ܦܪܽܘ̣ܡܝܽܘܢ

ܬܶܫܒܘ̣ܚܬܳܐ: ܠܗܰܘ̇ ܢܳܨܘ̣ܒܳܗ̇ ܕܰܥܕܶܝܢ ܒܚܶܟܡܬܶܗ: ܕܟܰܪܡܳܐ ܡܠܝ̣ܠܳܐ ܨܒ̣ܳܐ ܘܰܫܬܰܠ ܒܰܐܪܥܳܐ ܒܰܐܬܪܳܐ ܫܰܡܺܝ̣ܢܳܐ: ܕܐܝ̣ܬܰܝܗܽܘܢ ܒܢܰܝ̈ ܐܝ̣ܣܪܳܐܝܶܠ ܒܛܰܝܒܘ̣ܬܶܗ: ܘܰܣܝܳܓܳܐ ܢܳܡܘ̣ܣܳܝܳܐ ܠܶܗ ܐܰܚ̣ܕܰܪ ܒܟܺܐܢܘ̣ܬܶܗ: ܘܰܒܢ̣ܳܐ ܒܶܗ ܡܰܓܕܠܳܐ ܕܢܳܛܘ̣ܪܘ̣ܬܳܐ ܕܦܘ̣̈ܩܕܳܢܶܐ ܒܰܚܢܳܢܶܗ: ܘܐܰܬ̣ܩܶܢ ܡܰܥܨܰܪܬܳܐ ܡܰܕܒܚܳܐ ܕܕܶܒܚ̈ܶܐ ܘܢܘ̣̈ܩܳܝܶܐ ܒܛܰܝܒܘ̣ܬܶܗ: ܘܐܰܩܝ̣ܡ ܒܶܗ ܢܒܺܝ̈ܶܐ ܕܢ̣ܰܡܛܪܽܘܢ ܠܶܗ ܡܶܛܪܳܐ ܕܝܘ̣ܠ̈ܦܳܢܶܐ ܕܚܰܝ̈ܶܐ ܒܚܰܝܘ̣ܣܬܳܢܘ̣ܬܶܗ ܘܐܰܫܠ̣ܡܶܗ ܠܦܰܠܳܚ̈ܶܐ ܣܳܦܪ̈ܶܐ ܘܟܳܗ̈ܢܶܐ ܕܢܶܦ̣ܠܚܘ̣ܢܳܝܗ̱ܝ ܐܰܝܟ ܨܶܒܝܳܢܶܗ: ܘܣܰܟܝ̣ ܠܥܶܢ̈ܒܶܐ ܘܰܥܒ̣ܰܕܘ̱ ܠܶܗ ܚܰܪ̈ܘ̣ܒܶܐ: ܘܰܒܥ̣ܳܐ ܡܶܢܶܗ ܦܺܐܪ̈ܶܐ ܕܙܰܕܝ̣ܩܘ̣ܬܳܐ ܘܪܰܘܒܳܐ ܥܰܠ ܝܳܪܬܶܗ ܥܒ̣ܰܕܘ̱ ܦܰܠܳܚ̈ܶܐ ܒܝ̣̈ܫܶܐ: ܘܰܕܡܶܗ ܠܒܰܪ ܡܶܢ ܟܰܪܡܳܐ ܙܰܠܚܘ̣ܗ̱ܝ ܘܐܰܗ̣ܶܠܘ̱ ܒܶܗ: ܕܠܶܗ ܠܗܰܘ̇ ܕܐܰܚ̣ܪܒܶܗ ܘܐܰܩܝ̣ܡ ܠܶܗ ܟܰܪܡܳܐ ܕܝܰܗ̣ܒ ܦܺܐܪ̈ܶܐ ܚܠܰܝ̈ܳܐ ܕܗܰܝܡܳܢܘ̣ܬܳܐ ܢ̇ܫܰܒܰܚ ܘܢܰܘ̇ܕܶܐ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܩܰܘܡܳܐ ܬܪܰܝܳܢܳܐ ܕܠܶܠܝܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒܢ̈ܶܐ ܘܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܠܳܟ ܫܘ̣ܒܚܳܐ ܘܠܳܟ ܬܰܘܕܝ̣ܬܳܐ ܐܰܠܳܗܳܐ ܡܶܠܬܳܐ ܕܡܶܢ ܐܰܒܳܐ ܐܫܬܰܕܰܪ ܠܦܘ̣ܪܩܳܢ ܒܶܪ̈ܝܳܬܳܐ ܕܝ̣ܠܶܗ: ܒܪܳܐ ܚܰܒܝ̣ܒܳܐ ܕܐܶܬ̣ܳܐ ܒܚܰܪܰܬ݀ ܙܰܒ̈ܢܶܐ ܠܡܶܣ̣ܥܰܪ ܟܰܪܡܳܐ ܕܰܢ̣ܨܰܒ ܠܶܗ ܐܰܒܘ̣ܗ̱ܝ ܒܩܰܪܢܳܐ ܕܐܰܬܪܳܐ ܫܰܡܝ̣ܢܳܐ: ܓܦܶܬܳܐ ܡܫܰܒܰܚܬܳܐ ܕܐܶܬ̣ܳܬ݀ ܕܬܶܬ̣ܢܨܶܒܝ̱ ܒܶܝܬ ܥܰܡ̱̈ܡܶܐ ܚܠܳܦ ܟܰܪܡܳܐ ܕܰܚ̣ܪܰܒ ܡܶܢ ܐܝ̣̈ܕܰܝ ܦܰܠܳܚ̈ܶܐ ܒܝ̣̈ܫܶܐ: ܕܰܝܳܢܳܐ ܟܺܐܢܳܐ ܕܰܓـܙܰܪ ܕܝ̣ܢܶܗ ܡܶܢܗܽܘܢ ܕܦܰܠܳܚ̈ܶܐ: ܘܒ̣ܰܕܶܩ ܠܗܽܘܢ ܥܰܠ ܐܰܒܕܳܢܗܽܘܢ ܘܥܰܠ ܦܰܠܳܚ̈ܶܐ ܕܰܥܬܝ̣ܕ ܗ̱ܘܳܐ ܕܰܢ̣ܩܝ̣ܡ ܚܠܳܦܰܝܗܽܘܢ: ܗܰܘ̇ ܕܐܶܬ̣ܳܐ ܒܙܰܒܢܳܐ ܕܦܺܐܪ̈ܶܐ ܘܠܳܐ ܐܶܫܟܰܚ ܐܶܠܳܐ ܚܰܪ̈ܘ̣ܒܶܐ ܒܟܰܪܡܶܗ ܘܐܰܘܕܰܥ ܥܰܠ ܢܰܦܫܶܗ ܕܗܘ̣ܝܘ̣ ܝܳܪܬܳܐ ܕܐܶܬ̣ܳܐ ܒܳܬܰܪ ܝܘ̣ܬܪܳܢܶܗ: ܘܰܥܕܳܐ ܕܚܰܝ̈ܶܐ ܕܝܰܕܥܘ̣ܗ̱ܝ ܒܢܰܝ̈ ܩܳܐܝܶܢ ܕܐܝ̣ܬܰܘܗ̱ܝ ܝܳܪܬܳܐ: ܘܐܶܬܚܰܫ̣ܰܒܘ̱ ܕܢ̣ܡܝ̣ܬܘ̣ܢܳܝܗ̱ܝ ܥܰܠ ܕܠܳܐ ܢ̣ܺܐܪܰܬ: ܙܰܟܳܝܳܐ ܒܕܝ̣ܢܶܗ ܕܚ̣ܰܝܶܒ ܐܶܢܽܘܢ ܠܦܰܠܳܚ̈ܶܐ ܥܕܝ̣̈ܠܶܐ ܒܰܓܙܳܪ ܕܝ̣ܢܗܽܘܢ: ܘܚܰܘܝ̣ ܠܗܽܘܢ ܕܗܘ̣ܝܘ̣ ܟܺܐܦܳܐ ܕܪܝ̣ܫ ܓܘ̣ܢܝܳܐ ܕܗܶܢܽܘܢ ܐܰܣܠܝ̣ܘ ܕܒܶܗ ܢ̣ܺܐܒܕܽܘܢ: ܚܰܒܝ̣ܒܳܐ ܕܚܰܘܝ̣ ܠܰܒܢܰܝ̈ ܩܳܐܝܶܢ ܚܘ̣ܒܶܗ ܘܡܰܓܳܢ ܗ̣ܶܢܽܘܢ ܣܢ̣ܰܐܘܽܘ̣ܗ̱ܝ: ܛܳܒܳܐ ܕܐܰܫܦ̣ܰܥ ܛܳܒ̈ܳܬܶܗ ܥܰܠ ܒܝ̣̈ܫܶܐ ܘܗ̣ܶܢܽܘܢ ܒܝ̣̈ܫܳܬܳܐ ܦܰܪܥܘ̣ܗ̱ܝ: ܝܳܪܬܶܗ ܕܐܰܒܳܐ ܕܐܶܬ̣ܳܐ ܕܦܺܐܪ̈ܶܐ ܚܠܰܝ̈ܳܐ ܢ̣ܶܣܰܒ ܡܶܢ ܟܰܪܡܶܗ: ܘܚܰܠܳܐ ܘܰܡܪܳܪ̈ܶܐ ܐܰܘܫ̣ܶܛܘ̱ ܠܶܗ ܦܰܠܳܚ̈ܶܐ ܠܝ̣̈ܛܶܐ: ܟܺܐܢܳܐ ܕܠܳܐ ܥܒ̣ܰܕ ܥܰܘܠܳܐ ܘܐܳܦܠܳܐ ܢܶܟܠܳܐ ܐܶܫܬ̣ܟܰܚ ܒܦܘ̣ܡܶܗ: ܕܥܰܡ ܥܰܘ̈ܳܠܶܐ ܚܰܝܒܘ̣ܗ̱ܝ ܠܩܶܛܠܳܐ ܩܳܐܝܶܢܳܝܳܐ: ܠܘ̣ܒܳܒܳܐ ܕܥܰܝܺܝ̣̈ܩܶܐ: ܘܐܳܣܝܳܐ ܕܰܟܪ̈ܝ̣ܗܶܐ: ܕܟܺܐܒ̈ܶܐ ܘܡܰܚ̈ܘܳܬܳܐ ܘܫܘ̣̈ܩܳܦܶܐ ܣܒ̣ܰܠ ܡ̣ܶܢ ܐܰܚܰܘ̈ܗ̱ܝ ܚܰܣ̈ܳܡܶܐ: ܡܳܪܳܐ ܕܟܽܠܳܐ ܕܐܶܙܕܰܒ̣ܰܢ ܡܶܢ ܬܰܠܡܝ̣ܕܶܗ: ܘܐܶܙܕܒ̣ܶܢ ܡܶܢ ܥܰܒ̈ܕܶܐ ܕܐܰܒܘ̣ܗ̱ܝ ܡܳܪ̈ܘ̣ܕܶܐ: ܢܘ̣ܚܳܡܳܐ ܘܚܰܝ̈ܶܐ ܕܐܰܚܝ̣ ܡܝ̣ܬܰܘ̈ܗ̱ܝ ܕܐܝ̣ܣܪܳܐܝܶܠ ܘܟܳܗ̈ܢܰܝ ܙܺܐܦܳܐ ܡܶܠܟܳܐ ܢܣ̣ܰܒܘ̱ ܥܠܰܘܗ̱ܝ ܐܰܝܟܰܢܳܐ ܕܰܢܡܝ̣ܬܘ̣ܢܳܝܗ̱ܝ ܘܢ̣ܺܐܒܰܕ ܫܡܶܗ: ܣܰܒܪܳܐ ܕܣܰܟܝ̣ܘ ܠܶܗ ܐܰܒܳܗ̈ܶܐ ܟܺܐܢ̈ܶܐ ܕܢܶܚ̣ܙܘ̣ܢܳܝܗ̱ܝ: ܕܰܒܢܰܝ̈ܳܐ ܡܡܰܪܡܪ̈ܳܢܶܐ ܥܰܬ̣ܶܕܘ̱ ܩܰܝܣܳܐ ܠܰܙܩܝ̣ܦܶܗ: ܥܶܩܳܪܶܗ ܕܐܺܝ̣ܫܰܝ ܘܓܘ̣ܙܥܳܐ ܕܡܶܢ ܝ̣ܗܘ̣ܕܳܐ ܕܐܶܬ̣ܳܐ ܠܰܡ̣ܚܰܕܳܬܘ̣ ܡܰܠܟܘ̣ܬܶܗ ܕܕܰܘܝ̣ܕ ܐܰܒܘ̣ܗ̱ܝ: ܘܰܒܢܰܝ̈ ܥܰܡܶܗ ܟܦ̣ܰܪܘ̱ ܒܶܗ ܘܰܚܠܳܦܰܘܗ̱ܝ ܓܰܝܳܣܳܐ ܫܶـܼܐܠܘ̱: ܦܳܪܘ̣ܩܳܐ ܕܐܶܬ̣ܳܐ ܠܦܘ̣ܪܩܳܢ ܥܰܡܶܗ ܘܥܰܡܳܐ ܩ̇ܫܶܐ̣ ܩܕܳܠܳܐ ܠܳܐ ܨܒ̣ܰܘ ܒܦܘ̣ܪܩܳܢܶܗ: ܨܶܡܚܶܗ ܕܐܰܒܳܐ ܕܐܶܬ̣ܳܐ ܕܢ̣ܰܢܗܰܪ ܠܚܶܫܘ̣̈ܟܶܐ: ܘܰܒܢܰܝ̈ ܠܶܠܝܳܐ ܒܠܶܠܝܳܐ ܟܰܕ ܐܰܚܝ̣ܕܝ̣ܢ ܦܰܢ̈ܳܣܶܐ ܘܠܰܡ̈ܦܺܐܕܶܐ ܐܶܬ̣ܰܘ ܠܰܡ̣ܕܰܥܳܟܘ̣ܬܶܗ: ܩܰܕܝ̣ܫܳܐ ܕܩ̣ܰܕܶܫ ܠܛܰܡ̈ܶܐܐ ܒܩܰܕܝ̣ܫܘ̣ܬܶܗ: ܘܢܳܣ̈ܒܰܝ ܒܰܐܦ̈ܶܐ ܒܩܶܛܠܶܗ ܐܶܬ̣ܛܰܡܰܐܘ: ܪܳܚܶܡ ܐ̱ܢܳܫ̈ܳܐ ܕܐܶܬ̣ܳܐ ܕܰܢ̣ܪܰܥܶܐ ܠܰܐܒܘ̣ܗ̱ܝ ܥܰܡ ܒܶܪ̈ܝܳܬܶܗ ܒܰܕܡܳܐ ܕܰܩܢܘ̣ܡܶܗ ܘܐܳܫ̈ܕܰܝ ܕܡܶܐ ܙܰܟܳܝ̈ܶܐ ܐܝܟ ܩܳܐܝܶܢ ܙܳܥ̣ܘ̱ ܘܢ̣ܳܕܘ̱ ܒܰܕܡܘ̣ܬ ܕܳܘܰܝ̈ܳܐ ܠܥܳܠܰܡ: ܫܰܝܢܳܐ ܫܡܰܝܳܢܳܐ ܕܐܶܬ̣ܳܐ ܢ̣ܡܰܠܶܠ ܫܠܳܡܳܐ ܥܰܡ ܥܰܡܶܗ: ܘܰܟܬܝ̣̈ܫܶܐ ܐܰܝܟ ܐܰܒܳܗܰܝ̈ܗܽܘܢ ܥܰܡܶܗ ܡ̣ܶܬܚܪܶܝܢ ܗ̱ܘܰܘ: ܬܗܘ̣ܡܳܐ ܕܪ̈ܰܚܡܶܐ ܕܐܰܓܝ̣ܚ ܝܰܡܳܐ ܕܥܘ̣ܕܪ̈ܳܢܰܘܗ̱ܝ ܥܰܠ ܣܢܝ̣̈ܩܶܐ: ܘܥܰܒ̈ܕܶܐ ܒܝ̣̈ܫܶܐ ܘܠܳܐ ܡܪ̈ܰܚܡܳܢܶܐ ܒܥܶܠܕܒܳܒܘ̣ܬܳܐ ܚܰܘܝ̣ܘ ܠܶܗ: ܡܫܝ̣ܚܳܐ ܐܰܚܝ̣ܕ ܟܽܠ ܕܐܶܬ̣ܳܐ ܠܕܝ̣ܠܶܗ ܘܕܝ̣ܠܶܗ ܠܳܐ ܩܰܒ̣ܠܘ̣ܗ̱ܝ: ܠܳܟ ܡܳܪܝ̱ ܕܩܰܒ̣ܶܠܢܳܟ ܒܡܰܕܥܰܝ̈ܢ: ܘܐܰܚܶܒ̣ܢܳܟ ܡܶܢ ܟܽܠܳܗ̇ ܢܰܦܫܰܢ: ܘܙܰܝܰܚ̣ܢܳܟ ܥܰܠ ܦܶܪ̈ܝܰܘܳܬܳܐ ܕܠܶܒܰܢ: ܘܟܰܪܡܳܐ ܚ̣ܰܕܬܳܐ ܒܛܰܝܒܘ̣ܬܳܐ ܒܰܐܪܥܳܐ ܕܒܘ̣̈ܣܳܡܶܐ ܢܨܰܒ̣ܬ ܠܰܢ: ܘܰܣܝܳܓܳܐ ܕܪ̈ܰܚܡܶܐ ܘܕܰܚܢܳܢܳܐ ܐܰܚ̣ܕܰܪܬ ܠܰܢ ܘܡܰܕܒܚܳܐ ܡܠܝ̣ܠܳܐ ܕܰܥܠܰܘܗ̱ܝ ܕܶܒܚ̈ܶܐ ܬܰܘܕܝ̣̈ܬܳܢܳܝܶܐ ܡܶܬܕܰܒܚܝ̣ܢ ܠܰܢ ܥܒ̣ܰܕܬ: ܘܡܰܓܕܠܳܐ ܕܪܰܘܡܶܗ ܒܰܫܡܰܝܳܐ ܠܰܢ ܒܢ̣ܰܝܬ: ܘܡܰܝ̈ܳܐ ܚܰܝ̈ܶܐ ܪ̈ܘ̣ܚܳܢܳܝܶܐ ܡ̣ܶܢ ܡܰܒܘ̣ܥܳܟ ܠܳܐ ܡܰܘܦܝܳܢܳܐ ܠܰܢ ܬܰܦܶܦ̣ܬ: ܐܰܫܘܳܐ ܠܰܢ ܕܶܝܢ ܡܳܪܝܳܐ ܕܐܰܝܟ ܕܝܳܐܶܐ ܠܡܳܪܘ̣ܬܳܟ ܢ̇ܩܰܪܶܒ ܠܳܟ ܥܶܢ̈ܒܶܐ ܚܰܠ̈ܝܳܬܳܐ ܕܰܡܚܰܕ̈ܝܳܢ ܠܡܳܪܘ̣ܬܳܟ ܘܕܰܟܝܳܐܝ̣ܬ ܢܶܦ̇ܠܘ̣ܚ ܠܳܟ: ܘܚܰܡܪܳܐ ܛܳܒܳܐ ܘܗܰܢܺܝܳܐܐ ܕܪܶܚܡܬܳܐ ܘܰܕܥܶܢ̈ܒܶܐ ܢܶܥ̇ܨܘ̣ܪ ܠܳܟ: ܘܦܺܐܪ̈ܶܐ ܕܟܰܝ̈ܳܐ ܘܰܕܠܳܐ ܡܘ̣ܡܳܐ ܪܘ̣ܚܳܢܳܐܝ̣ܬ ܢ̇ܚܰܘܶܐ ܠܳܟ: ܘܥܰܒ̈ܕܶܐ ܛܳܒ̈ܶܐ ܘܥܳܒ̈ܕܰܝ ܨܶܒܝܳܢܳܟ ܢܶܗ̇ܘܶܐ: ܟܰܕ ܡ̣ܶܢ ܟܽܠ ܢܶܟܠܳܐ ܕܰܒܢܰܝ̈ ܩܳܐܝܶܢ ܕܰܬ̣ܕܰܟܶܐ ܠܰܢ ܘܡܶܢ ܙܺܐܦܳܐ ܕܒܶܝܬ ܩܰܝܳܦܳܐ ܬܫ̣ܰܘܶܙܒ ܠܰܢ: ܘܡ̣ܶܢ ܚܘ̣̈ܫܳܒܶܐ ܥܰܡܝ̣̈ܩܶܐ ܕܢܳܣܒܰܝ̈ ܒܰܐܦ̈ܶܐ ܦܪ̈ܝ̣ܫܶܐ ܬ̣ܚܰܪܰܪ ܠܰܢ ܘܡܶܢ ܘܳܝ̈ܶܐ ܕܣܳܦܪ̈ܶܐ ܘܡܰܠ̈ܦܰܝ ܠܳܐ ܢܳܡܘ̣ܣܳܝ̈ܘܳܬܳܐ ܬ̣ܦܰܨܶܐ ܠܰܢ: ܘܡܶܢ ܓܰܒܪ̈ܶܐ ܐܳܫ̈ܕܰܝ ܕܡܳܐ ܘܢܳܟ̈ܠܰܝ ܢܶܟܠܳܐ ܬ̣ܢܰܛܰܪ ܠܰܢ: ܘܥܰܡ ܗܳܒܶܝܠ ܐܶܡܪܳܐ ܬܰܡܝ̣ܡܳܐ ܬܶܚ̣ܠܘ̣ܛ ܠܰܢ: ܘܥܰܡ ܓܰܝܳܣܳܐ ܕܡܶܢ ܝܰܡܝ̣ܢܳܟ ܥܰܡܳܟ ܒܡܰܠܟܘ̣ܬܳܟ ܒܰܣܶܡ ܠܰܢ: ܘܥܰܡ ܟܽܠ ܕܰܫܦ̣ܰܪܘ̱ ܠܨܶܒܝܳܢܳܟ: ܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ: ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܘܰܥܕܳܐ ܕܚܰܝ̈ܶܐ ܘܰܠܡܺܐܢܳܐ ܕܟܽܠ ܛܳܒ̈ܳܬܳܐ ܡܳܪܝܳܐ: ܕܒܳܟ ܡܶܬܬܢܝ̣ܚܝ̣ܢ ܥܳܡ̈ܠܶܐ ܘܠܰܐܝ̈ܳܐ ܘܰܡܛܰܪ̈ܦܶܐ: ܡܶܢ ܓܰܠ̱̈ܠܐܶ ܫܓܝ̣̈ܫܶܐ ܘܡܰܚܫܘ̣̈ܠܶܐ ܕܰܚܛܝ̣ܬܳܐ: ܩܰܒܶܠܳܝܗ̱ܝ ܠܦܝ̣ܪܡܳܐ ܗܳܢܳܐ ܕܩܰܪܶܒ̣ܢܰܢ ܩܕܳܡܰܝܟ: ܘܒܶܗ ܢ̇ܶܬܚܰܠܰܠ ܘܢ̇ܶܬܡܪܶܩ ܡܶܢ ܟܽܠ ܙܢܳܐ ܠܳܐ ܢܳܡܘ̣ܣܳܝܳܐ ܘܰܥܕܝ̣ܠܳܐ ܕܰܣܥ̣ܰܪܢܰܢ ܩܕܳܡܰܝܟ: ܘܐܰܫܘܳܐ ܠܰܢ ܕܢ̇ܶܬܡܰܢܰܥ ܒܛܰܝܒܘ̣ܬܳܟ ܡܫܰܝܢܳܐܝ̣ܬ ܠܰܠܡܺܐܢܳܐ ܕܢܘ̣ܗܪܳܐ ܗܰܘ ܕܛܰܝܶܒ̣ܬ ܠܗܳܢܽܘܢ ܕܦܰܠ̣ܚܘ̣ܟ ܒܩܘ̣ܫܬܳܐ: ܘܩܳܡ̣ܘ̱ ܩܕܳܡܰܝܟ ܒܙܰܗܝܘ̣ܬܳܐ: ܡܶܛܽܠ ܕܨܳܒܶܐ ܒܚܰܝ̈ܶܐ ܕܟܽܠܗܽܘܢ ܒܢܰܝ̈ܢܳܫܳܐ ܐܝ̣ܬܰܝܟ: ܘܠܳܟ ܫܘ̣ܒܚܳܐ ܡܰܣܩܝ̣ܢܰܢ: ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀