܘ̣ܟܳܐ ܦ̣ܪܰܣ ܥܰܠ ܟܽܠܳܗܿ ܥܳܡܰܪܬܳܐ ܒܨܶܒܝܳܢܶܗ: ܘܰܠܢܘ̣ܗܪܳܐ ܫܒܝ̣ܚܳܐ ܚܰܦܝ̣ ܒܝܰܕ ܪܶܡܙܶܗ: ܘܠܺܠܝܳܐ ܟܡܝ̣ܪܳܐ ܐܰܝܬܝ̣ ܒܝܰܕ ܦܘ̣ܪܢܳܣܶܗ: ܡܦܝ̣ܣܝ̣ܢܰܢ ܠܳܟ ܡܳܪܝܳܐ ܒܥܶܕܳܢܳܐ ܗܳܢܳܐ ܕܠܺܠܝܳܐ ܕܬ̣ܰܕܢܰܚ ܒܠܶܒ̈ܰܘܳܬܰܢ ܢܘ̣ܗܪܳܐ ܕܦܘ̣ܩ̈ܕܳܢܰܝܟ ܩܰܕܝ̈ܫܶܐ ܘܰܐܠܳܗܳܝ̈ܶܐ ܒܗܳܢܳܐ ܥܶܕܳܢܳܐ ܕܩܰܘܡܳܐ ܩܰܕܡܳܝܳܐ ܕܠܺܠܝܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕܳܢ̈ܶܐ ܘܫܳܥ̈ܶܐ ܘܙܰܒ̈ܢܶܐ ܘܟܽܠܗܽܘܢ ܝܰܘ̈ܡܳܬܳܐ ܕܚܰܝ̈ܰܝܢ ܠܥܳܠܡܝ̣ܢ܀

ܣܶܕܪܳܐ

ܩܕܳܡܰܝܟ ܡܳܪܝܳܐ ܐܰܠܳܗܳܐ ܒܳܪܘ̣ܝܳܐ ܘܥܳܒܘ̣ܕܳܐ ܕܟܽܠ ܡܩܰܪܒܝ̣ܢܰܢ ܠܒܶܣ̈ܡܶܐ ܗܳܠܶܝܢ ܒܥܶܕܳܢܳܐ ܗܳܢܳܐ ܕܡܶܨܥܰܬ݀ ܝܰܘ̈ܡܳܬܳܐ ܕܨܰܘܡܳܐ ܩܰܕܝ̣ܫܳܐ: ܐܶܠܳܐ ܐܶܢ ܐܰܢ̱ܬ ܐܰܠܳܗܳܐ ܣܓܝ̣ܕܳܐ ܘܩܰܕܝ̣ܫܳܐ ܒܰܠܚܘ̣ܕܰܝܟ ܩܰܒܶܠ ܐܶܢܽܘܢ ܡ̣ܶܢ ܐܝ̣̈ܕܰܝܢ ܚܰܠܳܫ̈ܳܬܳܐ: ܟܰܕ ܡܚܰܣܶܐ ܐܰܢ̱ܬ ܒܗܽܘܢ ܟܽܠ ܡܰܥܒܕܳܢܘ̣ܬܳܐ ܒܝ̣ܫܬܳܐ ܘܰܡܚܰܒܰܠܬܳܐ ܕܡܶܢܰܢ ܐܶܣ̣ܬܰܥܪܰܬ݀ ܓܶܝܪ ܡܳܪܝܳܐ: ܡܶܛܽܠ ܕܰܚܢܰܢ ܡܚܰܝܒܝ̣ܢܰܢ ܒܟܽܠ ܙܢܳܐ ܕܰܚܛܝ̣ܬܳܐ: ܡܶܛܽܠ ܗܳܕܶܐ ܠܳܐ ܬ̣ܰܗܡܶܐ ܡ̣ܶܢ ܚܘ̣ܣܳܝܳܐ ܕܟܽܠܳܗܿ ܡܰܪܥܝ̣ܬܟ: ܐܶܠܳܐ ܐܰܝܟ ܣܰܓܺܝܽܐܘ̣ܬ ܚܢܳܢܳܐ ܘܪ̈ܰܚܡܶܐ ܥܰܬܝ̣ܪ̈ܶܐ ܕܡܶܢܳܟ ܕܥܰܡ ܦܝ̣ܪܡܳܐ ܗܳܢܳܐ: ܘܰܫܒܘ̣ܩ ܠܣܰܟ̈ܠܘܳܬܳܐ ܘܒܘ̣ܨܳܪ̈ܶܐ ܕܝ̣ܠܰܢ ܡܰܣܟ̈ܠܳܢܶܐ ܘܡܶܬܥܰܒܪ̈ܳܢܶܐ: ܥܒܶܕ ܐܳܣܝܘ̣ܬܳܐ ܡܫܰܡܠܰܝܬܳܐ ܠܰܐܝܠܶܝܢ ܕܒܰܐܢܰܢ̈ܩܰܐܣ ܘܰܒܟܘ̣ܪ̈ܗܳܢܶܐ ܡܫܰܚ̈ܠܦܶܐ ܐܰܚܝ̣ܕܝ̣ܢ: ܘܫܰܕܰܪ ܠܟܰܦ̈ܢܶܐ ܘܰܨܪ̈ܝ̣ܟܶܐ ܬܘ̣ܪܣܳܝܳܐ ܠܣܰܒܥܘ̣ܬܳܐ ܕܝ̣ܠܗܽܘܢ: ܠܰܐܝܠܶܝܢ ܕܰܒܫܘ̣ܥܒܳܕܳܐ ܡܰܪܝ̣ܪܳܐ ܟܕܝ̣ܢܝ̣ܢ ܙܰܒܢܳܐ ܕܥ̱ܳܗܶܢ ܠܦܘ̣ܪܩܳܢܳܐ ܕܝ̣ܠܗܽܘܢ ܗܰܒ: ܠܰܐܝܠܶܝܢ ܕܰܒܛܳܥܝܘ̣ܬܳܐ ܕܟܽܠ ܐܶܪ̈ܣܝ̣ܣ ܣܪܝ̣ܟܝ̣ܢ ܦܘ̣ܪܩܳܢܳܐ ܕܠܳܚܶܡ ܫܰܟܶܢ: ܠܰܐܝܠܶܝܢ ܕܰܒܝܰܡ̱̈ܡܶܐ ܥܰܣ̈ܩܶܐ ܩܝ̣ܢܕܘ̣ܢܝ̣̈ܣܶܐ ܥܳܒܪܝ̣ܢ ܐܰܘ ܒܐܘ̣ܪ̈ܚܳܬܳܐ ܩܰܫ̈ܝܳܬܳܐ ܘܰܕܚܝ̣̈ܠܳܬܳܐ: ܘܒܰܐܬܪ̈ܰܘܳܬܳܐ ܪ̈ܰܚܝ̣ܩܶܐ ܘܰܐ‌ܠܝ̣̈ܨܶܐ ܫܟܝ̣ܚܝ̣ܢ: ܠܘ̣ܒܳܒܳܐ ܘܫܘ̣ܘܙܳܒܳܐ ܠܟܽܠ ܚܰܕ ܫܰܕܰܪ: ܠܰܐܪ̈ܡܠܳܬܳܐ ܡܚܝ̣̈ܠܳܬܳܐ ܕܥܰܠ ܫܡܳܐ ܕܝ̣ܠܳܟ ܐܰܚܝ̣̈ܕܳܢ ܢܰܟܦܘ̣ܬܳܐ ܕܰܩܢܘ̣ܡܳܐ ܕܝ̣ܠܗܶܝܢ: ܝܰܨܝ̣ܦܘ̣ܬ ܠܘ̣ܒܳܒܳܐ ܕܚܰܝ̈ܰܝܗܽܘܢ ܥܒܶܕ: ܠܝܰܬܡ̈ܶܐ ܐܰܒܳܐ ܕܰܡܕܰܒܰܪ ܘܰܡܬܰܪܣܶܐ ܨܪܝ̣ܟܘ̣ܬܗܽܘܢ ܗܘܝ̣: ܠܰܕܒܝ̣ܪ̈ܰܝ ܩܛܝ̣ܪܳܐܝ̣ܬ ܡ̣ܶܢ ܕܝ̣ܢܳܐ ܕܗܳܪܟܳܐ: ܐܰܘ ܡ̣ܶܢ ܡܰܥ̈ܒܕܰܝ ܦܘ̣ܠܚܳܢܳܐ ܒܝ̣ܫܳܐ ܦܰܨܳܐ: ܠܰܐܚܝ̣̈ܕܰܝ ܡ̣ܶܢ ܪ̈ܘ̣ܚܶܐ ܒܝ̣̈ܫܳܬܳܐ: ܘܠܰܕܡܶܬܢܰܣܶܝܢ ܡ̣ܶܢ ܒܰܥܪܝ̣ܪܘ̣ܬܳܐ ܕܗܳܢܽܘܢ ܚܰܪܰܪ: ܠܰܐܝܠܶܝܢ ܕܒܰܡܰܐܝ̣ܺܢܘ̣ܬܳܐ ܕܰܚ̈ܛܳܗܶܐ ܥ̇ܢܶܝܢ̣ ܘܰܙܪܝ̣ܒܝ̣ܢ ܡ̣ܶܢ ܗܰܘ̇ ܕܰܠܩܘ̣ܒܠܳܐ: ܘܰܢܓܝ̣ܕܝ̣ܢ ܠܨܶܒܝܳܢܳܐ ܕܝ̣ܠܶܗ ܦܘ̣ܨܳܝܳܐ ܠܢܰܦ̈ܫܳܬܳܐ ܕܝ̣ܠܗܽܘܢ ܩܰܠܝ̣ܠܳܐܝ̣ܬ ܥܒܶܕ: ܠܝ̣ ܡܳܪܝ̱ ܠܚܰܛܳܝܳܐ ܘܕܳܘܝܳܐ: ܗܰܘ̇ ܕܝ̣ܕܝ̣ܥ ܒܗܳܕܶܐ ܘܰܦܪܝ̣ܫ ܡ̣ܶܢ ܟܽܠ ܐ̱ܢܳܫ: ܘܕܰܒܨܶܒܥܳܐ ܡܶܬܚܰܘܶܐ ܐ̱ܢܳܐ ܕܗܳܟܰܢܳܐ ܐܝ̣ܬܰܝ: ܪ̈ܰܚܡܶܐ ܘܫܘ̣ܒܩܳܢܳܐ ܕܰܚ̈ܛܳܗܶܐ ܫܰܟܶܢ: ܠܰܐܪܥܳܐ ܟܽܠܳܗܿ ܥܰܡ ܥܰܠ̈ܠܳܬܳܐ ܕܒܳܗܿ ܘܰܦܬܝ̣ܟܘ̣ܬܳܐ ܕܦܺܐܪ̈ܶܐ ܘܳܐܕ̈ܫܶܐ ܟܣܰܝ̈ܳܐ ܕܥܶܩܳܪ̈ܶܐ ܕܒܳܗܿ ܠܒܘ̣ܪܟܬܳܐ ܕܡܶܢܳܟ ܐܰܫܘܳܐ: ܠܟܽܠ ܢܰܛܰܪ ܘܫܰܟܶܢ ܪ̈ܰܚܡܶܐ ܡܶܛܽܠ ܕܕܝ̣ܠܳܟ ܗ̱ܘ̣ ܟܽܠ: ܠܕܝ̣ܢܳܐ ܡܳܪܝ̱ ܠܳܐ ܬܶܥܘ̣ܠ ܥܰܡܰܢ: ܡܶܛܽܠ ܕܝܳܕܰܥ ܐܰܢ̱ܬ ܡܚܝܠܘ̣ܬܶܗ ܕܰܟܝܳܢܰܢ ܐܰܝܟ ܒܳܪܘ̣ܝܳܐ ܕܝ̣ܠܶܗ ܕܒܰܐܝ̇ܕܳܐ ܡܚܝ̣ܠܘ̣ܬܳܐ ܘܚܰܫ̈ܶܐ ܟܕܝ̣ܢ: ܘܕܰܡܚܰܝܒܝ̣ܢܰܢ ܡ̣ܶܢ ܡܶܨܛܰܠܝܳܢܘ̣ܬܳܐ ܕܪܝ̣ܫ ܛܘ̣ܗܡܰܢ: ܐܶܠܳܐ ܘܰܠܗܳܠܶܝܢ ܕܫܰܠ̣ܶܡܘ̱ ܠܚܰܝ̈ܶܐ ܕܝ̣ܠܗܽܘܢ ܡ̣ܶܢ ܥܳܠܡܳܐ ܗܳܢܳܐ: ܬܰܡܳܢ ܒܰܐܘ̈ܘܳܢܶܐ ܐܘ̣ܪ̈ܫܠܶܡܳܝܶܐ ܡܕܝ̣ܢܬ̱ܳܐ ܗܳܝ̇ ܪܘ̣ܚܳܢܳܝܬܳܐ ܕܰܠܥܶܠ ܐܰܫܪܳܐ: ܟܰܕ ܫܳܒܶܩ ܐܰܢ̱ܬ ܠܗܽܘܢ ܟܽܠ ܟܘ̣ܬܡܳܐ ܘܛܘ̣ܠܫܳܐ ܕܡ̣ܶܢܗܽܘܢ ܐܶܣ̣ܬܥܰܪ: ܘܩܰܒܶܠ ܡܳܪܝܳܐ ܬܰܟܫ̈ܦܳܬܳܐ ܘܦܝ̣ܪ̈ܡܶܐ ܘܩܘ̣ܪ̈ܒܳܢܶܐ ܕܰܚܠܳܦܰܝܗܽܘܢ ܟܽܠ ܐܶܡܰܬܝ̱ ܕܗܘ̣ ܡܶܬܩܰܪܰܒ ܠܳܟ ܒܝܰܕ ܒܳܥ̈ܘܳܬܳܐ ܕܩܰܕܝ̣̈ܫܶܐ ܕܡ̣ܶܢ ܥܳܠܰܡ ܫܦ̣ܰܪܘ̱ ܠܳܟ: ܘܡܶܛܽܠ ܗܳܕܶܐ ܘܰܐܝܠܶܝܢ ܕܰܥܬܝ̣̈ܕܳܢ ܠܰܢ ܡܶܢܳܟ ܡܳܪܝܳܐ: ܬܰܘܕܝ̣ܬܳܐ ܐܰܡܝ̣ܢܬܳܐ ܡܩܰܪܒܝܢܰܢ ܠܳܟ ܐܰܠܳܗܳܐ ܐܰܒܳܐ: ܘܠܰܒܪܳܟ ܝ̣ܚܝ̣ܕܳܝܳܐ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀