ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܚܰܢܳܢܳܐ ܘܰܡܪܰܚܡܳܢܳܐ ܘܰܡܪܰܚܦܳܢܳܐ ܡܳܪܝܳܐ: ܗܰܘ̇ ܕܰܠܟܽܠܗܽܘܢ ܟܺܐܢ̈ܶܐ ܩܰܕ̈ܡܳܝܶܐ ܒܨܰܘ̈ܡܶܐ ܚܰܝܠ̈ܬܳܢܶܐ: ܘܒܰܨܠ̈ܰܘܳܬܳܐ ܕܰܟܝ̈ܳܬܳܐ ܘܰܒܕܘ̣ܒܳܪ̈ܶܐ ܫܰܦܝ̣ܪ̈ܶܐ ܓܡ̣ܰܪܬ ܘܫܰܡܠܝ̣ܬ: ܘܰܥܒ̣ܰܕܬ ܐܶܢܽܘܢ ܕܘ̣ܡܝܳܐ ܡܰܘܬܪܳܢܳܐ ܠܰܐܝܠܶܝܢ ܕܰܒܥܶܩ̈ܒܳܬܗܽܘܢ ܪܳܕܶܝܢ ܘܒܰܫܒܝ̣̈ܠܰܝܗܽܘܢ ܡܗܰܠܟܝ̣ܢ ܘܰܒܗܽܘܢ ܡܶܬܕܰܡܶܝܢ: ܗܰܒ ܠܰܢ ܡܳܪܝ̱ ܕܰܢ̇ܡܰܪܶܐ ܒܕܘ̣ܒܳܪ̈ܰܝܗܽܘܢ: ܘܰܕܢ̇ܶܛܰܢ ܒܥܰܡ̈ܠܶܐ ܕܰܡܝܰܬܪܘ̣ܬܳܐ ܒܰܕܡܽܘ̣ܬܗܽܘܢ: ܘܩܰܒܶܠ ܨܰܘܡܰܢ ܘܰܨܠܰܘ̈ܳܬܰܢ ܘܬܶܢܚ̈ܳܬܰܢ ܒܰܦܝܳܣ̈ܰܝܗܽܘܢ: ܘܰܐܡܛܰܪ ܥܠܰܝܢ ܡܶܛܪܳܐ ܕܰܚܢܳܢܳܟ ܒܒܳܥܘ̈ܳܬܗܽܘܢ: ܘܛܰܠܳܐ ܕܒܰܣܝ̣ܡܘ̣ܬܳܟ ܪܘ̣ܣ ܥܰܠ ܓܰܪ̈ܡܶܐ ܕܥܰܢܝ̈ܕܶܐ ܡܗܰܝܡ̈ܢܶܐ: ܘܰܐܢܝ̣ܚ ܪ̈ܘ̣ܚܳܬܗܽܘܢ ܒܰܐܘ̈ܘܳܢܶܐ ܕܝ̣ܠܳܟ ܫܡܰܝ̈ܳܢܶܐ ܒܬܰܟܫ̈ܦܳܬܗܽܘܢ: ܡܶܛܽܠ ܕܐܰܢ̱ܬ ܗ̱ܘ̣ ܡܩܰܒܠܳܢܳܐ ܕܬܰܝ̈ܳܒܶܐ: ܘܠܳܟ ܫܘ̣ܒܚܳܐ ܡܰܣܩܝ̣ܢܰܢ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܡܪܰܝܡܳܐ ܘܰܓܢܝ̣ܙܳܐ ܕܶܐܬܚܙܝ̣ ܒܰܒܣܰܪ ܒܛܰܝܒܘ̣ܬܶܗ: ܘܨܰܘܡܳܐ ܐܰܪܒܥܝ̣ܢܳܝܳܐ ܫܰܡ̣ܠܝ̣ ܗ̱ܘܳܐ ܒܰܡܕܰܒܪܳܢܘ̣ܬܶܗ: ܘܠܰܡܢܰܣܝܳܢܳܐ ܫܰܦ̣ܶܠ ܒܚܰܝܠܬܳܢܘ̣ܬܶܗ ܗܰܘ̇ ܕܠܰܐܒܽܘܢ ܐܳܕܳܡ ܐܰܛܥܝ̣ ܒܰܢܟܝ̣ܠܘ̣ܬܶܗ: ܘܰܠܝܳܪܬܘ̣ܬܶܗ ܩܰܕܡܳܝܬܳܐ ܐܰܦ̣ܢܝܶܗ ܒܰܡܪܰܚܡܳܢܘ̣ܬܶܗ: ܘܰܐ̱ܚܝܳܢܳܐ ܠܡܰܠܰܐܟ̈ܶܐ ܚܰܘܝܶܗ ܒܛܰܝܒܘ̣ܬܶܗ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܨܰܦܪܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܩܕܳܡܰܝܢ ܘܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܩܰܒܠܳܢܳܐ ܕܨܰܘܡܳܐ ܡܫܝ̣ܚܳܐ ܐܰܠܳܗܳܐ: ܕܨܰܘܡܳܐ ܠܒ̣ܰܟ ܐܰܝܟ ܚܰܝܳܒܳܐ ܡܶܛܽܠ ܕܰܗ̣ܘܳܐ ܒܰܪܢܳܫܳܐ: ܘܫܳܡܘ̣ܥܳܐ ܕܰܨܠܰܘ̈ܳܬܳܐ ܩܰܕܝ̈ܫܳܬܳܐ: ܘܰܡܦܰܢܝܳܢܳܐ ܕܫܶܐܠܴ̈ܬܳܐ ܟܺܐܢ̈ܳܬܳܐ: ܕܰܨܠܘ̣ܬܳܐ ܩܰܪܶܒ ܠܰܐܒܘ̣ܗ̱ܝ ܐܰܝܟ ܚܰܠܳܫܳܐ: ܗܰܘ̇ ܕܟܰܕ ܟܽܠܗܶܝܢ ܕܰܟܝܳܢܳܐ ܐ̱ܢܳܫܳܝܳܐ ܥܠܰܝܟ ܩܰܒܶܠ̣ܬ ܘܫܰܡܠܝ̣ܬ ܣܛܰܪ ܡܶܢ ܚܛܝ̣ܬܳܐ: ܘܰܗ̣ܘܰܝܬ ܠܰܢ ܪܝ̣ܫܝ̣ܬܳܐ ܕܚܰܝ̈ܶܐ ܚܠܳܦ ܪܝܫ ܓܒܝ̣ܠܬܰܢ ܕܶܐܬ̣ܚܰܝܰܒ ܒܝܰܕ ܝܰܥܢܘ̣ܬܳܐ: ܘܰܢܙܝ̣ܪܘ̣ܬܳܐ ܕܡܶܢ ܡܶܐܟ̈ܠܳܬܳܐ: ܕܪܰܫ̣ܬ ܠܰܢ ܫܒܝ̣ܠܳܐ ܕܪܳܕܶܐ ܩܰܛܝ̣ܢܳܐܝ̣ܬ ܒܐܘ̣ܪܚܳܐ ܐܰܠܝ̣ܨܬܳܐ ܕܡܰܘܒܠܳܐ ܠܰܢ ܠܡܰܠܟܘ̣ܬܳܐ ܫܡܰܝܳܢܝ̣ܬܳܐ: ܘܠܳܟ ܕܐܝ̣ܬܰܝܟ ܚܰܝ̈ܶܐ ܘܠܰܢ ܠܘܳܬܳܟ ܢܳܓܶܕ ܐܰܢ̱ܬ: ܡܦܝ̣ܣܝ̣ܢܰܢ ܕܰܬ̣ܚܰܝܶܠ ܠܰܢ ܕܰܒܨܰܘܡܳܐ ܕܰܟܝܳܐ ܘܩܰܕܝ̣ܫܳܐ ܢ̇ܶܫܦܰܪ ܠܳܟ: ܠܰܘ ܟܰܕ ܠܦܘ̣̈ܡܰܝܢ ܒܰܠܚܘ̣ܕ ܚܳܣܟܝ̣ܢܰܢ ܐܶܠܳܐ ܘܰܠܠܶܒܰܘ̈ܳܬܰܢ ܡܶܢ ܟܽܠ ܥܰܘܠܳܐ ܘܢܶܟܠܳܐ ܚܳܣܠܝ̣ܢܰܢ: ܠܰܘ ܟܰܕ ܡܶܢ ܫܶܩܝܳܐ ܕܚܰܡܪ̈ܳܢܶܐ ܡܶܬܥܰܢܘܺܝ̣ܢܰܢ ܐܶܠܳܐ ܡܶܢ ܬܶܛܪܳܐ ܕܪܘ̣ܓܙܳܐ ܘܫܰܟ݂ܪܳܐ ܫܟܝ̣ܪܳܐ ܕܰܒܥܶܠܕܒܳܒܘ̣ܬܳܐ ܡܶܬܢܰܙܪܝ̣ܢܰܢ: ܠܰܘ ܟܰܕ ܠܦܘ̈ܛܳܡܶܐ ܦܓܪ̈ܳܢܳܝܶܐ ܫܳܒܩܝ̣ܢܰܢ ܐܶܠܳܐ ܠܢܰܦܫ̈ܳܬܰܢ ܒܒܘ̈ܣܳܡܶܐ ܪ̈ܘ̣ܚܳܢܳܝܶܐ ܡܬܰܪܣܝ̣ܢܰܢ: ܠܰܘ ܟܰܕ ܒܰܚ̈ܕܳܕܶܐ ܒܫܰܝܢܳܐ ܘܒܰܫܠܳܡܳܐ ܦܳܓܥܝ̣ܢܰܢ ܐܶܠܳܐ ܚܠܳܦ ܐ̱ܚܪ̈ܳܢܶܐ ܪ̈ܰܚܡܶܐ ܘܰܚܢܳܢܳܐ ܫܳܐܠܝ̣ܢܰܢ ܐܰܟܡܳܐ ܕܰܦܩܝ̣ܕܝ̣ܢܰܢ: ܠܰܘ ܟܰܕ ܒܰܠܒܘ̣̈ܫܶܐ ܕܣܘ̣ܡܥܳܠܳܐ ܕܰܢܙܝ̣ܪܘ̣ܬܳܐ ܡܶܬܚܙܶܝܢܰܢ ܐܶܠܳܐ ܘܰܠܒܰܪܢܳܫܰܢ ܓܰܘܳܝܳܐ ܒܰܥ̈ܒܳܕܶܐ ܕܙܰܕܝ̣ܩܘ̣ܬܳܐ ܡܨܰܒܬܝ̣ܢܰܢ: ܟܰܕ ܐܝ̣ܕܰܝ̈ܢ ܦܳܫܛܝ̣ܢܰܢ ܒܙܶܕ̈ܩܳܬܳܐ: ܪ̈ܶܓܠܰܝܢ ܡܛܰܟܣܝ̣ܢܰܢ ܒܗܰܠ̈ܟܳܬܳܐ ܙܗܝ̣ܪ̈ܳܬܳܐ: ܟܰܕ ܠܰܐܟܣ̈ܢܳܝܶܐ ܘܢܘ̣ܟܪ̈ܳܝܶܐ ܒܒܳܬܰܝ̈ܢ ܡܩܰܒܠܝ̣ܢܰܢ: ܘܰܠܢܰܦܫ̈ܳܬܰܢ ܠܰܐܘ̈ܘܳܢܶܐ ܕܰܢܝܳܚܳܐ ܕܰܡܠܝ̣ܟܝ̣ܢ ܠܙܰܕܝ̈ܩܶܐ ܡܙܰܡܢܝ̣ܢܰܢ: ܟܰܕ ܟܽܠ ܩܶܛܪ̈ܶܐ ܕܥܰܘܠܳܐ ܡܶܢܰܢ ܫܳܪܶܝܢܰܢ: ܘܡܶܐܣܰܪ̈ܝܳܬܳܐ ܕܢܶܟܠܳܐ ܡܦܰܣܩܝ̣ܢܰܢ: ܟܰܕ ܨܠܰܘ̈ܳܬܰܢ ܘܒܳܥܘ̈ܳܬܰܢ ܕܠܳܐ ܫܶܠܝܳܐ ܡܫܰܡܠܶܝܢܰܢ: ܗܰܘ̈ܢܰܝܢ ܘܪ̈ܶܥܝܳܢܰܝܢ ܠܰܫܡܰܝܳܐ ܠܘܳܬܳܟ ܡܪܝ̣ܡܝ̣ܢܰܢ: ܟܰܕ ܡܶܢ ܐܰܪܥܳܐ ܘܰܐܪ̈ܥܳܢܝܳܬܳܐ ܓܡܝ̣ܪܳܐܝ̣ܬ ܐܰܦܰܝ̈ܢ ܡܰܗܦܟܝ̣ܢܰܢ: ܒܰܫܡܰܝܳܐ ܘܰܫܡܰܝ̈ܳܢܝܳܬܳܐ ܡܶܬܒܰܩܶܝܢܰܢ: ܐܝ̣ܢ܇ ܡܳܪܝܳܐ ܒܳܥܶܝܢܰܢ ܡܶܢܳܟ ܘܰܡܦܝ̣ܣܝ̣ܢܰܢ: ܠܳܐ ܢ̣ܶܗܘܶܐ ܨܰܘܡܰܢ ܠܩܘ̣ܛܪܳܓܳܐ ܕܝ̣ܠܰܢ: ܘܠܳܐ ܨܠܰܘ̈ܳܬܰܢ ܠܒܶܗܬܬܰܢ ܐܳܦܠܳܐ ܒܳܥܘ̈ܳܬܰܢ ܠܚܰܝܳܒܘ̣ܬܰܢ: ܘܰܐܫܘܳܐ ܠܥܺܕܬܳܟ ܩܰܕܝ̣ܫܬܳܐ ܕܰܬܨܽܘ̣ܡܝ̱ ܠܳܟ ܟܺܐܢܳܐܝ̣ܬ ܒܕܰܟܝܽܘ̣ܬܳܐ ܘܩܰܕܝ̣ܫܘ̣ܬܳܐ: ܘܰܬ̣ܨܰܠܶܐ ܩܕܳܡܰܝܟ ܩܰܕܝ̣ܫܳܐܝ̣ܬ: ܘܰܐܫܪܳܐ ܒܳܗ̇ ܫܰܝܢܳܐ ܘܰܫܠܳܡܳܐ ܗܰܘ̇ ܕܠܳܟ ܪܚܝ̣ܡ: ܘܰܐܫܦܰܥ ܒܘ̣ܪ̈ܟܳܬܳܟ ܥܰܠ ܥܰܡܳܟ ܡܗܰܝܡܢܳܐ ܘܪܰܡܪܶܡ ܠܟܳܗ̈ܢܶܐ ܒܨܶܒ̈ܬܶܐ ܪ̈ܘ̣ܚܳܢܳܝܶܐ ܕܟܳܗܢܘ̣ܬܳܐ: ܘܠܰܡܫܰܡ̈ܫܳܢܶܐ ܗܰܒ ܕܘ̣ܒܳܪܳܐ ܕܠܳܐ ܥܶܕܠܳܝ ܕܰܒܙܰܗܝܽܘ̣ܬܳܐ ܢܫܰܡܫܽܘܢ ܠܡܰܕܒܚܳܟ ܩܰܕܝ̣ܫܳܐ: ܗܘܺܝ̣ ܡܳܪܝܳܐ ܒܰܚܢܳܢܳܟ ܚܘ̣ܛܪܳܐ ܡܣܰܡܟܳܢܳܐ ܠܣܰܝܒܘ̣ܬܳܐ ܡܚܝ̣ܠܬܳܐ: ܘܫܘ̣ܠܳܡܳܐ ܕܰܡܠܶܐ ܦܰܪܶܗܣܺܝܰܐ ܠܝܰܘܡ̈ܳܬܳܗ̇: ܫܰܟܶܢ ܠܰܥܠܰܝ̈ܡܶܐ ܡܚܰܡܣܢܳܢܘ̣ܬܳܐ ܘܙܳܟܘ̣ܬܳܐ ܕܥܰܠ ܚܰܫ̈ܶܐ ܥܕܝ̣̈ܠܶܐ: ܠܫܰܒܪ̈ܶܐ ܪܰܒܳܐ ܒܰܚܢܳܢܳܟ: ܘܫܰܒܶܠ ܠܰܛܠܳܝ̈ܶܐ ܒܬܰܪܒܝ̣ܬܳܐ ܡܝܰܬܰܪܬܳܐ: ܘܠܰܥܠܰܠܬܳܐ ܕܫܰܢ̱ܬܳܐ ܒܰܪܶܟ ܒܛܰܝܒܘ̣ܬܳܟ ܘܪܰܒܳܐ ܒܡܶܛܪ̈ܶܐ ܘܛܰܠܷ̈ـܐ ܡܚܰܕ̈ܝܳܢܶܐ: ܘܟܽܠܗܶܝܢ ܡܰܚ̈ܘܳܬܳܐ ܘܫܰܒ̈ܛܶܐ ܕܪܘ̣ܓܙܳܐ ܒܰܛܶܠ ܡܶܢ ܥܺܕܬܳܟ: ܘܰܢ̇ܪܰܡܪܶܡ ܠܳܟ ܡܶܢ ܦܘ̣̈ܡܰܝܢ ܘܢܶܪܥܰܡ ܫܘ̣ܒܚܳܐ ܒܦܘ̣ܡ ܝܰܠ̈ܕܶܝܗ̇ ܒܗܳܠܶܝܢ ܝܰܘܡ̈ܳܬܳܐ ܕܟܰܝ̈ܳܐ ܘܩܰܕܝ̈ܫܶܐ ܘܰܠܢܰܦܫ̈ܳܬܳܐ ܕܥܰܢܝ̣̈ܕܰܝܢ ܕܩܰܕܶܡ̣ܘ̱ ܫܟܶܒ̣ܘ̱ ܥܰܠ ܣܰܒܪܳܟ ܒܗܰܝܡܳܢܘ̣ܬܳܐ ܕܰܫܪܳܪܳܐ ܥܒܶܕ ܢܘ̣ܚܳܡܳܐ ܕܙܰܕܝ̣ܩܘ̣ܬܳܐ: ܘܫܘ̣ܒܚܳܐ ܘܐܝ̣ܩܳܪܳܐ ܘܩܘ̣ܒܳܠܛܰܝܒܘ̣ܬܳܐ ܢ̇ܰܣܶܩ ܠܳܟ ܘܒܺܐܝ̈ܕܰܝܟ ܘܥܰܡܳܟ ܠܰܐܒܳܐ ܕܫܰܠܚ̣ܳܟ ܠܦܘ̣ܪܩܳܢܰܢ ܘܰܠܪܘ̣ܚܳܟ ܩܰܕܝ̣ܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܙܰܝܢܳܐ ܕܦܘ̣ܪܩܳܢܳܐ ܗܘܺܝ̣ ܠܰܢ ܡܫܝ̣ܚܳܐ ܦܳܪܘ̣ܩܰܢ ܘܒܳܟ ܢ̇ܶܫܟܰܚ ܕܰܢ̇ܩܘ̣ܡ ܠܘ̣ܩܒܰܠ ܨܶܢܥ̈ܳܬܶܗ ܕܳܐܟܶܠܩܰܪܨܳܐ ܘܢܶܫ̇ܬܰܘܙܰܒ ܡܶܢ ܣܰܓܺܝܽܐܘ̣ܬ ܢܶܟܠܰܘ̈ܗ̱ܝ ܘܠܘ̣ܬܳܟ̈ܰܘܗ̱ܝ: ܘܩܰܒܶܠ ܒܪܶܚܡܰܬ݀ ܐ̱ܢܳܫܘ̣ܬܳܟ ܠܥܶܛܪܳܐ ܗܰܢܺܝܳܐܐ ܕܡܶܢ ܒܨܺܝܪܘ̣ܬܰܢ ܡܶܬܩܰܪܰܒ ܠܐܝ̣ܩܳܪܳܐ ܕܰܐܠܳܗܘ̣ܬܳܟ: ܘܨܰܘܡܰܢ ܢܶܗܘܶܐ ܠܰܢܝܳܚܳܟ ܘܰܨܠܘ̣ܬܰܢ ܠܬܰܪܥܘ̣ܬܳܟ: ܘܰܐܫܘܳܐ ܠܰܢ ܕܕܰܟܝܳܐܝ̣ܬ ܘܩܰܕܝ̣ܫܳܐܝ̣ܬ ܢ̇ܡܰܢܰܥ ܥܰܡ ܪܘܳܙܳܐ ܘܚܰܕܘ̣ܬܳܐ ܠܫܰܘܬܳܦܘ̣ܬܳܐ ܕܦܶܨܚܳܐ ܩܰܕܝ̣ܫܳܐ: ܘܕܰܩܝܳܡܬܳܐ ܡܚܰܕܝܳܢܝ̣ܬܳܐ ܕܝ̣ܠܳܟ ܡܫܝ̣ܚܳܐ ܐܰܠܳܗܰܢ ܘܢ̇ܰܘܕܶܐ ܘܢ̇ܶܣܓܘ̣ܕ ܠܳܟ ܣܓܝ̣ܕܳܐ ܕܠܳܐ ܫܘ̣ܪܳܝ: ܕܪ̈ܘ̣ܚܳܢܶܐ ܣܳܓܕܝ̣ܢ ܠܶܗ ܘܦܰܓܪ̈ܳܢܶܐ ܡܙܰܝܚܝ̣ܢ ܠܶܗ: ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀