ܦܪܽܘ̣ܡܝܽܘܢ

ܫܽܘ̣ܒܚܳܐ ܕܠܳܐ ܒܳܛܶܠ: ܘܩܘ̣ܠܳܣܳܐ ܕܠܳܐ ܓܳܡܰܪ: ܘܬܰܘܕܝ̣ܬܳܐ ܕܠܳܐ ܡܰܘܦܝܳܐ: ܘܣܶܓܕܬܳܐ ܪܟܝ̣ܢܬܳܐ ܘܩܘ̣ܒܳܠ ܛܰܝܒܘ̣ܬܳܐ ܐܡܝ̣ܢܬܳܐ ܢ̇ܩܰܪܶܒ: ܠܗܰܘ̇ ܕܒܰܟܝܳܢܶܗ ܪܳܡ ܘܰܡܥܰܠܰܝ ܡ̣ܶܢ ܚܰܫ̈ܶܐ: ܘܒܰܒܣܰܪ ܠܚܰܫ̈ܶܐ ܒܨܶܒܝܳܢܶܗ ܐܶܬ̣ܩܰܪܰܒ: ܠܗܰܘ̇ ܪܳܡ ܡ̣ܶܢ ܡܰܘܬܳܐ ܕܡܝ̣ܬ ܒܰܦܓܰܪ ܘܰܚ̣ܝܳܐ ܒܪܘ̣ܚ ܐܰܝܟ ܕܰܨܒ̣ܳܐ: ܠܗܰܘ̇ ܡܳܪܳܗ̇ ܕܬܶܫܒܘ̣ܚܬܳܐ ܕܐܶܬܬ̣ܠܝ̣ ܒܰܙܩܝ̣ܦܳܐ ܐܰܝܟ ܚܰܝܳܒܳܐ: ܘܚܰܫܶܗ ܥ̣ܛܳܐ ܠܚܰܫܰܝ̈ܢ: ܘܡܰܘܬܶܗ ܒܰܛܠ ܠܥܘ̣ܩܣܶܗ ܕܡܰܘܬܳܐ ܡܶܢܰܢ: ܘܰܨܠܝ̣ܒܶܗ ܣܚ̣ܰܦ ܫܘ̣ܠܛܳܢܶܗ ܕܒܝ̣ܫܳܐ ܘܰܥ̣ܛܳܐ ܙܳܟܘ̣ܬܶܗ ܕܰܥܠܰܝܢ: ܘܦܰܪܣܝ̣ ܒܰܫܠܳܚ ܒܶܣܪܶܗ ܠܰܐܪ̈ܟܰܐܣ ܘܰܠܫܰܠܝ̣̈ܛܳܢܶܐ: ܕܥܰܠ ܐܰܦܰܝ̈ ܚܰܫܶܗ ܘܡܰܘܬܶܗ ܘܰܨܠܝ̣ܒܶܗ ܘܦܘ̣ܪܩܳܢܶܗ: ܩ̈ܳܠܶܐ ܕܬܰܘ̈ܕܝܳܬܳܐ ܢ̇ܕܰܒܰܚ ܩܕܳܡܰܘܗ̱ܝ: ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܣܘ̣ܬܳܪܳܐ: ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܘܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܐܰܠܳܗܳܐ ܡܪܰܚܡܳܢܳܐ ܘܰܕܚܝ̣ܠܳܐ ܕܐܶܬ̣ܗܰܦܰܟ ܥܰܡܰܢ ܠܬܘ̣ܪܳܨܰܢ ܡܕܰܒܪܳܢܳܐܝ̣ܬ: ܘܚܰܫ̣ ܒܰܒܣܰܪ ܡܶܛܽܠ ܦܘ̣ܪܩܳܢܰܢ ܨܶܒܝܳܢܳܐܝ̣ܬ: ܟܰܕ ܒܰܟܝܳܢܶܗ ܠܳܐ ܚܳܫܘ̣ܫܳܐ ܐܝ̣ܬܰܘܗ̱ܝ ܓܡܝ̣ܪܳܐܝ̣ܬ: ܘܐܰܠ̣ܶܦ ܠܰܢ ܕܰܠܚ̈ܰܫܶܐ ܕܰܚܛܝ̣ܬܳܐ ܢܶܡ̇ܪܘ̣ܩ ܘܰܢ̇ܕܰܟܶܐ ܡ̣ܶܢ ܢܰܦ̈ܫܳܬܰܢ ܟܽܠܳܢܳܐܝ̣ܬ: ܒܝܰܕ ܥܒܳܕ̈ܶܐ ܛܳܒ̈ܶܐ ܡܫܰܡܠܝܳܐܝ̣ܬ: ܘܰܒܠܶܒ̈ܰܘܳܬܳܐ ܫܦܰܝ̈ܳܐ ܢ̇ܰܙܥܶܩ ܘܢ̇ܺܐܡܰܪ ܦܨܝ̣ܚܳܐܝ̣ܬ: ܬܳܐ ܒܰܫܠܳܡܳܐ ܚܰܫܳܐ ܦܳܪܘ̣ܩܳܝܳܐ ܕܡ̣ܶܢ ܣܶܓܕܬܳܐ ܕܰܦܬܰܟܪ̈ܶܐ ܕܛܰܢܦܘ̣ܬܳܐ ܕܰܓܠܝ̣̈ܦܶܐ ܦܪܰܩ̣ܬ ܠܰܢ: ܒܪܝ̣ܟ ܐܰܢ̱ܬ ܚܰܫܳܐ ܦܳܪܘ̣ܩܳܝܳܐ ܕܡ̣ܶܢ ܨܢܝ̣ܥܘ̣ܬܳܐ ܘܰܢܟܝ̣ܠܘ̣ܬܳܐ ܕܒܝ̣ܫܳܐ ܫܰܘܙܶܒ̣ܬ ܠܰܢ: ܬܳܐ ܒܰܫܠܳܡܳܐ ܚܰܫܳܐ ܡܝܰܩܪܳܐ ܘܩܰܕܝ̣ܫܳܐ ܕܐܘ̣ܪܚܳܐ ܕܚܰܝ̈ܶܐ ܘܰܕܦܘ̣ܪܩܳܢܳܐ ܗ̣ܘܰܝܬ ܠܰܢ: ܒܪܝ̣ܟ ܐܰܢ̱ܬ ܚܰܫܳܐ ܦܳܪܘ̣ܩܳܝܳܐ ܘܩܰܕܝ̣ܫܳܐ: ܣܰܟܠ̈ܘܳܬܰܢ ܘܟܘ̣̈ܬܡܳܬܰܢ ܒܳܟ ܐܶܬܚܰܣܝ̣ܘ: ܫܠܳܡܠܳܟ ܚܰܫܳܐ ܦܳܪܘ̣ܩܳܝܳܐ ܘܩܰܕܝ̣ܫܳܐ ܕܰܡܚܝ̣ܠܘ̣ܬܰܢ ܒܳܟ ܐܶܬ̣ܚܰܝܨܰܬ݀ : ܘܪܰܦܝܘ̣ܬܰܢ ܒܳܟ ܐܶܫ̣ܬܰܪܪܰܬ݀ ܘܗܶܕܝܘ̣ܛܘ̣ܬܰܢ ܒܳܟ ܐܶܬܚܰܟ݂ܡܰܬ݀ : ܘܒܰܕܓܽܘܢ ܡܦܝ̣ܣܝ̣ܢܰܢ ܠܳܟ ܡܫܝ̣ܚܳܐ ܐܰܠܳܗܳܐ ܕܝ̣ܠܰܢ: ܕܚܰܫ̣ܬ ܒܰܒܣܰܪ ܡܶܛܽܠܳܬܰܢ ܕܬܰܫܘܶܐ ܠܟܽܠܰܢ ܕܢ̇ܶܚܰܫ ܒܚܰܫܳܟ ܘܢ̇ܶܛܥܰܢ ܠܨܰܥܪܳܟ: ܘܢ̇ܶܬܪܰܡܪܰܡ ܒܡܘ̣ܟܳܟܳܟ: ܘܢ̇ܶܫܬܰܒܗܰܪ ܒܰܙܩܝ̣ܦܳܟ: ܘܢ̣ܶܬܩܰܕ̈ܫܳܢ ܢܰܦܫ̈ܳܬܰܢ ܒܰܨܠܝ̣ܒܳܟ: ܘܢ̇ܶܗܘܶܐ ܙܡܝ̣̈ܢܶܐ ܒܰܚܠܘ̣ܠܳܟ ܘܰܚܕܽܘ̣̈ܓܶܐ ܒܡܶܫܬܘ̣ܬܳܟ: ܘܢ̇ܰܣܶܩ ܫܘ̣ܒܚܳܐ ܕܰܦ̇ܐܶܐ̣ ܠܐܝ̣ܩܳܪܳܟ ܘܬܰܘܕܝ̣ܬܳܐ ܕܡܶܬܬܚܝ̣ܒܳܐ ܠܡܳܪܘ̣ܬܳܟ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀