ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܬܪܝ̣ܨܳܐ ܕܰܒܟܺܐܢܘ̣ܬܶܗ ܠ̣ܳܛܳܗ̇ ܠܬܺܬܳܐ ܕܦܺܐܪ̈ܶܐ ܠܳܐ ܝܶܗ̣ܒܰܬ݀ : ܘܰܒܘܳܠܝ̣ܬܳܐ ܥܰܩ̣ܪܳܗ̇ ܠܰܟܢܘ̣ܫܬܳܐ ܕܫܘ̣ܒܚܶܗ ܠܳܐ ܠܶܥ̣ܙܰܬ݀ ܘܰܒܛܰܝܒܘ̣ܬܶܗ ܢܰܨܒ̣ܳܗ̇ ܠܥܺܕܬܳܐ ܟܰܠܬܳܐ ܕܠܶܗ ܐܶܬܡܰܟ݂ܪܰܬ݀ : ܘܰܒܟܰܗܝ̣ܢܘ̣ܬ ܛܳܒ̈ܳܬܶܗ ܒܫܘ̣ܒܚܳܐ ܕܡ̣ܶܢ ܝܰܡܝ̣ܢܶܗ ܩܳܡ̣ܰܬ݀ : ܘܰܒܚܰܫܰܘ̈ܗ̱ܝ ܩܰܕܝ̣̈ܫܶܐ ܚܳܕܝܳܐܝ̣ܬ ܘܰܕܠܳܐ ܒܶܗܬܬܳܐ ܐܘܕܝܰܬ݀ : ܘܰܒܫܘ̣̈ܡܳܬܶܗ ܡ̣ܶܢ ܟܽܠܗܽܘܢ ܚܰܫ̈ܶܐ ܕܒܶܝܬ ܐܰܒܘ̣ܗ̇ ܐܶܬܰܐܣ̣ܝܰܬ݀ : ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܣܘ̣ܬܳܪܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒܢ̈ܶܐ ܘܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܐܰܠܳܗܳܐ ܗܰܘ̇ ܕܐܝ̣ܬܰܝܟ ܡܫܰܒܚܳܐ ܒܪܰܒܘ̣ܬܳܐ: ܘܠܳܐ ܡܶܣܬܰܝܟܳܐ ܒܡܰܚܫܰܒܬܳܐ ܡܗܰܕܪܳܐ ܒܥܘ̣ܫܢܳܐ ܕܓܰܐܝܘ̣ܬܳܐ ܘܰܡܥܰܠܝܳܐ ܒܣܘ̣ܓܳܐܐ ܕܛܰܝܒܘ̣ܬܳܐ: ܘܡܰܠܝܳܐ ܒܥܘ̣ܬܪܳܐ ܕܚܶܟܡܬܳܐ: ܘܰܬܡܝ̣ܗܳܐ ܒܫܘ̣ܦܪܳܐ ܕܐܝ̣ܬܘ̣ܬܳܐ: ܥܳܒܘ̣ܕܳܐ ܕܨܰܒ̣ܶܬ ܠܒܶܪ̈ܝܳܬܳܐ ܒܗܶܕܪܳܐ ܕܦܰܐܝܘ̣ܬܳܐ: ܘܐܰܠܒ̣ܶܫ ܠܥܳܡܰܪܬܳܐ ܦܪܝ̣ܣܳܐ ܕܬܶܫܒܘ̣ܚܬܳܐ: ܒܳܪܘ̣ܝܳܐ ܕܰܐܬ̣ܩܶܢ ܟܽܠ ܒܚܶܟܡܬܶܗ ܐܝ̣ܬܝܳܝܬܳܐ: ܘܰܡ̣ܬܰܚ ܫܡܰܝܳܐ ܒܰܣܰܟܘ̣ܠܬܳܢܘ̣ܬܶܗ ܡܬܘ̣ܡܳܝܬܳܐ: ܐܰܢ̱ܬ ܗ̱ܘ̣ ܗܰܘ̇ ܕܥܰܡ ܐܰܒܘ̣ܟ ܘܪܘ̣ܚܳܟ ܩܰܕܝ̣ܫܳܐ ܝܰܗ̣ܒܬ ܠܡܽܘ̣ܫܶܐ ܢܳܡܘ̣ܣܳܐ ܕܰܢܨܰܒ̣ܬ ܠܟܰܠܬܳܐ ܓܰܝܳܪܬܳܐ ܒܰܪ̱ܬ݀ ܐܰܒܪܳܗܳܡ: ܡܟܝ̣ܪܬܳܐ ܐܰܘܟܝ̣ܬ ܟܢܘ̣ܫܬܳܐ ܡܰܣܠܰܝܬܳܐ ܘܝܰܗ̣ܒܬ ܠܳܗ̇ ܥܶܙܰܩܬܳܐ ܘܗ̣ܰܕܰܪܬܳܗ̇ ܒܛܘ̣̈ܦܣܶܐ ܪ̈ܳܡܶܐ ܘܦ̈ܶܠܳܐܬܳܐ: ܘܒܰܠ̈ܒܘ̣ܫܶܐ ܕܡܰܫܟܰܢܙܰܒܢܳܐ ܢܰܟܶܦ̣ܬܳܗ̇ ܒܬܰܚܦܝ̣ܬܳܐ: ܕܬܶܗ̣ܘܶܐ ܟܢܝ̣ܟܳܐ ܒܩܰܝܛܘ̣ܢܳܗ̇ ܕܢܳܡܘ̣ܣܳܐ ܐܝܟ ܒܰܪܬܳܐ ܚܰܒܝ̣ܒܬܳܐ: ܘܫܰܡܰܗ̣ܬܳܗ̇ ܒܥܳܠܡܳܐ ܓܦܶܬܳܐ ܡܫܰܒܰܚܬܳܐ: ܘܰܦܠܰܚ̣ܬܳܗ̇ ܒܡ̈ܶܠܶܐ ܚܰܝ̈ܳܬܳܐ ܦܶܬܓ̈ܳܡܶܐ ܕܰܢܒܺܝܘ̣ܬܳܐ: ܘܐܰܚ̣ܕܰܪܬ ܠܳܗ̇ ܣܝܳܓܳܐ ܕܦܘ̣̈ܩܕܳܢܶܐ ܩܰܕܝ̣̈ܫܶܐ ܒܝܰܨܝ̣ܦܘ̣ܬܳܐ: ܘܐܰܬܩܶܢ̣ܬ ܒܳܗ̇ ܡܰܥܨܰܪܬܳܐ ܕܕܶܒܚ̈ܶܐ ܠܬܰܕܟܝ̣ܬܳܐ: ܘܡ̣ܶܢ ܥܢܳܢ̈ܶܐ ܪ̈ܰܓܝܳܬܳܐ ܕܰܢܒܺܝ̈ܶܐ ܪܰܣܶܣ̣ܬ ܠܳܗ̇ ܫܶܦ̈ܥܶܐ ܕܒܘ̣ܪ̈ܟܳܬܳܐ: ܘܐܰܪܘܝ̣ܬܳܗ̇ ܒܣܘ̣ܓܳܐܐ ܕܛܳܒ̈ܳܬܳܐ: ܘܐܰܥܬܰܪܬܳܗ̇ ܒܡܶܛܪ̈ܶܐ ܕܚܕ̈ܘܳܬܳܐ: ܘܒܰܕܡܘ̣ܬ ܥܢܳܩܳܐ ܡ̣ܶܢ ܣܘ̣ܟܳܝܳܗ̇ ܦܪܰܫ̣ܬ ܠܳܟ ܫܰܒܛܳܐ ܕܡܰܠܟܘ̣ܬܳܐ ܕܒܳܗ̇ ܬܶܬ̣ܝܰܒܰܠܝ̱ ܡܕܰܒܪܳܢܘ̣ܬܳܟ: ܘܬ̣ܶܬܶܐܣܰܪܝ̱ ܐ̱ܢܳܫܘ̣ܬܳܟ ܒܰܡܕܰܒܪܳܢܘ̣ܬܳܟ: ܘܐܰܝܟ ܫܰܒܘ̣ܩܳܐ ܡ̣ܶܢ ܢܶܨܒܬܳܐ ܓܒܝ̣ܬܳܐ ܫܩܰܠ̣ܬ ܕܢܶܗ̣ܘܶܐ ܠܗܶܕܪܳܐ ܕܐܝ̣ܩܳܪܳܟ ܩܰܕܝ̣ܫܳܐ: ܘܟܰܕ ܠܰܩܝܳܡܳܐ ܕܣܳܗ̈ܕܘܳܬܳܟ ܘܰܕܢܳܡܘ̣̈ܣܰܝܟ ܐܰܣܠ̣ܝܰܬ݀ ܓܘ̣ܡܕܳܢܝ̣ܬܳܐ: ܩܳܛܠܰܬ݀ ܠܰܢܒܺܝ̈ܶܐ ܘܠܐܝ̣ܙܓ̈ܰܕܶܐ ܕܝ̣ܠܳܟ: ܘܚܰܒܒ̣ܰܬ݀ ܠܕܶܚ̈ܠܳܬܳܐ ܣܪ̈ܝ̣ܩܳܬܳܐ: ܐܰܢ̱ܬ ܕܶܝܢ ܐܳܘ ܚܰܬܢܳܐ ܩܰܕܝ̣ܫܳܐ ܟܰܕ ܚـܼܙܰܝܬ ܠܠܳܐ ܡܶܬܛܦܝ̣ܣܳܢܘ̣ܬܳܗ̇ ܣܰܓܺܝ̣ܐܬܳܐ ܐܶܬ̣ܬܰܚܬܝ̣ܬ ܠܘܳܬܳܗ̇ ܒܰܡܪܰܚܡܳܢܘ̣ܬܳܟ: ܘܰܠܛܘ̣̈ܦܣܶܐ ܘܐ̱ܪ̈ܳܙܶܐ ܕܰܪܫܰܡ̣ܘ̱ ܠܶܗ ܩܰܕ̈ܡܳܝܶܐ ܒܦ̈ܶܠܳܐܬܳܐ ܐܝܬܝ̣ܬ ܠܫܘ̣ܡܠܳܝܳܐ ܘܠܰܓܡܝ̣ܪܘ̣ܬܳܐ: ܘܟܰܕ ܠܘܳܬ ܚܰܫܳܐ ܨܶܒܝܳܢܳܝܳܐ ܘܦܳܪܘ̣ܩܳܝܳܐ ܥܳܐܶܠ ܗ̱ܘܰܝܬ ܠܐܘ̣ܪܫܠܶܡ ܡܕܝ̣ܢ̱ܬܳܐ ܠܘܳܬ ܬܺܬܳܐ ܕܥܰܠ ܝܰܕ ܐܘ̣ܪܚܳܐ ܐܰܘܟܝ̣ܬ ܟܢܘ̣ܫܬܳܐ ܛܳܠܘ̣ܡܬܳܐ ܐܶܬܰܝܬ ܒܰܒܛܝ̣ܠܘ̣ܬܳܐ ܘܚܰܘܝ̣ܬ ܕܟܰܦܢܳܐ ܐܝ̣ܬܰܝܟ ܠܦܺܐܪ̈ܶܐ ܕܡܶܢ ܗܳܕܶܐ ܡܶܬ̣ܩܰܪܒܝ̣ܢ ܒܕܰܟܝܘ̣ܬܳܐ: ܐܰܝܟ ܦܺܐܪ̈ܶܐ ܕܡܶܢ ܗܳܝ ܡܶܬ̣ܢܰܣܒܝ̣ܢ ܠܬܰܪܣܝ̣ܬܳܐ: ܘܟܰܕ ܬܰܪ̈ܬܰܝܗܶܝܢ ܓܠܝ̣ܙܰܬ݀ ܡܶܢ ܦܺܐܪ̈ܶܐ ܐܶܬ̣ܚ̈ܙܝ̣ ܠܫܰܘܝܘ̣ܬܳܐ ܠܗܳܝ̇ ܡܰܢ ܐܰܘܒܶܫ̣ܬ ܠܗܳܕܶܐ ܕܶܝܢ ܛܪܰܕܬ ܘܐܰܦܶܩ̣ܬ ܡ̣ܶܢ ܒܶܝܬ ܐܰܒܘ̣ܟ ܒܟܺܐܢܘ̣ܬܳܐ: ܘܡܶܛܽܠܗܳܕܶܐ ܡܦܝ̣ܣܝ̣ܢܰܢ ܘܡܶܬܟܰܫܦܝ̣ܢܰܢ ܠܪܶܚܡܰܬ݀ ܐ̱ܢܳܫܘ̣ܬܳܟ ܬܗܝ̣ܪܬܳܐ: ܕܬܶܥ̣ܒܶܕ ܠܥܺܕܬܳܟ ܩܰܕܝ̣ܫܬܳܐ ܘܰܡܟܝ̣ܪܬܳܐ ܕܝ̣ܠܳܟ ܟܢܝ̣ܟܬܳܐ ܘܰܡܒܰܪܰܟܬܳܐ ܕܐܰܡܝ̣ܢܳܐܝ̣ܬ ܦܺܐܪ̈ܶܐ ܕܒܘ̣ܪ̈ܟܳܬܳܐ ܕܰܡܪܰܥܶܝܢ ܠܰܐܠܳܗܘ̣ܬܳܟ ܡܪܰܝܰܡܬܳܐ ܡܩܰܪܒܳܐ ܠܳܟ: ܟܰܕ ܡܪܰܡܪܶܡ ܐܰܢ̱ܬ ܠܩܰܪܢܳܐ ܕܝ̣ܠܳܗ̇ ܒܰܐܪܒܰܥ ܦܶܢ̈ܝܳܬܶܗ ܕܥܳܠܡܳܐ: ܘܰܡܗܰܕܰܪ ܐܰܢ̱ܬ ܠܟܶܢܫܳܐ ܕܰܒܢܶܝ̈ܗ̇ ܒܟܽܠܗܶܝܢ ܡܰܘ̈ܗܒܳܬܳܐ ܫܒܝ̣̈ܚܳܬܳܐ ܕܬܰܣܶܩܝ̱ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ: ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀