ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܒܳܪܘ̣ܝܳܐ ܕܟܽܠܗܶܝܢ ܒܶܪ̈ܝܳܬܳܐ: ܘܝܳܨܘ̣ܦܳܐ ܘܰܡܬܰܩܢܳܢܳܐ ܕܡܶܬܚܰܙܝ̈ܳܢܝܳܬܳܐ ܘܰܕܠܳܐ ܡܶܬܚܰܙܝ̈ܳܢܝܳܬܳܐ ܗܰܘ̇ ܕܰܒܝܰܕ ܡܽܘܫܶܐ ܦܪܰܩ̣ܬ ܠܥܰܡܳܐ ܐܝ̣ܣܰܪܠܳܝܳܐ ܡ̣ܶܢ ܫܘ̣ܥܒܳܕܶܗ ܕܦܶܪܥܽܘܢ ܘܗܰܕܝ̣ܬܳܝܗ̱ܝ ܒܡܰܕܒܪܳܐ ܘܬܰܪܣܝ̣ܬܝܗ̱ܝ ܒܡܰܢ̱ܢܳܐ ܘܣܰܠܘܰܝ: ܘܰܐܫܩܝ̣ܬܝܗ̱ܝ ܡܰܝ̈ܳܐ ܡ̣ܶܢ ܛܰܪܳܢܳܐ: ܘܟܰܕ ܚ̣ܛܳܐ ܘܪܰܛܶܢ ܥܰܠ ܡܰܘܗ̈ܒܳܬܳܟ ܘܰܛܠ̣ܰܡ ܛܰܝܒܘ̣ܬܳܟ: ܘܰܪܕܰܝ̣ܬܝܗ̱ܝ ܒܝܰܕ ܚܘܰܘ̈ܳܬܳܐ ܚܰܪ̈ܡܳܢܶܐ: ܘܡ̣ܶܢ ܕܰܦܢܳܐ ܘܬܳܒ̣ ܘܰܗܦ̣ܰܟ ܠܘܳܬܳܟ ܘܰܒܥ̣ܳܐ ܡܶܢܳܟ: ܩܰܒܶܠ̣ܬܳܝܗ̱ܝ ܘܰܐܣܝ̣ܬܳܝܗ̱ܝ ܒܝܰܕ ܚܶܘܝܳܐ ܕܰܢܚܳܫܳܐ: ܗܰܘ̇ ܕܐܝ̣ܬܰܘܗ̱ܝ ܗ̱ܘܳܐ ܛܘ̣ܦܣܳܐ ܕܰܨܠܝ̣ܒܳܟ ܚܰܝܳܐ ܘܡܰܥܒܶܕ ܚܰܝ̈ܶܐ: ܕܠܳܟ ܐܳܦ ܗܳܫܳܐ ܡܳܪܝܳܐ ܡܦܝ̣ܣܝ̣ܢܰܢ ܥܰܠ ܥܶܛܪܳܐ ܗܳܢܳܐ ܕܒܶܣ̈ܡܶܐ: ܕܬ̣ܰܐܣܶܐ ܘܬ̣ܰܚܠܶܡ ܢܘ̣ܟ̈ܬܳܬܳܐ ܕܰܗ̣̈ܘܰܝ ܒܰܢ ܡ̣ܶܢ ܐܳܟܶܠܩܰܪܨܳܐ ܚܶܘܝܳܐ ܡܶܬܝܰܕܥܳܢܳܐ: ܘܫܰܡܳܫ̈ܰܘܗ̱ܝ ܚܰܪ̈ܡܳܢܶܐ: ܘܚܰܣܳܐ ܚܰܘ̈ܒܰܝܢ ܘܰܚ̈ܛܳܗܰܝܢ ܘܰܫܒܘ̣ܩ ܣܰܟ̈ܠܘܳܬܰܢ: ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܦܶܠܓܶܗ ܕܝܰܘܡܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕܳܢ̈ܶܐ ܘܫܳܥ̈ܶܐ ܘܙܰܒ̈ܢܶܐ ܘܟܽܠܗܽܘܢ ܝܰܘ̈ܡܳܬܳܐ ܕܚܰܝ̈ܰܝܢ ܠܥܳܠܡܝ̣ܢ܀

ܣܶܕܪܳܐ

ܡܫܝ̣ܚܳܐ ܐܰܠܳܗܳܐ ܕܝ̣ܠܰܢ ܡܶܠܬܳܐ ܡܬܘ̣ܡܳܝܳܐ ܘܰܕܠܳܐ ܫܘ̣ܪܳܝ: ܒܰܪ ܟܝܳܢܳܐ ܘܒܰܪ ܐܘ̣ܣܺܝܰܐ ܕܰܐܒܳܐ ܘܰܕܪܘ̣ܚܳܐ ܩܰܕܝ̣ܫܳܐ: ܣܳܓܕܝ̣ܢܰܢ ܘܡܰܘܕܶܝܢܰܢ ܘܰܡܫܰܒܚܝ̣ܢܰܢ ܠܳܟ ܥܰܠ ܟܽܠܗܶܝܢ ܛܰܝ̈ܒܘܳܬܳܟ ܕܰܣܥ̣ܰܪܬ ܠܘܳܬ ܓܶܢܣܰܢ ܬܰܚܘ̣ܒܳܐ: ܗܰܘ̇ ܕܡ̣ܶܢ ܫܘ̣ܪܳܝܳܐ ܠܳܐ ܐܰܗ̣ܡܝ̣ܬ ܡ̣ܶܢ ܦܘ̣ܪܩܳܢܳܐ ܘܪ̈ܰܚܡܶܐ ܕܝ̣ܠܳܟ ܕܰܥܠܰܝܢ: ܫ̣ܰܕܰܪܬ ܓܶܝܪ ܠܘ̣ܩܕܰܡ ܢܒܺܝ̈ܶܐ ܠܡܰܟܪܳܙܘ̣ ܥܰܠ ܦܘ̣ܢܳܝܳܐ ܕܚܰܝ̈ܶܐ ܕܝ̣ܠܰܢ: ܘܩܰܕܡܳܐܝ̣ܬ ܡܰܢ ܠܡܽܘܫܶܐ ܡܢܝ̣ܚܳܢܳܐ ܕܪܰܒܘ̣ܬܳܟ ܓܒ̣ܰܝܬ: ܕܰܠܥܰܡܳܐ ܩ̇ܫܶܐ̣ ܩܕܳܠܳܐ ܠܫܘ̣ܥܒܳܕܳܐ ܕܝ̣ܠܳܟ ܢ̣ܰܦܶܩ ܘܢ̣ܰܝܬܶܐ ܡ̣ܶܢ ܫܘ̣ܥܒܳܕܳܐ ܡܰܪܝܪܳܐ ܕܦܶܪܥܘܢ: ܘܝܰܗ̣ܒܬ ܠܶܗ ܚܘ̣ܛܪܳܐ ܗܰܘ̇ ܕܐ̱ܪܳܙܳܐ ܕܰܨܠܝ̣ܒܳܟ ܨܳܐܪ ܗ̱ܘܳܐ: ܘܒܶܗ ܣܥ̣ܰܪ ܬܶܕܡܪ̈ܳܬܳܐ ܬܡܝ̣̈ܗܳܬܳܐ ܒܰܐܪܥܳܐ ܕܡܶܨܪܶܝܢ ܘܫ̣ܰܘܙܶܒ ܠܥܰܡܳܐ ܡ̣ܶܢ ܫܘ̣ܥܒܳܕܳܐ ܕܡܶܨܪ̈ܳܝܶܐ ܘܰܐܥܒ̣ܪܶܗ ܒܝܰܡܳܐ ܣܘ̣ܡܳܩܳܐ: ܘܫ̣ܰܕܰܪܬ ܠܶܗ ܡ̣ܶܢ ܫܡܰܝܳܐ ܡܰܢ̱ܢܳܐ ܠܬܘ̣ܪܣܝܳܐ: ܗܰܘ̇ ܕܐ̱ܪܳܙܳܢܳܐܝ̣ܬ ܠܰܚܡܳܐ ܕܡܰܠܰܐܟ̈ܶܐ ܐܶܫ̣ܬܰܡܰܗ ܒܰܢܒܺܝܘ̣ܬܳܐ: ܘܡ̣ܶܢ ܝܰܡܳܐ ܣܰܠܘܰܝ ܠܡܶܐܟܘ̣ܠܬܳܐ: ܕܒܶܣܪܳܐ ܫ̣ܰܕܰܪܬ ܐܰܝܟ ܚܳܠܳܐ ܕܝܰܡܳܐ: ܘܟܰܕ ܐܶܟ̣ܰܠ ܘܰܣܒ̣ܰܥ ܛܠ̣ܰܡ ܛܰܝܒܘ̣ܬܳܐ ܕܡܶܬܬܚܝ̣ܒܳܐ ܗ̱ܘܳܬ݀ : ܘܠܳܐ ܐܰܘܕܝ̣ ܠܙܳܝܘ̣ܢܳܐ ܒܣܰܒܥܳܐ ܪܰܒܳܐ: ܘܰܚܠܳܦ ܬܰܘܕܝ̣ܬܳܐ ܕܥܰܠ ܡܰܘ̈ܗܳܒܬܳܟ ܪܶܛܢܳܐ ܡ̇ܠܶܐ̣ ܗ̱ܘܳܐ ܦܘ̣ܡܶܗ ܘܓܘ̣ܕܳܦ̈ܶܐ: ܡܶܬܬܰܪܣܶܐ ܗ̱ܘܳܐ ܘܡܶܬܦܰܛܰܡ ܡ̣ܶܢ ܛܘ̣ܒ̈ܶܐ ܕܰܣܕܝ̣ܪܝ̣ܢ ܩܕܳܡܰܘܗ̱ܝ: ܘܰܚܠܳܦ ܬܶܫܒܘ̣ܚܬܳܐ ܨܘ̣ܚ̈ܝܳܬܳܐ ܦܳܪܰܥ ܗ̱ܘܳܐ ܠܙܳܝܘ̣ܢܳܐ: ܟܫܶܝܢ ܩܕܳܡܰܘܗ̱ܝ ܡܰܢ̱ܢܳܐ ܘܣܰܠܘܰܝ ܕܰܥܢ̈ܳܢܳܐ ܘܰܕܪ̈ܘ̣ܚܶܐ ܡܩܰܪ̈ܒܳܢ ܗ̱ܘܰܝ̈ ܠܶܗ: ܘܡܰܢ̱ܢܳܐ ܠܶܗ ܕܰܢ̣ܫܰܒܰܚ ܠܙܳܐܶܢ ܟܽܠ ܥܰܠ ܡܰܘܗܰܒܬܶܗ: ܘܟܰܕ ܥܶܫ̣ܢܰܬ݀ ܒܝ̣ܫܘ̣ܬܶܗ ܒܪܶܛܢܳܐ ܪܰܒܳܐ ܪܕܰܝܬܝܗ̱ܝ ܒܰܚ̈ܘܰܘܳܬܳܐ ܚܰܪ̈ܡܳܢܶܐ ܕܡܶܪܬܳܐ ܓܳܣܶܝܢ: ܘܟܰܕ ܥܳܩ̣ܰܬ݀ ܪܘ̣ܚܶܗ ܪܗ̣ܶܛ ܨܶܝܕ ܡܽܘܫܶܐ ܒܒܳܥܘ̣ܬܳܐ ܕܢ̣ܰܡܶܕ ܡ̣ܶܢ ܡܰܪܕܘ̣ܬܳܐ: ܘܟܰܕ ܒܳܥܘ̣ܬܳܐ ܩܶܪܒ̣ܰܬ݀ ܠܘܳܬܳܟ ܒܝܰܕ ܡܢܝ̣ܚܳܢܳܟ: ܦܰܩ̣ܶܕܬ ܠܶܗ ܕܢ̣ܶܥܒܶܕ ܚܶܘܝܳܐ ܕܰܢܚܳܫܳܐ: ܘܰܢ̣ܣܝ̣ܡܝ̣ܘܗ̱ܝ ܠܳܐܬܳܐ ܒܓܰܘ ܡܰܫܪܝ̣ܬܳܐ: ܘܡܳܐ ܕܢܳܟܶܬ ܗ̱ܘܳܐ ܚܶܘܝܳܐ ܠܓܰܒܪܳܐ ܚܳܐܰܪ ܗ̱ܘܳܐ ܒܶܗ ܘܡܶܬܰܐܣܶܐ ܗ̱ܘܳܐ: ܗܰܘ̇ ܕܐܝ̣ܬܰܘܗ̱ܝ ܗ̱ܘܳܐ ܛܘ̣ܦܣܳܐ ܕܰܨܠܝ̣ܒܳܟ ܦܳܪܘ̣ܩܳܝܳܐ: ܕܒܶܗ ܐܶܬܦܪܶܩ̣ܢܰܢ ܡ̣ܶܢ ܢܘ̣ܟ̈ܬܳܬܳܐ ܕܚܶܘܝܳܐ ܢܳܟܘ̣ܠܳܐ: ܘܡ̣ܶܢ ܡܶܪܬܶܗ ܕܳܐܟܶܠܩܰܪܨܳܐ ܕܶܐܫܬܰܘܙܰܒ̣ܢܰܢ ܠܚܰܝ̈ܶܐ ܕܰܠܥܳܠܰܡ: ܐܰܟܡܳܐ ܕܒܰܣܒܰܪܬܳܐ ܕܝ̣ܠܳܟ ܦܳܪܘ̣ܩܳܝܬܳܐ ܐܶܡ̣ܰܪܬ: ܕܰܐܝܟܰܢܳܐ ܕܰܐܪܝ̣ܡ ܡܽܘܫܶܐ ܚܶܘܝܳܐ ܒܡܰܕܒܪܳܐ ܗܳܟܰܢܳܐ ܥܬܝܕ ܠܡܶܬܬܪܳܡܘ̣ ܒܪܶܗ ܕܐ̱ܢܳܫܳܐ: ܕܟܽܠ ܡܰܢ ܕܰܡܗܰܝܡܶܢ ܠܳܐ ܢ̣ܺܐܒܰܕ ܐܶܠܳܐ ܢܶܗܘܽܘܢ ܠܶܗ ܚܰܝ̈ܶܐ ܕܰܠܥܳܠܰܡ: ܬܡܝ̣ܗܝ̣ܢ ܓܶܝܪ ܐ̱ܪ̈ܳܙܶܐ ܘܛܘ̣ܦ̈ܣܶܐ ܕܶܐܣܬ̣ܥܰܪܘ̱ ܒܝܰܕ ܡܽܘܫܶܐ ܒܟܽܠܳܗܿ ܐܰܪܥܳܐ ܗܳܝ: ܕܰܐܪܡܝ̣ ܢܰܩ̣ܦܳܟ ܐܰܝܟ ܛܶܠܳـܠܳܐ ܠܓܘ̣ܫܡܳܐ: ܘܨܰܠܡܳܐ ܪܰܒܳܐ ܨܳܪ ܠܳܟ: ܕܡܘ̣ܬܳܟ ܛܥܝ̣ܢ ܗ̱ܘܳܐ ܩܕܳܡ ܡܰܫܪܝ̣ܬܳܐ: ܘܒܳܟ ܙܳܓܰܪ ܗ̱ܘܳܐ ܟܽܠ ܢܶܟ̈ܝܳܢܝ̣ܢ ܡ̣ܶܢ ܥܰܡܳܐ: ܢܝ̣ܫܶܗ ܕܰܨܠܝ̣ܒܳܟ ܚܳܙܝ̈ܳܢ ܗ̱ܘܰܝ̈ ܒܶܪ̈ܝܳܬܳܐ ܘܙܳܝ̈ܥܳܢ ܗ̱ܘ̈ܰܝ: ܘܰܒܟܽܠ ܐܰܘܘܳܢܳܐ ܕܫܳܪܶܐ ܗ̱ܘܳܐ ܬܚܶܝܬ ܛܶܠܳܠܳܟ ܕܠܳܐ ܩܶܢܛܳܐ ܡܰܫܪܶܐ ܗ̱ܘܳܐ ܠܥܰܡܳܐ: ܘܗܳܫܳܐ ܒܳܥܶܝܢܰܢ ܡ̣ܶܢ ܡܪܰܚܡܳܢܘ̣ܬܳܟ ܡܳܪܝܳܐ: ܕܰܐܟܡܳܐ ܕܰܒܐ̱ܪܳܙܳܐ ܕܰܙܩܝ̣ܦܳܟ ܐܶܬ̣ܐܣܝ̣ ܥܰܡܳܐ ܕܰܡܢܰܟܰܬ ܗ̱ܘܳܐ: ܘܥܶܪܩ̣ܰܬ݀ ܡܶܪܬܳܐ ܡ̣ܶܢ ܗܰܕܳܡܰܘ̈ܗ̱ܝ ܘܰܚ̣ܝܳܐ: ܗܳܟܰܢܳܐ ܐܳܦ ܠܰܢ ܕܠܰܘ ܒܰܠܚܘ̣ܕ ܚܳܝ̇ܪܝ̣ܢܰܢ ܒܰܙܩܝ̣ܦܳܟ ܐܶܠܳܐ ܡܶܫܬܒܰܗܪܝ̣ܢܰܢ ܕܬܰܐܣܶܐ ܡ̣ܶܢ ܡܶܪܬܳܐ ܟܣܝ̣ܬܳܐ ܕܦܳܪܚܳܐ ܒܗܰܕܳܡܰܝ̈ܢ ܘܰܒܢܝ̣ܫܶܗ ܕܰܨܠܝ̣ܒ ܢܘ̣ܗܪܳܐ ܐܰܚܠܶܡ ܠܢܰܦ̈ܫܳܬܰܢ ܘܰܠܦܰܓܪ̈ܰܝܢ: ܘܰܐܝܟ ܕܰܙܟ̣ܳܐ ܒܚܘ̣ܪܒܳܐ ܗܰܘ̇ ܚܶܘܝܳܐ ܕܢܳܚܫܳܐ ܠܰܚܘܰܘ̈ܳܬܳܐ: ܢ̣ܶܙܟܶܐ ܨܠܝ̣ܒܳܟ ܠܚܰܝܠܶܗ ܕܣܳܛܳܢܳܐ ܘܰܢ̣ܫܰܦܶܠ ܥܘ̣ܫܢܶܗ ܘܰܒܦܰܓܪܳܟ ܦܰܓܪ̈ܰܝܢ ܢܶܬܰܐܣܽܘܢ: ܘܒܰܕܡܳܟ ܢܰܦ̈ܫܳܬܰܢ ܢܶܬܩܰܕ̈ܫܳܢ: ܘܰܕܡܰܨܰܥ̣ܬܳܢ ܒܛܰܝܒܘ̣ܬܳܟ ܒܨܰܘܡܳܐ ܗܳܢܳܐ ܩܰܕܝ̣ܫܳܐ ܚܰܝܶܠ ܠܰܢ ܒܰܚܢܳܢܳܟ ܕܰܒܕܰܟܝܘ̣ܬܳܐ ܢ̇ܶܬܡܰܢܰܥ ܠܦܶܨܚܳܐ ܫܒܝ̣ܚܳܐ ܡܰܦܨܰܚ ܟܽܠ: ܘܰܒܝܰܕ ܨܠܰܘ̈ܳܬܳܗܿ ܕܝܳܠܶܕܬܳܟ ܘܰܕܩܰܕܝ̣̈ܫܰܝܟ: ܘܢܰܨܝ̣ܚ ܫܘ̣ܦܪ̈ܶܐ ܡܳܪܝ̱ ܚܰܒܺܝܒ ܡܢܝ̣ܚܳܢܳܟ ܗܳܢܳܐ ܕܳܐܦ ܕܘ̣ܟܪܳܢܶܗ ܬܘ̣ܒ ܝܰܘܡܳܢܳܐ ܡܫܰܡܠܶܝܢܰܢ: ܐܰܥܒܰܪ ܡܶܢܰܢ ܥܳܩ̈ܳܬܳܐ ܠܳܐ ܡܰܘܬܪ̈ܳܢܝܳܬܳܐ: ܟܠܝ̣ ܡ̣ܶܢ ܐܰܪܥܳܐ ܘܥܳܡܘ̣ܪ̈ܶܝܗܿ ܡܰܪ̈ܕܘܳܬܳܐ ܘܫܰܒ̈ܛܶܐ ܕܪܘ̣ܓܙܳܐ: ܬܰܪܣܳܐ ܠܡܶܣ̈ܟܺܢܶܐ ܒܰܚܢܳܢܳܟ: ܒܰܪܶܟ ܟܠܝ̣ܠܳܐ ܕܫܰܢ̱ܬܳܐ ܒܛܰܝܒܘ̣ܬܳܟ: ܚܽܘܢ ܠܚܰܛܳܝ̈ܶܐ ܒܰܡܪܰܚܡܳܢܘ̣ܬܳܟ: ܛܰܟܶܣ ܠܰܢ ܒܶܐܡܪ̈ܶܐ ܕܥܳܢ̈ܳܟ: ܘܝܰܡܝ̣ܢܳܟ ܐܰܓܶܢ ܥܰܠ ܥܰܡܳܟ: ܐܰܫܪܳܐ ܫܰܝܢܳܟ ܒܥܺܕܬܳܟ ܬܰܒܰܪ ܩܰܪ̈ܢܳܬܳܐ ܕܣܳܢ̈ܝ݂ܰܝ݂ ܫܪܳܪܳܟ: ܐܰܪܝ̣ܡ ܩܰܪܢܳܐ ܕܡܰܪܥܝ̣ܬܳܟ ܘܰܥܶܕ ܠܰܢ ܠܚܰܓܶܗ ܕܰܓܢܽܘܢܳܟ: ܕܰܒܰܪ ܠܰܢ ܠܫܘ̣ܠܳܡܳܐ ܕܫܳܦܰܪ ܠܳܟ: ܘܰܐܥܶܠ ܠܰܢ ܠܰܛܝܳܪܳܟ: ܪܘ̣ܣ ܙܘ̣ܦܶܗ ܕܰܚܢܳܢܳܟ: ܘܚܰܠܶܠ ܟܘ̣ܬܡ̈ܳܬܰܢ ܒܛܰܝܒܘ̣ܬܳܟ: ܣܰܝܶܥ ܠܰܢ ܒܝܰܡܝ̣ܢܳܟ: ܘܰܐܢܝ̣ܚ ܠܥܰܢܝ̣̈ܕܰܝܢ ܒܡܰܠܟܘ̣ܬܳܟ ܫܡܰܝܳܢܝ̣ܬܳܐ: ܘܰܚܢܰܢ ܘܗܶܢܽܘܢ ܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀