ܦܪܽܘ̣ܡܝܽܘܢ

ܬܶܫܒܘ̣ܚܬܳܐ: ܠܗܰܘ ܕܡܶܛܽܠ ܚܘ̣ܒܶܗ ܘܪܶܚܡܰܬ݀ ܐ̱ܢܳܫܘ̣ܬܶܗ ܐܶܬܗ̣ܰܦܰܟ ܥܰܡܰܢ ܡܕܰܒܪܳܢܳܐܝ̣ܬ: ܐܰܝܟ ܕܰܠܦܘ̣ܪܩܳܢܳܐ ܕܚܰܝ̈ܶܐ ܕܝ̣ܠܰܢ ܘܡ̈ܰܬܠܶܐ ܦܳܪ̈ܘ̣ܩܳܝܶܐ ܪܰܟܶܒ̣ܬ ܐܰܝܟ ܡܳܪܳܐ ܕܚܳܐܶܣ ܥܰܠ ܓܒܝ̣ܠܬܳܐ ܕܝ̣ܠܶܗ: ܘܐܶܡ̣ܰܪܬ ܠܰܢ ܒܰܣܒܰܪܬܳܟ ܦܳܪܘ̣ܩܳܝܬܳܐ ܕܐܶܬܬܥܝ̣ܪܘ̱ ܕܠܳܐ ܝܳܕ̇ܥܝ̣ܬܽܘܢ ܐܶܡܰܬܝ̱ ܐܳܬܶܐ ܚܰܬܢܳܐ: ܘܠܳܐ ܬ̣ܶܬܕܰܡܽܘܢ ܠܗܳܠܶܝܢ ܣܰܟ̈ܠܳܬܳܐ: ܕܠܳܟ ܡܦܝ̣ܣܝ̣ܢܰܢ ܡܫܝ̣ܚܳܐ ܐܰܠܳܗܳܐ ܕܝ̣ܠܰܢ: ܕܬ̣ܰܫܘܶܐ ܠܰܢ ܕܟܰܕ ܕܳܠ̇ܩܝ̣ܢ ܠܰܡܦܺܐܕܰܝ̈ܢ ܒܡܶܫܚܳܐ ܕܙܰܕܝ̣ܩܘ̣ܬܳܐ: ܢ̇ܶܦܘ̣ܩ ܠܐܘ̣ܪܥܳܐ ܕܡܶܐܬܝ̣ܬܳܟ ܗܳܝ̇ ܕܚܝ̣ܠܬܳܐ: ܘܥܰܡܳܟ ܒܟܶܢ̈ܫܶܐ ܕܩܰܕܝ̣̈ܫܰܝܟ ܢܶܥ̇ܘ̣ܠ ܠܰܓܢܘ̣ܢܳܐ ܗܰܘ ܡ̇ܠܶܐ̣ ܢܘ̣ܗܪܳܐ: ܘܐܰܟܚܕܳܐ ܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ: ܒܗܳܢܳܐ ܥܶܕܳܢܳܐ ܕܩܰܘܡܳܐ ܪܒܝ̣ܥܳܝܳܐ ܕܠܶܠܝܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒܢ̈ܶܐ ܘܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܫܝ̣ܚܳܐ ܐܠܳܗܳܐ ܕܝ̣ܠܰܢ: ܗܰܘ̇ ܕܰܒܝܰܕ ܡܶܬܓܰܠܝܳܢܘ̣ܬܳܟ ܕܒܰܒܣܰܪ ܥܰܠ ܨܶܒ̈ܬܶܐ ܫܒܝ̣̈ܚܶܐ: ܘܥܰܠ ܕܝ̣ܢܳܐ ܕܰܥܬܝ̣ܕ ܓܠ̣ܰܝܬ ܠܰܢ: ܝ̣ܚܝ̣ܕܳܝܳܐ ܡܶܠܬܳܐ ܗܰܘ̇ ܕܡܶܢ ܒܬܘ̣ܠܬܳܐ ܐܶܬܒܰܣ̣ܰܪܬ ܘܐܶܬܒܰܪܢܰܫ̣ܬ ܡܶܛܽܠܳܬܰܢ: ܘܥܰܠ ܗܳܕܶܐ ܠܰܒܬܘ̣ܠܘ̣ܬܳܐ ܥܰܠܝ̣ܬ ܘܪܰܡܪܶܡ̣ܬ ܘܕܳܡܝܰܬ݀ ܠܰܐܠܳܗܳܐ ܘܐ̱ܰܚܝܳܢܬܳܐ ܕܡܰܠܰܐܟ̈ܶܐ ܠܗܳܕܶܐ ܥܒ̣ܰܕܬ: ܘܡܰܠܟܘ̣ܬܳܐ ܫܡܰܝܳܢܝ̣ܬܳܐ ܒܰܒܬܘ̣̈ܠܳܬܳܐ ܦܰܚܶܡ̣ܬ: ܐܰܟܡܰܢ ܕܰܠܩܰܕܝ̣̈ܫܶܐ ܒܬܘ̣̈ܠܰܝ ܡܶܢ ܚܛܝ̣ܬܳܐ ܐܶܬܛܰܝܒ̣ܰܬ݀ ܘܐܶܬܡܰܠ̣ܟܰܬ݀ ܗܰܘ ܕܒܰܥܣܝ̣ܪܳܝܘ̣ܬ ܒܬܘ̣̈ܠܳܬܳܐ ܛܥܝ̣̈ܢܳܬ ܠܰܡ̈ܦܺܐܕܶܐ ܠܣܳܟܳܐ ܕܟܽܠܗܽܘܢ ܒܢܰܝ̈ܢܳܫܳܐ ܕܰܒܨܰܠܡܳܐ ܕܝ̣ܠܳܟ ܫܰܦܝ̣ܪܳܐ ܐܶܬܒܪܝ̣ܘ ܕܰܡܝ̣ܬ: ܟܰܕ ܠܗܳܢܽܘܢ ܡܰܢ ܒܰܚܡܝ̣ܫܳܝܘ̣ܬ ܪ̈ܶܓܫܶܐ ܦܠ̣ܰܚܘ̱ ܙܰܕܝ̣ܩܘ̣ܬܳܐ ܡܬܝ̣ܠܰܬ݀ ܒܡܶܫܚܳܐ ܒܚܰܟܝ̣̈ܡܳܬܳܐ ܛܰܦܶܣ̣ܬ: ܠܗܳܢܽܘܢ ܕܶܝܢ ܣܦܝ̣̈ܩܰܝ ܡ̣ܶܢ ܡܶܫܚܳܐ ܕܰܡܝܰܬܪܘ̣ܬܳܐ ܒܣܰܟ̈ܠܳܬܳܐ ܫ̣ܰܘܕܰܥ̣ܬ: ܘܡܶܛܽܠ ܚܘ̣ܝܳܕܳܟ ܘܪܶܚܡܰܬ݀ ܐ̱ܢܳܫܘ̣ܬܳܟ ܕܰܠܘܳܬ ܓܶܢܣܰܢ ܚܰܬܢܳܐ ܐܰܢ̱ܬ ܠܳܟ ܒܛܰܝܒܘ̣ܬܳܟ ܫܰܡ̣ܰܗܬ: ܘܰܠܙܰܒܢܳܐ ܗܰܘ̇ ܕܡܶܬܥܰܠܝܳܢܘ̣ܬܳܟ ܕܠܰܫܡܰܝܳܐ ܘܰܥܕܰܡܳܐ ܠܡܶܐܬܝ̣ܬܳܟ ܬܪܰܝܳܢܝ̣ܬܳܐ ܬܰܘܚܰܪܬܳܐ ܟܰܢܝ̣ܬ: ܟܰܕ ܠܡܰܘܬܳܐ ܗܰܘ̇ ܕܰܠܟܽܠܢܳܫ ܕܳܒܰܪ، ܢܰܘܡܬܳܐ ܘܕܰܡܟܘ̣ܬܳܐ ܐܰܪܶܙܬ: ܩܥܳܬܳܐ ܕܶܝܢ ܘܡܰܦܰܩܬܳܐ ܕܠܐܘ̣ܪܰܥ ܚܰܬܢܳܐ ܘܟܰܠܬܳܐ ܠܩܰܪܢܳܐ ܐ̱ܚܪܳܝܬܳܐ: ܘܒܰܪܬ ܩܳܠܳܐ ܕܪܝ̣ܫ ܡܰܠܰܐܟ̈ܶܐ ܘܰܩܝܳܡܬܳܐ ܕܡܶܢ ܩܰܒܪܳܐ ܕܟܽܠܢܳܫ ܐܰܘܕܰܥ̣ܬ: ܘܰܒܝܰܕ ܫܰܘܝܘ̣ܬܳܐ ܕܠܰܡ̈ܦܺܐܕܶܐ ܕܣܰܟ̈ܠܳܬܳܐ ܘܰܬܒܰܥܬܳܐ ܕܡܶܫܚܳܐ ܘܰܓܠܝ̣ܙܘ̣ܬܳܐ ܕܡܶܢܶܗ ܚܰܘܝ̣ܬ: ܐܰܝܟܰܢܳܐ ܕܟܽܠܢܳܫ ܒܰܥ̈ܒܳܕܶܐ ܕܰܥܒ̣ܰܕ ܗܳܪܟܳܐ ܩܳܐܶܡ ܩܕܳܡܰܝܟ ܟܺܐܢܳܐܝ̣ܬ: ܟܰܕ ܗܳܢܽܘܢ ܡܰܢ ܕܢܰܗܝ̣ܪܳܐܝ̣ܬ ܚ̣ܝܰܘ ܒܰܥ̈ܒܳܕܶܐ ܕܢܘ̣ܗܪܳܐ ܒܢܘ̣ܗܪܳܐ ܗܰܘ̇ ܡܰܦܪܓܳܐ ܘܥܰܬܝ̣ܪ ܒܨܶܡ̈ܚܶܐ ܡܶܬܓܰܐܝܶܢ: ܘܰܠܡܰܥܰܠܬܳܐ ܕܥܰܡܳܟ ܠܒܶܝܬ ܚܠܘ̣ܠܳܐ ܗܰܘ ܪܘ̣ܚܳܢܳܝܳܐ ܘܠܳܐ ܡܶܫܬܰܪܝܳܢܳܐ ܕܡܰܠܟܘ̣ܬܳܟ ܡܶܫܬܘܶܝܢ: ܗܳܢܽܘܢ ܕܶܝܢ ܕܰܚܫ̣ܶܟܘ̱ ܗ̣ܶܢܽܘܢ ܒܗܽܘܢ ܒܰܥ̈ܒܳܕܶܐ ܒܝ̣̈ܫܶܐ ܘܚܶܫܘ̣̈ܟܳܝܶܐ ܘܐܶܣܬܰܦܰܩܘ̱ ܠܰܡ̈ܦܺܐܕܶܐ ܕܢܰܦܫ̈ܳܬܗܽܘܢ ܡܶܢ ܡܶܫܚܳܐ ܕܰܡܝܰܬܪܘ̣ܬܳܐ ܒܚܶܫܘ̣ܟܳܐ ܒܰܪܳܝܳܐ ܡܶܫ̣ܬܰܢܩܝ̣ܢ: ܟܰܕ ܛܪܘ̣ܕܝܳܐ ܡܰܢ ܘܡܶܫܬܰܕܪܳܢܘ̣ܬܳܐ ܕܡܶܢ ܬܰܪܥܳܐ ܕܰܓܢܘ̣ܢܳܐ ܩܰܕܝ̣ܫܳܐ ܚܳܐܫܝ̣ܢ: ܒܰܕܓܽܘܢ ܡܦܝ̣ܣܝ̣ܢܰܢ ܠܳܟ ܐܰܠܳܗܳܐ ܡܪܰܚܡܳܢܳܐ ܘܚܰܬܢܳܐ ܕܰܫܪܳܪܳܐ ܗܰܘ ܕܩܳܪܶܐ ܠܥܰܡ̱̈ܡܶܐ ܘܥܳܠ̈ܡܶܐ ܠܰܚܠܘ̣ܠܶܗ ܫܒܝ̣ܚܳܐ: ܘܰܡܙܰܡܶܢ ܠܶܐܡ̈ܘܳܬܳܐ ܘܫܰܪ̈ܒܳܬܳܐ ܠܰܓܢܽܘܢܶܗ ܦܰܐܝܳܐ: ܒܝܰܕ ܥܶܛܪܳܐ ܗܳܢܳܐ ܕܒܶܣ̈ܡܶܐ ܕܰܡܩܰܪܒܝ̣ܢܰܢ ܩܕܳܡܰܝܟ ܕܰܒܠܶܠܝܳܐ ܕܗܳܘܝܳܐ ܩܥܳܬܳܐ ܕܡܶܐܬܝ̣ܬܳܟ ܙܝ̣ܥܬܳܐ: ܘܰܒܫܳܥܬܳܐ ܕܡܶܬܓܰܠܝܳܢܘ̣ܬܳܟ ܕܚܝ̣ܠܬܳܐ: ܡܳܐ ܕܰܡ̣ܛܳܬ݀ ܚܰܕܘ̣ܬܳܐ ܕܡܶܣܬܰܟܝܳܐ ܠܰܒܬܘ̣̈ܠܳܬܳܐ ܡܛܰܝ̈ܒܳܬܳܐ: ܘܩܶܪܒ̣ܰܬ݀ ܥܳܩܬܳܐ ܕܰܢܛܝ̣ܪܳܐ ܠܰܒܬܘ̣̈ܠܳܬܳܐ ܣܰܟ̈ܠܳܬܳܐ: ܘܨܳܦܚܳܐ ܘܐܳܬܝܳܐ ܡܶܢ ܫܶܠܝܳܐ ܫܳܥܬܳܐ ܕܡܶܐܬܝ̣ܬܳܟ: ܘܕܳܢܰܚ ܒܣܘ̣ܪܗܳܒܳܐ ܥܶܕܳܢܳܐ ܕܓܶܠܝܳܢܳܟ: ܡܳܐ ܕܗܳܘ̇ܝܳܐ ܩܥܳܬܳܐ ܙܝ̣ܥܬܳܐ ܩܕܳܡ ܡܰܚܬܬܳܐ ܕܪܰܒܘ̣ܬܳܟ: ܘܰܬܘܰܗܬܳܐ ܕܚܝ̣ܠܳܬܐ ܚܕܳܪ̈ܰܝ ܓܰܐܝܘ̣ܬܳܐ ܕܐܝ̣ܩܳܪܳܟ: ܡܳܐ ܕܢܳܦ̈ܩܳܢ ܚܰܟܝ̣̈ܡܳܬܳܐ ܟܰܕ ܓܰܠ̈ܝܳܢ ܐܰܦܰܝ̈ܗܶܝܢ: ܘܢܳܦ̈ܩܳܢ ܘܦܳܝ̈ܫܳܢ ܣܰܟ̈ܠܳܬܳܐ ܟܰܕ ܚܶܫܘ̣̈ܟܳܢ: ܡܳܐ ܕܰܒܓܰܠܝܘ̣ܬ ܐܰܦ̈ܶܐ ܚܰܟܝ̣̈ܡܳܬܳܐ ܒܳܟ ܦܳܓ̈ܥܳܢ ܘܰܒܒܶܗܬܰܬ݀ ܐܰܦ̈ܶܐ ܣܰܟ̈ܠܳܬܳܐ ܠܳܟ ܡܶܬ̣ܟܰܫ̈ܦܳܢ: ܡܳܐ ܕܚܰܟܝ̣ܡܘ̣ܬ ܚܰܟܝ̣̈ܡܳܬܳܐ ܐܰܝܟ ܢܘ̣ܗܪܳܐ ܕܳܢܚܳܐ ܘܣܰܟܠܘ̣ܬ ܣܰܟ̈ܠܳܬܳܐ ܐܰܝܟ ܚܶܫܘ̣ܟܳܐ ܥܳܡ̇ܛܳܐ: ܡܳܐ ܕܠܰܡ̈ܦܺܐܕܶܐ ܕܚܰܟܝ̣̈ܡܳܬܳܐ ܡܰܨܡܚܝ̣ܢ: ܘܰܫܪ̈ܳܓܶܐ ܕܣܰܟ̈ܠܳܬܳܐ ܕܰܥܝ̣ܟܝ̣ܢ: ܡܳܐ ܕܦܳܪܶܫ ܐܰܢ̱ܬ ܣܰܟ̈ܠܳܬܳܐ ܡ̣ܶܢ ܚܰܟܝ̣̈ܡܳܬܳܐ: ܘܛܳܪܶܕ ܐܰܢ̱ܬ ܠܚܶܫܘ̣̈ܟܳܬܳܐ ܡ̣ܶܢ ܢܰܗܝ̣ܪ̈ܳܬܳܐ: ܘܓܳܒܶܐ ܐܰܢ̱ܬ ܠܚܰܟܝ̣̈ܡܳܬܳܐ ܕܢܰܗܝ̣ܪ̈ܳܢ ܘܡܰܣܠܶܐ ܐܰܢ̱ܬ ܠܣܰܟ̈ܠܳܬܳܐ ܕܚܶܫܘ̣̈ܟܳܢ: ܡܳܐ ܕܡܶܬ̣ܦܰܨ̈ܚܳܢ ܚܰܟܝ̣̈ܡܳܬܳܐ ܠܘܳܬ ܢܘ̣ܗܪܗܶܝܢ: ܘܡܶܬ̣ܟܰܡܪ̈ܳܢ ܣܰܟ̈ܠܳܬܳܐ ܠܘܳܬ ܫܪ̈ܳܓܰܝܗܶܝܢ: ܡܳܐ ܕܡܶܫܬܰܘ̈ܝܳܢ ܡܛܰܝ̈ܒܳܬܳܐ ܠܡܰܥܰܠܬܳܐ ܘܦܳܝ̈ܫܳܢ ܡܰܗܡ̈ܝܳܢܝܳܬܳܐ ܒܒܶܗܬܬܳܐ: ܡܳܐ ܕܥܳܐܠ̈ܳܢ ܚܰܟܝ̣̈ܡܳܬܳܐ ܠܰܓܢܘ̣ܢܳܐ ܒܚܰܕܘ̣ܬܐܳ: ܘܡܶܬܬܚܶܕ ܬܰܪܥܳܐ ܒܰܐܦܰܝ̈ ܣܰܟ̈ܠܳܬܳܐ ܒܟܰܪܝܘ̣ܬܳܐ: ܡܳܐ ܕܡܶܫ̣̈ܟܚܳܢ ܣܰܟ̈ܠܳܬܳܐ ܠܬܰܪ̈ܥܶܐ ܕܰܓܢܘ̣ܢܳܐ ܕܐܰܚܝ̣ܕܝ̣ܢ: ܘܚܳܝܪ̈ܳܢ ܒܠܰܡ̈ܦܺܐܕܶܐ ܕܝ̣ܠܗܶܝܢ ܟܰܕ ܕܰܥܝ̣ܟܝ̣ܢ: ܡܳܐ ܕܕܳܝ̈ܨܳܢ ܚܰܟܝ̣̈ܡܳܬܳܐ ܒܰܓܢܘ̣ܢܳܐ: ܘܡܶܬܰܐܠ̈ܨܳܢ ܣܰܟ̈ܠܳܬܳܐ ܒܓܺܗܰܢܳܐ: ܡܳܐ ܕܚܳܙ̈ܝܳܢ ܠܳܟ ܚܰܟܝ̣̈ܡܳܬܳܐ ܒܬܶܫܒܘ̣ܚܬܳܐ ܘܩܳܪ̈ܝܳܢ ܠܳܟ ܣܰܟ̈ܠܳܬܳܐ ܒܚܶܢܓ̈ܳܬܳܐ: ܡܳܐ ܕܒܰܓܢܽܘܢ ܢܘ̣ܗܪܳܐ ܙܳܡܪ̈ܳܢ ܬܰܩ̈ܢܳܬܳܐ: ܘܰܠܒܰܪ ܡ̣ܶܢ ܬܰܪܥܳܐ ܒܳܟ̈ܝܳܢ ܣܰܟ̈ܠܳܬܳܐ: ܒܗܳܝ̇ ܫܳܥܬܳܐ ܕܚܝ̣ܠܬܳܐ ܘܙܝ̣ܥܬܳܐ ܡܳܪܝܳܐ܇ ܠܳܐ ܬ̣ܶܫܕܶܐ ܠܰܢ ܠܒܰܪ ܡܶܢ ܬܰܪܥܳܐ ܒܒܶܗܬܬܳܐ: ܠܐ ܬܰܕܥܶܟ ܠܰܫܪ̈ܳܓܶܐ ܕܢܰܦ̈ܫܳܬܰܢ ܒܡܶܫܬܘ̣ܬܳܐ: ܠܳܐ ܬܰܥ̣ܡܶܛ ܠܠܰܡ̈ܦܺܐܕܶܐ ܕܪ̈ܘ̣ܚܳܬܰܢ ܒܰܚܠܘ̣ܠܳܟ: ܠܳܐ ܬܶܐܚ̣ܘ̣ܕ ܒܰܐܦܰܝ̈ܢ ܬܰܪܥܶܗ ܕܰܓܢܽܘܢܳܟ: ܘܠܳܐ ܬ̣ܶܛܪܘ̣ܕ ܠܰܢ ܒܰܓ̈ܙܳܡܶܐ ܕܟܺܐܢܘ̣ܬܳܟ: ܐܶܠܳܐ ܐܫܘܳܐ ܠܰܢ ܒܛܰܝܒܘ̣ܬܳܟ ܕܢ̇ܶܐܪܘ̣ܥ ܠܫܳܥܬܳܐ ܕܓܷܠܝܳܢܳܟ: ܒܰܙܘ̈ܳܕܶܐ ܕܰܡܛܰܝܒܝ̣ܢ ܘܢܰܚ̈ܬܶܐ ܕܠܳܐ ܨܳܐܐܝ̣̈ܢ: ܒܰܫܪ̈ܳܓܶܐ ܕܢܰܗܝ̣ܪܝ̣ܢ ܘܠܰܡ̈ܦܺܐܕܶܐ ܕܠܳܐ ܕܳܥ̇ܟܝ̣ܢ: ܘܰܢ̇ܩܰܒܠܳܟ ܥܰܡ ܟܺܐܢ̈ܶܐ ܘܙܰܕܝ̣̈ܩܶܐ ܕܠܳܐ ܒܳܗܬܝ̣ܢ: ܘܢܶܙ̇ܡܰܪ ܫܘ̣ܒܚܳܟ ܥܰܡ ܙܡܝ̣̈ܢܶܐ ܘܰܚܕܘ̣̈ܓܷܐ ܕܠܳܐ ܡܳܝ̇ܬܝ̣ܢ: ܘܡܶܢ ܩܪ̈ܰܝܳܐ ܕܰܩ̣ܪܰܝܬ ܠܡܶܫܬܘ̣ܬܳܟ ܘܡܶܢ ܡܛܰܝ̈ܒܶܐ ܕܥܳܐܠܝ̣ܢ ܠܰܓܢܽܘܢܳܟ: ܘܡܶܢ ܣܡܝ̣̈ܟܶܐ ܕܚܳܕܶܝܢ ܒܰܣܡܳܟܳܟ: ܫܘ̣ܒܚܳܐ ܘܐܝ̣ܩܳܪܳܐ ܘܣܶܓܕܬܳܐ ܘܪܘ̣ܡܪܳܡܳܐ ܢ̇ܰܣܶܩ ܠܳܟ ܘܠܰܐܒܘ̣ܟ ܩܰܕܝ̣ܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܝܰܡܳܐ ܕܪ̈ܰܚܡܶܐ ܘܕܰܚܢܳܢܳܐ ܡܳܪܝܳܐ: ܗܰܘ ܕܰܒܫܶܦ̈ܥܶܐ ܕܛܰܝܒܘ̣ܬܳܟ ܠܳܐ ܡܶܬܡܰܠܠܳܢܝ̣ܬܳܐ ܠܰܐܠܝ̣̈ܨܶܐ ܘܰܠܡܰܛܰܪ̈ܦܶܐ ܕܡܶܬܓܰܘܣܝ̣ܢ ܐܰܡܝ̣ܢܳܐܝ̣ܬ ܒܰܡܪܰܚܡܳܢܘ̣ܬܳܟ ܡܰܪܘܰܚ ܐܰܢ̱ܬ: ܘܰܠܡܺܐܢܳܐ ܕܦܘ̣ܪܩܳܢܳܐ ܘܕܫܰܝܢܳܐ ܩܰܠܝ̣ܠܳܐ ܗܳܘܶܐ ܐܰܢ̱ܬ: ܐܰܢ̱ܬ ܐܳܦ ܗܳܫܳܐ ܡܳܪܝܳܐ ܗܘܝ̣ ܡܥܰܕܪܳܢܳܐ ܘ̣ܦܳܪܘ̣ܩܳܐ: ܒܝܰܕ ܥܶܛܪܳܐ ܗܳܢܳܐ ܕܒܶܣ̈ܡܶܐ ܠܟܽܠܗܽܘܢ ܐܰܝܠܶܝܢ ܕܥܰܡ ܗܰܝܡܳܢܘ̣ܬܳܐ ܠܰܠܡܺܐܢܳܐ ܕܥܺܕܬܳܟ ܩܰܕܝ̣ܫܬܳܐ ܐܶܬܡܰܢ̣ܰܥܘ̱: ܒܥ̱ܘ̣ܗܕܳܢܳܐ ܕܚܰܫܳܟ ܦܳܪܘ̣ܩܳܝܳܐ ܕܰܚܠܳܦܰܝ̣ܢ: ܡܳܪܰܢ ܘܰܐܠܳܗܰܢ ܠܥܳܠܡܝ̣ܢ܀