ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܗܺܘܝ̣ ܠܰܢ ܡܳܪܝܳܐ ܨܰܦܪܳܐ ܕܠܳܐ ܥܳܒܰܪ ܘܢܘ̣ܗܪܳܐ ܕܠܳܐ ܚܳܫܶܟ: ܘܐܝ̣ܡܳܡܳܐ ܕܠܳܐ ܦܳܛܰܪ ܘܠܳܐ ܡܶܫܬܪܶܐ: ܘܰܒܝܰܕ ܢܘ̣ܗܪܳܐ ܕܦܘ̣ܩ̈ܕܳܢܶܐ ܕܝ̣ܠܳܟ ܐܶܘܰܢ̈ܓܶܠܳܝܶܐ ܘܦܳܪ̈ܘ̣ܩܳܝܶܐ ܛܪܘ̣ܕ ܡ̣ܶܢ ܢܰܦ̈ܫܳܬܰܢ ܘܦܰܓܪ̈ܰܝܢ ܠܟܽܠ ܚܘ̣ܫܳܒܳܐ ܥܕܝ̣ܠܳܐ: ܘܰܠܟܽܠ ܬܰܪܥܝ̣ܬܳܐ ܡܚܰܒܰܠܬܳܐ: ܐܰܝܟܰܢܳܐ ܕܥܰܡ ܡܰܥܰܠܬܳܐ ܕܝ̣ܠܶܗ ܕܨܰܦܪܳܐ ܠܘܳܬ ܦܘ̣ܠܚܳܢܳܐ ܕܟܽܠܗܶܝܢ ܛܳܒ̈ܳܬܳܐ ܚܘܝ̣ܚܳܐܝ̣ܬ ܢ̇ܩܰܕܶܡ: ܐܰܒܳܐ ܘܰܒܪܳܐ ܘܪܘ̣ܚܳܐ ܩܰܕܝ̣ܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܛܳܒܳܐ ܕܠܳܐ ܪܳܓܶܙ: ܘܒܰܣܝ̣ܡܳܐ ܕܠܳܐ ܡܶܬܚܰܡܰܬ: ܠܗܰܘ̇ ܥܰܬܝ̣ܪܳܐ ܕܠܳܐ ܡܶܬܡܰܣܟܰܢ: ܠܗܰܘ̇ ܚܰܢܳܢܳܐ ܕܰܛܥܝ̣ܢ ܝܘ̣ܩܪܶܗ ܕܥܳܠܡܳܐ ܘܰܒܛܝ̣ܠ ܠܶܗ ܥܰܠ ܚܰܝ̈ܶܐ ܕܐ̱ܢܳܫܘ̣ܬܳܐ: ܘܰܡܟܰܘܶܢ ܐܰܝܟ ܡܰܠܦܳܢܳܐ ܘܪܳܕܘ̣ܝܳܐ ܥܳܨܘ̣ܒܳܐ: ܕܩܳܪܶܐ ܠܰܟܪ̈ܝ̣ܗܶܐ ܕܬܰܘ ܐܶܬܰܐܣܰܘ ܡܰܓܳܢ: ܘܰܠܚܰܛܳܝ̈ܶܐ ܝܳܗܶܒ ܫܘ̣ܒܩܳܢܳܐ: ܕܠܶܗ ܙܳܕܩܳܐ ܘܡܶܬܚܝ̣ܒܳܐ ܬܶܫܒܘ̣ܚܬܳܐ: ܒܗܳܢܳܐ ܨܰܘܡܳܐ ܩܰܕܝ̣ܫܳܐ ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܨܰܦܪܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕܳܢ̈ܶܐ ܘܫܳܥ̈ܶܐ ܘܙܰܒ̈ܢܶܐ ܘܟܽܠܗܽܘܢ ܝܰܘ̈ܡܳܬܳܐ ܕܚܰܝ̈ܰܝܢ ܠܥܳܠܡܝ̣ܢ܀

ܣܶܕܪܳܐ

ܐܰܠܳܗܳܐ ܗܰܘ̇ ܕܡܰܒܰܥ ܐܰܢ̱ܬ ܠܪ̈ܰܚܡܶܐ ܕܝ̣ܠܳܟ ܡܬܘ̣ܡܳܐܝ̣ܬ ܘܡܰܫܦܰܥ ܐܰܢ̱ܬ ܠܰܚܢܳܢܳܐ ܕܝ̣ܠܳܟ ܐܰܡܝ̣ܢܳܐܝ̣ܬ: ܗܰܘ̇ ܕܰܠܟܽܠ ܐܢܳܫ ܒܒܰܣܝ̣ܡܘ̣ܬܳܐ ܙܳܟܶܐ ܐܰܢ̱ܬ: ܗܰܘ̇ ܣܰܓܝ̣ ܡܰܦ̈ܩܳܢܶܐ ܒܠܳܐ ܡܰܦܩܳܢܳܐ: ܗܰܘ̇ ܡܶܬܬܰܗܝܳܢܳܐ ܠܘܳܬ ܡܣܳܡܒܪܝ̣ܫܳܐ ܘܩܰܠܝ̣ܠܳܐܝ̣ܬ ܠܘܳܬ ܣܳܥܘ̣ܪܘ̣ܬ ܛܳܒܘ̣ܬܳܐ: ܗܰܘ̇ ܕܰܠܦܳܥ̈ܠܶܐ ܟܰܫܝ̣ܪ̈ܶܐ ܕܦܘ̣ܩ̈ܕܳܢܶܐ ܕܝ̣ܠܳܟ ܡܩܰܕܶܫ ܐܰܢ̱ܬ: ܘܫܳܘ̈ܝ݂ܰܝ݂ ܠܡܰܠܰܐܟ̈ܶܐ ܥܳܒܶܕ ܐܰܢ̱ܬ ܠܰܡܪ̈ܰܘܡܶܐ ܕܶܝܢ ܩܳܪܶܐ ܐܰܢ̱ܬ: ܘܰܠܘܳܬ ܓܰܢܒܳܪܘ̣ܬܳܐ ܪܘ̣ܚܳܢܳܝܬܳܐ ܡܳܫܰܚ ܐܰܢ̱ܬ: ܗܰܘ̇ ܕܰܠܚܰܛܳܝ̈ܶܐ ܫܘ̣ܒܩܳܢܳܐ ܡܫܰܟܶܢ ܐܰܢ̱ܬ: ܘܠܰܐܝܠܶܝܢ ܕܬܳܝܒܝ̣ܢ ܦܘ̣ܪ̈ܥܳܢܶܐ ܡܫܰܡ̈ܠܝܶܐ ܝܳܗܶܒ ܐܰܢ̱ܬ: ܟܰܕ ܗܳܫܳܐ ܥܬܝ̣ܕܝ̣ܢܰܢ ܡܳܪܝܳܐ ܡܪܰܚܡܳܢܳܐ ܕܰܠܬܰܟܫ̈ܦܳܬܳܐ ܕܝ̣ܠܰܢ ܢ̇ܶܐܫܘ̣ܕ: ܘܠܐܘ̣ܠ̈ܨܳܢܶܐ ܕܝ̣ܠܰܢ ܠܡܶܬܢܳܐ ܩܕܳܡ ܬܶܫܒܘ̣ܚܬܳܐ ܕܝ̣ܠܳܟ: ܠܳܐ ܒܚܶܡܬܳܐ ܬ̣ܶܣܛܶܐ ܡ̣ܶܢ ܚܰܛܳܝ̈ܶܐ ܘܡܶܬ̈ܚܰܢܳܢܶܐ ܥܰܒ̈ܕܶܐ ܕܝ̣ܠܳܟ ܡܳܪܝܳܐ: ܐܳܦܠܳܐ ܬ̣ܚܘ̣ܪ ܠܘܳܬ ܪܰܒܘ̣ܬܳܐ ܕܰܚ̈ܛܳܗܶܐ ܕܝ̣ܠܰܢ ܕܚܝ̣̈ܠܶܐ ܘܥܰܘ̈ܠܶܐ ܙܝ̣̈ܥܶܐ: ܐܶܠܳܐ ܟܰܕ ܠܥܘ̣ܡܩܳܐ ܕܛܳܒ̈ܳܬܳܐ ܠܟܽܠܗܽܘܢ ܐܰܡ̈ܢܶܐ ܕܝ̣ܠܰܢ ܒܝ̣̈ܫܶܐ ܡܫܰܕܰܪ ܐܰܢ̱ܬ ܒܰܪ̈ܣܝ̣ܣܶܐ: ܘܰܡܫܰܘܬܦܘ̣ܬ ܚܰܫܳܐ ܘܰܒܛܰܠܳܐ ܕܚܰܝܘ̣ܣܬܳܢܘ̣ܬܳܐ ܕܝ̣ܠܳܟ ܠܰܡܦܰܝܳܓܘ̣ ܠܰܢ ܕܒܰܐܬܘ̣ܢܳܐ ܕܢܶܣ̈ܝܘ̣ܢܶܐ ܕܡܶܬܝܰܩܕܝ̣ܢܰܢ ܐܰܫܘܳܐ: ܐܝ̣ܢ ܡܳܪܝܳܐ ܠܳܐ ܬܫܘ̣ܛ ܠܒܳܥ̈ܘܳܬܳܐ ܕܥܰܡܳܐ ܕܝ̣ܠܳܟ ܠܳܐ ܬܰܗܦܶܟ ܦܰܪܨܘ̣ܦܳܟ ܡ̣ܶܢ ܝܳܪܬܘ̣ܬܳܟ ܠܳܐ ܬܕܽܘܢ ܠܰܢ ܒܪܘ̣ܓܙܳܐ: ܠܳܐ ܬ̣ܚܰܝܶܒ ܠܰܢ ܒܚܶܡܬܳܐ ܠܳܐ ܬ̣ܣܝ̣ܡ ܚܛܳܗ̈ܶܐ ܕܛܳܥܝܘ̣ܬܳܐ: ܠܳܐ ܬ̣ܶܬܥ̱ܰܗܰܕ ܠܰܢ ܒܝ̣̈ܫܳܬܳܐ ܗܳܠܶܝܢ ܕܰܒܛܰܠܝܘ̣ܬܳܐ ܣܥ̣ܰܪܢܰܢ: ܐܰܝܠܶܝܢ ܕܰܒܒܝ̣̈ܫܳܬܳܐ ܣܐܶܒ̣ܢܰܢ ܚܢܰܢ ܚܰܛܳܝ̈ܶܐ ܐܶܬܥ̱ܰܗܰܕ ܕܶܝܢ ܝܰܬܝ̣ܪܐܝ̣ܬ ܠܪ̈ܰܚܡܶܐ ܕܝ̣ܠܳܟ ܕܡ̣ܶܢ ܥܳܠܰܡ ܗܳܠܶܝܢ ܕܥܰܬܝ̣ܪܳܐܝ̣ܬ ܒܟܽܠܙܒܰܢ ܐܳܫܶܕ ܐܰܢ̱ܬ: ܠܶܐܫܛܳܪܳܐ ܕܰܚ̈ܛܳܗܰܝܢ ܗܳܠܶܝܢ ܕܰܒܨܶܒܝܳܢܳܐ ܘܰܕܠܳܐ ܒܶܨܒܝܳܢܳܐ: ܬܘ̣ܒ ܣܰܕܶܩ ܠܚܰܘܒܬܳܐ ܕܪ̈ܶܒܘ ܟܰܟܪ̈ܶܐ ܕܫܳܪ̈ܥܳܬܳܐ ܕܝ̣ܠܰܢ ܥܛܝ̣: ܐܶܬܕܰܡܶܐ ܐܰܢ̱ܬ ܒܝ ܐܳܦ ܗܳܫܳܐ ܡܳܪܝܳܐ ܪܳܚܶܡ ܐ̱ܢܳܫܳܐ ܛܰܢ ܒܢܝ̣ܚܘ̣ܬܳܐ ܕܝ̣ܠܳܟ: ܐܳܦ ܗܳܫܳܐ ܐܳܘ ܥܰܫܝܢܳܐ ܠܒܝܫܘ̣ܬܳܐ ܕܝ̣ܠܰܢ ܒܪܶܚܡܰܬ ܐ̱ܢܳܫܘ̣ܬܳܟ ܙܟܝ̣: ܐܰܟܶܣ ܡܰܢ ܐܰܝܟ ܐܰܒܳܐ ܟܰܘܶܢ ܠܰܢ ܐܰܝܟ ܝܳܨܘ̣ܦܳܐ: ܐܰܝܟ ܐܳܣܝܳܐ ܕܶܝܢ ܛܳܒܳܐ ܠܠܶܒܰܘ̈ܳܬܳܐ ܕܝ̣ܠܰܢ ܐܰܢܝ̣ܚ: ܠܒܝ̣̈ܫܳܬܳܐ ܕܝ̣ܠܰܢ ܒܰܛܶܠ: ܬܰܪ̈ܥܝܳܬܰܢ ܬܰܪܶܨ: ܟܺܐܒ̈ܶܐ ܢܰܦܫܳܢܳܝ̈ܶܐ ܐܰܚܠܶܡ ܟܘ̣ܪ̈ܗܳܢܶܐ ܕܦܰܓܪܳܐ ܐܰܣܳܐ: ܠܕܰܡܚܝ̣ܠܝ̣ܢ ܘܠܰܕܢܰܦܝ̣ܠܝ̣ܢ ܚܰܝܶܠ ܘܰܐܩܝ̣ܡ: ܠܰܐܝܠܶܝܢ ܕܰܒܫܰܦܝ̣ܪܘ̣ܬ ܬܰܩܢܘ̣ܬܳܐ ܐܝ̣ܬܰܝܗܽܘܢ ܒܚܘ̣ܠܡܳܢܳܐ ܛܰܪ: ܘܰܗܘܝ̣ ܡܳܪܝܳܐ ܠܰܐܪ̈ܡܠܳܬܳܐ ܚܠܳܦ ܓܰܒܪ̈ܶܐ ܠܝܰܬܡ̈ܶܐ ܚܠܳܦ ܐܰܒܳܐ: ܠܰܡܫܰܘ̈ܚܕܶܐ ܨܰܘܬܳܐ ܠܰܐܟܣ̈ܢܳܝܶܐ ܡܟܰܢܫܳܢܳܐ: ܠܬܰܘ̈ܬܳܒܶܐ ܝܳܨܘ̣ܦܳܐ: ܠܓܰܠ̈ܘܳܝܶܐ ܡܩܰܒܠܳܢܳܐ: ܠܚܳܙܘ̣ܩ̈ܶܐ ܒܰܪ ܠܶܘܝ̣ܬܳܐ: ܠܛܳܝܘ̣ܦ̈ܶܐ ܠܡܺܐܢܳܐ ܠܰܐܝܠܶܝܢ ܕܰܐܒܝ̣ܠܝ̣ܢ ܘܰܠܐܶܝܢ ܐܰܦܨܰܚ: ܠܰܐܝܠܶܝܢ ܕܰܒܥܳܩ̈ܳܬܳܐ ܘܰܒܢܶܣ̈ܝܘ̣ܢܶܐ ܒܰܝܰܐ: ܠܰܐܝܠܶܝܢ ܕܰܪܕܝ̣ܦܝ̣ܢ ܘܰܐ‌ܠܝ̣ܨܝ̣ܢ ܡܠܰܒܒܳܢܳܐ ܠܢܰܦ̈ܫܳܬܳܐ ܕܟܰܦ̈ܢܳܢ ܘܨܰܗ̈ܝܳܢ ܘܡܰܪܝ̣ܪ̈ܳܬܳܐ ܚܰܠ̈ܝܳܬܳܐ ܚܫܝ̣̈ܒܳܢ ܠܗܶܝܢ ܡ̣ܶܢ ܛܳܒ̈ܳܬܳܐ ܕܝ̣ܠܳܟ ܣܰܒܰܥ: ܠܰܕܚܰܣܝ̣ܪܝ̣ܢ ܡܰܠܳܐ: ܠܕܰܐ‌ܠܝ̣ܨܝ̣ܢ ܐܰܪܘܰܚ: ܦܪܘ̣ܩ ܠܰܫܒܝ̣ܬܳܐ ܕܝ̣ܠܰܢ ܘܰܐܗܦܶܟܝ̣ܗܿ ܐܰܝܟ ܦܨܝ̣̈ܕܶܐ ܕܰܒܬܰܝܡܢܳܐ ܬܶܥܘ̣ܠܝ̱ ܩܕܳܡܰܝܟ ܬܰܚܢܰܢܬܳܐ ܕܰܐܝܠܶܝܢ ܕܰܐܣܝ̣ܪܝ̣ܢ: ܘܦܰܣܶܩ ܠܰܦܟܳܪ̈ܶܐ ܕܝ̣ܠܗܽܘܢ ܫܰܘܙܶܒ ܠܰܒ̈ܢܰܝܳܐ ܕܰܩܛܝ̈ܠܶܐ ܘܰܫܒܘ̣ܩ ܐܰܪܥܳܐ ܠܥܰܒ̈ܕܶܐ ܕܝ̣ܠܳܟ: ܠܗܳܠܶܝܢ ܕܥܰܒܕܘ̣ܬܳܐ ܩܫܝ̣ܬܳܐ ܘܡܰܪܝ̣ܪܬܳܐ ܡܶܬܬܰܒܥܝ̣ܢ ܡ̣ܶܢ ܡܳܪ̈ܰܝܳܐ ܡܰܪܝ̣ܪ̈ܶܐ ܘܠܳܐ ܡܗܰܝ̈ܡܢܶܐ ܘܠܳܐ ܡܪ̈ܰܚܡܳܢܶܐ ܚܰܪܰܪ: ܠܗܳܠܶܝܢ ܕܡ̣ܶܢ ܕܰܝܘ̈ܶܐ ܚܰܪ̈ܡܶܐ ܡܶܬܢܰܣܶܝܢ ܚܘ̣ܪܳܪܳܐ ܡܫܰܡܠܝܳܐ: ܗܰܒ: ܫܰܟܶܢ ܕܶܝܢ ܡܳܪܝܳܐ ܐܳܦ ܠܥܰܬܝ̣ܪ̈ܶܐ ܡܫܰܘܬܦܘ̣ܬܳܐ ܘܫܰܦܝ̣ܪܘ̣ܬ ܡܰܘܗ̈ܒܳܬܳܐ ܕܰܒܝܰܨܝ̣ܦܘ̣ܬܳܐ: ܠܰܐܝܠܶܝܢ ܕܩܳܝܡܝ̣ܢ ܒܪܝ̣ܫܳܐ ܕܥܰܡܳܐ ܕܝ̣ܠܳܟ ܗܳܝ ܕܠܳܐ ܗ̱ܘܳܐ ܛܪܘܢܐܝ̣ܬ ܐܶܠܳܐ ܢܳܡܘ̣ܣܳܐܝ̣ܬ ܢܶܗܘܽܘܢ ܪ̈ܝ̣ܫܶܐ: ܘܠܳܐ ܗ̱ܘܳܐ ܡܦܰܬ̈ܠܳܬܳܐ ܐܶܠܳܐ ܟܺܐܢ̈ܳܬܳܐ ܢܕܘ̣ܢܽܘܢ: ܠܗܶܕܝ̈ܘ̣ܛܶܐ ܕܶܝܢ ܘܰܠܕܰܬܚܶܝܬ ܪܝ̣ܫܳܐ ܕܰܡܛܰܟ̈ܣܶܐ ܘܡܶܬܬܦܝ̣̈ܣܳܢܶܐ ܥܒܶܕ ܕܢ̣ܶܗܘܽܘܢ: ܘܰܕܠܳܐ ܢ̣ܶܣܥܪܽܘܢ ܒܝ̣̈ܫܳܬܳܐ ܘܟܽܠܗܶܝܢ ܐܰܝܠܶܝܢ ܕܫܳܘ̈ܝܳܢ ܠܫܘ̣ܢܳܩܳܐ: ܠܟܽܠܗܽܘܢ ܕܶܝܢ ܐܰܟܚܕܳܐ ܥܰܒ̈ܕܶܐ ܕܝ̣ܠܳܟ ܘܰܒ̈ܢܰܝܳܐ ܕܥܺܕܬܳܐ ܩܰܕܝ̣ܫܬܳܐ ܐܰܡܬܳܐ ܕܝ̣ܠܳܟ: ܘܒܰܪܶܟ ܘܬܰܪܣܳܐ ܘܪܰܒܳܐ: ܘܰܠܫܘ̣ܘ̈ܟܳܢܶܐ ܐܰ‌ܠܳܗܳܝ̈ܶܐ ܗܳܠܶܝܢ ܕܡܶܢܳܟ ܡܠܝ̣ܟܝ̣ܢ ܐܰܫܘܳܐ ܒܫܰܝܢܳܐ ܥܰܡܝ̣ܩܳܐ ܘܰܒܚܘ̣ܒܳܐ ܡܫܰܡܠܝܳܐ ܛܰܪ: ܒܫܶܠܝܳܐ ܘܒܰܒܗܝ̣ܠܘ̣ܬܳܐ ܚܰܣܶܢ ܒܫܰܦܝ̣ܪܘ̣ܬܳܐ ܘܟܰܗܝ̣ܢܘ̣ܬܳܐ ܘܰܒܟܽܠܳܗܿ ܙܰܕܝ̣ܩܘ̣ܬܳܐ ܨܰܒܶܬ: ܘܰܒܡܶܛܪ̈ܶܐ ܨܶܒ̈ܝܳܢܳܝܶܐ ܘܰܡܫܰܝ̈ܢܶܐ ܘܰܒܡܘ̣ܙܳܓܳܐ ܟܝ̣ܬ ܕܐܳܐܰܪ̈ܰܐܣ ܘܰܒܦܺܐܪ̈ܶܐ ܡܫܰܡ̈ܠܝܶܐ ܕܟܽܠ ܐܳܕܫ̈ܶܐ ܐܰܦܨܰܚ: ܚܰܝܶܕ ܢܳܡܘ̣ܣܳܐܝ̣ܬ ܠܥܺܕܬܳܐ ܕܝ̣ܠܳܟ ܕܰܒܟܽܠܕܘ̣ܟ ܠܗܰܕܳܡ̈ܶܐ ܕܶܐܣ̣ܬܕܶܩܘ̱ ܡ̣ܶܢ ܥܰܡܳܐ ܕܝ̣ܠܳܟ: ܐܰܠܘܶܬ ܒܰܐܘܝܘ̣ܬܳܐ ܘܰܒܫܰܦܝ̣ܪܘ̣ܬ ܬܰܪܥܝ̣ܬܳܐ ܚܰܝܶܨ: ܨܶܢ̈ܥܳܬܳܐ ܐܶܪ̈ܶܛܝ̣ܩܳܝܳܬܳܐ ܘܰܦܣ̈ܳܩܶܐ ܟܝ̣ܬ ܝܘ̣ܕܳܝ̈ܶܐ ܘܫܳܛܘ̣ܪ̈ܘܳܬܳܐ ܚܰܢ̈ܦܳܝܳܬܳܐ ܡ̣ܶܢ ܥܶܩܳܪ̈ܶܐ ܬܠܘ̣ܫ: ܠܟܽܠܢܳܫ ܕܶܝܢ ܟܰܕ ܠܰܫܡܳܐ ܕܝ̣ܠܳܟ ܩܰܕܝ̣ܫܳܐ ܡܫܰܥܒܶܕ ܐܰܢ̱ܬ: ܒܕܘ̣ܓ̈ܡܰܛܰܐ ܐܰ‌ܠܳܗܳܝ̈ܶܐ ܘܰܕܠܳܐ ܡܘ̣ܡ ܘܰܫܠܝ̣̈ܚܳܝܶܐ ܘܰܬܪ̈ܝ̣ܨܰܝ ܫܘ̣ܒܚܳܐ ܐܰܢܗܰܪ: ܘܰܠܛܳܒ̈ܳܬܳܐ ܕܰܠܥܳܠܰܡ ܐܰܫܘܳܐ ܒܛܰܝܒܘ̣ܬܳܐ ܘܰܒܪ̈ܰܚܡܶܐ ܘܰܒܪܶܚܡܰܬ݀ ܐ̱ܢܳܫܘ̣ܬܳܐ ܕܝ̣ܚܝ̣ܕܳܝܳܐ ܒܪܳܐ ܕܝ̣ܠܳܟ ܕܥܰܡܶܗ ܠܳܟ ܦ̇ܐܶܐ̣ ܫܘ̣ܒܚܳܐ ܘܐܝ̣ܩܳܪܳܐ ܘܐܘ̣ܚܕܳܢܳܐ ܥܰܡ ܪܘ̣ܚܳܐ ܕܝ̣ܠܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܩܰܒܶܠ ܡܳܪܝ̱ ܒܰܚܢܳܢܳܟ ܦܝ̣ܪܡܳܐ ܕܥܰܒ̈ܕܰܝܟ: ܘܶܐܬܪܰܥܳܐ ܒܥܶܛܪܳܐ ܕܟܳܗ̈ܢܰܝܟ ܘܶܐܬܬܢܝ̣ܚ ܒܬܶܫܡܶܫܬܳܐ ܕܣܳܓ̈ܘ̣ܕܰܝܟ: ܘܒܰܛܶܠ ܡܶܢܰܢ ܘܡ̣ܶܢ ܐܰܪܥܳܐ ܘܡ̣ܶܢ ܥܳܡܘ̣ܪ̈ܶܝܗܿ ܟܽܠܗܶܝܢ ܡܰܚ̈ܘܳܬܳܐ ܩܰܫ̈ܝܳܬܳܐ ܘܫܰܒ̈ܛܶܐ ܕܪܘ̣ܓܙܳܐ: ܘܫܰܝܢܳܟ ܘܰܫܠܳܡܳܟ ܫܰܟܶܢ ܠܰܢ ܒܟܽܠܙܒܰܢ ܡܳܪܰܢ ܘܰܐܠܳܗܰܢ ܠܥܳܠܡܝ̣ܢ܀