ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܝܰܠܕܳܐ ܡܬܘ̣ܡܳܝܳܐ ܘܠܳܐ ܙܰܒܢܳܝܳܐ: ܪܳܡܳܐ ܘܰܡܥܰܠܝܳܐ ܘܰܡܫܰܒܚܳܐ: ܗܰܘ̇ ܕܰܠܥܰܕܥܺܐܕܳܐ ܕܝܳܠܶܕܬܶܗ ܪܰܡ̣ܪܶܡ ܘܕܘ̣ܟܪܳܢܳܐ ܕܩܰܕܝ̣̈ܫܰܘܗ̱ܝ ܫܰܡ̣ܠܝ̣: ܠܗܰܘ̇ ܡܳܪܳܐ ܕܩܰܕܝ̣̈ܫܶܐ ܕܥ̱ܘ̣ܗܕܳܢܳܐ ܕܰܐܬܠܝ̣̈ܛܰܘܗ̱ܝ ܐܰܘܪܶܒ: ܘܰܚܠܘ̣ܠܳܐ ܕܪ̈ܳܚܡܰܘܗ̱ܝ ܢ̣ܰܨܰܚ: ܠܗܰܘ̇ ܒܪܳܐ ܫܰܪܝ̣ܪܳܐ ܕܠܰܐܒܳܗ̈ܳܬܳܐ ܒܚܝ̣ܪ̈ܶܐ ܘܡܰܠ̈ܦܳܢܶܐ ܚܣܰܝ̈ܳܐ ܫܰܪܰܪ: ܘܰܢܝܳܚܬܳܐ ܕܥܰܢܝ̣̈ܕܶܐ ܡܗܰܝܡ̈ܢܶܐ ܒܐ̱ܪ̈ܳܙܶܐ ܡܰܚ̈ܝܳܢܶܐ ܫܰܡ̣ܠܝ̣: ܛܳܒܳܐ ܕܠܶܗ ܢ̇ܶܬܕܟܰܪ ܘܠܶܗ ܢ̇ܫܰܒܰܚ ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܦܶܠܓܶܗ ܕܝܰܘܡܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕܳܢ̈ܶܐ ܘܫܳܥ̈ܶܐ ܘܙܰܒ̈ܢܶܐ ܘܟܽܠܗܽܘܢ ܝܰܘ̈ܡܳܬܳܐ ܕܚܰܝ̈ܰܝܢ ܠܥܳܠܡܝ̣ܢ܀

ܣܶܕܪܳܐ

ܪܳܥܝܳܐ ܕܚܰܝ̈ܠܰܘܳܬܳܐ ܫܡܰܝ̈ܳܢܶܐ ܕܰܫܒ̣ܰܩ ܒܰܡܪ̈ܰܘܡܶܐ ܠܥܳܢ̈ܳܐ ܠܳܐ ܛܳܥܝ̣ܬܳܐ ܘܰܠܘܳܬ ܫܟܳܚܬܶܗ ܕܥܶܪܒܳܐ ܐܰܒܝ̣ܕܳܐ ܒܪܶܚܡܰܬ݀ ܐ̱ܢܳܫܘ̣ܬܶܗ ܐܶܬ̣ܳܐ: ܘܟܰܕ ܐܶܫܟ̣ܚܶܗ ܛܰܥ̣ܢܶܗ ܥܰܠ ܟܰܬܦܴ̈ܬܶܗ ܩܰܕܝ̣̈ܫܳܬܳܐ ܘܠܰܛܝܳܪܶܗ ܐܰܦܢ̣ܝܶܗ: ܘܰܩ̣ܪܳܐ ܠܚܰܝ̈ܠܰܘܳܬܳܐ ܥܶܠܳܝ̈ܶܐ ܕܰܪܚܝ̣ܡܝ̣ܢ ܠܶܗ ܘܚܰܕܘ̣ܬܳܐ ܥܺܐܕܳܢܳܝܬܳܐ ܥܒ̣ܰܕ: ܨܒܝ̣ ܒܰܢ ܡܳܪܝܳܐ ܒܪ̈ܰܚܡܰܝܟ: ܘܩܰܒܶܠ ܡܶܢܰܢ ܒܨܝ̣ܪ̈ܶܐ ܘܚܰܛܳܝ̈ܶܐ ܥܰܒܕܰܝ̈ܟ ܠܥܶܛܪܳܐ ܗܳܢܳܐ ܕܒܶܣ̈ܡܶܐ ܕܰܡܩܰܪܒܝ̣ܢܰܢ ܩܕܳܡܰܝܟ: ܘܟܽܠ ܚܛܳܗ̈ܶܐ ܡܳܪܝ̱ ܘܣܰܟܠ̈ܘܳܬܳܐ ܕܰܐܝܟ ܠܒܝ̣̈ܫܰܝ ܒܶܣܪܳܐ ܕܐܶܬܥܒ̣ܰܪܢܰܢ ܩܕܳܡܰܝܟ ܒܨܶܒܝܳܢܳܐ ܘܰܕܠܳܐ ܒܨܶܒܝܳܢܳܐ ܘܒܝ̣ܕܰܥܬܳܐ ܘܰܕܠܳܐ ܒܝ̣ܕܰܥܬܳܐ: ܫܒܘ̣ܩ ܘܚܰܣܳܐ ܘܰܠܚܝ̣ ܘܰܐܥܒܰܪ ܒܒܳܥ̈ܘܳܬܳܐ ܕܟܽܠܗܽܘܢ ܐܰܝܠܶܝܢ ܕܡ̣ܶܢ ܥܳܠܰܡ ܫܦ̣ܰܪܘ̱ ܠܳܟ: ܕܰܐܒܳܗ̈ܳܬܳܐ ܩܰܕܝ̣̈ܫܶܐ ܘܪ̈ܝ̣ܫܰܝ ܐܰܒܳܗ̈ܳܬܳܐ: ܕܰܢܒܺܝ̈ܶܐ: ܕܰܫܠܝ̣ܚ̈ܶܐ: ܕܟܳܪ̈ܘ̣ܙܶܐ: ܕܶܐܘܰܢܓܶܠܝ̣̈ܣܛܶܐ: ܕܣܳܗ̈ܕܶܐ: ܕܡܰܘܕ̈ܝܳܢܶܐ: ܘܰܕܩܰܕܝ̣ܫܬܳܐ ܝܳܠܕܰܬ݀ ܐܰܠܳܗܳܐ ܡܰܪܝܰܡ: ܘܰܕܟܽܠ ܓܰܒܪܳܐ ܙܰܕܝ̣ܩܳܐ ܕܰܒܗܰܝܡܳܢܘ̣ܬܳܐ ܕܰܫܪܳܪܳܐ ܐܶܫܬܰܡ̣ܠܝ̣: ܕܒܰܨܠܰܘ̈ܳܬܳܐ ܕܝ̣ܠܗܽܘܢ ܘܰܒܬܰܟܫ̈ܦܳܬܗܽܘܢ ܕܰܚܠܳܦܰܝܢ: ܫܰܟܶܢ ܫܰܝܢܳܐ ܘܰܫܠܳܡܳܐ ܠܥܳܠܡܳܐ ܟܽܠܶܗ ܘܰܠܥܺܕܬܳܐ ܕܝ̣ܠܳܟ ܩܰܕܝ̣ܫܬܳܐ: ܒܡܰܘܗ̈ܒܳܬܳܐ ܕܪܘ̣ܚܳܐ ܕܝ̣ܠܳܟ ܩܰܕܝ̣ܫܳܐ ܨܰܒܶܬ ܘܗܰܕܰܪ: ܨܒܝ̣ ܒܳܗ̇ ܘܨܘ̣ܒ ܒܳܗ̇ ܫܪܳܪܳܐ ܕܗܰܝܡܳܢܘ̣ܬܳܐ: ܡܰܠ̈ܦܳܢܶܐ ܒܚܝ̣ܪ̈ܶܐ ܘܡܰܐܪ̈ܙܳܢܶܐ ܬܪ̈ܝ̣ܨܶܐ ܕܦܳܣܩܝ̣ܢ ܬܪܝ̣ܨܳܐܝ̣ܬ ܠܡܶܠܬܳܐ ܕܰܫܪܳܪܳܐ: ܩܰܫܝ̣̈ܫܶܐ ܘܰܡܫܰܡ̈ܫܳܢܶܐ ܡܰܠ̈ܝܰـܝ ܡ̣ܶܢ ܣܘ̣ܟܳܠܳܐ ܕܬܰܪܥܝ̣ܬܳܐ ܘܚܰܝ̈ܶܐ ܕܰܦ̇ܐܶܝܢ̣ ܠܟܳܗܢܘ̣ܬܳܐ ܕܰܡܩܰܪܒܝ̣ܢ ܨܶܝܕ ܐ̱ܪ̈ܳܙܶܐ ܐܰܠܳܗ̈ܳܝܶܐ: ܠܡܰܠ̈ܟܶܐ ܘܕܰܝ̈ܳܢܶܐ ܘܪ̈ܝ̣ܫܳܢܶܐ ܕܐܝ̣ܬ ܒܥܳܠܡܳܐ ܗܳܢܳܐ: ܗܰܒ ܕܢ̣ܶܬܪܰܟܢܽܘܢ ܠܘܳܬ ܢܳܛܘ̣ܪܘ̣ܬܳܐ ܕܦܘ̣ܩ̈ܕܳܢܶܐ ܕܝ̣ܠܳܟ ܩܰܕܝ̣̈ܫܶܐ ܘܡܰܥܒ̈ܕܰܝ ܚܰܝ̈ܶܐ: ܠܣܳܒ̈ܶܐ ܣܰܡܶܟ ܘܚܰܝܶܠ ܘܥܰܕܰܪ ܒܚܰܝܠܳܐ ܕܡܶܢܳܟ: ܠܰܥܠܰܝ̈ܡܶܐ ܚܰܝܠܬܳܢܘ̣ܬܳܐ ܘܓܰܢ̱ܒܳܪܘ̣ܬܳܐ ܕܠܘ̣ܩܒܰܠ ܚܰܫ̈ܶܐ ܫܟܝ̣ܪ̈ܶܐ ܫܰܟܶܢ: ܘܰܪܟܝ̣ܢܘ̣ܬ ܨܰܘܪ̈ܶܐ ܕܬܰܪ̈ܥܝܳܬܳܐ: ܠܰܛܠܳܝ̈ܶܐ ܬܰܪܐܰܐ ܒܝ̣ܕܰܥܬܳܐ ܘܰܒܕܘ̣ܒܳܪ̈ܶܐ ܕܰܡܝܰܬܪܘ̣ܬܳܐ: ܠܝܰܬܡ̈ܶܐ ܘܠܰܐܪ̈ܡܠܳܬܳܐ ܩܰܝܶܡ ܘܥܰܕܰܪ ܒܚܰܘ̈ܣܳܢܰܝܟ ܣܰܓܺܝ̈ܶܐܐ: ܠܰܛܠܝ̣̈ܡܶܐ ܘܠܰܥܠܝ̣̈ܒܶܐ ܘܠܰܐܝܠܶܝܢ ܕܰܕܒܝ̣ܪܝ̣ܢ ܒܰܩܛܝ̣ܪܳܐ ܕܥܰܘܠܳܐ ܫܰܘܙܶܒ ܘܦܰܨܳܐ ܒܝܰܕ ܙܳܟܘ̣ܬܳܐ ܕܟܺܐܢܘ̣ܬܳܐ ܕܕܝ̣̈ܢܰܝܟ: ܠܰܟܪ̈ܝ̣ܗܶܐ ܘܠܰܐܠܝ̣̈ܨܶܐ ܘܠܰܐܝܠܶܝܢ ܕܡܶܬܢܰܣܶܝܢ ܡ̣ܶܢ ܪ̈ܘ̣ܚܶܐ ܒܝ̣̈ܫܳܬܳܐ ܚܘ̣ܪܳܪܳܐ ܘܰܓܗܳܝܬܳܐ ܕܡ̣ܶܢ ܟܘ̣ܪ̈ܗܳܢܰܝܗܽܘܢ ܫܰܟܶܢ: ܠܰܐܣܝ̣ܪ̈ܶܐ ܫܪܝ̣ ܡܳܪܝܳܐ ܒܪ̈ܰܚܡܰܝܟ: ܠܛܳܥܰܝ̈ܳܐ ܩܪܝ̣ ܘܰܐܗܦܶܟ ܠܘܳܬܳܟ: ܘܠܰܐܝܠܶܝܢ ܕܰܫܪܰܥ̣ܘ̱ ܘܰܢܦ̣ܰܠܘ̱ ܒܦܰܚ̈ܶܐ ܕܰܚܛܝ̣ܬܳܐ ܕܰܠܳܐ ܘܰܐܩܝ̣ܡ ܒܣܘ̣ܓܳܐܐ ܪܰܒܳܐ ܕܰܡܪܰܚܡܳܢܘ̣ܬܳܟ: ܠܕܰܝܪ̈ܳܝܶܐ ܡܳܪܝ̱ ܘܥܳܢܘ̈ܳܝܶܐ ܘܰܒܬܘ̣̈ܠܶܐ ܘܰܒܬܘ̣̈ܠܳܬܳܐ ܕܢܝ̣ܪܳܐ ܕܰܨܠܝ̣ܒܳܐ ܕܝ̣ܠܳܟ ܛܥܝ̣ܢܝ̣ܢ: ܗܰܒ ܠܗܽܘܢ ܠܒܝ̣ܒܘ̣ܬܳܐ ܘܰܡܚܰܡܣܢܳܢܘ̣ܬܳܐ ܗܳܝ̇ ܕܰܥܕܰܡܳܐ ܠܰܕܡܳܐ: ܠܰܟܠܝ̣ܠܳܐ ܕܫܰܢ̱ܬܳܐ ܒܰܪܶܟ ܒܛܰܝܒܘ̣ܬܳܟ: ܫܦܝ̣ܥܘ̣ܬܳܐ ܕܦܺܐܪ̈ܶܐ ܫܰܪܬܰܚ ܒܒܰܣܝ̣ܡܘ̣ܬܳܟ ܡܶܛܽܠ ܒܳܝ̈ܫܶܐ ܘܡܶܣ̈ܟܺܢܶܐ ܕܥܰܡܳܟ: ܥܰܠ ܟܽܠ ܚܘ̣ܣ: ܘܥܰܠ ܟܽܠ ܪܰܚܶܡ: ܘܰܠܟܽܠ ܩܪܝ̣ ܘܰܐܝܬܳܐ ܠܐܘ̣ܪܚܳܐ ܕܦܘ̣ܩ̈ܕܳܢܰܝܟ ܩܰܕܝ̣̈ܫܶܐ ܘܡܰܥܒ̈ܕܰܝ ܚܰܝ̈ܶܐ: ܘܰܠܥܰܢܝ̣̈ܕܶܐ ܡܗܰܝܡ̈ܢܶܐ ܐܰܢܝ̣ܚ ܐܶܢܽܘܢ ܒܰܐܘ̈ܘܳܢܶܐ ܕܝ̣ܠܳܟ ܫܡܰܝ̈ܳܢܶܐ: ܡܶܛܽܠ ܕܡܳܪܳܐ ܕܚܰܝ̈ܶܐ ܘܰܕܡܝ̣̈ܬܶܐ ܐܝ̣ܬܰܝܟ: ܘܠܳܟ ܬܶܫܒܘ̣ܚܬܳܐ ܘܬܰܘܕܝ̣ܬܳܐ ܡܰܣܩܝ̣ܢܰܢ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܰܡ ܥܳܠܡܝ̣ܢ ܐܰܡܝ̣ܢ܀