ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܐܰ‌ܠܳܗܳܐ ܕܶܐܬ̣ܬܨܝ̣ܪ ܒܰܢ̈ܒܺܝܶܐ ܡ̣ܶܢ ܩܕܝ̣ܡ: ܘܰܪܫ̣ܰܡ ܛܘ̣ܦܣܶܗ ܡܽܘܫܶܐ ܒܚܶܘܝܳܐ ܕܰܢܚܳܫܳܐ ܕܰܩܒ̣ܰܥ ܒܡܶܨܥܰܬ݀ ܡܰܫܪܝ̣ܬܳܐ: ܘܟܰܕ ܥܰܠ ܨܠܝ̣ܒܳܐ ܐܶܬ̣ܬܪܝ̣ܡܬ ܢܓ̣ܰܕܬ ܠܰܒܪܝ̣ܬܳܐ ܠܣܶܓܕܬܳܟ: ܘܰܠܦܶܪܥܽܘܢ ܘܠܰܥܡܳܠܝ̣ܩ ܐܰܘܒ̣ܶܕܬ: ܣܰܬܰܪ ܠܰܢ ܡܳܪܝ̱ ܬܚܶܝܬ ܟܶܢ̈ܦܰܘܗ̱ܝ ܕܰܨܠܝ̣ܒܳܟ: ܘܰܐܝܟ ܕܦܰܢܝ̣ܬ ܠܰܐܒܓܰܪ ܐܘ̣ܟܳܡܳܐ ܫܶܐܠ̈ܳܬܶܗ ܘܰܐܣܝ̣ܬܝܗ̱ܝ: ܘܡܰܟܶܟ̣ܬ ܩܰܪܢܳܐ ܕܰܒܥܶܠ̈ܕܒܳܒܰܘܗ̱ܝ: ܩܰܒܶܠ ܡܳܪܝ̱ ܨܰܘܡܳܐ ܘܰܨܠܘ̣ܬܳܐ ܕܥܰܒ̈ܕܰܝܟ: ܘܰܐܣܳܐ ܫܘ̣ܡ̈ܳܬܰܢ ܒܰܨܠܝ̣ܒܳܟ: ܕܢ̇ܰܘܕܶܐ ܘܢ̇ܶܣܓܘ̣ܕ ܘܰܢ̇ܫܰܒܚܳܟ: ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܦܳܪܩܳܐ ܪܰܒܳܐ ܕܰܒܚܘ̣ܒܶܗ: ܨܰܘܡܳܐ ܘܟܰܦܢܳܐ ܘܢܶܣܝܳܢܳܐ ܩܰܒ̣ܶܠ ܥܠܰܘܗ̱ܝ ܒܰܒܣܰܪ ܡܶܛܽܠ ܦܘ̣ܪܩܳܢܰܢ: ܘܰܒܨܰܘܡܳܐ ܩܰܕܝ̣ܫܳܐ ܡ̣ܶܢ ܠܰܘܛܬܳܐ ܕܰܥܒܳܪ ܦܘ̣ܩܕܳܢܳܐ ܕܰܗ̣ܘܳܬ݀ ܒܩܰܝܣܳܐ ܚ̣ܰܪܰܪ ܠܰܢ: ܘܰܒܬܰܟܬܘ̣ܫܶܗ ܪܰܒܳܐ ܙܳܟܘ̣ܬܳܐ ܥܰܠ ܢܳܟܘ̣ܠܳܐ ܫܰܟ̣ܶܢ: ܐܘ̣ܪܚܳܐ ܕܪܰܫ̣ ܠܰܢ ܠܡܰܠܟܘ̣ܬܳܐ ܕܰܫܡܰܝܳܐ ܘܒܰܨܠܝ̣ܒܶܗ ܚܰܝܳܐ ܚܘ̣ܛܪܳܐ ܕܥܘ̣ܫܢܳܐ ܘܙܰܝܢܳܐ ܚܰܣܝ̣ܢܳܐ: ܘܢܰܝܙܟܳܐ ܕܦܘ̣ܪܩܳܢܳܐ ܐܰܫܠ̣ܶܡ ܠܰܢ: ܘܰܒܣܶܒܶܠܬܳܐ ܕܡܰܣܩܳܐ ܠܰܢ ܠܪܰܘܡܳܐ ܕܰܫܡܰܝܳܐ ܝܰܗ̣ܒܠܰܢ: ܕܠܶܗ ܠܗܰܘ̇ ܕܰܥܒ̣ܰܕ ܠܰܢ ܦܘ̣ܪܩܳܢܳܐ ܒܰܡܨܰܥܬܳܐ ܕܰܐܪܥܳܐ: ܢ̇ܫܰܒܰܚ ܘܢ̇ܶܣܓܘ̣ܕ ܘܢ̇ܰܘܕܶܐ ܒܰܡܨܰܥܬܳܗܿ ܕܥܺܕܬܳܐ ܩܰܕܝ̣ܫܬܳܐ: ܗܳܫܳܐ ܒܡܶܨܥܰܬ݀ ܨܰܘܡܶܗ ܐܰܠܳܗܳܝܳܐ ܘܠܰܐܒܘܗ̱ܝ ܘܰܠܪܘ̣ܚܶܗ ܩܰܕܝ̣ܫܳܐ: ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܪܰܡܫܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕܳܢ̈ܶܐ ܘܫܳܥ̈ܶܐ ܘܙܰܒ̈ܢܶܐ ܘܟܽܠܗܽܘܢ ܝܰܘ̈ܡܳܬܳܐ ܕܚܰܝ̈ܰܝܢ ܠܥܳܠܡܝ̣ܢ܀

ܣܶܕܪܳܐ

ܡܳܪܝܳܐ ܐܰ‌ܠܳܗܳܐ ܕܝ̣ܠܰܢ ܘܰܕܟܽܠܗܶܝܢ ܒܶܪ̈ܝܳܬܳܐ ܕܥܶܠܳܝ̈ܶܐ ܘܰܕܬܰܚ̈ܬܳܝܶܐ: ܗܰܘ̇ ܕܰܒܛܰܝܒܘ̣ܬܳܟ ܐܳܝܬܝܳܝܬܳܐ ܘܠܳܐ ܚܰܫܳܢܳܝܬܳܐ ܒܝܰܕ ܡܶܨܥܳܝܘ̣ܬ ܝ̣ܚܝ̣ܕܳܝܳܐ ܒܪܳܐ ܕܝ̣ܠܳܟ ܒ̣ܪܰܝܬ ܠܟܽܠܗܶܝܢ ܒܶܪ̈ܝܳܬܳܐ ܕܰܠܥܶܠ ܘܕܰܠܬܰܚܬ: ܡܠܝ̣̈ܠܳܬܳܐ ܡܶܬܚܰܙܝܳܢ̈ܝܳܬܳܐ ܘܡܶܬܝܰܕܥܳܢ̈ܝܳܬܳܐ: ܘܟܰܕ ܨܒ̣ܰܝܬ ܒܪܶܚܡܰܬ݀ ܐ̱ܢܳܫܘ̣ܬܳܟ ܠܳܐ ܡܶܬܡܰܠܠܳܢܝ̣ܬܳܐ ܕܰܟܝܳܢܳܐ ܡܶܨܥܳܝܳܐ ܬܩܝ̣ܡ: ܗܘ̣ܠܳܢܳܝܳܐ ܘܠܳܐ ܗܘ̣ܠܳܢܳܝܳܐ ܢܰܦܫܳܐ ܡܠܝ̣ܠܬܳܐ ܘܪܘ̣ܚܳܢܳܝܬܳܐ ܥܰܡ ܦܰܓܪܳܐ ܗܘ̣ܠܳܢܳܝܳܐ ܠܳܫ̣ܬ: ܒܡܶܨܥܰܬ݀ ܐܰܪܥܳܐ ܒܐܝ̣̈ܕܰܝܟ ܩܰܕܝ̣̈ܫܳܬܳܐ ܒܰܪܢܳܫܳܐ ܡܪܰܟܒܳܐ ܡܶܨܥܳܝܳܐ ܕܥܰܡ ܗܰܘ̈ܢܶܐ ܬܪ̈ܰܝܳܢܶܐ ܡܠܝܠܳܐܝ̣ܬ ܡܶܬܗܰܘܢܰܢ ܘܥܰܡ ܗܳܠܶܝܢ ܕܰܠܬܰܚܬ ܓܘ̣ܫܡܳܢܳܐܝ̣ܬ ܘܚܰܝܘ̣ܬܳܢܳܐܝ̣ܬ ܡܶܬܩܰܛܪܰܓ: ܟܰܕ ܠܗܳܢܳܐ ܡܶܨܥܰܬ݀ ܦܰܪܕܰܝܣܳܐ ܕܛܘ̣ܒ̈ܶܐ ܢܳܡܘ̣ܣܳܐ ܩܪܝܚܳܐ ܣܳܡ̣ܬ ܠܶܗ: ܐܰܝܟ ܫܰܠܝ̣ܛ ܥܰܠ ܝܳܬܶܗ: ܕܡ̣ܶܢ ܟܽܠܗܽܘܢ ܐܝ̣ܠܳܢ̈ܶܐ ܢ̣ܶܐܟܘ̣ܠ ܘܡ̣ܶܢ ܗܰܘ̇ ܕܒܰܡܨܰܥܬܳܐ ܢ̣ܶܫܬܐܶܠ: ܡܶܛܽܠ ܕܰܡܡܰܨܰܥ ܒܶܝܬ ܡܰܘܬܳܐ ܠܚܰܝ̈ܶܐ: ܗܰܘ̇ ܕܝܶܢ ܡܶܨܥܳܝܳܐ ܡ̇ܰܢ ܗܳܝ̇ ܕܶܐܬܢܰܟ̣ܠܰܬ݀ ܡ̣ܶܢ ܚܶܘܝܳܐ ܡܶܨܥܳܝܳܐ ܕܒܝ̣̈ܫܳܬܳܐ: ܐܶܬ̣ܡܰܨܥܰܬ݀ ܬܘ̣ܒ ܠܒܝ̣ܫܬܳܐ ܘܰܗ̣ܘܳܬ݀ ܥܶܠܬܳܐ ܠܡܰܦܘ̣ܠܬܳܐ ܕܝ̣ܠܳܗܿ ܘܕܳܐܕܳܡ ܓܰܒܪܳܗܿ ܡ̣ܶܢ ܪܰܘܡܳܐ ܪܰܒܳܐ ܕܫܘ̣ܠܛܳܢܗܽܘܢ ܩܰܕܡܳܝܳܐ: ܟܰܕ ܕܝܶܢ ܥܶܫ̣ܢܰܬ݀ ܡܰܦܘ̣ܠܬܗܽܘܢ ܕܗܳܢܽܘܢ ܕܰܒܨܰܠܡܳܟ ܚܰܝܳܐ ܒܝܰܕ ܡܶܨܥܳܝܳܐ ܕܰܐ‌ܠܳܗܘ̣ܬܳܟ ܒܪܳܐ ܕܝ̣ܠܳܟ ܥܒ̣ܰܕܬ: ܩܰܕܡܳܝܰܬ݀ ܡܶܨ̈ܥܳܝܶܐ ܐܰܩܝ̣ܡܬ ܒܶܝܬ ܠܳܟ ܘܠܰܓܒܝ̣ܠܬܳܐ: ܠܗܳܢܽܘܢ ܕܦܳܪ̈ܘ̣ܩܶܐ ܥܒ̣ܰܕܬ ܐܶܢܽܘܢ ܐ̱ܪܳܙܳܢܳܐܝ̣ܬ: ܕܰܠܦܘ̣ܪܩܳܢܳܐ ܪܰܒܳܐ ܘܰܓܡܝ̣ܪܳܐ ܢ̣ܶܩܢܽܘܢ ܕܰܒܝܶܫܘ̣ܥ ܡܫܝ̣ܚܳܐ ܕܒܶܝܬ ܠܳܟ ܘܰܠܥܳܠܡܳܐ ܥܬܝ̣ܕ ܗ̱ܘܰܝܬ ܕܬ̣ܶܥܒܶܕ: ܠܡܽܘܫܶܐ ܡܰܢ ܫ̣ܰܕܰܪܬ ܡܶܛܽܠ ܦܘ̣ܪܩܳܢ ܥܰܡܳܐ ܕܝ̣ܠܳܟ ܡ̣ܶܢ ܡܶܨܪܶܝܢ: ܘܒܐܝ̣ܕܶܗ ܣܥ̣ܰܪܬ ܚܰܝ̈ܠܶܐ ܬܡܝ̣̈ܗܶܐ ܒܡܶܨܪܶܝܢ ܘܰܒܡܰܕܒܪܳܐ: ܘܰܒܡܶܨܥܳܝܘ̣ܬܶܗ ܐܰܥܒ̣ܰܪܬ ܠܥܰܡܳܐ ܒܡܶܨܥܰܬ݀ ܝܰܡܳܐ ܕܣܘ̣ܦ ܐܰܝܟ ܕܰܒܝܰܒܝ̣ܫܬܳܐ: ܘܐ̱ܪܳܙܶܗ ܕܰܨܠܝ̣ܒܳܐ ܕܝ̣ܚܝ̣ܕܳܝܳܟ ܪܫ̣ܰܡ ܬܰܡܳܢ ܒܐܘ̣ܪܟ݂ܳܐ ܘܒܰܦܬܳܝܳܐ ܘܰܒܡܶܨܥܰܬ݀ ܡܰܕܒܪܳܐ: ܘܒܶܗ ܒܐ̱ܪܳܙܳܐ ܡܰܝ̈ܳܐ ܡ̣ܶܢ ܛܰܪܳܢܳܐ ܐܰܒܰܥ̣ܬ ܒܐܝ̣ܕܶܗ: ܘܰܠܡܰܝ̈ܳܐ ܕܡܽܘ̣ܪܰܬ ܚܰܠܝ̣ ܘܟܰܕ ܥܰܡܳܐ ܡܶܛܽܠ ܚܛܝ̣ܬܶܗ ܪܰܒܬܳܐ ܡ̣ܶܢ ܚܘܰܘ̈ܳܬܳܐ ܚܰܪ̈ܡܶܐ ܡܶܬܢܰܟܬܝ̣ܢ ܗ̱ܘܰܘ: ܫܡܰܥ̣ܬ ܒܩܳܠܶܗ ܘܰܓܥܳܬܶܗ ܕܡܶܨܥܳܝܳܐ: ܘܰܦܩ̣ܰܕܬ ܠܶܗ ܕܢ̣ܶܥܒܶܕ ܩܳܝܶܡܬܳܐ ܕܩܰܝܣܳܐ ܒܡܶܨܥܰܬ݀ ܡܰܫܪܝ̣ܬܳܐ ܘܟܽܠ ܕܒܶܗ ܚܳܐܰܪ ܗ̱ܘܳܐ ܡ̣ܶܢ ܡܡܰܚܰܝ̈ܳܐ ܒܰܪ ܫܳܥܬܶܗ ܡܶܬܚܰܪܰܪ ܗ̱ܘܳܐ ܡ̣ܶܢ ܗܳܝ ܡܶܪܬܳܐ ܩܳܛܘ̣ܠܬܳܐ: ܘܟܽܠ ܕܡܶܬܦܰܠܰܓ ܗ̱ܘܳܐ ܡ̣ܶܢ ܫܶܠܝܳܐ ܡܶܬܡܣܶܐ ܗ̱ܘܳܐ ܘܡܳܐܶܬ: ܗܳܟܰܢܳܐ ܘܐܳܦ ܡܰܫܟܰܢ ܙܰܒܢܳܐ ܕܛܘ̣ܦܣܳܐ ܕܥܺܕܬܳܐ ܪܳܫܶܡ ܗ̱ܘܳܐ: ܒܰܡܨܰܥܬܳܐ ܕܡܰܫܪܝ̣ܬܳܐ ܦܩ̣ܰܕܬ ܕܢ̣ܶܬܢܨܶܒ: ܡܶܛܽܠ ܕܒܶܗ ܢ̣ܶܫܬܰܡܠܽܘܢ ܐ̱ܪ̈ܳܙܶܐ ܛܶܠܳܢܳܝ̈ܶܐ ܕܰܫܪܳܪܗܽܘܢ ܒܥܺܕܬܳܐ ܡܶܬܓܡܰܪ ܪܘ̣ܚܳܢܳܐܝ̣ܬ: ܗܳܟܘ̣ܬ ܘܰܒܟܽܠ ܕܳܪ̈ܝ̣ܢ ܐܰܩܝ̣ܡܬ ܡܶܨܥܳܝ̈ܶܐ ܢܒܺܝ̈ܶܐ ܘܡܰܠ̈ܟܶܐ ܘܰܠܐ̱ܪܳܙܳܐ ܗܳܢܳܐ ܕܦܘ̣ܪܩܳܢܳܐ ܢ̣ܛܰܦܣܽܘܢ: ܒܩܘ̣ܪܒܳܢܳܐ ܕܝ̣ܠܗܽܘܢ ܘܰܒܡܰܕܒ̈ܚܰܝܗܽܘܢ ܘܰܒܦܝ̣ܪ̈ܡܰܝܗܽܘܢ ܘܒܰܛܢܳܢܗܽܘܢ: ܘܒܰܩܪ̈ܳܒܰܝܗܽܘܢ ܘܰܒܡܰܘ̈ܬܰܝܗܽܘܢ ܟܰܕ ܕܶܝܢ ܥܶܫ̣ܢܰܬ݀ ܡܚܘ̣ܬܳܐ ܥܰܠ ܗܳܠܶܝܢ ܡܶܨܥܳܝ̈ܶܐ ܘܰܠܗܰܘ̇ ܕܰܡܡܰܚܰܝ ܗ̱ܘܳܐ ܘܰܪܡܶܐ ܒܡܶܨܥܰܬ݀ ܐܘ̣ܪ̈ܚܳܬܳܐ ܫܒ̣ܰܩܘ̱ ܕܠܳܐ ܥܨܳܒܳܐ ܘܰܕܠܳܐ ܐܳܣܝܘ̣ܬܳܐ: ܠܰܒܪܳܐ ܕܝ̣ܠܳܟ ܫ̣ܰܕܰܪܬ ܡܶܨܥܳܝܳܐ ܠܡܶܣܥܰܪ ܠܪܰܡܝܳܐ ܘܰܗ̣ܘܳܐ ܒܰܪܢܳܫܳܐ ܡܫܰܡܠܝܳܐ ܡ̣ܶܢ ܒܬܘ̣ܠܬܳܐ ܡܡܰܨܥܰܬ ܐ̱ܪܳܙܳܐ ܕܦܘ̣ܪܩܳܢܰܢ: ܘܰܗ̣ܘܳܐ ܡܶܨܥܳܝܳܐ ܚܠܳܦܰܝܢ ܠܘܳܬܳܟ: ܘܒܰܕܡܳܐ ܘܒܶܣܪܳܐ ܗܰܘ̇ ܕܒܶܗ ܠܰܢ ܐܶܫ̣ܬܰܘܬܰܦ ܫܰܟܶܢ ܠܶܗ ܥܨܳܒܳܐ ܠܗܰܘ̇ ܪܰܡܝܳܐ: ܘܟܰܕ ܐܶܬ̣ܛܰܝܰܒ ܠܦܘ̣ܪܩܳܢܳܐ ܬܺܒܶܝܠܝܳܐ ܠܝܽܘܚܰܢܳܢ ܡܶܨܥܳܝܳܐ ܕܬܰܪܬܶܝܢ ܕܺܝܰܬܝ̣̈ܩܰܐܣ ܫܰܕܰܪܬ ܡ̣ܶܢ ܡܶܨܥܰܬ݀ ܡܰܕܒܪܳܐ ܠܝܽܘ̣ܪܕܢܳܢ ܒܡܶܨܥܳܝܘ̣ܬܶܗ ܢ̣ܫܰܡܠܶܐ ܛܘ̣ܦܣܳܐ ܕܡܰܥܡܘ̣ܕܝ̣ܬܳܐ: ܘܢ̣ܶܬܟܪܶܙ ܐ̱ܪܳܙܳܐ ܘܢ̣ܶܬܓܠܶܐ ܗܰܘ̇ ܕܰܡܟܰܣܰܝ ܡ̣ܶܢ ܕܳܪ̈ܶܐ ܘܡ̣ܶܢ ܫܰܪ̈ܒܳܬܳܐ: ܗܰܘ̇ ܕܐܝ̣ܬܰܘܗ̱ܝ ܫܘ̣ܘܕܳܥܳܐ ܕܰܬܠܝ̣ܬܳܝܘ̣ܬܳܐ ܩܰܕܝ̣ܫܬܳܐ: ܘܒܰܥܡܳܕܶܗ ܕܝ̣ܚܝ̣ܕܳܝܳܟ ܐܶܬ̣ܓܰܠܝܰܬ݀ ܗܰܘ̇ ܕܟܰܕ ܢܚ̣ܶܬ ܠܰܡܨܰܥܬܶܗ ܕܢܰܗܪܳܐ ܐ̱ܪܳܙܳܢܳܝܳܐ: ܬܰܡܳܢ ܩܰܒ̣ܠܶܗ ܠܐ̱ܪܳܙܳܐ ܕܰܨܠܝ̣ܒܶܗ ܡܰܥܒܶܕ ܚܰܝ̈ܶܐ: ܕܒܐܝ̣̈ܕܰܘܗ̱ܝ ܡܶܬܓܰܡܪܝܢ ܟܽܠܗܽܘܢ ܐ̱ܪ̈ܳܙܶܐ ܣܓܝ̣̈ܕܶܐ ܘܰܐ‌ܠܳܗܳܝ̈ܶܐ: ܘܡ̣ܶܢ ܗܳܪܟܳܐ ܩܰܒ̣ܶܠ ܨܰܘܡܳܐ ܘܢܶܣܝܳܢܳܐ ܕܡ̣ܶܢ ܒܝ̣ܫܳܐ: ܘܐ̱ܪܳܙܳܐ ܐ̱ܚܪܺܢܳܐ ܦܳܪܘ̣ܩܳܝܳܐ ܐܰܫܠ̣ܶܡ ܠܰܢ: ܕܒܶܗ ܢ̇ܶܙܟܶܐ ܠܰܡܪܰܡܝܳܢܳܐ ܕܰܒܡܶܐܟܘ̣ܠܬܳܐ ܐܰܦ̣ܶܠ ܠܰܢ ܡ̣ܶܢ ܠܰܘܛܬܳܐ ܗܳܝ̇ ܕܟܘ̣ܒ̈ܶܐ ܘܕܰܪܕܪ̈ܶܐ ܐܰܘܟܝ̣ܬ ܚܰܫ̈ܶܐ ܒܶܣܪ̈ܳܢܳܝܶܐ ܕܰܐܘܥ̣ܝܰܬ݀ ܐܰܪܥܳܐ ܕܠܶܒ̈ܰܘܳܬܰܢ ܢ̇ܶܬܕܰܟܶܐ: ܘܗܳܫܳܐ ܕܠܰܡܨܰܥܬܶܗ ܕܨܰܘܡܳܐ ܩܰܕܝ̣ܫܳܐ ܕܰܐܫܠ̣ܶܡ ܠܰܢ ܢܳܡܘ̣ܣܳܐܝ̣ܬ ܝܶܫܘ̣ܥ ܡܫܝ̣ܚܳܐ ܗܰܘ̇ ܕܐܝ̣ܬܰܘܗ̱ܝ ܪܝ̣ܫܝ̣ܬܳܐ ܕܚܰܝ݂̈ܰܝ݂ܢ ܐܶܬܡܰܢܰܥ̣ܢܰܢ: ܠܰܨܠܝ̣ܒܶܗ ܚܰܝܳܐ ܗܰܘ̇ ܕܒܶܗ ܥܰܒ̣ܕܶܗ ܠܦܘ̣ܪܩܳܢܰܢ ܒܰܡܨܰܥܬܳܗܿ ܕܡܶܬܥܰܡܪܳܢܝ̣ܬܳܐ ܒܛܘ̣ܦܣܶܗ ܕܚܶܘܝܳܐ ܕܰܢܚܳܫܳܐ ܒܡܶܨܥܰܬ݀ ܥܺܕܬܳܐ ܩܳܒܥܝ̣ܢܰܢ: ܩܕܳܡܰܘܗ̱ܝ ܘܒܶܗ ܠܗܰܘ̇ ܕܰܥܠܰܘܗ̱ܝ ܐܶܨܛܠ̣ܶܒ ܣܳܓܕܝ̣ܢܰܢ: ܘܒܶܗ ܚܳܙܶܝܢܰܢ ܘܰܡܣܰܒܪܝ̣ܢܰܢ ܪܘ̣ܚܳܢܳܐܝ̣ܬ ܕܡ̣ܶܢ ܢܘ̣ܟ̈ܬܳܬܳܐ ܡܶܬܝܰܕܥܳܢ̈ܝܳܬܳܐ ܕܚܶܘܝܳܐ ܩܕܳܡܰܘܗ̱ܝ ܡܶܬܦܰܪܩܝ̣ܢܰܢ: ܟܰܕ ܐܰܦܰܝ̈ܢ ܠܳܐ ܡܚܰܦܪ̈ܳܢ ܒܶܗ: ܡܶܛܽܠ ܕܗܘ̣ ܐܝ̣ܬܰܘܗ̱ܝ ܢܝ̣ܫܳܐ ܕܚܰܝ̈ܶܐ: ܘܳܐܬܳܐ ܕܙܳܟܘ̣ܬܳܐ ܕܡ̣ܶܢ ܩܶܫܬܳܐ ܕܰܒܥܶܠ̈ܕܒܳܒܶܐ ܡܶܬ̈ܝܰܕܥܳܢܶܐ: ܘܰܒܩܰܪ̈ܢܳܬܶܗ ܡܕܰܩܪܝ̣ܢܰܢ ܠܣܳܩܘ̣ܪ̈ܰܝܢ: ܘܙܳܟܶܝܢܰܢ ܠܰܒ̈ܥܶܠܕܒܳܒܰܝܢ ܘܰܠܣ̈ܳܐܢܰܝܢ ܡܰܒܗܬܝ̣ܢܰܢ: ܘܒܶܗ ܡܶܫܬܰܒܗܪܝ̣ܢܰܢ ܠܘ̣ܩܒܰܠ ܐܰܝܠܶܝܢ ܕܡܰܗܠܝ̣ܢ ܒܶܗ: ܒܪܘ̣ܫܡܶܗ ܙܰܟܳܝܳܐ ܠܟܽܠ ܩܰܪܢܳܐ ܕܡܰܩܪ̈ܒܳܢܶܐ ܕܥܰܡܰܢ ܡܬܰܒܪܝ̣ܢܰܢ: ܘܰܠܟܽܠܶܗ ܚܰܝܠܶܗ ܕܳܐܟܶܠܩܰܪܨܳܐ ܒܚܰܝܠܶܗ ܪܰܒܳܐ ܕܰܨܠܝ̣ܒܳܐ ܡܕܰܝܫܝ̣ܢܰܢ: ܘܒܐܝ̣̈ܕܰܘܗ̱ܝ ܘܰܒܚܰܝܠܶܗ ܕܨܰܘܡܳܐ ܩܰܕܝ̣ܫܳܐ ܘܡܳܪܢܳܝܳܐ ܡܦܝ̣ܣܝ̣ܢܰܢ ܠܳܟ ܕܡ̣ܶܢ ܟܽܠܗܽܘܢ ܒܥܶܠܕܒܳܒ̈ܶܐ ܡܶܬ̈ܝܰܕܥܳܢܶܐ ܘܡܶܬܪ̈ܰܓܫܳܢܶܐ ܬ̣ܚܰܪܰܪ ܠܰܢ: ܘܰܠ̈ܚܰܫܶܐ ܡܰܟ̈ܝܳܢܶܐ ܕܢܰܦܫܳܐ ܘܰܕܗܰܘܢܳܐ ܘܰܕܦܰܓܪܳܐ ܬ̣ܫܰܗܶܐ ܡܶܢܰܢ: ܘܰܠܚܘ̣ܫܳܒ̈ܶܐ ܣܪ̈ܝ̣ܩܶܐ ܕܒܰܐܪܥܳܐ ܚܳܠܕܝ̣ܢ ܬ̣ܒܰܛܶܠ ܡ̣ܶܢ ܠܶܒܰܘ̈ܳܬܰܢ: ܘܡ̣ܶܢ ܡܰܡܠ̱ܠܳܐ ܘܥܶܢܝܳܢܳܐ ܕܰܡܒܰܛܶܠ ܨܰܘܡܳܐ ܬ̣ܫܰܘܙܶܒ ܠܰܢ: ܘܡ̣ܶܢ ܟܡܝ̣ܪܘ̣ܬ ܐܰܦ̈ܶܐ ܡܣܰܪܩܰܬ݀ ܠܥܘ̣ܬܪܳܐ ܕܨܰܘܡܳܐ ܬ̣ܰܪܚܶܩ ܠܰܢ: ܘܡ̣ܶܢ ܚܣܳܡܳܐ ܩܳܛܘ̣ܠܳܐ ܘܡܰܘܒܕܳܢܳܐ ܕܚܰܝܰܝ̈ܢ ܬܶܦܪܘ̣ܩ ܠܰܢ: ܘܰܠܡܶܪܬܳܐ ܐܰܘܟܝ̣ܬ ܪܶܓܬܳܐ ܡܰܘܩܕܳܢܝ̣ܬܳܐ ܕܢܰܦ̈ܫܳܬܰܢ ܬ̣ܫܝ̣ܓ ܡܶܢܰܢ: ܘܡ̣ܶܢ ܢܘ̣ܟ̈ܬܳܬܳܐ ܓܳܪ̈ܣܳܢܝܳܬܳܐ ܬ̣ܰܚܠܶܡ ܠܰܢ: ܘܡ̣ܶܢ ܗܰܘ̇ ܚܡܝ̣ܪܳܐ ܡܶܨܪܳܝܳܐ ܘܰܦܪܝ̣ܫܳܝܳܐ ܘܕܐܝ̣ܪܳܘ̣ܕܶܝܣ ܬ̣ܕܰܟܶܐ ܠܰܢ: ܘܚܰܡܪܳܐ ܕܚܘ̣ܒܶܗ ܕܰܒܪܳܟ ܡܳܪܰܢ ܘܰܐ‌ܠܳܗܰܢ ܝܶܫܘ̣ܥ ܡܫܝ̣ܚܳܐ ܬ̣ܡܰܙܶܓ ܒܰܢ ܘܰܠܫܰܘܬܳܦܘ̣ܬܳܐ ܕܦܰܓܪܶܗ ܘܰܕܡܶܗ ܬ̣ܰܫܘܶܐ ܠܰܢ: ܘܰܕܥܰܡܶܗ ܒܚܰܫ̈ܰܘܗ̱ܝ ܡܝܰܩܪ̈ܶܐ ܢ̇ܶܫܬܰܒܰܚ: ܘܕܰܒܡܰܘܬܶܗ ܢܝ̣ܚܳܐ ܘܒܰܩܝܳܡܬܶܗ ܢ̇ܩܘ̣ܡ ܥܰܡܶܗ: ܘܰܒܡܶܨܥܰܬ݀ ܥܶܠܝ̣ܬܳܐ ܐ̱ܪܳܙܢܳܝܬܳܐ ܢܶܚ̇ܕܶܐ ܒܰܫܠܳܡܶܗ: ܘܕܰܥܡܶܗ ܢ̇ܶܣܬܰܠܰܩ ܘܰܒܡܶܨܥܳܝܘ̣ܬܶܗ ܥܰܡܶܗ ܡ̣ܶܢ ܝܰܡܝܢܳܟ ܢ̇ܶܬܶܒ: ܘܒܰܡܨܰܥܬܳܗܿ ܕܥܺܕܬܳܐ ܗܳܝ̇ ܐܘ̣ܪܫܠܶܡܳܝܬܳܐ ܕܒܘ̣ܟܪ̈ܶܐ ܢ̇ܫܰܒܚܝ̣ܘܗ̱ܝ ܠܳܐ ܫܰܠܘܳܐܝ̣ܬ: ܘܒܐܝ̣̈ܕܰܘܗ̱ܝ ܘܥܰܡܶܗ ܠܳܟ ܐܰܒܳܐ ܡܪܰܚܡܳܢܳܐ: ܕܶܐܬ̣ܪܰܥܝ̣ܬ ܠܰܢ ܒܰܨܠܝ̣ܒܶܗ ܘܰܠܪܘ̣ܚܳܐ ܩܰܕܝ̣ܫܳܐ ܕܰܥܠܰܝܢ ܡܪܰܚܶܦ ܘܒܶܗ ܓܳܡܰܪ ܠܐ̱ܪܳܙܳܐ ܕܦܘ̣ܪܩܳܢܰܢ ܘܰܕܢܘ̣ܚܳܡܰܢ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܡܫܝ̣ܚܳܐ ܐܰܠܳܗܳܐ ܕܝ̣ܠܰܢ ܗܰܘ̇ ܕܰܣܠ̣ܶܩ ܠܰܨܠܝ̣ܒܳܐ ܚܠܳܦ ܦܘ̣ܪܩܳܢܰܢ: ܘܥܰܒ̣ܕܶܗ ܬܘ̣ܒ ܠܰܨܠܝ̣ܒܳܐ ܢܝ̣ܫܳܐ ܕܙܳܟܘ̣ܬܳܐ ܠܰܡܗܰܝܡ̈ܢܶܐ ܚܠܳܦ ܚܶܘܝܳܐ ܕܰܢܚܳܫܳܐ ܕܰܒܡܶܨܥܰܬ݀ ܡܰܫܪܝ̣ܬܳܐ: ܗܰܒܠܰܢ ܡܳܪܝ ܕܰܐܝܟ ܕܙܳܕܶܩ ܢ̇ܝܰܩܪܝ̣ܘܗ̱ܝ: ܘܒܶܗ ܠܳܟ ܗܰܘ̇ ܕܶܐܨܛܠܶܒ̣ܬ ܥܠܰܘܗ̱ܝ ܢ̇ܶܣܓܘ̣ܕ: ܘܒܶܗ ܟܰܕ ܒܶܗ ܠܥ̱ܘ̣ܗܕܳܢ ܨܠܝ̣ܒܳܟ ܡܫܰܡܠܝ̣ܢܰܢ: ܘܒܶܗ ܢ̇ܶܙܟܶܐ ܠܟܽܠܗܶܝܢ ܨܶܢ̈ܥܳܬܶܗ ܕܒܝ̣ܫܳܐ: ܘܒܶܗ ܢܶܥ̇ܒܰܪ ܩܶܢܛܳܐ: ܘܢ̇ܶܬܡܰܢܰܥ ܠܡܰܠܟܘ̣ܬܳܟ ܫܡܰܝܳܢܝ̣ܬܳܐ: ܘܢ̇ܰܣܶܩ ܠܳܟ ܫܘ̣ܒܚܳܐ ܠܥܳܠܰܡ ܥܳܠܡܝ̣ܢ܀