ܦܪܽܘ̣ܡܝܽܘܢ

ܬܶܫܒܘ̣ܚܬܳܐ: ܠܗܰܘ̇ ܟܺܐܢܳܐ ܘܰܬܪܝ̣ܨܳܐ ܕܒ̣ܰܕܰܪ ܒܟܺܐܢܘ̣ܬܶܗ ܠܙܳܩܘ̣̈ܦܰܘܗ̱ܝ: ܘܟܰܢ̣ܶܫ ܒܛܰܝܒܘ̣ܬܶܗ ܠܣܳܓܘ̣̈ܕܰܘܗ̱ܝ: ܠܗܰܘ ܚܰܟܝ̣ܡܳܐ ܕܫܳܛ ܠܥܘ̣ܫܢܳܐ ܒܰܡܚܝ̣ܠܘ̣ܬܳܐ ܘܰܠܪܳܡܘ̣ܬܳܐ ܒܡܰܟܝ̣ܟܘ̣ܬܳܐ: ܘܩܰܦ̣ܰܚ ܠܪܳܡܘ̣ܬܳܐ ܕܫܰܠܝ̣̈ܛܳܢܶܐ: ܘܣܰܚ̣ܶܦ ܟܘ̣ܪ̈ܣܰܘܳܬܳܐ ܕܡܳܪ̈ܰܘܳܬܳܐ ܒܰܟܪܝ̣ܗܘ̣ܬܳܐ: ܘܐܰܫ̣ܛܝ̣ ܠܦܝ̣ܠܠܘ̣ܣܘ̣ܦܘ̣ܬܳܐ ܕܚܰܟܝ̣̈ܡܶܐ ܒܗܶܕܝܘ̣ܛܘ̣ܬܳܐ: ܘܬܰܒ̣ܰܪ ܐܶܠܦ̈ܶܐ ܕܬܰܪܫܝ̣ܫ ܒܪܘ̣ܚܳܐ ܥܰܫܝ̣ܢܬܳܐ ܕܢܶܩ̣ܫܰܬ݀ ܡܶܢ ܡܘ̣ܟܳܟܳܐ ܕܰܙܩܝ̣ܦܶܗ ܣܓܝ̣ܕܳܐ ܘܬܰܠ̣ܰܚ ܠܰܐܪܡܶܢܽܘܢ ܕܰܣܦܝ̣̈ܢܶܐ ܕܥܰܘ̈ܳܠܶܐ ܒܙܰܕܝ̣ܩܘ̣ܬܳܐ ܕܚܰܫܶܗ ܩܰܕܝ̣ܫܳܐ ܘܦܳܪܘ̣ܩܳܝܳܐ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܰܬܠܳܬܫܳܥܝ̣̈ܢ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒܢ̈ܶܐ ܘܟܽܠܗܽܘܢ ܝܘ̈ܡܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܳܪܝܳܐ ܐܰܠܳܗܳܐ ܘܚܰܝܠܬܳܢܳܐ ܘܐܰܚܝ̣ܕ ܟܽܠ: ܗܰܘ̇ ܡܶܠܬܳܐ ܚܰܝܳܐ ܕܐܰܒܳܐ ܚܰܝܳܐ ܘܛܘ̣ܒܬܳܢܳܐ: ܗܰܘ̇ ܡܰܒܘ̣ܥܳܐ ܕܥܘ̣ܕܪ̈ܳܢܶܐ ܘܰܡܫܰܟܢܳܢܳܐ ܕܦܘ̣ܪܩܳܢܳܐ ܠܰܟܝܳܢܳܐ ܐ̱ܢܳܫܳܝܳܐ: ܗܰܘ̇ ܕܰܡܥܰܠܰܝ ܡܶܢ ܟܽܠ ܝ̣ܕܰܥܬܳܐ ܘܣܘ̣ܟܳܠܳܐ ܘܰܬܚܘ̣ܡܳܐ ܕܰܒܪ̈ܰܝܳܐ ܒܰܓܢܝ̣ܙܘ̣ܬ ܐܰܠܳܗܘ̣ܬܶܗ ܡܪܰܝܰܡܬܳܐ: ܗܰܘ ܕܟܰܕ ܚـܼܙܰܝܬܳܝܗ̱ܝ ܠܨܰܠܡܳܐ ܕܝ̣ܠܳܟ ܕܡܶܬܢܰܘܰܓ ܒܚܰܫ̈ܶܐ ܕܰܚܛܝ̣ܬܳܐ: ܘܰܡܥܰܪܩܰܠ ܒܨܶܒܝܳܢܶܗ ܒܦܰܚ̈ܶܐ ܕܰܚܛܝ̣ܬܳܐ ܘܰܕܣܳܛܳܢܳܐ ܐܶܬ̣ܥܨܰܝܬ ܡܶܢ ܪ̈ܰܚܡܰܝܟ ܡܬܘ̣̈ܡܳܝܶܐ ܘܕܰܠܥܳܠܰܡ ܡܟܰܬܪܝ̣ܢ: ܐܶܬ̣ܥܰܪܙܰܠ̣ܬ ܥܰܡ ܒܶܣܪܳܐ ܘܢܰܦܫܳܐ ܝܰܕܘ̣ܥܬܳܢܝ̣ܬܳܐ ܘܰܗ̣ܘܰܝܬ ܒܰܪܢܳܫܳܐ ܡܫܰܡܠܝܳܐ ܕܠܳܐ ܫܘ̣ܚܠܳܦܳܐ ܘܫܘ̣ܓܢܳܝܳܐ: ܟܰܕ ܟܰܬܰܪܬ ܐܰܠܳܗܳܐ ܒܟܰܣܝܘ̣ܬܳܟ ܕܠܳܐ ܡܶܬܥܰܩܒܳܐ: ܘܰܣܒ̣ܰܠܬ ܟܽܠܗܶܝܢ ܐ̱ܢܳܫܝ̈ܳܬܳܐ ܘܠܳܐ ܥܕܝ̣̈ܠܳܬܳܐ ܨܶܒܝܳܢܳܐܝ̣ܬ: ܐܰܝܟܰܢܳܐ ܕܰܠܒܰܪܢܳܫܳܐ ܬ̣ܫܰܟܶܢ ܐܰܠܳܗܘ̣ܬܳܐ: ܘܡܶܢ ܚܰܫ̈ܶܐ ܢܕܝ̣̈ܕܶܐ ܕܰܒܗܽܘܢ ܡܡܰܚܰܝ ܗ̱ܘܳܐ ܬ̣ܚܰܪܪܺܝ̣ܘܗ̱ܝ: ܘܰܠܘܳܬ ܚܰܫܳܐ ܕܰܨܠܝ̣ܒܳܐ ܐܰܢ̱ܬ ܠܳܟ ܛܰܝܶܒ̣ܬ ܘܥ̣ܰܬܶܕܬ ܕܰܠܗܰܘ̇ ܕܡܰܚܶܫ ܗ̱ܘܳܐ ܠܰܢ ܬܰܚ̣ܶܫ: ܬܘ̣ܒ ܐܰܝܟܰܢܳܐ ܕܰܠܚܰܫ̈ܶܐ ܕܝ̣ܠܰܢ ܒܝ̣̈ܫܶܐ ܒܚܰܫܳܐ ܕܝ̣ܠܳܟ ܦܳܪܘ̣ܩܳܝܳܐ ܬ̣ܚܰܪܰܪ ܕܬ̣ܶܥܒܶܕ ܠܰܢ ܠܳܐ ܚܳܫܘ̣̈ܫܶܐ: ܘܒܰܕܓܽܘܢ ܡܦܝ̣ܣܝ̣ܢܰܢ ܠܳܟ ܡܳܪܝܳܐ: ܒܶܗ ܟܰܕ ܒܶܗ ܒܚܰܫܳܟ ܦܳܪܘ̣ܩܳܝܳܐ ܕܬܰܚ̣ܠܶܡ ܘܬܰܐܣ̣ܶܐ ܠܰܢ: ܘܠܳܐ ܡܶܙܕܰܟ̈ܝܳܢܶܐ ܠܰܚܛܝ̣ܬܳܐ ܬ̣ܶܥܒܶܕ ܠܰܢ: ܘܰܬ̣ܚܰܪܰܪ ܠܰܢ ܡܶܢ ܟܽܠܗܽܘܢ ܚܰܫ̈ܶܐ ܢܕܝ̣̈ܕܶܐ ܘܡܰܘ̈ܒܕܳܢܶܐ ܕܐܳܟܶܠܩܰܪܨܳܐ ܡܳܪܘ̣ܕܳܐ: ܟܰܕ ܫܳܚܶܩ ܐܰܢ̱ܬ ܒܰܥܓܰܠ ܠܪܝ̣ܫܳܢܘ̣ܬܳܐ ܕܝ̣ܠܶܗ ܡܰܪܝ̣ܪܬܳܐ ܬܚܶܝܬ ܪ̈ܶܓܠܶܐ ܕܝ̣ܠܰܢ ܒܚܰܝܠܶܗ ܕܰܨܠܝ̣ܒܳܟ ܣܓܝ̣ܕܳܐ: ܘܰܒܚܰܝ̈ܶܐ ܕܰܬܢܳܢ ܒܫܘ̣ܒܗܳܪܳܐ ܕܚܰܫܰܝ̈ܟ ܦܳܪ̈ܘ̣ܩܳܝܶܐ ܢܰܨܰܚ ܠܰܢ: ܘܬܰܡܳܢ ܒܛܘ̣ܒܬܳܢܘ̣ܬܳܐ ܕܝ̣ܠܳܟ ܐܰܠܗܳܝ̇ܬܳܐ ܫܰܒܰܚ ܠܰܢ: ܘܡܶܢ ܟܽܠܳܗ̇ ܣܰܩܘ̣ܒܠܳܝܘ̣ܬܳܐ ܘܩܰܘܡܳܐ ܕܠܘ̣ܩܒܰܠ ܦܘ̣ܪܩܳܢܳܐ ܕܝ̣ܠܰܢ: ܘܰܬܪܘ̣ܨ ܠܰܫܒܝ̣̈ܠܶܐ ܕܗܰܘܢܰܝ̈ܢ ܡܶܢ ܡܰܦܘ̣ܠܬܳܐ: ܡܶܛܽܠ ܚܰܫܰܝ̈ܟ ܣܓܝ̣̈ܕܶܐ: ܟܰܕ ܡܶܬܢܰܗܪܝ̣ܢܰܢ ܡܶܢܳܟ ܕܐܰܢ̱ܬ ܗ̱ܘ̣ ܐܰܠܳܗܳܐ ܠܳܐ ܚܳܫܘ̣ܫܳܐ ܒܐܘ̣ܣܺܝܰܐ ܕܝ̣ܠܳܟ: ܐܳܦܶܢ ܒܚܰܫ̈ܶܐ ܕܒܰܒܣܰܪ ܐܶܬ̣ܥܰܪܙܰܠܬ ܠܦܘ̣ܪܩܳܢܰܢ: ܘܚܰܕܶܬ ܒܰܢ ܟܽܠܝܘ̣ܡ ܦܘ̣ܪܩܳܢܳܟ: ܘܛܰܝܶܒ ܠܰܢ ܠܫܰܘܬܳܦܘ̣ܬܳܐ ܕܦܶܨܚܳܟ ܘܕܰܩܝܳܡܬܳܟ ܡܫܰܒܰܚܬܳܐ ܗܳܝ̇ ܕܝܳܗܶܒ ܐܰܢ̱ܬ ܡܫܰܡܠܝܳܐܝ̣ܬ ܠܡܰܠܟܘ̣ܬܳܟ: ܘܢܰܛܰܪ ܠܥܺܕܬܳܟ ܒܰܚܢܳܢܳܟ: ܘܰܠܩܳܝܘ̣̈ܡܶܐ ܡܶܢ ܟܽܠ ܬܰܘܫܳܐ ܥܕܝ̣ܠܳܐ ܫܰܘܙܶܒ: ܐܰܫܘܳܐ ܠܰܢ ܕܰܬܢܳܢ ܢ̇ܰܣܶܩ ܠܳܟ ܫܘ̣ܒܚܳܐ ܒܥܺܐܕ̈ܶܐ ܕܦܘ̣ܪܩܳܢܰܢ: ܘܬܰܡܳܢ ܥܰܡ ܟܶܢ̈ܫܶܐ ܫܡܰܝ̈ܳܢܶܐ ܘܓܘ̣̈ܕܶܐ ܕܩܰܕܝ̣̈ܫܶܐ ܬܰܘܕܝ̣ܬܳܐ ܢ̇ܝܰܒܶܒ ܠܳܟ: ܒܰܪ ܚܰܝܳܐ ܘܠܳܐ ܚܳܫܘ̣ܫܳܐ ܕܰܒܝܰܕ ܚܰܫܳܟ ܦܪܘ̣ܩ ܠܰܢ: ܘܠܰܐܒܘ̣ܟ ܡܫܰܒܚܳܐ ܕܨܳܒܶܐ ܒܦܘ̣ܪܩܳܢܰܢ: ܘܰܠܪܘ̣ܚܳܟ ܩܰܕܝ̣ܫܳܐ ܓܳܡܘ̣ܪܳܐ ܘܰܡܩܰܕܫܳܢܳܐ ܕܢܰܦ̈ܫܳܬܰܢ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܐܰܢܗܰܪ ܡܳܪܝ̱ ܠܗܰܘ̈ܢܰܝܢ ܒܢܘ̣ܗܪܳܐ ܕܐܶܘܰܢܓܶܠܝܽܘܢ ܕܛܰܝܒܘ̣ܬܳܟ: ܘܣܰܬܶܬ ܠܢܰܦ̈ܫܳܬܰܢ ܒܚܘ̣ܒܳܐ ܕܰܨܠܝ̣ܒܳܟ: ܘܙܰܝܶܢ ܠܦܰܓܪ̈ܰܝܢ ܒܠܳܐ ܚܳܫܘ̣ܫܘ̣ܬܳܐ ܕܚܰܫܳܟ: ܘܛܰܪ ܠܡܰܚ̈ܫܒܳܬܰܢ ܒܛܘ̣ܒܬܳܢܘ̣ܬܳܐ ܕܪܶܚܡܬܳܟ: ܘܐܰܥܝ̣ܪ ܠܠܶܒܰܘ̈ܳܬܰܢ ܠܘܳܬ ܡܡܰܠܠܘ̣ܬ ܬܶܫܒ̈ܚܳܬܳܟ: ܘܐܰܥܛܰܪ ܒܰܢ ܪܝ̣ܚܳܐ ܚܰܠܝܳܐ ܕܕܘ̣ܒܳܪ̈ܶܐ ܕܰܡܪܰܥܶܝܢ ܠܳܟ: ܘܩܰܒܶܠ ܦܝܪ̈ܡܰܝܢ ܠܬܰܪܥܘ̣ܬܳܐ ܕܰܡܪܰܚܡܳܢܘ̣ܬܳܟ: ܘܕܐܰܒܘ̣ܟ ܘܰܕܪܘ̣ܚܳܟ ܩܰܕܝ̣ܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀