ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܡܫܰܒܚܳܐ ܕܟܶܢ̈ܫܰܝ ܪܰܘܡܳܐ ܡܫܰܒܚܝ̣ܢ ܠܶܗ: ܠܗܰܘ̇ ܐܳܣܝܳܐ ܒܰܣܝ̣ܡܳܐ ܕܡܰܐܣܶܐ ܒܰܬܝܳܒܘ̣ܬܳܐ ܠܟܽܠ ܐܰܝܠܶܝܢ ܕܡܶܬܩܰܪܒܝ̣ܢ ܠܶܗ: ܠܗܰܘ̇ ܡܰܒܘ̣ܥܳܐ ܕܚܘ̣ܠ̈ܡܳܢܶܐ: ܕܡܰܩܢܶܐ ܚܰܝ̈ܶܐ ܠܳܐ ܡܰܘܦ̈ܝܳܢܶܐ ܠܰܐܝܠܶܝܢ ܕܫܳܬܶܝܢ ܡ̣ܶܢܗ: ܠܗܰܘ̇ ܕܰܒܝܰܕ ܨܰܘܡܳܐ ܩܰܕܝ̣ܫܳܐ ܕܝ̣ܠܶܗ: ܐܰܠܒ̣ܶܫ ܠܰܢ ܫܶܪܝܳܢܳܐ ܕܙܰܕܝܩܘ̣ܬܳܐ: ܕܒܶܗ ܢ̇ܶܙܟܶܐ ܠܚܰܫ̈ܶܐ ܕܰܚܛܝ̣ܬܳܐ: ܛܳܒܳܐ ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܩܰܘܡܳܐ ܩܰܕܡܳܝܳܐ ܕܠܺܠܝܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܩܕܳܡܰܝܢ ܘܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܳܪܝܳܐ ܚܰܝܠܬܳܢܳܐ ܘܓܰܢ̱ܒܳܪܳܐ: ܘܰܓܢܝ̣ܙܳܐ ܘܠܳܐ ܡܶܬܕܰܪܟܳܢܳܐ: ܣܰܒܪܳܐ ܕܟܽܠ ܕܠܳܐ ܣܰܒܪܳܐ ܘܬܘ̣ܟܠܳܢܳܐ ܕܟܽܠ ܕܠܳܐ ܬܘ̣ܟܠܳܢܳܐ: ܥܝܪܳܐ ܕܠܳܐ ܢܳܐܶܡ: ܕܰܐܩܝ̣ܡ ܠܶܗ ܡܫܰܡ̈ܫܳܢܶܐ ܕܢܰܨܝ̣ܚܘ̣ܬܳܐ ܕܝ̣ܠܶܗ: ܘܰܡܫܰܒ̈ܚܳܢܶܐ ܕܰܐܠܳܗܘ̣ܬܶܗ ܩܕܳܡ ܬܪܘ̣ܢܘ̣ܣ ܕܐܝ̣ܩܳܪܶܗ: ܕܥܝ̣ܪܝ̣ܢ ܘܰܐܡܝ̣ܢܝ̣ܢ ܠܬܶܫܒܘ̣ܚܬܶܗ ܘܰܠܬܶܫܡܶܫܬܶܗ ܚܦܝ̣ܛܝ̣ܢ ܘܰܐܣܝ̣ܪܝ̣ܢ ܠܬܰܘܕܝ̣ܬܶܗ: ܗܰܘ̇ ܕܰܒܠܰܝ̈ܠܰܘܳܬܳܐ ܡܶܬܕܰܟܪܝ̣ܢ ܠܶܗ ܟܽܠܗܽܘܢ ܙܰܕܝ̣ܩ̈ܶܐ ܘܟܺܐܢ̈ܶܐ ܘܨܰܝ̈ܳܡܶܐ ܘܥܳܢܘܳܝ̈ܶܐ: ܒܕܘ̣ܟ̈ܝܳܬܳܐ ܩܰܪ̈ܝ̣ܒܳܬܳܐ ܘܰܒܓܳܙܪ̈ܳܬܳܐ ܪ̈ܰܚܝ̣ܩܳܬܳܐ ܬܳܢܶܝܢ ܥܘ̣ܫܢܳܐ ܪܰܒܳܐ ܕܐܝ̣ܬܘ̣ܬܶܗ: ܥܰܡ̱̈ܡܶܐ ܘܶܐܡ̈ܘܳܬܳܐ ܘܠܶܫܳܢ̈ܶܐ: ܐܰܢ̱ܬ ܕܶܝܢ ܡܳܪܝܳܐ ܐܰܠܳܗܳܐ ܕܝ̣ܠܰܢ: ܐܰܥܝ̣ܪ ܠܠܶܒܳܐ ܕܝ̣ܠܰܢ ܛܰܒܝ̣ܥܳܐ ܒܦܰܢܛܰܣܺܝܰܐ ܥܳܠܡܳܢܳܝܬܳܐ: ܠܥܝ̣ܪܘ̣ܬܳܐ ܘܬܶܫܡܶܫܬܳܐ ܡܰܠܰܐܟܳܝܬܳܐ: ܘܰܛܪܘ̣ܕ ܡܶܢܰܢ ܠܚܶܫܘ̣ܟܳܐ ܡܶܬܝܰܕܥܳܢܳܐ ܘܠܶܠܝܳܝܳܐ ܘܰܠܟܰܡܗܘ̣ܬܳܐ ܣܳܛܳܢܳܝܬܳܐ: ܘܰܠܡܶܠܬܳܐ ܚܶܫܘ̣ܟܳܝܬܳܐ ܘܰܣܪܝ̣ܩܬܳܐ ܘܰܪܕܘ̣ܦ ܡܶܢܰܢ ܠܪܘ̣ܚܳܐ ܐܳܐܰܪܝܳܬܳܐ ܘܫܺܐܕܳܢܳܝܳܬܳܐ: ܕܦܰܚ̈ܶܐ ܘܰܡܨܺܝ̈ܕܳܬܳܐ ܦܳܪ̈ܣܳܢ ܠܡܰܘܒܳܕܘ̣ܬܰܢ ܦܬܰܚ ܡܳܪܝ̱ ܦܘ̣ܡܰܝ̈ܢ ܠܬܶܫܒܘ̣ܚܬܳܟ ܘܣܶܦ̈ܘܳܬܰܢ ܠܙܘ̣ܡܳܪܳܟ: ܘܠܶܫ̈ܳܢܰܝܢ ܠܩܝ̣̈ܢܳܬܳܟ: ܓܰܓܪ̈ܳܬܰܢ ܠܙܰܥ̈ܩܳܬܳܟ: ܥܰܝ̈ܢܰܝܢ ܕܢ̣ܶܚ̈ܙܝܳܢ ܬܪ̈ܝ̣ܨܳܬܳܟ: ܘܟܰܕ ܡܰܣ̈ܩܳܢܶܐ ܘܥܘ̣ܠܳܝ̈ܶܐ ܒܬܰܪ̈ܥܝܳܬܰܢ ܟܰܕ ܣܳܝ̇ܡܝ̣ܢܰܢ: ܒܰܪ ܒܶܣܬܪ̈ܳܝܳܬܳܐ ܫܳܝܛܝ̣ܢܰܢ ܘܫܳܒܩܝ̣ܢܰܢ: ܘܰܠܗܳܠܶܝܢ ܡܥܰܠ̈ܝܳܬܳܐ ܡܰܚܒܝ̣ܢܰܢ ܘܒܳܥܶܝܢܰܢ: ܘܟܳܬܒܝ̣ܢܰܢ ܥܰܠ ܒܶܝܬ ܥܰܝ̈ܢܶܐ ܕܝ̣ܠܰܢ: ܠܰܫܡܳܟ ܪܰܒܳܐ ܘܰܕܚܝ̣ܠܳܐ: ܘܓܳܠܦܝ̣ܢܰܢ ܥܰܠ ܠܘ̣ܚ̈ܶܐ ܕܠܶܒܰܘ̈ܳܬܰܢ ܘܬܰܪ̈ܥܝܳܬܰܢ ܠܰܨܠܝ̣ܒܳܟ ܚܰܝܳܐ ܘܩܰܕܝ̣ܫܳܐ ܘܒܶܗ ܟܳܒܫܝ̣ܢܰܢ ܠܚܶܣ̈ܢܶܐ ܡܪ̈ܝ̣ܕܶܐ ܕܰܚܛܝ̣ܬܳܐ ܘܙܳܓ݂ܪܝ̣ܢܰܢ ܠܡܰܚܫ̈ܒܳܬܐ ܒܝ̈ܫܳܬܳܐ: ܘܰܠܟܽܠܳܗܿ ܛܳܥܝܘ̣ܬܳܐ ܡܰܘܒܕܳܢܝ̣ܬܳܐ ܘܰܡܚܰܒܠܳܢܝ̣ܬܳܐ: ܕܰܐܢܛܝ̣ܦܰܛܝ̈ܩܳܝܶܐ ܣܳܬܪ̈ܰܝ ܠܰܫܪܳܪܳܐ: ܘܒܰܕܓܽܘܢ ܡܶܬܟܰܫܦܝ̣ܢܰܢ ܠܳܟ ܡܳܪܝܳܐ ܐܰܠܳܗܳܐ ܕܒܐܘ̣ܪ̈ܚܳܬܳܐ ܕܝ̣ܠܳܟ ܬܬ̣ܰܪܶܨ ܗܰܠ̈ܟܳܬܰܢ: ܘܒܰܫܒܝ̣̈ܠܰܝܟ ܐܰܬܩܶܢ ܡܰܪܕܝ̣ܬܰܢ: ܘܰܠܝܘ̣ܠ̈ܦܳܢܰܝܟ ܡܚܰܟ̈ܡܳܢܶܐ ܢ̇ܰܚܶܒ ܘܢ̇ܶܪܚܰܡ ܘܦܰܨܳܐ ܠܰܢ ܡ̣ܶܢ ܡܨܺܝ̈ܕܳܬܶܗ ܕܰܡܪܰܡܝܳܢܳܐ ܦܣܘ̣ܩ ܡܶܢܰܢ ܠܩܶܛܪ̈ܶܐ ܕܥܰܘܠܳܐ: ܘܰܠܡܶܐܣܰܪ̈ܝܳܬܳܐ ܕܚܰܘ̈ܒܶܐ ܘܕܰܚ̈ܛܳܗܶܐ ܚܠܘ̣ܛ ܠܰܨܰܠ̈ܰܘܳܬܰܢ ܥܰܡ ܬܶܓ̈ܡܶܐ ܪ̈ܘ̣ܚܳܢܳܝܶܐ ܘܰܫܡܰܝ̈ܳܢܶܐ: ܘܶܐܡܰܬܝ̱ ܕܕܳܢܰܚ ܐܰܢ̱ܬ ܒܣܰܘ̈ܦܰܝ ܥܳܠ̈ܡܶܐ: ܠܦܘ̣ܪܥܳܢܘ̣ܬܳܐ ܕܫܰܗܪ̈ܶܐ ܘܥܰܡ̈ܠܶܐ ܘܠܰܐܝ̈ܳܐ ܘܰܡܛܰܪ̈ܦܶܐ ܬܶܫܒܘ̣ܚܬܳܐ ܝܰܡܝ̣ܢܳܝܬܳܐ ܘܠܳܐ ܡܶܬܦܰܣܩܳܢܝ̣ܬܳܐ: ܢ̇ܶܫܬܘܶܐ ܕܢ̇ܶܙܡܰܪ ܠܳܟ: ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀