ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܪܳܥܝܳܐ ܛܳܒܳܐ ܕܝܰܗ̣ܒ ܢܰܦܫܶܗ ܠܩܶܛܠܳܐ: ܘܰܦ̣ܪܰܩ ܡܰܪܥܝ̣ܬܶܗ ܡ̣ܶܢ ܕܺܐܒ̈ܶܐ ܚܳܛܘ̣̈ܦܶܐ: ܠܗܰܘ̇ ܕܰܡܥܰܠܰܝ ܡ̣ܶܢ ܟܽܠܗܽܘܢ ܚܰܫ̈ܶܐ: ܘܡܶܛܽܠܳܬܰܢ ܗ̣ܘܳܐ ܬܚܶܝܬ ܚܰܫ̈ܶܐ ܒܰܒܣܰܪ: ܕܰܠܚܰܫ̈ܶܐ ܚܛܝ̣̈ܬܳܢܳܝܶܐ ܒܚܰܫܰܘ̈ܗ̱ܝ ܡܰܚ̈ܝܳܢܶܐ ܢܰܚ̣ܶܫ ܘܰܢ̣ܒܰܛܶܠ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܰܬܫܰܥܫܳܥܝ̣̈ܢ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒܢ̈ܶܐ ܘܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܳܪܝܳܐ ܕܒܐܝ̣̈ܕܰܝ ܚܰܛܳܝ̈ܶܐ ܐܶܫܬ̣ܠܶܡ ܕܰܠܥܰܒ̈ܕܶܐ ܕܰܚܛܝ̣ܬܳܐ ܢܚ̣ܰܪܰܪ: ܫܶܡܫܳܐ ܕܙܰܕܝ̣ܩܘ̣ܬܳܐ ܕܟܰܕ ܚܰܙܐܘܽܘ̣ܗ̱ܝ ܛܶܠܴ̈ܠܶܐ ܐܰܚ̣ܕܘ̣ܗ̱ܝ: ܕܰܠܢܰܦ̈ܫܳܬܳܐ ܕܚܶܫܘ̣̈ܟܳܢ ܢܰܢ̣ܗܰܪ: ܕܰܝܳܢܳܐ ܕܕܰܝ̈ܳܢܶܐ ܕܐܶܬ̣ܬܕܝ̣ܢ ܕܠܰܢ ܡ̣ܶܢ ܫܘ̣̈ܢܳܩܶܐ ܕܕܝ̣ܢܳܐ ܢܦ̣ܰܨܶܐ: ܓܰܢ̱ܒܳܪܳܐ ܕܥܳܠ̈ܡܶܐ ܕܐܶܬܶܐܣ̣ܰܪ ܕܠܰܢ ܡ̣ܶܢ ܐܰܣܘ̣ܪ̈ܶܐ ܕܚܰܣܝ̣̈ܢܶܐ ܢ̣ܦܰܠܶܛ: ܩܰܕܝ̣ܫܳܐ ܘܰܡܩܰܕܫܳܢܳܐ ܕܐܶܬ̣ܒܰܙܰܚ ܕܠܰܢ ܡ̣ܶܢ ܟܘ̣ܐܳܪܳܐ ܢ̣ܫܰܘܙܒܰܢ: ܡܰܠܟܳܐ ܕܡܰܠ̈ܟܶܐ ܕܐܶܬܩܰܦ̣ܰܚ ܕܠܰܒܢܰܝ̈ܢܳܫܳܐ ܚܰܕܘ̣ܬܳܐ ܢܫ̣ܰܟܶܢ: ܓܰܐܝܳܐ ܕܰܐܫܠ̣ܚܘ̣ܗ̱ܝ ܢܰܚ̈ܬܰܘܗ̱ܝ: ܕܠܰܢ ܡ̣ܶܢ ܟܘ̣̈ܬܡܳܬܳܐ ܘܰܚܒܳܪ̈ܳܬܳܐ ܢܰܫ̣ܠܰܚ: ܥܛܝ̣ܦ ܓܰܘܙܰܠܬܳܐ ܡܢܰܒܪܰܫܬܳܐ ܕܐܰܠܒ̣ܫܘ̣ܗ̱ܝ ܟܠܰܐܡܝ̣ܣ ܕܠܰܢ ܗܶܕܪܳܐ ܘܬܶܫܒܘ̣ܚܬܳܐ ܢܰܠ̣ܒܶܫ: ܡܫܰܒܚܳܐ ܕܐܶܨܛܰܥ̣ܰܪ ܕܠܰܢ ܐܝ̣ܩܳܪܳܐ ܢ̣ܶܬܶܠ: ܬܰܩܝ̣ܦܳܐ ܕܰܕܚܝ̣ܠ ܕܠܰܢ ܠܒܝ̣ܒܘ̣ܬܳܐ ܢ̣ܶܬܶܠ: ܐܰܠܳܗܳܐ ܕܨܰܠܝ̣ ܕܰܨܠܘ̣ܬܳܐ ܢܩ̣ܰܒܶܠ: ܒܰܣܝ̣ܡܳܐ ܕܐܶܫ̣ܬܝ̣ ܚܰܠܳܐ ܘܰܡܪܳܪ̈ܶܐ ܕܚܰܠܝܘ̣ܬܳܐ ܢ̣ܶܦܪܘ̣ܥ: ܡܪܰܝܡܳܐ ܕܐܶܨܛܠ̣ܶܒ ܕܠܰܚܛܝ̣ܬܳܐ ܢ̣ܶܨܠܘ̣ܒ: ܟܺܐܢܳܐ ܕܐܶܬ̣ܡܢܝ̣ ܥܰܡ ܥܰܘ̈ܳܠܶܐ ܕܠܰܢ ܥܰܡ ܩܰܕܝ̣̈ܫܶܐ ܢ̣ܛܰܟܶܣ: ܠܳܐ ܚܳܫܘ̣ܫܳܐ ܕܚ̣ܰܫ ܒܰܒܣܰܪ ܕܰܠܚܰܫ̈ܶܐ ܢ̣ܒܰܛܶܠ: ܠܳܐ ܡܳܝܘ̣ܬܳܐ ܕܡܝ̣ܬ ܒܰܦܓܰܪ ܕܰܠܡܰܘܬܳܐ ܢܶܫ̣ܪܶܐ: ܢܘ̣ܚܳܡܳܐ ܕܐܶܬܩܒ̣ܰܪ ܕܰܠܥܰܢܝ̣̈ܕܶܐ ܢ̣ܢܰܚܶܡ: ܠܳܟ ܡܫܝ̣ܚܳܐ ܐܰܠܳܗܰܢ ܕܗܳܠܶܝܢ ܟܽܠܗܶܝܢ ܡܶܛܽܠ ܦܘ̣ܪܩܳܢܰܢ ܣܒܰܠ̣ܬ ܘܣܰܝܒ̣ܰܪܬ: ܘܡܶܬܟܰܫܦܝ̣ܢܰܢ ܥܰܠ ܥܶܛܪܳܐ ܗܳܢܳܐ ܕܒܶܣ̈ܡܶܐ ܕܰܬ̣ܚܰܝܶܠ ܠܰܢ ܕܰܠܟܽܠܗܽܘܢ ܝܘ̣ܩܪ̈ܰܘܗ̱ܝ ܕܥܳܠܡܳܐ ܘܢܘ̣̈ܬܳܥܰܘܗ̱ܝ ܢܢܝ̣ܚ ܐܰܝܟܰܢܳܐ ܕܥܰܡܳܟ ܢܶܨ̇ܛܠܶܒ: ܘܣܰܝܰܥ ܠܰܢ ܕܰܠܟܽܠܗܽܘܢ ܚܰܫ̈ܶܐ ܘܰܪ̈ܓܝ̣ܓܳܬܳܐ ܚܢܰܢ ܒܰܢ ܢ̇ܡܘ̣ܬ: ܘܚܰܦܶܛ ܠܰܢ ܕܰܠܟܽܠܗܽܘܢ ܐܰܝܠܶܝܢ ܕܦܳܪ̈ܫܳܢ ܠܰܢ ܡ̣ܶܢ ܚܘ̣ܒܳܟ ܢܶܩ̇ܒܘ̣ܪ ܘܢ̇ܛܰܠܶܩ: ܐܰܝܟܰܢܳܐ ܕܥܰܡܳܟ ܢ̇ܶܬܩܒܰܪ: ܘܟܰܕ ܠܗܳܠܶܝܢ ܒܚܰܝܠܳܐ ܕܡܶܢܳܟ ܣܳܥ̇ܪܝ̣ܢܰܢ: ܘܰܒܝܰܕ ܥܘ̣ܕܪ̈ܳܢܰܝܟ ܡܫܰܡܠܝ̣ܢܰܢ: ܐܰܫܘܳܐ ܠܰܢ ܕܢ̇ܺܚܶܐ ܘܰܢ̇ܩܘ̣ܡ ܥܰܡܳܟ ܢ̇ܩܰܒܶܠ ܚܰܕܘ̣ܬܳܐ ܘܰܪܘܳܙܳܐ: ܘܰܚܠܳܦ ܨܰܥܪ̈ܶܐ ܘܛܘ̣ܪ̈ܳܦܶܐ ܘܥܰܡ̈ܠܶܐ ܕܡ̣ܶܢ ܗܳܪܟܳܐ: ܒܐܝ̣ܕܰܝ̈ܟ ܢܶܚ̇ܕܶܐ ܥܰܡ ܐܰܒܘ̣ܟ ܡܒܰܪܟܳܐ ܒܡܰܠܟܘ̣ܬܳܐ ܫܡܰܝܳܢܝ̣ܬܳܐ: ܘܢ̇ܶܬܗܰܕܰܪ ܒܝܰܕ ܪܘ̣ܚܳܟ ܩܰܕܝ̣ܫܳܐ ܘܥܰܡ ܓܒܰܝ̈ܳܐ ܕܝ̣ܠܳܟ ܒܰܡܛܰـܠ̱̈ـܠܶܐ ܕܢܘ̣ܗܪܳܐ ܐܰܫܘܳܐ ܠܰܢ: ܕܢܶܚ̇ܕܶܐ ܚܰܕܘ̣ܬܳܐ ܗܳܝ̇ ܠܳܐ ܡܶܫܬܰܪܝܳܢܝ̣ܬܳܐ ܘܬܰܡܳܢ ܢ̇ܕܰܒܰܚ ܠܳܟ ܡܩܰܒ̈ܠܳܬܳܐ: ܘܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ: ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܐܰܫܘܳܐ ܠܰܢ ܡܳܪܝܳܐ ܐܰܠܳܗܳܐ ܕܰܒܢܰܦܫܳܐ ܕܟܝ̣ܬܳܐ ܘܰܒܥܶܛܪܳܐ ܕܕܘ̣ܒܳܪ̈ܶܐ ܕܟܰܝ̈ܳܐ ܢ̇ܟܰܗܶܢ ܩܕܳܡܰܝܟ: ܟܰܕ ܠܒܝ̣ܫܝ̣ܢܰܢ ܚܘ̣ܒܳܟ ܘܰܡܥܰܛܦܝ̣ܢܰܢ ܫܪܳܪܳܟ: ܘܰܡܟܰܠܠܝ̣ܢܰܢ ܒܪܶܚܡܬܳܟ ܘܥܺܕܬܳܟ ܡܶܬܢܰܨܚܳܐ ܒܚܰܫܳܟ: ܘܡܶܫܬܰܒܗܪܳܐ ܒܰܙܩܝ̣ܦܘ̣ܬܳܟ ܘܚܳܕ̇ܝܳܐ ܒܢܘ̣ܚܳܡܳܟ: ܟܰܕ ܡܨܰܒܬܳܐ ܒܕܘ̣ܒܳܪ̈ܶܐ ܫܰܦܝ̣ܪ̈ܶܐ ܕܫܳܘܶܝܢ ܠܰܩܝܳܡܬܳܟ ܬ̣ܶܥܘ̣ܠܝ̱ ܥܰܡ ܟܽܠܗܽܘܢ ܝܰܠ̈ܕܶܝܗ̇ ܠܰܓܢܽܘܢܳܟ: ܘܒܚܰܕܳܐ ܫܰܘܝܘ̣ܬܳܐ ܬܶܣ̣ܬܓܶܕܝ̱ ܡܳܪܘ̣ܬܳܐ ܡ̣ܶܢ ܩܰܕܡܰܝ̈ܳܐ ܘܰܐ̱ܚܪ̈ܳܝܶܐ ܕܐܰܘܕܝ̣ܘ ܒܚܰܫܳܟ ܘܒܰܙܩܝ̣ܦܘ̣ܬܳܟ: ܡܫܝ̣ܚܳܐ ܣܰܒܪܳܐ ܕܚܰܝ̈ܶܐ ܕܝ̣ܠܰܢ ܘܦܳܪܘ̣ܩܳܐ ܕܢܰܦ̈ܫܳܬܰܢ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀