ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܟܰܠܶܠ ܡܳܪܝܳܐ ܒܰܟܠܝ̣̈ܠܶܐ ܕܟܰܝ̈ܳܐ ܠܪ̈ܝ̣ܫܶܐ ܡܶܬܝܰܕ̈ܥܳܢܶܐ ܘܡܶܬܪ̈ܰܓܫܳܢܶܐ ܕܢܰܦܫ̈ܳܬܰܢ ܘܰܕܦܰܓܪ̈ܰܝܢ: ܐܰܝܟܰܢܳܐ ܕܟܰܕ ܒܨܶܒ̈ܬܶܐ ܪ̈ܘ̣ܚܳܢܳܝܶܐ ܘܒܰܟܠܝ̣̈ܠܶܐ ܡܰܦܪ̈ܓܶܐ ܕܰܦ̇ܐܶܝܢ̣ ܠܥܰܕܥܺܐܕܳܐ ܪܰܒܳܐ ܕܦܶܨܚܳܐ ܩܰܕܝ̣ܫܳܐ ܡܶܨܛܰܒܬܝ̣ܢܰܢ: ܢ̇ܶܬܡܨܶܐ ܕܢ̇ܶܬܬܰܨܡܰܚ ܒܓܰܒܳܐ ܝܰܡܝ̣ܢܳܝܳܐ ܒܨܰܦܪܳܐ ܕܰܩܝܳܡܬܳܐ ܥܰܡ ܚܕܘ̣̈ܓܶܐ ܕܠܳܐ ܡܳܝܬܝ̣ܢ ܢ̇ܝܰܒܶܒ ܠܳܟ ܫܘ̣ܒܚܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܡܶܠܬܳܐ ܡܬܘ̣ܡܳܝܳܐ ܕܐܶܬ̣ܒܰܣܰܪ ܕܠܳܐ ܫܘ̣ܚܠܳܦܳܐ ܒܚܰܪܬܳܐ ܕܝܰܘܡ̈ܳܬܳܐ: ܘܶܐܬ̣ܕܰܡܝ̣ ܠܰܢ ܒܟܽܠ ܡܶܕܶܡ ܣܛܰܪ ܡ̣ܶܢ ܚܛܝ̣ܬܳܐ: ܠܗܰܘ̇ ܦܳܪܽܘ̣ܩܳܐ ܕܚܰܘܺܝ̣ ܒܰܩܢܘ̣ܡܶܗ ܐܘ̣ܪܚܳܐ ܕܦܘ̣ܪܩܳܢܳܐ ܠܓ݂ܶܢܣܳܐ ܐ̱ܢܳܫܳܝܳܐ: ܘܰܕܪܰܫ ܒܝܰܕ ܢܰܦܫܶܗ ܫܒܝ̣ܠܳܐ ܡܰܚܝܳܢܳܐ ܠܛܘ̣ܗܡܳܐ ܡܳܝܘ̣ܬܳܐ: ܠܗܰܘ̇ ܙܳܝܘ̣ܢܳܐ ܕܰܒܨܰܘܡܶܗ ܐܰܣܝ̣ ܠܝܰܥܢܘ̣ܬܳܐ ܕܰܙܟ̣ܳܬ݀ ܠܰܐܒܽܘܢ ܐܳܕܳܡ ܒܦܰܪܕܰܝܣܳܐ: ܘܰܒܕܰܪܶܗ ܙܰܟܝ̣ ܠܚܰܝܳܒܘ̣ܬܳܐ ܕܚܰܘܳܐ ܐܶܡܳܐ ܕܫܰܪ̈ܒܳܬܳܐ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܨܰܦܪܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܩܕܳܡܰܝܢ ܘܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܫܝ̣ܚܳܐ ܐܰܠܳܗܳܐ ܕܝ̣ܠܰܢ: ܗܰܘ̇ ܢܘ̣ܗܪܳܐ ܫܰܪܝ̣ܪܳܐ ܕܡ̣ܶܢ ܐܰܒܳܐ ܐܶܫ̣ܬܰܕܰܪ ܠܥܳܠܡܳܐ: ܗܰܘ̇ ܪܶܕܝܳܐ ܕܛܳܒ̈ܳܬܳܐ ܕܰܫ̣ܘܰܚ ܡ̣ܶܢ ܡܥܝ̣ܢܳܐ ܕܕܰܟܝܘ̣ܬܳܐ: ܗܰܘ̇ ܝܰܡܳܐ ܕܪ̈ܰܚܡܶܐ ܕܫܶܦܥ̈ܰܘܗ̱ܝ ܠܳܐ ܓܳܝ̇ܙܝ̣ܢ: ܗܰܘ̇ ܡܰܒܘ̣ܥܳܐ ܕܡܰܪܕܶܐ ܚܰܝ̈ܶܐ ܠܰܐܝܠܶܝܢ ܕܰܨܗܶܝܢ: ܗܰܘ̇ ܡܥܰܕܪܳܢܳܐ ܕܐܰܝܠܶܝܢ ܕܒܶܐܣܛܰܕܺܝܽܘܢ ܕܝ̣ܠܶܗ ܪܳܗܛܝ̣ܢ: ܘܰܡܣܰܝܥܳܢܳܐ ܕܰܐܝܠܶܝܢ ܕܒܰܫܡܶܗ ܡܶܬܓܰܘܣܝ̣ܢ: ܗܰܘ̇ ܕܰܠܡܘ̣ܟܳܟܳܐ ܕܝ̣ܠܶܗ ܨܶܒܝܳܢܳܝܳܐ ܡܶܛܽܠܳܬܰܢ ܐܶܬ̣ܬܰܚܬܝ̣: ܘܰܕܡܽܘ̣ܬܳܐ ܕܥܰܒܕܳܐ ܢܣ̣ܰܒ ܟܰܕ ܐܝ̣ܬܰܘܗ̱ܝ ܡܚܰܪܪܳܢܳܐ ܕܰܡܫܰܥܒ̈ܕܶܐ: ܗܰܘ̇ ܕܡ̣ܶܢ ܩܕܝ̣ܡ ܒܝܰܕ ܟܺܐܢ̈ܶܐ ܘܙܰܕܝ̣̈ܩܶܐ ܡܶܬܚܰܘܶܐ ܗ̱ܘܳܐ: ܘܡ̣ܶܢ ܢܒܺܝ̈ܶܐ ܡܶܬܛܰܦܰܣ ܗ̱ܘܳܐ: ܡܰܬܽܘܫܠܰܚ ܗܰܘ̇ ܟܺܐܢܳܐ ܘܰܬܪܝ̣ܨܳܐ ܒܕܰܟܝܘ̣ܬܳܐ ܘܩܰܕܝ̣ܫܘ̣ܬܳܐ ܐܶܬ̣ܢܰܨܰܚ: ܘܛܘ̣ܦܣܳܐ ܕܨܰܘܡܳܐ ܩܰܕܝ̣ܫܳܐ ܩ̣ܰܕܶܡ ܘܒ̣ܰܕܶܩ: ܘܫܺܝ̣ܬ ܗܰܘ̇ ܫܰܦܝ̣ܪܳܐ ܘܰܬܡܝ̣ܗܳܐ ܗܰܘ̇ ܕܰܠܪܶܓܬܳܐ ܒܝ̣ܫܬܳܐ ܡ̣ܶܢ ܦܰܓܪܶܗ ܒܝܰܕ ܨܰܘܡܳܐ ܕܰܥ̣ܶܟ: ܚܢܽܘܟ ܗܰܘ̇ ܕܡܶܛܽܠ ܢܝ̣ܚܘ̣ܬܶܗ ܐܶܬ̣ܚܛܶܦ ܠܰܫܡܰܝܳܐ: ܒܨܰܘܡܳܐ ܐܶܬ̣ܢܰܨܰܚ ܢܽܘܚ ܗܰܘ̇ ܙܰܕܝ̣ܩܳܐ ܘܡ̣ܶܢ ܛܰܘܦܳܢܳܐ ܐܶܫ̣ܬܰܘܙܰܒ: ܘܗܰܠ̣ܶܟ ܐܰܪܒܥܺܝ̣ܢ ܝܘܡ̈ܝ̣ܢ ܥܰܠ ܪ̈ܳܕܰܝܳܐ: ܒܕܰܟܝܘ̣ܬܳܐ ܐܶܬ̣ܓܰܢ̱ܒܰܪ ܡܰܠܟܝ̣ܙܕܶܩ ܗܰܘ̇ ܟܘ̣ܡܪܳܐ ܪܰܒܳܐ ܘܢܳܡܘ̣ܣܳܝܳܐ: ܗܰܘ̇ ܕܠܰܚܡܳܐ ܘܚܰܡܪܳܐ ܩ̣ܰܪܶܒ ܗ̱ܘܳܐ ܘܰܪܫ̣ܰܡ ܠܐ̱ܪܳܙܳܐ ܕܝ̣ܠܳܟ ܐܰܠܳܗܳܝܳܐ: ܒܨܰܘܡܳܐ ܐܰܒܪܳܗܳܡ ܐܶܬ̣ܥܰܙܝ̣ ܘܫ̣ܰܘܙܶܒ ܠܢܰܦܫܶܗ ܡ̣ܶܢ ܣܶܓܕܰܬ݀ ܦܬܰܟܪ̈ܶܐ: ܘܰܬܠܝ̣ܬܳܝܘ̣ܬܳܐ ܫ̣ܪܳܬ݀ ܒܒܰܝܬܶܗ: ܒܛܘ̣ܦܣܳܟ ܐܶܫ̣ܬܰܘܙܰܒ ܐܝ̣ܣܚܳܩ ܡ̣ܶܢ ܩܶܛܠܳܐ ܘܰܠܝܰܘܡܳܟ ܪܰܒܳܐ ܒܰܦܟܳܪ̈ܰܘܗ̱ܝ ܪܳܫܶܡ ܗ̱ܘܳܐ: ܘܝܽܘ̣ܩܢܳܐ ܠܨܰܘܡܳܐ ܩܰܕܝ̣ܫܳܐ ܚ̣ܰܘܺܝ̣ ܗ̱ܘܳܐ: ܒܨܰܘܡܳܐ ܐܶܬ̣ܦܰܠܰܛ ܠܽܘܛ ܡ̣ܶܢ ܝܰܩܕܳܢܳܐ ܕܰܣܕܽܘ̈ܡܳܝܶܐ: ܒܨܰܘܡܳܐ ܐܶܬ̣ܢܰܨܰܚ ܝܰܥܩܽܘܒ ܟܺܐܢܳܐ ܘܶܐܫ̣ܟܰܚ ܕܢ̣ܰܩܪܶܒ ܥܰܡ ܡܰܠܰܐܟܳܐ: ܒܨܰܘܡܳܐ ܐܶܬ̣ܟܰܠܰܠ ܒܢܰܟܦܘ̣ܬܳܐ ܬܡܝ̣ܗܬܳܐ ܝܰܘܣܶܦ ܘܒܶܗ ܙܟ̣ܳܐ ܠܪܶܓܬܳܐ ܒܬܰܘܘܳܢܳܐ: ܒܨܰܘܡܳܐ ܐܶܙܕܰܗܝ̣ ܡܽܘܫܶܐ ܢܒܺܝܳܐ ܘܐܰܚ̣ܶܬ ܦܘ̣ܩ̈ܕܳܢܶܐ ܠܥܰܡܳܐ ܛܳܠܘ̣ܡܳܐ: ܒܨܰܘܡܳܐ ܐܶܬ̣ܕܰܪܰܫ ܐܰܗܪܽܘܢ ܘܶܐܫ̣ܬܘܺܝ̣ ܗ̱ܘܳܐ ܕܶܐܣܛܠܳܐ ܟܳܗܢܳܝܬܳܐ ܢܶܠ̣ܒܰܫ: ܒܨܰܘܡܳܐ ܐܶܬ̣ܓܰܢ̱ܒܰܪ ܦܝ̣ܢܚܶܣ ܘܰܒܚܰܪܒܶܗ ܬܟ̣ܰܣ ܒܝ̣ܫܬܳܐ ܡ̣ܶܢ ܥܰܡܳܐ: ܒܨܰܘܡܳܐ ܐܶܬ̣ܟܰܫܰܪ ܝܶܫܽܘܥ ܒܰܪܢܽܘܢ ܘܰܒܗܰܝܡܳܢܘ̣ܬܳܐ ܣܚ̣ܰܦ ܫܘ̣ܪ̈ܶܝܗ̇ ܕܐܝ̣ܪܺܝ̣ܚܽܘ: ܒܨܰܘܡܳܐ ܐܶܙ̣ܕܰܝܰܢ ܢܰܦܬܰܚ ܘܶܐܪܰܥ ܠܰܩܪܳܒܳܐ ܕܰܥܡܳܠܝ̣̈ܩܳܝܶܐ ܘܰܢ̣ܨܰܚ ܒܶܗ: ܒܨܰܘܡܳܐ ܐܶܬ̣ܕܰܪܰܫ ܓܶܕܥܽܘܢ ܘܰܙܟ̣ܳܐ ܠܚܰܪܒܳܐ ܕܡܶܕ̈ܝܰܢܳܝܶܐ: ܒܨܰܘܡܳܐ ܐܶܬܝ̣ܗܶܒ ܫܡܽܘܐܝܶܠ ܠܰܥܩܰܪܬܳܐ ܘܰܒܨܰܘܡܶܗ ܕܰܟ̣ܝܶܗ ܘܥܰܒ̣ܕܶܗ ܢܒܺܝܳܐ: ܒܨܰܘܡܳܐ ܪܕܳܐ ܐܺܠܺܝܳܐ ܠܛܘ̣ܪܳܐ ܕܚܽܘܪܺܝܒ: ܘܒܶܗ ܢܣ̣ܰܒ ܫܘ̣ܠܛܳܢܳܐ ܕܢ̣ܶܐܣܘ̣ܪ ܠܰܫܡܰܝܳܐ: ܒܨܰܘܡܳܐ ܐܶܨܛܰܠܰܠ ܐܶܠܝ̣ܫܳܥ ܘܓܰܪ̈ܡܰܘܗ̱ܝ ܡܝ̣̈ܬܶܐ ܢܰܚ̣ܶܡܘ̱: ܒܨܰܘܡܳܐ ܐܶܫ̣ܬܰܘܙܰܒܘ̱ ܛܠܳܝ̈ܶܐ ܕܒܶܝܬ ܚܰܢܰܢܝܳܐ ܘܒܶܗ ܕܳܫ̣ܘ̱ ܥܰܠ ܓܘ̣ܡܪ̈ܶܐ ܕܫܰܠܗܶܒܝ̣ܬܳܐ: ܒܨܰܘܡܳܐ ܙܟ̣ܳܐ ܕܳܢܺܝ̣ܐܝܶܠ ܠܟܰܠܕ̈ܳܝܶܐ ܕܰܒܒܳܒܶܝܠ ܐܶܬ̣ܝܰܩܰܪ ܘܐܶܣ̣ܬܓܶܕ ܡ̣ܶܢ ܚܰܝ̈ܘܳܬܳܐ: ܒܨܰܘܡܳܐ ܐܶܬ̣ܥܢܝ̣ ܝܰܘܢܳܢ ܘܗܘ̣ ܕܰܠ̣ܝܶܗ ܡ̣ܶܢ ܝܰܡܳܐ: ܒܨܰܘܡܳܐ ܐܶܬ̣ܦܰܨܺܝ̣ ܐܶܪܰܡܝܳܐ ܡ̣ܶܢ ܓܘ̣ܒܳܐ ܕܰܣܝܳܢܳܐ: ܒܨܰܘܡܳܐ ܐܶܬ̣ܦܰܨܺܝ̣ܘ ܢܝ̣̈ܢܘܳܝܶܐ ܡ̣ܶܢ ܗܦܘ̣ܟܝܳܐ ܘܰܐܒܕܳܢܳܐ ܕܰܓ̣ܙܰܡ ܥܠܰܝܗܽܘܢ ܒܰܪ ܥܶܒܪ̈ܳܝܶܐ: ܒܨܰܘܡܳܐ ܫܩ̣ܰܠ ܚܰܙܩܺܝ̣ܐܝܶܠ ܥܰܘܠܳܐ ܕܰܒܢܰܝ̈ ܥܰܡܶܗ ܘܰܚ̣ܙܳܐ ܠܡܰܪܟܰܒܬܳܐ ܕܝ̣ܠܳܟ: ܒܨܰܘܡܳܐ ܐܶܬ̣ܥܰܢܘܺܝ̣ܘ ܫܠܝ̣̈ܚܶܐ ܩܰܕܝ̣̈ܫܶܐ ܘܒܶܗ ܐܶܫ̣ܬܘܺܝ̣ܘ ܠܰܡܩܰܒܳܠܘ̣ ܠܪܘ̣ܚܳܐ ܕܩܘ̣ܕܫܳܐ: ܒܨܰܘܡܳܐ ܢ̇ܩܝ̣ܡ ܢܳܛܘ̣ܪ̈ܶܐ ܠܦܘ̣ܡܰܢ: ܘܰܚܠܳܦ ܡܰܡܠ̱ܠܳܐ ܣܪܝ̣ܩܳܐ ܢ̣ܶܪ̈ܬܡܳܢ ܣܶܦ̈ܘܳܬܰܢ ܨܠܰܘ̈ܳܬܳܐ ܕܰܟܝ̈ܳܬܳܐ: ܒܨܰܘܡܳܐ ܢ̇ܛܰܟܶܣ ܬܰܪ̈ܥܶܐ ܠܶܐܕ̈ܢܰܝܢ: ܘܰܚܠܳܦ ܩ̈ܳܠܶܐ ܡܫܰܚ̈ܠܶܦܐ ܢ̇ܰܥܶܠ ܙܡܝ̣ܪ̈ܳܬܳܐ ܕܪܘ̣ܚܳܐ ܩܰܕܝ̣ܫܳܐ: ܒܨܰܘܡܳܐ ܢ̇ܚܰܝܶܨ ܪܰܦܝܘ̣ܬܰܢ ܠܘ̣ܩܒܰܠ ܨܶܢܥ̈ܳܬܶܗ ܕܒܝ̣ܫܳܐ: ܒܨܰܘܡܳܐ ܢ̇ܰܘܒܶܕ ܡܶܢܰܢ ܐܘ̣ܪ̈ܚܳܬܶܗ ܣܪ̈ܝ̣ܩܳܬܳܐ: ܒܨܰܘܡܳܐ ܢ̇ܙܰܗܶܐ ܢܰܦ̈ܫܳܬܰܢ: ܘܰܢ̇ܩܰܕܶܫ ܦܰܓܪ̈ܰܝܢ: ܘܥܰܡ ܙܘ̈ܳܕܶܐ ܛܳܒ̈ܶܐ ܘܕܘ̣ܒܳܪ̈ܶܐ ܡܝܰܬܪ̈ܶܐ ܢ̇ܶܫܬܘܶܐ ܠܦܶܨܚܳܐ ܩܰܕܝ̣ܫܳܐ ܚܢܰܢ ܘܥܰܢܝ̣̈ܕܰܝܢ: ܘܢ̇ܰܣܶܩ ܫܘ̣ܒܚܳܐ ܠܰܬܠܝ̣ܬܳܝܘ̣ܬܳܐ ܡܫܰܒܰܚܬܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܙܰܝܢܳܐ ܕܦܘ̣ܪܩܳܢܳܐ ܗܘܝ̣ ܠܰܢ ܡܫܝ̣ܚܳܐ ܦܳܪܘ̣ܩܰܢ: ܘܒܳܟ ܢ̇ܶܫܟܰܚ ܕܰܢ̇ܩܘ̣ܡ ܠܘ̣ܩܒܰܠ ܨܶܢܥ̈ܳܬܶܗ ܕܐܳܟܶܠܩܰܪܨܳܐ: ܘܢ̇ܶܫܬܰܘܙܰܒ ܡ̣ܶܢ ܣܰܓܺܝܽܐܘ̣ܬ ܢܶܟ̈ܠܰܘܗ̱ܝ ܘܠܘ̣ܬܳܟ̈ܰܘܗ̱ܝ: ܘܩܰܒܶܠ ܒܪܶܚܡܰܬ݀ ܐ̱ܢܳܫܘ̣ܬܳܟ ܠܥܶܛܪܳܐ ܗܳܢܳܐ ܗܰܢܺܝܳܐܐ ܕܡ̣ܶܢ ܒܨܺܝ̣ܪܘ̣ܬܰܢ ܡܶܬܩܰܪܰܒ ܠܐܝ̣ܩܳܪܳܐ ܕܰܐܠܳܗܘ̣ܬܳܟ: ܘܨܰܘܡܰܢ ܢ̣ܶܗܘܶܐ ܠܰܢܝܳܚܳܟ ܘܰܨܠܘ̣ܬܰܢ ܠܬܰܪܥܘ̣ܬܳܟ: ܘܰܐܫܘܳܐ ܕܕܰܟܝܳܐܝ̣ܬ ܘܩܰܕܝ̣ܫܳܐܝ̣ܬ ܢ̇ܡܰܢܰܥ ܥܰܡ ܪܘܳܙܳܐ ܘܚܰܕܘ̣ܬܳܐ ܠܫܰܘܬܳܦܘ̣ܬܳܐ ܕܦܶܨܚܳܐ ܩܰܕܝ̣ܫܳܐ: ܘܕܰܩܝܳܡܬܳܐ ܡܚܰܕܝܳܢܝ̣ܬܳܐ ܕܝ̣ܠܳܟ ܡܫܝ̣ܚܳܐ ܐܰܠܳܗܳܐ ܕܝ̣ܠܰܢ: ܘܢ̇ܰܘܕܶܐ ܘܢ̇ܶܣܓܘ̣ܕ ܠܳܟ ܣܓܝ̣ܕܳܐ ܕܠܳܐ ܫܘ̣ܪܳܝ ܕܪ̈ܘ̣ܚܳܢܶܐ ܣܳܓܕܝ̣ܢ ܠܶܗ ܘܦܰܓܪ̈ܳܢܶܐ ܡܙܰܝܚܝ̣ܢ ܠܶܗ: ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܠܥܳܠܡܝ̣ܢ܀